သဋ္ဌိနိပါတ

၂၀. သဋ္ဌိနိပါတ

၁. မဟာမောဂ္ဂလ္လာနတ္ထေရဂါထာ

၁၁၄၉.

‘‘အာရညိကာ ပိဏ္ဍပါတိကာ၊ ဥဉ္ဆာပတ္တာဂတေ ရတာ။

ဒါလေမု မစ္စုနော သေနံ၊ အဇ္ဈတ္တံ သုသမာဟိတာ။

၁၁၅၀.

‘‘အာရညိကာ ပိဏ္ဍပါတိကာ၊ ဥဉ္ဆာပတ္တာဂတေ ရတာ။

ဓုနာမ မစ္စုနော သေနံ၊ နဠာဂါရံဝ ကုဉ္ဇရော။

၁၁၅၁.

‘‘ရုက္ခမူလိကာ သာတတိကာ၊ ဥဉ္ဆာပတ္တာဂတေ ရတာ။

ဒါလေမု မစ္စုနော သေနံ၊ အဇ္ဈတ္တံ သုသမာဟိတာ။

၁၁၅၂.

‘‘ရုက္ခမူလိကာ သာတတိကာ၊ ဥဉ္ဆာပတ္တာဂတေ ရတာ။

ဓုနာမ မစ္စုနော သေနံ၊ နဠာဂါရံဝ ကုဉ္ဇရော။

၁၁၅၃.

‘‘အဋ္ဌိကင်္ကလကုဋိကေ၊ မံသနှာရုပသိဗ္ဗိတေ။

ဓိရတ္ထု ပုရေ ဒုဂ္ဂန္ဓေ၊ ပရဂတ္တေ မမာယသေ။

၁၁၅၄.

‘‘ဂူထဘသ္တေ တစောနဒ္ဓေ၊ ဥရဂဏ္ဍိပိသာစိနိ။

နဝ သောတာနိ တေ ကာယေ၊ ယာနိ သန္ဒန္တိ သဗ္ဗဒါ။

၁၁၅၅.

‘‘တဝ သရီရံ နဝသောတံ၊ ဒုဂ္ဂန္ဓကရံ ပရိဗန္ဓံ။

ဘိက္ခု ပရိဝဇ္ဇယတေ တံ၊ မီဠှံ စ ယထာ သုစိကာမော။

၁၁၅၆.

‘‘ဧဝဉ္စေ တံ ဇနော ဇညာ၊ ယထာ ဇာနာမိ တံ အဟံ။

အာရကာ ပရိဝဇ္ဇေယျ၊ ဂူထဋ္ဌာနံဝ ပါဝုသေ’’။

၁၁၅၇.

‘‘ဧဝမေတံ မဟာဝီရ၊ ယထာ သမဏ ဘာသသိ။

ဧတ္ထ စေကေ ဝိသီဒန္တိ၊ ပင်္ကမှိဝ ဇရဂ္ဂဝေါ။

၁၁၅၈.

‘‘အာကာသမှိ ဟလိဒ္ဒိယာ၊ ယော မညေထ ရဇေတဝေ။

အညေန ဝါပိ ရင်္ဂေန၊ ဝိဃာတုဒယမေဝ တံ။

၁၁၅၉.

‘‘တဒါကာသသမံ စိတ္တံ၊ အဇ္ဈတ္တံ သုသမာဟိတံ။

မာ ပါပစိတ္တေ အာသာဒိ၊ အဂ္ဂိခန္ဓံဝ ပက္ခိမာ။

၁၁၆၀.

‘‘ပဿ စိတ္တကတံ ဗိမ္ဗံ၊ အရုကာယံ သမုဿိတံ။

အာတုရံ ဗဟုသင်္ကပ္ပံ၊ ယဿ နတ္ထိ ဓုဝံ ဌိတိ။

၁၁၆၁.

‘‘ပဿ စိတ္တကတံ ရူပံ၊ မဏိနာ ကုဏ္ဍလေန စ။

အဋ္ဌိံ တစေန ဩနဒ္ဓံ၊ သဟ ဝတ္ထေဟိ သောဘတိ။

၁၁၆၂.

‘‘အလတ္တကကတာ ပါဒါ၊ မုခံ စုဏ္ဏကမက္ခိတံ။

အလံ ဗာလဿ မောဟာယ၊ နော စ ပါရဂဝေသိနော။

၁၁၆၃.

‘‘အဋ္ဌပဒကတာ ကေသာ၊ နေတ္တာ အဉ္ဇနမက္ခိတာ။

အလံ ဗာလဿ မောဟာယ၊ နော စ ပါရဂဝေသိနော။

၁၁၆၄.

‘‘အဉ္ဇနီဝ နဝါ စိတ္တာ၊ ပူတိကာယော အလင်္ကတော။

အလံ ဗာလဿ မောဟာယ၊ နော စ ပါရဂဝေသိနော။

၁၁၆၅.

‘‘ဩဒဟိ မိဂဝေါ ပါသံ၊ နာသဒါ ဝါဂုရံ မိဂေါ။

ဘုတွာ နိဝါပံ ဂစ္ဆာမ၊ ကဒ္ဒန္တေ မိဂဗန္ဓကေ။

၁၁၆၆.

‘‘ဆိန္နော ပါသော မိဂဝဿ၊ နာသဒါ ဝါဂုရံ မိဂေါ။

ဘုတွာ နိဝါပံ ဂစ္ဆာမ၊ သောစန္တေ မိဂလုဒ္ဒကေ။

၁၁၆၇.

‘‘တဒါသိ ယံ ဘိံသနကံ၊ တဒါသိ လောမဟံသနံ။

အနေကာကာရသမ္ပန္နေ၊ သာရိပုတ္တမှိ နိဗ္ဗုတေ။

၁၁၆၈.

[ဒီ. နိ. ၂.၂၂၁၊ ၂၇၂; သံ. နိ. ၁.၁၈၆; ၂.၁၄၃; အပ. ထေရ ၁.၂.၁၁၅; ဇာ. ၁.၁.၉၅] ‘‘အနိစ္စာ ဝတ သင်္ခါရာ ဥပ္ပါဒဝယ ဓမ္မိနော။

ဥပဇ္ဇိတွာ နိရုဇ္ဈန္တိ၊ တေသံ ဝူပသမော သုခေါ။

၁၁၆၉.

‘‘သုခုမံ တေ ပဋိဝိဇ္ဈန္တိ၊ ဝါလဂ္ဂံ ဥသုနာ ယထာ။

ယေ ပဉ္စက္ခန္ဓေ ပဿန္တိ၊ ပရတော နော စ အတ္တတော။

၁၁၇၀.

‘‘ယေ စ ပဿန္တိ သင်္ခါရေ၊ ပရတော နော စ အတ္တတော။

ပစ္စဗျာဓိံသု နိပုဏံ၊ ဝါလဂ္ဂံ ဥသုနာ ယထာ။

၁၁၇၁.

[သံ. နိ. ၁.၂၁၊ ၉၇] ‘‘သတ္တိယာ ဝိယ ဩမဋ္ဌော၊ ဍယှမာနောဝ မတ္ထကေ။

ကာမရာဂပ္ပဟာနာယ၊ သတော ဘိက္ခု ပရိဗ္ဗဇေ။

၁၁၇၂.

[သံ. နိ. ၁.၂၁၊ ၉၇]‘‘သတ္တိယာ ဝိယ ဩမဋ္ဌော၊ ဍယှမာနောဝ မတ္ထကေ။

ဘဝရာဂပ္ပဟာနာယ၊ သတော ဘိက္ခု ပရိဗ္ဗဇေ’’။

၁၁၇၃.

‘‘စောဒိတော ဘာဝိတတ္တေန၊ သရီရန္တိမဓါရိနာ။

မိဂါရမာတုပါသာဒံ၊ ပါဒင်္ဂုဋ္ဌေန ကမ္ပယိံ။

၁၁၇၄.

‘‘နယိဒံ သိထိလမာရဗ္ဘ၊ နယိဒံ အပ္ပေန ထာမသာ။

နိဗ္ဗာနမဓိဂန္တဗ္ဗံ၊ သဗ္ဗဂန္ထ-ပမောစနံ။

၁၁၇၅.

‘‘အယဉ္စ ဒဟရော ဘိက္ခု၊ အယမုတ္တမပေါရိသော။

ဓါရေတိ အန္တိမံ ဒေဟံ၊ ဇေတွာ မာရံ သဝါဟိနိံ [သဝါဟနံ (က.)]။

၁၁၇၆.

‘‘ဝိဝရမနုပဘန္တိ ဝိဇ္ဇုတာ၊ ဝေဘာရဿ စ ပဏ္ဍဝဿ စ။

နဂဝိဝရဂတော ဈာယတိ၊ ပုတ္တော အပ္ပဋိမဿ တာဒိနော။

၁၁၇၇.

‘‘ဥပသန္တော ဥပရတော၊ ပန္တသေနာသနော မုနိ။

ဒါယာဒေါ ဗုဒ္ဓသေဋ္ဌဿ၊ ဗြဟ္မုနာ အဘိဝန္ဒိတော။

၁၁၇၈.

‘‘ဥပသန္တံ ဥပရတံ၊ ပန္တသေနာသနံ မုနိံ။

ဒါယာဒံ ဗုဒ္ဓသေဋ္ဌဿ၊ ဝန္ဒ ဗြာဟ္မဏ ကဿပံ။

၁၁၇၉.

‘‘ယော စ ဇာတိသတံ ဂစ္ဆေ၊ သဗ္ဗာ ဗြာဟ္မဏဇာတိယော။

သောတ္တိယော ဝေဒသမ္ပန္နော၊ မနုဿေသု ပုနပ္ပုနံ။

၁၁၈၀.

‘‘အဇ္ဈာယကောပိ စေ အဿ၊ တိဏ္ဏံ ဝေဒါန ပါရဂူ။

ဧတဿ ဝန္ဒနာယေတံ၊ ကလံ နာဂ္ဃတိ သောဠသိံ။

၁၁၈၁.

‘‘ယော သော အဋ္ဌ ဝိမောက္ခာနိ၊ ပုရေဘတ္တံ အဖဿယိ [အပဿယိ (သီ. က.)၊ အဖုဿယိ (သျာ.)]။

အနုလောမံ ပဋိလောမံ၊ တတော ပိဏ္ဍာယ ဂစ္ဆတိ။

၁၁၈၂.

‘‘တာဒိသံ ဘိက္ခုံ မာသာဒိ [မာ ဟနိ (သီ.)]၊ မာတ္တာနံ ခဏိ ဗြာဟ္မဏ။

အဘိပ္ပသာဒေဟိ မနံ၊ အရဟန္တမှိ တာဒိနေ။

ခိပ္ပံ ပဉ္ဇလိကော ဝန္ဒ၊ မာ တေ ဝိဇဋိ မတ္ထကံ။

၁၁၈၃.

‘‘နေသော ပဿတိ သဒ္ဓမ္မံ၊ သံသာရေန ပုရက္ခတော။

အဓေါဂမံ ဇိမှပထံ၊ ကုမ္မဂ္ဂမနုဓါဝတိ။

၁၁၈၄.

‘‘ကိမီဝ မီဠှသလ္လိတ္တော၊ သင်္ခါရေ အဓိမုစ္ဆိတော။

ပဂါဠ္ဟော လာဘသက္ကာရေ၊ တုစ္ဆော ဂစ္ဆတိ ပေါဋ္ဌိလော။

၁၁၈၅.

‘‘ဣမဉ္စ ပဿ အာယန္တံ၊ သာရိပုတ္တံ သုဒဿနံ။

ဝိမုတ္တံ ဥဘတောဘာဂေ၊ အဇ္ဈတ္တံ သုသမာဟိတံ။

၁၁၈၆.

‘‘ဝိသလ္လံ ခီဏသံယောဂံ၊ တေဝိဇ္ဇံ မစ္စုဟာယိနံ။

ဒက္ခိဏေယျံ မနုဿာနံ၊ ပုညက္ခေတ္တံ အနုတ္တရံ။

၁၁၈၇.

‘‘ဧတေ သမ္ဗဟုလာ ဒေဝါ၊ ဣဒ္ဓိမန္တော ယသဿိနော။

ဒသ ဒေဝသဟဿာနိ၊ သဗ္ဗေ ဗြဟ္မပုရောဟိတာ။

မောဂ္ဂလ္လာနံ နမဿန္တာ၊ တိဋ္ဌန္တိ ပဉ္ဇလီကတာ။

၁၁၈၈.

‘‘‘နမော တေ ပုရိသာဇည၊ နမော တေ ပုရိသုတ္တမ။

ယဿ တေ အာသဝါ ခီဏာ၊ ဒက္ခိဏေယျောသိ မာရိသ’။

၁၁၈၉.

‘‘ပူဇိတော နရဒေဝေန၊ ဥပ္ပန္နော မရဏာဘိဘူ။

ပုဏ္ဍရီကံဝ တောယေန၊ သင်္ခါရေနုပလိပ္ပတိ။

၁၁၉၀.

‘‘ယဿ မုဟုတ္တေန သဟဿဓါ လောကော၊ သံဝိဒိတော သဗြဟ္မကပ္ပော ဝသိ။

ဣဒ္ဓိဂုဏေ စုတုပပါတေ ကာလေ၊ ပဿတိ ဒေဝတာ သ ဘိက္ခု။

၁၁၉၁.

‘‘သာရိပုတ္တောဝ ပညာယ၊ သီလေန ဥပသမေန စ။

ယောပိ ပါရင်္ဂတော ဘိက္ခု၊ ဧတာဝပရမော သိယာ။

၁၁၉၂.

‘‘ကောဋိသတသဟဿဿ၊ အတ္တဘာဝံ ခဏေန နိမ္မိနေ။

အဟံ ဝိကုဗ္ဗနာသု ကုသလော၊ ဝသီဘူတောမှိ ဣဒ္ဓိယာ။

၁၁၉၃.

‘‘သမာဓိဝိဇ္ဇာဝသိပါရမီဂတော၊ မောဂ္ဂလ္လာနဂေါတ္တော အသိတဿ သာသနေ။

ဓီရော သမုစ္ဆိန္ဒိ သမာဟိတိန္ဒ္ရိယော၊ နာဂေါ ယထာ ပူတိလတံဝ ဗန္ဓနံ။

၁၁၉၄.

‘‘ပရိစိဏ္ဏော မယာ သတ္ထာ၊ ကတံ ဗုဒ္ဓဿ သာသနံ။

ဩဟိတော ဂရုကော ဘာရော၊ ဘဝနေတ္တိ သမူဟတာ။

၁၁၉၅.

‘‘ယဿ စတ္ထာယ ပဗ္ဗဇိတော၊ အဂါရသ္မာနဂါရိယံ။

သော မေ အတ္ထော အနုပ္ပတ္တော၊ သဗ္ဗသံယောဇနက္ခယော။

၁၁၉၆.

[မ. နိ. ၁.၅၁၃] ‘‘ကီဒိသော နိရယော အာသိ၊ ယတ္ထ ဒုဿီ အပစ္စထ။

ဝိဓုရံ သာဝကမာသဇ္ဇ၊ ကကုသန္ဓဉ္စ ဗြာဟ္မဏံ။

၁၁၉၇.

‘‘သတံ အာသိ အယောသင်္ကူ၊ သဗ္ဗေ ပစ္စတ္တဝေဒနာ။

ဤဒိသော နိရယော အာသိ၊ ယတ္ထ ဒုဿီ အပစ္စထ။

ဝိဓုရံ သာဝကမာသဇ္ဇ၊ ကကုသန္ဓဉ္စ ဗြာဟ္မဏံ။

၁၁၉၈.

‘‘ယော ဧတမဘိဇာနာတိ၊ ဘိက္ခု ဗုဒ္ဓဿ သာဝကော။

တာဒိသံ ဘိက္ခုမာသဇ္ဇ၊ ကဏှ ဒုက္ခံ နိဂစ္ဆသိ။

၁၁၉၉.

‘‘မဇ္ဈေသရသ္မိံ [သရဿ (သီ.)၊ သာဂရသ္မိံ (က.)] တိဋ္ဌန္တိ၊ ဝိမာနာ ကပ္ပဌာယိနော။

ဝေဠုရိယဝဏ္ဏာ ရုစိရာ၊ အစ္စိမန္တော ပဘဿရာ။

အစ္ဆရာ တတ္ထ နစ္စန္တိ၊ ပုထု နာနတ္တဝဏ္ဏိယော။

၁၂၀၀.

‘‘ယော ဧတမဘိဇာနာတိ။ပေ.။ ကဏှ ဒုက္ခံ နိဂစ္ဆသိ။

၁၂၀၁.

‘‘ယော ဝေ ဗုဒ္ဓေန စောဒိတော၊ ဘိက္ခုသံဃဿ ပေက္ခတော။

မိဂါရမာတုပါသာဒံ၊ ပါဒင်္ဂုဋ္ဌေန ကမ္ပယိ။

၁၂၀၂.

‘‘ယော ဧတမဘိဇာနာတိ။ပေ.။ ကဏှ ဒုက္ခံ နိဂစ္ဆသိ။

၁၂၀၃.

‘‘ယော ဝေဇယန္တပါသာဒံ၊ ပါဒင်္ဂုဋ္ဌေန ကမ္ပယိ။

ဣဒ္ဓိဗလေနုပတ္ထဒ္ဓေါ၊ သံဝေဇေသိ စ ဒေဝတာ။

၁၂၀၄.

‘‘ယော ဧတမဘိဇာနာတိ။ပေ.။ ကဏှ ဒုက္ခံ နိဂစ္ဆသိ။

၁၂၀၄.

‘‘ယော ဧတမဘိဇာနာတိ။ပေ.။ ကဏှ ဒုက္ခံ နိဂစ္ဆသိ။

၁၂၀၅.

‘‘ယော ဝေဇယန္တပါသာဒေ၊ သက္ကံ သော ပရိပုစ္ဆတိ။

အပိ အာဝုသော ဇာနာသိ၊ တဏှက္ခယဝိမုတ္တိယော။

တဿ သက္ကော ဝိယာကာသိ၊ ပဉ္ဟံ ပုဋ္ဌော ယထာတထံ။

၁၂၀၆.

‘‘ယော ဧတမဘိဇာနာတိ။ပေ.။ ကဏှ ဒုက္ခံ နိဂစ္ဆသိ။

၁၂၀၇.

‘‘ယော ဗြဟ္မာနံ ပရိပုစ္ဆတိ၊ သုဓမ္မာယံ ဌိတော [သုဓမ္မာယာ’ဘိတော (သျာ.)] သဘံ။

အဇ္ဇာပိ တျာဝုသော သာ ဒိဋ္ဌိ၊ ယာ တေ ဒိဋ္ဌိ ပုရေ အဟု။

ပဿသိ ဝီတိဝတ္တန္တံ၊ ဗြဟ္မလောကေ ပဘဿရံ။

၁၂၀၈.

‘‘တဿ ဗြဟ္မာ ဝိယာကာသိ၊ ပဉ္ဟံ ပုဋ္ဌော ယထာတထံ။

န မေ မာရိသ သာ ဒိဋ္ဌိ၊ ယာ မေ ဒိဋ္ဌိ ပုရေ အဟု။

၁၂၀၉.

‘‘ပဿာမိ ဝီတိဝတ္တန္တံ၊ ဗြဟ္မလောကေ ပဘဿရံ။

သောဟံ အဇ္ဇ ကထံ ဝဇ္ဇံ၊ အဟံ နိစ္စောမှိ သဿတော။

၁၂၁၀.

‘‘ယော ဧတမဘိဇာနာတိ။ပေ.။ ကဏှ ဒုက္ခံ နိဂစ္ဆသိ။

၁၂၁၁.

‘‘ယော မဟာနေရုနော ကူဋံ၊ ဝိမောက္ခေန အဖဿယိ [အပဿယိ (သီ. က.)]။

ဝနံ ပုဗ္ဗဝိဒေဟာနံ၊ ယေ စ ဘူမိသယာ နရာ။

၁၂၁၂.

‘‘ယော ဧတမဘိဇာနာတိ၊ ဘိက္ခု ဗုဒ္ဓဿ သာဝကော။

တာဒိသံ ဘိက္ခုမာသဇ္ဇ၊ ကဏှ ဒုက္ခံ နိဂစ္ဆသိ။

၁၂၁၃.

‘‘န ဝေ အဂ္ဂိ စေတယတိ၊ အဟံ ဗာလံ ဍဟာမီတိ။

ဗာလောဝ ဇလိတံ အဂ္ဂိံ၊ အာသဇ္ဇ နံ ပဍယှတိ။

၁၂၁၄.

‘‘ဧဝမေဝ တုဝံ မာရ၊ အာသဇ္ဇ နံ တထာဂတံ။

သယံ ဍဟိဿသိ အတ္တာနံ၊ ဗာလော အဂ္ဂိံဝ သမ္ဖုသံ။

၁၂၁၅.

‘‘အပုညံ ပသဝီ မာရော၊ အာသဇ္ဇ နံ တထာဂတံ။

ကိံ နု မညသိ ပါပိမ၊ န မေ ပါပံ ဝိပစ္စတိ။

၁၂၁၆.

‘‘ကရတော တေ စီယတေ [မိယျတေ (သဗ္ဗတ္ထ) မ. နိ. ၁.၅၁၃ ပဿိတဗ္ဗံ] ပါပံ၊ စိရရတ္တာယ အန္တက။

မာရ နိဗ္ဗိန္ဒ ဗုဒ္ဓမှာ၊ အာသံ မာကာသိ ဘိက္ခုသု။

၁၂၁၇.

‘‘ဣတိ မာရံ အတဇ္ဇေသိ၊ ဘိက္ခု ဘေသကဠာဝနေ။

တတော သော ဒုမ္မနော ယက္ခော၊ တတ္ထေဝန္တရဓါယထာ’’တိ။

ဣတ္ထံ သုဒံ အာယသ္မာ မဟာမောဂ္ဂလ္လာနော [မဟာမောဂ္ဂလာနော (က.)] ထေရော ဂါထာယော အဘာသိတ္ထာတိ။

သဋ္ဌိနိပါတော နိဋ္ဌိတော။

တတြုဒ္ဒါနံ –

သဋ္ဌိကမှိ နိပါတမှိ၊ မောဂ္ဂလ္လာနော မဟိဒ္ဓိကော။

ဧကောဝ ထေရဂါထာယော၊ အဋ္ဌသဋ္ဌိ ဘဝန္တိ တာတိ။