၅. ပါရာယနဝဂ္ဂ
ဝတ္ထုဂါထာ
၉၈၂.
ကောသလာနံ ပုရာ ရမ္မာ၊ အဂမာ ဒက္ခိဏာပထံ။
အာကိဉ္စညံ ပတ္ထယာနော၊ ဗြာဟ္မဏော မန္တပါရဂူ။
၉၈၃.
သော အဿကဿ ဝိသယေ၊ အဠကဿ [မုဠကဿ (သျာ.)၊ မူဠှကဿ (က.)၊ မဠကဿ (နိဒ္ဒေသ)] သမာသနေ။
ဝသိ ဂေါဓါဝရီကူလေ၊ ဥဉ္ဆေန စ ဖလေန စ။
၉၈၄.
တဿေဝ ဥပနိဿာယ၊ ဂါမော စ ဝိပုလော အဟု။
တတော ဇာတေန အာယေန၊ မဟာယညမကပ္ပယိ။
၉၈၅.
မဟာယညံ ယဇိတွာန၊ ပုန ပါဝိသိ အဿမံ။
တသ္မိံ ပဋိပဝိဋ္ဌမှိ၊ အညော အာဂဉ္ဆိ ဗြာဟ္မဏော။
၉၈၆.
ဥဂ္ဃဋ္ဋပါဒေါ တသိတော [တဿိတော (က.)]၊ ပင်္ကဒန္တော ရဇဿိရော။
သော စ နံ ဥပသင်္ကမ္မ၊ သတာနိ ပဉ္စ ယာစတိ။
၉၈၇.
တမေနံ ဗာဝရီ ဒိသွာ၊ အာသနေန နိမန္တယိ။
သုခဉ္စ ကုသလံ ပုစ္ဆိ၊ ဣဒံ ဝစနမဗြဝိ။
၉၈၈.
‘‘ယံ ခေါ မမ ဒေယျဓမ္မံ၊ သဗ္ဗံ ဝိသဇ္ဇိတံ မယာ။
အနုဇာနာဟိ မေ ဗြဟ္မေ၊ နတ္ထိ ပဉ္စသတာနိ မေ’’။
၉၈၉.
‘‘သစေ မေ ယာစမာနဿ၊ ဘဝံ နာနုပဒဿတိ။
သတ္တမေ ဒိဝသေ တုယှံ၊ မုဒ္ဓါ ဖလတု သတ္တဓါ’’။
၉၉၀.
အဘိသင်္ခရိတွာ ကုဟကော၊ ဘေရဝံ သော အကိတ္တယိ။
တဿ တံ ဝစနံ သုတွာ၊ ဗာဝရီ ဒုက္ခိတော အဟု။
၉၉၁.
ဥဿုဿတိ အနာဟာရော၊ သောကသလ္လသမပ္ပိတော။
အထောပိ ဧဝံ စိတ္တဿ၊ ဈာနေ န ရမတီ မနော။
၉၉၂.
ဥတြသ္တံ ဒုက္ခိတံ ဒိသွာ၊ ဒေဝတာ အတ္ထကာမိနီ။
ဗာဝရိံ ဥပသင်္ကမ္မ၊ ဣဒံ ဝစနမဗြဝိ။
၉၉၃.
‘‘န သော မုဒ္ဓံ ပဇာနာတိ၊ ကုဟကော သော ဓနတ္ထိကော။
မုဒ္ဓနိ မုဒ္ဓပါတေ ဝါ၊ ဉာဏံ တဿ န ဝိဇ္ဇတိ’’။
၉၉၄.
‘‘ဘောတီ စရဟိ ဇာနာသိ၊ တံ မေ အက္ခာဟိ ပုစ္ဆိတာ။
မုဒ္ဓံ မုဒ္ဓါဓိပါတဉ္စ၊ တံ သုဏောမ ဝစော တဝ’’။
၉၉၅.
‘‘အဟမ္ပေတံ န ဇာနာမိ၊ ဉာဏမေတ္ထ န ဝိဇ္ဇတိ။
မုဒ္ဓနိ မုဒ္ဓါဓိပါတေ စ၊ ဇိနာနံ ဟေတ္ထ [မုဒ္ဓံ မုဒ္ဓါဓိပါတော စ၊ ဇိနာနံ ဟေတ (သီ. သျာ. ဣ.)] ဒဿနံ’’။
၉၉၆.
‘‘အထ ကော စရဟိ ဇာနာတိ၊ အသ္မိံ ပထဝိမဏ္ဍလေ [ပုထဝိမဏ္ဍလေ (သီ. ဣ.)]။
မုဒ္ဓံ မုဒ္ဓါဓိပါတဉ္စ၊ တံ မေ အက္ခာဟိ ဒေဝတေ’’။
၉၉၇.
‘‘ပုရာ ကပိလဝတ္ထုမှာ၊ နိက္ခန္တော လောကနာယကော။
အပစ္စော ဩက္ကာကရာဇဿ၊ သကျပုတ္တော ပဘင်္ကရော။
၉၉၈.
‘‘သော ဟိ ဗြာဟ္မဏ သမ္ဗုဒ္ဓေါ၊ သဗ္ဗဓမ္မာန ပါရဂူ။
သဗ္ဗာဘိညာဗလပ္ပတ္တော၊ သဗ္ဗဓမ္မေသု စက္ခုမာ။
သဗ္ဗကမ္မက္ခယံ ပတ္တော၊ ဝိမုတ္တော ဥပဓိက္ခယေ။
၉၉၉.
‘‘ဗုဒ္ဓေါ သော ဘဂဝါ လောကေ၊ ဓမ္မံ ဒေသေတိ စက္ခုမာ။
တံ တွံ ဂန္တွာန ပုစ္ဆဿု၊ သော တေ တံ ဗျာကရိဿတိ’’။
၁၀၀၀.
သမ္ဗုဒ္ဓေါတိ ဝစော သုတွာ၊ ဥဒဂ္ဂေါ ဗာဝရီ အဟု။
သောကဿ တနုကော အာသိ၊ ဣတိဉ္စ ဝိပုလံ လဘိ။
၁၀၀၁.
သော ဗာဝရီ အတ္တမနော ဥဒဂ္ဂေါ၊ တံ ဒေဝတံ ပုစ္ဆတိ ဝေဒဇာတော။
‘‘ကတမမှိ ဂါမေ နိဂမမှိ ဝါ ပန၊ ကတမမှိ ဝါ ဇနပဒေ လောကနာထော။
ယတ္ထ ဂန္တွာန ပဿေမု [ဂန္တွာ နမဿေမု (သီ. သျာ. ဣ.)]၊ သမ္ဗုဒ္ဓံ ဒွိပဒုတ္တမံ’’ [ဒွိပဒုတ္တမံ (သီ. သျာ. ဣ.)]၊။
၁၀၀၂.
‘‘သာဝတ္ထိယံ ကောသလမန္ဒိရေ ဇိနော၊ ပဟူတပညော ဝရဘူရိမေဓသော။
သော သကျပုတ္တော ဝိဓုရော အနာသဝေါ၊ မုဒ္ဓါဓိပါတဿ ဝိဒူ နရာသဘော’’။
၁၀၀၃.
တတော အာမန္တယီ သိဿေ၊ ဗြာဟ္မဏေ မန္တပါရဂေ။
‘‘ဧထ မာဏဝါ အက္ခိဿံ၊ သုဏာထ ဝစနံ မမ။
၁၀၀၄.
‘‘ယဿေသော ဒုလ္လဘော လောကေ၊ ပါတုဘာဝေါ အဘိဏှသော။
သွာဇ္ဇ လောကမှိ ဥပ္ပန္နော၊ သမ္ဗုဒ္ဓေါ ဣတိ ဝိဿုတော။
ခိပ္ပံ ဂန္တွာန သာဝတ္ထိံ၊ ပဿဝ္ဟော ဒွိပဒုတ္တမံ’’။
၁၀၀၅.
‘‘ကထံ စရဟိ ဇာနေမု၊ ဒိသွာ ဗုဒ္ဓေါတိ ဗြာဟ္မဏ။
အဇာနတံ နော ပဗြူဟိ၊ ယထာ ဇာနေမု တံ မယံ’’။
၁၀၀၆.
‘‘အာဂတာနိ ဟိ မန္တေသု၊ မဟာပုရိသလက္ခဏာ။
ဒွတ္တိံသာနိ စ [ဒွိတ္တိံသာ စ (သီ. သျာ. ဣ.)၊ ဒွိတ္တိံသ တာနိ (?)] ဗျာက္ခာတာ၊ သမတ္တာ အနုပုဗ္ဗသော။
၁၀၀၇.
‘‘ယဿေတေ ဟောန္တိ ဂတ္တေသု၊ မဟာပုရိသလက္ခဏာ။
ဒွေယေဝ တဿ ဂတိယော၊ တတိယာ ဟိ န ဝိဇ္ဇတိ။
၁၀၀၈.
‘‘သစေ အဂါရံ အာဝသတိ [အဇ္ဈာဝသတိ (က.)]၊ ဝိဇေယျ ပထဝိံ ဣမံ။
အဒဏ္ဍေန အသတ္ထေန၊ ဓမ္မေနမနုသာသတိ။
၁၀၀၉.
‘‘သစေ စ သော ပဗ္ဗဇတိ၊ အဂါရာ အနဂါရိယံ။
ဝိဝဋ္ဋစ္ဆဒေါ [ဝိဝတ္တဆဒ္ဒေါ (သီ.)] သမ္ဗုဒ္ဓေါ၊ အရဟာ ဘဝတိ အနုတ္တရော။
၁၀၁၀.
‘‘ဇာတိံ ဂေါတ္တဉ္စ လက္ခဏံ၊ မန္တေ သိဿေ ပုနာပရေ။
မုဒ္ဓံ မုဒ္ဓါဓိပါတဉ္စ၊ မနသာယေဝ ပုစ္ဆထ။
၁၀၁၁.
‘‘အနာဝရဏဒဿာဝီ၊ ယဒိ ဗုဒ္ဓေါ ဘဝိဿတိ။
မနသာ ပုစ္ဆိတေ ပဉ္ဟေ၊ ဝါစာယ ဝိဿဇေဿတိ’’။
၁၀၁၂.
ဗာဝရိဿ ဝစော သုတွာ၊ သိဿာ သောဠသ ဗြာဟ္မဏာ။
အဇိတော တိဿမေတ္တေယျော၊ ပုဏ္ဏကော အထ မေတ္တဂူ။
၁၀၁၃.
ဓေါတကော ဥပသီဝေါ စ၊ နန္ဒော စ အထ ဟေမကော။
တောဒေယျကပ္ပါ ဒုဘယော၊ ဇတုကဏ္ဏီ စ ပဏ္ဍိတော။
၁၀၁၄.
ဘဒြာဝုဓေါ ဥဒယော စ၊ ပေါသာလော စာပိ ဗြာဟ္မဏော။
မောဃရာဇာ စ မေဓါဝီ၊ ပိင်္ဂိယော စ မဟာဣသိ။
၁၀၁၅.
ပစ္စေကဂဏိနော သဗ္ဗေ၊ သဗ္ဗလောကဿ ဝိဿုတာ။
ဈာယီ ဈာနရတာ ဓီရာ၊ ပုဗ္ဗဝါသနဝါသိတာ။
၁၀၁၆.
ဗာဝရိံ အဘိဝါဒေတွာ၊ ကတွာ စ နံ ပဒက္ခိဏံ။
ဇဋာဇိနဓရာ သဗ္ဗေ၊ ပက္ကာမုံ ဥတ္တရာမုခါ။
၁၀၁၇.
အဠကဿ ပတိဋ္ဌာနံ၊ ပုရိမာဟိဿတိံ [ပုရိမံ မာဟိဿတိံ (သီ. ဣ.)၊ ပုရံ မာဟိဿတိံ (သျာ.)] တဒါ။
ဥဇ္ဇေနိဉ္စာပိ ဂေါနဒ္ဓံ၊ ဝေဒိသံ ဝနသဝှယံ။
၁၀၁၈.
ကောသမ္ဗိဉ္စာပိ သာကေတံ၊ သာဝတ္ထိဉ္စ ပုရုတ္တမံ။
သေတဗျံ ကပိလဝတ္ထုံ၊ ကုသိနာရဉ္စ မန္ဒိရံ။
၁၀၁၉.
ပါဝဉ္စ ဘောဂနဂရံ၊ ဝေသာလိံ မာဂဓံ ပုရံ။
ပါသာဏကံ စေတိယဉ္စ၊ ရမဏီယံ မနောရမံ။
၁၀၂၀.
တသိတောဝုဒကံ သီတံ၊ မဟာလာဘံဝ ဝါဏိဇော။
ဆာယံ ဓမ္မာဘိတတ္တောဝ၊ တုရိတာ ပဗ္ဗတမာရုဟုံ။
၁၀၂၁.
ဘဂဝါ တမှိ သမယေ၊ ဘိက္ခုသံဃပုရက္ခတော။
ဘိက္ခူနံ ဓမ္မံ ဒေသေတိ၊ သီဟောဝ နဒတီ ဝနေ။
၁၀၂၂.
အဇိတော အဒ္ဒသ ဗုဒ္ဓံ၊ သတရံသိံ [ဝီတရံသိံဝ (သျာ.)၊ သတရံသီဝ (က.)၊ ဣတရံသီဝ (နိဒ္ဒေသ)] ဝ ဘာဏုမံ။
စန္ဒံ ယထာ ပန္နရသေ၊ ပါရိပူရိံ ဥပါဂတံ။
၁၀၂၃.
အထဿ ဂတ္တေ ဒိသွာန၊ ပရိပူရဉ္စ ဗျဉ္ဇနံ။
ဧကမန္တံ ဌိတော ဟဋ္ဌော၊ မနောပဉ္ဟေ အပုစ္ဆထ။
၁၀၂၄.
‘‘အာဒိဿ ဇမ္မနံ [ဇပ္ပနံ (က.)] ဗြူဟိ၊ ဂေါတ္တံ ဗြူဟိ သလက္ခဏံ [ဗြူဟိဿ လက္ခဏံ (နိဒ္ဒေသ)]။
မန္တေသု ပါရမိံ ဗြူဟိ၊ ကတိ ဝါစေတိ ဗြာဟ္မဏော’’။
၁၀၂၅.
‘‘ဝီသံ ဝဿသတံ အာယု၊ သော စ ဂေါတ္တေန ဗာဝရီ။
တီဏိဿ လက္ခဏာ ဂတ္တေ၊ တိဏ္ဏံ ဝေဒါန ပါရဂူ။
၁၀၂၆.
‘‘လက္ခဏေ ဣတိဟာသေ စ၊ သနိဃဏ္ဍုသကေဋုဘေ။
ပဉ္စသတာနိ ဝါစေတိ၊ သဓမ္မေ ပါရမိံ ဂတော’’။
၁၀၂၇.
‘‘လက္ခဏာနံ ပဝိစယံ၊ ဗာဝရိဿ နရုတ္တမ။
ကင်္ခစ္ဆိဒ [တဏှစ္ဆိဒ (ဗဟူသု)] ပကာသေဟိ၊ မာ နော ကင်္ခါယိတံ အဟု’’။
၁၀၂၈.
‘‘မုခံ ဇိဝှာယ ဆာဒေတိ၊ ဥဏ္ဏဿ ဘမုကန္တရေ။
ကောသောဟိတံ ဝတ္ထဂုယှံ၊ ဧဝံ ဇာနာဟိ မာဏဝ’’။
၁၀၂၉.
ပုစ္ဆဉှိ ကိဉ္စိ အသုဏန္တော၊ သုတွာ ပဉ္ဟေ ဝိယာကတေ။
ဝိစိန္တေတိ ဇနော သဗ္ဗော၊ ဝေဒဇာတော ကတဉ္ဇလီ။
၁၀၃၀.
‘‘ကော နု ဒေဝေါ ဝါ ဗြဟ္မာ ဝါ၊ ဣန္ဒော ဝါပိ သုဇမ္ပတိ။
မနသာ ပုစ္ဆိတေ ပဉ္ဟေ၊ ကမေတံ ပဋိဘာသတိ။
၁၀၃၁.
‘‘မုဒ္ဓံ မုဒ္ဓါဓိပါတဉ္စ၊ ဗာဝရီ ပရိပုစ္ဆတိ။
တံ ဗျာကရောဟိ ဘဂဝါ၊ ကင်္ခံ ဝိနယ နော ဣသေ’’။
၁၀၃၂.
‘‘အဝိဇ္ဇာ မုဒ္ဓါတိ ဇာနာဟိ၊ ဝိဇ္ဇာ မုဒ္ဓါဓိပါတိနီ။
သဒ္ဓါသတိသမာဓီဟိ၊ ဆန္ဒဝီရိယေန သံယုတာ’’။
၁၀၃၃.
တတော ဝေဒေန မဟတာ၊ သန္ထမ္ဘိတွာန မာဏဝေါ။
ဧကံသံ အဇိနံ ကတွာ၊ ပါဒေသု သိရသာ ပတိ။
၁၀၃၄.
‘‘ဗာဝရီ ဗြာဟ္မဏော ဘောတော၊ သဟ သိဿေဟိ မာရိသ။
ဥဒဂ္ဂစိတ္တော သုမနော၊ ပါဒေ ဝန္ဒတိ စက္ခုမ’’။
၁၀၃၅.
‘‘သုခိတော ဗာဝရီ ဟောတု၊ သဟ သိဿေဟိ ဗြာဟ္မဏော။
တ္ဝဉ္စာပိ သုခိတော ဟောဟိ၊ စိရံ ဇီဝါဟိ မာဏဝ။
၁၀၃၆.
‘‘ဗာဝရိဿ စ တုယှံ ဝါ၊ သဗ္ဗေသံ သဗ္ဗသံသယံ။
ကတာဝကာသာ ပုစ္ဆဝ္ဟော၊ ယံ ကိဉ္စိ မနသိစ္ဆထ’’။
၁၀၃၇.
သမ္ဗုဒ္ဓေန ကတောကာသော၊ နိသီဒိတွာန ပဉ္ဇလီ။
အဇိတော ပဌမံ ပဉ္ဟံ၊ တတ္ထ ပုစ္ဆိ တထာဂတံ။
ဝတ္ထုဂါထာ နိဋ္ဌိတာ။
၁. အဇိတမာဏဝပုစ္ဆာ
၁၀၃၈.
‘‘ကေနဿု နိဝုတော လောကော၊ (ဣစ္စာယသ္မာ အဇိတော)
ကေနဿု နပ္ပကာသတိ။
ကိဿာဘိလေပနံ ဗြူသိ၊ ကိံသု တဿ မဟဗ္ဘယံ’’။
၁၀၃၉.
‘‘အဝိဇ္ဇာယ နိဝုတော လောကော၊ (အဇိတာတိ ဘဂဝါ)
ဝေဝိစ္ဆာ ပမာဒါ နပ္ပကာသတိ။
ဇပ္ပါဘိလေပနံ ဗြူမိ၊ ဒုက္ခမဿ မဟဗ္ဘယံ’’။
၁၀၄၀.
‘‘သဝန္တိ သဗ္ဗဓိ သောတာ၊ (ဣစ္စာယသ္မာ အဇိတော)
သောတာနံ ကိံ နိဝါရဏံ။
သောတာနံ သံဝရံ ဗြူဟိ၊ ကေန သောတာ ပိဓိယျရေ’’ [ပိထိယျရေ (သီ. သျာ. ဣ.)၊ ပိထီယရေ (သီ. အဋ္ဌ.)၊ ပိဓီယရေ (?)]။
၁၀၄၁.
‘‘ယာနိ သောတာနိ လောကသ္မိံ၊ (အဇိတာတိ ဘဂဝါ)
သတိ တေသံ နိဝါရဏံ။
သောတာနံ သံဝရံ ဗြူမိ၊ ပညာယေတေ ပိဓိယျရေ’’။
၁၀၄၂.
‘‘ပညာ စေဝ သတိ ယဉ္စ [သတီ စေဝ (သီ.)၊ သတီ စ (သျာ.)၊ သတီ စာပိ (ဣ. နိဒ္ဒေသ)၊ သတိ စာပိ (နိဒ္ဒေသ)]၊ (ဣစ္စာယသ္မာ အဇိတော)
နာမရူပဉ္စ မာရိသ။
ဧတံ မေ ပုဋ္ဌော ပဗြူဟိ၊ ကတ္ထေတံ ဥပရုဇ္ဈတိ’’။
၁၀၄၃.
‘‘ယမေတံ ပဉ္ဟံ အပုစ္ဆိ၊ အဇိတ တံ ဝဒါမိ တေ။
ယတ္ထ နာမဉ္စ ရူပဉ္စ၊ အသေသံ ဥပရုဇ္ဈတိ။
ဝိညာဏဿ နိရောဓေန၊ ဧတ္ထေတံ ဥပရုဇ္ဈတိ’’။
၁၀၄၄.
‘‘ယေ စ သင်္ခါတဓမ္မာသေ၊ ယေ စ သေခါ ပုထူ ဣဓ။
တေသံ မေ နိပကော ဣရိယံ၊ ပုဋ္ဌော ပဗြူဟိ မာရိသ’’။
၁၀၄၅.
‘‘ကာမေသု နာဘိဂိဇ္ဈေယျ၊ မနသာနာဝိလော သိယာ။
ကုသလော သဗ္ဗဓမ္မာနံ၊ သတော ဘိက္ခု ပရိဗ္ဗဇေ’’တိ။
အဇိတမာဏဝပုစ္ဆာ ပဌမာ နိဋ္ဌိတာ။
၂. တိဿမေတ္တေယျမာဏဝပုစ္ဆာ
၁၀၄၆.
‘‘ကောဓ သန္တုသိတော လောကေ၊ (ဣစ္စာယသ္မာ တိဿမေတ္တေယျော)
ကဿ နော သန္တိ ဣဉ္ဇိတာ။
ကော ဥဘန္တမဘိညာယ၊ မဇ္ဈေ မန္တာ န လိပ္ပတိ [လိမ္ပတိ (က.)]။
ကံ ဗြူသိ မဟာပုရိသောတိ၊ ကော ဣဓ သိဗ္ဗိနိမစ္စဂါ’’။
၁၀၄၇.
‘‘ကာမေသု ဗြဟ္မစရိယဝါ၊ (မေတ္တေယျာတိ ဘဂဝါ)
ဝီတတဏှော သဒါ သတော။
သင်္ခါယ နိဗ္ဗုတော ဘိက္ခု၊ တဿ နော သန္တိ ဣဉ္ဇိတာ။
၁၀၄၈.
‘‘သော ဥဘန္တမဘိညာယ၊ မဇ္ဈေ မန္တာ န လိပ္ပတိ။
တံ ဗြူမိ မဟာပုရိသောတိ၊ သော ဣဓ သိဗ္ဗိနိမစ္စဂါ’’တိ။
တိဿမေတ္တေယျမာဏဝပုစ္ဆာ ဒုတိယာ နိဋ္ဌိတာ။
၃. ပုဏ္ဏကမာဏဝပုစ္ဆာ
၁၀၄၉.
‘‘အနေဇံ မူလဒဿာဝိံ၊ (ဣစ္စာယသ္မာ ပုဏ္ဏကော)
အတ္ထိ [အတ္ထီ (သျာ.)] ပဉ္ဟေန အာဂမံ။
ကိံ နိဿိတာ ဣသယော မနုဇာ၊ ခတ္တိယာ ဗြာဟ္မဏာ ဒေဝတာနံ။
ယညမကပ္ပယိံသု ပုထူဓ လောကေ၊ ပုစ္ဆာမိ တံ ဘဂဝါ ဗြူဟိ မေ တံ’’။
၁၀၅၀.
‘‘ယေ ကေစိမေ ဣသယော မနုဇာ၊ (ပုဏ္ဏကာတိ ဘဂဝါ)
ခတ္တိယာ ဗြာဟ္မဏာ ဒေဝတာနံ။
ယညမကပ္ပယိံသု ပုထူဓ လောကေ၊ အာသီသမာနာ ပုဏ္ဏက ဣတ္ထတ္တံ [ဣတ္ထဘာဝံ (သီ. သျာ.)]။
ဇရံ သိတာ ယညမကပ္ပယိံသု’’။
၁၀၅၁.
‘‘ယေ ကေစိမေ ဣသယော မနုဇာ၊ (ဣစ္စာယသ္မာ ပုဏ္ဏကော)
ခတ္တိယာ ဗြာဟ္မဏာ ဒေဝတာနံ။
ယညမကပ္ပယိံသု ပုထူဓ လောကေ၊ ကစ္စိဿု တေ ဘဂဝါ ယညပထေ အပ္ပမတ္တာ။
အတာရုံ ဇာတိဉ္စ ဇရဉ္စ မာရိသ၊ ပုစ္ဆာမိ တံ ဘဂဝါ ဗြူဟိ မေ တံ’’။
၁၀၅၂.
‘‘အာသီသန္တိ ထောမယန္တိ၊ အဘိဇပ္ပန္တိ ဇုဟန္တိ။ (ပုဏ္ဏကာတိ ဘဂဝါ)
ကာမာဘိဇပ္ပန္တိ ပဋိစ္စ လာဘံ၊ တေ ယာဇယောဂါ ဘဝရာဂရတ္တာ။
နာတရိံသု ဇာတိဇရန္တိ ဗြူမိ’’။
၁၀၅၃.
‘‘တေ စေ နာတရိံသု ယာဇယောဂါ၊ (ဣစ္စာယသ္မာ ပုဏ္ဏကော)
ယညေဟိ ဇာတိဉ္စ ဇရဉ္စ မာရိသ။
အထ ကော စရဟိ ဒေဝမနုဿလောကေ၊ အတာရိ ဇာတိဉ္စ ဇရဉ္စ မာရိသ။
ပုစ္ဆာမိ တံ ဘဂဝါ ဗြူဟိ မေ တံ’’။
၁၀၅၄.
‘‘သင်္ခါယ လောကသ္မိ ပရောပရာနိ [ပရောဝရာနိ (သီ. သျာ.)]၊ (ပုဏ္ဏကာတိ ဘဂဝါ)
ယဿိဉ္ဇိတံ နတ္ထိ ကုဟိဉ္စိ လောကေ။
သန္တော ဝိဓူမော အနီဃော နိရာသော၊ အတာရိ သော ဇာတိဇရန္တိ ဗြူမီ’’တိ။
ပုဏ္ဏကမာဏဝပုစ္ဆာ တတိယာ နိဋ္ဌိတာ။
၄. မေတ္တဂူမာဏဝပုစ္ဆာ
၁၀၅၅.
‘‘ပုစ္ဆာမိ တံ ဘဂဝါ ဗြူဟိ မေ တံ၊ (ဣစ္စာယသ္မာ မေတ္တဂူ)
မညာမိ တံ ဝေဒဂုံ ဘာဝိတတ္တံ။
ကုတော နု ဒုက္ခာ သမုဒါဂတာ ဣမေ၊ ယေ ကေစိ လောကသ္မိမနေကရူပါ’’။
၁၀၅၆.
‘‘ဒုက္ခဿ ဝေ မံ ပဘဝံ အပုစ္ဆသိ၊ (မေတ္တဂူတိ ဘဂဝါ)
တံ တေ ပဝက္ခာမိ ယထာ ပဇာနံ။
ဥပဓိနိဒါနာ ပဘဝန္တိ ဒုက္ခာ၊ ယေ ကေစိ လောကသ္မိမနေကရူပါ။
၁၀၅၇.
‘‘ယော ဝေ အဝိဒွါ ဥပဓိံ ကရောတိ၊ ပုနပ္ပုနံ ဒုက္ခမုပေတိ မန္ဒော။
တသ္မာ ပဇာနံ ဥပဓိံ န ကယိရာ၊ ဒုက္ခဿ ဇာတိပ္ပဘဝါနုပဿီ’’။
၁၀၅၈.
‘‘ယံ တံ အပုစ္ဆိမှ အကိတ္တယီ နော၊ အညံ တံ ပုစ္ဆာမ [ပုစ္ဆာမိ (သီ. ဣ.)] တဒိင်္ဃ ဗြူဟိ။
ကထံ နု ဓီရာ ဝိတရန္တိ ဩဃံ၊ ဇာတိံ ဇရံ သောကပရိဒ္ဒဝဉ္စ။
တံ မေ မုနိ သာဓု ဝိယာကရောဟိ၊ တထာ ဟိ တေ ဝိဒိတော ဧသ ဓမ္မော’’။
၁၀၅၉.
‘‘ကိတ္တယိဿာမိ တေ ဓမ္မံ၊ (မေတ္တဂူတိ ဘဂဝါ)
ဒိဋ္ဌေ ဓမ္မေ အနီတိဟံ။
ယံ ဝိဒိတွာ သတော စရံ၊ တရေ လောကေ ဝိသတ္တိကံ’’။
၁၀၆၀.
‘‘တဉ္စာဟံ အဘိနန္ဒာမိ၊ မဟေသိ ဓမ္မမုတ္တမံ။
ယံ ဝိဒိတွာ သတော စရံ၊ တရေ လောကေ ဝိသတ္တိကံ’’။
၁၀၆၁.
‘‘ယံ ကိဉ္စိ သမ္ပဇာနာသိ၊ (မေတ္တဂူတိ ဘဂဝါ)
ဥဒ္ဓံ အဓေါ တိရိယဉ္စာပိ မဇ္ဈေ။
ဧတေသု နန္ဒိဉ္စ နိဝေသနဉ္စ၊ ပနုဇ္ဇ ဝိညာဏံ ဘဝေ န တိဋ္ဌေ။
၁၀၆၂.
‘‘ဧဝံဝိဟာရီ သတော အပ္ပမတ္တော၊ ဘိက္ခု စရံ ဟိတွာ မမာယိတာနိ။
ဇာတိံ ဇရံ သောကပရိဒ္ဒဝဉ္စ၊ ဣဓေဝ ဝိဒွါ ပဇဟေယျ ဒုက္ခံ’’။
၁၀၆၃.
‘‘ဧတာဘိနန္ဒာမိ ဝစော မဟေသိနော၊ သုကိတ္တိတံ ဂေါတမနူပဓီကံ။
အဒ္ဓါ ဟိ ဘဂဝါ ပဟာသိ ဒုက္ခံ၊ တထာ ဟိ တေ ဝိဒိတော ဧသ ဓမ္မော။
၁၀၆၄.
‘‘တေ စာပိ နူနပ္ပဇဟေယျု ဒုက္ခံ၊ ယေ တွံ မုနိ အဋ္ဌိတံ ဩဝဒေယျ။
တံ တံ နမဿာမိ သမေစ္စ နာဂ၊ အပ္ပေဝ မံ ဘဂဝါ အဋ္ဌိတံ ဩဝဒေယျ’’။
၁၀၆၅.
‘‘ယံ ဗြာဟ္မဏံ ဝေဒဂုမာဘိဇညာ၊ အကိဉ္စနံ ကာမဘဝေ အသတ္တံ။
အဒ္ဓါ ဟိ သော ဩဃမိမံ အတာရိ၊ တိဏ္ဏော စ ပါရံ အခိလော အကင္ခော။
၁၀၆၆.
‘‘ဝိဒွါ စ ယော [သော (သီ. သျာ. ဣ.)] ဝေဒဂူ နရော ဣဓ၊ ဘဝါဘဝေ သင်္ဂမိမံ ဝိသဇ္ဇ။
သော ဝီတတဏှော အနီဃော နိရာသော၊ အတာရိ သော ဇာတိဇရန္တိ ဗြူမီ’’တိ။
မေတ္တဂူမာဏဝပုစ္ဆာ စတုတ္ထီ နိဋ္ဌိတာ။
၅. ဓေါတကမာဏဝပုစ္ဆာ
၁၀၆၇.
‘‘ပုစ္ဆာမိ တံ ဘဂဝါ ဗြူဟိ မေ တံ၊ (ဣစ္စာယသ္မာ ဓေါတကော)
ဝါစာဘိကင်္ခါမိ မဟေသိ တုယှံ။
တဝ သုတွာန နိဂ္ဃောသံ၊ သိက္ခေ နိဗ္ဗာနမတ္တနော’’။
၁၀၆၈.
‘‘တေနဟာတပ္ပံ ကရောဟိ၊ (ဓေါတကာတိ ဘဂဝါ) ဣဓေဝ နိပကော သတော။
ဣတော သုတွာန နိဂ္ဃောသံ၊ သိက္ခေ နိဗ္ဗာနမတ္တနော’’။
၁၀၆၉.
‘‘ပဿာမဟံ ဒေဝမနုဿလောကေ၊ အကိဉ္စနံ ဗြာဟ္မဏမိရိယမာနံ။
တံ တံ နမဿာမိ သမန္တစက္ခု၊ ပမုဉ္စ မံ သက္က ကထံကထာဟိ’’။
၁၀၇၀.
‘‘နာဟံ သဟိဿာမိ [သမိဿာမိ (သျာ.)၊ ဂမိဿာမိ (သီ.)၊ သမီဟာမိ (ဣ.)] ပမောစနာယ၊ ကထံကထိံ ဓေါတက ကဉ္စိ လောကေ။
ဓမ္မဉ္စ သေဋ္ဌံ အဘိဇာနမာနော [အာဇာနမာနော (သီ. သျာ. ဣ.)]၊ ဧဝံ တုဝံ ဩဃမိမံ တရေသိ’’။
၁၀၇၁.
‘‘အနုသာသ ဗြဟ္မေ ကရုဏာယမာနော၊ ဝိဝေကဓမ္မံ ယမဟံ ဝိဇညံ။
ယထာဟံ အာကာသောဝ အဗျာပဇ္ဇမာနော၊ ဣဓေဝ သန္တော အသိတော စရေယျံ’’။
၁၀၇၂.
‘‘ကိတ္တယိဿာမိ တေ သန္တိံ၊ (ဓေါတကာတိ ဘဂဝါ) ဒိဋ္ဌေ ဓမ္မေ အနီတိဟံ။
ယံ ဝိဒိတွာ သတော စရံ၊ တရေ လောကေ ဝိသတ္တိကံ’’။
၁၀၇၃.
‘‘တဉ္စာဟံ အဘိနန္ဒာမိ၊ မဟေသိ သန္တိမုတ္တမံ။
ယံ ဝိဒိတွာ သတော စရံ၊ တရေ လောကေ ဝိသတ္တိကံ’’။
၁၀၇၄.
‘‘ယံ ကိဉ္စိ သမ္ပဇာနာသိ၊ (ဓေါတကာတိ ဘဂဝါ)
ဥဒ္ဓံ အဓေါ တိရိယဉ္စာပိ မဇ္ဈေ။
ဧတံ ဝိဒိတွာ သင်္ဂေါတိ လောကေ၊ ဘဝါဘဝါယ မာကာသိ တဏှ’’န္တိ။
ဓေါတကမာဏဝပုစ္ဆာ ပဉ္စမီ နိဋ္ဌိတာ။
၆. ဥပသီဝမာဏဝပုစ္ဆာ
၁၀၇၅.
‘‘ဧကော အဟံ သက္က မဟန္တမောဃံ၊ (ဣစ္စာယသ္မာ ဥပသီဝေါ)
အနိဿိတော နော ဝိသဟာမိ တာရိတုံ။
အာရမ္မဏံ ဗြူဟိ သမန္တစက္ခု၊ ယံ နိဿိတော ဩဃမိမံ တရေယျံ’’။
၁၀၇၆.
‘‘အာကိဉ္စညံ ပေက္ခမာနော သတိမာ၊ (ဥပသီဝါတိ ဘဂဝါ)
နတ္ထီတိ နိဿာယ တရဿု ဩဃံ။
ကာမေ ပဟာယ ဝိရတော ကထာဟိ၊ တဏှက္ခယံ နတ္တမဟာဘိပဿ’’ [ရတ္တမဟာဘိပဿ (သျာ.)၊ ရတ္တမဟံ ဝိပဿ (က.)]။
၁၀၇၇.
‘‘သဗ္ဗေသု ကာမေသု ယော ဝီတရာဂေါ၊ (ဣစ္စာယသ္မာ ဥပသီဝေါ)
အာကိဉ္စညံ နိဿိတော ဟိတွာ မညံ။
သညာဝိမောက္ခေ ပရမေ ဝိမုတ္တော [ဓိမုတ္တော (က.)]၊ တိဋ္ဌေ နု သော တတ္ထ အနာနုယာယီ’’ [အနာနုဝါယီ (သျာ. က.)]။
၁၀၇၈.
‘‘သဗ္ဗေသု ကာမေသု ယော ဝီတရာဂေါ၊ (ဥပသီဝါတိ ဘဂဝါ)
အာကိဉ္စညံ နိဿိတော ဟိတွာ မညံ။
သညာဝိမောက္ခေ ပရမေ ဝိမုတ္တော၊ တိဋ္ဌေယျ သော တတ္ထ အနာနုယာယီ’’။
၁၀၇၉.
‘‘တိဋ္ဌေ စေ သော တတ္ထ အနာနုယာယီ၊ ပူဂမ္ပိ ဝဿာနံ သမန္တစက္ခု။
တတ္ထေဝ သော သီတိသိယာ ဝိမုတ္တော၊ စဝေထ ဝိညာဏံ တထာဝိဓဿ’’။
၁၀၈၀.
‘‘အစ္စီ ယထာ ဝါတဝေဂေန ခိတ္တာ [ခိတ္တံ (သျာ.)၊ ခိတ္တော (ဣ.)]၊ (ဥပသီဝါတိ ဘဂဝါ)
အတ္ထံ ပလေတိ န ဥပေတိ သင်္ခံ။
ဧဝံ မုနီ နာမကာယာ ဝိမုတ္တော၊ အတ္ထံ ပလေတိ န ဥပေတိ သင်္ခံ’’။
၁၀၈၁.
‘‘အတ္ထင်္ဂတော သော ဥဒ ဝါ သော နတ္ထိ၊ ဥဒါဟု ဝေ သဿတိယာ အရောဂေါ။
တံ မေ မုနီ သာဓု ဝိယာကရောဟိ၊ တထာ ဟိ တေ ဝိဒိတော ဧသ ဓမ္မော’’။
၁၀၈၂.
‘‘အတ္ထင်္ဂတဿ န ပမာဏမတ္ထိ၊ (ဥပသီဝါတိ ဘဂဝါ)
ယေန နံ ဝဇ္ဇုံ တံ တဿ နတ္ထိ။
သဗ္ဗေသု ဓမ္မေသု သမောဟတေသု၊ သမူဟတာ ဝါဒပထာပိ သဗ္ဗေ’’တိ။
ဥပသီဝမာဏဝပုစ္ဆာ ဆဋ္ဌီ နိဋ္ဌိတာ။
၇. နန္ဒမာဏဝပုစ္ဆာ
၁၀၈၃.
‘‘သန္တိ လောကေ မုနယော၊ (ဣစ္စာယသ္မာ နန္ဒော)
ဇနာ ဝဒန္တိ တယိဒံ ကထံသု။
ဉာဏူပပန္နံ နော မုနိံ [မုနိ နော (သျာ. က.)] ဝဒန္တိ၊ ဥဒါဟု ဝေ ဇီဝိတေနူပပန္နံ’’။
၁၀၈၄.
‘‘န ဒိဋ္ဌိယာ န သုတိယာ န ဉာဏေန၊ (န သီလဗ္ဗတေန) [( ) နတ္ထိ သီ.-ဣ ပေါတ္ထကေသု]
မုနီဓ နန္ဒ ကုသလာ ဝဒန္တိ။
ဝိသေနိကတွာ အနီဃာ နိရာသာ၊ စရန္တိ ယေ တေ မုနယောတိ ဗြူမိ’’။
၁၀၈၅.
‘‘ယေ ကေစိမေ သမဏဗြာဟ္မဏာသေ၊ (ဣစ္စာယသ္မာ နန္ဒော)
ဒိဋ္ဌဿုတေနာပိ [ဒိဋ္ဌေန သုတေနာပိ (သီ.)၊ ဒိဋ္ဌေ သုတေနာပိ (သျာ. ဣ. က.)] ဝဒန္တိ သုဒ္ဓိံ။
သီလဗ္ဗတေနာပိ ဝဒန္တိ သုဒ္ဓိံ၊ အနေကရူပေန ဝဒန္တိ သုဒ္ဓိံ။
ကစ္စိဿု တေ ဘဂဝါ တတ္ထ ယတာ စရန္တာ၊ အတာရု ဇာတိဉ္စ ဇရဉ္စ မာရိသ။
ပုစ္ဆာမိ တံ ဘဂဝါ ဗြူဟိ မေ တံ’’။
၁၀၈၆.
‘‘ယေ ကေစိမေ သမဏဗြာဟ္မဏာသေ၊ (နန္ဒာတိ ဘဂဝါ)
ဒိဋ္ဌဿုတေနာပိ ဝဒန္တိ သုဒ္ဓိံ။
သီလဗ္ဗတေနာပိ ဝဒန္တိ သုဒ္ဓိံ၊ အနေကရူပေန ဝဒန္တိ သုဒ္ဓိံ။
ကိဉ္စာပိ တေ တတ္ထ ယတာ စရန္တိ၊ နာရိံသု ဇာတိဇရန္တိ ဗြူမိ’’။
၁၀၈၇.
‘‘ယေ ကေစိမေ သမဏဗြာဟ္မဏာသေ၊ (ဣစ္စာယသ္မာ နန္ဒော)
ဒိဋ္ဌဿုတေနာပိ ဝဒန္တိ သုဒ္ဓိံ။
သီလဗ္ဗတေနာပိ ဝဒန္တိ သုဒ္ဓိံ၊ အနေကရူပေန ဝဒန္တိ သုဒ္ဓိံ။
တေ စေ မုနိ [သစေ မုနိ (သီ.)] ဗြူသိ အနောဃတိဏ္ဏေ၊ အထ ကော စရဟိ ဒေဝမနုဿလောကေ။
အတာရိ ဇာတိဉ္စ ဇရဉ္စ မာရိသ၊ ပုစ္ဆာမိ တံ ဘဂဝါ ဗြူဟိ မေ တံ’’။
၁၀၈၈.
‘‘နာဟံ သဗ္ဗေ သမဏဗြာဟ္မဏာသေ၊ (နန္ဒာတိ ဘဂဝါ)
ဇာတိဇရာယ နိဝုတာတိ ဗြူမိ။
ယေ သီဓ ဒိဋ္ဌံဝ သုတံ မုတံ ဝါ၊ သီလဗ္ဗတံ ဝါပိ ပဟာယ သဗ္ဗံ။
အနေကရူပမ္ပိ ပဟာယ သဗ္ဗံ၊ တဏှံ ပရိညာယ အနာသဝါသေ။
တေ ဝေ နရာ ဩဃတိဏ္ဏာတိ ဗြူမိ’’။
၁၀၈၉.
‘‘ဧတာဘိနန္ဒာမိ ဝစော မဟေသိနော၊ သုကိတ္တိတံ ဂေါတမနူပဓီကံ။
ယေ သီဓ ဒိဋ္ဌံ ဝ သုတံ မုတံ ဝါ၊ သီလဗ္ဗတံ ဝါပိ ပဟာယ သဗ္ဗံ။
အနေကရူပမ္ပိ ပဟာယ သဗ္ဗံ၊ တဏှံ ပရိညာယ အနာသဝါသေ။
အဟမ္ပိ တေ ဩဃတိဏ္ဏာတိ ဗြူမီ’’တိ။
နန္ဒမာဏဝပုစ္ဆာ သတ္တမာ နိဋ္ဌိတာ။
၈. ဟေမကမာဏဝပုစ္ဆာ
၁၀၉၀.
‘‘ယေ မေ ပုဗ္ဗေ ဝိယာကံသု၊ (ဣစ္စာယသ္မာ ဟေမကော)
ဟုရံ ဂေါတမသာသနာ။
ဣစ္စာသိ ဣတိ ဘဝိဿတိ၊ သဗ္ဗံ တံ ဣတိဟီတိဟံ။
သဗ္ဗံ တံ တက္ကဝဍ္ဎနံ၊ နာဟံ တတ္ထ အဘိရမိံ။
၁၀၉၁.
‘‘တ္ဝဉ္စ မေ ဓမ္မမက္ခာဟိ၊ တဏှာနိဂ္ဃါတနံ မုနိ။
ယံ ဝိဒိတွာ သတော စရံ၊ တရေ လောကေ ဝိသတ္တိကံ’’။
၁၀၉၂.
‘‘ဣဓ ဒိဋ္ဌသုတမုတဝိညာတေသု၊ ပိယရူပေသု ဟေမက။
ဆန္ဒရာဂဝိနောဒနံ၊ နိဗ္ဗာနပဒမစ္စုတံ။
၁၀၉၃.
‘‘ဧတဒညာယ ယေ သတာ၊ ဒိဋ္ဌဓမ္မာဘိနိဗ္ဗုတာ။
ဥပသန္တာ စ တေ သဒါ၊ တိဏ္ဏာ လောကေ ဝိသတ္တိက’’န္တိ။
ဟေမကမာဏဝပုစ္ဆာ အဋ္ဌမာ နိဋ္ဌိတာ။
၉. တောဒေယျမာဏဝပုစ္ဆာ
၁၀၉၄.
‘‘ယသ္မိံ ကာမာ န ဝသန္တိ၊ (ဣစ္စာယသ္မာ တောဒေယျော)
တဏှာ ယဿ န ဝိဇ္ဇတိ။
ကထံကထာ စ ယော တိဏ္ဏော၊ ဝိမောက္ခော တဿ ကီဒိသော’’။
၁၀၉၅.
‘‘ယသ္မိံ ကာမာ န ဝသန္တိ၊ (တောဒေယျာတိ ဘဂဝါ)
တဏှာ ယဿ န ဝိဇ္ဇတိ။
ကထံကထာ စ ယော တိဏ္ဏော၊ ဝိမောက္ခော တဿ နာပရော’’။
၁၀၉၆.
‘‘နိရာသသော သော ဥဒ အာသသာနော၊ ပညာဏဝါ သော ဥဒ ပညကပ္ပီ။
မုနိံ အဟံ သက္က ယထာ ဝိဇညံ၊ တံ မေ ဝိယာစိက္ခ သမန္တစက္ခု’’။
၁၀၉၇.
‘‘နိရာသသော သော န စ အာသသာနော၊ ပညာဏဝါ သော န စ ပညကပ္ပီ။
ဧဝမ္ပိ တောဒေယျ မုနိံ ဝိဇာန၊ အကိဉ္စနံ ကာမဘဝေ အသတ္တ’’န္တိ။
တောဒေယျမာဏဝပုစ္ဆာ နဝမာ နိဋ္ဌိတာ။
၁၀. ကပ္ပမာဏဝပုစ္ဆာ
၁၀၉၈.
‘‘မဇ္ဈေ သရသ္မိံ တိဋ္ဌတံ၊ (ဣစ္စာယသ္မာ ကပ္ပော)
ဩဃေ ဇာတေ မဟဗ္ဘယေ။
ဇရာမစ္စုပရေတာနံ၊ ဒီပံ ပဗြူဟိ မာရိသ။
တ္ဝဉ္စ မေ ဒီပမက္ခာဟိ၊ ယထာယိဒံ နာပရံ သိယာ’’။
၁၀၉၉.
‘‘မဇ္ဈေ သရသ္မိံ တိဋ္ဌတံ၊ (ကပ္ပါတိ ဘဂဝါ)
ဩဃေ ဇာတေ မဟဗ္ဘယေ။
ဇရာမစ္စုပရေတာနံ၊ ဒီပံ ပဗြူမိ ကပ္ပ တေ။
၁၁၀၀.
‘‘အကိဉ္စနံ အနာဒါနံ၊ ဧတံ ဒီပံ အနာပရံ။
နိဗ္ဗာနံ ဣတိ [နိဗ္ဗာနမီတိ (သီ.)] နံ ဗြူမိ၊ ဇရာမစ္စုပရိက္ခယံ။
၁၁၀၁.
‘‘ဧတဒညာယ ယေ သတာ၊ ဒိဋ္ဌဓမ္မာဘိနိဗ္ဗုတာ။
န တေ မာရဝသာနုဂါ၊ န တေ မာရဿ ပဒ္ဓဂူ’’တိ [ပဋ္ဌဂူတိ (သျာ. က.)]။
ကပ္ပမာဏဝပုစ္ဆာ ဒသမာ နိဋ္ဌိတာ။
၁၁. ဇတုကဏ္ဏိမာဏဝပုစ္ဆာ
၁၁၀၂.
‘‘သုတွာနဟံ ဝီရမကာမကာမိံ၊ (ဣစ္စာယသ္မာ ဇတုကဏ္ဏိ)
ဩဃာတိဂံ ပုဋ္ဌုမကာမမာဂမံ။
သန္တိပဒံ ဗြူဟိ သဟဇနေတ္တ၊ ယထာတစ္ဆံ ဘဂဝါ ဗြူဟိ မေ တံ။
၁၁၀၃.
‘‘ဘဂဝါ ဟိ ကာမေ အဘိဘုယျ ဣရိယတိ၊ အာဒိစ္စောဝ ပထဝိံ တေဇီ တေဇသာ။
ပရိတ္တပညဿ မေ ဘူရိပည၊ အာစိက္ခ ဓမ္မံ ယမဟံ ဝိဇညံ။
ဇာတိဇရာယ ဣဓ ဝိပ္ပဟာနံ’’။
၁၁၀၄.
‘‘ကာမေသု ဝိနယ ဂေဓံ၊ (ဇတုကဏ္ဏီတိ ဘဂဝါ) နေက္ခမ္မံ ဒဋ္ဌု ခေမတော။
ဥဂ္ဂဟီတံ နိရတ္တံ ဝါ၊ မာ တေ ဝိဇ္ဇိတ္ထ ကိဉ္စနံ။
၁၁၀၅.
‘‘ယံ ပုဗ္ဗေ တံ ဝိသောသေဟိ၊ ပစ္ဆာ တေ မာဟု ကိဉ္စနံ။
မဇ္ဈေ စေ နော ဂဟေဿသိ၊ ဥပသန္တော စရိဿသိ။
၁၁၀၆.
‘‘သဗ္ဗသော နာမရူပသ္မိံ၊ ဝီတဂေဓဿ ဗြာဟ္မဏ။
အာသဝါဿ န ဝိဇ္ဇန္တိ၊ ယေဟိ မစ္စုဝသံ ဝဇေ’’တိ။
ဇတုကဏ္ဏိမာဏဝပုစ္ဆာ ဧကာဒသမာ နိဋ္ဌိတာ။
၁၂. ဘဒြာဝုဓမာဏဝပုစ္ဆာ
၁၁၀၇.
‘‘ဩကဉ္ဇဟံ တဏှစ္ဆိဒံ အနေဇံ၊ (ဣစ္စာယသ္မာ ဘဒြာဝုဓေါ)
နန္ဒိဉ္ဇဟံ ဩဃတိဏ္ဏံ ဝိမုတ္တံ။
ကပ္ပဉ္ဇဟံ အဘိယာစေ သုမေဓံ၊ သုတွာန နာဂဿ အပနမိဿန္တိ ဣတော။
၁၁၀၈.
‘‘နာနာဇနာ ဇနပဒေဟိ သင်္ဂတာ၊ တဝ ဝီရ ဝါက္ယံ အဘိကင်္ခမာနာ။
တေသံ တုဝံ သာဓု ဝိယာကရောဟိ၊ တထာ ဟိ တေ ဝိဒိတော ဧသ ဓမ္မော’’။
၁၁၀၉.
‘‘အာဒါနတဏှံ ဝိနယေထ သဗ္ဗံ၊ (ဘဒြာဝုဓါတိ ဘဂဝါ)
ဥဒ္ဓံ အဓေါ တိရိယဉ္စာပိ မဇ္ဈေ။
ယံ ယဉှိ လောကသ္မိမုပါဒိယန္တိ၊ တေနေဝ မာရော အန္ဝေတိ ဇန္တုံ။
၁၁၁၀.
‘‘တသ္မာ ပဇာနံ န ဥပါဒိယေထ၊ ဘိက္ခု သတော ကိဉ္စနံ သဗ္ဗလောကေ။
အာဒါနသတ္တေ ဣတိ ပေက္ခမာနော၊ ပဇံ ဣမံ မစ္စုဓေယျေ ဝိသတ္တ’’န္တိ။
ဘဒြာဝုဓမာဏဝပုစ္ဆာ ဒွါဒသမာ နိဋ္ဌိတာ။
၁၃. ဥဒယမာဏဝပုစ္ဆာ
၁၁၁၁.
‘‘ဈာယိံ ဝိရဇမာသီနံ၊ (ဣစ္စာယသ္မာ ဥဒယော) ကတကိစ္စံ အနာသဝံ။
ပါရဂုံ သဗ္ဗဓမ္မာနံ၊ အတ္ထိ ပဉ္ဟေန အာဂမံ။
အညာဝိမောက္ခံ ပဗြူဟိ၊ အဝိဇ္ဇာယ ပဘေဒနံ’’။
၁၁၁၂.
‘‘ပဟာနံ ကာမစ္ဆန္ဒာနံ၊ (ဥဒယာတိ ဘဂဝါ) ဒေါမနဿာန စူဘယံ။
ထိနဿ စ ပနူဒနံ၊ ကုက္ကုစ္စာနံ နိဝါရဏံ။
၁၁၁၃.
‘‘ဥပေက္ခာသတိသံသုဒ္ဓံ၊ ဓမ္မတက္ကပုရေဇဝံ။
အညာဝိမောက္ခံ ပဗြူမိ၊ အဝိဇ္ဇာယ ပဘေဒနံ’’။
၁၁၁၄.
‘‘ကိံသု သံယောဇနော လောကော၊ ကိံသု တဿ ဝိစာရဏံ။
ကိဿဿ ဝိပ္ပဟာနေန၊ နိဗ္ဗာနံ ဣတိ ဝုစ္စတိ’’။
၁၁၁၅.
‘‘နန္ဒိသံယောဇနော လောကော၊ ဝိတက္ကဿ ဝိစာရဏံ။
တဏှာယ ဝိပ္ပဟာနေန၊ နိဗ္ဗာနံ ဣတိ ဝုစ္စတိ’’။
၁၁၁၆.
‘‘ကထံ သတဿ စရတော၊ ဝိညာဏံ ဥပရုဇ္ဈတိ။
ဘဂဝန္တံ ပုဋ္ဌုမာဂမ္မ၊ တံ သုဏောမ ဝစော တဝ’’။
၁၁၁၇.
‘‘အဇ္ဈတ္တဉ္စ ဗဟိဒ္ဓါ စ၊ ဝေဒနံ နာဘိနန္ဒတော။
ဧဝံ သတဿ စရတော၊ ဝိညာဏံ ဥပရုဇ္ဈတီ’’တိ။
ဥဒယမာဏဝပုစ္ဆာ တေရသမာ နိဋ္ဌိတာ။
၁၄. ပေါသာလမာဏဝပုစ္ဆာ
၁၁၁၈.
‘‘ယော အတီတံ အာဒိသတိ၊ (ဣစ္စာယသ္မာ ပေါသာလော) အနေဇော ဆိန္နသံသယော။
ပါရဂုံ သဗ္ဗဓမ္မာနံ၊ အတ္ထိ ပဉ္ဟေန အာဂမံ။
၁၁၁၉.
‘‘ဝိဘူတရူပသညိဿ ၊ သဗ္ဗကာယပ္ပဟာယိနော။
အဇ္ဈတ္တဉ္စ ဗဟိဒ္ဓါ စ၊ နတ္ထိ ကိဉ္စီတိ ပဿတော။
ဉာဏံ သက္ကာနုပုစ္ဆာမိ၊ ကထံ နေယျော တထာဝိဓေါ’’။
၁၁၂၀.
‘‘ဝိညာဏဋ္ဌိတိယော သဗ္ဗာ၊ (ပေါသာလာတိ ဘဂဝါ) အဘိဇာနံ တထာဂတော။
တိဋ္ဌန္တမေနံ ဇာနာတိ၊ ဝိမုတ္တံ တပ္ပရာယဏံ။
၁၁၂၁.
‘‘အာကိဉ္စညသမ္ဘဝံ ဉတွာ၊ နန္ဒီ သံယောဇနံ ဣတိ။
ဧဝမေတံ အဘိညာယ၊ တတော တတ္ထ ဝိပဿတိ။
ဧတံ [ဧဝံ (သျာ. က.)] ဉာဏံ တထံ တဿ၊ ဗြာဟ္မဏဿ ဝုသီမတော’’တိ။
ပေါသာလမာဏဝပုစ္ဆာ စုဒ္ဒသမာ နိဋ္ဌိတာ။
၁၅. မောဃရာဇမာဏဝပုစ္ဆာ
၁၁၂၂.
‘‘ဒွါဟံ သက္ကံ အပုစ္ဆိဿံ၊ (ဣစ္စာယသ္မာ မောဃရာဇာ)
န မေ ဗျာကာသိ စက္ခုမာ။
ယာဝတတိယဉ္စ ဒေဝီသိ၊ ဗျာကရောတီတိ မေ သုတံ။
၁၁၂၃.
‘‘အယံ လောကော ပရော လောကော၊ ဗြဟ္မလောကော သဒေဝကော။
ဒိဋ္ဌိံ တေ နာဘိဇာနာတိ၊ ဂေါတမဿ ယသဿိနော။
၁၁၂၄.
‘‘ဧဝံ အဘိက္ကန္တဒဿာဝိံ၊ အတ္ထိ ပဉ္ဟေန အာဂမံ။
ကထံ လောကံ အဝေက္ခန္တံ၊ မစ္စုရာဇာ န ပဿတိ’’။
၁၁၂၅.
‘‘သုညတော လောကံ အဝေက္ခဿု၊ မောဃရာဇ သဒါ သတော။
အတ္တာနုဒိဋ္ဌိံ ဦဟစ္စ၊ ဧဝံ မစ္စုတရော သိယာ။
ဧဝံ လောကံ အဝေက္ခန္တံ၊ မစ္စုရာဇာ န ပဿတီ’’တိ။
မောဃရာဇမာဏဝပုစ္ဆာ ပန္နရသမာ နိဋ္ဌိတာ။
၁၆. ပိင်္ဂိယမာဏဝပုစ္ဆာ
၁၁၂၆.
‘‘ဇိဏ္ဏောဟမသ္မိ အဗလော ဝီတဝဏ္ဏော၊ (ဣစ္စာယသ္မာ ပိင်္ဂိယော)
နေတ္တာ န သုဒ္ဓါ သဝနံ န ဖာသု။
မာဟံ နဿံ မောမုဟော အန္တရာဝ
အာစိက္ခ ဓမ္မံ ယမဟံ ဝိဇညံ။
ဇာတိဇရာယ ဣဓ ဝိပ္ပဟာနံ’’။
၁၁၂၇.
‘‘ဒိသွာန ရူပေသု ဝိဟညမာနေ၊ (ပိင်္ဂိယာတိ ဘဂဝါ)
ရုပ္ပန္တိ ရူပေသု ဇနာ ပမတ္တာ။
တသ္မာ တုဝံ ပိင်္ဂိယ အပ္ပမတ္တော၊
ဇဟဿု ရူပံ အပုနဗ္ဘဝါယ’’။
၁၁၂၈.
‘‘ဒိသာ စတဿော ဝိဒိသာ စတဿော၊ ဥဒ္ဓံ အဓေါ ဒသ ဒိသာ ဣမာယော။
န တုယှံ အဒိဋ္ဌံ အသုတံ အမုတံ [အသုတံ အမုတံ ဝါ (သီ.)၊ အသုတာမုတံ ဝါ (သျာ.)၊ အသုတံ’မုတံ ဝါ (ဣ.)]၊ အထော အဝိညာတံ ကိဉ္စနမတ္ထိ [ကိဉ္စိ မတ္ထိ (သျာ.)၊ ကိဉ္စိ နတ္ထိ (ဣ.)၊ ကိဉ္စိနမတ္ထိ (က.)] လောကေ။
အာစိက္ခ ဓမ္မံ ယမဟံ ဝိဇညံ၊ ဇာတိဇရာယ ဣဓ ဝိပ္ပဟာနံ’’။
၁၁၂၉.
‘‘တဏှာဓိပန္နေ မနုဇေ ပေက္ခမာနော၊ (ပိင်္ဂိယာတိ ဘဂဝါ)
သန္တာပဇာတေ ဇရသာ ပရေတေ။
တသ္မာ တုဝံ ပိင်္ဂိယ အပ္ပမတ္တော၊ ဇဟဿု တဏှံ အပုနဗ္ဘဝါယာ’’တိ။
ပိင်္ဂိယမာဏဝပုစ္ဆာ သောဠသမာ နိဋ္ဌိတာ။
ပါရာယနတ္ထုတိဂါထာ
ဣဒမဝေါစ ဘဂဝါ မဂဓေသု ဝိဟရန္တော ပါသာဏကေ စေတိယေ, ပရိစာရကသောဠသာနံ [ပရိစာရကသောဠသန္နံ (သျာ. က.)] ဗြာဟ္မဏာနံ အဇ္ဈိဋ္ဌော ပုဋ္ဌော ပုဋ္ဌော ပဉ္ဟံ [ပဉ္ဟေ (သီ. ဣ.)] ဗျာကာသိ။ ဧကမေကဿ စေပိ ပဉ္ဟဿ အတ္ထမညာယ ဓမ္မမညာယ ဓမ္မာနုဓမ္မံ ပဋိပဇ္ဇေယျ, ဂစ္ဆေယျေဝ ဇရာမရဏဿ ပါရံ။ ပါရင်္ဂမနီယာ ဣမေ ဓမ္မာတိ, တသ္မာ ဣမဿ ဓမ္မပရိယာယဿ ပါရာယနန္တွေ [ပါရာယဏံတွေဝ (သီ. အဋ္ဌ.)] အဓိဝစနံ။
၁၁၃၀.
အဇိတော တိဿမေတ္တေယျော၊ ပုဏ္ဏကော အထ မေတ္တဂူ။
ဓေါတကော ဥပသီဝေါ စ၊ နန္ဒော စ အထ ဟေမကော။
၁၁၃၁.
တောဒေယျ-ကပ္ပါ ဒုဘယော၊ ဇတုကဏ္ဏီ စ ပဏ္ဍိတော။
ဘဒြာဝုဓေါ ဥဒယော စ၊ ပေါသာလော စာပိ ဗြာဟ္မဏော။
မောဃရာဇာ စ မေဓါဝီ၊ ပိင်္ဂိယော စ မဟာဣသိ။
၁၁၃၂.
ဧတေ ဗုဒ္ဓံ ဥပါဂစ္ဆုံ၊ သမ္ပန္နစရဏံ ဣသိံ။
ပုစ္ဆန္တာ နိပုဏေ ပဉ္ဟေ၊ ဗုဒ္ဓသေဋ္ဌံ ဥပါဂမုံ။
၁၁၃၃.
တေသံ ဗုဒ္ဓေါ ပဗျာကာသိ၊ ပဉ္ဟေ ပုဋ္ဌော ယထာတထံ။
ပဉှာနံ ဝေယျာကရဏေန၊ တောသေသိ ဗြာဟ္မဏေ မုနိ။
၁၁၃၄.
တေ တောသိတာ စက္ခုမတာ၊ ဗုဒ္ဓေနာဒိစ္စဗန္ဓုနာ။
ဗြဟ္မစရိယမစရိံသု၊ ဝရပညဿ သန္တိကေ။
၁၁၃၅.
ဧကမေကဿ ပဉ္ဟဿ၊ ယထာ ဗုဒ္ဓေန ဒေသိတံ။
တထာ ယော ပဋိပဇ္ဇေယျ၊ ဂစ္ဆေ ပါရံ အပါရတော။
၁၁၃၆.
အပါရာ ပါရံ ဂစ္ဆေယျ၊ ဘာဝေန္တော မဂ္ဂမုတ္တမံ။
မဂ္ဂေါ သော ပါရံ ဂမနာယ၊ တသ္မာ ပါရာယနံ ဣတိ။
ပါရာယနာနုဂီတိဂါထာ
၁၁၃၇.
‘‘ပါရာယနမနုဂါယိဿံ၊ (ဣစ္စာယသ္မာ ပိင်္ဂိယော)
ယထာဒ္ဒက္ခိ တထာက္ခာသိ၊ ဝိမလော ဘူရိမေဓသော။
နိက္ကာမော နိဗ္ဗနော [နိဗ္ဗုတော (သျာ.)] နာဂေါ၊ ကိဿ ဟေတု မုသာ ဘဏေ။
၁၁၃၈.
‘‘ပဟီနမလမောဟဿ ၊ မာနမက္ခပ္ပဟာယိနော။
ဟန္ဒာဟံ ကိတ္တယိဿာမိ၊ ဂိရံ ဝဏ္ဏူပသဉှိတံ။
၁၁၃၉.
‘‘တမောနုဒေါ ဗုဒ္ဓေါ သမန္တစက္ခု၊ လောကန္တဂူ သဗ္ဗဘဝါတိဝတ္တော။
အနာသဝေါ သဗ္ဗဒုက္ခပဟီနော၊ သစ္စဝှယော ဗြဟ္မေ ဥပါသိတော မေ။
၁၁၄၀.
‘‘ဒိဇော ယထာ ကုဗ္ဗနကံ ပဟာယ၊ ဗဟုပ္ဖလံ ကာနနမာဝသေယျ။
ဧဝံ ပဟံ အပ္ပဒဿေ ပဟာယ၊ မဟောဒဓိံ ဟံသောရိဝ အဇ္ဈပတ္တော။
၁၁၄၁.
‘‘ယေမေ ပုဗ္ဗေ ဝိယာကံသု၊ ဟုရံ ဂေါတမသာသနာ။
ဣစ္စာသိ ဣတိ ဘဝိဿတိ။
သဗ္ဗံ တံ ဣတိဟိတိဟံ၊ သဗ္ဗံ တံ တက္ကဝဍ္ဎနံ။
၁၁၄၂.
‘‘ဧကော တမနုဒါသိနော၊ ဇုတိမာ သော ပဘင်္ကရော။
ဂေါတမော ဘူရိပညာဏော၊ ဂေါတမော ဘူရိမေဓသော။
၁၁၄၃.
‘‘ယော မေ ဓမ္မမဒေသေသိ၊ သန္ဒိဋ္ဌိကမကာလိကံ။
တဏှက္ခယမနီတိကံ ၊ ယဿ နတ္ထိ ဥပမာ က္ဝစိ’’။
၁၁၄၄.
‘‘ကိံနု တမှာ ဝိပ္ပဝသသိ၊ မုဟုတ္တမပိ ပိင်္ဂိယ။
ဂေါတမာ ဘူရိပညာဏာ၊ ဂေါတမာ ဘူရိမေဓသာ။
၁၁၄၅.
‘‘ယော တေ ဓမ္မမဒေသေသိ၊ သန္ဒိဋ္ဌိကမကာလိကံ။
တဏှက္ခယမနီတိကံ၊ ယဿ နတ္ထိ ဥပမာ က္ဝစိ’’။
၁၁၄၆.
‘‘နာဟံ တမှာ ဝိပ္ပဝသာမိ၊ မုဟုတ္တမပိ ဗြာဟ္မဏ။
ဂေါတမာ ဘူရိပညာဏာ၊ ဂေါတမာ ဘူရိမေဓသာ။
၁၁၄၇.
‘‘ယော မေ ဓမ္မမဒေသေသိ၊ သန္ဒိဋ္ဌိကမကာလိကံ။
တဏှက္ခယမနီတိကံ၊ ယဿ နတ္ထိ ဥပမာ က္ဝစိ။
၁၁၄၈.
‘‘ပဿာမိ နံ မနသာ စက္ခုနာဝ၊ ရတ္တိန္ဒိဝံ ဗြာဟ္မဏ အပ္ပမတ္တော။
နမဿမာနော ဝိဝသေမိ ရတ္တိံ၊ တေနေဝ မညာမိ အဝိပ္ပဝါသံ။
၁၁၄၉.
‘‘သဒ္ဓါ စ ဣတိ စ မနော သတိ စ၊ နာပေန္တိ မေ ဂေါတမသာသနမှာ။
ယံ ယံ ဒိသံ ဝဇတိ ဘူရိပညော၊ သ တေန တေနေဝ နတောဟမသ္မိ။
၁၁၅၀.
‘‘ဇိဏ္ဏဿ မေ ဒုဗ္ဗလထာမကဿ၊ တေနေဝ ကာယော န ပလေတိ တတ္ထ။
သံကပ္ပယန္တာယ [သံကပ္ပယတ္တာယ (သီ.)] ဝဇာမိ နိစ္စံ၊ မနော ဟိ မေ ဗြာဟ္မဏ တေန ယုတ္တော။
၁၁၅၁.
‘‘ပင်္ကေ သယာနော ပရိဖန္ဒမာနော၊ ဒီပါ ဒီပံ ဥပပ္လဝိံ [ဥပလ္လဝိံ (သျာ. နိဒ္ဒေသ)]။
အထဒ္ဒသာသိံ သမ္ဗုဒ္ဓံ၊ ဩဃတိဏ္ဏမနာသဝံ’’။
၁၁၅၂.
‘‘ယထာ အဟူ ဝက္ကလိ မုတ္တသဒ္ဓေါ၊ ဘဒြာဝုဓေါ အာဠဝိ ဂေါတမော စ။
ဧဝမေဝ တ္ဝမ္ပိ ပမုဉ္စဿု သဒ္ဓံ၊
ဂမိဿသိ တွံ ပိင်္ဂိယ မစ္စုဓေယျဿ ပါရံ’’ [မစ္စုဓေယျပါရံ (သီ.)]။
၁၁၅၃.
‘‘ဧသ ဘိယျော ပသီဒါမိ၊ သုတွာန မုနိနော ဝစော။
ဝိဝဋ္ဋစ္ဆဒေါ သမ္ဗုဒ္ဓေါ၊ အခိလော ပဋိဘာနဝါ။
၁၁၅၄.
‘‘အဓိဒေဝေ အဘိညာယ၊ သဗ္ဗံ ဝေဒိ ဝရောဝရံ [ပရော ဝရံ (သီ. သျာ.)၊ ပရော ပရံ (နိဒ္ဒေသ)]။
ပဉှာနန္တကရော သတ္ထာ၊ ကင္ခီနံ ပဋိဇာနတံ။
၁၁၅၅.
‘‘အသံဟီရံ အသင္ကုပ္ပံ၊ ယဿ နတ္ထိ ဥပမာ က္ဝစိ။
အဒ္ဓါ ဂမိဿာမိ န မေတ္ထ ကင်္ခါ၊ ဧဝံ မံ ဓါရေဟိ အဓိမုတ္တစိတ္တ’’န္တိ။
ပါရာယနဝဂ္ဂေါ ပဉ္စမော နိဋ္ဌိတော။
သုတ္တုဒ္ဒါနံ –
၁.
ဥရဂေါ [ဣမာ ဥဒ္ဒါနဂါထာယော သီ. ဣ. ပေါတ္ထကေသု န သန္တိ] ဓနိယောပိ စ၊ ခဂ္ဂဝိသာဏော ကသိ စ။
စုန္ဒော ဘဝေါ ပုနဒေဝ၊ ဝသလော စ ကရဏီယဉ္စ။
ဟေမဝတော အထ ယက္ခော၊ ဝိဇယသုတ္တံ မုနိသုတ္တဝရန္တိ။
၂.
ပဌမကဋ္ဌဝရော ဝရဝဂ္ဂေါ၊ ဒွါဒသသုတ္တဓရော သုဝိဘတ္တော။
ဒေသိတော စက္ခုမတာ ဝိမလေန၊ သုယျတိ ဝဂ္ဂဝရော ဥရဂေါတိ။
၃.
ရတနာမဂန္ဓော ဟိရိမင်္ဂလနာမော၊ သုစိလောမကပိလော စ ဗြာဟ္မဏဓမ္မော။
နာဝါ [နာထ (က.)] ကိံသီလဥဋ္ဌဟနော စ၊ ရာဟုလော စ ပုနပိ ဝင္ဂီသော။
၄.
သမ္မာပရိဗ္ဗာဇနီယောပိ စေတ္ထ၊ ဓမ္မိကသုတ္တဝရော သုဝိဘတ္တော။
စုဒ္ဒသသုတ္တဓရော ဒုတိယမှိ၊ စူဠကဝဂ္ဂဝရောတိ တမာဟု။
၅.
ပဗ္ဗဇ္ဇပဓါနသုဘာသိတနာမော၊ ပူရဠာသော ပုနဒေဝ မာဃော စ။
သဘိယံ ကေဏိယမေဝ သလ္လနာမော၊ ဝါသေဋ္ဌဝရော ကာလိကောပိ စ။
၆.
နာလကသုတ္တဝရော သုဝိဘတ္တော၊ တံ အနုပဿီ တထာ ပုနဒေဝ။
ဒွါဒသသုတ္တဓရော တတိယမှိ၊ သုယျတိ ဝဂ္ဂဝရော မဟာနာမော။
၇.
ကာမဂုဟဋ္ဌကဒုဋ္ဌကနာမာ ၊ သုဒ္ဓဝရော ပရမဋ္ဌကနာမော။
ဇရာ မေတ္တိယဝရော သုဝိဘတ္တော၊ ပသူရမာဂဏ္ဍိယာ ပုရာဘေဒေါ။
၈.
ကလဟဝိဝါဒေါ ဥဘော ဝိယုဟာ စ၊ တုဝဋကအတ္တဒဏ္ဍသာရိပုတ္တာ။
သောဠသသုတ္တဓရော စတုတ္ထမှိ၊ အဋ္ဌကဝဂ္ဂဝရောတိ တမာဟု။
၉.
မဂဓေ ဇနပဒေ ရမဏီယေ၊ ဒေသဝရေ ကတပုညနိဝေသေ။
ပါသာဏကစေတိယဝရေ သုဝိဘတ္တေ၊ ဝသိ ဘဂဝါ ဂဏသေဋ္ဌော။
၁၀.
ဥဘယဝါသမာဂတိယမှိ [ဥဘယံ ဝါ ပုဏ္ဏသမာဂတံ ယမှိ (သျာ.)]၊ ဒွါဒသယောဇနိယာ ပရိသာယ။
သောဠသဗြာဟ္မဏာနံ ကိရ ပုဋ္ဌော၊ ပုစ္ဆာယ သောဠသပဉ္ဟကမ္မိယာ။
နိပ္ပကာသယိ ဓမ္မမဒါသိ။
၁၁.
အတ္ထပကာသကဗျဉ္ဇနပုဏ္ဏံ၊ ဓမ္မမဒေသေသိ ပရခေမဇနိယံ [ဝရံ ခမနီယံ (က.)]။
လောကဟိတာယ ဇိနော ဒွိပဒဂ္ဂေါ၊ သုတ္တဝရံ ဗဟုဓမ္မဝိစိတ္ရံ။
သဗ္ဗကိလေသပမောစနဟေတုံ၊ ဒေသယိ သုတ္တဝရံ ဒွိပဒဂ္ဂေါ။
၁၂.
ဗျဉ္ဇနမတ္ထပဒံ သမယုတ္တံ [ဗျဉ္ဇနမတ္ထပဒသမယုတ္တံ (သျာ.)]၊ အက္ခရသညိတဩပမဂါဠှံ။
လောကဝိစာရဏဉာဏပဘဂ္ဂံ၊ ဒေသယိ သုတ္တဝရံ ဒွိပဒဂ္ဂေါ။
၁၃.
ရာဂမလေ အမလံ ဝိမလဂ္ဂံ၊ ဒေါသမလေ အမလံ ဝိမလဂ္ဂံ။
မောဟမလေ အမလံ ဝိမလဂ္ဂံ၊ လောကဝိစာရဏဉာဏပဘဂ္ဂံ။
ဒေသယိ သုတ္တဝရံ ဒွိပဒဂ္ဂေါ။
၁၄.
က္လေသမလေ အမလံ ဝိမလဂ္ဂံ၊ ဒုစ္စရိတမလေ အမလံ ဝိမလဂ္ဂံ။
လောကဝိစာရဏဉာဏပဘဂ္ဂံ၊ ဒေသယိ သုတ္တဝရံ ဒွိပဒဂ္ဂေါ။
၁၅.
အာသဝဗန္ဓနယောဂါကိလေသံ၊ နီဝရဏာနိ စ တီဏိ မလာနိ။
တဿ ကိလေသပမောစနဟေတုံ၊ ဒေသယိ သုတ္တဝရံ ဒွိပဒဂ္ဂေါ။
၁၆.
နိမ္မလသဗ္ဗကိလေသပနူဒံ၊ ရာဂဝိရာဂမနေဇမသောကံ။
သန္တပဏီတသုဒုဒ္ဒသဓမ္မံ၊ ဒေသယိ သုတ္တဝရံ ဒွိပဒဂ္ဂေါ။
၁၇.
ရာဂဉ္စ ဒေါသကမဘဉ္ဇိတသန္တံ [ဒေါသဉ္စ ဘဉ္ဇိတသန္တံ (သျာ.)]၊ ယောနိစတုဂ္ဂတိပဉ္စဝိညာဏံ။
တဏှာရတစ္ဆဒနတာဏလတာပမောက္ခံ [တဏှာတလရတစ္ဆေဒနတာဏပမောက္ခံ (သျာ.)]၊ ဒေသယိ သုတ္တဝရံ ဒွိပဒဂ္ဂေါ။
၁၈.
ဂမ္ဘီရဒုဒ္ဒသသဏှနိပုဏံ၊ ပဏ္ဍိတဝေဒနိယံ နိပုဏတ္ထံ။
လောကဝိစာရဏဉာဏပဘဂ္ဂံ၊ ဒေသယိ သုတ္တဝရံ ဒွိပဒဂ္ဂေါ။
၁၉.
နဝင်္ဂကုသုမမာလဂီဝေယျံ၊ ဣန္ဒ္ရိယဈာနဝိမောက္ခဝိဘတ္တံ။
အဋ္ဌင်္ဂမဂ္ဂဓရံ ဝရယာနံ၊ ဒေသယိ သုတ္တဝရံ ဒွိပဒဂ္ဂေါ။
၂၀.
သောမုပမံ ဝိမလံ ပရိသုဒ္ဓံ၊ အဏ္ဏဝမူပမရတနသုစိတ္တံ။
ပုပ္ဖသမံ ရဝိမူပမတေဇံ၊ ဒေသယိ သုတ္တဝရံ ဒွိပဒဂ္ဂေါ။
၂၁.
ခေမသိဝံ သုခသီတလသန္တံ၊ မစ္စုတတာဏပရံ ပရမတ္ထံ။
တဿ သုနိဗ္ဗုတဒဿနဟေတုံ၊ ဒေသယိ သုတ္တဝရံ ဒွိပဒဂ္ဂေါတိ။
သုတ္တနိပါတပါဠိ နိဋ္ဌိတာ။