သောဠသကနိပါတ

၁၅. သောဠသကနိပါတ

၁. အညာသိကောဏ္ဍညတ္ထေရဂါထာ

၆၇၃.

‘‘ဧသ ဘိယျော ပသီဒါမိ၊ သုတွာ ဓမ္မံ မဟာရသံ။

ဝိရာဂေါ ဒေသိတော ဓမ္မော၊ အနုပါဒါယ သဗ္ဗသော။

၆၇၄.

‘‘ဗဟူနိ လောကေ စိတြာနိ၊ အသ္မိံ ပထဝိမဏ္ဍလေ။

မထေန္တိ မညေ သင်္ကပ္ပံ၊ သုဘံ ရာဂူပသံဟိတံ။

၆၇၅.

‘‘ရဇမုဟတဉ္စ ဝါတေန၊ ယထာ မေဃောပသမ္မယေ။

ဧဝံ သမ္မန္တိ သင်္ကပ္ပါ၊ ယဒါ ပညာယ ပဿတိ။

၆၇၆.

[ဓ. ပ. ၂၇၇ ဓမ္မပဒေ] ‘‘သဗ္ဗေ သင်္ခါရာ အနိစ္စာတိ၊ ယဒါ ပညာယ ပဿတိ။

အထ နိဗ္ဗိန္ဒတိ ဒုက္ခေ၊ ဧသ မဂ္ဂေါ ဝိသုဒ္ဓိယာ။

၆၇၇ .

[ဓ. ပ. ၂၇၈ ဓမ္မပဒေ] ‘‘သဗ္ဗေ သင်္ခါရာ ဒုက္ခာတိ၊ ယဒါ ပညာယ ပဿတိ

အထ နိဗ္ဗိန္ဒတိ ဒုက္ခေ၊ ဧသ မဂ္ဂေါ ဝိသုဒ္ဓိယာ။

၆၇၈.

[ဓ. ပ. ၂၇၉ ဓမ္မပဒေ] ‘‘သဗ္ဗေ ဓမ္မာ အနတ္တာတိ၊ ယဒါ ပညာယ ပဿတိ။

အထ နိဗ္ဗိန္ဒတိ ဒုက္ခေ၊ ဧသ မဂ္ဂေါ ဝိသုဒ္ဓိယာ။

၆၇၉.

‘‘ဗုဒ္ဓါနုဗုဒ္ဓေါ ယော ထေရော၊ ကောဏ္ဍညော တိဗ္ဗနိက္ကမော။

ပဟီနဇာတိမရဏော၊ ဗြဟ္မစရိယဿ ကေဝလီ။

၆၈၀.

‘‘ဩဃပါသော ဒဠှခိလော [ဒဠှော ခိလော (သျာ. က.)]၊ ပဗ္ဗတော ဒုပ္ပဒါလယော။

ဆေတွာ ခိလဉ္စ ပါသဉ္စ၊ သေလံ ဘေတွာန [ဆေတွာန (က.)] ဒုဗ္ဘိဒံ။

တိဏ္ဏော ပါရင်္ဂတော ဈာယီ၊ မုတ္တော သော မာရဗန္ဓနာ။

၆၈၁.

‘‘ဥဒ္ဓတော စပလော ဘိက္ခု၊ မိတ္တေ အာဂမ္မ ပါပကေ။

သံသီဒတိ မဟောဃသ္မိံ၊ ဦမိယာ ပဋိကုဇ္ဇိတော။

၆၈၂.

‘‘အနုဒ္ဓတော အစပလော၊ နိပကော သံဝုတိန္ဒ္ရိယော။

ကလျာဏမိတ္တော မေဓါဝီ၊ ဒုက္ခဿန္တကရော သိယာ။

၆၈၃.

‘‘ကာလပဗ္ဗင်္ဂသင်္ကာသော၊ ကိသော ဓမနိသန္ထတော။

မတ္တညူ အန္နပါနသ္မိံ၊ အဒီနမနသော နရော။

၆၈၄.

‘‘ဖုဋ္ဌော ဍံသေဟိ မကသေဟိ၊ အရညသ္မိံ ဗြဟာဝနေ။

နာဂေါ သင်္ဂါမသီသေဝ၊ သတော တတြာဓိဝါသယေ။

၆၈၅.

‘‘နာဘိနန္ဒာမိ မရဏံ။ပေ.။ နိဗ္ဗိသံ ဘတကော ယထာ။

၆၈၆.

‘‘နာဘိနန္ဒာမိ မရဏံ။ပေ.။ သမ္ပဇာနာဧ ပတိဿတော။

၆၈၇.

‘‘ပရိစိဏ္ဏော မယာ သတ္ထာ။ပေ.။ ဘဝနေတ္တိ သမူဟတာ။

၆၈၈.

‘‘ယဿ စတ္ထာယ ပဗ္ဗဇိတော၊ အဂါရသ္မာနဂါရိယံ။

သော မေ အတ္ထော အနုပ္ပတ္တော၊ ကိံ မေ သဒ္ဓိဝိဟာရိနာ’’တိ။

။ အညာသိကောဏ္ဍညော [အညာကောဏ္ဍညော (သီ. သျာ.)] ထေရော။။

၂. ဥဒါယိတ္ထေရဂါထာ

၆၈၉.

[အ. နိ. ၆.၄၃] ‘‘မနုဿဘူတံ သမ္ဗုဒ္ဓံ၊ အတ္တဒန္တံ သမာဟိတံ။

ဣရိယမာနံ ဗြဟ္မပထေ၊ စိတ္တဿူပသမေ ရတံ။

၆၉၀.

‘‘ယံ မနုဿာ နမဿန္တိ၊ သဗ္ဗဓမ္မာန ပါရဂုံ။

ဒေဝါပိ တံ နမဿန္တိ၊ ဣတိ မေ အရဟတော သုတံ။

၆၉၁.

‘‘သဗ္ဗသံယောဇနာတီတံ ၊ ဝနာ နိဗ္ဗနမာဂတံ။

ကာမေဟိ နေက္ခမ္မရတံ [နိက္ခမ္မရတံ (က.)]၊ မုတ္တံ သေလာဝ ကဉ္စနံ။

၆၉၂.

‘‘သ ဝေ အစ္စရုစိ နာဂေါ၊ ဟိမဝါဝညေ သိလုစ္စယေ။

သဗ္ဗေသံ နာဂနာမာနံ၊ သစ္စနာမော အနုတ္တရော။

၆၉၃.

‘‘နာဂံ ဝေါ ကိတ္တယိဿာမိ၊ န ဟိ အာဂုံ ကရောတိ သော။

သောရစ္စံ အဝိဟိံသာ စ၊ ပါဒါ နာဂဿ တေ ဒုဝေ။

၆၉၄.

‘‘သတိ စ သမ္ပဇညဉ္စ၊ စရဏာ နာဂဿ တေပရေ။

သဒ္ဓါဟတ္ထော မဟာနာဂေါ၊ ဥပေက္ခာသေတဒန္တဝါ။

၆၉၅.

‘‘သတိ ဂီဝါ သိရော ပညာ၊ ဝီမံသာ ဓမ္မစိန္တနာ။

ဓမ္မကုစ္ဆိသမာဝါသော၊ ဝိဝေကော တဿ ဝါလဓိ။

၆၉၆.

‘‘သော ဈာယီ အဿာသရတော၊ အဇ္ဈတ္တံ သုသမာဟိတော။

ဂစ္ဆံ သမာဟိတော နာဂေါ၊ ဌိတော နာဂေါ သမာဟိတော။

၆၉၇.

‘‘သယံ သမာဟိတော နာဂေါ၊ နိသိန္နောပိ သမာဟိတော။

သဗ္ဗတ္ထ သံဝုတော နာဂေါ၊ ဧသာ နာဂဿ သမ္ပဒါ။

၆၉၈.

‘‘ဘုဉ္ဇတိ အနဝဇ္ဇာနိ၊ သာဝဇ္ဇာနိ န ဘုဉ္ဇတိ။

ဃာသမစ္ဆာဒနံ လဒ္ဓါ၊ သန္နိဓိံ ပရိဝဇ္ဇယံ။

၆၉၉.

‘‘သံယောဇနံ အဏုံ ထူလံ၊ သဗ္ဗံ ဆေတွာန ဗန္ဓနံ။

ယေန ယေနေဝ ဂစ္ဆတိ၊ အနပက္ခောဝ ဂစ္ဆတိ။

၇၀၀.

‘‘ယထာပိ ဥဒကေ ဇာတံ၊ ပုဏ္ဍရီကံ ပဝဍ္ဎတိ။

နောပလိပ္ပတိ တောယေန၊ သုစိဂန္ဓံ မနောရမံ။

၇၀၁.

‘‘တထေဝ စ လောကေ ဇာတော၊ ဗုဒ္ဓေါ လောကေ ဝိဟရတိ။

နောပလိပ္ပတိ လောကေန၊ တောယေန ပဒုမံ ယထာ။

၇၀၂.

‘‘မဟာဂိနိ ပဇ္ဇလိတော၊ အနာဟာရောပသမ္မတိ။

အင်္ဂါရေသု စ သန္တေသု၊ နိဗ္ဗုတောတိ ပဝုစ္စတိ။

၇၀၃.

‘‘အတ္ထဿာယံ ဝိညာပနီ၊ ဥပမာ ဝိညူဟိ ဒေသိတာ။

ဝိညိဿန္တိ မဟာနာဂါ၊ နာဂံ နာဂေန ဒေသိတံ။

၇၀၄.

‘‘ဝီတရာဂေါ ဝီတဒေါသော၊ ဝီတမောဟော အနာသဝေါ။

သရီရံ ဝိဇဟံ နာဂေါ၊ ပရိနိဗ္ဗိဿတ္ယနာသဝေါ’’တိ။

။ ဥဒါယီ ထေရော။။

သောဠသကနိပါတော နိဋ္ဌိတော။

တတြုဒ္ဒါနံ –

ကောဏ္ဍညော စ ဥဒါယီ စ၊ ထေရာ ဒွေ တေ မဟိဒ္ဓိကာ။

သောဠသမှိ နိပါတမှိ၊ ဂါထာယော ဒွေ စ တိံသ စာတိ။