နာဂသမာလဝဂ္ဂ

၈။ နာဂသမာလဝဂ္ဂ

၁။ နာဂသမာလတ္ထေရအပဒါန

၁။

‘‘အပါဋလိံ အဟံ ပုပ္ဖံ၊ ဥဇ္ဈိတံ သုမဟာပထေ။

ထူပမှိ အဘိရောပေသိံ၊ သိခိနော လောကဗန္ဓုနော။

၂။

‘‘ဧကတ္တိံသေ ဣတော ကပ္ပေ၊ ယံ ကမ္မမကရိံ တဒါ။

ဒုဂ္ဂတိံ နာဘိဇာနာမိ၊ ထူပပူဇာယိဒံ ဖလံ။

၃။

‘‘ဣတော ပန္နရသေ ကပ္ပေ၊ ဘူမိယော [ပုပ္ဖိယော (သျာ။)] နာမ ခတ္တိယော။

သတ္တရတနသမ္ပန္နော၊ စက္ကဝတ္တီ မဟဗ္ဗလော။

၄။

‘‘ပဋိသမ္ဘိဒါ စတဿော၊ ဝိမောက္ခာပိ စ အဋ္ဌိမေ။

ဆဠဘိညာ သစ္ဆိကတာ၊ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ နာဂသမာလော ထေရော ဣမာ ဂါထာယော အဘာသိတ္ထာတိ။

နာဂသမာလတ္ထေရဿာပဒါနံ ပဌမံ။

၂။ ပဒသညကတ္ထေရအပဒါနံ

၅။

‘‘အက္ကန္တဉ္စ ပဒံ ဒိသွာ၊ တိဿဿာဒိစ္စဗန္ဓုနော။

ဟဋ္ဌော ဟဋ္ဌေန စိတ္တေန၊ ပဒေ စိတ္တံ ပသာဒယိံ။

၆။

‘‘ဒွေနဝုတေ ဣတော ကပ္ပေ၊ ယံ သညမလဘိံ တဒါ။

ဒုဂ္ဂတိံ နာဘိဇာနာမိ၊ ပဒသညာယိဒံ ဖလံ။

၇။

‘‘ဣတော သတ္တမကေ ကပ္ပေ၊ သုမေဓေါ နာမ ခတ္တိယော။

သတ္တရတနသမ္ပန္နော၊ စက္ကဝတီ မဟဗ္ဗလော။

၈။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ပဒသညကော ထေရော ဣမာ ဂါထာယော အဘာသိတ္ထာတိ။

ပဒသညကတ္ထေရဿာပဒါနံ ဒုတိယံ။

၃။ ဗုဒ္ဓသညကတ္ထေရအပဒါနံ

၉။

‘‘ဒုမဂ္ဂေ ပံသုကူလိကံ၊ လဂ္ဂံ ဒိသွာန သတ္ထုနော။

တတော တမဉ္ဇလိံ ကတွာ၊ ပံသုကူလံ အဝန္ဒဟံ။

၁၀။

‘‘ဒွေနဝုတေ ဣတော ကပ္ပေ၊ ယံ ကမ္မမကရိံ တဒါ။

ဒုဂ္ဂတိံ နာဘိဇာနာမိ၊ ဗုဒ္ဓသညာယိဒံ ဖလံ။

၁၁။

‘‘ဣတော စတုတ္ထကေ ကပ္ပေ၊ ဒုမသာရောသိ ခတ္တိယော။

စာတုရန္တော ဝိဇိတာဝီ၊ စက္ကဝတ္တီ မဟဗ္ဗလော။

၁၂။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ဗုဒ္ဓသညကော ထေရော ဣမာ ဂါထာယော အဘာသိတ္ထာတိ။

ဗုဒ္ဓသညကတ္ထေရဿာပဒါနံ တတိယံ။

၄။ ဘိသာလုဝဒါယကတ္ထေရအပဒါနံ

၁၃။

‘‘ကာနနံ ဝနမောဂယှ၊ ဝသာမိ ဝိပိနေ အဟံ။

ဝိပသ္သိံ အဒ္ဒသံ ဗုဒ္ဓံ၊ အာဟုတီနံ ပဋိဂ္ဂဟံ။

၁၄။

‘‘ဘိသာလုဝဉ္စ ပါဒါသိံ၊ ဥဒကံ ဟတ္ထဓေါဝနံ။

ဝန္ဒိတွာ သိရသာ ပါဒေ၊ ပက္ကာမိ ဥတ္တရာမုခေါ။

၁၅။

‘‘ဧကနဝုတိတော ကပ္ပေ၊ ဘိသာလုဝမဒံ တဒါ။

ဒုဂ္ဂတိံ နာဘိဇာနာမိ၊ ပုညကမ္မဿိဒံ ဖလံ။

၁၆။

‘‘ဣတော တတိယကေ ကပ္ပေ၊ ဘိသသမ္မတခတ္တိယော။

သတ္တရတနသမ္ပန္နော၊ စက္ကဝတ္တီ မဟဗ္ဗလော။

၁၇။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ဘိသာလုဝဒါယကော ထေရော ဣမာ ဂါထာယော အဘာသိတ္ထာတိ။

ဘိသာလုဝဒါယကတ္ထေရဿာပဒါနံ စတုတ္ထံ။

ဆဋ္ဌဘာဏဝါရံ။

၅။ ဧကသညကတ္ထေရအပဒါနံ

၁၈။

‘‘ခဏ္ဍော နာမာသိ နာမေန၊ ဝိပဿိဿဂ္ဂသာဝကော။

ဧကာ ဘိက္ခာ မယာ ဒိန္နာ၊ လောကာဟုတိပဋိဂ္ဂဟေ။

၁၉။

‘‘တေန စိတ္တပ္ပသာဒေန၊ ဒွိပဒိန္ဒ နရာသဘ။

ဒုဂ္ဂတိံ နာဘိဇာနာမိ၊ ဧကဘိက္ခာယိဒံ ဖလံ။

၂၀။

‘‘စတ္တာလီသမှိတော ကပ္ပေ၊ ဝရုဏော နာမ ခတ္တိယော။

သတ္တရတနသမ္ပန္နော၊ စက္ကဝတ္တီ မဟဗ္ဗလော။

၂၁။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ဧကသညကော ထေရော ဣမာ ဂါထာယော အဘာသိတ္ထာတိ။

ဧကသညကတ္ထေရဿာပဒါနံ ပဉ္စမံ။

၆။ တိဏသန္ထရဒါယကတ္ထေရအပဒါနံ

၂၂။

‘‘ဟိမဝန္တဿာဝိဒူရေ၊ မဟာဇာတဿရော အဟု။

သတပတ္တေဟိ သဉ္ဆန္နော၊ နာနာသကုဏမာလယော။

၂၃။

‘‘တမှိ နှတွာ စ ပိတွာ [ဣတွာ (သီ။ သျာ။)] စ၊ အဝိဒူရေ ဝသာမဟံ။

အဒ္ဒသံ သမဏာနဂ္ဂံ၊ ဂစ္ဆန္တံ အနိလဉ္ဇသေ။

၂၄။

‘‘မမ သင်္ကပ္ပမညာယ၊ သတ္ထာ လောကေ အနုတ္တရော။

အဗ္ဘတော ဩရုဟိတွာန၊ ဘူမိယံဌာသိ တာဝဒေ။

၂၅။

‘‘ဝိသာဏေန [လာယနေန (သျာ။)] တိဏံ ဂယှ၊ နိသီဒနမဒါသဟံ။

နိသီဒိ ဘဂဝါ တတ္ထ၊ တိဿော လောကဂ္ဂနာယကော။

၂၆။

‘‘သကံ စိတ္တံ ပသာဒေတွာ၊ အဝန္ဒိ လောကနာယကံ။

ပဋိကုဋိကော [ဥက္ကုဋိကော (သျာ။ က။)] အပသက္ကိံ၊ နိဇ္ဈာယန္တော မဟာမုနိံ။

၂၇။

‘‘တေန စိတ္တပ္ပသာဒေန၊ နိမ္မာနံ ဥပပဇ္ဇဟံ။

ဒုဂ္ဂတိံ နာဘိဇာနာမိ၊ သန္ထရဿ ဣဒံ ဖလံ။

၂၈။

‘‘ဣတော ဒုတိယကေ ကပ္ပေ၊ မိဂ [မိတ္တ (သျာ။)] သမ္မတခတ္တိယော။

သတ္တရတနသမ္ပန္နော၊ စက္ကဝတ္တီ မဟဗ္ဗလော။

၂၉။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ တိဏသန္ထရဒါယကော ထေရော ဣမာ ဂါထာယော အဘာသိတ္ထာတိ။

တိဏသန္ထရဒါယကတ္ထေရဿာပဒါနံ ဆဋ္ဌံ။

၇။ သူစိဒါယကတ္ထေရအပဒါနံ

၃၀။

‘‘တိံသကပ္ပသဟဿမှိ၊ သမ္ဗုဒ္ဓေါ လောကနာယကော။

သုမေဓေါ နာမ နာမေန၊ ဗာတ္တိံသဝရလက္ခဏော။

၃၁။

‘‘တဿ ကဉ္စနဝဏ္ဏဿ၊ ဒွိပဒိန္ဒဿ တာဒိနော။

ပဉ္စ သူစီ မယာ ဒိန္နာ၊ သိဗ္ဗနတ္ထာယ စီဝရံ။

၃၂။

‘‘တေနေဝ သူစိဒါနေန၊ နိပုဏတ္ထဝိပဿကံ။

တိက္ခံ လဟုဉ္စ ဖာသုဉ္စ၊ ဉာဏံ မေ ဥဒပဇ္ဇထ။

၃၃။

‘‘ကိလေသာ ဈာပိတာ မယှံ၊ ဘဝါ သဗ္ဗေ သမူဟတာ။

ဓါရေမိ အန္တိမံ ဒေဟံ၊ သမ္မာသမ္ဗုဒ္ဓသာသနေ။

၃၄။

‘‘ဒွိပဒါဓိပတီ နာမ၊ ရာဇာနော စတုရော အဟုံ။

သတ္တရတနသမ္ပန္နာ၊ စက္ကဝတ္တီ မဟဗ္ဗလာ။

၃၅။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ သူစိဒါယကော ထေရော ဣမာ ဂါထာယော အဘာသိတ္ထာတိ။

သူစိဒါယကတ္ထေရဿာပဒါနံ သတ္တမံ။

၈။ ပါဋလိပုပ္ဖိယတ္ထေရအပဒါနံ

၃၆။

‘‘သုဝဏ္ဏဝဏ္ဏံ သမ္ဗုဒ္ဓံ၊ ဂစ္ဆန္တံ အန္တရာပဏေ။

ကဉ္စနဂ္ဃိယသင်္ကာသံ၊ ဗာတ္တိံသဝရလက္ခဏံ။

၃၇။

‘‘သေဋ္ဌိပုတ္တော တဒါ အာသိံ၊ သုခုမာလော သုခေဓိတော။

ဥစ္ဆင်္ဂေ ပါဋလိပုပ္ဖံ၊ ကတွာန [ကတွာ တံ (သီ။ သျာ။)] အဘိသံဟရိံ။

၃၈။

‘‘ဟဋ္ဌော ဟဋ္ဌေန စိတ္တေန၊ ပုပ္ဖေဟိ အဘိပူဇယိံ။

တိဿံ လောကဝိဒုံ နာထံ၊ နရဒေဝံ နမဿဟံ။

၃၉။

‘‘ဒွေနဝုတေ ဣတော ကပ္ပေ၊ ယံ ကမ္မမကရိံ တဒါ။

ဒုဂ္ဂတိံ နာဘိဇာနာမိ၊ ပုပ္ဖပူဇာယိဒံ ဖလံ။

၄၀။

‘‘ဣတော တေသဋ္ဌိကပ္ပမှိ၊ အဘိသမ္မတနာမကော။

သတ္တရတနသမ္ပန္နော၊ စက္ကဝတ္တီ မဟဗ္ဗလော။

၄၁။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ပါဋလိပုပ္ဖိယော ထေရော ဣမာ ဂါထာယော အဘာသိတ္ထာတိ။

ပါဋလိပုပ္ဖိယတ္ထေရဿာပဒါနံ အဋ္ဌမံ။

၉။ ဌိတဉ္ဇလိယတ္ထေရအပဒါနံ

၄၂။

‘‘မိဂလုဒ္ဒေါ ပုရေ အာသိံ၊ အရညေ ကာနနေ အဟံ။

တတ္ထ အဒ္ဒသံ [တတ္ထဒ္ဒသာသိံ (သီ။ သျာ။)] သမ္ဗုဒ္ဓံ၊ ဗာတ္တိံသဝရလက္ခဏံ။

၄၃။

‘‘တတ္ထာဟံ အဉ္ဇလိံ ကတွာ၊ ပက္ကာမိံ ပါစိနာမုခေါ။

အဝိဒူရေ နိသိန္နဿ၊ နိယကေ ပဏ္ဏသန္ထရေ။

၄၄။

‘‘တတော မေ အသနီပါတော၊ မတ္ထကေ နိပတီ တဒါ။

သောဟံ မရဏကာလမှိ၊ အကာသိံ ပုနရဉ္ဇလိံ။

၄၅။

‘‘ဒွေနဝုတေ ဣတော ကပ္ပေ၊ အဉ္ဇလိံ အကရိံ တဒါ။

ဒုဂ္ဂတိံ နာဘိဇာနာမိ၊ အဉ္ဇလိဿ ဣဒံ ဖလံ။

၄၆။

‘‘စတုပဏ္ဏာသကပ္ပမှိ၊ မိဂကေတုသနာမကော။

သတ္တရတနသမ္ပန္နော၊ စက္ကဝတ္တီ မဟဗ္ဗလော။

၄၇။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ဌိတဉ္ဇလိယော ထေရော ဣမာ ဂါထာယော အဘာသိတ္ထာတိ။

ဌိတဉ္ဇလိယတ္ထေရဿာပဒါနံ နဝမံ။

၁၀။ တိပဒုမိယတ္ထေရအပဒါနံ

၄၈။

‘‘ပဒုမုတ္တရော နာမ ဇိနော၊ သဗ္ဗဓမ္မာန ပါရဂူ။

ဒန္တော ဒန္တပရိဝုတော၊ နဂရာ နိက္ခမီ တဒါ။

၄၉။

‘‘နဂရေ ဟံသဝတိယံ၊ အဟောသိံ မာလိကော တဒါ။

ယံ တတ္ထ ဥတ္တမံ တောဏိ၊ ပဒ္မပုပ္ဖာနိ [ဥတ္တမံ ပုပ္ဖံ၊ တီဏိ ပုပ္ဖာနိ (သီ။)] အဂ္ဂဟိံ။

၅၀။

‘‘အဒ္ဒသံ ဝိရဇံ ဗုဒ္ဓံ၊ ပဋိမဂ္ဂန္တရာပဏေ။

သဟ [သောဟံ (သီ။)] ဒိသွာန သမ္ဗုဒ္ဓံ၊ ဧဝံ စိန္တေသဟံ တဒါ။

၅၁။

‘‘ကိံ မေ ဣမေဟိ ပုပ္ဖေဟိ၊ ရညော ဥပနိတေဟိ မေ။

ဂါမံ ဝါ ဂါမခေတ္တံ ဝါ၊ သဟဿံ ဝါ လဘေယျဟံ။

၅၂။

‘‘အဒန္တဒမနံ ဝီရံ၊ သဗ္ဗသတ္တသုခါဝဟံ။

လောကနာထံ ပူဇယိတွာ၊ လစ္ဆာမိ အမတံ ဓနံ။

၅၃။

‘‘ဧဝါဟံ စိန္တယိတွာန၊ သကံ စိတ္တံ ပသာဒယိံ။

တီဏိ လောဟိတကေ ဂယှ၊ အာကာသေ ဥက္ခိပိံ တဒါ။

၅၄။

‘‘မယာ ဥက္ခိတ္တမတ္တမှိ၊ အာကာသေ ပတ္ထရိံသု တေ။

ဓါရိံသု မတ္ထကေ တတ္ထ၊ ဥဒ္ဓံဝဏ္ဋာ အဓေါမုခါ။

၅၅။

‘‘ယေ ကေစိ မနုဇာ ဒိသွာ၊ ဥက္ကုဋ္ဌိံ သမ္ပဝတ္တယုံ။

ဒေဝတာ အန္တလိက္ခမှိ၊ သာဓုကာရံ ပဝတ္တယုံ။

၅၆။

‘‘အစ္ဆေရံ လောကေ ဥပ္ပန္နံ၊ ဗုဒ္ဓသေဋ္ဌဿ ဝါဟသာ။

သဗ္ဗေ ဓမ္မံ သုဏိဿာမ၊ ပုပ္ဖာနံ ဝါဟသာ မယံ။

၅၇။

‘‘ပဒုမုတ္တရော လောကဝိဒူ၊ အာဟုတီနံ ပဋိဂ္ဂဟော။

ဝီထိယဉှိ ဌိတော သန္တော၊ ဣမာ ဂါထာ အဘာသထ။

၅၈။

‘‘‘ယော သော ဗုဒ္ဓံ အပူဇေသိ၊ ရတ္တပဒ္မေဟိ [ရတ္တပဒုမေဟိ (သီ။ သျာ။)] မာဏဝေါ။

တမဟံ ကိတ္တယိဿာမိ၊ သုဏာထ မမ ဘာသတော။

၅၉။

‘‘‘တိံသကပ္ပသဟဿာနိ၊ ဒေဝလောကေ ရမိဿတိ။

တိံသကပ္ပါနိ [တိံသက္ခတ္တုဉ္စ (သျာ။)] ဒေဝိန္ဒော၊ ဒေဝရဇ္ဇံ ကရိဿတိ။

၆၀။

‘‘‘မဟာဝိတ္ထာရိကံ နာမ၊ ဗျမှံ ဟေဿတိ တာဝဒေ။

တိယောဇနသတုဗ္ဗိဒ္ဓံ၊ ဒိယဍ္ဎသတဝိတ္ထတံ။

၆၁။

‘‘‘စတ္တာရိသတသဟဿာနိ ၊ နိယ္ယူဟာ စ သုမာပိတာ။

ကူဋာဂါရဝရူပေတာ၊ မဟာသယနမဏ္ဍိတာ။

၆၂။

‘‘‘ကောဋိသတသဟဿိယော ၊ ပရိဝါရေဿန္တိ အစ္ဆရာ။

ကုသလာ နစ္စဂီတဿ၊ ဝါဒိတေပိ ပဒက္ခိဏာ။

၆၃။

‘‘‘ဧတာဒိသေ ဗျမှဝရေ၊ နာရီဂဏသမာကုလေ။

ဝဿိဿတိ ပုပ္ဖဝဿော၊ ဒိဗ္ဗော [ပဒ (က။)] လောဟိတကော သဒါ။

၆၄။

‘‘‘ဘိတ္တိခီလေ နာဂဒန္တေ၊ ဒွါရဗာဟာယ တောရဏေ။

စက္ကမတ္တာ လောဟိတကာ၊ ဩလမ္ဗိဿန္တိ တာဝဒေ။

၆၅။

‘‘‘ပတ္တေန ပတ္တသဉ္ဆန္နေ၊ အန္တောဗျမှဝရေ ဣမံ။

အတ္ထရိတွာ ပါရုပိတွာ၊ တုဝဋ္ဋိဿန္တိ တာဝဒေ။

၆၆။

‘‘‘ဘဝနံ ပရိဝါရေတွာ၊ သမန္တာ သတယောဇနေ။

တေပိ ပဒ္မာ [တေ ဝိသုဒ္ဓါ (သီ။ သျာ။)] လောဟိတကာ၊ ဒိဗ္ဗဂန္ဓံ ပဝါယရေ။

၆၇။

‘‘‘ပဉ္စသတ္တတိက္ခတ္တုဉ္စ၊ စက္ကဝတ္တီ ဘဝိဿတိ။

ပဒေသရဇ္ဇံ ဝိပုလံ၊ ဂဏနာတော အသံခိယံ။

၆၈။

‘‘‘သမ္ပတ္တိယော ဒုဝေ ဘုတွာ၊ အနီတိ အနုပဒ္ဒဝေါ။

သမ္ပတ္တေ ပရိယောသာနေ၊ နိဗ္ဗာနံ ပါပုဏိဿတိ’ [ဖဿယိဿတိ (သီ။)၊ ပဿယိဿတိ (က။)]။

၆၉။

‘‘သုဒိဋ္ဌော ဝတ မေ ဗုဒ္ဓေါ၊ ဝါဏိဇ္ဇံ သုပယောဇိတံ။

ပဒ္မာနိ တီဏိ ပူဇေတွာ၊ အနုဘောသိံ တိသမ္ပဒါ [အနုဘူယန္တိ သမ္ပဒါ (က။)]။

၇၀။

‘‘အဇ္ဇ မေ ဓမ္မပ္ပတ္တဿ၊ ဝိပ္ပမုတ္တဿ သဗ္ဗသော။

သုပုပ္ဖိတံ လောဟိတကံ၊ ဓါရယိဿတိ မတ္ထကေ။

၇၁။

‘‘မမ ကမ္မံ ကထေန္တဿ၊ ပဒုမုတ္တရသတ္ထုနော။

သတပါဏသဟဿာနံ၊ ဓမ္မာဘိသမယော အဟု။

၇၂။

‘‘သတသဟဿိတော ကပ္ပေ၊ ယံ ဗုဒ္ဓမဘိပူဇယိံ။

ဒုဂ္ဂတိံ နာဘိဇာနာမိ၊ တိပဒုမာနိဒံ ဖလံ။

၇၃။

‘‘ကိလေသာ ဈာပိတာ မယှံ၊ ဘဝါ သဗ္ဗေ သမူဟတာ။

သဗ္ဗာသဝါ ပရိက္ခီဏာ၊ နတ္ထိ ဒါနိ ပုနဗ္ဘဝေါ။

၇၄။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ တိပဒုမိယော ထေရော ဣမာ ဂါထာယော အဘာသိတ္ထာတိ။

တိပဒုမိယတ္ထေရဿာပဒါနံ ဒသမံ။

နာဂသမာလဝဂ္ဂေါ အဋ္ဌမော။

တဿုဒ္ဒါနံ –

နာဂသမာလော ပဒသညီ၊ သညကာလုဝဒါယကော။

ဧကသညီ တိဏသန္ထာရော၊ သူစိပါဋလိပုပ္ဖိယော။

ဌိတဉ္ဇလီ တိပဒုမီ၊ ဂါထာယော ပဉ္စသတ္တတိ။