သေရေယျဝဂ္ဂ

၁၃။ သေရေယျဝဂ္ဂ

၁။ သေရေယျကတ္ထေရအပဒါန

၁။

‘‘အဇ္ဈာယကော မန္တဓရော၊ တိဏ္ဏံ ဝေဒါန ပါရဂူ။

အဗ္ဘောကာသေ ဌိတော သန္တော၊ အဒ္ဒသံ လောကနာယကံ။

၂။

‘‘သီဟံ ယထာ ဝနစရံ၊ ဗျဂ္ဃရာဇံဝ နိတ္တသံ။

တိဓါပဘိန္နမာတင်္ဂံ၊ ကုဉ္ဇရံဝ မဟေသိနံ။

၃။

‘‘သေရေယျကံ ဂဟေတွာန၊ အာကာသေ ဥက္ခိပိံ [နိက္ခိပိံ (က။)] အဟံ။

ဗုဒ္ဓဿ အာနုဘာဝေန၊ ပရိဝါရေန္တိ သဗ္ဗသော [သဗ္ဗတော (သီ။)]။

၄။

‘‘အဓိဋ္ဌဟိ မဟာဝီရော၊ သဗ္ဗညူ လောကနာယကော။

သမန္တာ ပုပ္ဖစ္ဆဒနာ၊ ဩကိရိံသု နရာသဘံ။

၅။

‘‘တတော သာ ပုပ္ဖကဉ္စုကာ၊ အန္တောဝဏ္ဋာ ဗဟိမုခါ။

သတ္တာဟံ ဆဒနံ ကတွာ၊ တတော အန္တရဓါယထ။

၆။

‘‘တဉ္စ အစ္ဆရိယံ ဒိသွာ၊ အဗ္ဘုတံ လောမဟံသနံ။

ဗုဒ္ဓေ စိတ္တံ ပသာဒေသိံ၊ သုဂတေ လောကနာယကေ။

၇။

‘‘တေန စိတ္တပ္ပသာဒေန၊ သုက္ကမူလေန စောဒိတော။

ကပ္ပါနံ သတသဟဿံ၊ ဒုဂ္ဂတိံ နုပပဇ္ဇဟံ။

၈။

‘‘ပန္နရသသဟဿမှိ ၊ ကပ္ပါနံ ပဉ္စဝီသတိ။

ဝီတမလာ [စိတ္တမာလာ (သီ။)၊ ဝိလာမာလာ (သျာ။)] သမာနာ စ၊ စက္ကဝတ္တီ မဟဗ္ဗလာ။

၉။

‘‘ပဋိသမ္ဘိဒါ စတဿော၊ ဝိမောက္ခာပိ စ အဋ္ဌိမေ။

ဆဠဘိညာ သစ္ဆိကတာ၊ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ သေရေယျကော ထေရော ဣမာ ဂါထာယော အဘာသိတ္ထာတိ။

သေရေယျကတ္ထေရဿာပဒါနံ ပဌမံ။

၂။ ပုပ္ဖထူပိယတ္ထေရအပဒါနံ

၁၀။

‘‘ဟိမဝန္တဿာဝိဒူရေ ၊ ကုက္ကုရော နာမ [ကုက္ကုဋော နာမ (သီ။)] ပဗ္ဗတော။

ဝေမဇ္ဈေ တဿ ဝသတိ၊ ဗြာဟ္မဏော မန္တပါရဂူ။

၁၁။

‘‘ပဉ္စ သိဿသဟဿာနိ၊ ပရိဝါရေန္တိ မံ သဒါ။

ပုဗ္ဗုဋ္ဌာယီ စ တေ အာသုံ၊ မန္တေသု စ ဝိသာရဒါ။

၁၂။

‘‘ဗုဒ္ဓေါ လောကေ သမုပ္ပန္နော၊ တံ ဝိဇာနာထ နော ဘဝံ။

အသီတိဗျဉ္ဇနာနဿ၊ ဗာတ္တိံသဝရလက္ခဏာ။

၁၃။

‘‘ဗျာမပ္ပဘော ဇိနဝရော၊ အာဒိစ္စောဝ ဝိရောစတိ။

သိဿာနံ ဝစနံ သုတွာ၊ ဗြာဟ္မဏော မန္တပါရဂူ။

၁၄။

‘‘အဿမာ အဘိနိက္ခမ္မ၊ ဒိသံ ပုစ္ဆတိ သိဿကေ [ဗြာဟ္မဏော (သျာ။)]။

ယမှိ ဒေသေ မဟာဝီရော၊ ဝသတိ လောကနာယကော။

၁၅။

‘‘တာဟံ ဒိသံ နမဿိဿံ၊ ဇိနံ အပ္ပဋိပုဂ္ဂလံ။

ဥဒဂ္ဂစိတ္တော သုမနော၊ ပူဇေသိံ တံ တထာဂတံ။

၁၆။

‘‘ဧထ သိဿာ ဂမိဿာမ၊ ဒက္ခိဿာမ တထာဂတံ။

ဝန္ဒိတွာ သတ္ထုနော ပါဒေ၊ သောဿာမ ဇိနသာသနံ။

၁၇။

‘‘ဧကာဟံ အဘိနိက္ခမ္မ၊ ဗျာဓိံ ပဋိလဘိံ အဟံ။

ဗျာဓိနာ ဣဠိတော သန္တော၊ သာလံ ဝါသယိတုံ ဂမိံ။

၁၈။

‘‘သဗ္ဗေ သိဿေ သမာနေတွာ၊ အပုစ္ဆိံ တေ တထာဂတံ။

ကီဒိသံ လောကနာထဿ၊ ဂုဏံ ပရမဗုဒ္ဓိနော။

၁၉။

‘‘တေ မေ ပုဋ္ဌာ ဝိယာကံသု၊ ယထာ ဒဿာဝိနော တထာ။

သက္ကစ္စံ ဗုဒ္ဓသေဋ္ဌံ တံ၊ ဒေသေသုံ [ဒဿေသုံ (သီ။ သျာ။)] မမ သမ္မုခါ။

၂၀။

‘‘တေသာဟံ ဝစနံ သုတွာ၊ သကံ စိတ္တံ ပသာဒယိံ။

ပုပ္ဖေဟိ ထူပံ ကတွာန၊ တတ္ထ ကာလင်္ကတော အဟံ။

၂၁။

‘‘တေ မေ သရီရံ ဈာပေတွာ၊ အဂမုံ ဗုဒ္ဓသန္တိကံ။

အဉ္ဇလိံ ပဂ္ဂဟေတွာန၊ သတ္ထာရမဘိဝါဒယုံ။

၂၂။

‘‘ပုပ္ဖေဟိ ထူပံ ကတွာန၊ သုဂတဿ မဟေသိနော။

ကပ္ပါနံ သတသဟဿံ၊ ဒုဂ္ဂတိံ နုပပဇ္ဇဟံ။

၂၃။

‘‘စတ္တာလီသသဟဿမှိ ၊ ကပ္ပေ သောဠသ ခတ္တိယာ။

နာမေနဂ္ဂိသမာ နာမ၊ စက္ကဝတ္တီ မဟဗ္ဗလာ။

၂၄။

‘‘ဝီသကပ္ပသဟဿမှိ၊ ရာဇာနော စက္ကဝတ္တိနော။

ဃတာသနသနာမာဝ၊ အဋ္ဌတ္တိံသ မဟီပတီ။

၂၅။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ပုပ္ဖထူပိယော ထေရော ဣမာ ဂါထာယော အဘာသိတ္ထာတိ။

ပုပ္ဖထူပိယတ္ထေရဿာပဒါနံ ဒုတိယံ။

၃။ ပါယသဒါယကတ္ထေရအပဒါနံ

၂၆။

သုဝဏ္ဏဝဏ္ဏံ ။ပေ။။ ပုရက္ခတံ-ဧဝံ ဒုတိယန္တဝသေန သီ။ သျာ။ ပေါတ္ထကေသု ဒိဿတိ> ‘‘သုဝဏ္ဏဝဏ္ဏော သမ္ဗုဒ္ဓေါ၊ ဗာတ္တိံသဝရလက္ခဏော။

ပဝနာ [ပဓါနော (က။)] အဘိနိက္ခန္တော၊ ဘိက္ခုသံဃပုရက္ခတော [သုဝဏ္ဏဝဏ္ဏံ ။ပေ။။ ပုရက္ခတံ-ဧဝံ ဒုတိယန္တဝသေန သီ။ သျာ။ ပေါတ္ထကေသု ဒိဿတိ]။

၂၇။

‘‘မဟစ္စာ [သဟတ္ထာ (သျာ။ က။)] ကံသပါတိယာ၊ ဝဍ္ဎေတွာ ပါယသံ [ပါယာသံ (သျာ။ က။)] အဟံ။

အာဟုတိံ ယိဋ္ဌုကာမော သော၊ ဥပနေသိံ ဗလိံ အဟံ။

၂၈။

‘‘ဘဂဝါ တမှိ သမယေ၊ လောကဇေဋ္ဌော နရာသဘော။

စင်္ကမံ သုသမာရူဠ္ဟော၊ အမ္ဗရေ အနိလာယနေ။

၂၉။

‘‘တဉ္စ အစ္ဆရိယံ ဒိသွာ၊ အဗ္ဘုတံ လောမဟံသနံ။

ဌပယိတွာ ကံသပါတိံ၊ ဝိပသ္သိံ အဘိဝါဒယိံ။

၃၀။

‘‘တုဝံ ဒေဝေါသိ [ဗုဒ္ဓေါသိ (သျာ။)] သဗ္ဗညူ၊ သဒေဝေ သဟမာနုသေ။

အနုကမ္ပံ ဥပါဒါယ၊ ပဋိဂဏှ မဟာမုနိ။

၃၁။

‘‘ပဋိဂ္ဂဟေသိ ဘဂဝါ၊ သဗ္ဗညူ လောကနာယကော။

မမ သင်္ကပ္ပမညာယ၊ သတ္ထာ လောကေ မဟာမုနိ [အနုတ္တရော (သျာ။)]။

၃၂။

‘‘ဧကနဝုတိတော ကပ္ပေ၊ ယံ ဒါနမဒဒိံ တဒါ။

ဒုဂ္ဂတိံ နာဘိဇာနာမိ၊ ပါယသဿ [ပါယာသဿ (သျာ။ က။)] ဣဒံ ဖလံ။

၃၃။

‘‘ဧကတာလီသိတော ကပ္ပေ၊ ဗုဒ္ဓေါ နာမာသိ ခတ္တိယော။

သတ္တရတနသမ္ပန္နော၊ စက္ကဝတ္တီ မဟဗ္ဗလော။

၃၄။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ပါယသဒါယကော [ပါယာသဒါယကော (သျာ။ က။)] ထေရော ဣမာ ဂါထာယော အဘာသိတ္ထာတိ။

ပါယသဒါယကတ္ထေရဿာပဒါနံ တတိယံ။

၄။ ဂန္ဓောဒကိယတ္ထေရအပဒါနံ

၃၅။

‘‘နိသဇ္ဇ ပါသာဒဝရေ၊ ဝိပသ္သိံ အဒ္ဒသံ ဇိနံ။

ကကုဓံ ဝိလသန္တံဝ၊ သဗ္ဗညုံ တမနာသကံ [သဗ္ဗညုတ္တမနာယကံ (သျာ။)၊ သဗ္ဗညုတမနာသဝံ (က။)]။

၃၆။

‘‘ပါသာဒဿာဝိဒူရေ စ၊ ဂစ္ဆတိ လောကနာယကော။

ပဘာ နိဒ္ဓါဝတေ တဿ၊ ယထာ စ သတရံသိနော။

၃၇။

‘‘ဂန္ဓောဒကဉ္စ ပဂ္ဂယှ၊ ဗုဒ္ဓသေဋ္ဌံ သမောကိရိံ။

တေန စိတ္တပ္ပသာဒေန၊ တတ္ထ ကာလင်္ကတော အဟံ။

၃၈။

‘‘ဧကနဝုတိတော ကပ္ပေ၊ ယံ ဂန္ဓောဒကမာကိရိံ။

ဒုဂ္ဂတိံ နာဘိဇာနာမိ၊ ဗုဒ္ဓပူဇာယိဒံ ဖလံ။

၃၉။

‘‘ဧကတ္တိံသေ ဣတော ကပ္ပေ၊ သုဂန္ဓော နာမ ခတ္တိယော။

သတ္တရတနသမ္ပန္နော၊ စက္ကဝတ္တီ မဟဗ္ဗလော။

၄၀။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ဂန္ဓောဒကိယော ထေရော ဣမာ ဂါထာယော အဘာသိတ္ထာတိ။

ဂန္ဓောဒကိယတ္ထေရဿာပဒါနံ စတုတ္ထံ။

၅။ သမ္မုခါထဝိကတ္ထေရအပဒါနံ

၄၁။

‘‘ဇာယမာနေ ဝိပဿိမှိ၊ နိမိတ္တံ ဗျာကရိံ အဟံ။

‘နိဗ္ဗာပယိဉ္စ [နိဗ္ဗာပယံ စ (သီ။ သျာ။)၊ နိဗ္ဗာပယန္တော (?)] ဇနတံ၊ ဗုဒ္ဓေါ လောကေ ဘဝိဿတိ။

၄၂။

‘‘‘ယသ္မိဉ္စ ဇာယမာနသ္မိံ၊ ဒသသဟဿိ ကမ္ပတိ။

သော ဒါနိ ဘဂဝါ သတ္ထာ၊ ဓမ္မံ ဒေသေတိ စက္ခုမာ။

၄၃။

‘‘‘ယသ္မိဉ္စ ဇာယမာနသ္မိံ၊ အာလောကော ဝိပုလော အဟု။

သော ဒါနိ ဘဂဝါ သတ္ထာ၊ ဓမ္မံ ဒေသေတိ စက္ခုမာ။

၄၄။

‘‘‘ယသ္မိဉ္စ ဇာယမာနသ္မိံ၊ သရိတာယော န သန္ဒယုံ [သန္ဒိသုံ (သီ။ သျာ။)]။

သော ဒါနိ ဘဂဝါ သတ္ထာ၊ ဓမ္မံ ဒေသေတိ စက္ခုမာ။

၄၅။

‘‘‘ယသ္မိဉ္စ ဇာယမာနသ္မိံ၊ အဝီစဂ္ဂိ န ပဇ္ဇလိ။

သော ဒါနိ ဘဂဝါ သတ္ထာ၊ ဓမ္မံ ဒေသေတိ စက္ခုမာ။

၄၆။

‘‘‘ယသ္မိဉ္စ ဇာယမာနသ္မိံ၊ ပက္ခိသံဃော န သံစရိ။

သော ဒါနိ ဘဂဝါ သတ္ထာ၊ ဓမ္မံ ဒေသေတိ စက္ခုမာ။

၄၇။

‘‘‘ယသ္မိဉ္စ ဇာယမာနသ္မိံ၊ ဝါတက္ခန္ဓော န ဝါယတိ။

သော ဒါနိ ဘဂဝါ သတ္ထာ၊ ဓမ္မံ ဒေသေတိ စက္ခုမာ။

၄၈။

‘‘‘ယသ္မိဉ္စ ဇာယမာနသ္မိံ၊ သဗ္ဗရတနာနိ ဇောတယုံ [ဇောတိသုံ (သီ။ သျာ။)]။

သော ဒါနိ ဘဂဝါ သတ္ထာ၊ ဓမ္မံ ဒေသေတိ စက္ခုမာ။

၄၉။

‘‘‘ယသ္မိဉ္စ ဇာယမာနသ္မိံ၊ သတ္တာသုံ ပဒဝိက္ကမာ။

သော ဒါနိ ဘဂဝါ သတ္ထာ၊ ဓမ္မံ ဒေသေတိ စက္ခုမာ။

၅၀။

‘‘‘ဇာတမတ္တော စ သမ္ဗုဒ္ဓေါ၊ ဒိသာ သဗ္ဗာ ဝိလောကယိ။

ဝါစာသဘိမုဒီရေသိ၊ ဧသာ ဗုဒ္ဓါန ဓမ္မတာ’။

၅၁။

‘‘သံဝေဇယိတွာ ဇနတံ၊ ထဝိတွာ လောကနာယကံ။

သမ္ဗုဒ္ဓံ အဘိဝါဒေတွာ၊ ပက္ကာမိံ ပါစိနာမုခေါ။

၅၂။

‘‘ဧကနဝုတိတော ကပ္ပေ၊ ယံ ဗုဒ္ဓမဘိထောမယိံ။

ဒုဂ္ဂတိံ နာဘိဇာနာမိ၊ ထောမနာယ ဣဒံ ဖလံ။

၅၃။

‘‘ဣတော နဝုတိကပ္ပမှိ၊ သမ္မုခါထဝိကဝှယော။

သတ္တရတနသမ္ပန္နော၊ စက္ကဝတ္တီ မဟဗ္ဗလော။

၅၄။

‘‘ပထဝီဒုန္ဒုဘိ နာမ [ဒုဒ္ဒသိ နာမ (က။)]၊ ဧကူနနဝုတိမှိတော။

သတ္တရတနသမ္ပန္နော၊ စက္ကဝတ္တီ မဟဗ္ဗလော။

၅၅။

‘‘အဋ္ဌာသီတိမှိတော ကပ္ပေ၊ ဩဘာသော နာမ ခတ္တိယော။

သတ္တရတနသမ္ပန္နော၊ စက္ကဝတ္တီ မဟဗ္ဗလော။

၅၆။

‘‘သတ္တာသီတိမှိတော ကပ္ပေ၊ သရိတစ္ဆေဒနဝှယော။

သတ္တရတနသမ္ပန္နော၊ စက္ကဝတ္တီ မဟဗ္ဗလော။

၅၇။

‘‘အဂ္ဂိနိဗ္ဗာပနော နာမ၊ ကပ္ပါနံ ဆဠသီတိယာ။

သတ္တရတနသမ္ပန္နော၊ စက္ကဝတ္တီ မဟဗ္ဗလော။

၅၈။

‘‘ဂတိပစ္ဆေဒနော နာမ၊ ကပ္ပါနံ ပဉ္စသီတိယာ။

သတ္တရတနသမ္ပန္နော၊ စက္ကဝတ္တီ မဟဗ္ဗလော။

၅၉။

‘‘ရာဇာ ဝါတသမော နာမ၊ ကပ္ပါနံ စုလ္လသီတိယာ။

သတ္တရတနသမ္ပန္နော၊ စက္ကဝတ္တီ မဟဗ္ဗလော။

၆၀။

‘‘ရတနပဇ္ဇလော နာမ၊ ကပ္ပါနံ တေအသီတိယာ။

သတ္တရတနသမ္ပန္နော၊ စက္ကဝတ္တီ မဟဗ္ဗလော။

၆၁။

‘‘ပဒဝိက္ကမနော နာမ၊ ကပ္ပါနံ ဒွေအသီတိယာ။

သတ္တရတနသမ္ပန္နော၊ စက္ကဝတ္တီ မဟဗ္ဗလော။

၆၂။

‘‘ရာဇာ ဝိလောကနော နာမ၊ ကပ္ပါနံ ဧကသီတိယာ။

သတ္တရတနသမ္ပန္နော၊ စက္ကဝတ္တီ မဟဗ္ဗလော။

၆၃။

‘‘ဂိရသာရောတိ နာမေန၊ ကပ္ပေသီတိမှိ ခတ္တိယော။

သတ္တရတနသမ္ပန္နော၊ စက္ကဝတ္တီ မဟဗ္ဗလော။

၆၄။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ သမ္မုခါထဝိကော ထေရော ဣမာ ဂါထာယော အဘာသိတ္ထာတိ။

သမ္မုခါထဝိကတ္ထေရဿာပဒါနံ ပဉ္စမံ။

၆။ ကုသုမာသနိယတ္ထေရအပဒါနံ

၆၅။

‘‘နဂရေ ဓညဝတိယာ၊ အဟောသိံ ဗြာဟ္မဏော တဒါ။

လက္ခဏေ ဣတိဟာသေ စ၊ သနိဃဏ္ဍုသကေဋုဘေ။

၆၆။

‘‘ပဒကော ဝေယျာကရဏော၊ နိမိတ္တကောဝိဒေါ အဟံ။

မန္တေ စ သိဿေ ဝါစေသိံ၊ တိဏ္ဏံ ဝေဒါန ပါရဂူ။

၆၇။

‘‘ပဉ္စ ဥပ္ပလဟတ္ထာနိ၊ ပိဋ္ဌိယံ ဌပိတာနိ မေ။

အာဟုတိံ ယိဋ္ဌုကာမောဟံ၊ ပိတုမာတုသမာဂမေ။

၆၈။

‘‘တဒါ ဝိပဿီ ဘဂဝါ၊ ဘိက္ခုသံဃပုရက္ခတော။

ဩဘာသေန္တော ဒိသာ သဗ္ဗာ၊ အာဂစ္ဆတိ နရာသဘော။

၆၉။

‘‘အာသနံ ပညပေတွာန၊ နိမန္တေတွာ မဟာမုနိံ။

သန္ထရိတွာန တံ ပုပ္ဖံ၊ အဘိနေသိံ သကံ ဃရံ။

၇၀။

‘‘ယံ မေ အတ္ထိ သကေ ဂေဟေ၊ အာမိသံ ပစ္စုပဋ္ဌိတံ။

တာဟံ ဗုဒ္ဓဿ ပါဒါသိံ၊ ပသန္နော သေဟိ ပါဏိဘိ။

၇၁။

‘‘ဘုတ္တာဝိံ ကာလမညာယ၊ ပုပ္ဖဟတ္ထမဒါသဟံ။

အနုမောဒိတွာန သဗ္ဗညူ၊ ပက္ကာမိ ဥတ္တရာမုခေါ။

၇၂။

‘‘ဧကနဝုတိတော ကပ္ပေ၊ ယံ ပုပ္ဖမဒဒိံ တဒါ။

ဒုဂ္ဂတိံ နာဘိဇာနာမိ၊ ပုပ္ဖဒါနဿိဒံ ဖလံ။

၇၃။

‘‘အနန္တရံ ဣတော ကပ္ပေ၊ ရာဇာဟုံ ဝရဒဿနော။

သတ္တရတနသမ္ပန္နော၊ စက္ကဝတ္တီ မဟဗ္ဗလော။

၇၄။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ကုသုမာသနိယော ထေရော ဣမာ ဂါထာယော အဘာသိတ္ထာတိ။

ကုသုမာသနိယတ္ထေရဿာပဒါနံ ဆဋ္ဌံ။

၇။ ဖလဒါယကတ္ထေရအပဒါနံ

၇၅။

‘‘အဇ္ဈာယကော မန္တဓရော၊ တိဏ္ဏံ ဝေဒါန ပါရဂူ။

ဟိမဝန္တဿာဝိဒူရေ၊ ဝသာမိ အဿမေ အဟံ။

၇၆။

‘‘အဂ္ဂိဟုတ္တဉ္စ မေ အတ္ထိ၊ ပုဏ္ဍရီကဖလာနိ စ။

ပုဋကေ နိက္ခိပိတွာန၊ ဒုမဂ္ဂေ လဂ္ဂိတံ မယာ။

၇၇။

‘‘ပဒုမုတ္တရော လောကဝိဒူ၊ အာဟုတီနံ ပဋိဂ္ဂဟော။

မမုဒ္ဓရိတုကာမော သော၊ ဘိက္ခန္တော မမုပါဂမိ။

၇၈။

‘‘ပသန္နစိတ္တော သုမနော၊ ဖလံ ဗုဒ္ဓဿဒါသဟံ။

ဝိတ္တိသဉ္ဇနနော မယှံ၊ ဒိဋ္ဌဓမ္မသုခါဝဟော။

၇၉။

‘‘သုဝဏ္ဏဝဏ္ဏော သမ္ဗုဒ္ဓေါ၊ အာဟုတီနံ ပဋိဂ္ဂဟော။

အန္တလိက္ခေ ဌိတော သတ္ထာ၊ ဣမံ ဂါထံ အဘာသထ။

၈၀။

‘‘‘ဣမိနာ ဖလဒါနေန၊ စေတနာပဏိဓီဟိ စ။

ကပ္ပါနံ သတသဟဿံ၊ ဒုဂ္ဂတိံ နုပပဇ္ဇသိ’။

၈၁။

‘‘တေနေဝ သုက္ကမူလေန၊ အနုဘောတွာန သမ္ပဒါ။

ပတ္တောမှိ အစလံ ဌာနံ၊ ဟိတွာ ဇယပရာဇယံ။

၈၂။

‘‘ဣတော သတ္တသတေ ကပ္ပေ၊ ရာဇာ အာသိံ သုမင်္ဂလော။

သတ္တရတနသမ္ပန္နော စက္ကဝတ္တီ မဟဗ္ဗလော။

၈၃။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ဖလဒါယကော ထေရော ဣမာ ဂါထာယော အဘာသိတ္ထာတိ။

ဖလဒါယကတ္ထေရဿာပဒါနံ သတ္တမံ။

၈။ ဉာဏသညိကတ္ထေရအပဒါနံ

၈၄။

‘‘ပဗ္ဗတေ ဟိမဝန္တမှိ၊ ဝသာမိ ပဗ္ဗတန္တရေ။

ပုလိနံ သောဘနံ ဒိသွာ၊ ဗုဒ္ဓသေဋ္ဌံ အနုဿရိံ။

၈၅။

‘‘ဉာဏေ ဥပနိဓါ နတ္ထိ၊ သင်္ခါရံ [သင်္ဂါမံ (သီ။ သျာ။)၊ သင်္ခါတံ (ထေရဂါထာ အဋ္ဌ။)] နတ္ထိ သတ္ထုနော။

သဗ္ဗဓမ္မံ အဘိညာယ၊ ဉာဏေန အဓိမုစ္စတိ။

၈၆။

‘‘နမော တေ ပုရိသာဇည၊ နမော တေ ပုရိသုတ္တမ။

ဉာဏေန တေ သမော နတ္ထိ၊ ယာဝတာ ဉာဏမုတ္တမံ။

၈၇။

‘‘ဉာဏေ စိတ္တံ ပသာဒေတွာ၊ ကပ္ပံ သဂ္ဂမှိ မောဒဟံ။

အဝသေသေသု ကပ္ပေသု၊ ကုသလံ စရိတံ [ကရိတံ (သီ။ သျာ။)၊ ကိရိယံ (က။)] မယာ။

၈၈။

‘‘ဧကနဝုတိတော ကပ္ပေ၊ ယံ သညမလဘိံ တဒါ။

ဒုဂ္ဂတိံ နာဘိဇာနာမိ၊ ဉာဏသညာယိဒံ ဖလံ။

၈၉။

‘‘ဣတော သတ္တတိကပ္ပမှိ [တေသတ္တတိကပ္ပေ (သီ။ သျာ။)]၊ ဧကော ပုလိနပုပ္ဖိယော။

သတ္တရတနသမ္ပန္နော၊ စက္ကဝတ္တီ မဟဗ္ဗလော။

၉၀။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ဉာဏသညိကော ထေရော ဣမာ ဂါထာယော အဘာသိတ္ထာတိ။

ဉာဏသညိကတ္ထေရဿာပဒါနံ အဋ္ဌမံ။

၉။ ဂဏ္ဌိပုပ္ဖိယတ္ထေရအပဒါနံ

၉၁။

‘‘သုဝဏ္ဏဝဏ္ဏော သမ္ဗုဒ္ဓေါ၊ ဝိပဿီ ဒက္ခိဏာရဟော။

ပုရက္ခတော သာဝကေဟိ၊ အာရာမာ အဘိနိက္ခမိ။

၉၂။

‘‘ဒိသွာနဟံ ဗုဒ္ဓသေဋ္ဌံ၊ သဗ္ဗညုံ တမနာသကံ။

ပသန္နစိတ္တော သုမနော၊ ဂဏ္ဌိပုပ္ဖံ [ဂတမဂ္ဂံ (သျာ။ က။)] အပူဇယိံ။

၉၃။

‘‘တေန စိတ္တပ္ပသာဒေန၊ ဒွိပဒိန္ဒဿ တာဒိနော။

ဟဋ္ဌော ဟဋ္ဌေန စိတ္တေန၊ ပုန ဝန္ဒိံ တထာဂတံ။

၉၄။

‘‘ဧကနဝုတိတော ကပ္ပေ၊ ယံ ပုပ္ဖမဘိရောပယိံ။

ဒုဂ္ဂတိံ နာဘိဇာနာမိ၊ ဗုဒ္ဓပူဇာယိဒံ ဖလံ။

၉၅။

‘‘ဧကတာလီသိတော ကပ္ပေ၊ စရဏော နာမ ခတ္တိယော။

သတ္တရတနသမ္ပန္နော၊ စက္ကဝတ္တီ မဟဗ္ဗလော။

၉၆။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ဂဏ္ဌိပုပ္ဖိယော [ဂန္ဓပုပ္ဖိယော (သျာ။ က။)] ထေရော ဣမာ ဂါထာယော အဘာသိတ္ထာတိ။

ဂဏ္ဌိပုပ္ဖိယတ္ထေရဿာပဒါနံ နဝမံ။

၁၀။ ပဒုမပူဇကတ္ထေရအပဒါနံ

၉၇။

‘‘ဟိမဝန္တဿာဝိဒူရေ ၊ ဂေါတမော နာမ ပဗ္ဗတော။

နာနာရုက္ခေဟိ သဉ္ဆန္နော၊ မဟာဘူတဂဏာလယော။

၉၈။

‘‘ဝေမဇ္ဈမှိ စ တဿာသိ၊ အဿမော အဘိနိမ္မိတော။

ပုရက္ခတော သသိဿေဟိ၊ ဝသာမိ အဿမေ အဟံ။

၉၉။

‘‘အာယန္တု မေ သိဿဂဏာ၊ ပဒုမံ အာဟရန္တု မေ။

ဗုဒ္ဓပူဇံ ကရိဿာမိ၊ ဒွိပဒိန္ဒဿ တာဒိနော။

၁၀၀။

‘‘ဧဝန္တိ တေ ပဋိဿုတွာ၊ ပဒုမံ အာဟရိံသု မေ။

တထာ နိမိတ္တံ ကတွာဟံ၊ ဗုဒ္ဓဿ အဘိရောပယိံ။

၁၀၁။

‘‘သိဿေ တဒါ သမာနေတွာ၊ သာဓုကံ အနုသာသဟံ။

မာ ခေါ တုမှေ ပမဇ္ဇိတ္ထ၊ အပ္ပမာဒေါ သုခါဝဟော။

၁၀၂။

‘‘ဧဝံ သမနုသာသိတွာ၊ တေ သိဿေ ဝစနက္ခမေ။

အပ္ပမာဒဂုဏေ ယုတ္တော၊ တဒါ ကာလင်္ကတော အဟံ။

၁၀၃။

‘‘ဧကနဝုတိတော ကပ္ပေ၊ ယံ ပုပ္ဖမဘိရောပယိံ။

ဒုဂ္ဂတိံ နာဘိဇာနာမိ၊ ဗုဒ္ဓပူဇာယိဒံ ဖလံ။

၁၀၄။

‘‘ဧကပညာသကပ္ပမှိ၊ ရာဇာ အာသိံ ဇလုတ္တမော။

သတ္တရတနသမ္ပန္နော၊ စက္ကဝတ္တီ မဟဗ္ဗလော။

၁၀၅။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ပဒုမပူဇကော ထေရော ဣမာ ဂါထာယော အဘာသိတ္ထာတိ။

ပဒုမပူဇကတ္ထေရဿာပဒါနံ ဒသမံ။

သေရေယျဝဂ္ဂေါ တေရသမော။

တဿုဒ္ဒါနံ –

သေရေယျကော ပုပ္ဖထူပိ၊ ပါယသော ဂန္ဓထောမကော။

အာသနိ ဖလသညီ စ၊ ဂဏ္ဌိပဒုမပုပ္ဖိယော။

ပဉ္စုတ္တရသတာ ဂါထာ၊ ဂဏိတာ အတ္ထဒဿိဘိ။