မဟာပရိဝါရဝဂ္ဂ

၁၂။ မဟာပရိဝါရဝဂ္ဂ

၁။ မဟာပရိဝါရကတ္ထေရအပဒါန

၁။

‘‘ဝိပဿီ နာမ ဘဂဝါ၊ လောကဇေဋ္ဌော နရာသဘော။

အဋ္ဌသဋ္ဌိသဟဿေဟိ၊ ပါဝိသိ ဗန္ဓုမံ တဒါ။

၂။

‘‘နဂရာ အဘိနိက္ခမ္မ၊ အဂမံ ဒီပစေတိယံ။

အဒ္ဒသံ ဝိရဇံ ဗုဒ္ဓံ၊ အာဟုတီနံ ပဋိဂ္ဂဟံ။

၃။

‘‘စုလ္လာသီတိသဟဿာနိ၊ ယက္ခာ မယှံ ဥပန္တိကေ။

ဥပဋ္ဌဟန္တိ သက္ကစ္စံ [မံ နိစ္စံ (က။)]၊ ဣန္ဒံဝ တိဒသာ ဂဏာ။

၄။

‘‘ဘဝနာ အဘိနိက္ခမ္မ၊ ဒုဿံ ပဂ္ဂယှဟံ တဒါ။

သိရသာ အဘိဝါဒေသိံ၊ တဉ္စာဒါသိံ မဟေသိနော။

၅။

‘‘အဟော ဗုဒ္ဓေါ အဟော ဓမ္မော၊ အဟော နော သတ္ထု သမ္ပဒါ။

ဗုဒ္ဓဿ အာနုဘာဝေန၊ ဝသုဓါယံ ပကမ္ပထ။

၆။

‘‘တဉ္စ အစ္ဆရိယံ ဒိသွာ၊ အဗ္ဘုတံ လောမဟံသနံ။

ဗုဒ္ဓေ စိတ္တံ ပသာဒေမိ၊ ဒွိပဒိန္ဒမှိ တာဒိနေ။

၇။

‘‘သောဟံ စိတ္တံ ပသာဒေတွာ၊ ဒုဿံ ဒတွာန သတ္ထုနော။

သရဏဉ္စ ဥပါဂစ္ဆိံ၊ သာမစ္စော သပရိဇ္ဇနော။

၈။

‘‘ဧကနဝုတိတော ကပ္ပေ၊ ယံ ကမ္မမကရိံ တဒါ။

ဒုဂ္ဂတိံ နာဘိဇာနာမိ၊ ဗုဒ္ဓပူဇာယိဒံ ဖလံ။

၉။

‘‘ဣတော ပန္နရသေ ကပ္ပေ၊ သောဠသာသုံ သုဝါဟနာ [သောဠသာသိံသု ဝါဟနော (သျာ။)]။

သတ္တရတနသမ္ပန္နာ၊ စက္ကဝတ္တီ မဟဗ္ဗလာ။

၁၀။

‘‘ပဋိသမ္ဘိဒါ စတဿော၊ ဝိမောက္ခာပိ စ အဋ္ဌိမေ။

ဆဠဘိညာ သစ္ဆိကတာ၊ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ မဟာပရိဝါရကော ထေရော ဣမာ ဂါထာယော အဘာသိတ္ထာတိ။

မဟာပရိဝါရကတ္ထေရဿာပဒါနံ ပဌမံ။

၂။ သုမင်္ဂလတ္ထေရအပဒါနံ

၁၁။

‘‘အတ္ထဒဿီ ဇိနဝရော၊ လောကဇေဋ္ဌော နရာသဘော။

ဝိဟာရာ အဘိနိက္ခမ္မ၊ တဠာကံ ဥပသင်္ကမိ။

၁၂။

‘‘နှတွာ ပိတွာ စ သမ္ဗုဒ္ဓေါ၊ ဥတ္တရိတွေကစီဝရော။

အဋ္ဌာသိ ဘဂဝါ တတ္ထ၊ ဝိလောကေန္တော ဒိသောဒိသံ။

၁၃။

‘‘ဘဝနေ ဥပဝိဋ္ဌောဟံ၊ အဒ္ဒသံ လောကနာယကံ။

ဟဋ္ဌော ဟဋ္ဌေန စိတ္တေန၊ အပ္ဖောဋေသိံ အဟံ တဒါ။

၁၄။

‘‘သတရံသိံဝ ဇောတန္တံ၊ ပဘာသန္တံဝ ကဉ္စနံ [ဣမိနာ ပါဒဒွယေန ပုရိမပါဒဒွယဿ ပုရတော ဘဝိတဗ္ဗံ]။

နစ္စဂီတေ ပယုတ္တောဟံ၊ ပဉ္စင်္ဂတူရိယမှိ စ။

၁၅။

‘‘ယံ ယံ ယောနုပပဇ္ဇာမိ၊ ဒေဝတ္တံ အထ မာနုသံ။

သဗ္ဗေ သတ္တေ အဘိဘောမိ၊ ဝိပုလော ဟောတိ မေ ယသော [အယဉ္စ ဂါထာ ပရိဂ္ဂဟေတိဂါထာယ အနန္တရမေဝ ဌာတုံ ယုတ္တာ]။

၁၆။

‘‘နမော တေ ပုရိသာဇည၊ နမော တေ ပုရိသုတ္တမ။

အတ္တာနံ တောသယိတွာန၊ ပရေ တောသေသိ တွံ မုနိ။

၁၇။

‘‘ပရိဂ္ဂဟေ [ပရိဂ္ဂယှ (သီ။)၊ ပရိဂ္ဂဟိတွာ (သျာ။)၊ ပရိဂ္ဂဟေန (က။)] နိသီဒိတွာ၊ ဟာသံ ကတွာန သုဗ္ဗတေ။

ဥပဋ္ဌဟိတွာ သမ္ဗုဒ္ဓံ၊ တုသိတံ ဥပပဇ္ဇဟံ။

၁၈။

‘‘သောဠသေတော ကပ္ပသတေ၊ ဒွိနဝဧကစိန္တိတာ။

သတ္တရတနသမ္ပန္နာ၊ စက္ကဝတ္တီ မဟဗ္ဗလာ။

၁၉။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ သုမင်္ဂလော ထေရော ဣမာ ဂါထာယော အဘာသိတ္ထာတိ။

သုမင်္ဂလတ္ထေရဿာပဒါနံ ဒုတိယံ။

၃။ သရဏဂမနိယတ္ထေရအပဒါနံ

၂၀။

‘‘ဥဘိန္နံ ဒေဝရာဇူနံ၊ သင်္ဂါမော သမုပဋ္ဌိတော။

အဟောသိ သမုပဗ္ယူဠ္ဟော [သမုပဗ္ဗူဠ္ဟော (သီ။)]၊ မဟာဃောသော အဝတ္တထ [ပဝတ္တထ (သီ။)]။

၂၁။

‘‘ပဒုမုတ္တရော လောကဝိဒူ၊ အာဟုတီနံ ပဋိဂ္ဂဟော။

အန္တလိက္ခေ ဌိတော သတ္ထာ၊ သံဝေဇေသိ မဟာဇနံ။

၂၂။

‘‘သဗ္ဗေ ဒေဝါ အတ္တမနာ၊ နိက္ခိတ္တကဝစာဝုဓါ။

သမ္ဗုဒ္ဓံ အဘိဝါဒေတွာ၊ ဧကဂ္ဂါသိံသု တာဝဒေ။

၂၃။

‘‘မယှံ [အမှံ (သီ။)] သင်္ကပ္ပမညာယ၊ ဝါစာသဘိမုဒီရယိ။

အနုကမ္ပကော လောကဝိဒူ၊ နိဗ္ဗာပေသိ မဟာဇနံ။

၂၄။

‘‘ပဒုဋ္ဌစိတ္တော မနုဇော၊ ဧကပါဏံ ဝိဟေဌယံ။

တေန စိတ္တပ္ပဒေါသေန၊ အပါယံ ဥပပဇ္ဇတိ။

၂၅။

‘‘သင်္ဂါမသီသေ နာဂေါဝ၊ ဗဟူ ပါဏေ ဝိဟေဌယံ။

နိဗ္ဗာပေထ သကံ စိတ္တံ၊ မာ ဟညိတ္ထော ပုနပ္ပုနံ။

၂၆။

‘‘ဒွိန္နမ္ပိ ယက္ခရာဇူနံ၊ သေနာ သာ ဝိမှိတာ အဟု [သေနာယော ဝိမှိတာ အဟူ (သီ။)၊ သေနာပိ သမိတာ အဟု (သျာ။)]။

သရဏဉ္စ ဥပါဂစ္ဆုံ၊ လောကဇေဋ္ဌံ သုတာဒိနံ။

၂၇။

‘‘သညာပေတွာန ဇနတံ၊ ပဒမုဒ္ဓရိ [ဥဒ္ဓရိ ပန (သီ။ သျာ။)] စက္ခုမာ။

ပေက္ခမာနောဝ ဒေဝေဟိ၊ ပက္ကာမိ ဥတ္တရာမုခေါ။

၂၈။

‘‘ပဌမံ သရဏံ ဂစ္ဆိံ၊ ဒွိပဒိန္ဒဿ တာဒိနော။

ကပ္ပါနံ သတသဟဿံ၊ ဒုဂ္ဂတိံ နုပပဇ္ဇဟံ။

၂၉။

‘‘မဟာဒုန္ဒုဘိနာမာ စ၊ သောဠသာသုံ ရထေသဘာ။

တိံသကပ္ပသဟဿမှိ၊ ရာဇာနော စက္ကဝတ္တိနော။

၃၀။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ သရဏဂမနိယော ထေရော ဣမာ ဂါထာယော အဘာသိတ္ထာတိ။

သရဏဂမနိယတ္ထေရဿာပဒါနံ တတိယံ။

၄။ ဧကာသနိယတ္ထေရအပဒါနံ

၃၁။

‘‘ဝရုဏော နာမ နာမေန၊ ဒေဝရာဇာ အဟံ တဒါ။

ဥပဋ္ဌဟေသိံ သမ္ဗုဒ္ဓံ၊ သယောဂ္ဂဗလဝါဟနော။

၃၂။

‘‘နိဗ္ဗုတေ လောကနာထမှိ၊ အတ္ထဒဿီနရုတ္တမေ။

တူရိယံ သဗ္ဗမာဒါယ၊ အဂမံ ဗောဓိမုတ္တမံ။

၃၃။

‘‘ဝါဒိတေန စ နစ္စေန၊ သမ္မတာဠသမာဟိတော။

သမ္မုခါ ဝိယ သမ္ဗုဒ္ဓံ၊ ဥပဋ္ဌိံ ဗောဓိမုတ္တမံ။

၃၄။

‘‘ဥပဋ္ဌဟိတွာ တံ ဗောဓိံ၊ ဓရဏီရုဟပါဒပံ။

ပလ္လင်္ကံ အာဘုဇိတွာန၊ တတ္ထ ကာလင်္ကတော အဟံ။

၃၅။

‘‘သကကမ္မာဘိရဒ္ဓေါဟံ၊ ပသန္နော ဗောဓိမုတ္တမေ။

တေန စိတ္တပ္ပသာဒေန၊ နိမ္မာနံ ဥပပဇ္ဇဟံ။

၃၆။

‘‘သဋ္ဌိတူရိယသဟဿာနိ၊ ပရိဝါရေန္တိ မံ သဒါ။

မနုဿေသု စ ဒေဝေသု၊ ဝတ္တမာနံ ဘဝါဘဝေ။

၃၇။

‘‘တိဝိဓဂ္ဂီ နိဗ္ဗုတာ မယှံ၊ ဘဝါ သဗ္ဗေ သမူဟတာ။

ဓါရေမိ အန္တိမံ ဒေဟံ၊ သမ္မာသမ္ဗုဒ္ဓသာသနေ [အယဉ္စ ဂါထာ ပဋိသမ္ဘိဒါ စတဿေတိဂါထာယ ဧကသမ္ဗန္ဓာ ဘဝိတံ ယုတ္တာ]။

၃၈။

‘‘သုဗာဟူ နာမ နာမေန၊ စတုတ္တိံသာသု ခတ္တိယာ။

သတ္တရတနသမ္ပန္နာ၊ ပဉ္စကပ္ပသတေ ဣတော။

၃၉။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ဧကာသနိယော ထေရော ဣမာ ဂါထာယော အဘာသိတ္ထာတိ။

ဧကာသနိယတ္ထေရဿာပဒါနံ စတုတ္ထံ။

၅။ သုဝဏ္ဏပုပ္ဖိယတ္ထေရအပဒါနံ

၄၀။

‘‘ဝိပဿီ နာမ ဘဂဝါ၊ လောကဇေဋ္ဌော နရာသဘော။

နိသိန္နော ဇနကာယဿ၊ ဒေသေသိ အမတံ ပဒံ။

၄၁။

‘‘တဿာဟံ ဓမ္မံ သုတွာန၊ ဒွိပဒိန္ဒဿ တာဒိနော။

သောဏ္ဏပုပ္ဖာနိ စတ္တာရိ၊ ဗုဒ္ဓဿ အဘိရောပယိံ။

၄၂။

‘‘သုဝဏ္ဏစ္ဆဒနံ အာသိ၊ ယာဝတာ ပရိသာ တဒါ။

ဗုဒ္ဓါဘာ စ သုဝဏ္ဏာဘာ၊ အာလောကော ဝိပုလော အဟု။

၄၃။

‘‘ဥဒဂ္ဂစိတ္တော သုမနော၊ ဝေဒဇာတော ကတဉ္ဇလီ။

ဝိတ္တိသဉ္ဇနနော တေသံ၊ ဒိဋ္ဌဓမ္မသုခါဝဟော။

၄၄။

‘‘အာယာစိတွာန သမ္ဗုဒ္ဓံ၊ ဝန္ဒိတွာန စ သုဗ္ဗတံ။

ပါမောဇ္ဇံ ဇနယိတွာန၊ သကံ ဘဝနုပါဂမိံ။

၄၅။

‘‘ဘဝနေ ဥပဝိဋ္ဌောဟံ၊ ဗုဒ္ဓသေဋ္ဌံ အနုဿရိံ။

တေန စိတ္တပ္ပသာဒေန၊ တုသိတံ ဥပပဇ္ဇဟံ။

၄၆။

‘‘ဧကနဝုတိတော ကပ္ပေ၊ ယံ ပုပ္ဖမဘိရောပယိံ။

ဒုဂ္ဂတိံ နာဘိဇာနာမိ၊ ဗုဒ္ဓပူဇာယိဒံ ဖလံ။

၄၇။

‘‘သောဠသာသိံသု ရာဇာနော၊ နေမိသမ္မတနာမကာ။

တေတာလီသေ ဣတော ကပ္ပေ၊ စက္ကဝတ္တီ မဟဗ္ဗလာ။

၄၈။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ သုဝဏ္ဏပုပ္ဖိယော ထေရော ဣမာ ဂါထာယော အဘာသိတ္ထာတိ။

သုဝဏ္ဏပုပ္ဖိယတ္ထေရဿာပဒါနံ ပဉ္စမံ။

၆။ စိတကပူဇကတ္ထေရအပဒါနံ

၄၉။

‘‘ဝသာမိ ရာဇာယတနေ၊ သာမစ္စော သပရိဇ္ဇနော။

ပရိနိဗ္ဗုတေ ဘဂဝတိ၊ သိခိနော လောကဗန္ဓုနော။

၅၀။

‘‘ပသန္နစိတ္တော သုမနော၊ စိတကံ အဂမာသဟံ။

တူရိယံ တတ္ထ ဝါဒေတွာ၊ ဂန္ဓမာလံ သမောကိရိံ။

၅၁။

‘‘စိတမှိ ပူဇံ ကတွာန၊ ဝန္ဒိတွာ စိတကံ အဟံ။

ပသန္နစိတ္တော သုမနော၊ သကံ ဘဝနုပါဂမိံ။

၅၂။

‘‘ဘဝနေ ဥပဝိဋ္ဌောဟံ၊ စိတပူဇံ အနုဿရိံ။

တေန ကမ္မေန ဒွိပဒိန္ဒ၊ လောကဇေဋ္ဌ နရာသဘ။

၅၃။

‘‘အနုဘောတွာန သမ္ပတ္တိံ၊ ဒေဝေသု မာနုသေသု စ။

ပတ္တောမှိ အစလံ ဌာနံ၊ ဟိတွာ ဇယပရာဇယံ။

၅၄။

‘‘ဧကတ္တိံသေ ဣတော ကပ္ပေ၊ ယံ ပုပ္ဖမဘိရောပယိံ။

ဒုဂ္ဂတိံ နာဘိဇာနာမိ၊ စိတပူဇာယိဒံ ဖလံ။

၅၅။

‘‘ဧကူနတိံသကပ္ပမှိ၊ ဣတော သောဠသ ရာဇာနော။

ဥဂ္ဂတာ နာမ နာမေန၊ စက္ကဝတ္တီ မဟဗ္ဗလာ။

၅၆။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ စိတကပူဇကော ထေရော ဣမာ ဂါထာယော အဘာသိတ္ထာတိ။

စိတကပူဇကတ္ထေရဿာပဒါနံ ဆဋ္ဌံ။

၇။ ဗုဒ္ဓသညကတ္ထေရအပဒါနံ

၅၇။

‘‘ယဒါ ဝိပဿီ လောကဂ္ဂေါ၊ အာယုသင်္ခါရမောဿဇိ။

ပထဝီ သမ္ပကမ္ပိတ္ထ၊ မေဒနီ ဇလမေခလာ။

၅၈။

‘‘ဩတတံ ဝိတ္ထတံ [ဩတတံ ဝိတတံ (သျာ။)] မယှံ၊ သုဝိစိတ္တဝဋံသကံ [သုစိစိတ္တံ ပပဉ္စကံ (သျာ။)]။

ဘဝနမ္ပိ ပကမ္ပိတ္ထ၊ ဗုဒ္ဓဿ အာယုသင်္ခယေ။

၅၉။

‘‘တာသော မယှံ သမုပ္ပန္နော၊ ဘဝနေ သမ္ပကမ္ပိတေ။

ဥပ္ပါဒေါ [ဥပ္ပါတော (?)] နု ကိမတ္ထာယ၊ အာလောကော ဝိပုလော အဟု။

၆၀။

‘‘ဝေဿဝဏော ဣဓါဂမ္မ၊ နိဗ္ဗာပေသိ မဟာဇနံ။

ပါဏဘူတေ [ပါဏဘုတံ (သျာ။)၊ ပါဏဘူနံ (သီ။ က။)] ဘယံ နတ္ထိ၊ ဧကဂ္ဂါ ဟောထ သံဝုတာ [သဂါရဝါ (သျာ။)]။

၆၁။

‘‘အဟော ဗုဒ္ဓေါ အဟော ဓမ္မော၊ အဟော နော သတ္ထု သမ္ပဒါ။

ယသ္မိံ ဥပ္ပဇ္ဇမာနမှိ၊ ပထဝီ [ပဌဝီ (သီ။ သျာ။)] သမ္ပကမ္ပတိ။

၆၂။

‘‘ဗုဒ္ဓါနုဘာဝံ ကိတ္တေတွာ၊ ကပ္ပံ သဂ္ဂမှိ မောဒဟံ။

အဝသေသေသု ကပ္ပေသု၊ ကုသလံ စရိတံ [ကရိတံ (သီ။ သျာ။)၊ ကာရိတံ (က။)] မယာ။

၆၃။

‘‘ဧကနဝုတိတော ကပ္ပေ၊ ယံ သညမလဘိံ တဒါ။

ဒုဂ္ဂတိံ နာဘိဇာနာမိ၊ ဗုဒ္ဓသညာယိဒံ ဖလံ။

၆၄။

‘‘ဣတော စုဒ္ဒသကပ္ပမှိ၊ ရာဇာ အာသိံ ပတာပဝါ။

သမိတော နာမ နာမေန၊ စက္ကဝတ္တီ မဟဗ္ဗလော။

၆၅။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ဗုဒ္ဓသညကော ထေရော ဣမာ ဂါထာယော အဘာသိတ္ထာတိ။

ဗုဒ္ဓသညကတ္ထေရဿာပဒါနံ သတ္တမံ။

၈။ မဂ္ဂသညကတ္ထေရအပဒါနံ

၆၆။

‘‘ပဒုမုတ္တရဗုဒ္ဓဿ၊ သာဝကာ ဝနစာရိနော။

ဝိပ္ပနဋ္ဌာ ဗြဟာရညေ၊ အန္ဓာဝ အနုသုယျရေ [အနုသုယရေ (သီ။)]။

၆၇။

‘‘အနုဿရိတွာ သမ္ဗုဒ္ဓံ၊ ပဒုမုတ္တရနာယကံ။

တဿ တေ မုနိနော ပုတ္တာ၊ ဝိပ္ပနဋ္ဌာ မဟာဝနေ။

၆၈။

‘‘ဘဝနာ ဩရုဟိတွာန၊ အဂမိံ ဘိက္ခုသန္တိကံ။

တေသံ မဂ္ဂဉ္စ အာစိက္ခိံ၊ ဘောဇနဉ္စ အဒါသဟံ။

၆၉။

‘‘တေန ကမ္မေန ဒွိပဒိန္ဒ၊ လောကဇေဋ္ဌ နရာသဘ။

ဇာတိယာ သတ္တဝဿောဟံ၊ အရဟတ္တမပါပုဏိံ။

၇၀။

‘‘သစက္ခူ နာမ နာမေန၊ ဒွါဒသ စက္ကဝတ္တိနော။

သတ္တရတနသမ္ပန္နာ၊ ပဉ္စကပ္ပသတေ ဣတော။

၇၁။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ မဂ္ဂသညကော ထေရော ဣမာ ဂါထာယော အဘာသိတ္ထာတိ။

မဂ္ဂသညကတ္ထေရဿာပဒါနံ အဋ္ဌမံ။

၉။ ပစ္စုပဋ္ဌာနသညကတ္ထေရအပဒါနံ

၇၂။

‘‘အတ္ထဒဿိမှိ သုဂတေ၊ နိဗ္ဗုတေ သမနန္တရာ။

ယက္ခယောနိံ ဥပပဇ္ဇိံ၊ ယသံ ပတ္တော စဟံ တဒါ။

၇၃။

‘‘ဒုလ္လဒ္ဓံ ဝတ မေ အာသိ၊ ဒုပ္ပဘာတံ ဒုရုဋ္ဌိတံ။

ယံ မေ ဘောဂေ ဝိဇ္ဇမာနေ၊ ပရိနိဗ္ဗာယိ စက္ခုမာ။

၇၄။

‘‘မမ သင်္ကပ္ပမညာယ၊ သာဂရော နာမ သာဝကော။

မမုဒ္ဓရိတုကာမော သော၊ အာဂစ္ဆိ မမ သန္တိကံ။

၇၅။

‘‘ကိံ နု သောစသိ မာ ဘာယိ၊ စရ ဓမ္မံ သုမေဓသ။

အနုပ္ပဒိန္နာ ဗုဒ္ဓေန၊ သဗ္ဗေသံ ဗီဇသမ္ပဒါ။

၇၆။

‘‘သော စေ ပူဇေယျ သမ္ဗုဒ္ဓံ၊ တိဋ္ဌန္တံ လောကနာယကံ။

ဓါတုံ သာသပမတ္တမ္ပိ၊ နိဗ္ဗုတဿာပိ ပူဇယေ။

၇၇။

‘‘သမေ စိတ္တပ္ပသာဒမှိ၊ သမံ ပုညံ မဟဂ္ဂတံ။

တသ္မာ ထူပံ ကရိတွာန၊ ပူဇေဟိ ဇိနဓါတုယော။

၇၈။

‘‘သာဂရဿ ဝစော သုတွာ၊ ဗုဒ္ဓထူပံ အကာသဟံ။

ပဉ္စဝဿေ ပရိစရိံ၊ မုနိနော ထူပမုတ္တမံ။

၇၉။

‘‘တေန ကမ္မေန ဒွိပဒိန္ဒ၊ လောကဇေဋ္ဌ နရာသဘ။

သမ္ပတ္တိံ အနုဘောတွာန၊ အရဟတ္တမပါပုဏိံ။

၈၀။

‘‘ဘူရိပညာ စ စတ္တာရော၊ သတ္တကပ္ပသတေ ဣတော။

သတ္တရတနသမ္ပန္နာ၊ စက္ကဝတ္တီ မဟဗ္ဗလာ။

၈၁။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ပစ္စုပဋ္ဌာနသညကော ထေရော ဣမာ ဂါထာယော အဘာသိတ္ထာတိ။

ပစ္စုပဋ္ဌာနသညကတ္ထေရဿာပဒါနံ နဝမံ။

၁၀။ ဇာတိပူဇကတ္ထေရအပဒါနံ

၈၂။

‘‘ဇာယန္တဿ ဝိပဿိဿ၊ အာလောကော ဝိပုလော အဟု။

ပထဝီ စ ပကမ္ပိတ္ထ၊ သသာဂရာ သပဗ္ဗတာ။

၈၃။

‘‘နေမိတ္တာ စ ဝိယာကံသု၊ ဗုဒ္ဓေါ လောကေ ဘဝိဿတိ။

အဂ္ဂေါ စ သဗ္ဗသတ္တာနံ၊ ဇနတံ ဥဒ္ဓရိဿတိ။

၈၄။

‘‘နေမိတ္တာနံ သုဏိတွာန၊ ဇာတိပူဇမကာသဟံ။

ဧဒိသာ ပူဇနာ နတ္ထိ၊ ယာဒိသာ ဇာတိပူဇနာ။

၈၅။

‘‘သင်္ခရိတွာန [သံဟရိတွာန (သီ။ သျာ။)၊ သင်္ကရိတွာန (က။)]

ကုသလံ, သကံ စိတ္တံ ပသာဒယိံ။

ဇာတိပူဇံ ကရိတွာန၊ တတ္ထ ကာလင်္ကတော အဟံ။

၈၆။

‘‘ယံ ယံ ယောနုပပဇ္ဇာမိ၊ ဒေဝတ္တံ အထ မာနုသံ။

သဗ္ဗေ သတ္တေ အဘိဘောမိ၊ ဇာတိပူဇာယိဒံ ဖလံ။

၈၇။

‘‘ဓါတိယော မံ ဥပဋ္ဌန္တိ၊ မမ စိတ္တဝသာနုဂါ။

န တာ သက္ကောန္တိ ကောပေတုံ၊ ဇာတိပူဇာယိဒံ ဖလံ။

၈၈။

‘‘ဧကနဝုတိတော ကပ္ပေ၊ ယံ ပူဇမကရိံ တဒါ။

ဒုဂ္ဂတိံ နာဘိဇာနာမိ၊ ဇာတိပူဇာယိဒံ ဖလံ။

၈၉။

‘‘သုပါရိစရိယာ နာမ၊ စတုတ္တိံသ ဇနာဓိပါ။

ဣတော တတိယကပ္ပမှိ၊ စက္ကဝတ္တီ မဟဗ္ဗလာ။

၉၀။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ဇာတိပူဇကော ထေရော ဣမာ ဂါထာယော အဘာသိတ္ထာတိ။

ဇာတိပူဇကတ္ထေရဿာပဒါနံ ဒသမံ။

မဟာပရိဝါရဝဂ္ဂေါ ဒွါဒသမော။

တဿုဒ္ဒါနံ –

ပရိဝါရသုမင်္ဂလာ၊ သရဏာသနပုပ္ဖိယာ။

စိတပူဇီ ဗုဒ္ဓသညီ၊ မဂ္ဂုပဋ္ဌာနဇာတိနာ။

ဂါထာယော နဝုတိ ဝုတ္တာ၊ ဂဏိတာယော ဝိဘာဝိဟိ။