ဆက္ကနိပါတ

၆. ဆက္ကနိပါတ

၁. ဥရုဝေဠကဿပတ္ထေရဂါထာ

၃၇၅.

‘‘ဒိသွာန ပါဋိဟီရာနိ၊ ဂေါတမဿ ယသဿိနော။

န တာဝါဟံ ပဏိပတိံ၊ ဣဿာမာနေန ဝဉ္စိတော။

၃၇၆.

‘‘မမ သင်္ကပ္ပမညာယ၊ စောဒေသိ နရသာရထိ။

တတော မေ အာသိ သံဝေဂေါ၊ အဗ္ဘုတော လောမဟံသနော။

၃၇၇.

‘‘ပုဗ္ဗေ ဇဋိလဘူတဿ၊ ယာ မေ သိဒ္ဓိ ပရိတ္တိကာ။

တာဟံ တဒါ နိရာကတွာ [နိရံကတွာ (သျာ. က.)]၊ ပဗ္ဗဇိံ ဇိနသာသနေ။

၃၇၈.

‘‘ပုဗ္ဗေ ယညေန သန္တုဋ္ဌော၊ ကာမဓါတုပုရက္ခတော။

ပစ္ဆာ ရာဂဉ္စ ဒေါသဉ္စ၊ မောဟဉ္စာပိ သမူဟနိံ။

၃၇၉.

‘‘ပုဗ္ဗေနိဝါသံ ဇာနာမိ၊ ဒိဗ္ဗစက္ခု ဝိသောဓိတံ။

ဣဒ္ဓိမာ ပရစိတ္တညူ၊ ဒိဗ္ဗသောတဉ္စ ပါပုဏိံ။

၃၈၀.

‘‘ယဿ စတ္ထာယ ပဗ္ဗဇိတော၊ အဂါရသ္မာနဂါရိယံ။

သော မေ အတ္ထော အနုပ္ပတ္တော၊ သဗ္ဗသံယောဇနက္ခယော’’တိ။

။ ဥရုဝေဠကဿပေါ ထေရော။။

၂. တေကိစ္ဆကာရိတ္ထေရဂါထာ

၃၈၁.

‘‘အတိဟိတာ ဝီဟိ၊ ခလဂတာ သာလီ။

န စ လဘေ ပိဏ္ဍံ၊ ကထမဟံ ကဿံ။

၃၈၂.

‘‘ဗုဒ္ဓမပ္ပမေယျံ အနုဿရ ပသန္နော။

ဣတိယာ ဖုဋသရီရော ဟောဟိသိ သတတမုဒဂ္ဂေါ။

၃၈၃.

‘‘ဓမ္မမပ္ပမေယျံ အနုဿရ ပသန္နော။

ဣတိယာ ဖုဋသရီရော ဟောဟိသိ သတတမုဒဂ္ဂေါ။

၃၈၄.

‘‘သံဃမပ္ပမေယျံ အနုဿရ ပသန္နော။

ဣတိယာ ဖုဋသရီရော ဟောဟိသိ သတတမုဒဂ္ဂေါ။

၃၈၅.

‘‘အဗ္ဘောကာသေ ဝိဟရသိ၊ သီတာ ဟေမန္တိကာ ဣမာ ရတ္ယော။

မာ သီတေန ပရေတော ဝိဟညိတ္ထော၊ ပဝိသ တွံ ဝိဟာရံ ဖုသိတဂ္ဂဠံ။

၃၈၆.

‘‘ဖုသိဿံ စတဿော အပ္ပမညာယော၊ တာဟိ စ သုခိတော ဝိဟရိဿံ။

နာဟံ သီတေန ဝိဟညိဿံ၊ အနိဉ္ဇိတော ဝိဟရန္တော’’တိ။

။ တေကိစ္ဆကာရီ [တေကိစ္ဆကာနိ (သီ. သျာ. ဣ.)] ထေရော။။

၃. မဟာနာဂတ္ထေရဂါထာ

၃၈၇.

‘‘ယဿ သဗြဟ္မစာရီသု၊ ဂါရဝေါ နူပလဗ္ဘတိ။

ပရိဟာယတိ သဒ္ဓမ္မာ၊ မစ္ဆော အပ္ပောဒကေ ယထာ။

၃၈၈.

‘‘ယဿ သဗြဟ္မစာရီသု၊ ဂါရဝေါ နူပလဗ္ဘတိ။

န ဝိရူဟတိ သဒ္ဓမ္မေ၊ ခေတ္တေ ဗီဇံဝ ပူတိကံ။

၃၈၉.

‘‘ယဿ သဗြဟ္မစာရီသု၊ ဂါရဝေါ နူပလဗ္ဘတိ။

အာရကာ ဟောတိ နိဗ္ဗာနာ [နိဗ္ဗာဏာ (သီ.)]၊ ဓမ္မရာဇဿ သာသနေ။

၃၉၀.

‘‘ယဿ သဗြဟ္မစာရီသု၊ ဂါရဝေါ ဥပလဗ္ဘတိ။

န ဝိဟာယတိ သဒ္ဓမ္မာ၊ မစ္ဆော ဗဝ္ဟောဒကေ [ဗဟ္ဝောဒကေ (သီ.)၊ ဗဟောဒကေ (သျာ.)] ယထာ။

၃၉၁.

‘‘ယဿ သဗြဟ္မစာရီသု၊ ဂါရဝေါ ဥပလဗ္ဘတိ။

သော ဝိရူဟတိ သဒ္ဓမ္မေ၊ ခေတ္တေ ဗီဇံဝ ဘဒ္ဒကံ။

၃၉၂.

‘‘ယဿ သဗြဟ္မစာရီသု၊ ဂါရဝေါ ဥပလဗ္ဘတိ။

သန္တိကေ ဟောတိ နိဗ္ဗာနံ [နိဗ္ဗာဏံ (သီ.)]၊ ဓမ္မရာဇဿ သာသနေ’’တိ။

။ မဟာနာဂေါ ထေရော။။

၄. ကုလ္လတ္ထေရဂါထာ

၃၉၃.

‘‘ကုလ္လော သိဝထိကံ ဂန္တွာ၊ အဒ္ဒသ ဣတ္ထိမုဇ္ဈိတံ။

အပဝိဒ္ဓံ သုသာနသ္မိံ၊ ခဇ္ဇန္တိံ ကိမိဟီ ဖုဋံ။

၃၉၄.

‘‘အာတုရံ အသုစိံ ပူတိံ၊ ပဿ ကုလ္လ သမုဿယံ။

ဥဂ္ဃရန္တံ ပဂ္ဃရန္တံ၊ ဗာလာနံ အဘိနန္ဒိတံ။

၃၉၅.

‘‘ဓမ္မာဒါသံ ဂဟေတွာန၊ ဉာဏဒဿနပတ္တိယာ။

ပစ္စဝေက္ခိံ ဣမံ ကာယံ၊ တုစ္ဆံ သန္တရဗာဟိရံ။

၃၉၆.

‘‘ယထာ ဣဒံ တထာ ဧတံ၊ ယထာ ဧတံ တထာ ဣဒံ။

ယထာ အဓေါ တထာ ဥဒ္ဓံ၊ ယထာ ဥဒ္ဓံ တထာ အဓေါ။

၃၉၇.

‘‘ယထာ ဒိဝါ တထာ ရတ္တိံ၊ ယထာ ရတ္တိံ တထာ ဒိဝါ။

ယထာ ပုရေ တထာ ပစ္ဆာ၊ ယထာ ပစ္ဆာ တထာ ပုရေ။

၃၉၈.

‘‘ပဉ္စင်္ဂိကေန တုရိယေန၊ န ရတီ ဟောတိ တာဒိသီ။

ယထာ ဧကဂ္ဂစိတ္တဿ၊ သမ္မာ ဓမ္မံ ဝိပဿတော’’တိ။

။ ကုလ္လော ထေရော။။

၅. မာလုကျပုတ္တတ္ထေရဂါထာ

၃၉၉.

‘‘မနုဇဿ ပမတ္တစာရိနော၊ တဏှာ ဝဍ္ဎတိ မာလုဝါ ဝိယ။

သော ပ္လဝတီ [ပ္လဝတိ (သီ. ဣ. က.)၊ ပရိပ္လဝတိ (သျာ.)] ဟုရာ ဟုရံ၊ ဖလမိစ္ဆံဝ ဝနသ္မိ ဝါနရော။

၄၀၀.

‘‘ယံ ဧသာ သဟတေ [သဟတိ (ဣ. က.)] ဇမ္မီ၊ တဏှာ လောကေ ဝိသတ္တိကာ။

သောကာ တဿ ပဝဍ္ဎန္တိ၊ အဘိဝဋ္ဌံဝ [အဘိဝုဋ္ဌံဝ (သျာ.)၊ အဘိဝဍ္ဎံဝ (က.)] ဗီရဏံ။

၄၀၁.

‘‘ယော စေတံ သဟတေ [သဟတိ (ဣ. က.)] ဇမ္မိံ၊ တဏှံ လောကေ ဒုရစ္စယံ။

သောကာ တမှာ ပပတန္တိ၊ ဥဒဗိန္ဒူဝ ပေါက္ခရာ။

၄၀၂.

‘‘တံ ဝေါ ဝဒါမိ ဘဒ္ဒံ ဝေါ၊ ယာဝန္တေတ္ထ သမာဂတာ။

တဏှာယ မူလံ ခဏထ၊ ဥသီရတ္ထောဝ ဗီရဏံ။

မာ ဝေါ နဠံဝ သောတောဝ၊ မာရော ဘဉ္ဇိ ပုနပ္ပုနံ။

၄၀၃.

‘‘ကရောထ ဗုဒ္ဓဝစနံ၊ ခဏော ဝေါ မာ ဥပစ္စဂါ။

ခဏာတီတာ ဟိ သောစန္တိ၊ နိရယမှိ သမပ္ပိတာ။

၄၀၄.

‘‘ပမာဒေါ ရဇော ပမာဒေါ [သဗ္ဗဒါ (သီ. က.)၊ သုတ္တနိပါတဋ္ဌကထာယံ ဥဋ္ဌာနသုတ္တဝဏ္ဏနာ ဩလောကေတဗ္ဗာ]၊ ပမာဒါနုပတိတော ရဇော။

အပ္ပမာဒေန ဝိဇ္ဇာယ၊ အဗ္ဗဟေ သလ္လမတ္တနော’’တိ။

။ မာလုကျပုတ္တော [မာလုင္က္ယပုတ္တော (သီ. သျာ. ဣ.)] ထေရော။။

၆. သပ္ပဒါသတ္ထေရဂါထာ

၄၀၅.

‘‘ပဏ္ဏဝီသတိဝဿာနိ ၊ ယတော ပဗ္ဗဇိတော အဟံ။

အစ္ဆရာသံဃာတမတ္တမ္ပိ၊ စေတောသန္တိမနဇ္ဈဂံ။

၄၀၆.

‘‘အလဒ္ဓါ စိတ္တဿေကဂ္ဂံ၊ ကာမရာဂေန အဋ္ဋိတော [အဒ္ဒိတော (သျာ. သီ. အဋ္ဌ.)၊ အဍ္ဍိတော (က.)]။

ဗာဟာ ပဂ္ဂယှ ကန္ဒန္တော၊ ဝိဟာရာ ဥပနိက္ခမိံ [နူပနိက္ခမိံ (သဗ္ဗတ္ထ)၊ ဒုပနိက္ခမိံ (?)]။

၄၀၇.

‘‘သတ္ထံ ဝါ အာဟရိဿာမိ၊ ကော အတ္ထော ဇီဝိတေန မေ။

ကထံ ဟိ သိက္ခံ ပစ္စက္ခံ၊ ကာလံ ကုဗ္ဗေထ မာဒိသော။

၄၀၈.

‘‘တဒါဟံ ခုရမာဒါယ၊ မဉ္စကမှိ ဥပါဝိသိံ။

ပရိနီတော ခုရော အာသိ၊ ဓမနိံ ဆေတ္တုမတ္တနော။

၄၀၉.

‘‘တတော မေ မနသီကာရော၊ ယောနိသော ဥဒပဇ္ဇထ။

အာဒီနဝေါ ပါတုရဟု၊ နိဗ္ဗိဒါ သမတိဋ္ဌထ။

၄၁၀.

‘‘တတော စိတ္တံ ဝိမုစ္စိ မေ၊ ပဿ ဓမ္မသုဓမ္မတံ။

တိဿော ဝိဇ္ဇာ အနုပ္ပတ္တာ၊ ကတံ ဗုဒ္ဓဿ သာသန’’န္တိ။

။ သပ္ပဒါသော ထေရော။။

၇.ကာတိယာနတ္ထေရဂါထာ

၄၁၁.

‘‘ဥဋ္ဌေဟိ နိသီဒ ကာတိယာန၊ မာ နိဒ္ဒါဗဟုလော အဟု ဇာဂရဿု။

မာ တံ အလသံ ပမတ္တဗန္ဓု၊ ကူဋေနေဝ ဇိနာတု မစ္စုရာဇာ။

၄၁၂.

‘‘သေယျထာပိ [သယထာပိ (သီ. ဣ.)] မဟာသမုဒ္ဒဝေဂေါ၊ ဧဝံ ဇာတိဇရာတိဝတ္တတေ တံ။

သော ကရောဟိ သုဒီပမတ္တနော တွံ၊ န ဟိ တာဏံ တဝ ဝိဇ္ဇတေဝ အညံ။

၄၁၃.

‘‘သတ္ထာ ဟိ ဝိဇေသိ မဂ္ဂမေတံ၊ သင်္ဂါ ဇာတိဇရာဘယာ အတီတံ။

ပုဗ္ဗာပရရတ္တမပ္ပမတ္တော၊ အနုယုဉ္ဇဿု ဒဠှံ ကရောဟိ ယောဂံ။

၄၁၄.

‘‘ပုရိမာနိ ပမုဉ္စ ဗန္ဓနာနိ၊ သံဃာဋိခုရမုဏ္ဍဘိက္ခဘောဇီ။

မာ ခိဍ္ဍာရတိဉ္စ မာ နိဒ္ဒံ၊ အနုယုဉ္ဇိတ္ထ ဈာယ ကာတိယာန။

၄၁၅.

‘‘ဈာယာဟိ ဇိနာဟိ ကာတိယာန၊ ယောဂက္ခေမပထေသု ကောဝိဒေါသိ။

ပပ္ပုယျ အနုတ္တရံ ဝိသုဒ္ဓိံ၊ ပရိနိဗ္ဗာဟိသိ ဝါရိနာဝ ဇောတိ။

၄၁၆.

‘‘ပဇ္ဇောတကရော ပရိတ္တရံသော၊ ဝါတေန ဝိနမ္ယတေ လတာဝ။

ဧဝမ္ပိ တုဝံ အနာဒိယာနော၊ မာရံ ဣန္ဒသဂေါတ္တ နိဒ္ဓုနာဟိ။

သော ဝေဒယိတာသု ဝီတရာဂေါ၊ ကာလံ ကင်္ခ ဣဓေဝ သီတိဘူတော’’တိ။

။ ကာတိယာနော ထေရော။။

၈. မိဂဇာလတ္ထေရဂါထာ

၄၁၇.

‘‘သုဒေသိတော စက္ခုမတာ၊ ဗုဒ္ဓေနာဒိစ္စဗန္ဓုနာ။

သဗ္ဗသံယောဇနာတီတော၊ သဗ္ဗဝဋ္ဋဝိနာသနော။

၄၁၈.

‘‘နိယျာနိကော ဥတ္တရဏော၊ တဏှာမူလဝိသောသနော။

ဝိသမူလံ အာဃာတနံ၊ ဆေတွာ ပါပေတိ နိဗ္ဗုတိံ။

၄၁၉.

‘‘အညာဏမူလဘေဒါယ ၊ ကမ္မယန္တဝိဃာဋနော။

ဝိညာဏာနံ ပရိဂ္ဂဟေ၊ ဉာဏဝဇိရနိပါတနော။

၄၂၀.

‘‘ဝေဒနာနံ ဝိညာပနော၊ ဥပါဒါနပ္ပမောစနော။

ဘဝံ အင်္ဂါရကာသုံဝ၊ ဉာဏေန အနုပဿနော [အနုပဿကော (သီ. ဣ.)]။

၄၂၁.

‘‘မဟာရသော သုဂမ္ဘီရော၊ ဇရာမစ္စုနိဝါရဏော။

အရိယော အဋ္ဌင်္ဂိကော မဂ္ဂေါ၊ ဒုက္ခူပသမနော သိဝေါ။

၄၂၂.

‘‘ကမ္မံ ကမ္မန္တိ ဉတွာန၊ ဝိပါကဉ္စ ဝိပါကတော။

ပဋိစ္စုပ္ပန္နဓမ္မာနံ၊ ယထာဝါလောကဒဿနော။

မဟာခေမင်္ဂမော သန္တော၊ ပရိယောသာနဘဒ္ဒကော’’တိ။

။ မိဂဇာလော ထေရော။။

၉. ပုရောဟိတပုတ္တဇေန္တတ္ထေရဂါထာ

၄၂၃.

‘‘ဇာတိမဒေန မတ္တောဟံ၊ ဘောဂဣဿရိယေန စ။

သဏ္ဌာနဝဏ္ဏရူပေန၊ မဒမတ္တော အစာရိဟံ။

၄၂၄.

‘‘နာတ္တနော သမကံ ကဉ္စိ၊ အတိရေကံ စ မညိသံ။

အတိမာနဟတော ဗာလော၊ ပတ္ထဒ္ဓေါ ဥဿိတဒ္ဓဇော။

၄၂၅.

‘‘မာတရံ ပိတရဉ္စာပိ၊ အညေပိ ဂရုသမ္မတေ။

န ကဉ္စိ အဘိဝါဒေသိံ၊ မာနတ္ထဒ္ဓေါ အနာဒရော။

၄၂၆.

‘‘ဒိသွာ ဝိနာယကံ အဂ္ဂံ၊ သာရထီနံ ဝရုတ္တမံ။

တပန္တမိဝ အာဒိစ္စံ၊ ဘိက္ခုသံဃပုရက္ခတံ။

၄၂၇.

‘‘မာနံ မဒဉ္စ ဆဍ္ဍေတွာ၊ ဝိပ္ပသန္နေန စေတသာ။

သိရသာ အဘိဝါဒေသိံ၊ သဗ္ဗသတ္တာနမုတ္တမံ။

၄၂၈.

‘‘အတိမာနော စ ဩမာနော၊ ပဟီနာ သုသမူဟတာ။

အသ္မိမာနော သမုစ္ဆိန္နော၊ သဗ္ဗေ မာနဝိဓါ ဟတာ’’တိ။

။ ဇေန္တော ပုရောဟိတပုတ္တော ထေရော။။

၁၀. သုမနတ္ထေရဂါထာ

၄၂၉.

‘‘ယဒါ နဝေါ ပဗ္ဗဇိတော၊ ဇာတိယာ သတ္တဝဿိကော။

ဣဒ္ဓိယာ အဘိဘောတွာန၊ ပန္နဂိန္ဒံ မဟိဒ္ဓိကံ။

၄၃၀.

‘‘ဥပဇ္ဈာယဿ ဥဒကံ၊ အနောတတ္တာ မဟာသရာ။

အာဟရာမိ တတော ဒိသွာ၊ မံ သတ္ထာ ဧတဒဗြဝိ’’။

၄၃၁.

‘‘သာရိပုတ္တ ဣမံ ပဿ၊ အာဂစ္ဆန္တံ ကုမာရကံ။

ဥဒကကုမ္ဘမာဒါယ၊ အဇ္ဈတ္တံ သုသမာဟိတံ။

၄၃၂.

‘‘ပါသာဒိကေန ဝတ္တေန၊ ကလျာဏဣရိယာပထော။

သာမဏေရောနုရုဒ္ဓဿ၊ ဣဒ္ဓိယာ စ ဝိသာရဒေါ။

၄၃၃.

‘‘အာဇာနီယေန အာဇညော၊ သာဓုနာ သာဓုကာရိတော။

ဝိနီတော အနုရုဒ္ဓေန၊ ကတကိစ္စေန သိက္ခိတော။

၄၃၄.

‘‘သော ပတွာ ပရမံ သန္တိံ၊ သစ္ဆိကတွာ အကုပ္ပတံ။

သာမဏေရော သ သုမနော၊ မာ မံ ဇညာတိ ဣစ္ဆတီ’’တိ။

။ သုမနော ထေရော။။

၁၁. နှာတကမုနိတ္ထေရဂါထာ

၄၃၅.

‘‘ဝါတရောဂါဘိနီတော တွံ၊ ဝိဟရံ ကာနနေ ဝနေ။

ပဝိဒ္ဓဂေါစရေ လူခေ၊ ကထံ ဘိက္ခု ကရိဿသိ’’။

၄၃၆.

‘‘ဣတိသုခေန ဝိပုလေန၊ ဖရိတွာန သမုဿယံ။

လူခမ္ပိ အဘိသမ္ဘောန္တော၊ ဝိဟရိဿာမိ ကာနနေ။

၄၃၇.

‘‘ဘာဝေန္တော သတ္တ ဗောဇ္ဈင်္ဂေ၊ ဣန္ဒ္ရိယာနိ ဗလာနိ စ။

ဈာနသောခုမ္မသမ္ပန္နော [ဈာနသုခုမသမ္ပန္နော (သျာ. က.)]၊ ဝိဟရိဿံ အနာသဝေါ။

၄၃၈.

‘‘ဝိပ္ပမုတ္တံ ကိလေသေဟိ၊ သုဒ္ဓစိတ္တံ အနာဝိလံ။

အဘိဏှံ ပစ္စဝေက္ခန္တော၊ ဝိဟရိဿံ အနာသဝေါ။

၄၃၉.

‘‘အဇ္ဈတ္တဉ္စ ဗဟိဒ္ဓါ စ၊ ယေ မေ ဝိဇ္ဇိံသု အာသဝါ။

သဗ္ဗေ အသေသာ ဥစ္ဆိန္နာ၊ န စ ဥပ္ပဇ္ဇရေ ပုန။

၄၄၀.

‘‘ပဉ္စက္ခန္ဓာ ပရိညာတာ၊ တိဋ္ဌန္တိ ဆိန္နမူလကာ။

ဒုက္ခက္ခယော အနုပ္ပတ္တော၊ နတ္ထိ ဒါနိ ပုနဗ္ဘဝေါ’’တိ။

။ နှာတကမုနိတ္ထေရော။။

၁၂. ဗြဟ္မဒတ္တတ္ထေရဂါထာ

၄၄၁.

‘‘အက္ကောဓဿ ကုတော ကောဓေါ၊ ဒန္တဿ သမဇီဝိနော။

သမ္မဒညာ ဝိမုတ္တဿ၊ ဥပသန္တဿ တာဒိနော။

၄၄၂.

‘‘တဿေဝ တေန ပါပိယော၊ ယော ကုဒ္ဓံ ပဋိကုဇ္ဈတိ။

ကုဒ္ဓံ အပ္ပဋိကုဇ္ဈန္တော၊ သင်္ဂါမံ ဇေတိ ဒုဇ္ဇယံ။

၄၄၃.

[သံ. နိ. ၁.၁၈၈၊ ၂၅၀] ‘‘ဥဘိန္နမတ္ထံ စရတိ၊ အတ္တနော စ ပရဿ စ။

ပရံ သင္ကုပိတံ ဉတွာ၊ ယော သတော ဥပသမ္မတိ။

၄၄၄.

[သံ. နိ. ၁.၁၈၈၊ ၂၅၀] ‘‘ဥဘိန္နံ တိကိစ္ဆန္တံ တံ၊ အတ္တနော စ ပရဿ စ။

ဇနာ မညန္တိ ဗာလောတိ၊ ယေ ဓမ္မဿ အကောဝိဒါ။

၄၄၅.

‘‘ဥပ္ပဇ္ဇေ တေ သစေ ကောဓေါ၊ အာဝဇ္ဇ ကကစူပမံ။

ဥပ္ပဇ္ဇေ စေ ရသေ တဏှာ၊ ပုတ္တမံသူပမံ သရ။

၄၄၆.

‘‘သစေ ဓါဝတိ စိတ္တံ တေ၊ ကာမေသု စ ဘဝေသု စ။

ခိပ္ပံ နိဂ္ဂဏှ သတိယာ၊ ကိဋ္ဌာဒံ ဝိယ ဒုပ္ပသု’’န္တိ။

။ ဗြဟ္မဒတ္တော ထေရော။။

၁၃. သိရိမဏ္ဍတ္ထေရဂါထာ

၄၄၇.

[ဥဒါ. ၄၅; စူဠဝ. ၃၈၅; ပရိ. ၃၃၉] ‘‘ဆန္နမတိဝဿတိ ၊ ဝိဝဋံ နာတိဝဿတိ။

တသ္မာ ဆန္နံ ဝိဝရေထ၊ ဧဝံ တံ နာတိဝဿတိ။

၄၄၈.

[သံ. နိ. ၁.၆၆; နေတ္တိ. ၁၈] ‘‘မစ္စုနာဗ္ဘဟတော လောကော၊ ဇရာယ ပရိဝါရိတော။

တဏှာသလ္လေန ဩတိဏ္ဏော၊ ဣစ္ဆာဓူပါယိတော သဒါ။

၄၄၉.

‘‘မစ္စုနာဗ္ဘဟတော လောကော၊ ပရိက္ခိတ္တော ဇရာယ စ။

ဟညတိ နိစ္စမတ္တာဏော၊ ပတ္တဒဏ္ဍောဝ တက္ကရော။

၄၅၀.

‘‘အာဂစ္ဆန္တဂ္ဂိခန္ဓာဝ၊ မစ္စု ဗျာဓိ ဇရာ တယော။

ပစ္စုဂ္ဂန္တုံ ဗလံ နတ္ထိ၊ ဇဝေါ နတ္ထိ ပလာယိတုံ။

၄၅၁.

‘‘အမောဃံ ဒိဝသံ ကယိရာ၊ အပ္ပေန ဗဟုကေန ဝါ။

ယံ ယံ ဝိဇဟတေ [ဝိရဟတေ (သီ. ဣ.)၊ ဝိဝဟတေ (သျာ.)] ရတ္တိံ၊ တဒူနံ တဿ ဇီဝိတံ။

၄၅၂.

‘‘စရတော တိဋ္ဌတော ဝါပိ၊ အာသီနသယနဿ ဝါ။

ဥပေတိ စရိမာ ရတ္တိ၊ န တေ ကာလော ပမဇ္ဇိတု’’န္တိ။

။ သိရိမဏ္ဍော [သိရိမန္ဒော (သီ.)] ထေရော။။

၁၄. သဗ္ဗကာမိတ္ထေရဂါထာ

၄၅၃.

‘‘ဒွိပါဒကောယံ အသုစိ၊ ဒုဂ္ဂန္ဓော ပရိဟီရတိ [ပရိဟရတိ (က.)]။

နာနာကုဏပပရိပူရော၊ ဝိဿဝန္တော တတော တတော။

၄၅၄.

‘‘မိဂံ နိလီနံ ကူဋေန၊ ဗဠိသေနေဝ အမ္ဗုဇံ။

ဝါနရံ ဝိယ လေပေန၊ ဗာဓယန္တိ ပုထုဇ္ဇနံ။

၄၅၅.

‘‘ရူပါ သဒ္ဒါ ရသာ ဂန္ဓာ၊ ဖောဋ္ဌဗ္ဗာ စ မနောရမာ။

ပဉ္စ ကာမဂုဏာ ဧတေ၊ ဣတ္ထိရူပသ္မိ ဒိဿရေ။

၄၅၆.

‘‘ယေ ဧတာ ဥပသေဝန္တိ၊ ရတ္တစိတ္တာ ပုထုဇ္ဇနာ။

ဝဍ္ဎေန္တိ ကဋသိံ ဃောရံ၊ အာစိနန္တိ ပုနဗ္ဘဝံ။

၄၅၇.

‘‘ယော စေတာ ပရိဝဇ္ဇေတိ၊ သပ္ပဿေဝ ပဒါ သိရော။

သောမံ ဝိသတ္တိကံ လောကေ၊ သတော သမတိဝတ္တတိ။

၄၅၈.

‘‘ကာမေသွာဒီနဝံ ဒိသွာ၊ နေက္ခမ္မံ ဒဋ္ဌု ခေမတော။

နိဿဋော သဗ္ဗကာမေဟိ၊ ပတ္တော မေ အာသဝက္ခယော’’တိ။

။ သဗ္ဗကာမိတ္ထေရော။။

ဆက္ကနိပါတော နိဋ္ဌိတော။

တတြုဒ္ဒါနံ –

ဥရုဝေဠကဿပေါ စ၊ ထေရော တေကိစ္ဆကာရိ စ။

မဟာနာဂေါ စ ကုလ္လော စ၊ မာလုကျော [မာလုတော (သီ. က.)၊ မာလုင္က္ယော (သျာ.)] သပ္ပဒါသကော။

ကာတိယာနော မိဂဇာလော၊ ဇေန္တော သုမနသဝှယော။

နှာတမုနိ ဗြဟ္မဒတ္တော၊ သိရိမဏ္ဍော သဗ္ဗကာမီ စ။

ဂါထာယော စတုရာသီတိ၊ ထေရာ စေတ္ထ စတုဒ္ဒသာတိ။