ဗန္ဓုဇီဝကဝဂ္ဂ

၁၆။ ဗန္ဓုဇီဝကဝဂ္ဂ

၁။ ဗန္ဓုဇီဝကတ္ထေရအပဒါန

၁။

‘‘စန္ဒံဝ ဝိမလံ သုဒ္ဓံ၊ ဝိပ္ပသန္နမနာဝိလံ။

နန္ဒီဘဝပရိက္ခီဏံ၊ တိဏ္ဏံ လောကေ ဝိသတ္တိကံ။

၂။

‘‘နိဗ္ဗာပယန္တံ ဇနတံ၊ တိဏ္ဏံ [ဒိသွာ (?)] တာရယတံ ဝရံ [တာရယတံ မုနိံ (သျာ။)]။

မုနိံ ဝနမှိ ဈာယန္တံ [ဝနသ္မိံ ဈာယမာနံ တံ (သီ။ သျာ။)]၊ ဧကဂ္ဂံ သုသမာဟိတံ။

၃။

‘‘ဗန္ဓုဇီဝကပုပ္ဖာနိ၊ လဂေတွာ သုတ္တကေနဟံ။

ဗုဒ္ဓဿ အဘိရောပယိံ၊ သိခိနော လောကဗန္ဓုနော။

၄။

‘‘ဧကတ္တိံသေ ဣတော ကပ္ပေ၊ ယံ ကမ္မမကရိံ တဒါ။

ဒုဂ္ဂတိံ နာဘိဇာနာမိ၊ ဗုဒ္ဓပူဇာယိဒံ ဖလံ။

၅။

‘‘ဣတော သတ္တမကေ ကပ္ပေ၊ မနုဇိန္ဒော မဟာယသော။

သမန္တစက္ခု နာမာသိ၊ စက္ကဝတ္တီ မဟဗ္ဗလော။

၆။

‘‘ပဋိသမ္ဘိဒါ စတဿော၊ ဝိမောက္ခာပိ စ အဋ္ဌိမေ။

ဆဠဘိညာ သစ္ဆိကတာ၊ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ဗန္ဓုဇီဝကော ထေရော ဣမာ ဂါထာယော အဘာသိတ္ထာတိ။

ဗန္ဓုဇီဝကတ္ထေရဿာပဒါနံ ပဌမံ။

၂။ တမ္ဗပုပ္ဖိယတ္ထေရအပဒါနံ

၇။

‘‘ပရကမ္မာယနေ ယုတ္တော၊ အပရာဓံ အကာသဟံ။

ဝနန္တံ အဘိဓါဝိဿံ၊ ဘယဝေရသမပ္ပိတော။

၈။

‘‘ပုပ္ဖိတံ ပါဒပံ ဒိသွာ၊ ပိဏ္ဍိဗန္ဓံ သုနိမ္မိတံ။

တမ္ဗပုပ္ဖံ ဂဟေတွာန၊ ဗောဓိယံ ဩကိရိံ အဟံ။

၉။

‘‘သမ္မဇ္ဇိတွာန တံ ဗောဓိံ၊ ပါဋလိံ ပါဒပုတ္တမံ။

ပလ္လင်္ကံ အာဘုဇိတွာန၊ ဗောဓိမူလေ ဥပါဝိသိံ။

၁၀။

‘‘ဂတမဂ္ဂံ ဂဝေသန္တာ၊ အာဂစ္ဆုံ မမ သန္တိကံ။

တေ စ ဒိသွာနဟံ တတ္ထ၊ အာဝဇ္ဇိံ ဗောဓိမုတ္တမံ။

၁၁။

‘‘ဝန္ဒိတွာန အဟံ ဗောဓိံ၊ ဝိပ္ပသန္နေန စေတသာ။

အနေကတာလေ ပပတိံ၊ ဂိရိဒုဂ္ဂေ ဘယာနကေ။

၁၂။

‘‘ဧကနဝုတိတော ကပ္ပေ၊ ယံ ပုပ္ဖမဘိရောပယိံ။

ဒုဂ္ဂတိံ နာဘိဇာနာမိ၊ ဗောဓိပူဇာယိဒံ ဖလံ။

၁၃။

‘‘ဣတော စ တတိယေ ကပ္ပေ၊ ရာဇာ သုသညတော အဟံ [သံထုသိတော အဟုံ (သီ။)]။

သတ္တရတနသမ္ပန္နော၊ စက္ကဝတ္တီ မဟဗ္ဗလော။

၁၄။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ တမ္ဗပုပ္ဖိယော ထေရော ဣမာ ဂါထာယော အဘာသိတ္ထာတိ။

တမ္ဗပုပ္ဖိယတ္ထေရဿာပဒါနံ ဒုတိယံ။

၃။ ဝီထိသမ္မဇ္ဇကတ္ထေရအပဒါနံ

၁၅။

‘‘ဥဒေန္တံ သတရံသိံဝ၊ ဣတရံသိံဝ [သိတရံသိံဝ (သီ။ သျာ။)] ဘာဏုမံ။

ပန္နရသေ ယထာ စန္ဒံ၊ နိယျန္တံ လောကနာယကံ။

၁၆။

‘‘အဋ္ဌသဋ္ဌိသဟဿာနိ၊ သဗ္ဗေ ခီဏာသဝါ အဟုံ။

ပရိဝါရိံသု သမ္ဗုဒ္ဓံ၊ ဒွိပဒိန္ဒံ နရာသဘံ။

၁၇။

‘‘သမ္မဇ္ဇိတွာန တံ ဝီထိံ၊ နိယျန္တေ လောကနာယကေ။

ဥဿာပေသိံ ဓဇံ တတ္ထ၊ ဝိပ္ပသန္နေန စေတသာ။

၁၈။

‘‘ဧကနဝုတိတော ကပ္ပေ၊ ယံ ဓဇံ အဘိရောပယိံ။

ဒုဂ္ဂတိံ နာဘိဇာနာမိ၊ ဓဇဒါနဿိဒံ ဖလံ။

၁၉။

‘‘ဣတော စတုတ္ထကေ ကပ္ပေ၊ ရာဇာဟောသိံ မဟဗ္ဗလော။

သဗ္ဗာကာရေန သမ္ပန္နော၊ သုဓဇော ဣတိ ဝိဿုတော။

၂၀။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ဝီထိသမ္မဇ္ဇကော ထေရော ဣမာ ဂါထာယော အဘာသိတ္ထာတိ။

ဝီထိသမ္မဇ္ဇကတ္ထေရဿာပဒါနံ တတိယံ။

၄။ ကက္ကာရုပုပ္ဖပူဇကတ္ထေရအပဒါနံ

၂၁။

‘‘ဒေဝပုတ္တော အဟံ သန္တော၊ ပူဇယိံ သိခိနာယကံ။

ကက္ကာရုပုပ္ဖံ ပဂ္ဂယှ၊ ဗုဒ္ဓဿ အဘိရောပယိံ။

၂၂။

‘‘ဧကတ္တိံသေ ဣတော ကပ္ပေ၊ ယံ ပုပ္ဖမဘိရောပယိံ။

ဒုဂ္ဂတိံ နာဘိဇာနာမိ၊ ဗုဒ္ဓပူဇာယိဒံ ဖလံ။

၂၃။

‘‘ဣတော စ နဝမေ ကပ္ပေ၊ ရာဇာ သတ္တုတ္တမော အဟုံ။

သတ္တရတနသမ္ပန္နော၊ စက္ကဝတ္တီ မဟဗ္ဗလော။

၂၄။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ကက္ကာရုပုပ္ဖပူဇကော ထေရော ဣမာ ဂါထာယော အဘာသိတ္ထာတိ။

ကက္ကာရုပုပ္ဖပူဇကတ္ထေရဿာပဒါနံ စတုတ္ထံ။

၅။ မန္ဒာရဝပုပ္ဖပူဇကတ္ထေရအပဒါနံ

၂၅။

‘‘ဒေဝပုတ္တော အဟံ သန္တော၊ ပူဇယိံ သိခိနာယကံ။

မန္ဒာရဝေန ပုပ္ဖေန၊ ဗုဒ္ဓဿ အဘိရောပယိံ။

၂၆။

‘‘သတ္တာဟံ ဆဒနံ အာသိ၊ ဒိဗ္ဗံ မာလံ တထာဂတေ။

သဗ္ဗေ ဇနာ သမာဂန္တွာ၊ နမသ္သိံသု တထာဂတံ။

၂၇။

‘‘ဧကတ္တိံသေ ဣတော ကပ္ပေ၊ ယံ ပုပ္ဖမဘိပူဇယိံ။

ဒုဂ္ဂတိံ နာဘိဇာနာမိ၊ ဗုဒ္ဓပူဇာယိဒံ ဖလံ။

၂၈။

‘‘ဣတော စ ဒသမေ ကပ္ပေ၊ ရာဇာဟောသိံ ဇုတိန္ဓရော။

သတ္တရတနသမ္ပန္နော၊ စက္ကဝတ္တီ မဟဗ္ဗလော။

၂၉။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ မန္ဒာရဝပုပ္ဖပူဇကော ထေရော ဣမာ ဂါထာယော အဘာသိတ္ထာတိ။

မန္ဒာရဝပုပ္ဖပူဇကတ္ထေရဿာပဒါနံ ပဉ္စမံ။

၆။ ကဒမ္ဗပုပ္ဖိယတ္ထေရအပဒါနံ

၃၀။

‘‘ဟိမဝန္တဿာဝိဒူရေ ၊ ကုက္ကုဋော နာမ ပဗ္ဗတော။

တမှိ ပဗ္ဗတပါဒမှိ၊ သတ္တ ဗုဒ္ဓါ ဝသန္တိ တေ။

၃၁။

‘‘ကဒမ္ဗံ ပုပ္ဖိတံ ဒိသွာ၊ ဒီပရာဇံဝ ဥဂ္ဂတံ။

ဥဘော ဟတ္ထေဟိ ပဂ္ဂယှ၊ သတ္တ ဗုဒ္ဓေ သမောကိရိံ။

၃၂။

‘‘စတုန္နဝုတိတော ကပ္ပေ၊ ယံ ပုပ္ဖမဘိရောပယိံ။

ဒုဂ္ဂတိံ နာဘိဇာနာမိ၊ ဗုဒ္ဓပူဇာယိဒံ ဖလံ။

၃၃။

‘‘ဒွေနဝုတေ ဣတော ကပ္ပေ၊ သတ္တာသုံ ပုပ္ဖနာမကာ။

သတ္တရတနသမ္ပန္နာ၊ စက္ကဝတ္တီ မဟဗ္ဗလာ။

၃၄။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ကဒမ္ဗပုပ္ဖိယော ထေရော ဣမာ ဂါထာယော အဘာသိတ္ထာတိ။

ကဒမ္ဗပုပ္ဖိယတ္ထေရဿာပဒါနံ ဆဋ္ဌံ။

၇။ တိဏသူလကတ္ထေရအပဒါနံ

၃၅။

‘‘ဟိမဝန္တဿာဝိဒူရေ ၊ ဘူတဂဏော နာမ ပဗ္ဗတော။

ဝသတေကော ဇိနော တတ္ထ၊ သယမ္ဘူ လောကနိဿဋော။

၃၆။

‘‘တိဏသူလံ ဂဟေတွာန၊ ဗုဒ္ဓဿ အဘိရောပယိံ။

ဧကူနသတသဟဿံ၊ ကပ္ပံ န ဝိနိပါတိကော။

၃၇။

‘‘ဣတော ဧကာဒသေ ကပ္ပေ၊ ဧကောသိံ ဓရဏီရုဟော။

သတ္တရတနသမ္ပန္နော၊ စက္ကဝတ္တီ မဟဗ္ဗလော။

၃၈။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ တိဏသူလကော ထေရော ဣမာ ဂါထာယော အဘာသိတ္ထာတိ။

တိဏသူလကတ္ထေရဿာပဒါနံ သတ္တမံ။

၈။ နာဂပုပ္ဖိယတ္ထေရအပဒါနံ

၃၉။

‘‘သုဝစ္ဆော နာမ နာမေန၊ ဗြာဟ္မဏော မန္တပါရဂူ။

ပုရက္ခတော သသိဿေဟိ၊ ဝသတေ ပဗ္ဗတန္တရေ။

၄၀။

‘‘ပဒုမုတ္တရော နာမ ဇိနော၊ အာဟုတီနံ ပဋိဂ္ဂဟော။

မမုဒ္ဓရိတုကာမော သော၊ အာဂစ္ဆိ မမ သန္တိကံ။

၄၁။

‘‘ဝေဟာသမှိ စင်္ကမတိ၊ ဓူပါယတိ ဇလတေ တထာ။

ဟာသံ မမံ ဝိဒိတွာန၊ ပက္ကာမိ ပါစိနာမုခေါ။

၄၂။

‘‘တဉ္စ အစ္ဆရိယံ ဒိသွာ၊ အဗ္ဘုတံ လောမဟံသနံ။

နာဂပုပ္ဖံ ဂဟေတွာန၊ ဂတမဂ္ဂမှိ ဩကိရိံ။

၄၃။

‘‘သတသဟဿိတော ကပ္ပေ၊ ယံ ပုပ္ဖံ ဩကိရိံ အဟံ။

တေန စိတ္တပ္ပသာဒေန၊ ဒုဂ္ဂတိံ နုပပဇ္ဇဟံ။

၄၄။

‘‘ဧကတ္တိံသေ ကပ္ပသတေ [ဧကတိံသေ ဣတော ကမ္မေ (သျာ။)]၊ ရာဇာ အာသိ မဟာရဟော။

သတ္တရတနသမ္ပန္နော၊ စက္ကဝတ္တီ မဟဗ္ဗလော။

၄၅။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ နာဂပုပ္ဖိယော ထေရော ဣမာ ဂါထာယော အဘာသိတ္ထာတိ။

နာဂပုပ္ဖိယတ္ထေရဿာပဒါနံ အဋ္ဌမံ။

၉။ ပုန္နာဂပုပ္ဖိယတ္ထေရအပဒါနံ

၄၆။

‘‘ကာနနံ ဝနမောဂယှ၊ ဝသာမိ လုဒ္ဒကော အဟံ။

ပုန္နာဂံ ပုပ္ဖိတံ ဒိသွာ၊ ဗုဒ္ဓသေဋ္ဌံ အနုဿရိံ။

၄၇။

‘‘တံ ပုပ္ဖံ ဩစိနိတွာန၊ သုဂန္ဓံ ဂန္ဓိတံ သုဘံ။

ထူပံ ကရိတွာ ပုလိနေ၊ ဗုဒ္ဓဿ အဘိရောပယိံ။

၄၈။

‘‘ဒွေနဝုတေ ဣတော ကပ္ပေ၊ ယံ ပုပ္ဖမဘိပူဇယိံ။

ဒုဂ္ဂတိံ နာဘိဇာနာမိ၊ ဗုဒ္ဓပူဇာယိဒံ ဖလံ။

၄၉။

‘‘ဧကမှိ နဝုတေ ကပ္ပေ၊ ဧကော အာသိံ တမောနုဒေါ။

သတ္တရတနသမ္ပန္နော၊ စက္ကဝတ္တီ မဟဗ္ဗလော။

၅၀။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ပုန္နာဂပုပ္ဖိယော ထေရော ဣမာ ဂါထာယော အဘာသိတ္ထာတိ။

ပုန္နာဂပုပ္ဖိယတ္ထေရဿာပဒါနံ နဝမံ။

၁၀။ ကုမုဒဒါယကတ္ထေရအပဒါနံ

၅၁။

‘‘ဟိမဝန္တဿာဝိဒူရေ၊ မဟာဇာတဿရော အဟု။

ပဒုမုပ္ပလသဉ္ဆန္နော၊ ပုဏ္ဍရီကသမောတ္ထဋော။

၅၂။

‘‘ကုကုတ္ထော နာမ နာမေန၊ တတ္ထာသိံ သကုဏော တဒါ။

သီလဝါ ဗုဒ္ဓိသမ္ပန္နော၊ ပုညာပုညေသု ကောဝိဒေါ။

၅၃။

‘‘ပဒုမုတ္တရော လောကဝိဒူ၊ အာဟုတီနံ ပဋိဂ္ဂဟော။

ဇာတဿရဿာဝိဒူရေ၊ သဉ္စရိတ္ထ မဟာမုနိ။

၅၄။

‘‘ဇလဇံ ကုမုဒံ ဆေတွာ၊ ဥပနေသိံ မဟေသိနော။

မမ သင်္ကပ္ပမညာယ၊ ပဋိဂ္ဂဟိ မဟာမုနိ။

၅၅။

‘‘တဉ္စ ဒါနံ ဒဒိတွာန၊ သုက္ကမူလေန စောဒိတော။

ကပ္ပါနံ သတသဟဿံ၊ ဒုဂ္ဂတိံ နုပပဇ္ဇဟံ။

၅၆။

‘‘သောဠသေတော ကပ္ပသတေ၊ အာသုံ ဝရုဏနာမကာ။

အဋ္ဌ ဧတေ ဇနာဓိပါ၊ စက္ကဝတ္တီ မဟဗ္ဗလာ။

၅၇။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ကုမုဒဒါယကော ထေရော ဣမာ ဂါထာယော အဘာသိတ္ထာတိ။

ကုမုဒဒါယကတ္ထေရဿာပဒါနံ ဒသမံ။

ဗန္ဓုဇီဝကဝဂ္ဂေါ သောဠသမော။

တဿုဒ္ဒါနံ –

ဗန္ဓုဇီဝေါ တမ္ဗပုပ္ဖီ၊ ဝီထိကက္ကာရုပုပ္ဖိယော။

မန္ဒာရဝေါ ကဒမ္ဗီ စ၊ သူလကော နာဂပုပ္ဖိယော။

ပုန္နာဂေါ ကောမုဒီ ဂါထာ၊ ဆပ္ပညာသ ပကိတ္တိတာတိ။