ဆတ္တဝဂ္ဂ

၁၅။ ဆတ္တဝဂ္ဂ

၁။ အတိဆတ္တိယတ္ထေရအပဒါန

၁။

‘‘ပရိနိဗ္ဗုတေ ဘဂဝတိ၊ အတ္ထဒဿီနရုတ္တမေ။

ဆတ္တာတိဆတ္တံ [ဆတ္တာဓိဆတ္တံ (သီ။)] ကာရေတွာ၊ ထူပမှိ အဘိရောပယိံ။

၂။

‘‘ကာလေန ကာလမာဂန္တွာ၊ နမသ္သိံ လောကနာယကံ [သတ္ထု စေတိယံ (သီ။)]။

ပုပ္ဖစ္ဆဒနံ ကတွာန၊ ဆတ္တမှိ အဘိရောပယိံ။

၃။

‘‘သတ္တရသေ ကပ္ပသတေ၊ ဒေဝရဇ္ဇမကာရယိံ။

မနုဿတ္တံ န ဂစ္ဆာမိ၊ ထူပပူဇာယိဒံ ဖလံ။

၄။

‘‘ပဋိသမ္ဘိဒါ စတဿော၊ ဝိမောက္ခာပိ စ အဋ္ဌိမေ။

ဆဠဘိညာ သစ္ဆိကတာ၊ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ အတိဆတ္တိယော [အဓိဆတ္တိယော (သီ။ သျာ။)] ထေရော ဣမာ ဂါထာယော အဘာသိတ္ထာတိ။

အတိဆတ္တိယတ္ထေရဿာပဒါနံ ပဌမံ။

၂။ ထမ္ဘာရောပကတ္ထေရအပဒါနံ

၅။

‘‘နိဗ္ဗုတေ လောကနာထမှိ၊ ဓမ္မဒဿီနရာသဘေ။

အာရောပေသိံ ဓဇတ္ထမ္ဘံ၊ ဗုဒ္ဓသေဋ္ဌဿ စေတိယေ။

၆။

‘‘နိဿေဏိံ မာပယိတွာန၊ ထူပသေဋ္ဌံ သမာရုဟိံ။

ဇာတိပုပ္ဖံ ဂဟေတွာန၊ ထူပမှိ အဘိရောပယိံ။

၇။

‘‘အဟော ဗုဒ္ဓေါ အဟော ဓမ္မော၊ အဟော နော သတ္ထု သမ္ပဒါ။

ဒုဂ္ဂတိံ နာဘိဇာနာမိ၊ ထူပပူဇာယိဒံ ဖလံ။

၈။

‘‘စတုန္နဝုတိတော ကပ္ပေ၊ ထူပသီခသနာမကာ။

သောဠသာသိံသု ရာဇာနော၊ စက္ကဝတ္တီ မဟဗ္ဗလာ။

၉။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ထမ္ဘာရောပကော ထေရော ဣမာ ဂါထာယော အဘာသိတ္ထာတိ။

ထမ္ဘာရောပကတ္ထေရဿာပဒါနံ ဒုတိယံ။

၃။ ဝေဒိကာရကတ္ထေရအပဒါနံ

၁၀။

‘‘နိဗ္ဗုတေ လောကနာထမှိ၊ ပိယဒဿီနရုတ္တမေ။

ပသန္နစိတ္တော သုမနော၊ မုတ္တာဝေဒိမကာသဟံ။

၁၁။

‘‘မဏီဟိ ပရိဝါရေတွာ၊ အကာသိံ ဝေဒိမုတ္တမံ။

ဝေဒိကာယ မဟံ ကတွာ၊ တတ္ထ ကာလင်္ကတော အဟံ။

၁၂။

‘‘ယံ ယံ ယောနုပပဇ္ဇာမိ၊ ဒေဝတ္တံ အထ မာနုသံ။

မဏီ ဓါရေန္တိ အာကာသေ၊ ပုညကမ္မဿိဒံ ဖလံ။

၁၃။

‘‘သောဠသိတော ကပ္ပသတေ၊ မဏိပ္ပဘာသနာမကာ။

ဆတ္တိံသာသိံသု [ဗာတ္တိံသာသိံသု (သီ။ သျာ။)] ရာဇာနော၊ စက္ကဝတ္တီ မဟဗ္ဗလာ။

၁၄။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ဝေဒိကာရကော ထေရော ဣမာ ဂါထာယော အဘာသိတ္ထာတိ။

ဝေဒိကာရကတ္ထေရဿာပဒါနံ တတိယံ။

၄။ သပရိဝါရိယတ္ထေရအပဒါနံ

၁၅။

‘‘ပဒုမုတ္တရော နာမ ဇိနော၊ လောကဇေဋ္ဌော နရာသဘော။

ဇလိတွာ အဂ္ဂိက္ခန္ဓောဝ၊ သမ္ဗုဒ္ဓေါ ပရိနိဗ္ဗုတော။

၁၆။

‘‘နိဗ္ဗုတေ စ မဟာဝီရေ၊ ထူပေါ ဝိတ္ထာရိကော အဟု။

ဒူရတောဝ [အဟောရတ္တံ (သီ။)၊ ထူပဒတ္တံ (သျာ။)] ဥပဋ္ဌေန္တိ၊ ဓါတုဂေဟဝရုတ္တမေ။

၁၇။

‘‘ပသန္နစိတ္တော သုမနော၊ အကံ စန္ဒနဝေဒိကံ။

ဒိဿတိ ထူပခန္ဓော စ [ဒီယတိ ဓူမက္ခန္ဓော စ (သီ။)၊ ဒီယတိ ဓူပဂန္ဓော စ (သျာ။)]၊ ထူပါနုစ္ဆဝိကော တဒါ။

၁၈။

‘‘ဘဝေ နိဗ္ဗတ္တမာနမှိ၊ ဒေဝတ္တေ အထ မာနုသေ။

ဩမတ္တံ မေ န ပဿာမိ၊ ပုဗ္ဗကမ္မဿိဒံ ဖလံ။

၁၉။

‘‘ပဉ္စဒသကပ္ပသတေ ၊ ဣတော အဋ္ဌ ဇနာ အဟုံ။

သဗ္ဗေ သမတ္တနာမာ တေ၊ စက္ကဝတ္တီ မဟဗ္ဗလာ။

၂၀။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ သပရိဝါရိယော ထေရော ဣမာ ဂါထာယော အဘာသိတ္ထာတိ။

သပရိဝါရိယတ္ထေရဿာပဒါနံ စတုတ္ထံ။

၅။ ဥမာပုပ္ဖိယတ္ထေရအပဒါနံ

၂၁။

‘‘နိဗ္ဗုတေ လောကမဟိတေ [လောကနာထမှိ (သီ။)]၊ အာဟုတီနံ ပဋိဂ္ဂဟေ။

သိဒ္ဓတ္ထမှိ ဘဂဝတိ၊ မဟာထူပမဟော အဟု။

၂၂။

‘‘မဟေ ပဝတ္တမာနမှိ၊ သိဒ္ဓတ္ထဿ မဟေသိနော။

ဥမာပုပ္ဖံ [ဥမ္မာပုပ္ဖံ (သဗ္ဗတ္ထ)] ဂဟေတွာန၊ ထူပမှိ အဘိရောပယိံ။

၂၃။

‘‘စတုန္နဝုတိတော ကပ္ပေ၊ ယံ ပုပ္ဖမဘိရောပယိံ။

ဒုဂ္ဂတိံ နာဘိဇာနာမိ၊ ထူပပူဇာယိဒံ [ပုပ္ဖပူဇာယိဒံ (သျာ။)၊ ဗုဒ္ဓပူဇာယိဒံ (က။)] ဖလံ။

၂၄။

‘‘ဣတော စ နဝမေ ကပ္ပေ၊ သောမဒေဝသနာမကာ။

ပဉ္စာသီတိသု ရာဇာနော၊ စက္ကဝတ္တီ မဟဗ္ဗလာ။

၂၅။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ဥမာပုပ္ဖိယော ထေရော ဣမာ ဂါထာယော အဘာသိတ္ထာတိ။

ဥမာပုပ္ဖိယတ္ထေရဿာပဒါနံ ပဉ္စမံ။

၆။ အနုလေပဒါယကတ္ထေရအပဒါနံ

၂၆။

‘‘အနောမဒဿီမုနိနော ၊ ဗောဓိဝေဒိမကာသဟံ။

သုဓါယ ပိဏ္ဍံ ဒတွာန၊ ပါဏိကမ္မံ အကာသဟံ။

၂၇။

‘‘ဒိသွာ တံ သုကတံ ကမ္မံ၊ အနောမဒဿီ နရုတ္တမော။

ဘိက္ခုသံဃေ ဌိတော သတ္ထာ၊ ဣမံ ဂါထံ အဘာသထ။

၂၈။

‘‘‘ဣမိနာ သုဓကမ္မေန၊ စေတနာပဏိဓီဟိ စ။

သမ္ပတ္တိံ အနုဘောတွာန၊ ဒုက္ခဿန္တံ ကရိဿတိ’။

၂၉။

‘‘ပသန္နမုခဝဏ္ဏောမှိ ၊ ဧကဂ္ဂေါ သုသမာဟိတော။

ဓါရေမိ အန္တိမံ ဒေဟံ၊ သမ္မာသမ္ဗုဒ္ဓသာသနေ။

၃၀။

‘‘ဣတော ကပ္ပသတေ အာသိံ၊ ပရိပုဏ္ဏေ အနူနကေ [ပရိပုဏ္ဏော အနူနကော (သျာ။)]။

ရာဇာ သဗ္ဗဃနော နာမ၊ စက္ကဝတ္တီ မဟဗ္ဗလော။

၃၁။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ အနုလေပဒါယကော ထေရော ဣမာ ဂါထာယော အဘာသိတ္ထာတိ။

အနုလေပဒါယကတ္ထေရဿာပဒါနံ ဆဋ္ဌံ။

၇။ မဂ္ဂဒါယကတ္ထေရအပဒါနံ

၃၂။

‘‘ဥတ္တရိတွာန နဒိကံ၊ ဝနံ ဂစ္ဆတိ စက္ခုမာ။

တမဒ္ဒသာသိံ သမ္ဗုဒ္ဓံ၊ သိဒ္ဓတ္ထံ ဝရလက္ခဏံ။

၃၃။

‘‘ကုဒါလ [ကုဒ္ဒါလ (သီ။ သျာ။)] ပိဋကမာဒါယ၊ သမံ ကတွာန တံ ပထံ။

သတ္ထာရံ အဘိဝါဒေတွာ၊ သကံ စိတ္တံ ပသာဒယိံ။

၃၄။

‘‘စတုန္နဝုတိတော ကပ္ပေ၊ ယံ ကမ္မမကရိံ တဒါ။

ဒုဂ္ဂတိံ နာဘိဇာနာမိ၊ မဂ္ဂဒါနဿိဒံ ဖလံ။

၃၅။

‘‘သတ္တပညာသကပ္ပမှိ၊ ဧကော အာသိံ ဇနာဓိပေါ။

နာမေန သုပ္ပဗုဒ္ဓေါတိ၊ နာယကော သော နရိဿရော။

၃၆။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ မဂ္ဂဒါယကော ထေရော ဣမာ ဂါထာယော အဘာသိတ္ထာတိ။

မဂ္ဂဒါယကတ္ထေရဿာပဒါနံ သတ္တမံ။

၈။ ဖလကဒါယကတ္ထေရအပဒါနံ

၃၇။

‘‘ယာနကာရော ပုရေ အာသိံ၊ ဒါရုကမ္မေ သုသိက္ခိတော။

စန္ဒနံ ဖလကံ ကတွာ၊ အဒါသိံ လောကဗန္ဓုနော။

၃၈။

‘‘ပဘာသတိ ဣဒံ ဗျမှံ၊ သုဝဏ္ဏဿ သုနိမ္မိတံ။

ဟတ္ထိယာနံ အဿယာနံ၊ ဒိဗ္ဗယာနံ ဥပဋ္ဌိတံ။

၃၉။

‘‘ပါသာဒါ သိဝိကာ စေဝ၊ နိဗ္ဗတ္တန္တိ ယဒိစ္ဆကံ။

အက္ခုဗ္ဘံ [အက္ခောဘံ (သီ။)] ရတနံ မယှံ၊ ဖလကဿ ဣဒံ ဖလံ။

၄၀။

‘‘ဧကနဝုတိတော ကပ္ပေ၊ ဖလကံ ယမဟံ ဒဒိံ။

ဒုဂ္ဂတိံ နာဘိဇာနာမိ၊ ဖလကဿ ဣဒံ ဖလံ။

၄၁။

‘‘သတ္တပညာသကပ္ပမှိ၊ စတုရော နိမ္မိတာဝှယာ။

သတ္တရတနသမ္ပန္နာ၊ စက္ကဝတ္တီ မဟဗ္ဗလာ။

၄၂။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ဖလကဒါယကော ထေရော ဣမာ ဂါထာယော အဘာသိတ္ထာတိ။

ဖလကဒါယကတ္ထေရဿာပဒါနံ အဋ္ဌမံ။

၉။ ဝဋံသကိယတ္ထေရအပဒါနံ

၄၃။

‘‘သုမေဓေါ နာမ နာမေန၊ သယမ္ဘူ အပရာဇိတော။

ဝိဝေကမနုဗြူဟန္တော၊ အဇ္ဈောဂဟိ မဟာဝနံ။

၄၄။

‘‘သဠလံ ပုပ္ဖိတံ ဒိသွာ၊ ဂန္ထိတွာန [ဗန္ဓိတွာန (သီ။)] ဝဋံသကံ။

ဗုဒ္ဓဿ အဘိရောပေသိံ၊ သမ္မုခါ လောကနာယကံ။

၄၅။

‘‘တိံသကပ္ပသဟဿမှိ ၊ ယံ ပုပ္ဖမဘိရောပယိံ။

ဒုဂ္ဂတိံ နာဘိဇာနာမိ၊ ဗုဒ္ဓပူဇာယိဒံ ဖလံ။

၄၆။

‘‘ဦနဝီသေ ကပ္ပသတေ၊ သောဠသာသုံ သုနိမ္မိတာ။

သတ္တရတနသမ္ပန္နာ၊ စက္ကဝတ္တီ မဟဗ္ဗလာ။

၄၇။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ဝဋံသကိယော ထေရော ဣမာ ဂါထာယော အဘာသိတ္ထာတိ။

ဝဋံသကိယတ္ထေရဿာပဒါနံ နဝမံ။

၁၀။ ပလ္လင်္ကဒါယကတ္ထေရအပဒါနံ

၄၈။

‘‘သုမေဓဿ ဘဂဝတော၊ လောကဇေဋ္ဌဿ တာဒိနော။

ပလ္လင္ကော ဟိ မယာ ဒိန္နော၊ သဥတ္တရသပစ္ဆဒေါ။

၄၉။

‘‘သတ္တရတနသမ္ပန္နော ၊ ပလ္လင္ကော အာသိ သော တဒါ။

မမ သင်္ကပ္ပမညာယ၊ နိဗ္ဗတ္တတိ သဒါ မမ။

၅၀။

‘‘တိံသကပ္ပသဟဿမှိ၊ ပလ္လင်္ကမဒဒိံ တဒါ။

ဒုဂ္ဂတိံ နာဘိဇာနာမိ၊ ပလ္လင်္ကဿ ဣဒံ ဖလံ။

၅၁။

‘‘ဝီသကပ္ပသဟဿမှိ၊ သုဝဏ္ဏာဘာ တယော ဇနာ။

သတ္တရတနသမ္ပန္နာ၊ စက္ကဝတ္တီ မဟဗ္ဗလာ။

၅၂။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ပလ္လင်္ကဒါယကော ထေရော ဣမာ ဂါထာယော အဘာသိတ္ထာတိ။

ပလ္လင်္ကဒါယကတ္ထေရဿာပဒါနံ ဒသမံ။

ဆတ္တဝဂ္ဂေါ ပန္နရသမော။

တဿုဒ္ဒါနံ –

ဆတ္တံ ထမ္ဘော စ ဝေဒိ စ၊ ပရိဝါရုမပုပ္ဖိယော။

အနုလေပေါ စ မဂ္ဂေါ စ၊ ဖလကော စ ဝဋံသကော။

ပလ္လင်္ကဒါယီ စ ဂါထာယော၊ ဆပ္ပညာသ ပကိတ္တိတာတိ။