ဗီဇနိဝဂ္ဂ

၆။ ဗီဇနိဝဂ္ဂ

၁။ ဝိဓူပနဒါယကတ္ထေရအပဒါန

၁။

‘‘ပဒုမုတ္တရဗုဒ္ဓဿ ၊ လောကဇေဋ္ဌဿ တာဒိနော။

ဗီဇနိကာ [ဝီဇနိကာ (သီ။ သျာ။)] မယာ ဒိန္နာ၊ ဒွိပဒိန္ဒဿ တာဒိနော။

၂။

‘‘သကံ စိတ္တံ ပသာဒေတွာ၊ ပဂ္ဂဟေတွာန အဉ္ဇလိံ။

သမ္ဗုဒ္ဓမဘိဝါဒေတွာ၊ ပက္ကမိံ ဥတ္တရာမုခေါ။

၃။

‘‘ဗီဇနိံ ပဂ္ဂဟေတွာန၊ သတ္ထာ လောကဂ္ဂနာယကော [လောကေ အနုတ္တရော (သီ။)]။

ဘိက္ခုသံဃေ ဌိတော သန္တော၊ ဣမာ ဂါထာ အဘာသထ။

၄။

‘‘‘ဣမိနာ ဗီဇနိဒါနေန၊ စိတ္တဿ ပဏိဓီဟိ [စေတနာပဏိဓီဟိ (အညတ္ထ)] စ။

ကပ္ပါနံ သတသဟဿံ၊ ဝိနိပါတံ န ဂစ္ဆတိ’။

၅။

‘‘အာရဒ္ဓဝီရိယော ပဟိတတ္တော၊ စေတောဂုဏသမာဟိတော။

ဇာတိယာ သတ္တဝဿောဟံ၊ အရဟတ္တံ အပါပုဏိံ။

၆။

‘‘သဋ္ဌိကပ္ပသဟဿမှိ၊ ဗီဇမာနသနာမကာ။

သောဠသာသိံသု ရာဇာနော၊ စက္ကဝတ္တီ မဟဗ္ဗလာ။

၇။

‘‘ပဋိသမ္ဘိဒါ စတဿော၊ ဝိမောက္ခာပိ စ အဋ္ဌိမေ။

ဆဠဘိညာ သစ္ဆိကတာ၊ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ဝိဓူပနဒါယကော ထေရော ဣမာ ဂါထာယော အဘာသိတ္ထာတိ။

ဝိဓူပနဒါယကတ္ထေရဿာပဒါနံ ပဌမံ။

၂။ သတရံသိတ္ထေရအပဒါနံ

၈။

‘‘ဥဗ္ဗိဒ္ဓံ သေလမာရုယှ၊ နိသီဒိ ပုရိသုတ္တမော။

ပဗ္ဗတဿာဝိဒူရမှိ၊ ဗြာဟ္မဏော မန္တပါရဂူ။

၉။

‘‘ဥပဝိဋ္ဌံ မဟာဝီရံ၊ ဒေဝဒေဝံ နရာသဘံ။

အဉ္ဇလိံ ပဂ္ဂဟေတွာန၊ သန္ထဝိံ လောကနာယကံ။

၁၀။

‘‘‘ဧသ ဗုဒ္ဓေါ မဟာဝီရော၊ ဝရဓမ္မပ္ပကာသကော။

ဇလတိ အဂ္ဂိခန္ဓောဝ၊ ဘိက္ခုသံဃပုရက္ခတော။

၁၁။

‘‘‘မဟာသမုဒ္ဒေါဝ‘က္ခုဗ္ဘော [’က္ခောဘော (သီ။ သျာ။)]၊ အဏ္ဏဝေါဝ ဒုရုတ္တရော။

မိဂရာဇာဝသမ္ဘီတော [ဆမ္ဘိတော (က။)]၊ ဓမ္မံ ဒေသေတိ စက္ခုမာ’။

၁၂။

‘‘မမ သင်္ကပ္ပမညာယ၊ ပဒုမုတ္တရနာယကော။

ဘိက္ခုသံဃေ ဌိတော သတ္ထာ၊ ဣမာ ဂါထာ အဘာသထ။

၁၃။

‘‘‘ယေနာယံ [ယေနာဟံ (က။)] အဉ္ဇလီ ဒိန္နော၊ ဗုဒ္ဓသေဋ္ဌော စ ထောမိတော။

တိံသကပ္ပသဟဿာနိ၊ ဒေဝရဇ္ဇံ ကရိဿတိ။

၁၄။

‘‘‘ကပ္ပသတသဟဿမှိ၊ အင်္ဂီရသသနာမကော။

ဝိဝဋ္ဋစ္ဆဒေါ [ဝိဝတ္ထစ္ဆဒ္ဒေါ (သီ။)] သမ္ဗုဒ္ဓေါ၊ ဥပ္ပဇ္ဇိဿတိ တာဝဒေ။

၁၅။

‘‘‘တဿ ဓမ္မေသု ဒါယာဒေါ၊ ဩရသော ဓမ္မနိမ္မိတော။

သတရံသီတိ နာမေန၊ အရဟာ သော ဘဝိဿတိ’။

၁၆။

‘‘ဇာတိယာ သတ္တဝဿောဟံ၊ ပဗ္ဗဇိံ အနဂါရိယံ။

သတရံသိမှိ နာမေန၊ ပဘာ နိဒ္ဓါဝတေ မမ။

၁၇။

‘‘မဏ္ဍပေ ရုက္ခမူလေ ဝါ၊ ဈာယီ ဈာနရတော အဟံ။

ဓါရေမိ အန္တိမံ ဒေဟံ၊ သမ္မာသမ္ဗုဒ္ဓသာသနေ။

၁၈။

‘‘သဋ္ဌိကပ္ပသဟဿမှိ၊ စတုရော ရာမနာမကာ။

သတ္တရတနသမ္ပန္နာ၊ စက္ကဝတ္တီ မဟဗ္ဗလာ။

၁၉။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ သတရံသိ ထေရော ဣမာ ဂါထာယော အဘာသိတ္ထာတိ။

သတရံသိတ္ထေရဿာပဒါနံ ဒုတိယံ။

၃။ သယနဒါယကတ္ထေရအပဒါနံ

၂၀။

‘‘ပဒုမုတ္တရဗုဒ္ဓဿ၊ သဗ္ဗလောကာနုကမ္ပိနော။

သယနံ တဿ ပါဒါသိံ၊ ဝိပ္ပသန္နေန စေတသာ။

၂၁။

‘‘တေန သယနဒါနေန၊ သုခေတ္တေ ဗီဇသမ္ပဒါ။

ဘောဂါ နိဗ္ဗတ္တရေ တဿ၊ သယနဿ ဣဒံ ဖလံ။

၂၂။

‘‘အာကာသေ သေယျံ ကပ္ပေမိ၊ ဓါရေမိ ပထဝိံ ဣမံ။

ပါဏေသု မေ ဣဿရိယံ၊ သယနဿ ဣဒံ ဖလံ။

၂၃။

‘‘ပဉ္စကပ္ပသဟဿမှိ၊ အဋ္ဌ အာသုံ မဟာတေဇာ [မဟာဝရာ (သီ။)၊ မဟာဝီရာ (သျာ။)]။

စတုတ္တိံသေ ကပ္ပသတေ၊ စတုရော စ မဟဗ္ဗလာ။

၂၄။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ သယနဒါယကော ထေရော ဣမာ ဂါထာယော အဘာသိတ္ထာတိ။

သယနဒါယကတ္ထေရဿာပဒါနံ တတိယံ။

၄။ ဂန္ဓောဒကိယတ္ထေရအပဒါနံ

၂၅။

‘‘ပဒုမုတ္တရဗုဒ္ဓဿ ၊ မဟာဗောဓိမဟော အဟု။

ဝိစိတ္တံ ဃဋမာဒါယ၊ ဂန္ဓောဒကမဒါသဟံ။

၂၆။

‘‘နှာနကာလေ စ ဗောဓိယာ၊ မဟာမေဃော ပဝဿထ။

နိန္နာဒေါ စ မဟာ အာသိ၊ အသနိယာ ဖလန္တိယာ။

၂၇။

‘‘တေနေဝါသနိဝေဂေန၊ တတ္ထ ကာလင်္ကတော [ကာလကတော (သီ။ သျာ။)] အဟံ [အဟုံ (သီ။)]။

ဒေဝလောကေ ဌိတော သန္တော၊ ဣမာ ဂါထာ အဘာသဟံ။

၂၈။

‘‘‘အဟော ဗုဒ္ဓေါ အဟော ဓမ္မော၊ အဟော နော သတ္ထုသမ္ပဒါ။

ကဠေဝရံ [ကလေဗရံ (သီ။)] မေ ပတိတံ၊ ဒေဝလောကေ ရမာမဟံ။

၂၉။

‘‘‘ဥဗ္ဗိဒ္ဓံ ဘဝနံ မယှံ၊ သတဘူမံ သမုဂ္ဂတံ။

ကညာသတသဟဿာနိ၊ ပရိဝါရေန္တိ မံ သဒါ။

၃၀။

‘‘‘အာဗာဓါ မေ န ဝိဇ္ဇန္တိ၊ သောကော မယှံ န ဝိဇ္ဇတိ။

ပရိဠာဟံ န ပဿာမိ၊ ပုညကမ္မဿိဒံ ဖလံ။

၃၁။

‘‘‘အဋ္ဌဝီသေ ကပ္ပသတေ၊ ရာဇာ သံဝသိတော အဟုံ။

သတ္တရတနသမ္ပန္နော၊ စက္ကဝတ္တီ မဟဗ္ဗလော’။

၃၂။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ဂန္ဓောဒကိယော ထေရော ဣမာ ဂါထာယော အဘာသိတ္ထာတိ။

ဂန္ဓောဒကိယတ္ထေရဿာပဒါနံ စတုတ္ထံ။

၅။ ဩပဝယှတ္ထေရအပဒါနံ

၃၃။

‘‘ပဒုမုတ္တရဗုဒ္ဓဿ ၊ အာဇာနီယမဒါသဟံ။

နိယျာဒေတွာန သမ္ဗုဒ္ဓေ [သမ္ဗုဒ္ဓံ (သီ။ က။)]၊ အဂမာသိံ သကံ ဃရံ။

၃၄။

‘‘ဒေဝလော နာမ နာမေန၊ သတ္ထုနော အဂ္ဂသာဝကော။

ဝရဓမ္မဿ ဒါယာဒေါ၊ အာဂစ္ဆိ မမ သန္တိကံ။

၃၅။

‘‘သပတ္တဘာရော ဘဂဝါ၊ အာဇာနေယျော န ကပ္ပတိ။

တဝ သင်္ကပ္ပမညာယ၊ အဓိဝါသေသိ စက္ခုမာ။

၃၆။

‘‘အဂ္ဃါပေတွာ ဝါတဇဝံ၊ သိန္ဓဝံ သီဃဝါဟနံ။

ပဒုမုတ္တရဗုဒ္ဓဿ၊ ခမနီယမဒါသဟံ။

၃၇။

‘‘ယံ ယံ ယောနုပပဇ္ဇာမိ၊ ဒေဝတ္တံ အထ မာနုသံ [ဒေဝေ စ မာနုသေ ဘဝေ (သီ။ က။)]။

ခမနီယံ ဝါတဇဝံ၊ စိတ္တံ နိဗ္ဗတ္တတေ [အာဇာနီယာ ဝါတဇဝါ၊ ဝိတ္တိ နိဗ္ဗတ္တရေ (သျာ။)၊ ခမနီယာ ဝါတဇဝါ၊ စိတ္တာ နိဗ္ဗတ္တရေ (သီ။)] မမ။

၃၈။

‘‘လာဘံ တေသံ သုလဒ္ဓံဝ၊ ယေ လဘန္တုပသမ္ပဒံ။

ပုနပိ ပယိရုပါသေယျံ၊ ဗုဒ္ဓေါ လောကေ သစေ ဘဝေ။

၃၉။

‘‘အဋ္ဌဝီသတိက္ခတ္တုံဟံ၊ ရာဇာ အာသိံ မဟဗ္ဗလော။

စာတုရန္တော ဝိဇိတာဝီ၊ ဇမ္ဗုသဏ္ဍဿ [ဇမ္ဗုဒီပဿ (သျာ။)၊ ဇမ္ဗုမဏ္ဍဿ (က။)] ဇမ္ဗုဣဿရော။

၄၀။

‘‘ဣဒံ ပစ္ဆိမကံ မယှံ၊ စရိမော ဝတ္တတေ ဘဝေါ။

ပတ္တောသ္မိ အစလံ ဌာနံ၊ ဟိတွာ ဇယပရာဇယံ။

၄၁။

‘‘စတုတိံသသဟဿမှိ၊ မဟာတေဇောသိ ခတ္တိယော။

သတရတနသမ္ပန္နော၊ စက္ကဝတ္တီ မဟဗ္ဗလော။

၄၂။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ဩပဝယှော ထေရော ဣမာ ဂါထာယော အဘာသိတ္ထာတိ။

ဩပဝယှတ္ထေရဿာပဒါနံ ပဉ္စမံ။

၆။ သပရိဝါရာသနတ္ထေရအပဒါနံ

၄၃။

‘‘ပဒုမုတ္တရဗုဒ္ဓဿ၊ ပိဏ္ဍပါတံ အဒါသဟံ။

ဂန္တွာ ကိလိဋ္ဌကံ ဌာနံ [တံ ဘောဇနဋ္ဌာနံ (သီ။)]၊ မလ္လိကာဟိ ပရိက္ခိတံ [ပရိက္ခိပိံ (သီ။)]။

၄၄။

‘‘တမှာသနမှိ အာသီနော၊ ဗုဒ္ဓေါ လောကဂ္ဂနာယကော။

အကိတ္တယိ ပိဏ္ဍပါတံ၊ ဥဇုဘူတော သမာဟိတော။

၄၅။

‘‘ယထာပိ ဘဒ္ဒကေ ခေတ္တေ၊ ဗီဇံ အပ္ပမ္ပိ ရောပိတံ။

သမ္မာ ဓါရံ ပဝေစ္ဆန္တေ၊ ဖလံ တောသေတိ ကဿကံ။

၄၆။

‘‘တထေဝါယံ ပိဏ္ဍပါတော၊ သုခေတ္တေ ရောပိတော တယာ။

ဘဝေ နိဗ္ဗတ္တမာနမှိ၊ ဖလံ တေ [နိဗ္ဗတ္တမာနံ ဟိ၊ ဖလတော (သီ။)] တောသယိဿတိ [တပ္ပယိဿတိ (က။)]။

၄၇။

‘‘ဣဒံ ဝတွာန သမ္ဗုဒ္ဓေါ၊ ဇလဇုတ္တမနာမကော။

ပိဏ္ဍပါတံ ဂဟေတွာန၊ ပက္ကာမိ ဥတ္တရာမုခေါ။

၄၈။

‘‘သံဝုတော ပါတိမောက္ခသ္မိံ၊ ဣန္ဒ္ရိယေသု စ ပဉ္စသု။

ပဝိဝေကမနုယုတ္တော၊ ဝိဟရာမိ အနာသဝေါ။

၄၉။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ သပရိဝါရာသနော ထေရော ဣမာ ဂါထာယော အဘာသိတ္ထာတိ။

သပရိဝါရာသနတ္ထေရဿာပဒါနံ ဆဋ္ဌံ။

၇။ ပဉ္စဒီပကတ္ထေရအပဒါနံ

၅၀။

‘‘ပဒုမုတ္တရဗုဒ္ဓဿ၊ သဗ္ဗဘူတာနုကမ္ပိနော။

သဒ္ဒဟိတွာန [သုသဏ္ဌဟိတွာ (သီ။)] သဒ္ဓမ္မေ၊ ဥဇုဒိဋ္ဌိ အဟောသဟံ။

၅၁။

‘‘ပဒီပဒါနံ ပါဒါသိံ၊ ပရိဝါရေတွာန ဗောဓိယံ။

သဒ္ဒဟန္တော ပဒီပါနိ၊ အကရိံ တာဝဒေ အဟံ။

၅၂။

‘‘ယံ ယံ ယောနုပပဇ္ဇာမိ၊ ဒေဝတ္တံ အထ မာနုသံ။

အာကာသေ ဥက္ကံ ဓါရေန္တိ၊ ဒီပဒါနဿိဒံ ဖလံ။

၅၃။

‘‘တိရောကုဋ္ဋံ တိရောသေလံ၊ သမတိဂ္ဂယှ ပဗ္ဗတံ။

သမန္တာ ယောဇနသတံ၊ ဒဿနံ အနုဘောမဟံ။

၅၄။

‘‘တေန ကမ္မာဝသေသေန၊ ပတ္တောမှိ အာသဝက္ခယံ။

ဓါရေမိ အန္တိမံ ဒေဟံ၊ ဒွိပဒိန္ဒဿ သာသနေ။

၅၅။

‘‘စတုတ္တိံသေ ကပ္ပသတေ၊ သတစက္ခုသနာမကာ။

ရာဇာဟေသုံ မဟာတေဇာ၊ စက္ကဝတ္တီ မဟဗ္ဗလာ။

၅၆။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ပဉ္စဒီပကော ထေရော ဣမာ ဂါထာယော အဘာသိတ္ထာတိ။

ပဉ္စဒီပကတ္ထေရဿာပဒါနံ သတ္တမံ။

၈။ ဓဇဒါယကတ္ထေရအပဒါနံ

၅၇။

‘‘ပဒုမုတ္တရဗုဒ္ဓဿ၊ ဗောဓိယာ ပါဒပုတ္တမေ။

ဟဋ္ဌော ဟဋ္ဌေန စိတ္တေန၊ ဓဇမာရောပယိံ အဟံ။

၅၈။

‘‘ပတိတပတ္တာနိ ဂဏှိတွာ၊ ဗဟိဒ္ဓါ ဆဍ္ဍယိံ အဟံ။

အန္တောသုဒ္ဓံ ဗဟိသုဒ္ဓံ၊ အဓိမုတ္တမနာသဝံ။

၅၉။

‘‘သမ္မုခါ ဝိယ သမ္ဗုဒ္ဓံ၊ အဝန္ဒိံ ဗောဓိမုတ္တမံ။

ပဒုမုတ္တရော လောကဝိဒူ၊ အာဟုတီနံ ပဋိဂ္ဂဟော။

၆၀။

‘‘ဘိက္ခုသံဃေ ဌိတော သတ္ထာ၊ ဣမာ ဂါထာ အဘာသထ။

‘‘‘ဣမိနာ ဓဇဒါနေန၊ ဥပဋ္ဌာနေန စူဘယံ။

၆၁။

‘‘‘ကပ္ပါနံ သတသဟဿံ၊ ဒုဂ္ဂတိံ သော န ဂစ္ဆတိ။

ဒေဝေသု ဒေဝသောဘဂ္ယံ၊ အနုဘောဿတိနပ္ပကံ။

၆၂။

‘‘‘အနေကသတက္ခတ္တုဉ္စ ၊ ရာဇာ ရဋ္ဌေ ဘဝိဿတိ။

ဥဂ္ဂတော နာမ နာမေန၊ စက္ကဝတ္တီ ဘဝိဿတိ။

၆၃။

‘‘‘သမ္ပတ္တိံ အနုဘောတွာန၊ သုက္ကမူလေန စောဒိတော။

ဂေါတမဿ ဘဂဝတော၊ သာသနေဘိရမိဿတိ’။

၆၄။

‘‘ပဓါနပဟိတတ္တောမှိ၊ ဥပသန္တော နိရူပဓိ။

ဓါရေမိ အန္တိမံ ဒေဟံ၊ သမ္မာသမ္ဗုဒ္ဓသာသနေ။

၆၅။

‘‘ဧကပညာသသဟဿေ၊ ကပ္ပေ ဥဂ္ဂတသဝှယော [သဝှယာ (သျာ။)]။

ပညာသသတသဟဿေ၊ ခတ္တိယော မေဃသဝှယော [ခတ္တိယာ ခေမသဝှယာ (သျာ။)]။

၆၆။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ဓဇဒါယကော ထေရော ဣမာ ဂါထာယော အဘာသိတ္ထာတိ။

ဓဇဒါယကတ္ထေရဿာပဒါနံ အဋ္ဌမံ။

၉။ ပဒုမတ္ထေရအပဒါနံ

၆၇။

‘‘စတုသစ္စံ ပကာသေန္တော၊ ဝရဓမ္မပ္ပဝတ္တကော။

ဝဿတေ [ဝဿေတိ (?)] အမတံ ဝုဋ္ဌိံ၊ နိဗ္ဗာပေန္တော မဟာဇနံ။

၆၈။

‘‘သဓဇံ [သဒဏ္ဍံ (သီ။)] ပဒုမံ ဂယှ၊ အဍ္ဎကောသေ ဌိတော အဟံ။

ပဒုမုတ္တရမုနိဿ၊ ပဟဋ္ဌော ဥက္ခိပိမမ္ဗရေ။

၆၉။

‘‘အာဂစ္ဆန္တေ စ ပဒုမေ၊ အဗ္ဘုတော အာသိ တာဝဒေ။

မမ သင်္ကပ္ပမညာယ၊ ပဂ္ဂဏှိ ဝဒတံ ဝရော။

၇၀။

‘‘ကရသေဋ္ဌေန ပဂ္ဂယှ၊ ဇလဇံ ပုပ္ဖမုတ္တမံ။

ဘိက္ခုသံဃေ ဌိတော သတ္ထာ၊ ဣမာ ဂါထာ အဘာသထ။

၇၁။

‘‘‘ယေနိဒံ ပဒုမံ ခိတ္တံ၊ သဗ္ဗညုမှိ ဝိနာယကေ [သဗ္ဗညုတမနာယကေ (သျာ။ က။)]။

တမဟံ ကိတ္တယိဿာမိ၊ သုဏာထ မမ ဘာသတော။

၇၂။

‘‘‘တိံသကပ္ပါနိ ဒေဝိန္ဒော၊ ဒေဝရဇ္ဇံ ကရိဿတိ။

ပထဗျာ ရဇ္ဇံ သတ္တသတံ၊ ဝသုဓံ အာဝသိဿတိ။

၇၃။

‘‘‘တတ္ထ ပတ္တံ ဂဏေတွာန၊ စက္ကဝတ္တီ ဘဝိဿတိ။

အာကာသတော ပုပ္ဖဝုဋ္ဌိ၊ အဘိဝဿိဿတီ တဒါ။

၇၄။

‘‘‘ကပ္ပသတသဟဿမှိ၊ ဩက္ကာကကုလသမ္ဘဝေါ။

ဂေါတမော နာမ နာမေန၊ သတ္ထာ လောကေ ဘဝိဿတိ။

၇၅။

‘‘‘တဿ ဓမ္မေသု ဒါယာဒေါ၊ ဩရသော ဓမ္မနိမ္မိတော။

သဗ္ဗာသဝေ ပရိညာယ၊ နိဗ္ဗာယိဿတိနာသဝေါ’။

၇၆။

‘‘နိက္ခမိတွာန ကုစ္ဆိမှာ၊ သမ္ပဇာနော ပတိဿတော။

ဇာတိယာ ပဉ္စဝဿောဟံ၊ အရဟတ္တံ အပါပုဏိံ။

၇၇။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ပဒုမော ထေရော ဣမာ ဂါထာယော အဘာသိတ္ထာတိ။

ပဒုမတ္ထေရဿာပဒါနံ နဝမံ။

၁၀။ အသနဗောဓိယတ္ထေရအပဒါနံ

၇၈။

‘‘ဇာတိယာ သတ္တဝဿောဟံ၊ အဒ္ဒသံ လောကနာယကံ။

ပသန္နစိတ္တော သုမနော၊ ဥပဂစ္ဆိံ နရုတ္တမံ။

၇၉။

‘‘တိဿဿာဟံ ဘဂဝတော၊ လောကဇေဋ္ဌဿ တာဒိနော။

ဟဋ္ဌော ဟဋ္ဌေန စိတ္တေန၊ ရောပယိံ ဗောဓိမုတ္တမံ။

၈၀။

‘‘အသနော နာမဓေယျေန၊ ဓရဏီရုဟပါဒပေါ။

ပဉ္စဝဿေ ပရိစရိံ၊ အသနံ ဗောဓိမုတ္တမံ။

၈၁။

‘‘ပုပ္ဖိတံ ပါဒပံ ဒိသွာ၊ အဗ္ဘုတံ လောမဟံသနံ။

သကံ ကမ္မံ ပကိတ္တေန္တော၊ ဗုဒ္ဓသေဋ္ဌံ ဥပါဂမိံ။

၈၂။

‘‘တိဿော တဒါ သော သမ္ဗုဒ္ဓေါ၊ သယမ္ဘူ အဂ္ဂပုဂ္ဂလော။

ဘိက္ခုသံဃေ နိသီဒိတွာ၊ ဣမာ ဂါထာ အဘာသထ။

၈၃။

‘‘‘ယေနာယံ ရောပိတာ ဗောဓိ၊ ဗုဒ္ဓပူဇာ စ သက္ကတာ။

တမဟံ ကိတ္တယိဿာမိ၊ သုဏာထ မမ ဘာသတော။

၈၄။

‘‘‘တိံသကပ္ပါနိ ဒေဝေသု၊ ဒေဝရဇ္ဇံ ကရိဿတိ။

စတုသဋ္ဌိ စက္ခတ္တုံ သော၊ စက္ကဝတ္တီ ဘဝိဿတိ။

၈၅။

‘‘‘တုသိတာ ဟိ စဝိတွာန၊ သုက္ကမူလေန စောဒိတော။

ဒွေ သမ္ပတ္တီ အနုဘောတွာ၊ မနုဿတ္တေ ရမိဿတိ။

၈၆။

‘‘‘ပဓါနပဟိတတ္တော သော၊ ဥပသန္တော နိရူပဓိ။

သဗ္ဗာသဝေ ပရိညာယ၊ နိဗ္ဗာယိဿတိနာသဝေါ’။

၈၇။

‘‘ဝိဝေကမနုယုတ္တောဟံ ၊ ဥပသန္တော နိရူပဓိ။

နာဂေါဝ ဗန္ဓနံ ဆေတွာ၊ ဝိဟရာမိ အနာသဝေါ။

၈၈။

‘‘ဒွေနဝုတေ ဣတော ကပ္ပေ၊ ဗောဓိံ ရောပေသဟံ တဒါ။

ဒုဂ္ဂတိံ နာဘိဇာနာမိ၊ ဗောဓိရောပဿိဒံ ဖလံ။

၈၉။

‘‘စတုသတ္တတိတော ကပ္ပေ၊ ဒဏ္ဍသေနောတိ ဝိဿုတော။

သတ္တရတနသမ္ပန္နော၊ စက္ကဝတ္တီ တဒါ အဟုံ။

၉၀။

‘‘တေသတ္တတိမှိတော ကပ္ပေ၊ သတ္တာဟေသုံ မဟီပတီ။

သမန္တနေမိနာမေန၊ ရာဇာနော စက္ကဝတ္တိနော။

၉၁။

‘‘ပဏ္ဏဝီသတိတော ကပ္ပေ၊ ပုဏ္ဏကော နာမ ခတ္တိယော။

သတ္တရတနသမ္ပန္နော၊ စက္ကဝတ္တီ မဟဗ္ဗလော။

၉၂။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ အသနဗောဓိယော ထေရော ဣမာ ဂါထာယော အဘာသိတ္ထာတိ။

အသနဗောဓိယတ္ထေရဿာပဒါနံ ဒသမံ။

ဗီဇနိဝဂ္ဂေါ ဆဋ္ဌော။

တဿုဒ္ဒါနံ –

ဗီဇနီ သတရံသီ စ၊ သယနောဒကိဝါဟိယော။

ပရိဝါရော ပဒီပဉ္စ၊ ဓဇော ပဒုမပူဇကော။

ဗောဓိ စ ဒသမော ဝုတ္တော၊ ဂါထာ ဒွေနဝုတိ တထာ။