၇။ သကစိန္တနိယဝဂ္ဂ
၁။ သကစိန္တနိယတ္ထေရအပဒါန
၁။
‘‘ပဝနံ ကာနနံ ဒိသွာ၊ အပ္ပသဒ္ဒမန္နာဝိလံ။
ဣသီနံ အနုစိဏ္ဏံဝ၊ အာဟုတီနံ ပဋိဂ္ဂဟံ။
၂။
‘‘ထူပံ ကတွာန ပုလိနံ [ဝေဠုနာ (အဋ္ဌ။)၊ ဝေဠိနံ (သျာ။)]၊ နာနာပုပ္ဖံ သမောကိရိံ။
သမ္မုခါ ဝိယ သမ္ဗုဒ္ဓံ၊ နိမ္မိတံ အဘိဝန္ဒဟံ။
၃။
‘‘သတ္တရတနသမ္ပန္နော ၊ ရာဇာ ရဋ္ဌမှိ ဣဿရော။
သကကမ္မာဘိရဒ္ဓေါဟံ၊ ပုပ္ဖပူဇာယိဒံ [ထူပပူဇာယိဒံ (သီ။)] ဖလံ။
၄။
‘‘ဧကနဝုတိတော ကပ္ပေ၊ ယံ ပုပ္ဖမဘိရောပယိံ။
ဒုဂ္ဂတိံ နာဘိဇာနာမိ၊ ပုပ္ဖပူဇာယိဒံ [ထူပပူဇာယိဒံ (သီ။)] ဖလံ။
၅။
‘‘အသီတိကပ္ပေနန္တယသော၊ စက္ကဝတ္တီ အဟောသဟံ။
သတ္တရတနသမ္ပန္နော၊ စတုဒီပမှိ ဣဿရော။
၆။
‘‘ပဋိသမ္ဘိဒါ စတဿော၊ ဝိမောက္ခာပိ စ အဋ္ဌိမေ။
ဆဠဘိညာ သစ္ဆိကတာ၊ ကတံ ဗုဒ္ဓဿ သာသနံ’’။
ဣတ္ထံ သုဒံ အာယသ္မာ သကစိန္တနိယော ထေရော ဣမာ ဂါထာယော အဘာသိတ္ထာတိ။
သကစိန္တနိယတ္ထေရဿာပဒါနံ ပဌမံ။
၂။ အဝေါပုပ္ဖိယတ္ထေရအပဒါနံ
၇။
‘‘ဝိဟာရာ အဘိနိက္ခမ္မ၊ အဗ္ဘုဋ္ဌဟိယ [အဗ္ဘုဋ္ဌာသိ စ (သျာ။ က။)] စင်္ကမေ။
စတုသစ္စံ ပကာသန္တော၊ ဒေသေတိ [ဒေသေန္တော (သျာ။ က။)] အမတံ ပဒံ။
၈။
‘‘သိခိဿ ဂိရမညာယ၊ ဗုဒ္ဓသေဋ္ဌဿ တာဒိနော။
နာနာပုပ္ဖံ ဂဟေတွာန၊ အာကာသမှိ သမောကိရိံ။
၉။
‘‘တေန ကမ္မေန ဒွိပဒိန္ဒ၊ လောကဇေဋ္ဌ နရာသဘ။
ပတ္တောမှိ အစလံ ဌာနံ၊ ဟိတွာ ဇယပရာဇယံ။
၁၀။
‘‘ဧကတ္တိံသေ ဣတော ကပ္ပေ၊ ယံ ပုပ္ဖမဘိရောပယိံ။
ဒုဂ္ဂတိံ နာဘိဇာနာမိ၊ ပုပ္ဖပူဇာယိဒံ ဖလံ။
၁၁။
‘‘ဣတော ဝီသတိကပ္ပမှိ၊ သုမေဓေါ နာမ ခတ္တိယော။
သတ္တရတနသမ္ပန္နော၊ စက္ကဝတ္တီ မဟဗ္ဗလော။
၁၂။
‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။
ဣတ္ထံ သုဒံ အာယသ္မာ အဝေါပုပ္ဖိယော ထေရော ဣမာ ဂါထာယော အဘာသိတ္ထာတိ။
အဝေါပုပ္ဖိယတ္ထေရဿာပဒါနံ ဒုတိယံ။
၃။ ပစ္စာဂမနိယတ္ထေရအပဒါနံ
၁၃။
‘‘သိန္ဓုယာ နဒိယာ တီရေ၊ စက္ကဝါကော အဟံ တဒါ။
သုဒ္ဓသေဝါလဘက္ခောဟံ၊ ပါပေသု စ သုသညတော။
၁၄။
‘‘အဒ္ဒသံ ဝိရဇံ ဗုဒ္ဓံ၊ ဂစ္ဆန္တံ အနိလဉ္ဇသေ။
တုဏ္ဍေန သာလံ ပဂ္ဂယှ၊ ဝိပဿိဿာဘိရောပယိံ။
၁၅။
‘‘ယဿ သဒ္ဓါ တထာဂတေ၊ အစလာ သုပတိဋ္ဌိတာ။
တေန စိတ္တပ္ပသာဒေန၊ ဒုဂ္ဂတိံ သော န ဂစ္ဆတိ။
၁၆။
‘‘သွာဂတံ ဝတ မေ အာသိ၊ ဗုဒ္ဓသေဋ္ဌဿ သန္တိကေ။
ဝိဟင်္ဂမေန သန္တေန၊ သုဗီဇံ ရောပိတံ မယာ။
၁၇။
‘‘ဧကနဝုတိတော ကပ္ပေ၊ ယံ ပုပ္ဖမဘိရောပယိံ။
ဒုဂ္ဂတိံ နာဘိဇာနာမိ၊ ဗုဒ္ဓပူဇာယိဒံ [ပုပ္ဖပူဇာယိဒံ (သီ။)] ဖလံ။
၁၈။
‘‘သုစာရုဒဿနာ နာမ၊ အဋ္ဌေတေ ဧကနာမကာ။
ကပ္ပေ သတ္တရသေ အာသုံ၊ စက္ကဝတ္တီ မဟဗ္ဗလာ။
၁၉။
‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။
ဣတ္ထံ သုဒံ အာယသ္မာ ပစ္စာဂမနိယော ထေရော ဣမာ ဂါထာယော အဘာသိတ္ထာတိ။
ပစ္စာဂမနိယတ္ထေရဿာပဒါနံ တတိယံ။
၄။ ပရပ္ပသာဒကတ္ထေရအပဒါနံ
၂၀။
‘‘ဥသဘံ ပဝရံ ဝီရံ၊ မဟေသိံ ဝိဇိတာဝိနံ။
သုဝဏ္ဏဝဏ္ဏံ သမ္ဗုဒ္ဓံ၊ ကော ဒိသွာ နပ္ပသီဒတိ။
၂၁။
‘‘ဟိမဝါဝါပရိမေယျော၊ သာဂရောဝ ဒုရုတ္တရော။
တထေဝ ဈာနံ ဗုဒ္ဓဿ၊ ကော ဒိသွာ နပ္ပသီဒတိ။
၂၂။
‘‘ဝသုဓါ ယထာပ္ပမေယျာ၊ စိတ္တာ ဝနဝဋံသကာ။
တထေဝ သီလံ ဗုဒ္ဓဿ၊ ကော ဒိသွာ နပ္ပသီဒတိ။
၂၃။
‘‘အနိလဉ္ဇသာသင္ခုဗ္ဘော [အနိလဇောဝ အသင္ခောဘော (သီ။)]၊ ယထာကာသော အသံခိယော။
တထေဝ ဉာဏံ ဗုဒ္ဓဿ၊ ကော ဒိသွာ နပ္ပသီဒတိ။
၂၄။
‘‘ဣမာဟိ စတုဂါထာဟိ၊ ဗြာဟ္မဏော သေနသဝှယော။
ဗုဒ္ဓသေဋ္ဌံ ထဝိတွာန၊ သိဒ္ဓတ္ထံ အပရာဇိတံ။
၂၅။
‘‘စတုန္နဝုတိကပ္ပါနိ၊ ဒုဂ္ဂတိံ နုပပဇ္ဇထ။
သုဂတိံ သုခသမ္ပတ္တိံ [သုဂတီသု သုသုမ္ပတ္တိံ (သီ။ သျာ။)]၊ အနုဘောသိမနပ္ပကံ။
၂၆။
‘‘စတုန္နဝုတိတော ကပ္ပေ၊ ထဝိတွာ လောကနာယကံ။
ဒုဂ္ဂတိံ နာဘိဇာနာမိ၊ ထောမနာယ [ထောမနဿ (သျာ။)] ဣဒံ ဖလံ။
၂၇။
‘‘စာတုဒ္ဒသမှိ ကပ္ပမှိ၊ စတုရော အာသုမုဂ္ဂတာ။
သတ္တရတနသမ္ပန္နာ၊ စက္ကဝတ္တီ မဟဗ္ဗလာ။
၂၈။
‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။
ဣတ္ထံ သုဒံ အာယသ္မာ ပရပ္ပသာဒကော ထေရော ဣမာ ဂါထာယော အဘာသိတ္ထာတိ။
ပရပ္ပသာဒကတ္ထေရဿာပဒါနံ စတုတ္ထံ။
၅။ ဘိသဒါယကတ္ထေရအပဒါနံ
၂၉။
‘‘ဝေဿဘူ နာမ နာမေန၊ ဣသီနံ တတိယော အဟု။
ကာနနံ ဝနမောဂယှ၊ ဝိဟာသိ ပုရိသုတ္တမော။
၃၀။
‘‘ဘိသမုဠာလံ ဂဏှိတွာ၊ အဂမံ ဗုဒ္ဓသန္တိကံ။
တဉ္စ ဗုဒ္ဓဿ ပါဒါသိံ၊ ပသန္နော သေဟိ ပါဏိဘိ။
၃၁။
‘‘ကရေန စ ပရာမဋ္ဌော၊ ဝေဿဘူဝရဗုဒ္ဓိနာ။
သုခါဟံ နာဘိဇာနာမိ၊ သမံ တေန ကုတောတ္တရိံ။
၃၂။
‘‘စရိမော ဝတ္တတေ မယှံ၊ ဘဝါ သဗ္ဗေ သမူဟတာ။
ဟတ္ထိနာဂေန သန္တေန၊ ကုသလံ ရောပိတံ မယာ [နာဂေါဝ ဗန္ဓနံ ဆေတွာ၊ ဝိဟရာမိ အနာသဝေါ (သျာ။)]။
၃၃။
‘‘ဧကတ္တိံသေ ဣတော ကပ္ပေ၊ ယံ ကမ္မမကရိံ တဒါ။
ဒုဂ္ဂတိံ နာဘိဇာနာမိ၊ ဘိသဒါနဿိဒံ ဖလံ။
၃၄။
‘‘သမောဓါနာ စ ရာဇာနော၊ သောဠသ မနုဇာဓိပါ။
ကပ္ပမှိ စုဒ္ဒသေ [တေရသေ (သီ။ သျာ။)] အာသုံ၊ စက္ကဝတ္တီ မဟဗ္ဗလာ။
၃၅။
‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။
ဣတ္ထံ သုဒံ အာယသ္မာ ဘိသဒါယကော ထေရော ဣမာ ဂါထာယော အဘာသိတ္ထာတိ။
ဘိသဒါယကတ္ထေရဿာပဒါနံ ပဉ္စမံ။
၆။ သုစိန္တိတတ္ထေရအပဒါနံ
၃၆။
‘‘ဂိရိဒုဂ္ဂစရော အာသိံ၊ အဘိဇာတောဝ ကေသရီ။
မိဂသသံဃံ ဝဓိတွာန၊ ဇီဝါမိ ပဗ္ဗတန္တရေ။
၃၇။
‘‘အတ္ထဒဿီ တု ဘဂဝါ၊ သဗ္ဗညူ ဝဒတံ ဝရော။
မမုဒ္ဓရိတုကာမော သော၊ အာဂစ္ဆိ ပဗ္ဗတုတ္တမံ။
၃၈။
‘‘ပသဒဉ္စ မိဂံ ဟန္တွာ၊ ဘက္ခိတုံ သမုပါဂမိံ။
ဘဂဝါ တမှိ သမယေ၊ ဘိက္ခမာနော [သိက္ခာစာရော (သျာ။)] ဥပါဂမိ။
၃၉။
‘‘ဝရမံသာနိ ပဂ္ဂယှ၊ အဒါသိံ တဿ သတ္ထုနော။
အနုမောဒိ မဟာဝီရော၊ နိဗ္ဗာပေန္တော မမံ တဒါ။
၄၀။
‘‘တေန စိတ္တပ္ပသာဒေန၊ ဂိရိဒုဂ္ဂံ ပဝိသိံ အဟံ။
ဣတိံ ဥပ္ပါဒယိတွာန၊ တတ္ထ ကာလင်္ကတော အဟံ။
၄၁။
‘‘ဧတေန မံသဒါနေန၊ စိတ္တဿ ပဏိဓီဟိ စ။
ပန္နရသေ ကပ္ပသတေ၊ ဒေဝလောကေ ရမိံ အဟံ။
၄၂။
‘‘အဝသေသေသု ကပ္ပေသု၊ ကုသလံ စိန္တိတံ [နိစိတံ (သီ။)၊ ကရိတံ (သျာ။)] မယာ။
တေနေဝ မံသဒါနေန၊ ဗုဒ္ဓါနုဿရဏေန စ။
၄၃။
‘‘အဋ္ဌတ္တိံသမှိ ကပ္ပမှိ၊ အဋ္ဌ ဒီဃာယုနာမကာ။
သဋ္ဌိမှိတော ကပ္ပသတေ၊ ဒုဝေ ဝရုဏနာမကာ [သရဏနာမကာ (သျာ။)]။
၄၄။
‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။
ဣတ္ထံ သုဒံ အာယသ္မာ သုစိန္တိတော ထေရော ဣမာ ဂါထာယော အဘာသိတ္ထာတိ။
သုစိန္တိတတ္ထေရဿာပဒါနံ ဆဋ္ဌံ။
၇။ ဝတ္ထဒါယကတ္ထေရအပဒါနံ
၄၅။
‘‘ပက္ခိဇာတော တဒါ အာသိံ၊ သုပဏ္ဏော ဂရုဠာဓိပေါ။
အဒ္ဒသံ ဝိရဇံ ဗုဒ္ဓံ၊ ဂစ္ဆန္တံ ဂန္ဓမာဒနံ။
၄၆။
‘‘ဇဟိတွာ ဂရုဠဝဏ္ဏံ၊ မာဏဝကံ အဓါရယိံ။
ဧကံ ဝတ္ထံ မယာ ဒိန္နံ၊ ဒွိပဒိန္ဒဿ တာဒိနော။
၄၇။
‘‘တဉ္စ ဒုဿံ ပဋိဂ္ဂယှ၊ ဗုဒ္ဓေါ လောကဂ္ဂနာယကော။
အန္တလိက္ခေ ဌိတော သတ္ထာ၊ ဣမာ ဂါထာ အဘာသထ။
၄၈။
‘‘‘ဣမိနာ ဝတ္ထဒါနေန၊ စိတ္တဿ ပဏိဓီဟိ စ။
ပဟာယ ဂရုဠံ ယောနိံ၊ ဒေဝလောကေ ရမိဿတိ’။
၄၉။
‘‘အတ္ထဒဿီ တု ဘဂဝါ၊ လောကဇေဋ္ဌော နရာသဘော။
ဝတ္ထဒါနံ ပသံသိတွာ၊ ပက္ကာမိ ဥတ္တရာမုခေါ။
၅၀။
‘‘ဘဝေ နိဗ္ဗတ္တမာနမှိ၊ ဟောန္တိ မေ ဝတ္ထသမ္ပဒါ။
အာကာသေ ဆဒနံ ဟောတိ၊ ဝတ္ထဒါနဿိဒံ ဖလံ။
၅၁။
‘‘အရုဏဝါ [အရုဏကာ (သီ။)၊ အရုဏသာ (သျာ။)] သတ္တ ဇနာ၊ စက္ကဝတ္တီ မဟဗ္ဗလာ။
ဆတ္တိံသတိမှိ အာသိံသု၊ ကပ္ပမှိ မနုဇာဓိပါ။
၅၂။
‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။
ဣတ္ထံ သုဒံ အာယသ္မာ ဝတ္ထဒါယကော ထေရော ဣမာ ဂါထာယော အဘာသိတ္ထာတိ။
ဝတ္ထဒါယကတ္ထေရဿာပဒါနံ သတ္တမံ။
၈။ အမ္ဗဒါယကတ္ထေရအပဒါနံ
၅၃။
‘‘အနောမဒဿီ ဘဂဝါ၊ နိသိန္နော ပဗ္ဗတန္တရေ။
မေတ္တာယ အဖရိ လောကေ၊ အပ္ပမာဏေ နိရူပဓိ။
၅၄။
‘‘ကပိ အဟံ တဒါ အာသိံ၊ ဟိမဝန္တေ နဂုတ္တမေ။
ဒိသွာ အနောမဒသ္သိံ တံ [အနောမံ အမိတံ (သီ။)၊ အနောမမဓိတံ (သျာ။)]၊ ဗုဒ္ဓေ စိတ္တံ ပသာဒယိံ။
၅၅။
‘‘အဝိဒူရေ ဟိမဝန္တဿ၊ အမ္ဗာသုံ ဖလိနော တဒါ။
တတော ပက္ကံ ဂဟေတွာန၊ အမ္ဗံ သမဓုကံ အဒံ။
၅၆။
‘‘တံ မေ ဗုဒ္ဓေါ ဝိယာကာသိ၊ အနောမဒဿီ မဟာမုနိ။
ဣမိနာ မဓုဒါနေန၊ အမ္ဗဒါနေန စူဘယံ။
၅၇။
‘‘သတ္တပညာသကပ္ပမှိ၊ ဒေဝလောကေ ရမိဿတိ။
အဝသေသေသု ကပ္ပေသု၊ ဝေါကိဏ္ဏံ သံသရိဿတိ။
၅၈။
‘‘ခေပေတွာ ပါပကံ ကမ္မံ၊ ပရိပက္ကာယ ဗုဒ္ဓိယာ။
ဝိနိပါတမဂန္တွာန၊ ကိလေသေ ဈာပယိဿတိ။
၅၉။
‘‘ဒမေန ဥတ္တမေနာဟံ၊ ဒမိတောမှိ မဟေသိနာ။
ပတ္တောမှိ အစလံ ဌာနံ၊ ဟိတွာ ဇယပရာဇယံ။
၆၀။
‘‘သတ္တသတ္တတိကပ္ပသတေ၊ အမ္ဗဋ္ဌဇသနာမကာ။
စတုဒ္ဒသ တေ ရာဇာနော၊ စက္ကဝတ္တီ မဟဗ္ဗလာ။
၆၁။
‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။
ဣတ္ထံ သုဒံ အာယသ္မာ အမ္ဗဒါယကော ထေရော ဣမာ ဂါထာယော အဘာသိတ္ထာတိ။
အမ္ဗဒါယကတ္ထေရဿာပဒါနံ အဋ္ဌမံ။
၉။ သုမနတ္ထေရအပဒါနံ
၆၂။
‘‘သုမနော နာမ နာမေန၊ မာလာကာရော အဟံ တဒါ။
အဒ္ဒသံ ဝိရဇံ ဗုဒ္ဓံ၊ လောကာဟုတိပဋိဂ္ဂဟံ။
၆၃။
‘‘ဥဘော ဟတ္ထေဟိ ပဂ္ဂယှ၊ သုမနံ ပုပ္ဖမုတ္တမံ။
ဗုဒ္ဓဿ အဘိရောပေသိံ၊ သိခိနော လောကဗန္ဓုနော။
၆၄။
‘‘ဣမာယ ပုပ္ဖပူဇာယ၊ စေတနာပဏိဓီဟိ စ။
ဒုဂ္ဂတိံ နာဘိဇာနာမိ၊ ဗုဒ္ဓပူဇာယိဒံ ဖလံ။
၆၅။
‘‘ဧကတ္တိံသေ ဣတော ကပ္ပေ၊ ယံ ပုပ္ဖမဘိရောပယိံ။
ဒုဂ္ဂတိံ နာဘိဇာနာမိ၊ ဗုဒ္ဓပူဇာယိဒံ [ပုပ္ဖပူဇာယိဒံ (သီ။)] ဖလံ။
၆၆။
‘‘ဆဗ္ဗီသတိမှိ ကပ္ပမှိ၊ စတ္တာရောသုံ မဟာယသာ။
သတ္တရတနသမ္ပန္နာ၊ ရာဇာနော စက္ကဝတ္တိနော။
၆၇။
‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။
ဣတ္ထံ သုဒံ အာယသ္မာ သုမနော ထေရော ဣမာ ဂါထာယော အဘာသိတ္ထာတိ။
သုမနတ္ထေရဿာပဒါနံ နဝမံ။
၁၀။ ပုပ္ဖစင္ကောဋိယတ္ထေရအပဒါနံ
၆၈။
‘‘အဘီတရူပံ သီဟံဝ၊ ဂရုဠဂ္ဂံဝ ပက္ခိနံ။
ဗျဂ္ဃူသဘံဝ ပဝရံ၊ အဘိဇာတံဝ ကေသရိံ။
၆၉။
‘‘သိခိံ တိလောကသရဏံ၊ အနေဇံ အပရာဇိတံ။
နိသိန္နံ သမဏာနဂ္ဂံ၊ ဘိက္ခုသံဃပုရက္ခတံ။
၇၀။
‘‘စင္ကောဋကေ [စင်္ဂေါဋကေ (သီ။)] ဌပေတွာန၊ အနောဇံ ပုပ္ဖမုတ္တမံ။
သဟ စင္ကောဋကေနေဝ၊ ဗုဒ္ဓသေဋ္ဌံ သမောကိရိံ။
၇၁။
‘‘တေန စိတ္တပ္ပသာဒေန၊ ဒွိပဒိန္ဒ နရာသဘ။
ပတ္တောမှိ အစလံ ဌာနံ၊ ဟိတွာ ဇယပရာဇယံ။
၇၂။
‘‘ဧကတ္တိံသေ ဣတော ကပ္ပေ၊ ယံ ကမ္မမကရိံ တဒါ။
ဒုဂ္ဂတိံ နာဘိဇာနာမိ၊ ဗုဒ္ဓပူဇာယိဒံ ဖလံ။
၇၃။
‘‘သမ္ပုဏ္ဏေ တိံသကပ္ပမှိ၊ ဒေဝဘူတိသနာမကာ။
သတ္တရတနသမ္ပန္နာ၊ ပဉ္စာသုံ စက္ကဝတ္တိနော။
၇၄။
‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။
ဣတ္ထံ သုဒံ အာယသ္မာ ပုပ္ဖစင္ကောဋိယော ထေရော ဣမာ ဂါထာယော အဘာသိတ္ထာတိ။
ပုပ္ဖစင္ကောဋိယတ္ထေရဿာပဒါနံ ဒသမံ။
သကစိန္တနိယဝဂ္ဂေါ သတ္တမော။
တဿုဒ္ဒါနံ –
သကစိန္တီ အဝေါပုပ္ဖီ၊ သပစ္စာဂမနေန စ။
ပရပ္ပသာဒီ ဘိသဒေါ၊ သုစိန္တိ ဝတ္ထဒါယကော။
အမ္ဗဒါယီ စ သုမနော၊ ပုပ္ဖစင္ကောဋကီပိ စ။
ဂါထေကသတ္တတိ ဝုတ္တာ၊ ဂဏိတာ အတ္ထဒဿိဘိ။