၈။ အဋ္ဌကနိပါတ
၁။ သီသူပစာလာထေရီဂါထာ
၁၉၆။
‘‘ဘိက္ခုနီ သီလသမ္ပန္နာ၊ ဣန္ဒ္ရိယေသု သုသံဝုတာ။
အဓိဂစ္ဆေ ပဒံ သန္တံ၊ အသေစနကမောဇဝံ’’။
၁၉၇။
‘‘တာဝတိံသာ စ ယာမာ စ၊ တုသိတာ စာပိ ဒေဝတာ။
နိမ္မာနရတိနော ဒေဝါ၊ ယေ ဒေဝါ ဝသဝတ္တိနော။
တတ္ထ စိတ္တံ ပဏီဓေဟိ၊ ယတ္ထ တေ ဝုသိတံ ပုရေ’’။
၁၉၈။
‘‘တာဝတိံသာ စ ယာမာ စ၊ တုသိတာ စာပိ ဒေဝတာ။
နိမ္မာနရတိနော ဒေဝါ၊ ယေ ဒေဝါ ဝသဝတ္တိနော။
၁၉၉။
‘‘ကာလံ ကာလံ ဘဝါဘဝံ၊ သက္ကာယသ္မိံ ပုရက္ခတာ။
အဝီတိဝတ္တာ သက္ကာယံ၊ ဇာတိမရဏသာရိနော။
၂၀၀။
‘‘သဗ္ဗော အာဒီပိတော လောကော၊ သဗ္ဗော လောကော ပဒီပိတော။
သဗ္ဗော ပဇ္ဇလိတော လောကော၊ သဗ္ဗော လောကော ပကမ္ပိတော။
၂၀၁။
‘‘အကမ္ပိယံ အတုလိယံ၊ အပုထုဇ္ဇနသေဝိတံ။
ဗုဒ္ဓေါ ဓမ္မမဒေသေသိ၊ တတ္ထ မေ နိရတော မနော။
၂၀၂။
‘‘တဿာဟံ ဝစနံ သုတွာ၊ ဝိဟရိံ သာသနေ ရတာ။
တိဿော ဝိဇ္ဇာ အနုပ္ပတ္တာ၊ ကတံ ဗုဒ္ဓဿ သာသနံ။
၂၀၃။
‘‘သဗ္ဗတ္ထ ဝိဟတာ နန္ဒီ၊ တမောခန္ဓော ပဒါလိတော။
ဧဝံ ဇာနာဟိ ပါပိမ၊ နိဟတော တွမသိ အန္တက’’။
။ သီသူပစာလာ ထေရီ။။
အဋ္ဌကနိပါတော နိဋ္ဌိတော။