၁၃. တေရသနိပါတ
၁. သောဏကောဠိဝိသတ္ထေရဂါထာ
၆၃၂.
‘‘ယာဟု ရဋ္ဌေ သမုက္ကဋ္ဌော၊ ရညော အင်္ဂဿ ပဒ္ဓဂူ [ပတ္ထဂူ (သျာ.)၊ ပဋ္ဌဂူ (က.)]။
သွာဇ္ဇ ဓမ္မေသု ဥက္ကဋ္ဌော၊ သောဏော ဒုက္ခဿ ပါရဂူ။
၆၃၃.
‘‘ပဉ္စ ဆိန္ဒေ ပဉ္စ ဇဟေ၊ ပဉ္စ စုတ္တရိ ဘာဝယေ။
ပဉ္စသင်္ဂါတိဂေါ ဘိက္ခု၊ ဩဃတိဏ္ဏောတိ ဝုစ္စတိ။
၆၃၄.
‘‘ဥန္နဠဿ ပမတ္တဿ၊ ဗာဟိရာသဿ [ဗာဟိရာသယဿ (က.)] ဘိက္ခုနော။
သီလံ သမာဓိ ပညာ စ၊ ပါရိပူရိံ န ဂစ္ဆတိ။
၆၃၅.
‘‘ယဉှိ ကိစ္စံ အပဝိဒ္ဓံ [တဒပဝိဒ္ဓံ (သီ. သျာ.)]၊ အကိစ္စံ ပန ကရီယတိ။
ဥန္နဠာနံ ပမတ္တာနံ၊ တေသံ ဝဍ္ဎန္တိ အာသဝါ။
၆၃၆.
‘‘ယေသဉ္စ သုသမာရဒ္ဓါ၊ နိစ္စံ ကာယဂတာ သတိ။
အကိစ္စံ တေ န သေဝန္တိ၊ ကိစ္စေ သာတစ္စကာရိနော။
သတာနံ သမ္ပဇာနာနံ၊ အတ္ထံ ဂစ္ဆန္တိ အာသဝါ။
၆၃၇.
‘‘ဥဇုမဂ္ဂမှိ အက္ခာတေ၊ ဂစ္ဆထ မာ နိဝတ္တထ။
အတ္တနာ စောဒယတ္တာနံ၊ နိဗ္ဗာနမဘိဟာရယေ။
၆၃၈.
‘‘အစ္စာရဒ္ဓမှိ ဝီရိယမှိ၊ သတ္ထာ လောကေ အနုတ္တရော။
ဝီဏောပမံ ကရိတွာ မေ၊ ဓမ္မံ ဒေသေသိ စက္ခုမာ။
တဿာဟံ ဝစနံ သုတွာ၊ ဝိဟာသိံ သာသနေ ရတော။
၆၃၉.
‘‘သမထံ ပဋိပါဒေသိံ၊ ဥတ္တမတ္ထဿ ပတ္တိယာ။
တိဿော ဝိဇ္ဇာ အနုပ္ပတ္တာ၊ ကတံ ဗုဒ္ဓဿ သာသနံ။
၆၄၀.
‘‘နေက္ခမ္မေ [နိက္ခမေ (က.)၊ နေက္ခမ္မံ (မဟာဝ. ၂၄၄; အ. နိ. ၆.၅၅)] အဓိမုတ္တဿ၊ ပဝိဝေကဉ္စ စေတသော။
အဗျာပဇ္ဈာဓိမုတ္တဿ [အဗျာပဇ္ဈာဓိမှတ္တဿ (က.)]၊ ဥပါဒါနက္ခယဿ စ။
၆၄၁.
‘‘တဏှက္ခယာဓိမုတ္တဿ၊ အသမ္မောဟဉ္စ စေတသော။
ဒိသွာ အာယတနုပ္ပါဒံ၊ သမ္မာ စိတ္တံ ဝိမုစ္စတိ။
၆၄၂.
‘‘တဿ သမ္မာ ဝိမုတ္တဿ၊ သန္တစိတ္တဿ ဘိက္ခုနော။
ကတဿ ပဋိစယော နတ္ထိ၊ ကရဏီယံ န ဝိဇ္ဇတိ။
၆၄၃.
‘‘သေလော ယထာ ဧကဃနော [ဧကဃနော (က.)]၊ ဝါတေန န သမီရတိ။
ဧဝံ ရူပါ ရသာ သဒ္ဒါ၊ ဂန္ဓာ ဖဿာ စ ကေဝလာ။
၆၄၄.
‘‘ဣဋ္ဌာ ဓမ္မာ အနိဋ္ဌာ စ၊ နပ္ပဝေဓေန္တိ တာဒိနော။
ဌိတံ စိတ္တံ ဝိသညုတ္တံ၊ ဝယဉ္စဿာနုပဿတီ’’တိ။
။ သောဏော ကောဠိဝိသော ထေရော။။
တေရသနိပါတော နိဋ္ဌိတော။
တတြုဒ္ဒါနံ –
သောဏော ကောဠိဝိသော ထေရော၊ ဧကောယေဝ မဟိဒ္ဓိကော။
တေရသမှိ နိပါတမှိ၊ ဂါထာယော စေတ္ထ တေရသာတိ။