ဘိက္ခဒါယိဝဂ္ဂ

၁၁။ ဘိက္ခဒါယိဝဂ္ဂ

၁။ ဘိက္ခဒါယကတ္ထေရအပဒါန

၁။

‘‘သုဝဏ္ဏဝဏ္ဏံ သမ္ဗုဒ္ဓံ၊ အာဟုတီနံ ပဋိဂ္ဂဟံ။

ပဝရာ [ပဝနာ (သျာ။)] အဘိနိက္ခန္တံ၊ ဝနာ နိဗ္ဗနမာဂတံ [ဝါနာ နိဗ္ဗာနမာဂတံ (သျာ။)]။

၂။

‘‘ကဋစ္ဆုဘိက္ခံ ပါဒါသိံ၊ သိဒ္ဓတ္ထဿ မဟေသိနော။

ပညာယ ဥပသန္တဿ၊ မဟာဝီရဿ တာဒိနော။

၃။

‘‘ပဒေနာနုပဒါယန္တံ [ပဒေနာနုပဒါယန္တော (သီ။ သျာ။)]၊ နိဗ္ဗာပေန္တေ မဟာဇနံ။

ဥဠာရာ ဝိတ္တိ မေ ဇာတာ၊ ဗုဒ္ဓေ အာဒိစ္စဗန္ဓုနေ [ဝိတ္တိ မေ ပါဟုနာ တာဝ၊ ဗုဒ္ဓဿာဒိစ္စဗန္ဓုနော (သျာ။)]။

၄။

‘‘စတုန္နဝုတိတော ကပ္ပေ၊ ယံ ဒါနမဒဒိံ တဒါ။

ဒုဂ္ဂတိံ နာဘိဇာနာမိ၊ ဘိက္ခာဒါနဿိဒံ ဖလံ။

၅။

‘‘သတ္တာသီတိမှိတော ကပ္ပေ၊ မဟာရေဏု သနာမကာ။

သတ္တရတနသမ္ပန္နာ၊ သတ္တေတေ စက္ကဝတ္တိနော။

၆။

‘‘ပဋိသမ္ဘိဒါ စတဿော၊ ဝိမောက္ခာပိ စ အဋ္ဌိမေ။

ဆဠဘိညာ သစ္ဆိကတာ၊ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ဘိက္ခဒါယကော ထေရော ဣမာ ဂါထာယော အဘာသိတ္ထာတိ။

ဘိက္ခဒါယကတ္ထေရဿာပဒါနံ ပဌမံ။

၂။ ဉာဏသညိကတ္ထေရအပဒါနံ

၇။

‘‘သုဝဏ္ဏဝဏ္ဏံ သမ္ဗုဒ္ဓံ၊ နိသဘာဇာနိယံ ယထာ။

တိဓါပဘိန္နံ မာတင်္ဂံ၊ ကုဉ္ဇရံဝ မဟေသိနံ။

၈။

‘‘ဩဘာသေန္တံ ဒိသာ သဗ္ဗာ၊ ဥဠုရာဇံဝ ပူရိတံ။

ရထိယံ ပဋိပဇ္ဇန္တံ၊ လောကဇေဋ္ဌံ အပဿဟံ။

၉။

‘‘ဉာဏေ စိတ္တံ ပသာဒေတွာ၊ ပဂ္ဂဟေတွာန အဉ္ဇလိံ။

ပသန္နစိတ္တော သုမနော၊ သိဒ္ဓတ္ထမဘိဝါဒယိံ။

၁၀။

‘‘စတုန္နဝုတိတော ကပ္ပေ၊ ယံ ကမ္မမကရိံ တဒါ။

ဒုဂ္ဂတိံ နာဘိဇာနာမိ၊ ဉာဏသညာယိဒံ ဖလံ။

၁၁။

‘‘တေသတ္တတိမှိတော ကပ္ပေ၊ သောဠသာသုံ နရုတ္တမာ။

သတ္တရတနသမ္ပန္နာ၊ စက္ကဝတ္တီ မဟဗ္ဗလာ။

၁၂။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ဉာဏသညိကော ထေရော ဣမာ ဂါထာယော အဘာသိတ္ထာတိ။

ဉာဏသညိကတ္ထေရဿာပဒါနံ ဒုတိယံ။

၃။ ဥပ္ပလဟတ္ထိယတ္ထေရအပဒါနံ

၁၃။

‘‘တိဝရာယံ နိဝါသီဟံ၊ အဟောသိံ မာလိကော တဒါ။

အဒ္ဒသံ ဝိရဇံ ဗုဒ္ဓံ၊ သိဒ္ဓတ္ထံ လောကပူဇိတံ [လောကနာယကံ (သီ။)]။

၁၄။

‘‘ပသန္နစိတ္တော သုမနော၊ ပုပ္ဖဟတ္ထမဒါသဟံ။

ယတ္ထ ယတ္ထုပပဇ္ဇာမိ၊ တဿ ကမ္မဿ ဝါဟသာ။

၁၅။

‘‘အနုဘောမိ ဖလံ ဣဋ္ဌံ၊ ပုဗ္ဗေ သုကတမတ္တနော။

ပရိက္ခိတ္တော သုမလ္လေဟိ၊ ပုပ္ဖဒါနဿိဒံ ဖလံ။

၁၆။

‘‘စတုန္နဝုတိတော ကပ္ပေ၊ ယံ ပုပ္ဖမဘိရောပယိံ။

ဒုဂ္ဂတိံ နာဘိဇာနာမိ၊ ပုပ္ဖပူဇာယိဒံ [ဗုဒ္ဓပူဇာယိဒံ (သီ။)] ဖလံ။

၁၇။

‘‘စတုန္နဝုတုပါဒါယ၊ ဌပေတွာ ဝတ္တမာနကံ။

ပဉ္စရာဇသတာ တတ္ထ၊ နဇ္ဇသမသနာမကာ [နဇ္ဇုပမသနာမကာ (သီ။ သျာ။)]။

၁၈။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ဥပ္ပလဟတ္ထိယော ထေရော ဣမာ ဂါထာယော အဘာသိတ္ထာတိ။

ဥပ္ပလဟတ္ထိယတ္ထေရဿာပဒါနံ တတိယံ။

၄။ ပဒပူဇကတ္ထေရအပဒါနံ

၁၉။

‘‘သိဒ္ဓတ္ထဿ ဘဂဝတော၊ ဇာတိပုပ္ဖမဒါသဟံ။

ပါဒေသု သတ္တ ပုပ္ဖာနိ၊ ဟာသေနောကိရိတာနိ မေ။

၂၀။

‘‘တေန ကမ္မေနဟံ အဇ္ဇ၊ အဘိဘောမိ နရာမရေ။

ဓါရေမိ အန္တိမံ ဒေဟံ၊ သမ္မာသမ္ဗုဒ္ဓသာသနေ။

၂၁။

‘‘စတုန္နဝုတိတော ကပ္ပေ၊ ယံ ပုပ္ဖမဘိရောပယိံ။

ဒုဂ္ဂတိံ နာဘိဇာနာမိ၊ ပုပ္ဖပူဇာယိဒံ ဖလံ။

၂၂။

‘‘သမန္တဂန္ဓနာမာသုံ၊ တေရသ စက္ကဝတ္တိနော။

ဣတော ပဉ္စမကေ ကပ္ပေ၊ စာတုရန္တာ ဇနာဓိပါ။

၂၃။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ပဒပူဇကော ထေရော ဣမာ ဂါထာယော အဘာသိတ္ထာတိ။

ပဒပူဇကတ္ထေရဿာပဒါနံ စတုတ္ထံ။

၅။ မုဋ္ဌိပုပ္ဖိယတ္ထေရအပဒါနံ

၂၄။

‘‘သုဒဿနောတိ နာမေန၊ မာလာကာရော အဟံ တဒါ။

အဒ္ဒသံ ဝိရဇံ ဗုဒ္ဓံ၊ လောကဇေဋ္ဌံ နရာသဘံ။

၂၅။

‘‘ဇာတိပုပ္ဖံ ဂဟေတွာန၊ ပူဇယိံ ပဒုမုတ္တရံ။

ဝိသုဒ္ဓစက္ခု သုမနော၊ ဒိဗ္ဗစက္ခုံ သမဇ္ဈဂံ။

၂၆။

‘‘ဧတိဿာ ပုပ္ဖပူဇာယ၊ စိတ္တဿ ပဏိဓီဟိ စ။

ကပ္ပါနံ သတသဟဿံ၊ ဒုဂ္ဂတိံ နုပပဇ္ဇဟံ။

၂၇။

‘‘သောဠသာသိံသု ရာဇာနော၊ ဒေဝုတ္တရသနာမကာ။

ဆတ္တိံသမှိ ဣတော ကပ္ပေ၊ စက္ကဝတ္တီ မဟဗ္ဗလာ။

၂၈။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ မုဋ္ဌိပုပ္ဖိယော ထေရော ဣမာ ဂါထာယော အဘာသိတ္ထာတိ။

မုဋ္ဌိပုပ္ဖိယတ္ထေရဿာပဒါနံ ပဉ္စမံ။

၆။ ဥဒကပူဇကတ္ထေရအပဒါနံ

၂၉။

‘‘သုဝဏ္ဏဝဏ္ဏံ သမ္ဗုဒ္ဓံ၊ ဂစ္ဆန္တံ အနိလဉ္ဇသေ။

ဃတာသနံဝ ဇလိတံ၊ အာဒိတ္တံဝ ဟုတာသနံ။

၃၀။

‘‘ပါဏိနာ ဥဒကံ ဂယှ၊ အာကာသေ ဥက္ခိပိံ အဟံ။

သမ္ပဋိစ္ဆိ မဟာဝီရော၊ ဗုဒ္ဓေါ ကာရုဏိကော ဣသိ [မယိ (သျာ။)]။

၃၁။

‘‘အန္တလိက္ခေ ဌိတော သတ္ထာ၊ ပဒုမုတ္တရနာမကော။

မမ သင်္ကပ္ပမညာယ၊ ဣမံ ဂါထံ အဘာသထ။

၃၂။

‘‘‘ဣမိနာ ဒကဒါနေန၊ ဣတိဥပ္ပါဒနေန စ။

ကပ္ပသတသဟဿမ္ပိ၊ ဒုဂ္ဂတိံ နုပပဇ္ဇတိ’ [နုပပဇ္ဇသိ (က။)]။

၃၃။

‘‘တေန ကမ္မေန ဒွိပဒိန္ဒ၊ လောကဇေဋ္ဌ နရာသဘ။

ပတ္တောမှိ အစလံ ဌာနံ၊ ဟိတွာ ဇယပရာဇယံ။

၃၄။

‘‘သဟဿရာဇနာမေန ၊ တယော တေ စက္ကဝတ္တိနော။

ပဉ္စသဋ္ဌိကပ္ပသတေ၊ စာတုရန္တာ ဇနာဓိပါ။

၃၅။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ဥဒကပူဇကော ထေရော ဣမာ ဂါထာယော အဘာသိတ္ထာတိ။

ဥဒကပူဇကတ္ထေရဿာပဒါနံ ဆဋ္ဌံ။

၇။ နဠမာလိယတ္ထေရအပဒါနံ

၃၆။

‘‘ပဒုမုတ္တရဗုဒ္ဓဿ၊ လောကဇေဋ္ဌဿ တာဒိနော။

တိဏတ္ထရေ နိသိန္နဿ၊ ဥပသန္တဿ တာဒိနော။

၃၇။

‘‘နဠမာလံ ဂဟေတွာန၊ ဗန္ဓိတွာ [ဗီဇိတွာ (က။)] ဗီဇနိံ အဟံ။

ဗုဒ္ဓဿ ဥပနာမေသိံ၊ ဒွိပဒိန္ဒဿ တာဒိနော။

၃၈။

‘‘ပဋိဂ္ဂဟေတွာ သဗ္ဗညူ၊ ဗီဇနိံ လောကနာယကော။

မမ သင်္ကပ္ပမညာယ၊ ဣမံ ဂါထံ အဘာသထ။

၃၉။

‘‘‘ယထာ မေ ကာယော နိဗ္ဗာတိ၊ ပရိဠာဟော န ဝိဇ္ဇတိ။

တထေဝ တိဝိဓဂ္ဂီဟိ၊ စိတ္တံ တဝ ဝိမုစ္စတု’။

၄၀။

‘‘သဗ္ဗေ ဒေဝါ သမာဂစ္ဆုံ၊ ယေ ကေစိ ဝနနိဿိတာ။

သောဿာမ ဗုဒ္ဓဝစနံ၊ ဟာသယန္တဉ္စ ဒါယကံ။

၄၁။

‘‘နိသိန္နော ဘဂဝါ တတ္ထ၊ ဒေဝသံဃပုရက္ခတော။

ဒါယကံ သမ္ပဟံသေန္တော၊ ဣမာ ဂါထာ အဘာသထ။

၄၂။

‘‘‘ဣမိနာ ဗီဇနိဒါနေန၊ စိတ္တဿ ပဏိဓီဟိ စ။

သုဗ္ဗတော နာမ နာမေန၊ စက္ကဝတ္တီ ဘဝိဿတိ။

၄၃။

‘‘‘တေန ကမ္မာဝသေသေန၊ သုက္ကမူလေန စောဒိတော။

မာလုတော နာမ နာမေန၊ စက္ကဝတ္တီ ဘဝိဿတိ’။

၄၄။

‘‘‘ဣမိနာ ဗီဇနိဒါနေန၊ သမ္မာနဝိပုလေန စ။

ကပ္ပသတသဟဿမ္ပိ၊ ဒုဂ္ဂတိံ နုပပဇ္ဇတိ။

၄၅။

‘‘တိံသကပ္ပသဟဿမှိ၊ သုဗ္ဗတာ အဋ္ဌတိံသ တေ။

ဧကူနတိံသသဟဿေ၊ အဋ္ဌ မာလုတနာမကာ။

၄၆။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ နဠမာလိယော ထေရော ဣမာ ဂါထာယော အဘာသိတ္ထာတိ။

နဠမာလိယတ္ထေရဿာပဒါနံ သတ္တမံ။

သတ္တမဘာဏဝါရံ။

၈။ အာသနုပဋ္ဌာဟကတ္ထေရအပဒါနံ

၄၇။

‘‘ကာနနံ ဝနမောဂယှ၊ အပ္ပသဒ္ဒံ နိရာကုလံ။

သီဟာသနံ မယာ ဒိန္နံ၊ အတ္ထဒဿိဿ တာဒိနော။

၄၈။

‘‘မာလာဟတ္ထံ ဂဟေတွာန၊ ကတွာ စ နံ ပဒက္ခိဏံ။

သတ္ထာရံ ပယိရုပါသိတွာ၊ ပက္ကာမိံ ဥတ္တရာမုခေါ။

၄၉။

‘‘တေန ကမ္မေန ဒွိပဒိန္ဒ၊ လောကဇေဋ္ဌ နရာသဘ။

သန္နိဗ္ဗာပေမိ [သန္ဒိဋ္ဌာပေမိ (က။)] အတ္တာနံ၊ ဘဝါ သဗ္ဗေ သမူဟတာ။

၅၀။

‘‘အဋ္ဌာရသကပ္ပသတေ၊ ယံ ဒါနမဒဒိံ တဒါ။

ဒုဂ္ဂတိံ နာဘိဇာနာမိ၊ သီဟာသနဿိဒံ ဖလံ။

၅၁။

‘‘ဣတော သတ္တကပ္ပသတေ၊ သန္နိဗ္ဗာပက [သန္နိဋ္ဌော နာမ (က။)] ခတ္တိယော။

သတ္တရတနသမ္ပန္နော၊ စက္ကဝတ္တီ မဟဗ္ဗလော။

၅၂။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ အာသနုပဋ္ဌာဟကော ထေရော ဣမာ ဂါထာယော အဘာသိတ္ထာတိ။

အာသနုပဋ္ဌာဟကတ္ထေရဿာပဒါနံ အဋ္ဌမံ။

၉။ ဗိဠာလိဒါယကတ္ထေရအပဒါနံ

၅၃။

‘‘ဟိမဝန္တဿာဝိဒူရေ ၊ ဝသာမိ ပဏ္ဏသန္ထရေ။

ဃာသေသု ဂေဓမာပန္နော၊ သေယျသီလော စဟံ [သေယသီလောဝဟံ (သျာ။ က။)] တဒါ။

၅၄။

‘‘ခဏန္တာလု [ခဏမာလု (သျာ။)] ကလမ္ဗာနိ၊ ဗိဠာလိတက္ကလာနိ စ။

ကောလံ ဘလ္လာတကံ ဗိလ္လံ၊ အာဟတွာ ပဋိယာဒိတံ။

၅၅။

‘‘ပဒုမုတ္တရော လောကဝိဒူ၊ အာဟုတီနံ ပဋိဂ္ဂဟော။

မမ သင်္ကပ္ပမညာယ၊ အာဂစ္ဆိ မမ သန္တိကံ။

၅၆။

‘‘ဥပါဂတံ မဟာနာဂံ၊ ဒေဝဒေဝံ နရာသဘံ။

ဗိဠာလိံ ပဂ္ဂဟေတွာန၊ ပတ္တမှိ ဩကိရိံ အဟံ။

၅၇။

‘‘ပရိဘုဉ္ဇိ မဟာဝီရော၊ တောသယန္တော မမံ တဒါ။

ပရိဘုဉ္ဇိတွာန သဗ္ဗညူ၊ ဣမံ ဂါထံ အဘာသထ။

၅၈။

‘‘‘သကံ စိတ္တံ ပသာဒေတွာ၊ ဗိဠာလိံ မေ အဒါ တုဝံ။

ကပ္ပါနံ သတသဟဿံ၊ ဒုဂ္ဂတိံ နုပပဇ္ဇသိ’။

၅၉။

‘‘စရိမံ ဝတ္တတေ မယှံ၊ ဘဝါ သဗ္ဗေ သမူဟတာ။

ဓါရေမိ အန္တိမံ ဒေဟံ၊ သမ္မာသမ္ဗုဒ္ဓသာသနေ။

၆၀။

‘‘စတုပညာသိတော ကပ္ပေ၊ သုမေခလိယသဝှယော။

သတ္တရတနသမ္ပန္နော၊ စက္ကဝတ္တီ မဟဗ္ဗလော။

၆၁။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ဗိဠာလိဒါယကော ထေရော ဣမာ ဂါထာယော အဘာသိတ္ထာတိ။

ဗိဠာလိဒါယကတ္ထေရဿာပဒါနံ နဝမံ။

၁၀။ ရေဏုပူဇကတ္ထေရအပဒါနံ

၆၂။

‘‘သုဝဏ္ဏဝဏ္ဏံ သမ္ဗုဒ္ဓံ၊ သတရံသိံဝ ဘာဏုမံ။

ဩဘာသေန္တံ ဒိသာ သဗ္ဗာ၊ ဥဠုရာဇံဝ ပူရိတံ။

၆၃။

‘‘ပုရက္ခတံ သာဝကေဟိ၊ သာဂရေဟေဝ မေဒနိံ။

နာဂံ ပဂ္ဂယှ ရေဏူဟိ၊ ဝိပဿိဿာဘိရောပယိံ။

၆၄။

‘‘ဧကနဝုတိတော ကပ္ပေ၊ ယံ ရေဏုမဘိရောပယိံ။

ဒုဂ္ဂတိံ နာဘိဇာနာမိ၊ ဗုဒ္ဓပူဇာယိဒံ ဖလံ။

၆၅။

‘‘ပဏ္ဏတာလီသိတော ကပ္ပေ၊ ရေဏု နာမာသိ ခတ္တိယော။

သတ္တရတနသမ္ပန္နော၊ စက္ကဝတ္တီ မဟဗ္ဗလော။

၆၆။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ရေဏုပူဇကော ထေရော ဣမာ ဂါထာယော အဘာသိတ္ထာတိ။

ရေဏုပူဇကတ္ထေရဿာပဒါနံ ဒသမံ။

ဘိက္ခဒါယိဝဂ္ဂေါ ဧကာဒသမော။

တဿုဒ္ဒါနံ –

ဘိက္ခဒါယီ ဉာဏသညီ၊ ဟတ္ထိယော ပဒပူဇကော။

မုဋ္ဌိပုပ္ဖီ ဥဒကဒေါ၊ နဠမာလိ ဥပဋ္ဌကော။

ဗိဠာလိဒါယီ ရေဏု စ၊ ဂါထာယော ဆ စ သဋ္ဌိ စ။