၂. ပုရိသဝိမာန
၅. မဟာရထဝဂ္ဂ
၁. မဏ္ဍူကဒေဝပုတ္တဝိမာနဝတ္ထု
၈၅၇.
‘‘ကော မေ ဝန္ဒတိ ပါဒါနိ၊ ဣဒ္ဓိယာ ယသသာ ဇလံ။
အဘိက္ကန္တေန ဝဏ္ဏေန၊ သဗ္ဗာ ဩဘာသယံ ဒိသာ’’တိ။
၈၅၈.
‘‘မဏ္ဍူကောဟံ ပုရေ အာသိံ၊ ဥဒကေ ဝါရိဂေါစရော။
တဝ ဓမ္မံ သုဏန္တဿ၊ အဝဓီ ဝစ္ဆပါလကော။
၈၅၉.
‘‘မုဟုတ္တံ စိတ္တပသာဒဿ၊ ဣဒ္ဓိံ ပဿ ယသဉ္စ မေ။
အာနုဘာဝဉ္စ မေ ပဿ၊ ဝဏ္ဏံ ပဿ ဇုတိဉ္စ မေ။
၈၆၀.
‘‘ယေ စ တေ ဒီဃမဒ္ဓါနံ၊ ဓမ္မံ အဿောသုံ ဂေါတမ။
ပတ္တာ တေ အစလဋ္ဌာနံ၊ ယတ္ထ ဂန္တွာ န သောစရေ’’တိ။
မဏ္ဍူကဒေဝပုတ္တဝိမာနံ ပဌမံ။
၂. ရေဝတီဝိမာနဝတ္ထု
၈၆၁.
[ဓ. ပ. ၂၁၉ ဓမ္မပဒေ] ‘‘စိရပ္ပဝါသိံ ပုရိသံ၊ ဒူရတော သောတ္ထိမာဂတံ။
ဉာတိမိတ္တာ သုဟဇ္ဇာ စ၊ အဘိနန္ဒန္တိ အာဂတံ။
၈၆၂.
[ဓ. ပ. ၂၂၀ ဓမ္မပဒေ] ‘‘တထေဝ ကတပုညမ္ပိ၊ အသ္မာ လောကာ ပရံ ဂတံ။
ပုညာနိ ပဋိဂဏှန္တိ၊ ပိယံ ဉာတီဝ အာဂတံ။
၈၆၃.
[ပေ. ဝ. ၇၁၄]‘‘ဥဋ္ဌေဟိ ရေဝတေ သုပါပဓမ္မေ၊ အပါရုတဒွါရေ [အပါရုဘံ ဒွါရံ (သီ. သျာ.)၊ အပါရုတဒွါရံ (ဣ. က.)] အဒါနသီလေ။
နေဿာမ တံ ယတ္ထ ထုနန္တိ ဒုဂ္ဂတာ၊ သမပ္ပိတာ နေရယိကာ ဒုက္ခေနာ’’တိ။
၈၆၄.
ဣစ္စေဝ [ဣစ္စေဝံ (သျာ. က.)] ဝတွာန ယမဿ ဒူတာ၊ တေ ဒွေ ယက္ခာ လောဟိတက္ခာ ဗြဟန္တာ။
ပစ္စေကဗာဟာသု ဂဟေတွာ ရေဝတံ၊ ပက္ကာမယုံ ဒေဝဂဏဿ သန္တိကေ။
၈၆၅.
‘‘အာဒိစ္စဝဏ္ဏံ ရုစိရံ ပဘဿရံ၊ ဗျမ္ဟံ သုဘံ ကဉ္စနဇာလဆန္နံ။
ကဿေတမာကိဏ္ဏဇနံ ဝိမာနံ၊ သူရိယဿ ရံသီရိဝ ဇောတမာနံ။
၈၆၆.
‘‘နာရီဂဏာ စန္ဒနသာရလိတ္တာ [စန္ဒနသာရာနုလိတ္တာ (သျာ.)]၊ ဥဘတော ဝိမာနံ ဥပသောဘယန္တိ။
တံ ဒိဿတိ သူရိယသမာနဝဏ္ဏံ၊ ကော မောဒတိ သဂ္ဂပတ္တော ဝိမာနေ’’တိ။
၈၆၇.
‘‘ဗာရာဏသိယံ နန္ဒိယော နာမာသိ၊ ဥပါသကော အမစ္ဆရီ ဒါနပတိ ဝဒညူ။
တဿေတမာကိဏ္ဏဇနံ ဝိမာနံ၊ သူရိယဿ ရံသီရိဝ ဇောတမာနံ။
၈၆၈.
‘‘နာရီဂဏာ စန္ဒနသာရလိတ္တာ၊ ဥဘတော ဝိမာနံ ဥပသောဘယန္တိ။
တံ ဒိဿတိ သူရိယသမာနဝဏ္ဏံ၊ သော မောဒတိ သဂ္ဂပတ္တော ဝိမာနေ’’တိ။
၈၆၉.
‘‘နန္ဒိယဿာဟံ ဘရိယာ၊ အဂါရိနီ သဗ္ဗကုလဿ ဣဿရာ။
ဘတ္တု ဝိမာနေ ရမိဿာမိ ဒါနဟံ၊ န ပတ္ထယေ နိရယံ ဒဿနာယာ’’တိ။
၈၇၀.
‘‘ဧသော တေ နိရယော သုပါပဓမ္မေ၊ ပုညံ တယာ အကတံ ဇီဝလောကေ။
န ဟိ မစ္ဆရီ ရောသကော ပါပဓမ္မော၊ သဂ္ဂူပဂါနံ လဘတိ သဟဗျတ’’န္တိ။
၈၇၁.
‘‘ကိံ နု ဂူထဉ္စ မုတ္တဉ္စ၊ အသုစီ ပဋိဒိဿတိ။
ဒုဂ္ဂန္ဓံ ကိမိဒံ မီဠှံ၊ ကိမေတံ ဥပဝါယတီ’’တိ။
၈၇၂.
‘‘ဧသ သံသဝကော နာမ၊ ဂမ္ဘီရော သတပေါရိသော။
ယတ္ထ ဝဿသဟဿာနိ၊ တုဝံ ပစ္စသိ ရေဝတေ’’တိ။
၈၇၃.
‘‘ကိံ နု ကာယေန ဝါစာယ၊ မနသာ ဒုက္ကဋံ ကတံ။
ကေန သံသဝကော လဒ္ဓေါ၊ ဂမ္ဘီရော သတပေါရိသော’’တိ။
၈၇၄.
‘‘သမဏေ ဗြာဟ္မဏေ စာပိ၊ အညေ ဝါပိ ဝနိဗ္ဗကေ [ဝဏိဗ္ဗကေ (သျာ. က.)]။
မုသာဝါဒေန ဝဉ္စေသိ၊ တံ ပါပံ ပကတံ တယာ။
၈၇၅.
‘‘တေန သံသဝကော လဒ္ဓေါ၊ ဂမ္ဘီရော သတပေါရိသော။
တတ္ထ ဝဿသဟဿာနိ၊ တုဝံ ပစ္စသိ ရေဝတေ။
၈၇၆.
‘‘ဟတ္ထေပိ ဆိန္ဒန္တိ အထောပိ ပါဒေ၊ ကဏ္ဏေပိ ဆိန္ဒန္တိ အထောပိ နာသံ။
အထောပိ ကာကောဠဂဏာ သမေစ္စ၊ သင်္ဂမ္မ ခါဒန္တိ ဝိဖန္ဒမာန’’န္တိ။
၈၇၇.
‘‘သာဓု ခေါ မံ ပဋိနေထ၊ ကာဟာမိ ကုသလံ ဗဟုံ။
ဒါနေန သမစရိယာယ၊ သံယမေန ဒမေန စ။
ယံ ကတွာ သုခိတာ ဟောန္တိ၊ န စ ပစ္ဆာနုတပ္ပရေ’’တိ။
၈၇၈.
‘‘ပုရေ တုဝံ ပမဇ္ဇိတွာ၊ ဣဒါနိ ပရိဒေဝသိ။
သယံ ကတာနံ ကမ္မာနံ၊ ဝိပါကံ အနုဘောဿသီ’’တိ။
၈၇၉.
‘‘ကော ဒေဝလောကတော မနုဿလောကံ၊ ဂန္တွာန ပုဋ္ဌော မေ ဧဝံ ဝဒေယျ။
‘နိက္ခိတ္တဒဏ္ဍေသု ဒဒါထ ဒါနံ၊ အစ္ဆာဒနံ သေယျ [သယန (သီ.)] မထန္နပါနံ။
နဟိ မစ္ဆရီ ရောသကော ပါပဓမ္မော၊ သဂ္ဂူပဂါနံ လဘတိ သဟဗျတံ’။
၈၈၀.
‘‘သာဟံ နူန ဣတော ဂန္တွာ၊ ယောနိံ လဒ္ဓါန မာနုသိံ။
ဝဒညူ သီလသမ္ပန္နာ၊ ကာဟာမိ ကုသလံ ဗဟုံ။
ဒါနေန သမစရိယာယ၊ သံယမေန ဒမေန စ။
၈၈၁.
‘‘အာရာမာနိ စ ရောပိဿံ၊ ဒုဂ္ဂေ သင်္ကမနာနိ စ။
ပပဉ္စ ဥဒပါနဉ္စ၊ ဝိပ္ပသန္နေန စေတသာ။
၈၈၂.
‘‘စာတုဒ္ဒသိံ ပဉ္စဒသိံ၊ ယာ စ ပက္ခဿ အဋ္ဌမီ။
ပါဋိဟာရိယပက္ခဉ္စ၊ အဋ္ဌင်္ဂသုသမာဂတံ။
၈၈၃.
‘‘ဥပေါသထံ ဥပဝသိဿံ၊ သဒါ သီလေသု သံဝုတာ။
န စ ဒါနေ ပမဇ္ဇိဿံ၊ သာမံ ဒိဋ္ဌမိဒံ မယာ’’တိ။
၈၈၄.
ဣစ္စေဝံ ဝိပ္ပလပန္တိံ၊ ဖန္ဒမာနံ တတော တတော။
ခိပိံသု နိရယေ ဃောရေ၊ ဥဒ္ဓပါဒံ အဝံသိရံ။
၈၈၅.
‘‘အဟံ ပုရေ မစ္ဆရိနီ အဟောသိံ၊ ပရိဘာသိကာ သမဏဗြာဟ္မဏာနံ။
ဝိတထေန စ သာမိကံ ဝဉ္စယိတွာ၊ ပစ္စာမဟံ နိရယေ ဃောရရူပေ’’တိ။
ရေဝတီဝိမာနံ ဒုတိယံ။
၃. ဆတ္တမာဏဝကဝိမာနဝတ္ထု
၈၈၆.
‘‘ယေ ဝဒတံ ပဝရော မနုဇေသု၊ သကျမုနီ ဘဂဝါ ကတကိစ္စော။
ပါရဂတော ဗလဝီရိယသမင္ဂီ [ဗလဝီရသမင္ဂီ (က.)]၊ တံ သုဂတံ သရဏတ္ထမုပေဟိ။
၈၈၇.
‘‘ရာဂဝိရာဂမနေဇမသောကံ၊ ဓမ္မမသင်္ခတမပ္ပဋိကူလံ။
မဓုရမိမံ ပဂုဏံ သုဝိဘတ္တံ၊ ဓမ္မမိမံ သရဏတ္ထမုပေဟိ။
၈၈၈.
‘‘ယတ္ထ စ ဒိန္န မဟပ္ဖလမာဟု၊ စတူသု သုစီသု ပုရိသယုဂေသု။
အဋ္ဌ စ ပုဂ္ဂလဓမ္မဒသာ တေ၊ သံဃမိမံ သရဏတ္ထမုပေဟိ။
၈၈၉.
‘‘န တထာ တပတိ နဘေ သူရိယော၊ စန္ဒော စ န ဘာသတိ န ဖုဿော။
ယထာ အတုလမိဒံ မဟပ္ပဘာသံ၊ ကော နု တွံ တိဒိဝါ မဟိံ ဥပါဂါ။
၈၉၀.
‘‘ဆိန္ဒတိ ရံသီ ပဘင်္ကရဿ၊ သာဓိကဝီသတိယောဇနာနိ အာဘာ။
ရတ္တိမပိ ယထာ ဒိဝံ ကရောတိ၊ ပရိသုဒ္ဓံ ဝိမလံ သုဘံ ဝိမာနံ။
၈၉၁.
‘‘ဗဟုပဒုမဝိစိတြပုဏ္ဍရီကံ၊ ဝေါကိဏ္ဏံ ကုသုမေဟိ နေကစိတ္တံ။
အရဇဝိရဇဟေမဇာလဆန္နံ၊ အာကာသေ တပတိ ယထာပိ သူရိယော။
၈၉၂.
‘‘ရတ္တမ္ဗရဣတဝသသာဟိ၊ အဂရုပိယင်္ဂုစန္ဒနုဿဒါဟိ။
ကဉ္စနတနုသန္နိဘတ္တစာဟိ၊ ပရိပူရံ ဂဂနံဝ တာရကာဟိ။
၈၉၃.
‘‘နရနာရိယော [နရနာရီ (က.)၊ နာရိယော (?)] ဗဟုကေတ္ထနေကဝဏ္ဏာ၊ ကုသုမဝိဘူသိတာဘရဏေတ္ထ သုမနာ။
အနိလပမုဉ္စိတာ ပဝန္တိ [ပဝါယန္တိ (က.)] သုရဘိံ၊ တပနိယဝိတတာ သုဝဏ္ဏဆန္နာ [သုဝဏ္ဏစ္ဆာဒနာ (သီ.)]။
၈၉၄.
‘‘ကိဿ သံယမဿ [သမဒမဿ (သီ.)] အယံ ဝိပါကော၊ ကေနာသိ ကမ္မဖလေနိဓူပပန္နော။
ယထာ စ တေ အဓိဂတမိဒံ ဝိမာနံ၊ တဒနုပဒံ အဝစာသိ ဣင်္ဃ ပုဋ္ဌော’’တိ။
၈၉၅.
‘‘သယမိဓ [ယမိဓ (သီ. သျာ. ဣ.)] ပထေ သမေစ္စ မာဏဝေန၊ သတ္ထာနုသာသိ အနုကမ္ပမာနော။
တဝ ရတနဝရဿ ဓမ္မံ သုတွာ၊ ကရိဿာမီတိ စ ဗြဝိတ္ထ ဆတ္တော။
၈၉၆.
‘‘ဇိနဝရပဝရံ [ဇိနပဝရံ (သျာ. က.)] ဥပေဟိ [ဥပေမိ (ဗဟူသု)] သရဏံ၊ ဓမ္မဉ္စာပိ တထေဝ ဘိက္ခုသသံဃံ။
နောတိ ပဌမံ အဝေါစဟံ [အဝေါစာဟံ (သီ. သျာ. က.)] ဘန္တေ၊ ပစ္ဆာ တေ ဝစနံ တထေဝကာသိံ။
၈၉၇.
‘‘မာ စ ပါဏဝဓံ ဝိဝိဓံ စရဿု အသုစိံ၊
န ဟိ ပါဏေသု အသညတံ အဝဏ္ဏယိံသု သပ္ပညာ။
နောတိ ပဌမံ အဝေါစဟံ ဘန္တေ၊
ပစ္ဆာ တေ ဝစနံ တထေဝကာသိံ။
၈၉၈.
‘‘မာ စ ပရဇနဿ ရက္ခိတမ္ပိ၊ အာဒါတဗ္ဗမမညိထော [မမညိတ္ထ (သီ. ဣ.)] အဒိန္နံ။
နောတိ ပဌမံ အဝေါစဟံ ဘန္တေ၊ ပစ္ဆာ ဝစနံ တထေဝကာသိံ။
၈၉၉.
‘‘မာ စ ပရဇနဿ ရက္ခိတာယော၊ ပရဘရိယာ အဂမာ အနရိယမေတံ။
နောတိ ပဌမံ အဝေါစဟံ ဘန္တေ၊ ပစ္ဆာ တေ ဝစနံ တထေဝကာသိံ။
၉၀၀.
‘‘မာ စ ဝိတထံ အညထာ အဘာဏိ၊
န ဟိ မုသာဝါဒံ အဝဏ္ဏယိံသု သပ္ပညာ။
နောတိ ပဌမံ အဝေါစဟံ ဘန္တေ၊ ပစ္ဆာ တေ ဝစနံ တထေဝကာသိံ။
၉၀၁.
‘‘ယေန စ ပုရိသဿ အပေတိ သညာ၊ တံ မဇ္ဇံ ပရိဝဇ္ဇယဿု သဗ္ဗံ။
နောတိ ပဌမံ အဝေါစဟံ ဘန္တေ၊ ပစ္ဆာ တေ ဝစနံ တထေဝကာသိံ။
၉၀၂.
‘‘သွာဟံ ဣဓ ပဉ္စ သိက္ခာ ကရိတွာ၊ ပဋိပဇ္ဇိတွာ တထာဂတဿ ဓမ္မေ။
ဒွေပထမဂမာသိံ စောရမဇ္ဈေ၊ တေ မံ တတ္ထ ဝဓိံသု ဘောဂဟေတု။
၉၀၃.
‘‘ဧတ္တကမိဒံ အနုဿရာမိ ကုသလံ၊ တတော ပရံ န မေ ဝိဇ္ဇတိ အညံ။
တေန သုစရိတေန ကမ္မုနာဟံ [ကမ္မနာဟံ (သီ.)]၊ ဥပ္ပန္နော [ဥပပန္နော (ဗဟူသု)] တိဒိဝေသု ကာမကာမီ။
၉၀၄.
‘‘ပဿ ခဏမုဟုတ္တသညမဿ၊ အနုဓမ္မပ္ပဋိပတ္တိယာ ဝိပါကံ။
ဇလမိဝ ယသသာ သမေက္ခမာနာ၊ ဗဟုကာ မံ ပိဟယန္တိ ဟီနကမ္မာ။
၉၀၅.
‘‘ပဿ ကတိပယာယ ဒေသနာယ၊ သုဂတိဉ္စမှိ ဂတော သုခဉ္စ ပတ္တော။
ယေ စ တေ သတတံ သုဏန္တိ ဓမ္မံ၊ မညေ တေ အမတံ ဖုသန္တိ ခေမံ။
၉၀၆.
‘‘အပ္ပမ္ပိ ကတံ မဟာဝိပါကံ၊ ဝိပုလံ ဟောတိ [ဝိပုလဖလံ (က.)] တထာဂတဿ ဓမ္မေ။
ပဿ ကတပုညတာယ ဆတ္တော၊ ဩဘာသေတိ ပထဝိံ ယထာပိ သူရိယော။
၉၀၇.
‘‘ကိမိဒံ ကုသလံ ကိမာစရေမ၊ ဣစ္စေကေ ဟိ သမေစ္စ မန္တယန္တိ။
တေ မယံ ပုနရေဝ [ပုနပိ (?)] လဒ္ဓ မာနုသတ္တံ၊ ပဋိပန္နာ ဝိဟရေမု သီလဝန္တော။
၉၀၈.
‘‘ဗဟုကာရော အနုကမ္ပကော စ သတ္ထာ၊ ဣတိ မေ သတိ အဂမာ ဒိဝါ ဒိဝဿ။
သွာဟံ ဥပဂတောမှိ သစ္စနာမံ၊ အနုကမ္ပဿု ပုနပိ သုဏေမု [သုဏောမ (သီ.)၊ သုဏောမိ (သျာ.)] ဓမ္မံ။
၉၀၉.
‘‘ယေ စိဓ [ယေဓ (သီ. သျာ. ဣ.)၊ ယေ ဣဓ (က.)] ပဇဟန္တိ ကာမရာဂံ၊ ဘဝရာဂါနုသယဉ္စ ပဟာယ မောဟံ။
န စ တေ ပုနမုပေန္တိ ဂဗ္ဘသေယျံ၊ ပရိနိဗ္ဗာနဂတာ ဟိ သီတိဘူတာ’’တိ။
ဆတ္တမာဏဝကဝိမာနံ တတိယံ။
၄. ကက္ကဋကရသဒါယကဝိမာနဝတ္ထု
၉၁၀.
‘‘ဥစ္စမိဒံ မဏိထူဏံ ဝိမာနံ၊ သမန္တတော ဒွါဒသ ယောဇနာနိ။
ကူဋာဂါရာ သတ္တသတာ ဥဠာရာ၊ ဝေဠုရိယထမ္ဘာ ရုစကတ္ထတာ [ရုစိရတ္ထတာ (သျာ. က.) ၆၄၆ ဂါထာယံ ‘‘ရုစကုပကိဏ္ဏံ’’တိ ပဒဿ သံဝဏ္ဏနာ ပဿိတဗ္ဗာ] သုဘာ။
၉၁၁.
‘‘တတ္ထစ္ဆသိ ပိဝသိ ခါဒသိ စ၊ ဒိဗ္ဗာ စ ဝီဏာ ပဝဒန္တိ ဝဂ္ဂုံ [ဝဂ္ဂု (သီ. က.)၊ ဝဂ္ဂူ (သျာ.)]။
ဒိဗ္ဗာ ရသာ ကာမဂုဏေတ္ထ ပဉ္စ၊ နာရိယော စ နစ္စန္တိ သုဝဏ္ဏဆန္နာ။
၉၁၂.
‘‘ကေန တေတာဒိသော ဝဏ္ဏော၊ ကေန တေ ဣဓ မိဇ္ဈတိ။
ဥပ္ပဇ္ဇန္တိ စ တေ ဘောဂါ၊ ယေ ကေစိ မနသော ပိယာ။
၉၁၃.
‘‘ပုစ္ဆာမိ တံ ဒေဝ မဟာနုဘာဝ၊ မနုဿဘူတော ကိမကာသိ ပုညံ။
ကေနာသိ ဧဝံ ဇလိတာနုဘာဝေါ၊ ဝဏ္ဏော စ တေ သဗ္ဗဒိသာ ပဘာသတီ’’တိ။
၉၁၄.
သော ဒေဝပုတ္တော အတ္တမနော၊ မောဂ္ဂလ္လာနေန ပုစ္ဆိတော။
ပဉ္ဟံ ပုဋ္ဌော ဝိယာကာသိ၊ ယဿ ကမ္မဿိဒံ ဖလံ။
၉၁၅.
‘‘သတိသမုပ္ပါဒကရော ၊ ဒွါရေ ကက္ကဋကော ဌိတော။
နိဋ္ဌိတော ဇာတရူပဿ၊ သောဘတိ ဒသပါဒကော။
၉၁၆.
‘‘တေန မေတာဒိသော ဝဏ္ဏော၊ တေန မေ ဣဓ မိဇ္ဈတိ။
ဥပ္ပဇ္ဇန္တိ စ မေ ဘောဂါ၊ ယေ ကေစိ မနသော ပိယာ။
၉၁၇.
‘‘အက္ခာမိ တေ ဘိက္ခု မဟာနုဘာဝ၊ မနုဿဘူတော ယမကာသိ ပုညံ။
တေနမှိ ဧဝံ ဇလိတာနုဘာဝေါ၊ ဝဏ္ဏော စ မေ သဗ္ဗဒိသာ ပဘာသတီ’’တိ။
ကက္ကဋကရသဒါယကဝိမာနံ စတုတ္ထံ။
(အနန္တရံ ပဉ္စဝိမာနံ ယထာ ကက္ကဋကရသဒါယကဝိမာနံ တထာ ဝိတ္ထာရေတဗ္ဗံ)
၅. ဒွါရပါလဝိမာနဝတ္ထု
၉၁၈.
‘‘ဥစ္စမိဒံ မဏိထူဏံ ဝိမာနံ၊ သမန္တတော ဒွါဒသ ယောဇနာနိ။
ကူဋာဂါရာ သတ္တသတာ ဥဠာရာ၊ ဝေဠုရိယထမ္ဘာ ရုစကတ္ထတာ သုဘာ။
၉၁၉.
‘‘တတ္ထစ္ဆသိ ပိဝသိ ခါဒသိ စ၊ ဒိဗ္ဗာ စ ဝီဏာ ပဝဒန္တိ ဝဂ္ဂုံ။
ဒိဗ္ဗာ ရသာ ကာမဂုဏေတ္ထ ပဉ္စ၊ နာရိယော စ နစ္စန္တိ သုဝဏ္ဏဆန္နာ။
၉၂၀.
‘‘ကေန တေတာဒိသော ဝဏ္ဏော။ပေ.။ ဝဏ္ဏော စ တေ သဗ္ဗဒိသာ ပဘာသတီ’’တိ။
၉၂၂.
သော ဒေဝပုတ္တော အတ္တမနော၊ မောဂ္ဂလ္လာနေန ပုစ္ဆိတော။
ပဉ္ဟံ ပုဋ္ဌော ဝိယာကာသိ၊ ယဿ ကမ္မဿိဒံ ဖလံ။
၉၂၃.
‘‘ဒိဗ္ဗံ မမံ ဝဿသဟဿမာယု၊ ဝါစာဘိဂီတံ မနသာ ပဝတ္တိတံ။
ဧတ္တာဝတာ ဌဿတိ ပုညကမ္မော၊ ဒိဗ္ဗေဟိ ကာမေဟိ သမင်္ဂိဘူတော။
၉၂၄.
‘‘တေန မေတာဒိသော ဝဏ္ဏော။ပေ.။ဝဏ္ဏော စ မေ သဗ္ဗဒိသာ ပဘာသတီ’’တိ။
ဒွါရပါလဝိမာနံ ပဉ္စမံ။
၆. ပဌမကရဏီယဝိမာနဝတ္ထု
၉၂၆.
‘‘ဥစ္စမိဒံ မဏိထူဏံ ဝိမာနံ၊ သမန္တတော ဒွါဒသ ယောဇနာနိ။
ကူဋာဂါရာ သတ္တသတာ ဥဠာရာ၊ ဝေဠုရိယထမ္ဘာ ရုစကတ္ထတာ သုဘာ။
၉၂၇.
‘‘တတ္ထစ္ဆသိ ပိဝသိ ခါဒသိ စ၊ ဒိဗ္ဗာ စ ဝီဏာ ပဝဒန္တိ ဝဂ္ဂုံ။
ဒိဗ္ဗာ ရသာ ကာမဂုဏေတ္ထ ပဉ္စ၊ နာရိယော စ နစ္စန္တိ သုဝဏ္ဏဆန္နာ။
၉၂၈.
‘‘ကေန တေတာဒိသော ဝဏ္ဏော။ပေ.။
ဝဏ္ဏော စ တေ သဗ္ဗဒိသာ ပဘာသတီ’’တိ။
၉၃၀.
သော ဒေဝပုတ္တော အတ္တမနော။ပေ.။ယဿ ကမ္မဿိဒံ ဖလံ။
၉၃၁.
‘‘ကရဏီယာနိ ပုညာနိ၊ ပဏ္ဍိတေန ဝိဇာနတာ။
သမ္မဂ္ဂတေသု ဗုဒ္ဓေသု၊ ယတ္ထ ဒိန္နံ မဟပ္ဖလံ။
၉၃၂.
‘‘အတ္ထာယ ဝတ မေ ဗုဒ္ဓေါ၊ အရညာ ဂါမမာဂတော။
တတ္ထ စိတ္တံ ပသာဒေတွာ၊ တာဝတိံသူပဂေါ အဟံ [အဟုံ (သီ.)]။
၉၃၃.
‘‘တေန မေတာဒိသော ဝဏ္ဏော။ပေ.။ဝဏ္ဏော စ မေ သဗ္ဗဒိသာ ပဘာသတီ’’တိ။
ပဌမကရဏီယဝိမာနံ ဆဋ္ဌံ။
၇. ဒုတိယကရဏီယဝိမာနဝတ္ထု
၉၃၅.
‘‘ဥစ္စမိဒံ မဏိထူဏံ ဝိမာနံ၊ သမန္တတော ဒွါဒသ ယောဇနာနိ။
ကူဋာဂါရာ သတ္တသတာ ဥဠာရာ၊ ဝေဠုရိယထမ္ဘာ ရုစကတ္ထတာ သုဘာ။
၉၃၆.
‘‘တတ္ထစ္ဆသိ ပိဝသိ ခါဒသိ စ၊ ဒိဗ္ဗာ စ ဝီဏာ ပဝဒန္တိ ဝဂ္ဂုံ။
ဒိဗ္ဗာ ရသာ ကာမဂုဏေတ္ထ ပဉ္စ၊ နာရိယော စ နစ္စန္တိ သုဝဏ္ဏဆန္နာ။
၉၃၇.
‘‘ကေန တေတာဒိသော ဝဏ္ဏော။ပေ.။ ဝဏ္ဏော စ တေ သဗ္ဗဒိသာ ပဘာသတီ’’တိ။
၉၃၉.
သော ဒေဝပုတ္တော အတ္တမနော။ပေ.။ ယဿ ကမ္မဿိဒံ ဖလံ။
၉၄၀.
‘‘ကရဏီယာနိ ပုညာနိ၊ ပဏ္ဍိတေန ဝိဇာနတာ။
သမ္မဂ္ဂတေသု ဘိက္ခူသု၊ ယတ္ထ ဒိန္နံ မဟပ္ဖလံ။
၉၄၁.
‘‘အတ္ထာယ ဝတ မေ ဘိက္ခု၊ အရညာ ဂါမမာဂတော။
တတ္ထ စိတ္တံ ပသာဒေတွာ၊ တာဝတိံသူပဂေါ အဟံ။
၉၄၂.
‘‘တေန မေတာဒိသော ဝဏ္ဏော။ပေ.။
ဝဏ္ဏော စ မေ သဗ္ဗဒိသာ ပဘာသတီ’’တိ။
ဒုတိယကရဏီယဝိမာနံ သတ္တမံ။
၈. ပဌမသူစိဝိမာနဝတ္ထု
၉၄၄.
‘‘ဥစ္စမိဒံ မဏိထူဏံ ဝိမာနံ၊ သမန္တတော ဒွါဒသ ယောဇနာနိ။
ကူဋာဂါရာ သတ္တသတာ ဥဠာရာ၊ ဝေဠုရိယထမ္ဘာ ရုစကတ္ထတာ သုဘာ။
၉၄၅.
‘‘တတ္ထစ္ဆသိ ပိဝသိ ခါဒသိ စ၊ ဒိဗ္ဗာ စ ဝီဏာ ပဝဒန္တိ ဝဂ္ဂုံ။
ဒိဗ္ဗာ ရသာ ကာမဂုဏေတ္ထ ပဉ္စ၊ နာရိယော စ နစ္စန္တိ သုဝဏ္ဏဆန္နာ။
၉၄၆.
‘‘ကေန တေတာဒိသော ဝဏ္ဏော။ပေ.။ ဝဏ္ဏော စ တေ သဗ္ဗဒိသာ ပဘာသတီ’’တိ။
၉၄၈.
သော ဒေဝပုတ္တော အတ္တမနော။ပေ.။ ယဿ ကမ္မဿိဒံ ဖလံ။
၉၄၉.
‘‘ယံ ဒဒါတိ န တံ ဟောတိ၊
ယဉ္စေဝ ဒဇ္ဇာ တဉ္စေဝ သေယျော။
သူစိ ဒိန္နာ သူစိမေဝ သေယျော။
၉၅၀.
‘‘တေန မေတာဒိသော ဝဏ္ဏော။ပေ.။ ဝဏ္ဏော စ မေ သဗ္ဗဒိသာ ပဘာသတီ’’တိ။
ပဌမသူစိဝိမာနံ အဋ္ဌမံ။
၉. ဒုတိယသူစိဝိမာနဝတ္ထု
၉၅၂.
‘‘ဥစ္စမိဒံ မဏိထူဏံ ဝိမာနံ၊ သမန္တတော ဒွါဒသ ယောဇနာနိ။
ကူဋာဂါရာ သတ္တသတာ ဥဠာရာ၊ ဝေဠုရိယထမ္ဘာ ရုစကတ္ထတာ သုဘာ။
၉၅၃.
‘‘တတ္ထစ္ဆသိ ပိဝသိ ခါဒသိ စ၊ ဒိဗ္ဗာ စ ဝီဏာ ပဝဒန္တိ ဝဂ္ဂုံ။
ဒိဗ္ဗာ ရသာ ကာမဂုဏေတ္ထ ပဉ္စ၊ နာရိယော စ နစ္စန္တိ သုဝဏ္ဏဆန္နာ။
၉၅၄.
‘‘ကေန တေတာဒိသော ဝဏ္ဏော။ပေ.။ ဝဏ္ဏော စ တေ သဗ္ဗဒိသာ ပဘာသတီ’’တိ။
၉၅၆.
သော ဒေဝပုတ္တော အတ္တမနော။ပေ.။ ယဿ ကမ္မဿိဒံ ဖလံ။
၉၅၇.
‘‘အဟံ မနုဿေသု မနုဿဘူတော၊ပုရိမဇာတိယာ မနုဿလောကေ။
၉၅၈.
‘‘အဒ္ဒသံ ဝိရဇံ ဘိက္ခုံ၊ ဝိပ္ပသန္နမနာဝိလံ။
တဿ အဒါသဟံ သူစိံ၊ ပသန္နော သေဟိ ပါဏိဘိ။
၉၅၉.
‘‘တေန မေတာဒိသော ဝဏ္ဏော။ပေ.။ဝဏ္ဏော စ မေ သဗ္ဗဒိသာ ပဘာသတီ’’တိ။
ဒုတိယသူစိဝိမာနံ နဝမံ။
၁၀. ပဌမနာဂဝိမာနဝတ္ထု
၉၆၁.
‘‘သုသုက္ကခန္ဓံ အဘိရုယှ နာဂံ၊ အကာစိနံ ဒန္တိံ ဗလိံ မဟာဇဝံ။
အဘိရုယှ ဂဇဝရံ [ဂဇံ ဝရံ (သျာ.)] သုကပ္ပိတံ၊ ဣဓါဂမာ ဝေဟာယသံ အန္တလိက္ခေ။
၉၆၂.
‘‘နာဂဿ ဒန္တေသု ဒုဝေသု နိမ္မိတာ၊ အစ္ဆောဒကာ ပဒုမိနိယော သုဖုလ္လာ။
ပဒုမေသု စ တုရိယဂဏာ ပဝဇ္ဇရေ၊ ဣမာ စ နစ္စန္တိ မနောဟရာယော။
၉၆၃.
‘‘ဒေဝိဒ္ဓိပတ္တောသိ မဟာနုဘာဝေါ၊ မနုဿဘူတော ကိမကာသိ ပုညံ။
ကေနာသိ ဧဝံ ဇလိတာနုဘာဝေါ၊ ဝဏ္ဏော စ တေ သဗ္ဗဒိသာ ပဘာသတီ’’တိ။
၉၆၄.
သော ဒေဝပုတ္တော အတ္တမနော၊ မောဂ္ဂလ္လာနေန ပုစ္ဆိတော။
ပဉ္ဟံ ပုဋ္ဌော ဝိယာကာသိ၊ ယဿ ကမ္မဿိဒံ ဖလံ။
၉၆၅.
‘‘အဋ္ဌေဝ မုတ္တပုပ္ဖာနိ၊ ကဿပဿ မဟေသိနော [ဘဂဝတော (သျာ. က.)]။
ထူပသ္မိံ အဘိရောပေသိံ၊ ပသန္နော သေဟိ ပါဏိဘိ။
၉၆၆.
‘‘တေန မေတာဒိသော ဝဏ္ဏော။ပေ.။ဝဏ္ဏော စ မေ သဗ္ဗဒိသာ ပဘာသတီ’’တိ။
ပဌမနာဂဝိမာနံ ဒသမံ။
၁၁. ဒုတိယနာဂဝိမာနဝတ္ထု
၉၆၈.
‘‘မဟန္တံ နာဂံ အဘိရုယှ၊ သဗ္ဗသေတံ ဂဇုတ္တမံ။
ဝနာ ဝနံ အနုပရိယာသိ၊ နာရီဂဏပုရက္ခတော။
ဩဘာသေန္တော ဒိသာ သဗ္ဗာ၊ ဩသဓီ ဝိယ တာရကာ။
၉၆၉.
‘‘ကေန တေတာဒိသော ဝဏ္ဏော။ပေ.။ဝဏ္ဏော စ တေ သဗ္ဗဒိသာ ပဘာသတီ’’တိ။
၉၇၁.
သော ဒေဝပုတ္တော အတ္တမနော၊ ဝင္ဂီသေနေဝ ပုစ္ဆိတော။
ပဉ္ဟံ ပုဋ္ဌော ဝိယာကာသိ၊ ယဿ ကမ္မဿိဒံ ဖလံ။
၉၇၂.
‘‘အဟံ မနုဿေသု မနုဿဘူတော၊ ဥပါသကော စက္ခုမတော အဟောသိံ။
ပါဏာတိပါတာ ဝိရတော အဟောသိံ၊ လောကေ အဒိန္နံ ပရိဝဇ္ဇယိဿံ။
၉၇၃.
‘‘အမဇ္ဇပေါ နော စ မုသာ အဘာဏိံ [အဘာသိံ (သီ. က.)]၊ သကေန ဒါရေန စ တုဋ္ဌော အဟောသိံ။
အန္နဉ္စ ပါနဉ္စ ပသန္နစိတ္တော၊ သက္ကစ္စ ဒါနံ ဝိပုလံ အဒါသိံ။
၉၇၄.
‘‘တေန မေတာဒိသော ဝဏ္ဏော။ပေ.။ဝဏ္ဏော စ မေ သဗ္ဗဒိသာ ပဘာသတီ’’တိ။
ဒုတိယနာဂဝိမာနံ ဧကာဒသမံ။
၁၂. တတိယနာဂဝိမာနဝတ္ထု
၉၇၆.
‘‘ကော နု ဒိဗ္ဗေန ယာနေန၊ သဗ္ဗသေတေန ဟတ္ထိနာ။
တုရိယတာဠိတနိဂ္ဃောသော၊ အန္တလိက္ခေ မဟီယတိ။
၉၇၇.
‘‘ဒေဝတာ နုသိ ဂန္ဓဗ္ဗော၊ အဒု [အာဒု (သီ. သျာ.)] သက္ကော ပုရိန္ဒဒေါ။
အဇာနန္တာ တံ ပုစ္ဆာမ၊ ကထံ ဇာနေမု တံ မယ’’န္တိ။
၉၇၈.
‘‘နမှိ ဒေဝေါ န ဂန္ဓဗ္ဗော၊ နာပိ [နာမှိ (က.)] သက္ကော ပုရိန္ဒဒေါ။
သုဓမ္မာ နာမ ယေ ဒေဝါ၊ တေသံ အညတရော အဟ’’န္တိ။
၉၇၉.
‘‘ပုစ္ဆာမ ဒေဝံ သုဓမ္မံ [ဒေဝ သုဓမ္မ (သျာ.)၊ ဒေဝ သုဓမ္မံ (က.)]၊ ပုထုံ ကတွာန အဉ္ဇလိံ။
ကိံ ကတွာ မာနုသေ ကမ္မံ၊ သုဓမ္မံ ဥပပဇ္ဇတီ’’တိ။
၉၈၀.
‘‘ဥစ္ဆာဂါရံ တိဏာဂါရံ၊ ဝတ္ထာဂါရဉ္စ ယော ဒဒေ။
တိဏ္ဏံ အညတရံ ဒတွာ၊ သုဓမ္မံ ဥပပဇ္ဇတီ’’တိ။
တတိယနာဂဝိမာနံ ဒွါဒသမံ။
၁၃. စူဠရထဝိမာနဝတ္ထု
၉၈၁.
‘‘ဒဠှဓမ္မာ နိသာရဿ၊ ဓနုံ ဩလုဗ္ဘ တိဋ္ဌသိ။
ခတ္တိယော နုသိ ရာဇညော၊ အဒု လုဒ္ဒေါ ဝနေစရော’’တိ [ဝနာစရောတိ (သျာ. က.)]။
၉၈၂.
‘‘အဿကာဓိပတိဿာဟံ ၊ ဘန္တေ ပုတ္တော ဝနေစရော။
နာမံ မေ ဘိက္ခု တေ ဗြူမိ၊ သုဇာတော ဣတိ မံ ဝိဒူ [ဝိဒုံ (သီ.)]။
၉၈၃.
‘‘မိဂေ ဂဝေသမာနောဟံ၊ ဩဂါဟန္တော ဗြဟာဝနံ။
မိဂံ တဉ္စေဝ [မိဂံ ဂန္တ္ဝေဝ (သျာ.)၊ မိဂဝဓဉ္စ (က.)] နာဒ္ဒက္ခိံ၊ တဉ္စ ဒိသွာ ဌိတော အဟ’’န္တိ။
၉၈၄.
‘‘သွာဂတံ တေ မဟာပုည၊ အထော တေ အဒုရာဂတံ။
ဧတ္တော ဥဒကမာဒါယ၊ ပါဒေ ပက္ခာလယဿု တေ။
၉၈၅.
‘‘ဣဒမ္ပိ ပါနီယံ သီတံ၊ အာဘတံ ဂိရိဂဗ္ဘရာ။
ရာဇပုတ္တ တတော ပိတွာ [ဣတွာ (သီ. သျာ.)]၊ သန္ထတသ္မိံ ဥပါဝိသာ’’တိ။
၉၈၆.
‘‘ကလျာဏီ ဝတ တေ ဝါစာ၊ သဝနီယာ မဟာမုနိ။
နေလာ အတ္ထဝတီ [စတ္ထဝတီ (သီ.)] ဝဂ္ဂု၊ မန္တွာ [မန္တာ (သျာ. ဣ. က.)] အတ္ထဉ္စ ဘာသသိ [ဘာသသေ (သီ.)]။
၉၈၇.
‘‘ကာ တေ ရတိ ဝနေ ဝိဟရတော၊ ဣသိနိသဘ ဝဒေဟိ ပုဋ္ဌော။
တဝ ဝစနပထံ နိသာမယိတွာ၊ အတ္ထဓမ္မပဒံ သမာစရေမသေ’’တိ။
၉၈၈.
‘‘အဟိံသာ သဗ္ဗပါဏီနံ၊ ကုမာရမှာက ရုစ္စတိ။
ထေယျာ စ အတိစာရာ စ၊ မဇ္ဇပါနာ စ အာရတိ။
၉၈၉.
‘‘အာရတိ သမစရိယာ စ၊ ဗာဟုသစ္စံ ကတညုတာ။
ဒိဋ္ဌေဝ ဓမ္မေ ပါသံသာ၊ ဓမ္မာ ဧတေ ပသံသိယာတိ။
၉၉၀.
‘‘သန္တိကေ မရဏံ တုယှံ၊ ဩရံ မာသေဟိ ပဉ္စဟိ။
ရာဇပုတ္တ ဝိဇာနာဟိ၊ အတ္တာနံ ပရိမောစယာ’’တိ။
၉၉၁.
‘‘ကတမံ သွာဟံ ဇနပဒံ ဂန္တွာ၊ ကိံ ကမ္မံ ကိဉ္စ ပေါရိသံ။
ကာယ ဝါ ပန ဝိဇ္ဇာယ၊ ဘဝေယျံ အဇရာမရော’’တိ။
၉၉၂.
‘‘န ဝိဇ္ဇတေ သော ပဒေသော၊ ကမ္မံ ဝိဇ္ဇာ စ ပေါရိသံ။
ယတ္ထ ဂန္တွာ ဘဝေ မစ္စော၊ ရာဇပုတ္တာဇရာမရော။
၉၉၃.
‘‘မဟဒ္ဓနာ မဟာဘောဂါ၊ ရဋ္ဌဝန္တောပိ ခတ္တိယာ။
ပဟူတဓနဓညာသေ၊ တေပိ နော [တေပိ န (ဗဟူသု)] အဇရာမရာ။
၉၉၄.
‘‘ယဒိ တေ သုတာ အန္ဓကဝေဏ္ဍုပုတ္တာ [အန္ဓကဝေဏ္ဟုပုတ္တာ (သီ.)၊ အဏ္ဍကဝေဏ္ဍပုတ္တာ (သျာ. က.)]၊ သူရာ ဝီရာ ဝိက္ကန္တပ္ပဟာရိနော။
တေပိ အာယုက္ခယံ ပတ္တာ၊ ဝိဒ္ဓသ္တာ သဿတီသမာ။
၉၉၅.
‘‘ခတ္တိယာ ဗြာဟ္မဏာ ဝေဿာ၊ သုဒ္ဒါ စဏ္ဍာလပုက္ကုသာ။
ဧတေ စညေ စ ဇာတိယာ၊ တေပိ နော အဇရာမရာ။
၉၉၆.
‘‘ယေ မန္တံ ပရိဝတ္တေန္တိ၊ ဆဠင်္ဂံ ဗြဟ္မစိန္တိတံ။
ဧတေ စညေ စ ဝိဇ္ဇာယ၊ တေပိ နော အဇရာမရာ။
၉၉၇.
‘‘ဣသယော စာပိ ယေ သန္တာ၊ သညတတ္တာ တပဿိနော။
သရီရံ တေပိ ကာလေန၊ ဝိဇဟန္တိ တပဿိနော။
၉၉၈.
‘‘ဘာဝိတတ္တာပိ အရဟန္တော၊ ကတကိစ္စာ အနာသဝါ။
နိက္ခိပန္တိ ဣမံ ဒေဟံ၊ ပုညပါပပရိက္ခယာ’’တိ။
၉၉၉.
‘‘သုဘာသိတာ အတ္ထဝတီ၊ ဂါထာယော တေ မဟာမုနိ။
နိဇ္ဈတ္တောမှိ သုဘဋ္ဌေန၊ တ္ဝဉ္စ မေ သရဏံ ဘဝါ’’တိ။
၁၀၀၀.
‘‘မာ မံ တွံ သရဏံ ဂစ္ဆ၊ တမေဝ သရဏံ ဝဇ [ဘဇ (က.)]။
သကျပုတ္တံ မဟာဝီရံ၊ ယမဟံ သရဏံ ဂတော’’တိ။
၁၀၀၁.
‘‘ကတရသ္မိံ သော ဇနပဒေ၊ သတ္ထာ တုမှာက မာရိသ။
အဟမ္ပိ ဒဋ္ဌုံ ဂစ္ဆိဿံ၊ ဇိနံ အပ္ပဋိပုဂ္ဂလ’’န္တိ။
၁၀၀၂.
‘‘ပုရတ္ထိမသ္မိံ ဇနပဒေ၊ ဩက္ကာကကုလသမ္ဘဝေါ။
တတ္ထာသိ ပုရိသာဇညော၊ သော စ ခေါ ပရိနိဗ္ဗုတော’’တိ။
၁၀၀၃.
‘‘သစေ ဟိ ဗုဒ္ဓေါ တိဋ္ဌေယျ၊ သတ္ထာ တုမှာက မာရိသ။
ယောဇနာနိ သဟဿာနိ၊ ဂစ္ဆေယျံ [ဂစ္ဆေ (သျာ. ဣ. က.)] ပယိရုပါသိတုံ။
၁၀၀၄.
‘‘ယတော စ ခေါ [ယတာ ခေါ (ဣ. က.)] ပရိနိဗ္ဗုတော၊ သတ္ထာ တုမှာက မာရိသ။
နိဗ္ဗုတမ္ပိ [ပရိနိဗ္ဗုတံ (သျာ. က.)] မဟာဝီရံ၊ ဂစ္ဆာမိ သရဏံ အဟံ။
၁၀၀၅.
‘‘ဥပေမိ သရဏံ ဗုဒ္ဓံ၊ ဓမ္မဉ္စာပိ အနုတ္တရံ။
သံဃဉ္စ နရဒေဝဿ၊ ဂစ္ဆာမိ သရဏံ အဟံ။
၁၀၀၆.
‘‘ပါဏာတိပါတာ ဝိရမာမိ ခိပ္ပံ၊ လောကေ အဒိန္နံ ပရိဝဇ္ဇယာမိ။
အမဇ္ဇပေါ နော စ မုသာ ဘဏာမိ၊ သကေန ဒါရေန စ ဟောမိ တုဋ္ဌော’’တိ။
၁၀၀၇.
‘‘သဟဿရံသီဝ ယထာ မဟပ္ပဘော၊ ဒိသံ ယထာ ဘာတိ နဘေ အနုက္ကမံ။
တထာပကာရော [တထပ္ပကာရော (သီ. သျာ.)] တဝါယံ [တဝယံ (သီ. ဣ.)] မဟာရထော၊ သမန္တတော ယောဇနသတ္တမာယတော။
၁၀၀၈.
‘‘သုဝဏ္ဏပဋ္ဋေဟိ သမန္တမောတ္ထဋော၊ ဥရဿ မုတ္တာဟိ မဏီဟိ စိတ္တိတော။
လေခါ သုဝဏ္ဏဿ စ ရူပိယဿ စ၊ သောဘေန္တိ ဝေဠုရိယမယာ သုနိမ္မိတာ။
၁၀၀၉.
‘‘သီသဉ္စိဒံ ဝေဠုရိယဿ နိမ္မိတံ၊ ယုဂဉ္စိဒံ လောဟိတကာယ စိတ္တိတံ။
ယုတ္တာ သုဝဏ္ဏဿ စ ရူပိယဿ စ၊ သောဘန္တိ အဿာ စ ဣမေ မနောဇဝါ။
၁၀၁၀.
‘‘သော တိဋ္ဌသိ ဟေမရထေ အဓိဋ္ဌိတော၊ ဒေဝါနမိန္ဒောဝ သဟဿဝါဟနော။
ပုစ္ဆာမိ တာဟံ ယသဝန္တ ကောဝိဒံ [ကောဝိဒ (က.)]၊ ကထံ တယာ လဒ္ဓေါ အယံ ဥဠာရော’’တိ။
၁၀၁၁.
‘‘သုဇာတော နာမဟံ ဘန္တေ၊ ရာဇပုတ္တော ပုရေ အဟုံ။
တ္ဝဉ္စ မံ အနုကမ္ပာယ၊ သညမသ္မိံ နိဝေသယိ။
၁၀၁၂.
‘‘ခီဏာယုကဉ္စ မံ ဉတွာ၊ သရီရံ ပါဒါသိ သတ္ထုနော။
ဣမံ သုဇာတ ပူဇေဟိ၊ တံ တေ အတ္ထာယ ဟေဟိတိ။
၁၀၁၃.
‘‘တာဟံ ဂန္ဓေဟိ မာလေဟိ၊ ပူဇယိတွာ သမုယျုတော။
ပဟာယ မာနုသံ ဒေဟံ၊ ဥပပန္နောမှိ နန္ဒနံ။
၁၀၁၄.
‘‘နန္ဒနေ စ ဝနေ [နန္ဒနောပဝနေ (သီ.)၊ နန္ဒနေ ပဝနေ (သျာ. က.)] ရမ္မေ၊ နာနာဒိဇဂဏာယုတေ။
ရမာမိ နစ္စဂီတေဟိ၊ အစ္ဆရာဟိ ပုရက္ခတော’’တိ။
စူဠရထဝိမာနံ တေရသမံ။
၁၄. မဟာရထဝိမာနဝတ္ထု
၁၀၁၅.
‘‘သဟဿယုတ္တံ ဟယဝါဟနံ သုဘံ၊ အာရုယှိမံ သန္ဒနံ နေကစိတ္တံ။
ဥယျာနဘူမိံ အဘိတော အနုက္ကမံ၊ ပုရိန္ဒဒေါ ဘူတပတီဝ ဝါသဝေါ။
၁၀၁၆.
‘‘သောဝဏ္ဏမယာ တေ ရထကုဗ္ဗရာ ဥဘော၊ ဖလေဟိ [ထလေဟိ (သီ.)] အံသေဟိ အတီဝ သင်္ဂတာ။
သုဇာတဂုမ္ဗာ နရဝီရနိဋ္ဌိတာ၊ ဝိရောစတီ ပန္နရသေဝ စန္ဒော။
၁၀၁၇.
‘‘သုဝဏ္ဏဇာလာဝတတော ရထော အယံ၊ ဗဟူဟိ နာနာရတနေဟိ စိတ္တိတော။
သုနန္ဒိဃောသော စ သုဘဿရော စ၊ ဝိရောစတီ စာမရဟတ္ထဗာဟုဘိ။
၁၀၁၈.
‘‘ဣမာ စ နာဘ္ယော မနသာဘိနိမ္မိတာ၊ ရထဿ ပါဒန္တရမဇ္ဈဘူသိတာ။
ဣမာ စ နာဘ္ယော သတရာဇိစိတ္တိတာ၊ သတေရတာ ဝိဇ္ဇုရိဝပ္ပဘာသရေ။
၁၀၁၉.
‘‘အနေကစိတ္တာဝတတော ရထော အယံ၊ ပုထူ စ နေမီ စ သဟဿရံသိကော။
တေသံ သရော သုယျတိ [သူယတိ (သီ.)] ဝဂ္ဂုရူပေါ၊ ပဉ္စင်္ဂိကံ တုရိယမိဝပ္ပဝါဒိတံ။
၁၀၂၀.
‘‘သိရသ္မိံ စိတ္တံ မဏိစန္ဒကပ္ပိတံ၊ သဒါ ဝိသုဒ္ဓံ ရုစိရံ ပဘဿရံ။
သုဝဏ္ဏရာဇီဟိ အတီဝ သင်္ဂတံ၊ ဝေဠုရိယရာဇီဝ အတီဝ သောဘတိ။
၁၀၂၁.
‘‘ဣမေ စ ဝါဠီ မဏိစန္ဒကပ္ပိတာ၊ အာရောဟကမ္ဗူ သုဇဝါ ဗြဟူပမာ။
ဗြဟာ မဟန္တာ ဗလိနော မဟာဇဝါ၊ မနော တဝညာယ တထေဝ သိံသရေ [သဗ္ဗရေ (က.)၊ သပ္ပရေ (?)]။
၁၀၂၂.
‘‘ဣမေ စ သဗ္ဗေ သဟိတာ စတုက္ကမာ၊ မနော တဝညာယ တထေဝ သိံသရေ။
သမံ ဝဟန္တာ မုဒုကာ အနုဒ္ဓတာ၊ အာမောဒမာနာ တုရဂါန [တုရင်္ဂါန (က.)] မုတ္တမာ။
၁၀၂၃.
‘‘ဓုနန္တိ ဝဂ္ဂန္တိ ပတန္တိ [ပဝတ္တန္တိ (ဣ. က.)] စမ္ဗရေ၊ အဗ္ဘုဒ္ဓုနန္တာ သုကတေ ပိဠန္ဓနေ။
တေသံ သရော သုယျတိ ဝဂ္ဂုရူပေါ၊ ပဉ္စင်္ဂိကံ တုရိယမိဝပ္ပဝါဒိတံ။
၁၀၂၄.
‘‘ရထဿ ဃောသော အပိဠန္ဓနာန စ၊ ခုရဿ နာဒေါ [နာဒီ (သျာ.)၊ နာဒိ (ဣ. က.)] အဘိဟိံသနာယ စ။
ဃောသော သုဝဂ္ဂူ သမိတဿ သုယျတိ၊ ဂန္ဓဗ္ဗတူရိယာနိ ဝိစိတြသံဝနေ။
၁၀၂၅.
‘‘ရထေ ဌိတာ တာ မိဂမန္ဒလောစနာ၊ အာဠာရပမှာ ဟသိတာ ပိယံဝဒါ။
ဝေဠုရိယဇာလာဝတတာ တနုစ္ဆဝါ၊ သဒေဝ ဂန္ဓဗ္ဗသူရဂ္ဂပူဇိတာ။
၁၀၂၆.
‘‘တာ ရတ္တရတ္တမ္ဗရဣတဝါသသာ၊ ဝိသာလနေတ္တာ အဘိရတ္တလောစနာ။
ကုလေ သုဇာတာ သုတနူ သုစိမှိတာ၊ ရထေ ဌိတာ ပဉ္ဇလိကာ ဥပဋ္ဌိတာ။
၁၀၂၇.
‘‘တာ ကမ္ဗုကေယူရဓရာ သုဝါသသာ၊ သုမဇ္ဈိမာ ဦရုထနူပပန္နာ။
ဝဋ္ဋင်္ဂုလိယော သုမုခါ သုဒဿနာ၊ ရထေ ဌိတာ ပဉ္ဇလိကာ ဥပဋ္ဌိတာ။
၁၀၂၈.
‘‘အညာ သုဝေဏီ သုသု မိဿကေသိယော၊ သမံ ဝိဘတ္တာဟိ ပဘဿရာဟိ စ။
အနုဗ္ဗတာ တာ တဝ မာနသေ ရတာ၊ ရထေ ဌိတာ ပဉ္ဇလိကာ ဥပဋ္ဌိတာ။
၁၀၂၉.
‘‘အာဝေဠိနိယော ပဒုမုပ္ပလစ္ဆဒါ၊ အလင်္ကတာ စန္ဒနသာရဝါသိတာ [ဝေါသိတာ (သျာ.)၊ ဘူသိတာ (က.)]။
အနုဗ္ဗတာ တာ တဝ မာနသေ ရတာ၊ ရထေ ဌိတာ ပဉ္ဇလိကာ ဥပဋ္ဌိတာ။
၁၀၃၀.
‘‘တာ မာလိနိယော ပဒုမုပ္ပလစ္ဆဒါ၊ အလင်္ကတာ စန္ဒနသာရဝါသိတာ။
အနုဗ္ဗတာ တာ တဝ မာနသေ ရတာ၊ ရထေ ဌိတာ ပဉ္ဇလိကာ ဥပဋ္ဌိတာ။
၁၀၃၁.
‘‘ကဏ္ဌေသု တေ ယာနိ ပိဠန္ဓနာနိ၊ ဟတ္ထေသု ပါဒေသု တထေဝ သီသေ။
ဩဘာသယန္တီ ဒသ သဗ္ဗသော ဒိသာ၊ အဗ္ဘုဒ္ဒယံ သာရဒိကောဝ ဘာဏုမာ။
၁၀၃၂.
‘‘ဝါတဿ ဝေဂေန စ သမ္ပကမ္ပိတာ၊ ဘုဇေသု မာလာ အပိဠန္ဓနာနိ စ။
မုဉ္စန္တိ ဃောသံ ရူစိရံ သုစိံ သုဘံ၊ သဗ္ဗေဟိ ဝိညူဟိ သုတဗ္ဗရူပံ။
၁၀၃၃.
‘‘ဥယျာနဘူမ္ယာ စ ဒုဝဒ္ဓတော ဌိတာ၊ ရထာ စ နာဂါ တူရိယာနိ စ သရော။
တမေဝ ဒေဝိန္ဒ ပမောဒယန္တိ၊ ဝီဏာ ယထာ ပေါက္ခရပတ္တဗာဟုဘိ။
၁၀၃၄.
‘‘ဣမာသု ဝီဏာသု ဗဟူသု ဝဂ္ဂူသု၊ မနုညရူပါသု ဟဒယေရိတံ ဣတိံ [ဟဒယေရိတံ ပတိ (သီ.)၊ ဟဒယေရိတမ္ပိ တံ (သျာ.)]။
ပဝဇ္ဇမာနာသု အတီဝ အစ္ဆရာ၊ ဘမန္တိ ကညာ ပဒုမေသု သိက္ခိတာ။
၁၀၃၅.
‘‘ယဒါ စ ဂီတာနိ စ ဝါဒိတာနိ စ၊ နစ္စာနိ စိမာနိ [စေမာနိ (သီ.)] သမေန္တိ ဧကတော။
အထေတ္ထ နစ္စန္တိ အထေတ္ထ အစ္ဆရာ၊ ဩဘာသယန္တီ ဥဘတော ဝရိတ္ထိယော။
၁၀၃၆.
‘‘သော မောဒသိ တုရိယဂဏပ္ပဗောဓနော၊ မဟီယမာနော ဝဇိရာဝုဓေါရိဝ။
ဣမာသု ဝီဏာသု ဗဟူသု ဝဂ္ဂူသု၊ မနုညရူပါသု ဟဒယေရိတံ ဣတိံ။
၁၀၃၇.
‘‘ကိံ တွံ ပုရေ ကမ္မမကာသိ အတ္တနာ၊ မနုဿဘူတော ပုရိမာယ ဇာတိယာ။
ဥပေါသထံ ကံ ဝါ [ဥပေါသထံ ကိံ ဝ (သျာ.)] တုဝံ ဥပါဝသိ၊ ကံ [ကိံ (သျာ.)] ဓမ္မစရိယံ ဝတမာဘိရောစယိ။
၁၀၃၈.
‘‘နယီဒမပ္ပဿ ကတဿ [နယိဒံ အပ္ပဿ ကတဿ (သီ. သျာ.)၊ သာသေဒံ အပ္ပကတဿ (က.)] ကမ္မုနော၊ ပုဗ္ဗေ သုစိဏ္ဏဿ ဥပေါသထဿ ဝါ။
ဣဒ္ဓါနုဘာဝေါ ဝိပုလော အယံ တဝ၊ ယံ ဒေဝသသံဃံ အဘိရောစသေ ဘုသံ။
၁၀၃၉.
‘‘ဒါနဿ တေ ဣဒံ ဖလံ၊ အထော သီလဿ ဝါ ပန။
အထော အဉ္ဇလိကမ္မဿ၊ တံ မေ အက္ခာဟိ ပုစ္ဆိတော’’တိ။
၁၀၄၀.
သော ဒေဝပုတ္တော အတ္တမနော၊ မောဂ္ဂလ္လာနေန ပုစ္ဆိတော။
ပဉ္ဟံ ပုဋ္ဌော ဝိယာကာသိ၊ ယဿ ကမ္မဿိဒံ ဖလန္တိ။
၁၀၄၁.
‘‘ဇိတိန္ဒ္ရိယံ ဗုဒ္ဓမနောမနိက္ကမံ၊ နရုတ္တမံ ကဿပမဂ္ဂပုဂ္ဂလံ။
အဝါပုရန္တံ အမတဿ ဒွါရံ၊ ဒေဝါတိဒေဝံ သတပုညလက္ခဏံ။
၁၀၄၂.
‘‘တမဒ္ဒသံ ကုဉ္ဇရမောဃတိဏ္ဏံ၊ သုဝဏ္ဏသိင္ဂီနဒဗိမ္ဗသာဒိသံ။
ဒိသွာန တံ ခိပ္ပမဟုံ သုစီမနော၊ တမေဝ ဒိသွာန သုဘာသိတဒ္ဓဇံ။
၁၀၄၃.
‘‘တမန္နပါနံ အထဝါပိ စီဝရံ၊ သုစိံ ပဏီတံ ရသသာ ဥပေတံ။
ပုပ္ဖာဘိက္ကိဏမှိ သကေ နိဝေသနေ၊ ပတိဋ္ဌပေသိံ သ အသင်္ဂမာနသော။
၁၀၄၄.
‘‘တမန္နပါနေန စ စီဝရေန စ၊ ခဇ္ဇေန ဘောဇ္ဇေန စ သာယနေန စ။
သန္တပ္ပယိတွာ ဒွိပဒါနမုတ္တမံ၊ သော သဂ္ဂသော ဒေဝပုရေ ရမာမဟံ။
၁၀၄၅.
‘‘ဧတေနုပါယေန ဣမံ နိရဂ္ဂဠံ, ယညံ ယဇိတွာ တိဝိဓံ ဝိသုဒ္ဓံ။
ပဟာယဟံ မာနုသကံ သမုဿယံ၊ ဣန္ဒူပမော [ဣန္ဒဿမော (သျာ. က.)] ဒေဝပုရေ ရမာမဟံ။
၁၀၄၆.
‘‘အာယုဉ္စ ဝဏ္ဏဉ္စ သုခံ ဗလဉ္စ၊ ပဏီတရူပံ အဘိကင်္ခတာ မုနိ။
အန္နဉ္စ ပါနဉ္စ ဗဟုံ သုသင်္ခတံ၊ ပတိဋ္ဌပေတဗ္ဗမသင်္ဂမာနသေ။
၁၀၄၇.
[ကထာ. ၇၉၉]‘‘နယိမသ္မိံ လောကေ ပရသ္မိံ [နယိမသ္မိံ ဝါ လောကေ ပရသ္မိံ (ကထာဝတ္ထု ၇၉၉)၊ နယိမသ္မိ လောကေ ဝ ပရသ္မိ (?)] ဝါ ပန၊ ဗုဒ္ဓေန သေဋ္ဌော ဝ သမော ဝ ဝိဇ္ဇတိ။
အာဟုနေယျာနံ [ယမာဟုနေယျာနံ (က.)] ပရမာဟုတိံ ဂတော၊ ပုညတ္ထိကာနံ ဝိပုလပ္ဖလေသိန’’န္တိ။
မဟာရထဝိမာနံ စုဒ္ဒသမံ။
မဟာရထဝဂ္ဂေါ ပဉ္စမော နိဋ္ဌိတော။
တဿုဒ္ဒါနံ –
မဏ္ဍူကော ရေဝတီ ဆတ္တော၊ ကက္ကဋော ဒွါရပါလကော။
ဒွေ ကရဏီယာ ဒွေ သူစိ၊ တယော နာဂါ စ ဒွေ ရထာ။
ပုရိသာနံ ပဌမော ဝဂ္ဂေါ ပဝုစ္စတီတိ။
ဘာဏဝါရံ တတိယံ နိဋ္ဌိတံ။
၆. ပါယာသိဝဂ္ဂေါ
၁. ပဌမအဂါရိယဝိမာနဝတ္ထု
၁၀၄၈.
‘‘ယထာ ဝနံ စိတ္တလတံ ပဘာသတိ [ပကာသတိ (က.)]၊ ဥယျာနသေဋ္ဌံ တိဒသာနမုတ္တမံ။
တထူပမံ တုယှမိဒံ ဝိမာနံ၊ ဩဘာသယံ တိဋ္ဌတိ အန္တလိက္ခေ။
၁၀၄၉.
‘‘ဒေဝိဒ္ဓိပတ္တောသိ မဟာနုဘာဝေါ၊ မနုဿဘူတော ကိမကာသိ ပုညံ။
ကေနာသိ ဧဝံ ဇလိတာနုဘာဝေါ၊ ဝဏ္ဏော စ တေ သဗ္ဗဒိသာ ပဘာသတီ’’တိ။
၁၀၅၀.
သော ဒေဝပုတ္တော အတ္တမနော၊ မောဂ္ဂလ္လာနေန ပုစ္ဆိတော။
ပဉ္ဟံ ပုဋ္ဌော ဝိယာကာသိ၊ ယဿ ကမ္မဿိဒံ ဖလံ။
၁၀၅၁.
‘‘အဟဉ္စ ဘရိယာ စ မနုဿလောကေ၊ ဩပါနဘူတာ ဃရမာဝသိမှ။
အန္နဉ္စ ပါနဉ္စ ပသန္နစိတ္တာ၊ သက္ကစ္စ ဒါနံ ဝိပုလံ အဒမှ။
၁၀၅၂.
‘‘တေန မေတာဒိသော ဝဏ္ဏော။ပေ.။ဝဏ္ဏော စ မေ သဗ္ဗဒိသာ ပဘာသတီ’’တိ။
ပဌမအဂါရိယဝိမာနံ ပဌမံ။
၂. ဒုတိယအဂါရိယဝိမာနဝတ္ထု
၁၀၅၄.
‘‘ယထာ ဝနံ စိတ္တလတံ ပဘာသတိ၊ ဥယျာနသေဋ္ဌံ တိဒသာနမုတ္တမံ။
တထူပမံ တုယှမိဒံ ဝိမာနံ၊ ဩဘာသယံ တိဋ္ဌတိ အန္တလိက္ခေ။
၁၀၅၅.
‘‘ဒေဝိဒ္ဓိပတ္တောသိ မဟာနုဘာဝေါ၊ မနုဿဘူတော ကိမကာသိ ပုညံ။
ကေနာသိ ဧဝံ ဇလိတာနုဘာဝေါ၊ ဝဏ္ဏော စ တေ သဗ္ဗဒိသာ ပဘာသတီ’’တိ။
၁၀၅၆.
သော ဒေဝပုတ္တော အတ္တမနော။ပေ.။ ယဿ ကမ္မဿိဒံ ဖလံ။
၁၀၅၇.
‘‘အဟဉ္စ ဘရိယာ စ မနုဿလောကေ၊ ဩပါနဘူတာ ဃရမာဝသိမှ။
အန္နဉ္စ ပါနဉ္စ ပသန္နစိတ္တာ၊ သက္ကစ္စ ဒါနံ ဝိပုလံ အဒမှ။
၁၀၅၈.
‘‘တေန မေတာဒိသော ဝဏ္ဏော။ပေ.။ ဝဏ္ဏော စ မေ သဗ္ဗဒိသာ ပဘာသတီ’’တိ။
ဒုတိယအဂါရိယဝိမာနံ ဒုတိယံ။
၃. ဖလဒါယကဝိမာနဝတ္ထု
၁၀၆၀.
‘‘ဥစ္စမိဒံ မဏိထူဏံ ဝိမာနံ၊ သမန္တတော သောဠသ ယောဇနာနိ။
ကူဋာဂါရာ သတ္တသတာ ဥဠာရာ၊ ဝေဠုရိယထမ္ဘာ ရုစကတ္ထတာ သုဘာ။
၁၀၆၁.
‘‘တတ္ထစ္ဆသိ ပိဝသိ ခါဒသိ စ၊ ဒိဗ္ဗာ စ ဝီဏာ ပဝဒန္တိ ဝဂ္ဂုံ။
အဋ္ဌဋ္ဌကာ သိက္ခိတာ သာဓုရူပါ၊ ဒိဗ္ဗာ စ ကညာ တိဒသစရာ ဥဠာရာ။
နစ္စန္တိ ဂါယန္တိ ပမောဒယန္တိ။
၁၀၆၂.
‘‘ဒေဝိဒ္ဓိပတ္တောသိ မဟာနုဘာဝေါ၊ မနုဿဘူတော ကိမကာသိ ပုညံ။
ကေနာသိ ဧဝံ ဇလိတာနုဘာဝေါ၊ ဝဏ္ဏော စ တေ သဗ္ဗဒိသာ ပဘာသတီ’’တိ။
၁၀၆၃.
သော ဒေဝပုတ္တော အတ္တမနော။ပေ.။ ယဿ ကမ္မဿိဒံ ဖလံ။
၁၀၆၄.
‘‘ဖလဒါယီ ဖလံ ဝိပုလံ လဘတိ၊ ဒဒမုဇုဂတေသု ပသန္နမာနသော။
သော ဟိ ပမောဒတိ [မောဒတိ (သီ. သျာ. ဣ.)] သဂ္ဂဂတော တိဒိဝေ [တတ္ထ (က.)]၊ အနုဘောတိ စ ပုညဖလံ ဝိပုလံ။
၁၀၆၅.
‘‘တဝေဝါဟံ [တထေဝါဟံ (သီ. သျာ. ဣ.)] မဟာမုနိ၊ အဒါသိံ စတုရော ဖလေ။
၁၀၆၆.
‘‘တသ္မာ ဟိ ဖလံ အလမေဝ ဒါတုံ၊ နိစ္စံ မနုဿေန သုခတ္ထိကေန။
ဒိဗ္ဗာနိ ဝါ ပတ္ထယတာ သုခါနိ၊ မနုဿသောဘဂ္ဂတမိစ္ဆတာ ဝါ။
၁၀၆၇.
‘‘တေန မေတာဒိသော ဝဏ္ဏော။ပေ.။
ဝဏ္ဏော စ မေ သဗ္ဗဒိသာ ပဘာသတီ’’တိ။
ဖလဒါယကဝိမာနံ တတိယံ။
၄. ပဌမဥပဿယဒါယကဝိမာနဝတ္ထု
၁၀၆၉.
‘‘စန္ဒော ယထာ ဝိဂတဝလာဟကေ နဘေ၊ ဩဘာသယံ ဂစ္ဆတိ အန္တလိက္ခေ။
တထူပမံ တုယှမိဒံ ဝိမာနံ၊ ဩဘာသယံ တိဋ္ဌတိ အန္တလိက္ခေ။
၁၀၇၀.
‘‘ဒေဝိဒ္ဓိပတ္တောသိ မဟာနုဘာဝါ၊ မနုဿဘူတော ကိမကာသိ ပုညံ။
ကေနာသိ ဧဝံ ဇလိတာနုဘာဝေါ၊ ဝဏ္ဏော စ တေ သဗ္ဗဒိသာ ပဘာသတီ’’တိ။
၁၀၇၁.
သော ဒေဝပုတ္တော အတ္တမနော။ပေ.။ ယဿ ကမ္မဿိဒံ ဖလံ။
၁၀၇၂.
‘‘အဟဉ္စ ဘရိယာ စ မနုဿလောကေ၊ ဥပဿယံ အရဟတော အဒမှ။
အန္နဉ္စ ပါနဉ္စ ပသန္နစိတ္တာ၊ သက္ကစ္စ ဒါနံ ဝိပုလံ အဒမှ။
၁၀၇၃.
‘‘တေန မေတာဒိသော ဝဏ္ဏော။ပေ.။ ဝဏ္ဏော စ မေ သဗ္ဗဒိသာ ပဘာသတီ’’တိ။
ပဌမဥပဿယဒါယကဝိမာနံ စတုတ္ထံ။
၅. ဒုတိယဥပဿယဒါယကဝိမာနဝတ္ထု
၁၀၇၅.
သူရိယော ယထာ ဝိဂတဝလာဟကေ နဘေ။ပေ.။။
(ယထာ ပုရိမဝိမာနံ တထာ ဝိတ္ထာရေတဗ္ဗံ)။
၁၀၇၉.
‘‘တေန မေတာဒိသော ဝဏ္ဏော။ပေ.။ဝဏ္ဏော စ မေ သဗ္ဗဒိသာ ပဘာသတီ’’တိ။
ဒုတိယဥပဿယဒါယကဝိမာနံ ပဉ္စမံ။
၆. ဘိက္ခာဒါယကဝိမာနဝတ္ထု
၁၀၈၁.
‘‘ဥစ္စမိဒံ မဏိထူဏံ ဝိမာနံ၊ သမန္တတော ဒွါဒသ ယောဇနာနိ။
ကူဋာဂါရာ သတ္တသတာ ဥဠာရာ၊ ဝေဠုရိယထမ္ဘာ ရုစကတ္ထတာ သုဘာ။
၁၀၈၂.
‘‘ဒေဝိဒ္ဓိပတ္တောသိ မဟာနုဘာဝေါ၊ မနုဿဘူတော ကိမကာသိ ပုညံ။
ကေနာသိ ဧဝံ ဇလိတာနုဘာဝေါ၊ ဝဏ္ဏော စ တေ သဗ္ဗဒိသာ ပဘာသတီ’’တိ။
၁၀၈၃.
သော ဒေဝပုတ္တော အတ္တမနော။ပေ.။ ယဿ ကမ္မဿိဒံ ဖလံ။
၁၀၈၄.
‘‘အဟံ မနုဿေသု မနုဿဘူတော၊ ဒိသွာန ဘိက္ခုံ တသိတံ ကိလန္တံ။
ဧကာဟံ ဘိက္ခံ ပဋိပါဒယိဿံ၊ သမင်္ဂိ ဘတ္တေန တဒါ အကာသိံ။
၁၀၈၅.
‘‘တေန မေတာဒိသော ဝဏ္ဏော။ပေ.။ ဝဏ္ဏော စ မေ သဗ္ဗဒိသာ ပဘာသတီ’’တိ။
ဘိက္ခာဒါယကဝိမာနံ ဆဋ္ဌံ။
၇. ယဝပါလကဝိမာနဝတ္ထု
၁၀၈၇.
‘‘ဥစ္စမိဒံ မဏိထူဏံ ဝိမာနံ။ပေ.။ ဝဏ္ဏော စ တေ သဗ္ဗဒိသာ ပဘာသတီ’’တိ။
၁၀၈၉.
သော ဒေဝပုတ္တော အတ္တမနော။ပေ.။ ယဿ ကမ္မဿိဒံ ဖလံ။
၁၀၉၀.
‘‘အဟံ မနုဿေသု မနုဿဘူတော၊ အဟောသိံ ယဝပါလကော။
အဒ္ဒသံ ဝိရဇံ ဘိက္ခုံ၊ ဝိပ္ပသန္နမနာဝိလံ။
၁၀၉၁.
‘‘တဿ အဒါသဟံ ဘာဂံ၊ ပသန္နော သေဟိ ပါဏိဘိ။
ကုမ္မာသပိဏ္ဍံ ဒတွာန၊ မောဒါမိ နန္ဒနေ ဝနေ။
၁၀၉၂.
‘‘တေန မေတာဒိသော ဝဏ္ဏော။ပေ.။ ဝဏ္ဏော စ မေ သဗ္ဗဒိသာ ပဘာသတီ’’တိ။
ယဝပါလကဝိမာနံ သတ္တမံ။
၈. ပဌမကုဏ္ဍလီဝိမာနဝတ္ထု
၁၀၉၄.
‘‘အလင်္ကတော မလ္ယဓရော သုဝတ္ထော၊ သုကုဏ္ဍလီ ကပ္ပိတကေသမဿု။
အာမုတ္တဟတ္ထာဘရဏော ယသဿီ၊ ဒိဗ္ဗေ ဝိမာနမှိ ယထာပိ စန္ဒိမာ။
၁၀၉၅.
‘‘ဒိဗ္ဗာ စ ဝီဏာ ပဝဒန္တိ ဝဂ္ဂုံ၊ အဋ္ဌဋ္ဌကာ သိက္ခိတာ သာဓုရူပါ။
ဒိဗ္ဗာ စ ကညာ တိဒသစရာ ဥဠာရာ၊ နစ္စန္တိ ဂါယန္တိ ပမောဒယန္တိ။
၁၀၉၆.
‘‘ဒေဝိဒ္ဓိပတ္တောသိ မဟာနုဘာဝေါ၊ မနုဿဘူတော ကိမကာသိ ပုညံ။
ကေနာသိ ဧဝံ ဇလိတာနုဘာဝေါ၊ ဝဏ္ဏော စ တေ သဗ္ဗဒိသာ ပဘာသတီ’’တိ။
၁၀၉၇.
သော ဒေဝပုတ္တော အတ္တမနော။ပေ.။ ယဿ ကမ္မဿိဒံ ဖလံ။
၁၀၉၈.
‘‘အဟံ မနုဿေသု မနုဿဘူတော၊ ဒိသွာန သမဏေ သီလဝန္တေ။
သမ္ပန္နဝိဇ္ဇာစရဏေ ယသဿီ၊ ဗဟုဿုတေ တဏှက္ခယူပပန္နေ။
အန္နဉ္စ ပါနဉ္စ ပသန္နစိတ္တော၊ သက္ကစ္စ ဒါနံ ဝိပုလံ အဒါသိံ။
၁၀၉၉.
‘‘တေန မေတာဒိသော ဝဏ္ဏော။ပေ.။ဝဏ္ဏော စ မေ သဗ္ဗဒိသာ ပဘာသတီ’’တိ။
ပဌမကုဏ္ဍလီဝိမာနံ အဋ္ဌမံ။
၉. ဒုတိယကုဏ္ဍလီဝိမာနဝတ္ထု
၁၁၀၁.
‘‘အလင်္ကတော မလ္ယဓရော သုဝတ္ထော၊ သုကုဏ္ဍလီ ကပ္ပိတကေသမဿု။
အာမုတ္တဟတ္ထာဘရဏော ယသဿီ၊ ဒိဗ္ဗေ ဝိမာနမှိ ယထာပိ စန္ဒိမာ။
၁၁၀၂.
‘‘ဒိဗ္ဗာ စ ဝီဏာ ပဝဒန္တိ ဝဂ္ဂုံ၊ အဋ္ဌဋ္ဌကာ သိက္ခိတာ သာဓုရူပါ။
ဒိဗ္ဗာ စ ကညာ တိဒသစရာ ဥဠာရာ၊ နစ္စန္တိ ဂါယန္တိ ပမောဒယန္တိ။
၁၁၀၃.
‘‘ဒေဝိဒ္ဓိပတ္တောသိ မဟာနုဘာဝေါ၊ မနုဿဘူတော ကိမကာသိ ပုညံ။
ကေနာသိ ဧဝံ ဇလိတာနုဘာဝေါ၊ ဝဏ္ဏော စ တေ သဗ္ဗဒိသာ ပဘာသတီ’’တိ။
၁၁၀၄.
သော ဒေဝပုတ္တော အတ္တမနော။ပေ.။ ယဿ ကမ္မဿိဒံ ဖလံ။
၁၁၀၅.
‘‘အဟံ မနုဿေသု မနုဿဘူတော၊ ဒိသွာန သမဏေ သာဓုရူပေ [သီလဝန္တေ (က.)]။
သမ္ပန္နဝိဇ္ဇာစရဏေ ယသဿီ၊ ဗဟုဿုတေ သီလဝန္တေ ပသန္နေ [သီလဝတူပပန္နေ (က. သီ. က.)]။
အန္နဉ္စ ပါနဉ္စ ပသန္နစိတ္တော၊ သက္ကစ္စ ဒါနံ ဝိပုလံ အဒါသိံ။
၁၁၀၆.
‘‘တေန မေတာဒိသော ဝဏ္ဏော။ပေ.။ဝဏ္ဏော စ မေ သဗ္ဗဒိသာ ပဘာသတီ’’တိ။
ဒုတိယကုဏ္ဍလီဝိမာနံ နဝမံ။
၁၀. (ဥတ္တရ) ပါယာသိဝိမာနဝတ္ထု
၁၁၀၈.
‘‘ယာ ဒေဝရာဇဿ သဘာ သုဓမ္မာ၊ ယတ္ထစ္ဆတိ ဒေဝသံဃော သမဂ္ဂေါ။
တထူပမံ တုယှမိဒံ ဝိမာနံ၊ ဩဘာသယံ တိဋ္ဌတိ အန္တလိက္ခေ။
၁၁၀၉.
‘‘ဒေဝိဒ္ဓိပတ္တောသိ မဟာနုဘာဝေါ၊ မနုဿဘူတော ကိမကာသိ ပုညံ။
ကေနာသိ ဧဝံ ဇလိတာနုဘာဝေါ၊ ဝဏ္ဏော စ တေ သဗ္ဗဒိသာ ပဘာသတီ’’တိ။
၁၁၁၀.
သော ဒေဝပုတ္တော အတ္တမနော။ပေ.။ ယဿ ကမ္မဿိဒံ ဖလံ။
၁၁၁၁.
‘‘အဟံ မနုဿေသု မနုဿဘူတော၊ ရညော ပါယာသိဿ အဟောသိံ မာဏဝေါ။
လဒ္ဓါ ဓနံ သံဝိဘာဂံ အကာသိံ၊ ပိယာ စ မေ သီလဝန္တော အဟေသုံ။
အန္နဉ္စ ပါနဉ္စ ပသန္နစိတ္တော၊ သက္ကစ္စ ဒါနံ ဝိပုလံ အဒါသိံ။
၁၁၁၂.
‘‘တေန မေတာဒိသော ဝဏ္ဏော။ပေ. ။ဝဏ္ဏော စ မေ သဗ္ဗဒိသာ ပဘာသတီ’’တိ။
(ဥတ္တရ) ပါယာသိဝိမာနံ [ဥတ္တရဝိမာနံ (သီ. သျာ. အဋ္ဌ.)] ဒသမံ။
ပါယာသိဝဂ္ဂေါ ဆဋ္ဌော နိဋ္ဌိတော။
တဿုဒ္ဒါနံ –
ဒွေ အဂါရိနော ဖလဒါယီ၊ ဒွေ ဥပဿယဒါယီ ဘိက္ခာယ ဒါယီ။
ယဝပါလကော စေဝ ဒွေ၊ ကုဏ္ဍလိနော ပါယာသီတိ [ပါဌဘေဒေါ နတ္ထိ]။
ပုရိသာနံ ဒုတိယော ဝဂ္ဂေါ ပဝုစ္စတီတိ။
၇. သုနိက္ခိတ္တဝဂ္ဂေါ
၁. စိတ္တလတာဝိမာနဝတ္ထု
၁၁၁၄.
‘‘ယထာ ဝနံ စိတ္တလတံ ပဘာသတိ၊ ဥယျာနသေဋ္ဌံ တိဒသာနမုတ္တမံ။
တထူပမံ တုယှမိဒံ ဝိမာနံ၊ ဩဘာသယံ တိဋ္ဌတိ အန္တလိက္ခေ။
၁၁၁၅.
‘‘ဒေဝိဒ္ဓိပတ္တောသိ မဟာနုဘာဝေါ၊ မနုဿဘူတော ကိမကာသိ ပုညံ။
ကေနာသိ ဧဝံ ဇလိတာနုဘာဝေါ၊ ဝဏ္ဏော စ တေ သဗ္ဗဒိသာ ပဘာသတီ’’တိ။
၁၁၁၆.
သော ဒေဝပုတ္တော အတ္တမနော။ပေ.။ ယဿ ကမ္မဿိဒံ ဖလံ။
၁၁၁၇.
‘‘အဟံ မနုဿေသု မနုဿဘူတော၊ ဒလိဒ္ဒေါ အတာဏော ကပဏော ကမ္မကရော အဟောသိံ။
ဇိဏ္ဏေ စ မာတာပိတရော အဘာရိံ [အဘရိံ (သီ. သျာ.)]၊ ပိယာ စ မေ သီလဝန္တော အဟေသုံ။
အန္နဉ္စ ပါနဉ္စ ပသန္နစိတ္တော၊ သက္ကစ္စ ဒါနံ ဝိပုလံ အဒါသိ။
၁၁၁၈.
‘‘တေန မေတာဒိသော ဝဏ္ဏော။ပေ.။ ဝဏ္ဏော စ မေ သဗ္ဗဒိသာ ပဘာသတီ’’တိ။
စိတ္တလတာဝိမာနံ ပဌမံ။
၂. နန္ဒနဝိမာနဝတ္ထု
၁၁၂၀.
‘‘ယထာ ဝနံ နန္ဒနံ [နန္ဒနံ စိတ္တလတံ (သီ. သျာ. က.)၊ နန္ဒဝနံ (က.)] ပဘာသတိ၊ ဥယျာနသေဋ္ဌံ တိဒသာနမုတ္တမံ။
တထူပမံ တုယှမိဒံ ဝိမာနံ၊ ဩဘာသယံ တိဋ္ဌတိ အန္တလိက္ခေ။
၁၁၂၁.
‘‘ဒေဝိဒ္ဓိပတ္တောသိ မဟာနုဘာဝေါ၊ မနုဿဘူတော ကိမကာသိ ပုညံ။
ကေနာသိ ဧဝံ ဇလိတာနုဘာဝေါ၊ ဝဏ္ဏော စ တေ သဗ္ဗဒိသာ ပဘာသတီ’’တိ။
၁၁၂၂.
သော ဒေဝပုတ္တော အတ္တမနော။ပေ.။ ယဿ ကမ္မဿိဒံ ဖလံ။
၁၁၂၃.
‘‘အဟံ မနုဿေသု မနုဿဘူတော၊ ဒလိဒ္ဒေါ အတာဏော ကပဏော ကမ္မကရော အဟောသိံ။
ဇိဏ္ဏေ စ မာတာပိတရော အဘာရိံ၊ ပိယာ စ မေ သီလဝန္တော အဟေသုံ။
အန္နဉ္စ ပါနဉ္စ ပသန္နစိတ္တော၊ သက္ကစ္စ ဒါနံ ဝိပုလံ အဒါသိံ။
၁၁၂၄.
‘‘တေန မေတာဒိသော ဝဏ္ဏော။ပေ.။ ဝဏ္ဏော စ မေ သဗ္ဗဒိသာ ပဘာသတီ’’တိ။
နန္ဒနဝိမာနံ ဒုတိယံ။
၃. မဏိထူဏဝိမာနဝတ္ထု
၁၁၂၆.
‘‘ဥစ္စမိဒံ မဏိထူဏံ ဝိမာနံ၊ သမန္တတော ဒွါဒသ ယောဇနာနိ။
ကူဋာဂါရာ သတ္တသတာ ဥဠာရာ၊ ဝေဠုရိယထမ္ဘာ ရုစကတ္ထတာ သုဘာ။
၁၁၂၇.
‘‘တတ္ထစ္ဆသိ ပိဝသိ ခါဒသိ စ၊ ဒိဗ္ဗာ စ ဝီဏာ ပဝဒန္တိ ဝဂ္ဂုံ။
ဒိဗ္ဗာ ရသာ ကာမဂုဏေတ္ထ ပဉ္စ၊ နာရိယော စ နစ္စန္တိ သုဝဏ္ဏဆန္နာ။
၁၁၂၈.
‘‘ကေန တေတာဒိသော ဝဏ္ဏော။ပေ.။ဝဏ္ဏော စ တေ သဗ္ဗဒိသာ ပဘာသတီ’’တိ။
၁၁၃၀.
သော ဒေဝပုတ္တော အတ္တမနော။ပေ.။ယဿ ကမ္မဿိဒံ ဖလံ။
၁၁၃၁.
‘‘အဟံ မနုဿေသု မနုဿဘူတော၊ ဝိဝနေ ပထေ သင်္ကမနံ [စင်္ကမနံ (သီ.)၊ စင်္ကမံ (သျာ.)၊ သမကံ (က. သီ.)] အကာသိံ။
အာရာမရုက္ခာနိ စ ရောပယိဿံ၊ ပိယာ စ မေ သီလဝန္တော အဟေသုံ။
အန္နဉ္စ ပါနဉ္စ ပသန္နစိတ္တော၊ သက္ကစ္စ ဒါနံ ဝိပုလံ အဒါသိံ။
၁၁၃၂.
‘‘တေန မေတာဒိသော ဝဏ္ဏော။ပေ.။ ဝဏ္ဏော စ မေ သဗ္ဗဒိသာ ပဘာသတီ’’တိ။
မဏိထူဏဝိမာနံ တတိယံ။
၄. သုဝဏ္ဏဝိမာနဝတ္ထု
၁၁၃၄.
‘‘သောဝဏ္ဏမယေ ပဗ္ဗတသ္မိံ၊ ဝိမာနံ သဗ္ဗတောပဘံ။
ဟေမဇာလပဋိစ္ဆန္နံ [ဟေမဇာလကပစ္ဆန္နံ (သီ.)]၊ ကိင်္ကိဏိ [ကိင်္ကဏိက (သျာ. က.)၊ ကိင်္ကိဏိက (ဣ.)] ဇာလကပ္ပိတံ။
၁၁၃၅.
‘‘အဋ္ဌံသာ သုကတာ ထမ္ဘာ၊ သဗ္ဗေ ဝေဠုရိယာမယာ။
ဧကမေကာယ အံသိယာ၊ ရတနာ သတ္တ နိမ္မိတာ။
၁၁၃၆.
‘‘ဝေဠုရိယသုဝဏ္ဏဿ၊ ဖလိကာ ရူပိယဿ စ။
မသာရဂလ္လမုတ္တာဟိ၊ လောဟိတင်္ဂမဏီဟိ စ။
၁၁၃၇.
‘‘စိတြာ မနောရမာ ဘူမိ၊ န တတ္ထုဒ္ဓံသတီ ရဇော။
ဂေါပါဏသီဂဏာ ဣတာ၊ ကူဋံ ဓါရေန္တိ နိမ္မိတာ။
၁၁၃၈.
‘‘သောပါဏာနိ စ စတ္တာရိ၊ နိမ္မိတာ စတုရော ဒိသာ။
နာနာရတနဂဗ္ဘေဟိ ၊ အာဒိစ္စောဝ ဝိရောစတိ။
၁၁၃၉.
‘‘ဝေဒိယာ စတဿော တတ္ထ၊ ဝိဘတ္တာ ဘာဂသော မိတာ။
ဒဒ္ဒလ္လမာနာ အာဘန္တိ၊ သမန္တာ စတုရော ဒိသာ။
၁၁၄၀.
‘‘တသ္မိံ ဝိမာနေ ပဝရေ၊ ဒေဝပုတ္တော မဟပ္ပဘော။
အတိရောစသိ ဝဏ္ဏေန၊ ဥဒယန္တောဝ ဘာဏုမာ။
၁၁၄၁.
‘‘ဒါနဿ တေ ဣဒံ ဖလံ၊ အထော သီလဿ ဝါ ပန။
အထော အဉ္ဇလိကမ္မဿ၊ တံ မေ အက္ခာဟိ ပုစ္ဆိတော’’။
၁၁၄၂.
သော ဒေဝပုတ္တော အတ္တမနော။ပေ.။ ယဿ ကမ္မဿိဒံ ဖလံ။
၁၁၄၃.
‘‘အဟံ အန္ဓကဝိန္ဒသ္မိံ၊ ဗုဒ္ဓဿာဒိစ္စဗန္ဓုနော။
ဝိဟာရံ သတ္ထု ကာရေသိံ၊ ပသန္နော သေဟိ ပါဏိဘိ။
၁၁၄၄.
‘‘တတ္ထ ဂန္ဓဉ္စ မာလဉ္စ၊ ပစ္စယဉ္စ [ပစ္စဂ္ဂဉ္စ (သီ.)၊ ပစ္စဂ္ဃဉ္စ (?)] ဝိလေပနံ။
ဝိဟာရံ သတ္ထု အဒါသိံ၊ ဝိပ္ပသန္နေန စေတသာ။
တေန မယှံ ဣဒံ လဒ္ဓံ၊ ဝသံ ဝတ္တေမိ နန္ဒနေ။
၁၁၄၅.
‘‘နန္ဒနေ စ ဝနေ [နန္ဒနေ ပဝနေ (သီ. သျာ.)] ရမ္မေ၊ နာနာဒိဇဂဏာယုတေ။
ရမာမိ နစ္စဂီတေဟိ၊ အစ္ဆရာဟိ ပုရက္ခတော’’တိ။
သုဝဏ္ဏဝိမာနံ စတုတ္ထံ။
၅. အမ္ဗဝိမာနဝတ္ထု
၁၁၄၆.
‘‘ဥစ္စမိဒံ မဏိထူဏံ ဝိမာနံ၊ သမန္တတော ဒွါဒသ ယောဇနာနိ။
ကူဋာဂါရာ သတ္တသတာ ဥဠာရာ၊ ဝေဠုရိယထမ္ဘာ ရုစကတ္ထတာ သုဘာ။
၁၁၄၇.
‘‘တတ္ထစ္ဆသိ ပိဝသိ ခါဒသိ စ၊ ဒိဗ္ဗာ စ ဝီဏာ ပဝဒန္တိ ဝဂ္ဂုံ။
ဒိဗ္ဗာ ရသာ ကာမဂုဏေတ္ထ ပဉ္စ၊ နာရိယော စ နစ္စန္တိ သုဝဏ္ဏဆန္နာ။
၁၁၄၈.
‘‘ကေန တေတာဒိသော ဝဏ္ဏော။ပေ.။ ဝဏ္ဏော စ တေ သဗ္ဗဒိသာ ပဘာသတီ’’တိ။
၁၁၅၀.
သော ဒေဝပုတ္တော အတ္တမနော။ပေ.။ ယဿ ကမ္မဿိဒံ ဖလံ။
၁၁၅၁.
‘‘ဂိမှာနံ ပစ္ဆိမေ မာသေ၊ ပတပန္တေ [ပတာပန္တေ (သျာ.)၊ ပတာပေန္တေ (က.)] ဒိဝင်္ကရေ။
ပရေသံ ဘတကော ပေါသော၊ အမ္ဗာရာမမသိဉ္စတိ။
၁၁၅၂.
‘‘အထ တေနာဂမာ ဘိက္ခု၊ သာရိပုတ္တောတိ ဝိဿုတော။
ကိလန္တရူပေါ ကာယေန၊ အကိလန္တောဝ စေတသာ။
၁၁၅၃.
‘‘တဉ္စ ဒိသွာန အာယန္တံ၊ အဝေါစံ အမ္ဗသိဉ္စကော။
သာဓု တံ [သာဓုကံ (က.)] ဘန္တေ နှာပေယျံ၊ ယံ မမဿ သုခါဝဟံ။
၁၁၅၄.
‘‘တဿ မေ အနုကမ္ပာယ၊ နိက္ခိပိ ပတ္တစီဝရံ။
နိသီဒိ ရုက္ခမူလသ္မိံ၊ ဆာယာယ ဧကစီဝရော။
၁၁၅၅.
‘‘တဉ္စ အစ္ဆေန ဝါရိနာ၊ ပသန္နမာနသော နရော။
နှာပယီ ရုက္ခမူလသ္မိံ၊ ဆာယာယ ဧကစီဝရံ။
၁၁၅၆.
‘‘အမ္ဗော စ သိတ္တော သမဏော စ နှာပိတော၊ မယာ စ ပုညံ ပသုတံ အနပ္ပကံ။
ဣတိ သော ဣတိယာ ကာယံ၊ သဗ္ဗံ ဖရတိ အတ္တနော။
၁၁၅၇.
‘‘တဒေဝ ဧတ္တကံ ကမ္မံ၊ အကာသိံ တာယ ဇာတိယာ။
ပဟာယ မာနုသံ ဒေဟံ၊ ဥပပန္နောမှိ နန္ဒနံ။
၁၁၅၈.
‘‘နန္ဒနေ စ ဝနေ ရမ္မေ၊ နာနာဒိဇဂဏာယုတေ။
ရမာမိ နစ္စဂီတေဟိ၊ အစ္ဆရာဟိ ပုရက္ခတော’’တိ။
အမ္ဗဝိမာနံ ပဉ္စမံ။
၆. ဂေါပါလဝိမာနဝတ္ထု
၁၁၅၉.
‘‘ဒိသွာန ဒေဝံ ပဋိပုစ္ဆိ ဘိက္ခု၊ ဥစ္စေ ဝိမာနမှိ စိရဋ္ဌိတိကေ။
အာမုတ္တဟတ္ထာဘရဏံ ယသသ္သိံ [အာမုတ္တဟတ္ထာဘရဏော ယသဿီ (သျာ. ဣ. က.)]၊ ဒိဗ္ဗေ ဝိမာနမှိ ယထာပိ စန္ဒိမာ။
၁၁၆၀.
‘‘အလင်္ကတော မလ္ယဓရော [မာလဘာရီ (သီ.)၊ မာလဓရီ (က.)] သုဝတ္ထော၊ သုကုဏ္ဍလီ ကပ္ပိတကေသမဿု။
အာမုတ္တဟတ္ထာဘရဏော ယသဿီ၊ ဒိဗ္ဗေ ဝိမာနမှိ ယထာပိ စန္ဒိမာ။
၁၁၆၁.
‘‘ဒိဗ္ဗာ စ ဝီဏာ ပဝဒန္တိ ဝဂ္ဂုံ၊ အဋ္ဌဋ္ဌကာ သိက္ခိတာ သာဓုရူပါ။
ဒိဗ္ဗာ စ ကညာ တိဒသစရာ ဥဠာရာ၊ နစ္စန္တိ ဂါယန္တိ ပမောဒယန္တိ။
၁၁၆၂.
‘‘ဒေဝိဒ္ဓိပတ္တောသိ မဟာနုဘာဝေါ၊ မနုဿဘူတော ကိမကာသိ ပုညံ။
ကေနာသိ ဧဝံ ဇလိတာနုဘာဝေါ၊ ဝဏ္ဏော စ တေ သဗ္ဗဒိသာ ပဘာသတီ’’တိ။
၁၁၆၃.
သော ဒေဝပုတ္တော အတ္တမနော။ပေ.။ ယဿ ကမ္မဿိဒံ ဖလံ။
၁၁၆၄.
‘‘အဟံ မနုဿေသု မနုဿဘူတော၊ သင်္ဂမ္မ ရက္ခိဿံ ပရေသံ ဓေနုယော။
တတော စ အာဂါ သမဏော မမန္တိကေ ဂါဝေါ စ မာသေ အဂမံသု ခါဒိတုံ။
၁၁၆၅.
‘‘ဒွယဇ္ဇ ကိစ္စံ ဥဘယဉ္စ ကာရိယံ၊ ဣစ္စေဝဟံ [ဣစ္စေဝံ (က.)] ဘန္တေ တဒါ ဝိစိန္တယိံ။
တတော စ သညံ ပဋိလဒ္ဓယောနိသော၊ ဒဒါမိ ဘန္တေတိ ခိပိံ အနန္တကံ။
၁၁၆၆.
‘‘သော မာသခေတ္တံ တုရိတော အဝါသရိံ၊ ပုရာ အယံ ဘဉ္ဇတိ ယဿိဒံ ဓနံ။
တတော စ ကဏှော ဥရဂေါ မဟာဝိသော၊ အဍံသိ ပါဒေ တုရိတဿ မေ သတော။
၁၁၆၇.
‘‘သွာဟံ အဋ္ဋောမှိ ဒုက္ခေန ဣဠိတော၊ ဘိက္ခု စ တံ သာမံ မုဉ္စိတွာနန္တကံ [မုဉ္စိတ္ဝ နန္တကံ (သီ.)၊ မုဉ္စိတွာ အနန္တကံ (သျာ.)]။
အဟာသိ ကုမ္မာသံ မမာနုကမ္ပယာ [မမာနုကမ္ပိယာ (ဣ. က.)၊ မမာနုကမ္ပာယ (သျာ.)]၊ တတော စုတော ကာလကတောမှိ ဒေဝတာ။
၁၁၆၈.
‘‘တဒေဝ ကမ္မံ ကုသလံ ကတံ မယာ၊ သုခဉ္စ ကမ္မံ အနုဘောမိ အတ္တနာ။
တယာ ဟိ ဘန္တေ အနုကမ္ပိတော ဘုသံ၊ ကတညုတာယ အဘိပါဒယာမိ တံ။
၁၁၆၉.
‘‘သဒေဝကေ လောကေ သမာရကေ စ၊ အညော မုနိ နတ္ထိ တယာနုကမ္ပကော။
တယာ ဟိ ဘန္တေ အနုကမ္ပိတော ဘုသံ၊ ကတညုတာယ အဘိဝါဒယာမိ တံ။
၁၁၇၀.
‘‘ဣမသ္မိံ လောကေ ပရသ္မိံ ဝါ ပန၊ အညော မုနီ နတ္ထိ တယာနုကမ္ပကော။
တယာ ဟိ ဘန္တေ အနုကမ္ပိတော ဘုသံ၊ ကတညုတာယ အဘိဝါဒယာမိ တ’’န္တိ။
ဂေါပါလဝိမာနံ ဆဋ္ဌံ။
၇. ကဏ္ဍကဝိမာနဝတ္ထု
၁၁၇၁.
‘‘ပုဏ္ဏမာသေ ယထာ စန္ဒော၊ နက္ခတ္တပရိဝါရိတော။
သမန္တာ အနုပရိယာတိ၊ တာရကာဓိပတီ သသီ။
၁၁၇၂.
‘‘တထူပမံ ဣဒံ ဗျမ္ဟံ၊ ဒိဗ္ဗံ ဒေဝပုရမှိ စ။
အတိရောစတိ ဝဏ္ဏေန၊ ဥဒယန္တောဝ ရံသိမာ။
၁၁၇၃.
‘‘ဝေဠုရိယသုဝဏ္ဏဿ၊ ဖလိကာ ရူပိယဿ စ။
မသာရဂလ္လမုတ္တာဟိ၊ လောဟိတင်္ဂမဏီဟိ စ။
၁၁၇၄.
‘‘စိတြာ မနောရမာ ဘူမိ၊ ဝေဠူရိယဿ သန္ထတာ။
ကူဋာဂါရာ သုဘာ ရမ္မာ၊ ပါသာဒေါ တေ သုမာပိတော။
၁၁၇၅.
‘‘ရမ္မာ စ တေ ပေါက္ခရဏီ၊ ပုထုလောမနိသေဝိတာ။
အစ္ဆောဒကာ ဝိပ္ပသန္နာ၊ သောဝဏ္ဏဝါလုကသန္ထတာ။
၁၁၇၆.
‘‘နာနာပဒုမသဉ္ဆန္နာ၊ ပုဏ္ဍရီကသမောတတာ [သမောတ္ထတာ (က.)၊ သမောဂတာ (သျာ.)]။
သုရဘိံ သမ္ပဝါယန္တိ၊ မနုညာ မာလုတေရိတာ။
၁၁၇၇.
‘‘တဿာ တေ ဥဘတော ပဿေ၊ ဝနဂုမ္ဗာ သုမာပိတာ။
ဥပေတာ ပုပ္ဖရုက္ခေဟိ၊ ဖလရုက္ခေဟိ စူဘယံ။
၁၁၇၈.
‘‘သောဝဏ္ဏပါဒေ ပလ္လင်္ကေ၊ မုဒုကေ ဂေါဏကတ္ထတေ [စောလသန္ထတေ (သီ.)]။
နိသိန္နံ ဒေဝရာဇံဝ၊ ဥပတိဋ္ဌန္တိ အစ္ဆရာ။
၁၁၇၉.
‘‘သဗ္ဗာဘရဏသဉ္ဆန္နာ၊ နာနာမာလာဝိဘူသိတာ။
ရမေန္တိ တံ မဟိဒ္ဓိကံ၊ ဝသဝတ္တီဝ မောဒသိ။
၁၁၈၀.
‘‘ဘေရိသင်္ခမုဒိင်္ဂါဟိ၊ ဝီဏာဟိ ပဏဝေဟိ စ။
ရမသိ ရတိသမ္ပန္နော၊ နစ္စဂီတေ သုဝါဒိတေ။
၁၁၈၁.
‘‘ဒိဗ္ဗာ တေ ဝိဝိဓါ ရူပါ၊ ဒိဗ္ဗာ သဒ္ဒါ အထော ရသာ။
ဂန္ဓာ စ တေ အဓိပ္ပေတာ၊ ဖောဋ္ဌဗ္ဗာ စ မနောရမာ။
၁၁၈၂.
‘‘တသ္မိံ ဝိမာနေ ပဝရေ၊ ဒေဝပုတ္တ မဟပ္ပဘော။
အတိရောစသိ ဝဏ္ဏေန၊ ဥဒယန္တောဝ ဘာဏုမာ။
၁၁၈၃.
‘‘ဒါနဿ တေ ဣဒံ ဖလံ၊ အထော သီလဿ ဝါ ပန။
အထော အဉ္ဇလိကမ္မဿ၊ တံ မေ အက္ခာဟိ ပုစ္ဆိတော’’။
၁၁၈၄.
သော ဒေဝပုတ္တော အတ္တမနော။ပေ.။ ယဿ ကမ္မဿိဒံ ဖလံ။
၁၁၈၅.
‘‘အဟံ ကပိလဝတ္ထုသ္မိံ၊ သာကိယာနံ ပုရုတ္တမေ။
သုဒ္ဓေါဒနဿ ပုတ္တဿ၊ ကဏ္ဍကော သဟဇော အဟံ။
၁၁၈၆.
‘‘ယဒါ သော အဍ္ဎရတ္တာယံ၊ ဗောဓါယ မဘိနိက္ခမိ။
သော မံ မုဒူဟိ ပါဏီဟိ၊ ဇာလိ [ဇာလ (သီ.)] တမ္ဗနခေဟိ စ။
၁၁၈၇.
‘‘သတ္ထိံ အာကောဋယိတွာန၊ ဝဟ သမ္မာတိ စဗြဝိ။
အဟံ လောကံ တာရယိဿံ၊ ပတ္တော သမ္ဗောဓိမုတ္တမံ။
၁၁၈၈.
‘‘တံ မေ ဂိရံ သုဏန္တဿ၊ ဟာသော မေ ဝိပုလော အဟု။
ဥဒဂ္ဂစိတ္တော သုမနော၊ အဘိသီသိံ [အဘိသိံသိံ (သီ.)၊ အဘိသီသိ (ဣ.)] တဒါ အဟံ။
၁၁၈၉.
‘‘အဘိရူဠှဉ္စ မံ ဉတွာ၊ သကျပုတ္တံ မဟာယသံ။
ဥဒဂ္ဂစိတ္တော မုဒိတော၊ ဝဟိဿံ ပုရိသုတ္တမံ။
၁၁၉၀.
‘‘ပရေသံ ဝိဇိတံ ဂန္တွာ၊ ဥဂ္ဂတသ္မိံ ဒိဝါကရေ [ဒိဝင်္ကရေ (သျာ. က.)]။
မမံ ဆန္နဉ္စ ဩဟာယ၊ အနပေက္ခော သော အပက္ကမိ။
၁၁၉၁.
‘‘တဿ တမ္ဗနခေ ပါဒေ၊ ဇိဝှာယ ပရိလေဟိသံ။
ဂစ္ဆန္တဉ္စ မဟာဝီရံ၊ ရုဒမာနော ဥဒိက္ခိသံ။
၁၁၉၂.
‘‘အဒဿနေနဟံ တဿ၊ သကျပုတ္တဿ သိရီမတော။
အလတ္ထံ ဂရုကာဗာဓံ၊ ခိပ္ပံ မေ မရဏံ အဟု။
၁၁၉၃.
‘‘တဿေဝ အာနုဘာဝေန၊ ဝိမာနံ အာဝသာမိဒံ။
သဗ္ဗကာမဂုဏောပေတံ ၊ ဒိဗ္ဗံ ဒေဝပုရမှိ စ။
၁၁၉၄.
‘‘ယဉ္စ မေ အဟုဝါ ဟာသော၊ သဒ္ဒံ သုတွာန ဗောဓိယာ။
တေနေဝ ကုသလမူလေန၊ ဖုသိဿံ အာသဝက္ခယံ။
၁၁၉၅.
‘‘သစေ ဟိ ဘန္တေ ဂစ္ဆေယျာသိ၊ သတ္ထု ဗုဒ္ဓဿ သန္တိကေ။
မမာပိ နံ ဝစနေန၊ သိရသာ ဝဇ္ဇာသိ ဝန္ဒနံ။
၁၁၉၆.
‘‘အဟမ္ပိ ဒဋ္ဌုံ ဂစ္ဆိဿံ၊ ဇိနံ အပ္ပဋိပုဂ္ဂလံ။
ဒုလ္လဘံ ဒဿနံ ဟောတိ၊ လောကနာထာန တာဒိန’’န္တိ။
၁၁၉၇.
သော ကတညူ ကတဝေဒီ၊ သတ္ထာရံ ဥပသင်္ကမိ။
သုတွာ ဂိရံ စက္ခုမတော၊ ဓမ္မစက္ခုံ ဝိသောဓယိ။
၁၁၉၈.
ဝိသောဓေတွာ ဒိဋ္ဌိဂတံ၊ ဝိစိကိစ္ဆံ ဝတာနိ စ။
ဝန္ဒိတွာ သတ္ထုနော ပါဒေ၊ တတ္ထေဝန္တရဓါယထာတိ [တတ္ထေဝန္တရဓါယတီတိ (က.)]။
ကဏ္ဍကဝိမာနံ သတ္တမံ။
၈. အနေကဝဏ္ဏဝိမာနဝတ္ထု
၁၁၉၉.
‘‘အနေကဝဏ္ဏံ ဒရသောကနာသနံ၊ ဝိမာနမာရုယှ အနေကစိတ္တံ။
ပရိဝါရိတော အစ္ဆရာသင်္ဂဏေန၊ သုနိမ္မိတော ဘူတပတီဝ မောဒသိ။
၁၂၀၀.
‘‘သမဿမော နတ္ထိ ကုတော ပနုတ္တရော [ဥတ္တရိ (က.)]၊ ယသေန ပုညေန စ ဣဒ္ဓိယာ စ။
သဗ္ဗေ စ ဒေဝါ တိဒသဂဏာ သမေစ္စ၊ တံ တံ နမဿန္တိ သသိံဝ ဒေဝါ။
ဣမာ စ တေ အစ္ဆရာယော သမန္တတော၊ နစ္စန္တိ ဂါယန္တိ ပမောဒယန္တိ။
၁၂၀၁.
‘‘ဒေဝိဒ္ဓိပတ္တောသိ မဟာနုဘာဝေါ၊ မနုဿဘူတော ကိမကာသိ ပုညံ။
ကေနာသိ ဧဝံ ဇလိတာနုဘာဝေါ၊ ဝဏ္ဏော စ တေ သဗ္ဗဒိသာ ပဘာသတီ’’တိ။
၁၂၀၂.
သော ဒေဝပုတ္တော အတ္တမနော။ပေ.။ ယဿ ကမ္မဿိဒံ ဖလံ။
၁၂၀၃.
‘‘အဟံ ဘဒန္တေ အဟုဝါသိ ပုဗ္ဗေ၊ သုမေဓနာမဿ ဇိနဿ သာဝကော။
ပုထုဇ္ဇနော အနနုဗောဓေါဟမသ္မိ [အနဝဗောဓေါဟမသ္မိံ (သီ.)၊ အနနုဗောဓေါဟမာသိံ (?)]၊ သော သတ္တ ဝဿာနိ ပရိဗ္ဗဇိဿဟံ [ပဗ္ဗဇိဿဟံ (သျာ. က.)၊ ပဗ္ဗဇိသာဟံ (ဣ.)]။
၁၂၀၄.
‘‘သောဟံ သုမေဓဿ ဇိနဿ သတ္ထုနော၊ ပရိနိဗ္ဗုတဿောဃတိဏ္ဏဿ တာဒိနော။
ရတနုစ္စယံ ဟေမဇာလေန ဆန္နံ၊ ဝန္ဒိတွာ ထူပသ္မိံ မနံ ပသာဒယိံ။
၁၂၀၅.
‘‘န မာသိ ဒါနံ န စ မတ္ထိ ဒါတုံ၊ ပရေ စ ခေါ တတ္ထ သမာဒပေသိံ။
ပူဇေထ နံ ပူဇနီယဿ [ပူဇနေယျဿ (သျာ. က.)] ဓါတုံ၊ ဧဝံ ကိရ သဂ္ဂမိတော ဂမိဿထ။
၁၂၀၆.
‘‘တဒေဝ ကမ္မံ ကုသလံ ကတံ မယာ၊ သုခဉ္စ ဒိဗ္ဗံ အနုဘောမိ အတ္တနာ။
မောဒါမဟံ တိဒသဂဏဿ မဇ္ဈေ၊ န တဿ ပုညဿ ခယမ္ပိ အဇ္ဈဂ’’န္တိ။
အနေကဝဏ္ဏဝိမာနံ အဋ္ဌမံ။
၉. မဋ္ဌကုဏ္ဍလီဝိမာနဝတ္ထု
၁၂၀၇.
[ပေ. ဝ. ၁၈၆] ‘‘အလင်္ကတော မဋ္ဌကုဏ္ဍလီ [မဋ္ဋကုဏ္ဍလီ (သီ.)]၊ မာလဓါရီ ဟရိစန္ဒနုဿဒေါ။
ဗာဟာ ပဂ္ဂယှ ကန္ဒသိ၊ ဝနမဇ္ဈေ ကိံ ဒုက္ခိတော တုဝ’’န္တိ။
၁၂၀၈.
‘‘သောဝဏ္ဏမယော ပဘဿရော၊ ဥပ္ပန္နော ရထပဉ္ဇရော မမ။
တဿ စက္ကယုဂံ န ဝိန္ဒာမိ၊ တေန ဒုက္ခေန ဇဟာမိ [ဇဟိဿံ (သီ.)၊ ဇဟိဿာမိ (သျာ. ဣ.)] ဇီဝိတ’’န္တိ။
၁၂၀၉.
‘‘သောဝဏ္ဏမယံ မဏိမယံ၊ လောဟိတကမယံ [လောဟိတင်္ဂမယံ (သျာ.)၊ လောဟိတင်္ကမယံ (သီ.)၊ လောဟမယံ (ကတ္ထစိ)] အထ ရူပိယမယံ။
အာစိက္ခ [အာစိက္ခထ (က.)] မေ ဘဒ္ဒမာဏဝ၊ စက္ကယုဂံ ပဋိပါဒယာမိ တေ’’တိ။
၁၂၁၀.
သော မာဏဝေါ တဿ ပါဝဒိ၊ ‘‘စန္ဒိမသူရိယာ ဥဘယေတ္ထ ဒိဿရေ။
သောဝဏ္ဏမယော ရထော မမ၊ တေန စက္ကယုဂေန သောဘတီ’’တိ။
၁၂၁၁.
‘‘ဗာလော ခေါ တွံ အသိ မာဏဝ၊ ယော တွံ ပတ္ထယသေ အပတ္ထိယံ။
မညာမိ တုဝံ မရိဿသိ၊ န ဟိ တွံ လစ္ဆသိ စန္ဒိမသူရိယေ’’တိ။
၁၂၁၂.
‘‘ဂမနာဂမနမ္ပိ ဒိဿတိ၊ ဝဏ္ဏဓါတု ဥဘယတ္ထ ဝီထိယာ။
ပေတော [ပေတော ပန (သီ. သျာ.)] ကာလကတော န ဒိဿတိ၊ ကော နိဓ ကန္ဒတံ ဗာလ္ယတရော’’တိ။
၁၂၁၃.
‘‘သစ္စံ ခေါ ဝဒေသိ မာဏဝ၊ အဟမေဝ ကန္ဒတံ ဗာလ္ယတရော။
စန္ဒံ ဝိယ ဒါရကော ရုဒံ၊ ပေတံ ကာလကတာဘိပတ္ထယိ’’န္တိ။
၁၂၁၄.
‘‘အာဒိတ္တံ ဝတ မံ သန္တံ၊ ဃတသိတ္တံဝ ပါဝကံ။
ဝါရိနာ ဝိယ ဩသိဉ္စံ၊ သဗ္ဗံ နိဗ္ဗာပယေ ဒရံ။
၁၂၁၅.
‘‘အဗ္ဗဟီ [အဗ္ဗူဠှ (ဣ.)၊ အဗ္ဗူဠှံ (သျာ. က.)] ဝတ မေ သလ္လံ၊ သောကံ ဟဒယနိဿိတံ။
ယော မေ သောကပရေတဿ၊ ပုတ္တသောကံ အပါနုဒိ။
၁၂၁၆.
‘‘သွာဟံ အဗ္ဗူဠှသလ္လောသ္မိ၊ သီတိဘူတောသ္မိ နိဗ္ဗုတော။
န သောစာမိ န ရောဒါမိ၊ ဝတ သုတွာန မာဏဝါတိ။
၁၂၁၇.
‘‘ဒေဝတာ နုသိ ဂန္ဓဗ္ဗော၊ အဒု [အာဒု (သီ. သျာ.)] သက္ကော ပုရိန္ဒဒေါ။
ကော ဝါ တွံ ကဿ ဝါ ပုတ္တော၊ ကထံ ဇာနေမု တံ မယ’’န္တိ။
၁၂၁၈.
‘‘ယဉ္စ [ယံ (က.)] ကန္ဒသိ ယဉ္စ ရောဒသိ၊ ပုတ္တံ အာဠာဟနေ သယံ ဒဟိတွာ။
သွာဟံ ကုသလံ ကရိတွာ ကမ္မံ၊ တိဒသာနံ သဟဗျတံ ဂတော’’တိ [ပတ္တောတိ (သီ. သျာ. ဣ.)]။
၁၂၁၉.
‘‘အပ္ပံ ဝါ ဗဟုံ ဝါ နာဒ္ဒသာမ၊ ဒါနံ ဒဒန္တဿ သကေ အဂါရေ။
ဥပေါသထကမ္မံ ဝါ [ဥပေါသထကမ္မဉ္စ (က.)] တာဒိသံ၊ ကေန ကမ္မေန ဂတောသိ ဒေဝလောက’’န္တိ။
၁၂၂၀.
‘‘အာဗာဓိကောဟံ ဒုက္ခိတော ဂိလာနော၊ အာတုရရူပေါမှိ သကေ နိဝေသနေ။
ဗုဒ္ဓံ ဝိဂတရဇံ ဝိတိဏ္ဏကင်္ခံ၊ အဒ္ဒက္ခိံ သုဂတံ အနောမပညံ။
၁၂၂၁ .
‘‘သွာဟံ မုဒိတမနော ပသန္နစိတ္တော၊ အဉ္ဇလိံ အကရိံ တထာဂတဿ။
တာဟံ ကုသလံ ကရိတွာန ကမ္မံ၊ တိဒသာနံ သဟဗျတံ ဂတော’’တိ။
၁၂၂၂.
‘‘အစ္ဆရိယံ ဝတ အဗ္ဘုတံ ဝတ၊ အဉ္ဇလိကမ္မဿ အယမီဒိသော ဝိပါကော။
အဟမ္ပိ မုဒိတမနော ပသန္နစိတ္တော၊ အဇ္ဇေဝ ဗုဒ္ဓံ သရဏံ ဝဇာမီ’’တိ။
၁၂၂၃.
‘‘အဇ္ဇေဝ ဗုဒ္ဓံ သရဏံ ဝဇာဟိ၊ ဓမ္မဉ္စ သံဃဉ္စ ပသန္နစိတ္တော။
တထေဝ သိက္ခာယ ပဒါနိ ပဉ္စ၊ အခဏ္ဍဖုလ္လာနိ သမာဒိယဿု။
၁၂၂၄.
‘‘ပါဏာတိပါတာ ဝိရမဿု ခိပ္ပံ၊ လောကေ အဒိန္နံ ပရိဝဇ္ဇယဿု။
အမဇ္ဇပေါ မာ စ မုသာ ဘဏာဟိ၊ သကေန ဒါရေန စ ဟောဟိ တုဋ္ဌော’’တိ။
၁၂၂၅.
‘‘အတ္ထကာမောသိ မေ ယက္ခ၊ ဟိတကာမောသိ ဒေဝတေ။
ကရောမိ တုယှံ ဝစနံ၊ တွံသိ အာစရိယော မမာတိ။
၁၂၂၆.
‘‘ဥပေမိ သရဏံ ဗုဒ္ဓံ၊ ဓမ္မဉ္စာပိ အနုတ္တရံ။
သံဃဉ္စ နရဒေဝဿ၊ ဂစ္ဆာမိ သရဏံ အဟံ။
၁၂၂၇.
‘‘ပါဏာတိပါတာ ဝိရမာမိ ခိပ္ပံ၊ လောကေ အဒိန္နံ ပရိဝဇ္ဇယာမိ။
အမဇ္ဇပေါ နော စ မုသာ ဘဏာမိ၊ သကေန ဒါရေန စ ဟောမိ တုဋ္ဌော’’တိ။
မဋ္ဌကုဏ္ဍလီဝိမာနံ နဝမံ။
၁၀. သေရီသကဝိမာနဝတ္ထု
၁၂၂၈.
[ပေ. ဝ. ၆၀၄] သုဏောထ ယက္ခဿ စ ဝါဏိဇာန စ၊ သမာဂမော ယတ္ထ တဒါ အဟောသိ။
ယထာ ကထံ ဣတရိတရေန စာပိ၊ သုဘာသိတံ တဉ္စ သုဏာထ သဗ္ဗေ။
၁၂၂၉.
‘‘ယော သော အဟု ရာဇာ ပါယာသိ နာမ [နာမော (သီ.)]၊ ဘုမ္မာနံ သဟဗျဂတော ယသဿီ။
သော မောဒမာနောဝ သကေ ဝိမာနေ၊ အမာနုသော မာနုသေ အဇ္ဈဘာသီတိ။
၁၂၃၀.
‘‘ဝင်္ကေ အရညေ အမနုဿဋ္ဌာနေ၊ ကန္တာရေ အပ္ပောဒကေ အပ္ပဘက္ခေ။
သုဒုဂ္ဂမေ ဝဏ္ဏုပထဿ မဇ္ဈေ၊ ဝင်္ကံ ဘယာ [ဓင်္ကံဘယာ (က.)] နဋ္ဌမနာ မနုဿာ။
၁၂၃၁.
‘‘နယိဓ ဖလာ မူလမယာ စ သန္တိ၊ ဥပါဒါနံ နတ္ထိ ကုတောဓ ဘက္ခော။
အညတြ ပံသူဟိ စ ဝါလုကာဟိ စ၊ တတာဟိ ဥဏှာဟိ စ ဒါရုဏာဟိ စ။
၁၂၃၂.
‘‘ဥဇ္ဇင်္ဂလံ တတ္တမိဝံ ကပါလံ၊ အနာယသံ ပရလောကေန တုလ္ယံ။
လုဒ္ဒါနမာဝါသမိဒံ ပုရာဏံ၊ ဘူမိပ္ပဒေသော အဘိသတ္တရူပေါ။
၁၂၃၃.
‘‘အထ တုမှေ ကေန [ကေန နု (သျာ. က.)] ဝဏ္ဏေန၊ ကိမာသမာနာ ဣမံ ပဒေသံ ဟိ။
အနုပဝိဋ္ဌာ သဟသာ သမေစ္စ၊ လောဘာ ဘယာ အထ ဝါ သမ္ပမူဠှာ’’တိ။
၁၂၃၄.
‘‘မဂဓေသု အင်္ဂေသု စ သတ္ထဝါဟာ၊ အာရောပယိတွာ ပဏိယံ ပုထုတ္တံ။
တေ ယာမသေ သိန္ဓုသောဝီရဘူမိံ၊ ဓနတ္ထိကာ ဥဒ္ဒယံ ပတ္ထယာနာ။
၁၂၃၅.
‘‘ဒိဝါ ပိပါသံ နဓိဝါသယန္တာ၊ ယောဂ္ဂါနုကမ္ပဉ္စ သမေက္ခမာနာ၊
ဧတေန ဝေဂေန အာယာမ သဗ္ဗေ [သဗ္ဗေ တေ (က.)]၊ ရတ္တိံ မဂ္ဂံ ပဋိပန္နာ ဝိကာလေ။
၁၂၃၆.
‘‘တေ ဒုပ္ပယာတာ အပရဒ္ဓမဂ္ဂါ၊ အန္ဓာကုလာ ဝိပ္ပနဋ္ဌာ အရညေ။
သုဒုဂ္ဂမေ ဝဏ္ဏုပထဿ မဇ္ဈေ၊ ဒိသံ န ဇာနာမ ပမူဠှစိတ္တာ။
၁၂၃၇.
‘‘ဣဒဉ္စ ဒိသွာန အဒိဋ္ဌပုဗ္ဗံ၊ ဝိမာနသေဋ္ဌဉ္စ တဝဉ္စ ယက္ခ။
တတုတ္တရိံ ဇီဝိတမာသမာနာ၊ ဒိသွာ ပတီတာ သုမနာ ဥဒဂ္ဂါ’’တိ။
၁၂၃၈.
‘‘ပါရံ သမုဒ္ဒဿ ဣမဉ္စ ဝဏ္ဏုံ [ဝနံ (သျာ.)၊ ဝဏ္ဏံ (က.)]၊ ဝေတ္တာစရံ [ဝေတ္တံ ပရံ (သျာ.)၊ ဝေတ္တာစာရံ (က.)] သင္ကုပထဉ္စ မဂ္ဂံ။
နဒိယော ပန ပဗ္ဗတာနဉ္စ ဒုဂ္ဂါ၊ ပုထုဒ္ဒိသာ ဂစ္ဆထ ဘောဂဟေတု။
၁၂၃၉.
‘‘ပက္ခန္ဒိယာန ဝိဇိတံ ပရေသံ၊ ဝေရဇ္ဇကေ မာနုသေ ပေက္ခမာနာ။
ယံ ဝေါ သုတံ ဝါ အထ ဝါပိ ဒိဋ္ဌံ၊ အစ္ဆေရကံ တံ ဝေါ သုဏောမ တာတာ’’တိ။
၁၂၄၀.
‘‘ဣတောပိ အစ္ဆေရတရံ ကုမာရ၊ န တော သုတံ ဝါ အထ ဝါပိ ဒိဋ္ဌံ။
အတီတမာနုဿကမေဝ သဗ္ဗံ၊ ဒိသွာန တပ္ပါမ အနောမဝဏ္ဏံ။
၁၂၄၁.
‘‘ဝေဟာယသံ ပေါက္ခရညော သဝန္တိ၊ ပဟူတမလျာ [ပဟူတမာလျာ (သျာ.)] ဗဟုပုဏ္ဍရီကာ။
ဒုမာ စိမေ [ဒုမာ စ တေ (သျာ. က.)] နိစ္စဖလူပပန္နာ၊ အတီဝ ဂန္ဓာ သုရဘိံ ပဝါယန္တိ။
၁၂၄၂.
‘‘ဝေဠူရိယထမ္ဘာ သတမုဿိတာသေ၊ သိလာပဝါဠဿ စ အာယတံသာ။
မသာရဂလ္လာ သဟလောဟိတင်္ဂါ၊ ထမ္ဘာ ဣမေ ဇောတိရသာမယာသေ။
၁၂၄၃.
‘‘သဟဿထမ္ဘံ အတုလာနုဘာဝံ၊ တေသူပရိ သာဓုမိဒံ ဝိမာနံ။
ရတနန္တရံ ကဉ္စနဝေဒိမိဿံ၊ တပနီယပဋ္ဋေဟိ စ သာဓုဆန္နံ။
၁၂၄၄.
‘‘ဇမ္ဗောနဒုတ္တတ္တမိဒံ သုမဋ္ဌော၊ ပါသာဒသောပါဏဖလူပပန္နော။
ဒဠ္ဟော စ ဝဂ္ဂု စ သုသင်္ဂတော စ [ဝဂ္ဂု သုမုခေါ သုသင်္ဂတော (သီ.)]၊ အတီဝ နိဇ္ဈာနခမော မနုညော။
၁၂၄၅.
‘‘ရတနန္တရသ္မိံ ဗဟုအန္နပါနံ၊ ပရိဝါရိတော အစ္ဆရာသင်္ဂဏေန။
မုရဇအာလမ္ဗရတူရိယဃုဋ္ဌော၊ အဘိဝန္ဒိတောသိ ထုတိဝန္ဒနာယ။
၁၂၄၆.
‘‘သော မောဒသိ နာရိဂဏပ္ပဗောဓနော၊ ဝိမာနပါသာဒဝရေ မနောရမေ။
အစိန္တိယော သဗ္ဗဂုဏူပပန္နော၊ ရာဇာ ယထာ ဝေဿဝဏော နဠိန္ယာ [နဠိညံ (က.)]။
၁၂၄၇.
‘‘ဒေဝေါ နု အာသိ ဥဒဝါသိ ယက္ခော၊ ဥဒါဟု ဒေဝိန္ဒော မနုဿဘူတော။
ပုစ္ဆန္တိ တံ ဝါဏိဇာ သတ္ထဝါဟာ၊ အာစိက္ခ ကော နာမ တုဝံသိ ယက္ခော’’တိ။
၁၂၄၈.
‘‘သေရီသကော [သေရိဿကော (သီ. သျာ.)] နာမ အဟမှိ ယက္ခော၊ ကန္တာရိယော ဝဏ္ဏုပထမှိ ဂုတ္တော။
ဣမံ ပဒေသံ အဘိပါလယာမိ၊ ဝစနကရော ဝေဿဝဏဿ ရညော’’တိ။
၁၂၄၉.
‘‘အဓိစ္စလဒ္ဓံ ပရိဏာမဇံ တေ၊ သယံ ကတံ ဥဒါဟု ဒေဝေဟိ ဒိန္နံ။
ပုစ္ဆန္တိ တံ ဝါဏိဇာ သတ္ထဝါဟာ၊ ကထံ တယာ လဒ္ဓမိဒံ မနုည’’န္တိ။
၁၂၅၀.
‘‘နာဓိစ္စလဒ္ဓံ န ပရိဏာမဇံ မေ၊ န သယံ ကတံ န ဟိ ဒေဝေဟိ ဒိန္နံ။
သကေဟိ ကမ္မေဟိ အပါပကေဟိ၊ ပုညေဟိ မေ လဒ္ဓမိဒံ မနုည’’န္တိ။
၁၂၅၁.
‘‘ကိံ တေ ဝတံ ကိံ ပန ဗြဟ္မစရိယံ၊ ကိဿ သုစိဏ္ဏဿ အယံ ဝိပါကော။
ပုစ္ဆန္တိ တံ ဝါဏိဇာ သတ္ထဝါဟာ၊ ကထံ တယာ လဒ္ဓမိဒံ ဝိမာန’’န္တိ။
၁၂၅၂.
‘‘မမံ ပါယာသီတိ အဟု သမညာ၊ ရဇ္ဇံ ယဒါ ကာရယိံ ကောသလာနံ။
နတ္ထိကဒိဋ္ဌိ ကဒရိယော ပါပဓမ္မော၊ ဥစ္ဆေဒဝါဒီ စ တဒါ အဟောသိံ။
၁၂၅၃.
‘‘သမဏော စ ခေါ အာသိ ကုမာရကဿပေါ၊ ဗဟုဿုတော စိတ္တကထီ ဥဠာရော။
သော မေ တဒါ ဓမ္မကထံ အဘာသိ [အကာသိ (သီ.)]၊ ဒိဋ္ဌိဝိသူကာနိ ဝိနောဒယီ မေ။
၁၂၅၄.
‘‘တာဟံ တဿ [တာဟံ (က.)] ဓမ္မကထံ သုဏိတွာ၊ ဥပါသကတ္တံ ပဋိဝေဒယိဿံ။
ပါဏာတိပါတာ ဝိရတော အဟောသိံ၊ လောကေ အဒိန္နံ ပရိဝဇ္ဇယိဿံ။
အမဇ္ဇပေါ နော စ မုသာ အဘာဏိံ၊ သကေန ဒါရေန စ အဟောသိ တုဋ္ဌော။
၁၂၅၅.
‘‘တံ မေ ဝတံ တံ ပန ဗြဟ္မစရိယံ၊ တဿ သုစိဏ္ဏဿ အယံ ဝိပါကော။
တေဟေဝ ကမ္မေဟိ အပါပကေဟိ၊ ပုညေဟိ မေ လဒ္ဓမိဒံ ဝိမာန’’န္တိ။
၁၂၅၆.
‘‘သစ္စံ ကိရာဟံသု နရာ သပညာ၊ အနညထာ ဝစနံ ပဏ္ဍိတာနံ။
ယဟိံ ယဟိံ ဂစ္ဆတိ ပုညကမ္မော၊ တဟိံ တဟိံ မောဒတိ ကာမကာမီ။
၁၂၅၇.
‘‘ယဟိံ ယဟိံ သောကပရိဒ္ဒဝေါ စ၊ ဝဓေါ စ ဗန္ဓော စ ပရိက္ကိလေသော။
တဟိံ တဟိံ ဂစ္ဆတိ ပါပကမ္မော၊ န မုစ္စတိ ဒုဂ္ဂတိယာ ကဒါစီ’’တိ။
၁၂၅၈.
‘‘သမ္မူဠှရူပေါဝ ဇနော အဟောသိ၊ အသ္မိံ မုဟုတ္တေ ကလလီကတောဝ။
ဇနဿိမဿ တုယှဉ္စ ကုမာရ၊ အပ္ပစ္စယော ကေန နု ခေါ အဟောသီ’’တိ။
၁၂၅၉.
‘‘ဣမေ စ သိရီသဝနာ [ဣမေ သိရီသူပဝနာ စ (သီ.)၊ ဣမေပိ သိရီသဝနာ စ (ဣ. က.)] တာတာ၊ ဒိဗ္ဗာ [ဒိဗ္ဗာ စ (ဣ. က.)] ဂန္ဓာ သုရဘီ [သုရဘိံ (သီ. က.)] သမ္ပဝန္တိ [သမ္ပဝါယန္တိ (က.)]။
တေ သမ္ပဝါယန္တိ ဣမံ ဝိမာနံ၊ ဒိဝါ စ ရတ္တော စ တမံ နိဟန္တွာ။
၁၂၆၀.
‘‘ဣမေသဉ္စ ခေါ ဝဿသတစ္စယေန၊ သိပါဋိကာ ဖလတိ ဧကမေကာ။
မာနုဿကံ ဝဿသတံ အတီတံ၊ ယဒဂ္ဂေ ကာယမှိ ဣဓူပပန္နော။
၁၂၆၁.
‘‘ဒိသွာနဟံ ဝဿသတာနိ ပဉ္စ၊ အသ္မိံ ဝိမာနေ ဌတွာန တာတာ။
အာယုက္ခယာ ပုညက္ခယာ စဝိဿံ၊ တေနေဝ သောကေန ပမုစ္ဆိတောသ္မီ’’တိ [သမုစ္ဆိတောသ္မီတိ (ဣ. က.)]။
၁၂၆၂.
‘‘ကထံ နု သောစေယျ တထာဝိဓေါ သော၊ လဒ္ဓါ ဝိမာနံ အတုလံ စိရာယ။
ယေ စာပိ ခေါ ဣတ္တရမုပပန္နာ၊ တေ နူန သောစေယျုံ ပရိတ္တပုညာ’’တိ။
၁၂၆၃.
‘‘အနုစ္ဆဝိံ ဩဝဒိယဉ္စ မေ တံ၊ ယံ မံ တုမှေ ပေယျဝါစံ ဝဒေထ။
တုမှေ စ ခေါ တာတာ မယာနုဂုတ္တာ၊ ယေနိစ္ဆကံ တေန ပလေထ သောတ္ထိ’’န္တိ။
၁၂၆၄.
‘‘ဂန္တွာ မယံ သိန္ဓုသောဝီရဘူမိံ၊ ဓနတ္ထိကာ ဥဒ္ဒယံ ပတ္ထယာနာ။
ယထာပယောဂါ ပရိပုဏ္ဏစာဂါ၊ ကာဟာမ သေရီသမဟံ ဥဠာရ’’န္တိ။
၁၂၆၅.
‘‘မာ စေဝ သေရီသမဟံ အကတ္ထ၊ သဗ္ဗဉ္စ ဝေါ ဘဝိဿတိ ယံ ဝဒေထ။
ပါပါနိ ကမ္မာနိ ဝိဝဇ္ဇယာထ၊ ဓမ္မာနုယောဂဉ္စ အဓိဋ္ဌဟာထ။
၁၂၆၆.
‘‘ဥပါသကော အတ္ထိ ဣမမှိ သံဃေ၊ ဗဟုဿုတော သီလဝတူပပန္နော။
သဒ္ဓေါ စ စာဂီ စ သုပေသလော စ၊ ဝိစက္ခဏော သန္တုသိတော မုတီမာ။
၁၂၆၇.
‘‘သဉ္ဇာနမာနော န မုသာ ဘဏေယျ၊ ပရူပဃာတာယ န စေတယေယျ။
ဝေဘူတိကံ ပေသုဏံ နော ကရေယျ၊ သဏှဉ္စ ဝါစံ သခိလံ ဘဏေယျ။
၁၂၆၈.
‘‘သဂါရဝေါ သပ္ပဋိဿော ဝိနီတော၊ အပါပကော အဓိသီလေ ဝိသုဒ္ဓေါ။
သော မာတရံ ပိတရဉ္စာပိ ဇန္တု၊ ဓမ္မေန ပေါသေတိ အရိယဝုတ္တိ။
၁၂၆၉.
‘‘မညေ သော မာတာပိတူနံ ကာရဏာ၊ ဘောဂါနိ ပရိယေသတိ န အတ္တဟေတု။
မာတာပိတူနဉ္စ ယော [သော (?)] အစ္စယေန၊ နေက္ခမ္မပေါဏော စရိဿတိ ဗြဟ္မစရိယံ။
၁၂၇၀.
‘‘ဥဇူ အဝင္ကော အသဌော အမာယော၊ န လေသကပ္ပေန စ ဝေါဟရေယျ။
သော တာဒိသော သုကတကမ္မကာရီ၊ ဓမ္မေ ဌိတော ကိန္တိ လဘေထ ဒုက္ခံ။
၁၂၇၁.
‘‘တံ ကာရဏာ ပါတုကတောမှိ အတ္တနာ၊ တသ္မာ ဓမ္မံ ပဿထ ဝါဏိဇာသေ။
အညတြ တေနိဟ ဘသ္မီ [ဘသ္မိ (သျာ.)၊ ဘသ္မ (က.)] ဘဝေထ၊ အန္ဓာကုလာ ဝိပ္ပနဋ္ဌာ အရညေ။
တံ ခိပ္ပမာနေန လဟုံ ပရေန၊ သုခေါ ဟဝေ သပ္ပုရိသေန သင်္ဂမော’’တိ။
၁၂၇၂.
‘‘ကိံ နာမ သော ကိဉ္စ ကရောတိ ကမ္မံ၊
ကိံ နာမဓေယျံ ကိံ ပန တဿ ဂေါတ္တံ။
မယမ္ပိ နံ ဒဋ္ဌုကာမမှ ယက္ခ၊ ယဿာနုကမ္ပာယ ဣဓါဂတောသိ။
လာဘာ ဟိ တဿ၊ ယဿ တုဝံ ပိဟေသီ’’တိ။
၁၂၇၃.
‘‘ယော ကပ္ပကော သမ္ဘဝနာမဓေယျော၊
ဥပါသကော ကောစ္ဆဖလူပဇီဝီ။
ဇာနာထ နံ တုမှာကံ ပေသိယော သော၊
မာ ခေါ နံ ဟီဠိတ္ထ သုပေသလော သော’’တိ။
၁၂၇၄.
‘‘ဇာနာမသေ ယံ တွံ ပဝဒေသိ [ဝဒေသိ (သီ.)] ယက္ခ၊
န ခေါ နံ ဇာနာမ သ ဧဒိသောတိ။
မယမ္ပိ နံ ပူဇယိဿာမ ယက္ခ၊
သုတွာန တုယှံ ဝစနံ ဥဠာရ’’န္တိ။
၁၂၇၅.
‘‘ယေ ကေစိ ဣမသ္မိံ သတ္ထေ မနုဿာ၊
ဒဟရာ မဟန္တာ အထဝါပိ မဇ္ဈိမာ။
သဗ္ဗေဝ တေ အာလမ္ဗန္တု ဝိမာနံ၊
ပဿန္တု ပုညာနံ ဖလံ ကဒရိယာ’’တိ။
၁၂၇၆.
တေ တတ္ထ သဗ္ဗေဝ ‘အဟံ ပုရေ’တိ၊
တံ ကပ္ပကံ တတ္ထ ပုရက္ခတွာ [ပုရက္ခိပိတွာ (သီ.)]။
သဗ္ဗေဝ တေ အာလမ္ဗိံသု ဝိမာနံ၊
မသက္ကသာရံ ဝိယ ဝါသဝဿ။
၁၂၇၇.
တေ တတ္ထ သဗ္ဗေဝ ‘အဟံ ပုရေ’တိ၊ ဥပါသကတ္တံ ပဋိဝေဒယိံသု။
ပါဏာတိပါတာ ဝိရတာ အဟေသုံ၊ လောကေ အဒိန္နံ ပရိဝဇ္ဇယိံသု။
အမဇ္ဇပါ နော စ မုသာ ဘဏိံသု၊ သကေန ဒါရေန စ အဟေသုံ တုဋ္ဌာ။
၁၂၇၈.
တေ တတ္ထ သဗ္ဗေဝ ‘အဟံ ပုရေ’တိ၊ ဥပါသကတ္တံ ပဋိဝေဒယိတွာ။
ပက္ကာမိ သတ္ထော အနုမောဒမာနော၊ ယက္ခိဒ္ဓိယာ အနုမတော ပုနပ္ပုနံ။
၁၂၇၉.
‘‘ဂန္တွာန တေ သိန္ဓုသောဝီရဘူမိံ၊ ဓနတ္ထိကာ ဥဒ္ဒယံ [ဥဒယ (ဣ. က.)] ပတ္ထယာနာ။
ယထာပယောဂါ ပရိပုဏ္ဏလာဘာ၊ ပစ္စာဂမုံ ပါဋလိပုတ္တမက္ခတံ။
၁၂၈၀.
‘‘ဂန္တွာန တေ သံဃရံ သောတ္ထိဝန္တော၊
ပုတ္တေဟိ ဒါရေဟိ သမင်္ဂိဘူတာ။
အာနန္ဒီ ဝိတ္တာ [အာနန္ဒစိတ္တာ (သျာ.)၊ အာနန္ဒီစိတ္တာ (က.)] သုမနာ ပတီတာ၊
အကံသု သေရီသမဟံ ဥဠာရံ။
သေရီသကံ တေ ပရိဝေဏံ မာပယိံသု။
၁၂၈၁.
ဧတာဒိသာ သပ္ပုရိသာန သေဝနာ၊
မဟတ္ထိကာ ဓမ္မဂုဏာန သေဝနာ။
ဧကဿ အတ္ထာယ ဥပါသကဿ၊
သဗ္ဗေဝ သတ္တာ သုခိတာ [သုခိနော (ဣ. က.)] အဟေသုန္တိ။
သေရီသကဝိမာနံ ဒသမံ။
၁၁. သုနိက္ခိတ္တဝိမာနဝတ္ထု
၁၂၈၂.
‘‘ဥစ္စမိဒံ မဏိထူဏံ ဝိမာနံ၊ သမန္တတော ဒွါဒသ ယောဇနာနိ။
ကူဋာဂါရာ သတ္တသတာ ဥဠာရာ၊ ဝေဠုရိယထမ္ဘာ ရုစကတ္ထတာ သုဘာ။
၁၂၈၃.
‘‘တတ္ထစ္ဆသိ ပိဝသိ ခါဒသိ စ၊ ဒိဗ္ဗာ စ ဝီဏာ ပဝဒန္တိ ဝဂ္ဂုံ။
ဒိဗ္ဗာ ရသာ ကာမဂုဏေတ္ထ ပဉ္စ၊ နာရိယော စ နစ္စန္တိ သုဝဏ္ဏဆန္နာ။
၁၂၈၄.
‘‘ကေန တေတာဒိသော ဝဏ္ဏော၊ ကေန တေ ဣဓ မိဇ္ဈတိ။
ဥပ္ပဇ္ဇန္တိ စ တေ ဘောဂါ၊ ယေ ကေစိ မနသော ပိယာ။
၁၂၈၅.
‘‘ပုစ္ဆာမိ ‘တံ ဒေဝ မဟာနုဘာဝ၊ မနုဿဘူတော ကိမကာသိ ပုညံ။
ကေနာသိ ဧဝံ ဇလိတာနုဘာဝေါ၊ ဝဏ္ဏော စ တေ သဗ္ဗဒိသာ ပဘာသတီ’’တိ။
၁၂၈၆.
သော ဒေဝပုတ္တော အတ္တမနော၊ မောဂ္ဂလ္လာနေန ပုစ္ဆိတော။
ပဉ္ဟံ ပုဋ္ဌော ဝိယာကာသိ၊ ယဿ ကမ္မဿိဒံ ဖလံ။
၁၂၈၇.
‘‘ဒုန္နိက္ခိတ္တံ မာလံ သုနိက္ခိပိတွာ၊ ပတိဋ္ဌပေတွာ သုဂတဿ ထူပေ။
မဟိဒ္ဓိကော စမှိ မဟာနုဘာဝေါ၊ ဒိဗ္ဗေဟိ ကာမေဟိ သမင်္ဂိဘူတော။
၁၂၈၈.
‘‘တေန မေတာဒိသော ဝဏ္ဏော၊
တေန မေ ဣဓ မိဇ္ဈတိ။
ဥပ္ပဇ္ဇန္တိ စ မေ ဘောဂါ၊
ယေ ကေစိ မနသော ပိယာ။
၁၂၈၉.
‘‘အက္ခာမိ တေ ဘိက္ခု မဟာနုဘာဝ၊
မနုဿဘူတော ယမဟံ အကာသိံ။
တေနမှိ ဧဝံ ဇလိတာနုဘာဝေါ၊
ဝဏ္ဏော စ မေ သဗ္ဗဒိသာ ပဘာသတီ’’တိ။
သုနိက္ခိတ္တဝိမာနံ ဧကာဒသမံ။
သုနိက္ခိတ္တဝဂ္ဂေါ သတ္တမော နိဋ္ဌိတော။
တဿုဒ္ဒါနံ –
ဒွေ ဒလိဒ္ဒါ ဝနဝိဟာရာ၊ ဘတကော ဂေါပါလကဏ္ဍကာ။
အနေကဝဏ္ဏမဋ္ဌကုဏ္ဍလီ၊ သေရီသကော သုနိက္ခိတ္တံ။
ပုရိသာနံ တတိယော ဝဂ္ဂေါ ပဝုစ္စတီတိ။
ဘာဏဝါရံ စတုတ္ထံ နိဋ္ဌိတံ။
ဝိမာနဝတ္ထုပါဠိ နိဋ္ဌိတာ။