တိမိရဝဂ္ဂ

၉။ တိမိရဝဂ္ဂ

၁။ တိမိရပုပ္ဖိယတ္ထေရအပဒါန

၁။

‘‘စန္ဒဘာဂါနဒီတီရေ ၊ အနုသောတံ ဝဇာမဟံ။

နိသိန္နံ သမဏံ ဒိသွာ၊ ဝိပ္ပသန္နမနာဝိလံ။

၂။

‘‘တတ္ထ စိတ္တံ ပသာဒေတွာ [ပသာဒေသိံ (သျာ။)]၊ ဧဝံ စိန္တေသဟံ တဒါ။

တာရယိဿတိ တိဏ္ဏောယံ၊ ဒန္တောယံ ဒမယိဿတိ။

၃။

‘‘အဿာသိဿတိ အဿတ္ထော၊ သန္တော စ သမယိဿတိ။

မောစယိဿတိ မုတ္တော စ၊ နိဗ္ဗာပေဿတိ နိဗ္ဗုတော။

၄။

‘‘ဧဝါဟံ စိန္တယိတွာန၊ သိဒ္ဓတ္ထဿ မဟေသိနော။

ဂဟေတွာ တိမိရပုပ္ဖံ၊ မတ္ထကေ ဩကိရိံ အဟံ [တဒါ (သျာ။)]။

၅။

‘‘အဉ္ဇလိံ ပဂ္ဂဟေတွာန၊ ကတွာ စ နံ ပဒက္ခိဏံ။

ဝန္ဒိတွာ သတ္ထုနော ပါဒေ၊ ပက္ကာမိံ အပရံ ဒိသံ။

၆။

‘‘အစိရံ ဂတမတ္တံ မံ၊ မိဂရာဇာ ဝိဟေဌယိ။

ပပါတမနုဂစ္ဆန္တော၊ တတ္ထေဝ ပပတိံ အဟံ။

၇။

‘‘စတုန္နဝုတိတော ကပ္ပေ၊ ယံ ပုပ္ဖမဘိရောပယိံ။

ဒုဂ္ဂတိံ နာဘိဇာနာမိ၊ ပုပ္ဖပူဇာယိဒံ [ဗုဒ္ဓပူဇာယိဒံ (သီ။ သျာ။)] ဖလံ။

၈။

‘‘ဆပ္ပညာသမှိ ကပ္ပမှိ၊ သတ္တေဝါသုံ မဟာယသာ [မဟာရဟာ (သျာ။ က။)]။

သတ္တရတနသမ္ပန္နာ၊ စက္ကဝတ္တီ မဟဗ္ဗလာ။

၉။

‘‘ပဋိသမ္ဘိဒါ စတဿော၊ ဝိမောက္ခာပိ စ အဋ္ဌိမေ။

ဆဠဘိညာ သစ္ဆိကတာ၊ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ တိမိရပုပ္ဖိယော ထေရော ဣမာ ဂါထာယော အဘာသိတ္ထာတိ။

တိမိရပုပ္ဖိယတ္ထေရဿာပဒါနံ ပဌမံ။

၂။ ဂတသညကတ္ထေရအပဒါနံ

၁၀။

‘‘ဇာတိယာ သတ္တဝဿောဟံ၊ ပဗ္ဗဇိံ အနဂါရိယံ။

အဝန္ဒိံ သတ္ထုနော ပါဒေ၊ ဝိပ္ပသန္နေန စေတသာ။

၁၁။

‘‘သတ္တနင်္ဂလကီပုပ္ဖေ၊ အာကာသေ ဥက္ခိပိံ အဟံ။

တိဿံ ဗုဒ္ဓံ သမုဒ္ဒိဿ၊ အနန္တဂုဏသာဂရံ။

၁၂။

‘‘သုဂတာနုဂတံ မဂ္ဂံ၊ ပူဇေတွာ ဟဋ္ဌမာနသော။

အဉ္ဇလိဉ္စ [အဉ္ဇလိဿ (က။)] တဒါကာသိံ၊ ပသန္နော သေဟိ ပါဏိဘိ။

၁၃။

‘‘ဒွေနဝုတေ ဣတော ကပ္ပေ၊ ယံ ကမ္မမကရိံ တဒါ။

ဒုဂ္ဂတိံ နာဘိဇာနာမိ၊ ဗုဒ္ဓပူဇာယိဒံ ဖလံ။

၁၄။

‘‘ဣတော အဋ္ဌမကေ ကပ္ပေ၊ တယော အဂ္ဂိသိခါ အဟု။

သတ္တရတနသမ္ပန္နာ၊ စက္ကဝတ္တီ မဟဗ္ဗလာ။

၁၅။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ဂတသညကော ထေရော ဣမာ ဂါထာယော အဘာသိတ္ထာတိ။

ဂတသညကတ္ထေရဿာပဒါနံ ဒုတိယံ။

၃။ နိပန္နဉ္ဇလိကတ္ထေရအပဒါနံ

၁၆။

‘‘ရုက္ခမူလေ နိသိန္နောဟံ၊ ဗျာဓိတော ပရမေန စ။

ပရမကာရုညပတ္တောမှိ၊ အရညေ ကာနနေ အဟံ။

၁၇။

‘‘အနုကမ္ပံ ဥပါဒါယ၊ တိဿော သတ္ထာ ဥပေသိ မံ။

သောဟံ နိပန္နကော သန္တော၊ သိရေ ကတွာန အဉ္ဇလိံ။

၁၈။

‘‘ပသန္နစိတ္တော သုမနော၊ သဗ္ဗသတ္တာနမုတ္တမံ။

သမ္ဗုဒ္ဓံ အဘိဝါဒေတွာ၊ တတ္ထ ကာလင်္ကတော အဟံ။

၁၉။

‘‘ဒွေနဝုတေ ဣတော ကပ္ပေ၊ ယံ ဝန္ဒိံ ပုရိသုတ္တမံ။

ဒုဂ္ဂတိံ နာဘိဇာနာမိ၊ ဝန္ဒနာယ ဣဒံ ဖလံ။

၂၀။

‘‘ဣတော ပဉ္စမကေ ကပ္ပေ၊ ပဉ္စေဝါသုံ မဟာသိခါ။

သတ္တရတနသမ္ပန္နာ၊ စက္ကဝတ္တီ မဟဗ္ဗလာ။

၂၁။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ နိပန္နဉ္ဇလိကော ထေရော ဣမာ ဂါထာယော အဘာသိတ္ထာတိ။

နိပန္နဉ္ဇလိကတ္ထေရဿာပဒါနံ တတိယံ။

၄။ အဓေါပုပ္ဖိယတ္ထေရအပဒါနံ

၂၂။

‘‘အဘိဘူ နာမ သော ဘိက္ခု၊ သိခိနော အဂ္ဂသာဝကော။

မဟာနုဘာဝေါ တေဝိဇ္ဇော၊ ဟိမဝန္တံ ဥပါဂမိ။

၂၃။

‘‘အဟမ္ပိ ဟိမဝန္တမှိ၊ ရမဏီယဿမေ ဣသိ။

ဝသာမိ အပ္ပမညာသု၊ ဣဒ္ဓီသု စ တဒါ ဝသီ။

၂၄။

‘‘ပက္ခိဇာတော ဝိယာကာသေ၊ ပဗ္ဗတံ အဓိဝတ္တယိံ [အဘိပတ္ထယိံ (သျာ။)၊ အဘိမတ္ထယိံ (က။)၊ အဓိဝတ္ထယိန္တိ ပဗ္ဗတဿ ဥပရိ ဂစ္ဆိန္တိအတ္ထော]။

အဓေါပုပ္ဖံ ဂဟေတွာန၊ အာဂစ္ဆိံ [အဂစ္ဆိံ (က။)] ပဗ္ဗတံ အဟံ။

၂၅။

‘‘သတ္တ ပုပ္ဖာနိ ဂဏှိတွာ၊ မတ္ထကေ ဩကိရိံ အဟံ။

အာလောကိတေ [အာလောကိတော (သျာ။)] စ ဝီရေန၊ ပက္ကာမိံ ပါစိနာမုခေါ။

၂၆။

‘‘အာဝါသံ အဘိသမ္ဘောသိံ၊ ပတွာန အဿမံ အဟံ။

ခါရိဘာရံ ဂဟေတွာန၊ ပါယာသိံ [ပါဝိသိံ (သီ။)] ပဗ္ဗတန္တရံ။

၂၇။

‘‘အဇဂရော မံ ဣဠေသိ၊ ဃောရရူပေါ မဟဗ္ဗလော။

ပုဗ္ဗကမ္မံ သရိတွာန၊ တတ္ထ ကာလင်္ကတော အဟံ။

၂၈။

‘‘ဧကတ္တိံသေ ဣတော ကပ္ပေ၊ ယံ ပုပ္ဖမဘိရောပယိံ။

ဒုဂ္ဂတိံ နာဘိဇာနာမိ၊ ပုပ္ဖပူဇာယိဒံ ဖလံ။

၂၉။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ အဓေါပုပ္ဖိယော ထေရော ဣမာ ဂါထာယော အဘာသိတ္ထာတိ။

အဓေါပုပ္ဖိယတ္ထေရဿာပဒါနံ စတုတ္ထံ။

၅။ ရံသိသညကတ္ထေရအပဒါနံ

၃၀။

‘‘ပဗ္ဗတေ ဟိမဝန္တမှိ၊ ဝါသံ ကပ္ပေသဟံ ပုရေ။

အဇိနုတ္တရဝါသောဟံ၊ ဝသာမိ ပဗ္ဗတန္တရေ။

၃၁။

‘‘သုဝဏ္ဏဝဏ္ဏံ သမ္ဗုဒ္ဓံ၊ သတရံသိံဝ ဘာဏုမံ။

ဝနန္တရဂတံ ဒိသွာ၊ သာလရာဇံဝ ပုပ္ဖိတံ။

၃၂။

‘‘ရံသျာ [ရံသေ (သျာ။ က။)] စိတ္တံ ပသာဒေတွာ၊ ဝိပဿိဿ မဟေသိနော။

ပဂ္ဂယှ အဉ္ဇလိံ ဝန္ဒိံ၊ သိရသာ ဥက္ကုဋီ [သိရသာ ဥက္ကုဋိကော (သျာ။)၊ သိရသုက္ကုဋိကော (က။)] အဟံ။

၃၃။

‘‘ဧကနဝုတိတော ကပ္ပေ၊ ယံ ကမ္မမကရိံ တဒါ။

ဒုဂ္ဂတိံ နာဘိဇာနာမိ၊ ရံသိသညာယိဒံ ဖလံ။

၃၄။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ရံသိသညကော ထေရော ဣမာ ဂါထာယော အဘာသိတ္ထာတိ။

ရံသိသညကတ္ထေရဿာပဒါနံ ပဉ္စမံ။

၆။ ဒုတိယရံသိသညကတ္ထေရအပဒါနံ

၃၅။

‘‘ပဗ္ဗတေ ဟိမဝန္တမှိ၊ ဝါကစီရဓရော အဟံ။

စင်္ကမဉ္စ သမာရူဠ္ဟော၊ နိသီဒိံ ပါစိနာမုခေါ။

၃၆။

‘‘ပဗ္ဗတေ သုဂတံ ဒိသွာ၊ ဖုဿံ ဈာနရတံ တဒါ။

အဉ္ဇလိံ ပဂ္ဂဟေတွာန၊ ရံသျာ စိတ္တံ ပသာဒယိံ။

၃၇။

‘‘ဒွေနဝုတေ ဣတော ကပ္ပေ၊ ယံ သညမလဘိံ တဒါ။

ဒုဂ္ဂတိံ နာဘိဇာနာမိ၊ ရံသိသညာယိဒံ ဖလံ။

၃၈။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ရံသိသညကော ထေရော ဣမာ ဂါထာယော အဘာသိတ္ထာတိ။

ဒုတိယရံသိသညကတ္ထေရဿာပဒါနံ ဆဋ္ဌံ။

၇။ ဖလဒါယကတ္ထေရအပဒါနံ

၃၉။

‘‘ပဗ္ဗတေ ဟိမဝန္တမှိ၊ ခရာဇိနဓရော အဟံ။

ဖုဿံ ဇိနဝရံ ဒိသွာ၊ ဖလဟတ္ထော ဖလံ အဒံ။

၄၀။

‘‘ယမဟံ ဖလမဒါသိံ၊ ဝိပ္ပသန္နေန စေတသာ။

ဘဝေ နိဗ္ဗတ္တမာနမှိ၊ ဖလံ နိဗ္ဗတ္တတေ မမ။

၄၁။

‘‘ဒွေနဝုတေ ဣတော ကပ္ပေ၊ ယံ ဖလံ အဒဒိံ အဟံ။

ဒုဂ္ဂတိံ နာဘိဇာနာမိ၊ ဖလဒါနဿိဒံ ဖလံ။

၄၂။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ဖလဒါယကော ထေရော ဣမာ ဂါထာယော အဘာသိတ္ထာတိ။

ဖလဒါယကတ္ထေရဿာပဒါနံ သတ္တမံ။

၈။ သဒ္ဒသညကတ္ထေရအပဒါနံ

၄၃။

‘‘ပဗ္ဗတေ ဟိမဝန္တမှိ၊ ဝသာမိ ပဏ္ဏသန္ထရေ။

ဖုဿဿ ဓမ္မံ ဘဏတော၊ သဒ္ဒေ စိတ္တံ ပသာဒယိံ။

၄၄။

‘‘ဒွေနဝုတေ ဣတော ကပ္ပေ၊ ယံ ကမ္မမကရိံ တဒါ။

ဒုဂ္ဂတိံ နာဘိဇာနာမိ၊ ပုညကမ္မဿိဒံ ဖလံ။

၄၅။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ သဒ္ဒသညကော ထေရော ဣမာ ဂါထာယော အဘာသိတ္ထာတိ။

သဒ္ဒသညကတ္ထေရဿာပဒါနံ အဋ္ဌမံ။

၉။ ဗောဓိသိဉ္စကတ္ထေရအပဒါနံ

၄၆။

‘‘ဝိပဿိဿ ဘဂဝတော၊ မဟာဗောဓိမဟော အဟု။

ပဗ္ဗဇ္ဇုပဂတော သန္တော၊ ဥပဂစ္ဆိံ အဟံ တဒါ။

၄၇။

‘‘ကုသုမောဒကမာဒါယ ၊ ဗောဓိယာ ဩကိရိံ အဟံ။

မောစယိဿတိ နော မုတ္တော၊ နိဗ္ဗာပေဿတိ နိဗ္ဗုတော။

၄၈။

‘‘ဧကနဝုတိတော ကပ္ပေ၊ ယံ ဗောဓိမဘိသိဉ္စယိံ။

ဒုဂ္ဂတိံ နာဘိဇာနာမိ၊ ဗောဓိသိဉ္စာယိဒံ ဖလံ။

၄၉။

‘‘တေတ္တိံသေ ဝတ္တမာနမှိ၊ ကပ္ပေ အာသုံ ဇနာဓိပါ။

ဥဒကသေစနာ နာမ၊ အဋ္ဌေတေ စက္ကဝတ္တိနော။

၅၀။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ဗောဓိသိဉ္စကော ထေရော ဣမာ ဂါထာယော အဘာသိတ္ထာတိ။

ဗောဓိသိဉ္စကတ္ထေရဿာပဒါနံ နဝမံ။

၁၀။ ပဒုမပုပ္ဖိယတ္ထေရအပဒါနံ

၅၁။

‘‘ပေါက္ခရဝနံ ပဝိဋ္ဌော၊ ဘဉ္ဇန္တော ပဒုမာနိဟံ။

တတ္ထဒ္ဒသံ ဖုဿံ ဗုဒ္ဓံ [အဒ္ဒသံ ဖုဿသမ္ဗုဒ္ဓံ (သီ။ သျာ။)]၊ ဗာတ္တိံသဝရလက္ခဏံ။

၅၂။

‘‘ပဒုမပုပ္ဖံ ဂဟေတွာန၊ အာကာသေ ဥက္ခိပိံ အဟံ။

ပါပကမ္မံ သရိတွာန၊ ပဗ္ဗဇိံ အနဂါရိယံ။

၅၃။

‘‘ပဗ္ဗဇိတွာန ကာယေန၊ မနသာ သံဝုတေန စ။

ဝစီဒုစ္စရိတံ ဟိတွာ၊ အာဇီဝံ ပရိသောဓယိံ။

၅၄။

‘‘ဒွေနဝုတေ ဣတော ကပ္ပေ၊ ယံ ပုပ္ဖမဘိရောပယိံ။

ဒုဂ္ဂတိံ နာဘိဇာနာမိ၊ ဗုဒ္ဓပူဇာယိဒံ ဖလံ။

၅၅။

‘‘ပဒုမာဘာသနာမာ စ၊ အဋ္ဌာရသ မဟီပတီ။

အဋ္ဌာရသေသု ကပ္ပေသု၊ အဋ္ဌတာလီသမာသိသုံ။

၅၆။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ပဒုမပုပ္ဖိယော ထေရော ဣမာ ဂါထာယော အဘာသိတ္ထာတိ။

ပဒုမပုပ္ဖိယတ္ထေရဿာပဒါနံ ဒသမံ။

တိမိရဝဂ္ဂေါ နဝမော။

တဿုဒ္ဒါနံ –

တိမိရနင်္ဂလီပုပ္ဖ၊ နိပ္ပန္နဉ္ဇလိကော အဓေါ။

ဒွေ ရံသိသညီ ဖလဒေါ၊ သဒ္ဒသညီ စ သေစကော။

ပဒ္မပုပ္ဖီ စ ဂါထာယော၊ ဆပ္ပညာသ ပကိတ္တိတာ။