သုဓါဝဂ္ဂ

၁၀။ သုဓါဝဂ္ဂ

၁။ သုဓါပိဏ္ဍိယတ္ထေရအပဒါန

၁။

‘‘ပူဇာရဟေ ပူဇယတော၊ ဗုဒ္ဓေ ယဒိ ဝ သာဝကေ။

ပပဉ္စသမတိက္ကန္တေ၊ တိဏ္ဏသောကပရိဒ္ဒဝေ။

၂။

‘‘တေ တာဒိသေ ပူဇယတော၊ နိဗ္ဗုတေ အကုတောဘယေ။

န သက္ကာ ပုညံ သင်္ခါတုံ၊ ဣမေတ္တမပိ [ဣဒမ္မတ္တန္တိ (သီ။)၊ ဣမေတ္ထမပိ (က။)] ကေနစိ။

၃။

‘‘စတုန္နမပိ ဒီပါနံ၊ ဣဿရံ ယောဓ ကာရယေ။

ဧကိဿာ ပူဇနာယေတံ၊ ကလံ နာဂ္ဃတိ သောဠသိံ။

၄။

‘‘သိဒ္ဓတ္ထဿ နရဂ္ဂဿ၊ စေတိယေ ဖလိတန္တရေ။

သုဓါပိဏ္ဍော မယာ ဒိန္နော၊ ဝိပ္ပသန္နေန စေတသာ။

၅။

‘‘စတုန္နဝုတိတော ကပ္ပေ၊ ယံ ကမ္မမကရိံ တဒါ။

ဒုဂ္ဂတိံ နာဘိဇာနာမိ၊ ပဋိသင်္ခါရဿိဒံ ဖလံ။

၆။

‘‘ဣတော တိံသတိကပ္ပမှိ၊ ပဋိသင်္ခါရသဝှယာ။

သတ္တရတနသမ္ပန္နာ၊ တေရသ စက္ကဝတ္တိနော။

၇။

‘‘ပဋိသမ္ဘိဒါ စတဿော၊ ဝိမောက္ခာပိ စ အဋ္ဌိမေ။

ဆဠဘိညာ သစ္ဆိကတာ၊ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ သုဓါပိဏ္ဍိယော ထေရော ဣမာ ဂါထာယော အဘာသိတ္ထာတိ။

သုဓါပိဏ္ဍိယတ္ထေရဿာပဒါနံ ပဌမံ။

၂။ သုစိန္တိကတ္ထေရအပဒါနံ

၈။

‘‘တိဿဿ လောကနာထဿ၊ သုဒ္ဓဣဌမဒါသဟံ။

ဟဋ္ဌော ဟဋ္ဌေန စိတ္တေန၊ ဗုဒ္ဓဿာဒိစ္စဗန္ဓုနော။

၉။

‘‘အဋ္ဌာရသေ [အဋ္ဌတိံသေ (သီ။ သျာ။)] ဣတော ကပ္ပေ၊ ရာဇာ အာသိံ မဟာရုစိ။

ဘောဂေါ စ ဝိပုလော အာသိ၊ သယနဉ္စ အနပ္ပကံ။

၁၀။

‘‘ဣဌံ ဗုဒ္ဓဿ ဒတွာန၊ ဝိပ္ပသန္နေန စေတသာ။

အနုဘောမိ သကံ ကမ္မံ၊ ပုဗ္ဗေ သုကတမတ္တနော။

၁၁။

‘‘ဒွေနဝုတေ ဣတော ကပ္ပေ၊ ယံ ဣဌမဒဒိံ တဒါ။

ဒုဂ္ဂတိံ နာဘိဇာနာမိ၊ ဣဌဒါနဿိဒံ ဖလံ။

၁၂။

‘‘အဋ္ဌတိံသေ ဣတော ကပ္ပေ၊ တယော တေ စက္ကဝတ္တိနော။

ရုစိ ဥပရုစိ စေဝ၊ မဟာရုစိ တတိယကော။

၁၃။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ သုစိန္တိကော ထေရော ဣမာ ဂါထာယော အဘာသိတ္ထာတိ။

သုစိန္တိကတ္ထေရဿာပဒါနံ ဒုတိယံ။

၃။ အဍ္ဎစေဠကတ္ထေရအပဒါနံ

၁၄။

‘‘တိဿဿာဟံ ဘဂဝတော၊ ဥပဍ္ဎဒုဿမဒါသဟံ။

ပရမကာပညပတ္တောမှိ [ပရမကာရုညပတ္တောမှိ (သျာ။ က။)]၊ ဒုဂ္ဂတေန [ဒုဂ္ဂန္ဓေန (သီ။)] သမပ္ပိတော။

၁၅။

‘‘ဥပဍ္ဎဒုဿံ ဒတွာန၊ ကပ္ပံ သဂ္ဂမှိ မောဒဟံ။

အဝသေသေသု ကပ္ပေသု၊ ကုသလံ ကာရိတံ မယာ။

၁၆။

‘‘ဒွေနဝုတေ ဣတော ကပ္ပေ၊ ယံ ဒုဿမဒဒိံ တဒါ။

ဒုဂ္ဂတိံ နာဘိဇာနာမိ၊ ဒုဿဒါနဿိဒံ ဖလံ။

၁၇။

‘‘ဧကူနပညာသကပ္ပမှိ [ဧကပညာသကပ္ပမှိ (သျာ။)]၊ ရာဇာနော စက္ကဝတ္တိနော။

သမန္တစ္ဆဒနာ နာမ၊ ဗာတ္တိံသာသုံ [ခတ္တိယာသုံ (သျာ။ က။)] ဇနာဓိပါ။

၁၈။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ အဍ္ဎစေဠကော ထေရော ဣမာ ဂါထာယော အဘာသိတ္ထာတိ။

အဍ္ဎစေဠကတ္ထေရဿာပဒါနံ တတိယံ။

၄။ သူစိဒါယကတ္ထေရအပဒါနံ

၁၉။

‘‘ကမ္မာရောဟံ ပုရေ အာသိံ၊ ဗန္ဓုမာယံ ပုရုတ္တမေ။

သူစိဒါနံ မယာ ဒိန္နံ၊ ဝိပဿိဿ မဟေသိနော။

၂၀။

‘‘ဝဇိရဂ္ဂသမံ ဉာဏံ၊ ဟောတိ ကမ္မေန တာဒိသံ။

ဝိရာဂေါမှိ ဝိမုတ္တောမှိ [ဝိဘဝေါမှိ ဝိဘတ္တောမှိ (က။)]၊ ပတ္တောမှိ အာသဝက္ခယံ။

၂၁။

‘‘အတီတေ စ ဘဝေ သဗ္ဗေ၊ ဝတ္တမာနေ စနာဂတေ [အတီတာ စ ဘဝါ သဗ္ဗေ၊ ဝတ္တမာနာ စ’နာဂတာ (သျာ။ က။)]။

ဉာဏေန ဝိစိနိံ သဗ္ဗံ၊ သူစိဒါနဿိဒံ ဖလံ။

၂၂။

‘‘ဧကနဝုတိတော ကပ္ပေ၊ သတ္တာသုံ ဝဇိရဝှယာ။

သတ္တရတနသမ္ပန္နာ၊ စက္ကဝတ္တီ မဟဗ္ဗလာ။

၂၃။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ သူစိဒါယကော ထေရော ဣမာ ဂါထာယော အဘာသိတ္ထာတိ။

သူစိဒါယကတ္ထေရဿာပဒါနံ စတုတ္ထံ။

၅။ ဂန္ဓမာလိယတ္ထေရအပဒါနံ

၂၄။

‘‘သိဒ္ဓတ္ထဿ ဘဂဝတော၊ ဂန္ဓထူပံ အကာသဟံ။

သုမနေဟိ ပဋိစ္ဆန္နံ၊ ဗုဒ္ဓါနုစ္ဆဝိကံ ကတံ။

၂၅။

‘‘ကဉ္စနဂ္ဃိယသင်္ကာသံ၊ ဗုဒ္ဓံ လောကဂ္ဂနာယကံ။

ဣန္ဒီဝရံဝ ဇလိတံ၊ အာဒိတ္တံဝ ဟုတာသနံ။

၂၆။

‘‘ဗျဂ္ဃူသဘံဝ ပဝရံ၊ အဘိဇာတံဝ ကေသရိံ။

နိသိန္နံ သမဏာနဂ္ဂံ၊ ဘိက္ခုသံဃပုရက္ခတံ။

၂၇။

‘‘ဝန္ဒိတွာ သတ္ထုနော ပါဒေ၊ ပက္ကာမိံ ဥတ္တရာမုခေါ။

စတုန္နဝုတိတော ကပ္ပေ၊ ဂန္ဓမာလံ ယတော အဒံ။

၂၈။

‘‘ဗုဒ္ဓေ ကတဿ ကာရဿ၊ ဖလေနာဟံ ဝိသေသတော။

ဒုဂ္ဂတိံ နာဘိဇာနာမိ၊ ဗုဒ္ဓပူဇာယိဒံ ဖလံ။

၂၉။

‘‘စတ္တာရီသမှိ ဧကူနေ၊ ကပ္ပေ အာသိံသု သောဠသ။

ဒေဝဂန္ဓသနာမာ တေ၊ ရာဇာနော စက္ကဝတ္တိနော။

၃၀။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ဂန္ဓမာလိယော ထေရော ဣမာ ဂါထာယော အဘာသိတ္ထာတိ။

ဂန္ဓမာလိယတ္ထေရဿာပဒါနံ ပဉ္စမံ။

၆။ တိပုပ္ဖိယတ္ထေရအပဒါနံ

၃၁။

‘‘မိဂလုဒ္ဒေါ ပုရေ အာသိံ၊ အရညေ ကာနနေ အဟံ [ဗြဟာ (သျာ။)]။

ပါဋလိံ ဟရိတံ ဒိသွာ၊ တီဏိ ပုပ္ဖာနိ ဩကိရိံ။

၃၂။

‘‘ပတိတပတ္တာနိ [သတ္တပတ္တာနိ (သီ။)၊ သတပတ္တာနိ (က။)၊ သုက္ခပဏ္ဏာနိ (သျာ။)] ဂဏှိတွာ၊ ဗဟိ ဆဍ္ဍေသဟံ တဒါ။

အန္တောသုဒ္ဓံ ဗဟိသုဒ္ဓံ၊ သုဝိမုတ္တံ အနာသဝံ။

၃၃။

‘‘သမ္မုခါ ဝိယ သမ္ဗုဒ္ဓံ၊ ဝိပသ္သိံ လောကနာယကံ။

ပါဋလိံ အဘိဝါဒေတွာ၊ တတ္ထ ကာလင်္ကတော အဟံ။

၃၄။

‘‘ဧကနဝုတိတော ကပ္ပေ၊ ယံ ဗောဓိမဘိပူဇယိံ။

ဒုဂ္ဂတိံ နာဘိဇာနာမိ၊ ဗောဓိပူဇာယိဒံ ဖလံ။

၃၅။

‘‘သမန္တပါသာဒိကာ နာမ၊ တေရသာသိံသု ရာဇိနော။

ဣတော တေတ္တိံသကပ္ပမှိ [တိံသတိကပ္ပမှိ (သျာ။)]၊ စက္ကဝတ္တီ မဟဗ္ဗလာ။

၃၆။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ တိပုပ္ဖိယော ထေရော ဣမာ ဂါထာယော အဘာသိတ္ထာတိ။

တိပုပ္ဖိယတ္ထေရဿာပဒါနံ ဆဋ္ဌံ။

၇။ မဓုပိဏ္ဍိကတ္ထေရအပဒါနံ

၃၇။

‘‘ဝိပိနေ [ဝိဝနေ (သျာ။ အဋ္ဌ။)] ကာနနေ ဒိသွာ၊ အပ္ပသဒ္ဒေ နိရာကုလေ။

သိဒ္ဓတ္ထံ ဣသိနံ သေဋ္ဌံ၊ အာဟုတီနံ ပဋိဂ္ဂဟံ။

၃၈။

‘‘နိဗ္ဗုတတ္တံ [နိဗ္ဗုတဂ္ဂံ (က။)၊ နိဗ္ဗူတိကံ (သျာ။)] မဟာနာဂံ၊ နိသဘာဇာနိယံ ယထာ။

ဩသဓိံဝ ဝိရောစန္တံ၊ ဒေဝသံဃနမဿိတံ။

၃၉။

‘‘ဝိတ္တိ မမာဟု တာဝဒေ [ဝိတ္တိ မေ ပါဟုနာ တာဝ (သီ။ သျာ။)]၊ ဉာဏံ ဥပ္ပဇ္ဇိ တာဝဒေ။

ဝုဋ္ဌိတဿ သမာဓိမှာ၊ မဓုံ ဒတွာန သတ္ထုနော။

၄၀။

‘‘ဝန္ဒိတွာ သတ္ထုနော ပါဒေ၊ ပက္ကာမိံ ပါစိနာမုခေါ။

စတုတ္တိံသမှိ ကပ္ပမှိ၊ ရာဇာ အာသိံ သုဒဿနော။

၄၁။

‘‘မဓု ဘိသေဟိ သဝတိ၊ ဘောဇနမှိ စ တာဝဒေ။

မဓုဝဿံ ပဝဿိတ္ထ၊ ပုဗ္ဗကမ္မဿိဒံ ဖလံ။

၄၂။

‘‘စတုန္နဝုတိတော ကပ္ပေ၊ ယံ မဓုံ အဒဒိံ တဒါ။

ဒုဂ္ဂတိံ နာဘိဇာနာမိ၊ မဓုဒါနဿိဒံ ဖလံ။

၄၃။

‘‘စတုတ္တိံသေ ဣတော ကပ္ပေ၊ စတ္တာရော တေ သုဒဿနာ။

သတ္တရတနသမ္ပန္နာ၊ စက္ကဝတ္တီ မဟဗ္ဗလာ။

၄၄။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ မဓုပိဏ္ဍိကော ထေရော ဣမာ ဂါထာယော အဘာသိတ္ထာတိ။

မဓုပိဏ္ဍိကတ္ထေရဿာပဒါနံ သတ္တမံ။

၈။ သေနာသနဒါယကတ္ထေရအပဒါနံ

၄၅။

‘‘သိဒ္ဓတ္ထဿ ဘဂဝတော၊ အဒါသိံ ပဏ္ဏသန္ထရံ။

သမန္တာ ဥပဟာရဉ္စ၊ ကုသုမံ ဩကိရိံ အဟံ။

၄၆။

‘‘ပါသာဒေဝံ ဂုဏံ ရမ္မံ [ပါသာဒေ စ ဂုဟံ ရမ္မံ (သျာ။)]၊ အနုဘောမိ မဟာရဟံ။

မဟဂ္ဃါနိ စ ပုပ္ဖာနိ၊ သယနေဘိသဝန္တိ မေ။

၄၇။

‘‘သယနေဟံ တုဝဋ္ဋာမိ၊ ဝိစိတ္တေ ပုပ္ဖသန္ထတေ။

ပုပ္ဖဝုဋ္ဌိ စ သယနေ၊ အဘိဝဿတိ တာဝဒေ။

၄၈။

‘‘စတုန္နဝုတိတော ကပ္ပေ၊ အဒါသိံ ပဏ္ဏသန္ထရံ။

ဒုဂ္ဂတိံ နာဘိဇာနာမိ၊ သန္ထရဿ ဣဒံ ဖလံ။

၄၉။

‘‘တိဏသန္ထရကာ နာမ၊ သတ္တေတေ စက္ကဝတ္တိနော။

ဣတော တေ ပဉ္စမေ ကပ္ပေ၊ ဥပ္ပဇ္ဇိံသု ဇနာဓိပါ။

၅၀။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ သေနာသနဒါယကော ထေရော ဣမာ ဂါထာယော အဘာသိတ္ထာတိ။

သေနာသနဒါယကတ္ထေရဿာပဒါနံ အဋ္ဌမံ။

၉။ ဝေယျာဝစ္စကတ္ထေရအပဒါနံ

၅၁။

‘‘ဝိပဿိဿ ဘဂဝတော၊ မဟာပူဂဂဏော အဟု။

ဝေယျာဝစ္စကရော အာသိံ၊ သဗ္ဗကိစ္စေသု ဝါဝဋော [ဗျာဝဋော (သီ။ သျာ။)]။

၅၂။

‘‘ဒေယျဓမ္မော စ မေ နတ္ထိ၊ သုဂတဿ မဟေသိနော။

အဝန္ဒိံ သတ္ထုနော ပါဒေ၊ ဝိပ္ပသန္နေန စေတသာ။

၅၃။

‘‘ဧကနဝုတိတော ကပ္ပေ၊ ဝေယျာဝစ္စံ အကာသဟံ။

ဒုဂ္ဂတိံ နာဘိဇာနာမိ၊ ဝေယျာဝစ္စဿိဒံ ဖလံ။

၅၄။

‘‘ဣတော စ အဋ္ဌမေ ကပ္ပေ၊ ရာဇာ အာသိံ သုစိန္တိတော။

သတ္တရတနသမ္ပန္နော၊ စက္ကဝတ္တီ မဟဗ္ဗလော။

၅၅။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ဝေယျာဝစ္စကော ထေရော ဣမာ ဂါထာယော အဘာသိတ္ထာတိ။

ဝေယျာဝစ္စကတ္ထေရဿာပဒါနံ နဝမံ။

၁၀။ ဗုဒ္ဓုပဋ္ဌာကတ္ထေရအပဒါနံ

၅၆။

‘‘ဝိပဿိဿ ဘဂဝတော၊ အဟောသိံ သင်္ခဓမ္မကော။

နိစ္စုပဋ္ဌာနယုတ္တောမှိ၊ သုဂတဿ မဟေသိနော။

၅၇။

‘‘ဥပဋ္ဌာနဖလံ ပဿ၊ လောကနာထဿ တာဒိနော။

သဋ္ဌိတူရိယသဟဿာနိ၊ ပရိဝါရေန္တိ မံ သဒါ။

၅၈။

‘‘ဧကနဝုတိတော ကပ္ပေ၊ ဥပဋ္ဌဟိံ မဟာဣသိံ။

ဒုဂ္ဂတိံ နာဘိဇာနာမိ၊ ဥပဋ္ဌာနဿိဒံ ဖလံ။

၅၉။

‘‘စတုဝီသေ [စတုနဝုတေ (သျာ။)] ဣတော ကပ္ပေ၊ မဟာနိဂ္ဃောသနာမကာ။

သောဠသာသိံသု ရာဇာနော၊ စက္ကဝတ္တီ မဟဗ္ဗလာ။

၆၀။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ဗုဒ္ဓုပဋ္ဌာကော ထေရော ဣမာ ဂါထာယော အဘာသိတ္ထာတိ။

ဗုဒ္ဓုပဋ္ဌာကတ္ထေရဿာပဒါနံ ဒသမံ။

သုဓါဝဂ္ဂေါ ဒသမော။

တဿုဒ္ဒါနံ –

သုဓါ သုစိန္တိ စေဠဉ္စ၊ သူစီ စ ဂန္ဓမာလိယော။

တိပုပ္ဖိယော မဓုသေနာ၊ ဝေယျာဝစ္စော စုပဋ္ဌကော။

သမသဋ္ဌိ စ ဂါထာယော၊ အသ္မိံ ဝဂ္ဂေ ပကိတ္တိတာ။

အထ ဝဂ္ဂုဒ္ဒါနံ –

ဗုဒ္ဓဝဂ္ဂေါ ဟိ ပဌမော၊ သီဟာသနိ သုဘူတိ စ။

ကုဏ္ဍဓါနော ဥပါလိ စ၊ ဗီဇနိသကစိန္တိ စ။

နာဂသမာလော တိမိရော၊ သုဓါဝဂ္ဂေန တေ ဒသ။

စတုဒ္ဒသသတာ ဂါထာ၊ ပဉ္စပညာသမေဝ စ။

ဗုဒ္ဓဝဂ္ဂဒသကံ။

ပဌမသတကံ သမတ္တံ။