သောဠသနိပါတ

၁၂။ သောဠသနိပါတ

၁။ ပုဏ္ဏာထေရီဂါထာ

၂၃၆။

‘‘ဥဒဟာရီ အဟံ သီတေ [ဥဒကမာဟရိံ သီတေ (သီ။)]၊ သဒါ ဥဒကမောတရိံ။

အယျာနံ ဒဏ္ဍဘယဘီတာ၊ ဝါစာဒေါသဘယဋ္ဋိတာ။

၂၃၇။

‘‘ကဿ ဗြာဟ္မဏ တွံ ဘီတော၊ သဒါ ဥဒကမောတရိ။

ဝေဓမာနေဟိ ဂတ္တေဟိ၊ သီတံ ဝေဒယသေ ဘုသံ’’။

၂၃၈။

ဇာနန္တီ ဝတ မံ [ဇာနန္တီ စ တုဝံ (က။)] ဘောတိ၊ ပုဏ္ဏိကေ ပရိပုစ္ဆသိ။

ကရောန္တံ ကုသလံ ကမ္မံ၊ ရုန္ဓန္တံ ကတပါပကံ။

၂၃၉။

‘‘ယော စ ဝုဍ္ဎော ဒဟရော ဝါ၊ ပါပကမ္မံ ပကုဗ္ဗတိ။

ဒကာဘိသေစနာ သောပိ၊ ပါပကမ္မာ ပမုစ္စတိ’’။

၂၄၀။

‘‘ကော နု တေ ဣဒမက္ခာသိ၊ အဇာနန္တဿ အဇာနကော။

ဒကာဘိသေစနာ နာမ၊ ပါပကမ္မာ ပမုစ္စတိ။

၂၄၁။

‘‘သဂ္ဂံ နူန ဂမိဿန္တိ၊ သဗ္ဗေ မဏ္ဍူကကစ္ဆပါ။

နာဂါ [နက္ကာ (သီ။)] စ သုသုမာရာ စ၊ ယေ စညေ ဥဒကေ စရာ။

၂၄၂။

‘‘ဩရဗ္ဘိကာ သူကရိကာ၊ မစ္ဆိကာ မိဂဗန္ဓကာ။

စောရာ စ ဝဇ္ဈဃာတာ စ၊ ယေ စညေ ပါပကမ္မိနော။

ဒကာဘိသေစနာ တေပိ၊ ပါပကမ္မာ ပမုစ္စရေ။

၂၄၃။

‘‘သစေ ဣမာ နဒိယော တေ၊ ပါပံ ပုဗ္ဗေ ကတံ ဝဟုံ။

ပုညမ္ပိမာ ဝဟေယျုံ တေ၊ တေန တွံ ပရိဗာဟိရော။

၂၄၄။

‘‘ယဿ ဗြာဟ္မဏ တွံ ဘီတော၊ သဒါ ဥဒကမောတရိ။

တမေဝ ဗြဟ္မေ မာ ကာသိ၊ မာ တေ သီတံ ဆဝိံ ဟနေ’’။

၂၄၅။

‘‘ကုမ္မဂ္ဂပဋိပန္နံ မံ၊ အရိယမဂ္ဂံ သမာနယိ။

ဒကာဘိသေစနာ ဘောတိ၊ ဣမံ သာဋံ ဒဒါမိ တေ’’။

၂၄၆။

‘‘တုယ္ဟေဝ သာဋကော ဟောတု၊ နာဟမိစ္ဆာမိ သာဋကံ။

သစေ ဘာယသိ ဒုက္ခဿ၊ သစေ တေ ဒုက္ခမပ္ပိယံ။

၂၄၇။

‘‘မာကာသိ ပါပကံ ကမ္မံ၊ အာဝိ ဝါ ယဒိ ဝါ ရဟော။

သစေ စ ပါပကံ ကမ္မံ၊ ကရိဿသိ ကရောသိ ဝါ။

၂၄၈။

‘‘န တေ ဒုက္ခာ ပမုတ္ယတ္ထိ၊ ဥပေစ္စာပိ [ဥပ္ပစ္စာပိ (အဋ္ဌ။ ပါဌန္တရံ)] ပလာယတော။

သစေ ဘာယသိ ဒုက္ခဿ၊ သစေ တေ ဒုက္ခမပ္ပိယံ။

၂၄၉။

‘‘ဥပေဟိ သရဏံ ဗုဒ္ဓံ၊ ဓမ္မံ သံဃဉ္စ တာဒိနံ။

သမာဒိယာဟိ သီလာနိ၊ တံ တေ အတ္ထာယ ဟေဟိတိ’’။

၂၅၀။

‘‘ဥပေမိ သရဏံ ဗုဒ္ဓံ၊ ဓမ္မံ သံဃဉ္စ တာဒိနံ။

သမာဒိယာမိ သီလာနိ၊ တံ မေ အတ္ထာယ ဟေဟိတိ။

၂၅၁။

‘‘ဗြဟ္မဗန္ဓု ပုရေ အာသိံ၊ အဇ္ဇမှိ သစ္စဗြာဟ္မဏော။

တေဝိဇ္ဇော ဝေဒသမ္ပန္နော၊ သောတ္တိယော စမှိ နှာတကော’’တိ။

။ ပုဏ္ဏာ ထေရီ။။

သောဠသနိပါတော နိဋ္ဌိတော။