၉။ နဝနိပါတ
၁။ ဝဍ္ဎမာတုထေရီဂါထာ
၂၀၄။
‘‘မာ သု တေ ဝဍ္ဎ လောကမှိ၊ ဝနထော အာဟု ကုဒါစနံ။
မာ ပုတ္တက ပုနပ္ပုနံ၊ အဟု ဒုက္ခဿ ဘာဂိမာ။
၂၀၅။
‘‘သုခဉှိ ဝဍ္ဎ မုနယော၊ အနေဇာ ဆိန္နသံသယာ။
သီတိဘူတာ ဒမပ္ပတ္တာ၊ ဝိဟရန္တိ အနာသဝါ။
၂၀၆။
‘‘တေဟာနုစိဏ္ဏံ ဣသီဘိ၊ မဂ္ဂံ ဒဿနပတ္တိယာ။
ဒုက္ခဿန္တကိရိယာယ၊ တွံ ဝဍ္ဎ အနုဗြူဟယ’’။
၂၀၇။
‘‘ဝိသာရဒါဝ ဘဏသိ၊ ဧတမတ္ထံ ဇနေတ္တိ မေ။
မညာမိ နူန မာမိကေ၊ ဝနထော တေ န ဝိဇ္ဇတိ’’။
၂၀၈။
‘‘ယေ ကေစိ ဝဍ္ဎ သင်္ခါရာ၊ ဟီနာ ဥက္ကဋ္ဌမဇ္ဈိမာ။
အဏူပိ အဏုမတ္တောပိ၊ ဝနထော မေ န ဝိဇ္ဇတိ။
၂၀၉။
‘‘သဗ္ဗေ မေ အာသဝါ ခီဏာ၊ အပ္ပမတ္တဿ ဈာယတော။
တိဿော ဝိဇ္ဇာ အနုပ္ပတ္တာ၊ ကတံ ဗုဒ္ဓဿ သာသနံ’’။
၂၁၀။
‘‘ဥဠာရံ ဝတ မေ မာတာ၊ ပတောဒံ သမဝဿရိ။
ပရမတ္ထသဉှိတာ ဂါထာ၊ ယထာပိ အနုကမ္ပိကာ။
၂၁၁။
‘‘တဿာဟံ ဝစနံ သုတွာ၊ အနုသိဋ္ဌိံ ဇနေတ္တိယာ။
ဓမ္မသံဝေဂမာပါဒိံ၊ ယောဂက္ခေမဿ ပတ္တိယာ။
၂၁၂။
‘‘သောဟံ ပဓါနပဟိတတ္တော၊ ရတ္တိန္ဒိဝမတန္ဒိတော။
မာတရာ စောဒိတော သန္တော၊ အဖုသိံ သန္တိမုတ္တမံ’’။
။ ဝဍ္ဎမာတာ ထေရီ။။
နဝကနိပါတော နိဋ္ဌိတော။