တိံသနိပါတ

၁၇. တိံသနိပါတ

၁. ဖုဿတ္ထေရဂါထာ

၉၄၉.

ပါသာဒိကေ ဗဟူ ဒိသွာ၊ ဘာဝိတတ္တေ သုသံဝုတေ။

ဣသိ ပဏ္ဍရသဂေါတ္တော [ပဏ္ဍရဿ ဂေါတ္တော (သီ.)]၊ အပုစ္ဆိ ဖုဿသဝှယံ။

၉၅၀.

‘‘ကိံဆန္ဒာ ကိမဓိပ္ပါယာ၊ ကိမာကပ္ပါ ဘဝိဿရေ။

အနာဂတမှိ ကာလမှိ၊ တံ မေ အက္ခာဟိ ပုစ္ဆိတော’’။

၉၅၁.

‘‘သုဏောဟိ ဝစနံ မယှံ၊ ဣသိပဏ္ဍရသဝှယ။

သက္ကစ္စံ ဥပဓါရေဟိ၊ အာစိက္ခိဿာမ္ယနာဂတံ။

၉၅၂.

‘‘ကောဓနာ ဥပနာဟီ စ၊ မက္ခီ ထမ္ဘီ သဌာ ဗဟူ။

ဥဿုကီ နာနာဝါဒါ စ၊ ဘဝိဿန္တိ အနာဂတေ။

၉၅၃.

‘‘အညာတမာနိနော ဓမ္မေ၊ ဂမ္ဘီရေ တီရဂေါစရာ။

လဟုကာ အဂရု ဓမ္မေ၊ အညမညမဂါရဝါ။

၉၅၄.

‘‘ဗဟူ အာဒီနဝါ လောကေ၊ ဥပ္ပဇ္ဇိဿန္တ္ယနာဂတေ။

သုဒေသိတံ ဣမံ ဓမ္မံ၊ ကိလေသေဿန္တိ [ကိလေသိဿန္တိ (သီ.)၊ ကိလိသိဿန္တိ (သျာ. က.)] ဒုမ္မတီ။

၉၅၅.

‘‘ဂုဏဟီနာပိ သံဃမှိ၊ ဝေါဟရန္တာ ဝိသာရဒါ။

ဗလဝန္တော ဘဝိဿန္တိ၊ မုခရာ အဿုတာဝိနော။

၉၅၆.

‘‘ဂုဏဝန္တောပိ သံဃမှိ၊ ဝေါဟရန္တာ ယထာတ္ထတော။

ဒုဗ္ဗလာ တေ ဘဝိဿန္တိ၊ ဟိရီမနာ အနတ္ထိကာ။

၉၅၇.

‘‘ရဇတံ ဇာတရူပဉ္စ၊ ခေတ္တံ ဝတ္ထုမဇေဠကံ။

ဒါသိဒါသဉ္စ ဒုမ္မေဓါ၊ သာဒိယိဿန္တ္ယနာဂတေ။

၉၅၈.

‘‘ဥဇ္ဈာနသညိနော ဗာလာ၊ သီလေသု အသမာဟိတာ။

ဥန္နဠာ ဝိစရိဿန္တိ၊ ကလဟာဘိရတာ မဂါ။

၉၅၉.

‘‘ဥဒ္ဓတာ စ ဘဝိဿန္တိ၊ နီလစီဝရပါရုတာ။

ကုဟာ ထဒ္ဓါ လပါ သိင်္ဂီ၊ စရိဿန္တ္ယရိယာ ဝိယ။

၉၆၀.

‘‘တေလသဏ္ဌေဟိ ကေသေဟိ၊ စပလာ အဉ္ဇနက္ခိကာ။

ရထိယာယ ဂမိဿန္တိ၊ ဒန္တဝဏ္ဏိကပါရုတာ။

၉၆၁.

‘‘အဇေဂုစ္ဆံ ဝိမုတ္တေဟိ၊ သုရတ္တံ အရဟဒ္ဓဇံ။

ဇိဂုစ္ဆိဿန္တိ ကာသာဝံ၊ ဩဒါတေသု သမုစ္ဆိတာ [ဩဒါတေ သုသမုစ္ဆိတာ (သီ.)]။

၉၆၂.

‘‘လာဘကာမာ ဘဝိဿန္တိ၊ ကုသီတာ ဟီနဝီရိယာ။

ကိစ္ဆန္တာ ဝနပတ္ထာနိ၊ ဂါမန္တေသု ဝသိဿရေ။

၉၆၃.

‘‘ယေ ယေ လာဘံ လဘိဿန္တိ၊ မိစ္ဆာဇီဝရတာ သဒါ။

တေ တေဝ အနုသိက္ခန္တာ၊ ဘဇိဿန္တိ အသံယတာ။

၉၆၄.

‘‘ယေ ယေ အလာဘိနော လာဘံ၊ န တေ ပုဇ္ဇာ ဘဝိဿရေ။

သုပေသလေပိ တေ ဓီရေ၊ သေဝိဿန္တိ န တေ တဒါ။

၉၆၅.

‘‘မိလက္ခုရဇနံ ရတ္တံ [ပိလက္ခရဇနံ ရတ္တံ (?)]၊ ဂရဟန္တာ သကံ ဓဇံ။

တိတ္ထိယာနံ ဓဇံ ကေစိ၊ ဓါရိဿန္တ္ယဝဒါတကံ။

၉၆၆.

‘‘အဂါရဝေါ စ ကာသာဝေ၊ တဒါ တေသံ ဘဝိဿတိ။

ပဋိသင်္ခါ စ ကာသာဝေ၊ ဘိက္ခူနံ န ဘဝိဿတိ။

၉၆၇.

‘‘အဘိဘူတဿ ဒုက္ခေန၊ သလ္လဝိဒ္ဓဿ ရုပ္ပတော။

ပဋိသင်္ခါ မဟာဃောရာ၊ နာဂဿာသိ အစိန္တိယာ။

၉၆၈.

‘‘ဆဒ္ဒန္တော ဟိ တဒါ ဒိသွာ၊ သုရတ္တံ အရဟဒ္ဓဇံ။

တာဝဒေဝ ဘဏီ ဂါထာ၊ ဂဇော အတ္ထောပသံဟိတာ’’။

၉၆၉.

[ဓ. ပ. ၉; ဇာ. ၁.၂.၁၄၁; ၁.၁၆.၁၂၂] ‘‘အနိက္ကသာဝေါ ကာသာဝံ၊ ယော ဝတ္ထံ ပရိဓဿတိ [ပရိဒဟိဿတိ (သီ. သျာ.)]။

အပေတော ဒမသစ္စေန၊ န သော ကာသာဝမရဟတိ။

၉၇၀.

‘‘ယော စ ဝန္တကာသာဝဿ၊ သီလေသု သုသမာဟိတော။

ဥပေတော ဒမသစ္စေန၊ သ ဝေ ကာသာဝမရဟတိ။

၉၇၁.

‘‘ဝိပန္နသီလော ဒုမ္မေဓေါ၊ ပါကဋော ကာမကာရိယော။

ဝိဗ္ဘန္တစိတ္တော နိဿုက္ကော၊ န သော ကာသာဝမရဟတိ။

၉၇၂.

‘‘ယော စ သီလေန သမ္ပန္နော၊ ဝီတရာဂေါ သမာဟိတော။

ဩဒါတမနသင်္ကပ္ပော၊ သ ဝေ ကာသာဝမရဟတိ။

၉၇၃.

‘‘ဥဒ္ဓတော ဥန္နဠော ဗာလော၊ သီလံ ယဿ န ဝိဇ္ဇတိ။

ဩဒါတကံ အရဟတိ၊ ကာသာဝံ ကိံ ကရိဿတိ။

၉၇၄.

‘‘ဘိက္ခူ စ ဘိက္ခုနိယော စ၊ ဒုဋ္ဌစိတ္တာ အနာဒရာ။

တာဒီနံ မေတ္တစိတ္တာနံ၊ နိဂ္ဂဏှိဿန္တ္ယနာဂတေ။

၉၇၅.

‘‘သိက္ခာပေန္တာပိ ထေရေဟိ၊ ဗာလာ စီဝရဓါရဏံ။

န သုဏိဿန္တိ ဒုမ္မေဓါ၊ ပါကဋာ ကာမကာရိယာ။

၉၇၆.

‘‘တေ တထာ သိက္ခိတာ ဗာလာ၊ အညမညံ အဂါရဝါ။

နာဒိယိဿန္တုပဇ္ဈာယေ၊ ခဠုင္ကော ဝိယ သာရထိံ။

၉၇၇.

‘‘ဧဝံ အနာဂတဒ္ဓါနံ၊ ပဋိပတ္တိ ဘဝိဿတိ။

ဘိက္ခူနံ ဘိက္ခုနီနဉ္စ၊ ပတ္တေ ကာလမှိ ပစ္ဆိမေ။

၉၇၈.

‘‘ပုရာ အာဂစ္ဆတေ ဧတံ၊ အနာဂတံ မဟဗ္ဘယံ။

သုဗ္ဗစာ ဟောထ သခိလာ၊ အညမညံ သဂါရဝါ။

၉၇၉.

‘‘မေတ္တစိတ္တာ ကာရုဏိကာ၊ ဟောထ သီလေသု သံဝုတာ။

အာရဒ္ဓဝီရိယာ ပဟိတတ္တာ၊ နိစ္စံ ဒဠှပရက္ကမာ။

၉၈၀.

‘‘ပမာဒံ ဘယတော ဒိသွာ၊ အပ္ပမာဒဉ္စ ခေမတော။

ဘာဝေထဋ္ဌင်္ဂိကံ မဂ္ဂံ၊ ဖုသန္တာ အမတံ ပဒ’’န္တိ။

။ ဖုဿော ထေရော။။

၂. သာရိပုတ္တတ္ထေရဂါထာ

၉၈၁.

‘‘ယထာစာရီ ယထာသတော သတီမာ၊ ယတသင်္ကပ္ပဇ္ဈာယိ အပ္ပမတ္တော။

အဇ္ဈတ္တရတော သမာဟိတတ္တော၊ ဧကော သန္တုသိတော တမာဟု ဘိက္ခုံ။

၉၈၂.

‘‘အလ္လံ သုက္ခံ ဝါ ဘုဉ္ဇန္တော၊ န ဗာဠှံ သုဟိတော သိယာ။

ဦနူဒရော မိတာဟာရော၊ သတော ဘိက္ခု ပရိဗ္ဗဇေ။

၉၈၃.

‘‘စတ္တာရော ပဉ္စ အာလောပေ၊ အဘုတွာ ဥဒကံ ပိဝေ။

အလံ ဖာသုဝိဟာရာယ၊ ပဟိတတ္တဿ ဘိက္ခုနော။

၉၈၄.

‘‘ကပ္ပိယံ တံ စေ ဆာဒေတိ၊ စီဝရံ ဣဒမတ္ထိကံ [ဣဒမတ္ထိတံ (သီ.)]။

အလံ ဖာသုဝိဟာရာယ၊ ပဟိတတ္တဿ ဘိက္ခုနော။

၉၈၅.

‘‘ပလ္လင်္ကေန နိသိန္နဿ၊ ဇဏ္ဏုကေ နာဘိဝဿတိ။

အလံ ဖာသုဝိဟာရာယ၊ ပဟိတတ္တဿ ဘိက္ခုနော။

၉၈၆.

[သံ. နိ. ၄.၂၅၃; ဣတိဝု. ၅၃] ‘‘ယော သုခံ ဒုက္ခတော အဒ္ဒ၊ ဒုက္ခမဒ္ဒက္ခိ သလ္လတော။

ဥဘယန္တရေန [ဥဘယမန္တရေ (သီ.)] နာဟောသိ၊ ကေန လောကသ္မိ ကိံ သိယာ။

၉၈၇.

‘‘မာ မေ ကဒါစိ ပါပိစ္ဆော၊ ကုသီတော ဟီနဝီရိယော။

အပ္ပဿုတော အနာဒရော၊ ကေန လောကသ္မိ ကိံ သိယာ။

၉၈၈.

‘‘ဗဟုဿုတော စ မေဓါဝီ၊ သီလေသု သုသမာဟိတော။

စေတောသမထမနုယုတ္တော၊ အပိ မုဒ္ဓနိ တိဋ္ဌတု။

၉၈၉.

‘‘ယော ပပဉ္စမနုယုတ္တော၊ ပပဉ္စာဘိရတော မဂေါ။

ဝိရာဓယီ သော နိဗ္ဗာနံ၊ ယောဂက္ခေမံ အနုတ္တရံ။

၉၉၀.

‘‘ယော စ ပပဉ္စံ ဟိတွာန၊ နိပ္ပပဉ္စပထေ ရတော။

အာရာဓယီ သော နိဗ္ဗာနံ၊ ယောဂက္ခေမံ အနုတ္တရံ။

၉၉၁.

[ဓ. ပ. ၉၈] ‘‘ဂါမေ ဝါ ယဒိ ဝါရညေ၊ နိန္နေ ဝါ ယဒိ ဝါ ထလေ။

ယတ္ထ အရဟန္တော ဝိဟရန္တိ၊ တံ ဘူမိရာမဏေယျကံ။

၉၉၂.

‘‘ရမဏီယာနိ အရညာနိ၊ ယတ္ထ န ရမတီ ဇနော။

ဝီတရာဂါ ရမိဿန္တိ၊ န တေ ကာမဂဝေသိနော။

၉၉၃.

[ဓ. ပ. ၇၆] ‘‘နိဓီနံဝ ပဝတ္တာရံ၊ ယံ ပဿေ ဝဇ္ဇဒဿိနံ။

နိဂ္ဂယှဝါဒိံ မေဓါဝိံ၊ တာဒိသံ ပဏ္ဍိတံ ဘဇေ။

တာဒိသံ ဘဇမာနဿ၊ သေယျော ဟောတိ န ပါပိယော။

၉၉၄.

[ဓ. ပ. ၇၇] ‘‘ဩဝဒေယျာနုသာသေယျ၊ အသဗ္ဘာ စ နိဝါရယေ။

သတဉှိ သော ပိယော ဟောတိ၊ အသတံ ဟောတိ အပ္ပိယော။

၉၉၅.

‘‘အညဿ ဘဂဝါ ဗုဒ္ဓေါ၊ ဓမ္မံ ဒေသေသိ စက္ခုမာ။

ဓမ္မေ ဒေသိယမာနမှိ၊ သောတမောဓေသိမတ္ထိကော။

တံ မေ အမောဃံ သဝနံ၊ ဝိမုတ္တောမှိ အနာသဝေါ။

၉၉၆.

‘‘နေဝ ပုဗ္ဗေနိဝါသာယ၊ နပိ ဒိဗ္ဗဿ စက္ခုနော။

စေတောပရိယာယ ဣဒ္ဓိယာ၊ စုတိယာ ဥပပတ္တိယာ။

သောတဓါတုဝိသုဒ္ဓိယာ၊ ပဏိဓီ မေ န ဝိဇ္ဇတိ [ကထာ. ၃၇၈]။

၉၉၇.

‘‘ရုက္ခမူလံဝ နိဿာယ၊ မုဏ္ဍော သံဃာဋိပါရုတော။

ပညာယ ဥတ္တမော ထေရော၊ ဥပတိဿောဝ [ဥပတိဿော စ (သီ. က.)] ဈာယတိ။

၉၉၈.

‘‘အဝိတက္ကံ သမာပန္နော၊ သမ္မာသမ္ဗုဒ္ဓသာဝကော။

အရိယေန တုဏှီဘာဝေန၊ ဥပေတော ဟောတိ တာဝဒေ။

၉၉၉.

[ဥဒါ. ၂၄] ‘‘ယထာပိ ပဗ္ဗတော သေလော၊ အစလော သုပ္ပတိဋ္ဌိတော။

ဧဝံ မောဟက္ခယာ ဘိက္ခု၊ ပဗ္ဗတောဝ န ဝေဓတိ။

၁၀၀၀.

‘‘အနင်္ဂဏဿ ပေါသဿ၊ နိစ္စံ သုစိဂဝေသိနော။

ဝါလဂ္ဂမတ္တံ ပါပဿ၊ အဗ္ဘမတ္တံဝ ခါယတိ။

၁၀၀၁.

‘‘နာဘိနန္ဒာမိ မရဏံ၊ နာဘိနန္ဒာမိ ဇီဝိတံ။

နိက္ခိပိဿံ ဣမံ ကာယံ၊ သမ္ပဇာနော ပတိဿတော။

၁၀၀၂.

‘‘နာဘိနန္ဒာမိ မရဏံ၊ နာဘိနန္ဒာမိ ဇီဝိတံ။

ကာလဉ္စ ပဋိကင်္ခါမိ၊ နိဗ္ဗိသံ ဘတကော ယထာ။

၁၀၀၃.

‘‘ဥဘယေန မိဒံ မရဏမေဝ၊ နာမရဏံ ပစ္ဆာ ဝါ ပုရေ ဝါ။

ပဋိပဇ္ဇထ မာ ဝိနဿထ၊ ခဏော ဝေါ မာ ဥပစ္စဂါ။

၁၀၀၄.

‘‘နဂရံ ယထာ ပစ္စန္တံ၊ ဂုတ္တံ သန္တရဗာဟိရံ။

ဧဝံ ဂေါပေထ အတ္တာနံ၊ ခဏော ဝေါ မာ ဥပစ္စဂါ။

ခဏာတီတာ ဟိ သောစန္တိ၊ နိရယမှိ သမပ္ပိတာ။

၁၀၀၅.

‘‘ဥပသန္တော ဥပရတော၊ မန္တဘာဏီ [မတ္တဘာဏီ (သီ.)] အနုဒ္ဓတော။

ဓုနာတိ ပါပကေ ဓမ္မေ၊ ဒုမပတ္တံဝ မာလုတော။

၁၀၀၆.

‘‘ဥပသန္တော ဥပရတော၊ မန္တဘာဏီ အနုဒ္ဓတော။

အပ္ပါသိ [အဗ္ဗဟိ (သျာ.)၊ အဘာသိ (?)] ပါပကေ ဓမ္မေ၊ ဒုမပတ္တံဝ မာလုတော။

၁၀၀၇.

‘‘ဥပသန္တော အနာယာသော၊ ဝိပ္ပသန္နော အနာဝိလော။

ကလျာဏသီလော မေဓါဝီ၊ ဒုက္ခဿန္တကရော သိယာ။

၁၀၀၈.

‘‘န ဝိဿသေ ဧကတိယေသု ဧဝံ၊ အဂါရိသု ပဗ္ဗဇိတေသု စာပိ။

သာဓူပိ ဟုတွာ န အသာဓု ဟောန္တိ၊ အသာဓု ဟုတွာ ပုန သာဓု ဟောန္တိ။

၁၀၀၉.

‘‘ကာမစ္ဆန္ဒော စ ဗျာပါဒေါ၊ ထိနမိဒ္ဓဉ္စ ဘိက္ခုနော။

ဥဒ္ဓစ္စံ ဝိစိကိစ္ဆာ စ၊ ပဉ္စေတေ စိတ္တကေလိသာ။

၁၀၁၀.

‘‘ယဿ သက္ကရိယမာနဿ၊ အသက္ကာရေန စူဘယံ။

သမာဓိ န ဝိကမ္ပတိ၊ အပ္ပမာဒဝိဟာရိနော။

၁၀၁၁.

‘‘တံ ဈာယိနံ သာတတိကံ၊ သုခုမဒိဋ္ဌိဝိပဿကံ။

ဥပါဒါနက္ခယာရာမံ၊ အာဟု သပ္ပုရိသော ဣတိ။

၁၀၁၂.

‘‘မဟာသမုဒ္ဒေါ ပထဝီ၊ ပဗ္ဗတော အနိလောပိ စ။

ဥပမာယ န ယုဇ္ဇန္တိ၊ သတ္ထု ဝရဝိမုတ္တိယာ။

၁၀၁၃.

‘‘စက္ကာနုဝတ္တကော ထေရော၊ မဟာဉာဏီ သမာဟိတော။

ပထဝါပဂ္ဂိသမာနော၊ န ရဇ္ဇတိ န ဒုဿတိ။

၁၀၁၄.

‘‘ပညာပါရမိတံ ပတ္တော၊ မဟာဗုဒ္ဓိ မဟာမတိ။

အဇဠော ဇဠသမာနော၊ သဒါ စရတိ နိဗ္ဗုတော။

၁၀၁၅.

‘‘ပရိစိဏ္ဏော မယာ သတ္ထာ။ပေ.။ ဘဝနေတ္တိ သမူဟတာ။

၁၀၁၆.

‘‘သမ္ပာဒေထပ္ပမာဒေန ၊ ဧသာ မေ အနုသာသနီ။

ဟန္ဒာဟံ ပရိနိဗ္ဗိဿံ၊ ဝိပ္ပမုတ္တောမှိ သဗ္ဗဓီ’’တိ။

။ သာရိပုတ္တော ထေရော။။

၃. အာနန္ဒတ္ထေရဂါထာ

၁၀၁၇.

‘‘ပိသုဏေန စ ကောဓနေန စ၊ မစ္ဆရိနာ စ ဝိဘူတနန္ဒိနာ။

သခိတံ န ကရေယျ ပဏ္ဍိတော၊ ပါပေါ ကာပုရိသေန သင်္ဂမော။

၁၀၁၈.

‘‘သဒ္ဓေန စ ပေသလေန စ၊ ပညဝတာ ဗဟုဿုတေန စ။

သခိတံ ကရေယျ ပဏ္ဍိတော၊ ဘဒ္ဒေါ သပ္ပုရိသေန သင်္ဂမော။

၁၀၁၉.

‘‘ပဿ စိတ္တကတံ ဗိမ္ဗံ။ပေ.။ ယဿ နတ္ထိ ဓုဝံ ဌိတိ။

၁၀၂၀.

‘‘ပဿ စိတ္တကတံ ဗိမ္ဗံ။ပေ.။ ဝတ္ထေဟိ သောဘတိ။

၁၀၂၁.

‘‘အလတ္တကကတာ ။ပေ.။ နော စ ပါရဂဝေသိနော။

၁၀၂၂.

‘‘အဋ္ဌပဒကတာ။ပေ.။ နော စ ပါရဂဝေသိနော။

၁၀၂၃.

‘‘အဉ္ဇနီဝ နဝါ။ပေ.။ နော စ ပါရဂဝေသိနော။

၁၀၂၄.

‘‘ဗဟုဿုတော စိတ္တကထီ၊ ဗုဒ္ဓဿ ပရိစာရကော။

ပန္နဘာရော ဝိသညုတ္တော၊ သေယျံ ကပ္ပေတိ ဂေါတမော။

၁၀၂၅.

‘‘ခီဏာသဝေါ ဝိသညုတ္တော၊ သင်္ဂါတီတော သုနိဗ္ဗုတော။

ဓါရေတိ အန္တိမံ ဒေဟံ၊ ဇာတိမရဏပါရဂူ။

၁၀၂၆.

‘‘ယသ္မိံ ပတိဋ္ဌိတာ ဓမ္မာ၊ ဗုဒ္ဓဿာဒိစ္စဗန္ဓုနော။

နိဗ္ဗာနဂမနေ မဂ္ဂေ၊ သောယံ တိဋ္ဌတိ ဂေါတမော။

၁၀၂၇.

‘‘ဒွါသီတိ ဗုဒ္ဓတော ဂဏ္ဟိံ၊ ဒွေ သဟဿာနိ ဘိက္ခုတော။

စတုရာသီတိသဟဿာနိ၊ ယေ မေ ဓမ္မာ ပဝတ္တိနော။

၁၀၂၈.

‘‘အပ္ပဿုတာယံ ပုရိသော၊ ဗလိဗဒ္ဒေါဝ ဇီရတိ။

မံသာနိ တဿ ဝဍ္ဎန္တိ၊ ပညာ တဿ န ဝဍ္ဎတိ။

၁၀၂၉.

‘‘ဗဟုဿုတော အပ္ပဿုတံ၊ ယော သုတေနာတိမညတိ။

အန္ဓော ပဒီပဓါရောဝ၊ တထေဝ ပဋိဘာတိ မံ။

၁၀၃၀.

‘‘ဗဟုဿုတံ ဥပါသေယျ၊ သုတဉ္စ န ဝိနာသယေ။

တံ မူလံ ဗြဟ္မစရိယဿ၊ တသ္မာ ဓမ္မဓရော သိယာ။

၁၀၃၁.

‘‘ပုဗ္ဗာပရညူ အတ္ထညူ၊ နိရုတ္တိပဒကောဝိဒေါ။

သုဂ္ဂဟီတဉ္စ ဂဏှာတိ၊ အတ္ထဉ္စောပပရိက္ခတိ။

၁၀၃၂.

‘‘ခန္တ္ယာ ဆန္ဒိကတော [ခန္တိယာ ဆန္ဒိတော (?)] ဟောတိ၊ ဥဿဟိတွာ တုလေတိ တံ။

သမယေ သော ပဒဟတိ၊ အဇ္ဈတ္တံ သုသမာဟိတော။

၁၀၃၃.

‘‘ဗဟုဿုတံ ဓမ္မဓရံ၊ သပ္ပညံ ဗုဒ္ဓသာဝကံ။

ဓမ္မဝိညာဏမာကင်္ခံ၊ တံ ဘဇေထ တထာဝိဓံ။

၁၀၃၄.

‘‘ဗဟုဿုတော ဓမ္မဓရော၊ ကောသာရက္ခော မဟေသိနော။

စက္ခု သဗ္ဗဿ လောကဿ၊ ပူဇနီယော ဗဟုဿုတော။

၁၀၃၅.

‘‘ဓမ္မာရာမော ဓမ္မရတော၊ ဓမ္မံ အနုဝိစိန္တယံ။

ဓမ္မံ အနုဿရံ ဘိက္ခု၊ သဒ္ဓမ္မာ န ပရိဟာယတိ။

၁၀၃၆.

‘‘ကာယမစ္ဆေရဂရုနော [ဂရုကော (သီ.)]၊ ဟိယျမာနေ [ဟိယျမာနော (သီ.)] အနုဋ္ဌဟေ။

သရီရသုခဂိဒ္ဓဿ၊ ကုတော သမဏဖာသုတာ။

၁၀၃၇.

‘‘န ပက္ခန္တိ ဒိသာ သဗ္ဗာ၊ ဓမ္မာ န ပဋိဘန္တိ မံ။

ဂတေ ကလျာဏမိတ္တမှိ၊ အန္ဓကာရံဝ ခါယတိ။

၁၀၃၈.

‘‘အဗ္ဘတီတသဟာယဿ၊ အတီတဂတသတ္ထုနော။

နတ္ထိ ဧတာဒိသံ မိတ္တံ၊ ယထာ ကာယဂတာ သတိ။

၁၀၃၉.

‘‘ယေ ပုရာဏာ အတီတာ တေ၊ နဝေဟိ န သမေတိ မေ။

သ္ဝဇ္ဇ ဧကောဝ ဈာယာမိ၊ ဝဿုပေတောဝ ပက္ခိမာ။

၁၀၄၀.

‘‘ဒဿနာယ အဘိက္ကန္တေ၊ နာနာဝေရဇ္ဇကေ ဗဟူ။

မာ ဝါရယိတ္ထ သောတာရော၊ ပဿန္တု သမယော မမံ။

၁၀၄၁.

‘‘ဒဿနာယ အဘိက္ကန္တေ၊ နာနာဝေရဇ္ဇကေ ပုထု။

ကရောတိ သတ္ထာ ဩကာသံ၊ န နိဝါရေတိ စက္ခုမာ။

၁၀၄၂.

‘‘ပဏ္ဏဝီသတိဝဿာနိ၊ သေခဘူတဿ မေ သတော။

န ကာမသညာ ဥပ္ပဇ္ဇိ၊ ပဿ ဓမ္မသုဓမ္မတံ။

၁၀၄၃.

‘‘ပဏ္ဏဝီသတိဝဿာနိ၊ သေခဘူတဿ မေ သတော။

န ဒေါသသညာ ဥပ္ပဇ္ဇိ၊ ပဿ ဓမ္မသုဓမ္မတံ။

၁၀၄၄.

‘‘ပဏ္ဏဝီသတိဝဿာနိ၊ ဘဂဝန္တံ ဥပဋ္ဌဟိံ။

မေတ္တေန ကာယကမ္မေန၊ ဆာယာဝ အနပါယိနီ [အနုပါယိနီ (သျာ. က.)]။

၁၀၄၅.

‘‘ပဏ္ဏဝီသတိဝဿာနိ၊ ဘဂဝန္တံ ဥပဋ္ဌဟိံ။

မေတ္တေန ဝစီကမ္မေန၊ ဆာယာဝ အနပါယိနီ။

၁၀၄၆.

‘‘ပဏ္ဏဝီသတိဝဿာနိ၊ ဘဂဝန္တံ ဥပဋ္ဌဟိံ။

မေတ္တေန မနောကမ္မေန၊ ဆာယာဝ အနပါယိနီ။

၁၀၄၇.

‘‘ဗုဒ္ဓဿ စင်္ကမန္တဿ၊ ပိဋ္ဌိတော အနုစင်္ကမိံ။

ဓမ္မေ ဒေသိယမာနမှိ၊ ဉာဏံ မေ ဥဒပဇ္ဇထ။

၁၀၄၈.

‘‘အဟံ သကရဏီယောမှိ၊ သေခေါ အပ္ပတ္တမာနသော။

သတ္ထု စ ပရိနိဗ္ဗာနံ၊ ယော အမှံ အနုကမ္ပကော။

၁၀၄၉.

‘‘တဒါသိ ယံ ဘိံသနကံ၊ တဒါသိ လောမဟံသနံ။

သဗ္ဗာကာရဝရူပေတေ၊ သမ္ဗုဒ္ဓေ ပရိနိဗ္ဗုတေ။

၁၀၅၀.

‘‘ဗဟုဿုတော ဓမ္မဓရော၊ ကောသာရက္ခော မဟေသိနော။

စက္ခု သဗ္ဗဿ လောကဿ၊ အာနန္ဒော ပရိနိဗ္ဗုတော။

၁၀၅၁.

‘‘ဗဟုဿုတော ဓမ္မဓရော၊ ကောသာရက္ခော မဟေသိနော။

စက္ခု သဗ္ဗဿ လောကဿ၊ အန္ဓကာရေ တမောနုဒေါ။

၁၀၅၂.

‘‘ဂတိမန္တော သတိမန္တော၊ ဓိတိမန္တော စ ယော ဣသိ။

သဒ္ဓမ္မဓါရကော ထေရော၊ အာနန္ဒော ရတနာကရော။

၁၀၅၃.

‘‘ပရိစိဏ္ဏော မယာ သတ္ထာ၊ ကတံ ဗုဒ္ဓဿ သာသနံ။

ဩဟိတော ဂရုကော ဘာရော၊ နတ္ထိ ဒါနိ ပုနဗ္ဘဝေါ’’တိ။

။ အာနန္ဒော ထေရော။။

တိံသနိပါတော နိဋ္ဌိတော။

တတြုဒ္ဒါနံ –

ဖုဿောပတိဿော အာနန္ဒော၊ တယောတိမေ ပကိတ္တိတာ။

ဂါထာယော တတ္ထ သင်္ခါတာ၊ သတံ ပဉ္စ စ ဥတ္တရီတိ။