၄. အဋ္ဌကဝဂ္ဂ
၁. ကာမသုတ္တံ
၇၇၂.
ကာမံ ကာမယမာနဿ၊ တဿ စေ တံ သမိဇ္ဈတိ။
အဒ္ဓါ ဣတိမနော ဟောတိ၊ လဒ္ဓါ မစ္စော ယဒိစ္ဆတိ။
၇၇၃.
တဿ စေ ကာမယာနဿ [ကာမယမာနဿ (က.)]၊ ဆန္ဒဇာတဿ ဇန္တုနော။
တေ ကာမာ ပရိဟာယန္တိ၊ သလ္လဝိဒ္ဓေါဝ ရုပ္ပတိ။
၇၇၄.
ယော ကာမေ ပရိဝဇ္ဇေတိ၊ သပ္ပဿေဝ ပဒါ သိရော။
သောမံ [သော ဣမံ (သီ. ဣ.)] ဝိသတ္တိကံ လောကေ၊ သတော သမတိဝတ္တတိ။
၇၇၅.
ခေတ္တံ ဝတ္ထုံ ဟိရညံ ဝါ၊ ဂဝဿံ [ဂဝါဿံ (သီ. သျာ. ဣ.)] ဒါသပေါရိသံ။
ထိယော ဗန္ဓူ ပုထု ကာမေ၊ ယော နရော အနုဂိဇ္ဈတိ။
၇၇၆.
အဗလာ နံ ဗလီယန္တိ၊ မဒ္ဒန္တေနံ ပရိဿယာ။
တတော နံ ဒုက္ခမန္ဝေတိ၊ နာဝံ ဘိန္နမိဝေါဒကံ။
၇၇၇.
တသ္မာ ဇန္တု သဒါ သတော၊ ကာမာနိ ပရိဝဇ္ဇယေ။
တေ ပဟာယ တရေ ဩဃံ၊ နာဝံ သိတွာဝ [သိဉ္စိတွာ (သီ.)] ပါရဂူတိ။
ကာမသုတ္တံ ပဌမံ နိဋ္ဌိတံ။
၂. ဂုဟဋ္ဌကသုတ္တံ
၇၇၈.
သတ္တော ဂုဟာယံ ဗဟုနာဘိဆန္နော၊ တိဋ္ဌံ နရော မောဟနသ္မိံ ပဂါဠ္ဟော။
ဒူရေ ဝိဝေကာ ဟိ တထာဝိဓေါ သော၊ ကာမာ ဟိ လောကေ န ဟိ သုပ္ပဟာယာ။
၇၇၉.
ဣစ္ဆာနိဒါနာ ဘဝသာတဗဒ္ဓါ၊ တေ ဒုပ္ပမုဉ္စာ န ဟိ အညမောက္ခာ။
ပစ္ဆာ ပုရေ ဝါပိ အပေက္ခမာနာ၊ ဣမေဝ ကာမေ ပုရိမေဝ ဇပ္ပံ။
၇၈၀.
ကာမေသု ဂိဒ္ဓါ ပသုတာ ပမူဠှာ၊ အဝဒါနိယာ တေ ဝိသမေ နိဝိဋ္ဌာ။
ဒုက္ခူပနီတာ ပရိဒေဝယန္တိ၊ ကိံသူ ဘဝိဿာမ ဣတော စုတာသေ။
၇၈၁.
တသ္မာ ဟိ သိက္ခေထ ဣဓေဝ ဇန္တု၊ ယံ ကိဉ္စိ ဇညာ ဝိသမန္တိ လောကေ။
န တဿ ဟေတူ ဝိသမံ စရေယျ၊ အပ္ပဉှိဒံ ဇီဝိတမာဟု ဓီရာ။
၇၈၂.
ပဿာမိ လောကေ ပရိဖန္ဒမာနံ၊ ပဇံ ဣမံ တဏှဂတံ ဘဝေသု။
ဟီနာ နရာ မစ္စုမုခေ လပန္တိ၊ အဝီတတဏှာသေ ဘဝါဘဝေသု။
၇၈၃.
မမာယိတေ ပဿထ ဖန္ဒမာနေ၊ မစ္ဆေဝ အပ္ပောဒကေ ခီဏသောတေ။
ဧတမ္ပိ ဒိသွာ အမမော စရေယျ၊ ဘဝေသု အာသတ္တိမကုဗ္ဗမာနော။
၇၈၄.
ဥဘောသု အန္တေသု ဝိနေယျ ဆန္ဒံ၊ ဖဿံ ပရိညာယ အနာနုဂိဒ္ဓေါ။
ယဒတ္တဂရဟီ တဒကုဗ္ဗမာနော၊ န လိပ္ပတီ [န လိမ္ပတီ (သျာ. က.)] ဒိဋ္ဌသုတေသု ဓီရော။
၇၈၅.
သညံ ပရိညာ ဝိတရေယျ ဩဃံ၊ ပရိဂ္ဂဟေသု မုနိ နောပလိတ္တော။
အဗ္ဗူဠှသလ္လော စရမပ္ပမတ္တော၊ နာသီသတီ [နာသိံသတီ (သီ. သျာ. ဣ.)] လောကမိမံ ပရဉ္စာတိ။
ဂုဟဋ္ဌကသုတ္တံ ဒုတိယံ နိဋ္ဌိတံ။
၃. ဒုဋ္ဌဋ္ဌကသုတ္တံ
၇၈၆.
ဝဒန္တိ ဝေ ဒုဋ္ဌမနာပိ ဧကေ၊ အထောပိ ဝေ သစ္စမနာ ဝဒန္တိ။
ဝါဒဉ္စ ဇာတံ မုနိ နော ဥပေတိ၊ တသ္မာ မုနီ နတ္ထိ ခိလော ကုဟိဉ္စိ။
၇၈၇.
သကဉှိ ဒိဋ္ဌိံ ကထမစ္စယေယျ၊ ဆန္ဒာနုနီတော ရုစိယာ နိဝိဋ္ဌော။
သယံ သမတ္တာနိ ပကုဗ္ဗမာနော၊ ယထာ ဟိ ဇာနေယျ တထာ ဝဒေယျ။
၇၈၈.
ယော အတ္တနော သီလဝတာနိ ဇန္တု၊ အနာနုပုဋ္ဌောဝ ပရေသ [ပရဿ (က.)] ပါဝ [ပါဝါ (သီ. သျာ. ဣ.)]။
အနရိယဓမ္မံ ကုသလာ တမာဟု၊ ယော အာတုမာနံ သယမေဝ ပါဝ။
၇၈၉.
သန္တော စ ဘိက္ခု အဘိနိဗ္ဗုတတ္တော၊ ဣတိဟန္တိ သီလေသု အကတ္ထမာနော။
တမရိယဓမ္မံ ကုသလာ ဝဒန္တိ၊ ယဿုဿဒါ နတ္ထိ ကုဟိဉ္စိ လောကေ။
၇၉၀.
ပကပ္ပိတာ သင်္ခတာ ယဿ ဓမ္မာ၊ ပုရက္ခတာ [ပုရေက္ခတာ (သီ.)] သန္တိ အဝီဝဒါတာ။
ယဒတ္တနိ ပဿတိ အာနိသံသံ၊ တံ နိဿိတော ကုပ္ပပဋိစ္စ သန္တိံ။
၇၉၁.
ဒိဋ္ဌီနိဝေသာ န ဟိ သွာတိဝတ္တာ၊ ဓမ္မေသု နိစ္ဆေယျ သမုဂ္ဂဟီတံ။
တသ္မာ နရော တေသု နိဝေသနေသု၊ နိရဿတီ အာဒိယတီ စ ဓမ္မံ။
၇၉၂.
ဓေါနဿ ဟိ နတ္ထိ ကုဟိဉ္စိ လောကေ၊ ပကပ္ပိတာ ဒိဋ္ဌိ ဘဝါဘဝေသု။
မာယဉ္စ မာနဉ္စ ပဟာယ ဓေါနော၊ သ ကေန ဂစ္ဆေယျ အနူပယော သော။
၇၉၃.
ဥပယော ဟိ ဓမ္မေသု ဥပေတိ ဝါဒံ၊ အနူပယံ ကေန ကထံ ဝဒေယျ။
အတ္တာ နိရတ္တာ [အတ္တံ နိရတ္တံ (ဗဟူသု)] န ဟိ တဿ အတ္ထိ၊ အဓေါသိ သော ဒိဋ္ဌိမိဓေဝ သဗ္ဗန္တိ။
ဒုဋ္ဌဋ္ဌကသုတ္တံ တတိယံ နိဋ္ဌိတံ။
၄. သုဒ္ဓဋ္ဌကသုတ္တံ
၇၉၄.
ပဿာမိ သုဒ္ဓံ ပရမံ အရောဂံ၊ ဒိဋ္ဌေန သံသုဒ္ဓိ နရဿ ဟောတိ။
ဧဝါဘိဇာနံ [ဧတာဘိဇာနံ (သီ. ဣ.)] ပရမန္တိ ဉတွာ၊ သုဒ္ဓါနုပဿီတိ ပစ္စေတိ ဉာဏံ။
၇၉၅.
ဒိဋ္ဌေန စေ သုဒ္ဓိ နရဿ ဟောတိ၊ ဉာဏေန ဝါ သော ပဇဟာတိ ဒုက္ခံ။
အညေန သော သုဇ္ဈတိ သောပဓီကော၊ ဒိဋ္ဌီ ဟိ နံ ပါဝ တထာ ဝဒါနံ။
၇၉၆.
န ဗြာဟ္မဏော အညတော သုဒ္ဓိမာဟ၊ ဒိဋ္ဌေ သုတေ သီလဝတေ မုတေ ဝါ။
ပုညေ စ ပါပေ စ အနူပလိတ္တော၊ အတ္တဉ္ဇဟော နယိဓ ပကုဗ္ဗမာနော။
၇၉၇.
ပုရိမံ ပဟာယ အပရံ သိတာသေ၊ ဧဇာနုဂါ တေ န တရန္တိ သင်္ဂံ။
တေ ဥဂ္ဂဟာယန္တိ နိရဿဇန္တိ၊ ကဣဝ သာခံ ပမုဉ္စံ ဂဟာယံ [ပမုခံ ဂဟာယ (သျာ.)၊ ပမုဉ္စ ဂဟာယ (က.)]။
၇၉၈.
သယံ သမာဒါယ ဝတာနိ ဇန္တု၊ ဥစ္စာဝစံ ဂစ္ဆတိ သညသတ္တော။
ဝိဒွါ စ ဝေဒေဟိ သမေစ္စ ဓမ္မံ၊ န ဥစ္စာဝစံ ဂစ္ဆတိ ဘူရိပညော။
၇၉၉.
သ သဗ္ဗဓမ္မေသု ဝိသေနိဘူတော၊ ယံ ကိဉ္စိ ဒိဋ္ဌံ ဝ သုတံ မုတံ ဝါ။
တမေဝ ဒသ္သိံ ဝိဝဋံ စရန္တံ၊ ကေနီဓ လောကသ္မိ ဝိကပ္ပယေယျ။
၈၀၀.
န ကပ္ပယန္တိ န ပုရေက္ခရောန္တိ၊ အစ္စန္တသုဒ္ဓီတိ န တေ ဝဒန္တိ။
အာဒါနဂန္ထံ ဂထိတံ ဝိသဇ္ဇ၊ အာသံ န ကုဗ္ဗန္တိ ကုဟိဉ္စိ လောကေ။
၈၀၁.
သီမာတိဂေါ ဗြာဟ္မဏော တဿ နတ္ထိ၊ ဉတွာ ဝ ဒိသွာ ဝ [ဉတွာ စ ဒိသွာ စ (က. သီ. က.)] သမုဂ္ဂဟီတံ။
န ရာဂရာဂီ န ဝိရာဂရတ္တော၊ တဿီဓ နတ္ထီ ပရမုဂ္ဂဟီတန္တိ။
သုဒ္ဓဋ္ဌကသုတ္တံ စတုတ္ထံ နိဋ္ဌိတံ။
၅. ပရမဋ္ဌကသုတ္တံ
၈၀၂.
ပရမန္တိ ဒိဋ္ဌီသု ပရိဗ္ဗသာနော၊ ယဒုတ္တရိ ကုရုတေ ဇန္တု လောကေ။
ဟီနာတိ အညေ တတော သဗ္ဗမာဟ၊ တသ္မာ ဝိဝါဒါနိ အဝီတိဝတ္တော။
၈၀၃.
ယဒတ္တနီ ပဿတိ အာနိသံသံ၊ ဒိဋ္ဌေ သုတေ သီလဝတေ [သီလဗ္ဗတေ (သျာ.)] မုတေ ဝါ။
တဒေဝ သော တတ္ထ သမုဂ္ဂဟာယ၊ နိဟီနတော ပဿတိ သဗ္ဗမညံ။
၈၀၄.
တံ ဝါပိ ဂန္ထံ ကုသလာ ဝဒန္တိ၊ ယံ နိဿိတော ပဿတိ ဟီနမညံ။
တသ္မာ ဟိ ဒိဋ္ဌံ ဝ သုတံ မုတံ ဝါ၊ သီလဗ္ဗတံ ဘိက္ခု န နိဿယေယျ။
၈၀၅.
ဒိဋ္ဌိမ္ပိ လောကသ္မိံ န ကပ္ပယေယျ၊ ဉာဏေန ဝါ သီလဝတေန ဝါပိ။
သမောတိ အတ္တာနမနူပနေယျ၊ ဟီနော န မညေထ ဝိသေသိ ဝါပိ။
၈၀၆.
အတ္တံ ပဟာယ အနုပါဒိယာနော၊ ဉာဏေပိ သော နိဿယံ နော ကရောတိ။
သ ဝေ ဝိယတ္တေသု [ဝိယုတ္တေသု (သီ. အဋ္ဌ.)၊ ဒွိယတ္တေသု (က.)] န ဝဂ္ဂသာရီ၊ ဒိဋ္ဌိမ္ပိ [ဒိဋ္ဌိမပိ (က.)] သော န ပစ္စေတိ ကိဉ္စိ။
၈၀၇.
ယဿူဘယန္တေ ပဏိဓီဓ နတ္ထိ၊ ဘဝါဘဝါယ ဣဓ ဝါ ဟုရံ ဝါ။
နိဝေသနာ တဿ န သန္တိ ကေစိ၊ ဓမ္မေသု နိစ္ဆေယျ သမုဂ္ဂဟီတံ။
၈၀၈.
တဿီဓ ဒိဋ္ဌေ ဝ သုတေ မုတေ ဝါ၊ ပကပ္ပိတာ နတ္ထိ အဏူပိ သညာ။
တံ ဗြာဟ္မဏံ ဒိဋ္ဌိမနာဒိယာနံ၊ ကေနီဓ လောကသ္မိံ ဝိကပ္ပယေယျ။
၈၀၉.
န ကပ္ပယန္တိ န ပုရေက္ခရောန္တိ၊ ဓမ္မာပိ တေသံ န ပဋိစ္ဆိတာသေ။
န ဗြာဟ္မဏော သီလဝတေန နေယျော၊ ပါရင်္ဂတော န ပစ္စေတိ တာဒီတိ။
ပရမဋ္ဌကသုတ္တံ ပဉ္စမံ နိဋ္ဌိတံ။
၆. ဇရာသုတ္တံ
၈၁၀.
အပ္ပံ ဝတ ဇီဝိတံ ဣဒံ၊ ဩရံ ဝဿသတာပိ မိယျတိ [မီယတိ (သီ. အဋ္ဌ.)]။
ယော စေပိ အတိစ္စ ဇီဝတိ၊ အထ ခေါ သော ဇရသာပိ မိယျတိ။
၈၁၁.
သောစန္တိ ဇနာ မမာယိတေ၊ န ဟိ သန္တိ [န ဟိ သန္တာ (သီ.)၊ န ဟီ သန္တိ (ကတ္ထစိ)] နိစ္စာ ပရိဂ္ဂဟာ။
ဝိနာဘာဝသန္တမေဝိဒံ၊ ဣတိ ဒိသွာ နာဂါရမာဝသေ။
၈၁၂.
မရဏေနပိ တံ ပဟီယတိ [ပဟိယျတိ (သီ. သျာ. က.)]၊ ယံ ပုရိသော မမိဒန္တိ [မမယိဒန္တိ (သီ. သျာ. က.)၊ မမာယန္တိ (က.)] မညတိ။
ဧတမ္ပိ ဝိဒိတွာ [ဧတံ ဒိသွာန (နိဒ္ဒေသေ)၊ ဧတမ္ပိ ဝိဒိတ္ဝ (?)] ပဏ္ဍိတော၊ န မမတ္တာယ နမေထ မာမကော။
၈၁၃.
သုပိနေန ယထာပိ သင်္ဂတံ၊ ပဋိဗုဒ္ဓေါ ပုရိသော န ပဿတိ။
ဧဝမ္ပိ ပိယာယိတံ ဇနံ၊ ပေတံ ကာလကတံ န ပဿတိ။
၈၁၄.
ဒိဋ္ဌာပိ သုတာပိ တေ ဇနာ၊ ယေသံ နာမမိဒံ ပဝုစ္စတိ [နာမမေဝါ ဝသိဿတိ (သီ. သျာ. ဣ.)]။
နာမံယေဝါဝသိဿတိ၊ အက္ခေယျံ ပေတဿ ဇန္တုနော။
၈၁၅.
သောကပ္ပရိဒေဝမစ္ဆရံ [သောကပရိဒေဝမစ္ဆရံ (သီ. သျာ. ဣ.)၊ သောကံ ပရိဒေဝမစ္ဆရံ (?)]၊ န ဇဟန္တိ ဂိဒ္ဓါ မမာယိတေ။
တသ္မာ မုနယော ပရိဂ္ဂဟံ၊ ဟိတွာ အစရိံသု ခေမဒဿိနော။
၈၁၆.
ပတိလီနစရဿ ဘိက္ခုနော၊ ဘဇမာနဿ ဝိဝိတ္တမာသနံ။
သာမဂ္ဂိယမာဟု တဿ တံ၊ ယော အတ္တာနံ ဘဝနေ န ဒဿယေ။
၈၁၇.
သဗ္ဗတ္ထ မုနီ အနိဿိတော၊ န ပိယံ ကုဗ္ဗတိ နောပိ အပ္ပိယံ။
တသ္မိံ ပရိဒေဝမစ္ဆရံ၊ ပဏ္ဏေ ဝါရိ ယထာ န လိမ္ပတိ [လိပ္ပတိ (သီ. ဣ.)]။
၈၁၈.
ဥဒဗိန္ဒု ယထာပိ ပေါက္ခရေ၊ ပဒုမေ ဝါရိ ယထာ န လိမ္ပတိ။
ဧဝံ မုနိ နောပလိမ္ပတိ၊ ယဒိဒံ ဒိဋ္ဌသုတံ မုတေသု ဝါ။
၈၁၉.
ဓေါနော န ဟိ တေန မညတိ၊ ယဒိဒံ ဒိဋ္ဌသုတံ မုတေသု ဝါ။
နာညေန ဝိသုဒ္ဓိမိစ္ဆတိ၊ န ဟိ သော ရဇ္ဇတိ နော ဝိရဇ္ဇတီတိ။
ဇရာသုတ္တံ ဆဋ္ဌံ နိဋ္ဌိတံ။
၇. တိဿမေတ္တေယျသုတ္တံ
၈၂၀.
‘‘မေထုနမနုယုတ္တဿ၊ (ဣစ္စာယသ္မာ တိဿော မေတ္တေယျော) ဝိဃာတံ ဗြူဟိ မာရိသ။
သုတွာန တဝ သာသနံ၊ ဝိဝေကေ သိက္ခိဿာမသေ။
၈၂၁.
‘‘မေထုနမနုယုတ္တဿ၊ (မေတ္တေယျာတိ ဘဂဝါ) မုဿတေ ဝါပိ သာသနံ။
မိစ္ဆာ စ ပဋိပဇ္ဇတိ၊ ဧတံ တသ္မိံ အနာရိယံ။
၈၂၂.
‘‘ဧကော ပုဗ္ဗေ စရိတွာန၊ မေထုနံ ယော နိသေဝတိ။
ယာနံ ဘန္တံ ဝ တံ လောကေ၊ ဟီနမာဟု ပုထုဇ္ဇနံ။
၈၂၃.
‘‘ယသော ကိတ္တိ စ ယာ ပုဗ္ဗေ၊ ဟာယတေ ဝါပိ တဿ သာ။
ဧတမ္ပိ ဒိသွာ သိက္ခေထ၊ မေထုနံ ဝိပ္ပဟာတဝေ။
၈၂၄.
‘‘သင်္ကပ္ပေဟိ ပရေတော သော၊ ကပဏော ဝိယ ဈာယတိ။
သုတွာ ပရေသံ နိဂ္ဃောသံ၊ မင္ကု ဟောတိ တထာဝိဓေါ။
၈၂၅.
‘‘အထ သတ္ထာနိ ကုရုတေ၊ ပရဝါဒေဟိ စောဒိတော။
ဧသ ခွဿ မဟာဂေဓေါ၊ မောသဝဇ္ဇံ ပဂါဟတိ။
၈၂၆.
‘‘ပဏ္ဍိတောတိ သမညာတော၊ ဧကစရိယံ အဓိဋ္ဌိတော။
အထာပိ [သ စာပိ (နိဒ္ဒေသေ)] မေထုနေ ယုတ္တော၊ မန္ဒောဝ ပရိကိဿတိ [ပရိကိလိဿတိ (သီ.)]။
၈၂၇.
‘‘ဧတမာဒီနဝံ ဉတွာ၊ မုနိ ပုဗ္ဗာပရေ ဣဓ။
ဧကစရိယံ ဒဠှံ ကယိရာ၊ န နိသေဝေထ မေထုနံ။
၈၂၈.
‘‘ဝိဝေကညေဝ သိက္ခေထ၊ ဧတဒရိယာနမုတ္တမံ။
န တေန သေဋ္ဌော မညေထ၊ သ ဝေ နိဗ္ဗာနသန္တိကေ။
၈၂၉.
‘‘ရိတ္တဿ မုနိနော စရတော၊ ကာမေသု အနပေက္ခိနော။
ဩဃတိဏ္ဏဿ ပိဟယန္တိ၊ ကာမေသု ဂဓိတာ [ဂထိတာ (သီ.)] ပဇာ’’တိ။
တိဿမေတ္တေယျသုတ္တံ သတ္တမံ နိဋ္ဌိတံ။
၈. ပသူရသုတ္တံ
၈၃၀.
ဣဓေဝ သုဒ္ဓိ ဣတိ ဝါဒယန္တိ [ဝိဒိယန္တိ (သီ. ဣ.)]၊ နာညေသု ဓမ္မေသု ဝိသုဒ္ဓိမာဟု။
ယံ နိဿိတာ တတ္ထ သုဘံ ဝဒါနာ၊ ပစ္စေကသစ္စေသု ပုထူ နိဝိဋ္ဌာ။
၈၃၁.
တေ ဝါဒကာမာ ပရိသံ ဝိဂယှ၊ ဗာလံ ဒဟန္တီ မိထု အညမညံ။
ဝဒန္တိ တေ အညသိတာ ကထောဇ္ဇံ၊ ပသံသကာမာ ကုသလာ ဝဒါနာ။
၈၃၂.
ယုတ္တော ကထာယံ ပရိသာယ မဇ္ဈေ၊ ပသံသမိစ္ဆံ ဝိနိဃာတိ ဟောတိ။
အပါဟတသ္မိံ ပန မင္ကု ဟောတိ၊ နိန္ဒာယ သော ကုပ္ပတိ ရန္ဓမေသီ။
၈၃၃.
ယမဿ ဝါဒံ ပရိဟီနမာဟု၊ အပါဟတံ ပဉ္ဟဝိမံသကာသေ။
ပရိဒေဝတိ သောစတိ ဟီနဝါဒေါ၊ ဥပစ္စဂါ မန္တိ အနုတ္ထုနာတိ။
၈၃၄.
ဧတေ ဝိဝါဒါ သမဏေသု ဇာတာ၊ ဧတေသု ဥဂ္ဃါတိ နိဃာတိ ဟောတိ။
ဧတမ္ပိ ဒိသွာ ဝိရမေ ကထောဇ္ဇံ၊ န ဟညဒတ္ထတ္ထိပသံသလာဘာ။
၈၃၅.
ပသံသိတော ဝါ ပန တတ္ထ ဟောတိ၊ အက္ခာယ ဝါဒံ ပရိသာယ မဇ္ဈေ။
သော ဟဿတီ ဥဏ္ဏမတီ [ဥန္နမတီ (?)] စ တေန၊ ပပ္ပုယျ တမတ္ထံ ယထာ မနော အဟု။
၈၃၆.
ယာ ဥဏ္ဏတီ [ဥန္နတီ (?)] သာဿ ဝိဃာတဘူမိ၊ မာနာတိမာနံ ဝဒတေ ပနေသော။
ဧတမ္ပိ ဒိသွာ န ဝိဝါဒယေထ၊ န ဟိ တေန သုဒ္ဓိံ ကုသလာ ဝဒန္တိ။
၈၃၇.
သူရော ယထာ ရာဇခါဒါယ ပုဋ္ဌော၊ အဘိဂဇ္ဇမေတိ ပဋိသူရမိစ္ဆံ။
ယေနေဝ သော တေန ပလေဟိ သူရ၊ ပုဗ္ဗေဝ နတ္ထိ ယဒိဒံ ယုဓါယ။
၈၃၈.
ယေ ဒိဋ္ဌိမုဂ္ဂယှ ဝိဝါဒယန္တိ [ဝိဝါဒိယန္တိ (သီ. ဣ.)]၊ ဣဒမေဝ သစ္စန္တိ စ ဝါဒယန္တိ။
တေ တွံ ဝဒဿူ န ဟိ တေဓ အတ္ထိ၊ ဝါဒမှိ ဇာတေ ပဋိသေနိကတ္တာ။
၈၃၉.
ဝိသေနိကတွာ ပန ယေ စရန္တိ၊ ဒိဋ္ဌီဟိ ဒိဋ္ဌိံ အဝိရုဇ္ဈမာနာ။
တေသု တွံ ကိံ လဘေထော ပသူရ၊ ယေသီဓ နတ္ထီ ပရမုဂ္ဂဟီတံ။
၈၄၀.
အထ တွံ ပဝိတက္ကမာဂမာ၊ မနသာ ဒိဋ္ဌိဂတာနိ စိန္တယန္တော။
ဓေါနေန ယုဂံ သမာဂမာ၊ န ဟိ တွံ သက္ခသိ သမ္ပယာတဝေတိ။
ပသူရသုတ္တံ အဋ္ဌမံ နိဋ္ဌိတံ။
၉. မာဂဏ္ဍိယသုတ္တံ
၈၄၁.
‘‘ဒိသွာန တဏှံ အရတိံ ရဂဉ္စ [အရတိဉ္စ ရာဂံ (သျာ. က.)]၊ နာဟောသိ ဆန္ဒော အပိ မေထုနသ္မိံ။
ကိမေဝိဒံ မုတ္တကရီသပုဏ္ဏံ၊ ပါဒါပိ နံ သမ္ဖုသိတုံ န ဣစ္ဆေ’’။
၈၄၂.
‘‘ဧတာဒိသံ စေ ရတနံ န ဣစ္ဆသိ၊ နာရိံ နရိန္ဒေဟိ ဗဟူဟိ ပတ္ထိတံ။
ဒိဋ္ဌိဂတံ သီလဝတံ နု ဇီဝိတံ [သီလဝတာနုဇီဝိတံ (သီ. ဣ. က.)]၊ ဘဝူပပတ္တိဉ္စ ဝဒေသိ ကီဒိသံ’’။
၈၄၃.
‘‘ဣဒံ ဝဒါမီတိ န တဿ ဟောတိ၊ (မာဂဏ္ဍိယာတိ [မာဂန္ဒိယာတိ (သီ. သျာ. ဣ.)] ဘဂဝါ)
ဓမ္မေသု နိစ္ဆေယျ သမုဂ္ဂဟီတံ။
ပဿဉ္စ ဒိဋ္ဌီသု အနုဂ္ဂဟာယ၊
အဇ္ဈတ္တသန္တိံ ပစိနံ အဒဿံ’’။
၈၄၄.
‘‘ဝိနိစ္ဆယာ ယာနိ ပကပ္ပိတာနိ၊ (ဣတိ မာဂဏ္ဍိယော [မာဂန္ဒိယော (သီ. သျာ. ဣ.)] )
တေ ဝေ မုနီ ဗြူသိ အနုဂ္ဂဟာယ။
အဇ္ဈတ္တသန္တီတိ ယမေတမတ္ထံ၊
ကထံ နု ဓီရေဟိ ပဝေဒိတံ တံ’’။
၈၄၅.
‘‘န ဒိဋ္ဌိယာ န သုတိယာ န ဉာဏေန၊ (မာဂဏ္ဍိယာတိ ဘဂဝါ)
သီလဗ္ဗတေနာပိ န သုဒ္ဓိမာဟ။
အဒိဋ္ဌိယာ အဿုတိယာ အဉာဏာ၊
အသီလတာ အဗ္ဗတာ နောပိ တေန။
ဧတေ စ နိဿဇ္ဇ အနုဂ္ဂဟာယ၊
သန္တော အနိဿာယ ဘဝံ န ဇပ္ပေ’’။
၈၄၆.
‘‘နော စေ ကိရ ဒိဋ္ဌိယာ န သုတိယာ န ဉာဏေန၊ (ဣတိ မာဂဏ္ဍိယော)
သီလဗ္ဗတေနာပိ န သုဒ္ဓိမာဟ။
အဒိဋ္ဌိယာ အဿုတိယာ အဉာဏာ၊
အသီလတာ အဗ္ဗတာ နောပိ တေန။
မညာမဟံ မောမုဟမေဝ ဓမ္မံ၊
ဒိဋ္ဌိယာ ဧကေ ပစ္စေန္တိ သုဒ္ဓိံ’’။
၈၄၇.
‘‘ဒိဋ္ဌဉ္စ နိဿာယ အနုပုစ္ဆမာနော၊ (မာဂဏ္ဍိယာတိ ဘဂဝါ)
သမုဂ္ဂဟီတေသု ပမောဟမာဂါ [သမောဟမာဂါ (သျာ. က.)]။
ဣတော စ နာဒ္ဒက္ခိ အဏုမ္ပိ သညံ၊
တသ္မာ တုဝံ မောမုဟတော ဒဟာသိ။
၈၄၈.
‘‘သမော ဝိသေသီ ဥဒ ဝါ နိဟီနော၊ ယော မညတီ သော ဝိဝဒေထ တေန။
တီသု ဝိဓါသု အဝိကမ္ပမာနော၊ သမော ဝိသေသီတိ န တဿ ဟောတိ။
၈၄၉.
‘‘သစ္စန္တိ သော ဗြာဟ္မဏော ကိံ ဝဒေယျ၊ မုသာတိ ဝါ သော ဝိဝဒေထ ကေန။
ယသ္မိံ သမံ ဝိသမံ ဝါပိ နတ္ထိ၊ သ ကေန ဝါဒံ ပဋိသံယုဇေယျ။
၈၅၀.
‘‘ဩကံ ပဟာယ အနိကေတသာရီ၊ ဂါမေ အကုဗ္ဗံ မုနိ သန္ထဝါနိ [သန္ဓဝါနိ (က.)]။
ကာမေဟိ ရိတ္တော အပုရေက္ခရာနော၊ ကထံ န ဝိဂ္ဂယှ ဇနေန ကယိရာ။
၈၅၁.
‘‘ယေဟိ ဝိဝိတ္တော ဝိစရေယျ လောကေ၊ န တာနိ ဥဂ္ဂယှ ဝဒေယျ နာဂေါ။
ဇလမ္ဗုဇံ [ဧလမ္ဗုဇံ (သီ. သျာ.)] ကဏ္ဍကံ ဝါရိဇံ ယထာ၊ ဇလေန ပင်္ကေန စနူပလိတ္တံ။
ဧဝံ မုနီ သန္တိဝါဒေါ အဂိဒ္ဓေါ၊ ကာမေ စ လောကေ စ အနူပလိတ္တော။
၈၅၂.
‘‘န ဝေဒဂူ ဒိဋ္ဌိယာယကော [န ဝေဒဂူ ဒိဋ္ဌိယာ (က. သီ. သျာ. ဣ.)] န မုတိယာ၊ သ မာနမေတိ န ဟိ တမ္မယော သော။
န ကမ္မုနာ နောပိ သုတေန နေယျော၊ အနူပနီတော သ နိဝေသနေသု။
၈၅၃.
‘‘သညာဝိရတ္တဿ န သန္တိ ဂန္ထာ၊ ပညာဝိမုတ္တဿ န သန္တိ မောဟာ။
သညဉ္စ ဒိဋ္ဌိဉ္စ ယေ အဂ္ဂဟေသုံ၊ တေ ဃဋ္ဋယန္တာ [ဃဋ္ဋမာနာ (သျာ. က.)] ဝိစရန္တိ လောကေ’’တိ။
မာဂဏ္ဍိယသုတ္တံ နဝမံ နိဋ္ဌိတံ။
၁၀. ပုရာဘေဒသုတ္တံ
၈၅၄.
‘‘ကထံဒဿီ ကထံသီလော၊ ဥပသန္တောတိ ဝုစ္စတိ။
တံ မေ ဂေါတမ ပဗြူဟိ၊ ပုစ္ဆိတော ဥတ္တမံ နရံ’’။
၈၅၅.
‘‘ဝီတတဏှော ပုရာ ဘေဒါ၊ (ဣတိ ဘဂဝါ) ပုဗ္ဗမန္တမနိဿိတော။
ဝေမဇ္ဈေ နုပသင်္ခေယျော၊ တဿ နတ္ထိ ပုရက္ခတံ။
၈၅၆.
‘‘အက္ကောဓနော အသန္တာသီ၊ အဝိကတ္ထီ အကုက္ကုစော။
မန္တဘာဏီ [မန္တာဘာဏီ (သျာ. ဣ.)] အနုဒ္ဓတော၊ သ ဝေ ဝါစာယတော မုနိ။
၈၅၇.
‘‘နိရာသတ္တိ အနာဂတေ၊ အတီတံ နာနုသောစတိ။
ဝိဝေကဒဿီ ဖဿေသု၊ ဒိဋ္ဌီသု စ န နီယတိ [နိယျတိ (ဗဟူသု)]။
၈၅၈.
‘‘ပတိလီနော အကုဟကော၊ အပိဟာလု အမစ္ဆရီ။
အပ္ပဂဗ္ဘော အဇေဂုစ္ဆော၊ ပေသုဏေယျေ စ နော ယုတော။
၈၅၉.
‘‘သာတိယေသု အနဿာဝီ၊ အတိမာနေ စ နော ယုတော။
သဏှော စ ပဋိဘာနဝါ [ပဋိဘာဏဝါ (သျာ. ဣ.)]၊ န သဒ္ဓေါ န ဝိရဇ္ဇတိ။
၈၆၀.
‘‘လာဘကမ္ယာ န သိက္ခတိ၊ အလာဘေ စ န ကုပ္ပတိ။
အဝိရုဒ္ဓေါ စ တဏှာယ၊ ရသေသု နာနုဂိဇ္ဈတိ။
၈၆၁.
‘‘ဥပေက္ခကော သဒါ သတော၊ န လောကေ မညတေ သမံ။
န ဝိသေသီ န နီစေယျော၊ တဿ နော သန္တိ ဥဿဒါ။
၈၆၂.
‘‘ယဿ နိဿယနာ [နိဿယတာ (သီ. သျာ. ဣ.)] နတ္ထိ၊ ဉတွာ ဓမ္မံ အနိဿိတော။
ဘဝါယ ဝိဘဝါယ ဝါ၊ တဏှာ ယဿ န ဝိဇ္ဇတိ။
၈၆၃.
‘‘တံ ဗြူမိ ဥပသန္တောတိ၊ ကာမေသု အနပေက္ခိနံ။
ဂန္ထာ တဿ န ဝိဇ္ဇန္တိ၊ အတရီ သော ဝိသတ္တိကံ။
၈၆၄.
‘‘န တဿ ပုတ္တာ ပသဝေါ၊ ခေတ္တံ ဝတ္ထုဉ္စ ဝိဇ္ဇတိ။
အတ္တာ ဝါပိ နိရတ္တာ ဝါ [အတ္တံ ဝါပိ နိရတ္တံ ဝါ (ဗဟူသု)]၊ န တသ္မိံ ဥပလဗ္ဘတိ။
၈၆၅.
‘‘ယေန နံ ဝဇ္ဇုံ ပုထုဇ္ဇနာ၊ အထော သမဏဗြာဟ္မဏာ။
တံ တဿ အပုရက္ခတံ၊ တသ္မာ ဝါဒေသု နေဇတိ။
၈၆၆.
‘‘ဝီတဂေဓေါ အမစ္ဆရီ၊ န ဥဿေသု ဝဒတေ မုနိ။
န သမေသု န ဩမေသု၊ ကပ္ပံ နေတိ အကပ္ပိယော။
၈၆၇.
‘‘ယဿ လောကေ သကံ နတ္ထိ၊ အသတာ စ န သောစတိ။
ဓမ္မေသု စ န ဂစ္ဆတိ၊ သ ဝေ သန္တောတိ ဝုစ္စတီ’’တိ။
ပုရာဘေဒသုတ္တံ ဒသမံ နိဋ္ဌိတံ။
၁၁. ကလဟဝိဝါဒသုတ္တံ
၈၆၈.
‘‘ကုတောပဟူတာ ကလဟာ ဝိဝါဒါ၊ ပရိဒေဝသောကာ သဟမစ္ဆရာ စ။
မာနာတိမာနာ သဟပေသုဏာ စ၊ ကုတောပဟူတာ တေ တဒိင်္ဃ ဗြူဟိ’’။
၈၆၉.
‘‘ပိယပ္ပဟူတာ ကလဟာ ဝိဝါဒါ၊
ပရိဒေဝသောကာ သဟမစ္ဆရာ စ။
မာနာတိမာနာ သဟပေသုဏာ စ၊
မစ္ဆေရယုတ္တာ ကလဟာ ဝိဝါဒါ။
ဝိဝါဒဇာတေသု စ ပေသုဏာနိ’’။
၈၇၀.
‘‘ပိယာ သု [ပိယာနု (သျာ.)၊ ပိယဿု (က.)] လောကသ္မိံ ကုတောနိဒါနာ၊ ယေ စာပိ [ယေ ဝါပိ (သီ. သျာ. ဣ.)] လောဘာ ဝိစရန္တိ လောကေ။
အာသာ စ နိဋ္ဌာ စ ကုတောနိဒါနာ၊ ယေ သမ္ပရာယာယ နရဿ ဟောန္တိ’’။
၈၇၁.
‘‘ဆန္ဒာနိဒါနာနိ ပိယာနိ လောကေ၊ ယေ စာပိ လောဘာ ဝိစရန္တိ လောကေ။
အာသာ စ နိဋ္ဌာ စ ဣတောနိဒါနာ၊ ယေ သမ္ပရာယာယ နရဿ ဟောန္တိ’’။
၈၇၂.
‘‘ဆန္ဒော နု လောကသ္မိံ ကုတောနိဒါနော၊ ဝိနိစ္ဆယာ စာပိ [ဝါပိ (သီ. သျာ. ဣ.)] ကုတောပဟူတာ။
ကောဓေါ မောသဝဇ္ဇဉ္စ ကထံကထာ စ၊ ယေ ဝါပိ ဓမ္မာ သမဏေန ဝုတ္တာ’’။
၈၇၃.
‘‘သာတံ အသာတန္တိ ယမာဟု လောကေ၊ တမူပနိဿာယ ပဟောတိ ဆန္ဒော။
ရူပေသု ဒိသွာ ဝိဘဝံ ဘဝဉ္စ၊ ဝိနိစ္ဆယံ ကုဗ္ဗတိ [ကုရုတေ (ဗဟူသု)] ဇန္တု လောကေ။
၈၇၄.
‘‘ကောဓေါ မောသဝဇ္ဇဉ္စ ကထံကထာ စ၊ ဧတေပိ ဓမ္မာ ဒွယမေဝ သန္တေ။
ကထံကထီ ဉာဏပထာယ သိက္ခေ၊ ဉတွာ ပဝုတ္တာ သမဏေန ဓမ္မာ’’။
၈၇၅.
‘‘သာတံ အသာတဉ္စ ကုတောနိဒါနာ၊ ကိသ္မိံ အသန္တေ န ဘဝန္တိ ဟေတေ။
ဝိဘဝံ ဘဝဉ္စာပိ ယမေတမတ္ထံ၊ ဧတံ မေ ပဗြူဟိ ယတောနိဒါနံ’’။
၈၇၆.
‘‘ဖဿနိဒါနံ သာတံ အသာတံ၊ ဖဿေ အသန္တေ န ဘဝန္တိ ဟေတေ။
ဝိဘဝံ ဘဝဉ္စာပိ ယမေတမတ္ထံ၊ ဧတံ တေ ပဗြူမိ ဣတောနိဒါနံ’’။
၈၇၇.
‘‘ဖဿော နု လောကသ္မိ ကုတောနိဒါနော၊ ပရိဂ္ဂဟာ စာပိ ကုတောပဟူတာ။
ကိသ္မိံ အသန္တေ န မမတ္တမတ္ထိ၊ ကိသ္မိံ ဝိဘူတေ န ဖုသန္တိ ဖဿာ’’။
၈၇၈.
‘‘နာမဉ္စ ရူပဉ္စ ပဋိစ္စ ဖဿော၊ ဣစ္ဆာနိဒါနာနိ ပရိဂ္ဂဟာနိ။
ဣစ္ဆာယသန္တ္ယာ န မမတ္တမတ္ထိ၊ ရူပေ ဝိဘူတေ န ဖုသန္တိ ဖဿာ’’။
၈၇၉.
‘‘ကထံသမေတဿ ဝိဘောတိ ရူပံ၊ သုခံ ဒုခဉ္စာပိ [ဒုခံ ဝါပိ (သီ. သျာ.)] ကထံ ဝိဘောတိ။
ဧတံ မေ ပဗြူဟိ ယထာ ဝိဘောတိ၊ တံ ဇာနိယာမာတိ [ဇာနိဿာမာတိ (သီ. က.)] မေ မနော အဟု’’။
၈၈၀.
‘‘န သညသညီ န ဝိသညသညီ၊ နောပိ အသညီ န ဝိဘူတသညီ။
ဧဝံသမေတဿ ဝိဘောတိ ရူပံ၊ သညာနိဒါနာ ဟိ ပပဉ္စသင်္ခါ’’။
၈၈၁.
‘‘ယံ တံ အပုစ္ဆိမှ အကိတ္တယီ နော၊
အညံ တံ ပုစ္ဆာမ တဒိင်္ဃ ဗြူဟိ။
ဧတ္တာဝတဂ္ဂံ နု [နော (သီ. သျာ.)] ဝဒန္တိ ဟေကေ၊
ယက္ခဿ သုဒ္ဓိံ ဣဓ ပဏ္ဍိတာသေ။
ဥဒါဟု အညမ္ပိ ဝဒန္တိ ဧတ္တော။
၈၈၂.
‘‘ဧတ္တာဝတဂ္ဂမ္ပိ ဝဒန္တိ ဟေကေ၊ ယက္ခဿ သုဒ္ဓိံ ဣဓ ပဏ္ဍိတာသေ။
တေသံ ပနေကေ သမယံ ဝဒန္တိ၊ အနုပါဒိသေသေ ကုသလာ ဝဒါနာ။
၈၈၃.
‘‘ဧတေ စ ဉတွာ ဥပနိဿိတာတိ၊ ဉတွာ မုနီ နိဿယေ သော ဝိမံသီ။
ဉတွာ ဝိမုတ္တော န ဝိဝါဒမေတိ၊ ဘဝါဘဝါယ န သမေတိ ဓီရော’’တိ။
ကလဟဝိဝါဒသုတ္တံ ဧကာဒသမံ နိဋ္ဌိတံ။
၁၂. စူဠဗ္ယူဟသုတ္တံ [စူဠဝိယူဟသုတ္တံ (သီ. သျာ. နိဒ္ဒေသ)]
၈၈၄.
သကံသကံဒိဋ္ဌိပရိဗ္ဗသာနာ၊ ဝိဂ္ဂယှ နာနာ ကုသလာ ဝဒန္တိ။
ယော ဧဝံ ဇာနာတိ သ ဝေဒိ ဓမ္မံ၊ ဣဒံ ပဋိက္ကောသမကေဝလီ သော။
၈၈၅.
ဧဝမ္ပိ ဝိဂ္ဂယှ ဝိဝါဒယန္တိ၊ ဗာလော ပရော အက္ကုသလောတိ [အကုသလောတိ (သီ. သျာ. ဣ.)] စာဟု။
သစ္စော နု ဝါဒေါ ကတမော ဣမေသံ၊ သဗ္ဗေဝ ဟီမေ ကုသလာ ဝဒါနာ။
၈၈၆.
ပရဿ စေ ဓမ္မမနာနုဇာနံ၊ ဗာလောမကော [ဗာလော မဂေါ (သီ. သျာ. က.)] ဟောတိ နိဟီနပညော။
သဗ္ဗေဝ ဗာလာ သုနိဟီနပညာ၊ သဗ္ဗေဝိမေ ဒိဋ္ဌိပရိဗ္ဗသာနာ။
၈၈၇.
သန္ဒိဋ္ဌိယာ စေဝ န ဝီဝဒါတာ၊ သံသုဒ္ဓပညာ ကုသလာ မုတီမာ။
န တေသံ ကောစိ ပရိဟီနပညော [ကောစိပိ နိဟီနပညော (သီ. သျာ. က.)]၊ ဒိဋ္ဌီ ဟိ တေသမ္ပိ တထာ သမတ္တာ။
၈၈၈.
န ဝါဟမေတံ တထိယန္တိ [တထိဝန္တိ (သျာ. က.)] ဗြူမိ၊ ယမာဟု ဗာလာ မိထု အညမညံ။
သကံသကံဒိဋ္ဌိမကံသု သစ္စံ၊ တသ္မာ ဟိ ဗာလောတိ ပရံ ဒဟန္တိ။
၈၈၉.
ယမာဟု သစ္စံ တထိယန္တိ ဧကေ၊ တမာဟု အညေ [အညေပိ (သျာ.)၊ အညေ စ (?)] တုစ္ဆံ မုသာတိ။
ဧဝမ္ပိ ဝိဂယှ ဝိဝါဒယန္တိ၊ ကသ္မာ န ဧကံ သမဏာ ဝဒန္တိ။
၈၉၀.
ဧကဉှိ သစ္စံ န ဒုတီယမတ္ထိ၊ ယသ္မိံ ပဇာ နော ဝိဝဒေ ပဇာနံ။
နာနာ တေ [နာနာတော (က.)] သစ္စာနိ သယံ ထုနန္တိ၊ တသ္မာ န ဧကံ သမဏာ ဝဒန္တိ။
၈၉၁.
ကသ္မာ နု သစ္စာနိ ဝဒန္တိ နာနာ၊ ပဝါဒိယာသေ ကုသလာ ဝဒါနာ။
သစ္စာနိ သုတာနိ ဗဟူနိ နာနာ၊ ဥဒါဟု တေ တက္ကမနုဿရန္တိ။
၈၉၂.
န ဟေဝ သစ္စာနိ ဗဟူနိ နာနာ၊ အညတြ သညာယ နိစ္စာနိ လောကေ။
တက္ကဉ္စ ဒိဋ္ဌီသု ပကပ္ပယိတွာ၊ သစ္စံ မုသာတိ ဒွယဓမ္မမာဟု။
၈၉၃.
ဒိဋ္ဌေ သုတေ သီလဝတေ မုတေ ဝါ၊ ဧတေ စ နိဿာယ ဝိမာနဒဿီ။
ဝိနိစ္ဆယေ ဌတွာ ပဟဿမာနော၊ ဗာလော ပရော အက္ကုသလောတိ စာဟ။
၈၉၄.
ယေနေဝ ဗာလောတိ ပရံ ဒဟာတိ၊ တေနာတုမာနံ ကုသလောတိ စာဟ။
သယမတ္တနာ သော ကုသလော ဝဒါနော၊ အညံ ဝိမာနေတိ တဒေဝ ပါဝ။
၈၉၅.
အတိသာရဒိဋ္ဌိယာဝ သော သမတ္တော၊ မာနေန မတ္တော ပရိပုဏ္ဏမာနီ။
သယမေဝ သာမံ မနသာဘိသိတ္တော၊ ဒိဋ္ဌီ ဟိ သာ တဿ တထာ သမတ္တာ။
၈၉၆.
ပရဿ စေ ဟိ ဝစသာ နိဟီနော၊ တုမော သဟာ ဟောတိ နိဟီနပညော။
အထ စေ သယံ ဝေဒဂူ ဟောတိ ဓီရော၊ န ကောစိ ဗာလော သမဏေသု အတ္ထိ။
၈၉၇.
အညံ ဣတော ယာဘိဝဒန္တိ ဓမ္မံ၊ အပရဒ္ဓါ သုဒ္ဓိမကေဝလီ တေ [သုဒ္ဓိမကေဝလီနော (သီ.)]။
ဧဝမ္ပိ တိတ္ထ္ယာ ပုထုသော ဝဒန္တိ၊ သန္ဒိဋ္ဌိရာဂေန ဟိ တေဘိရတ္တာ [တျာဘိရတ္တာ (သျာ. က.)]။
၈၉၈.
ဣဓေဝ သုဒ္ဓိ ဣတိ ဝါဒယန္တိ၊ နာညေသု ဓမ္မေသု ဝိသုဒ္ဓိမာဟု။
ဧဝမ္ပိ တိတ္ထ္ယာ ပုထုသော နိဝိဋ္ဌာ၊ သကာယနေ တတ္ထ ဒဠှံ ဝဒါနာ။
၈၉၉.
သကာယနေ ဝါပိ ဒဠှံ ဝဒါနော၊ ကမေတ္ထ ဗာလောတိ ပရံ ဒဟေယျ။
သယမေဝ သော မေဓဂမာဝဟေယျ [မေဓကံ အာဝဟေယျ (သီ. ဣ.)]၊ ပရံ ဝဒံ ဗာလမသုဒ္ဓိဓမ္မံ။
၉၀၀.
ဝိနိစ္ဆယေ ဌတွာ သယံ ပမာယ၊ ဥဒ္ဓံ သ [ဥဒ္ဒံ သော (သီ. သျာ. ဣ.)] လောကသ္မိံ ဝိဝါဒမေတိ။
ဟိတွာန သဗ္ဗာနိ ဝိနိစ္ဆယာနိ၊ န မေဓဂံ ကုဗ္ဗတိ ဇန္တု လောကေတိ။
စူဠဗ္ယူဟသုတ္တံ ဒွါဒသမံ နိဋ္ဌိတံ။
၁၃. မဟာဗ္ယူဟသုတ္တံ
၉၀၁.
ယေ ကေစိမေ ဒိဋ္ဌိပရိဗ္ဗသာနာ၊ ဣဒမေဝ သစ္စန္တိ ဝိဝါဒယန္တိ [ဝိဝါဒိယန္တိ (သီ. ဣ.)]။
သဗ္ဗေဝ တေ နိန္ဒမနွာနယန္တိ၊ အထော ပသံသမ္ပိ လဘန္တိ တတ္ထ။
၉၀၂.
အပ္ပဉှိ ဧတံ န အလံ သမာယ၊ ဒုဝေ ဝိဝါဒဿ ဖလာနိ ဗြူမိ။
ဧတမ္ပိ ဒိသွာ န ဝိဝါဒယေထ၊ ခေမာဘိပဿံ အဝိဝါဒဘူမိံ။
၉၀၃.
ယာ ကာစိမာ သမ္မုတိယော ပုထုဇ္ဇာ၊ သဗ္ဗာဝ ဧတာ န ဥပေတိ ဝိဒွါ။
အနူပယော သော ဥပယံ ကိမေယျ၊ ဒိဋ္ဌေ သုတေ ခန္တိမကုဗ္ဗမာနော။
၉၀၄.
သီလုတ္တမာ သညမေနာဟု သုဒ္ဓိံ၊ ဝတံ သမာဒါယ ဥပဋ္ဌိတာသေ။
ဣဓေဝ သိက္ခေမ အထဿ သုဒ္ဓိံ၊ ဘဝူပနီတာ ကုသလာ ဝဒါနာ။
၉၀၅.
သစေ စုတော သီလဝတတော ဟောတိ၊ ပဝေဓတီ [သ ဝေဓတိ (သီ. ဣ.)] ကမ္မ ဝိရာဓယိတွာ။
ပဇပ္ပတီ ပတ္ထယတီ စ သုဒ္ဓိံ၊ သတ္ထာဝ ဟီနော ပဝသံ ဃရမှာ။
၉၀၆.
သီလဗ္ဗတံ ဝါပိ ပဟာယ သဗ္ဗံ၊ ကမ္မဉ္စ သာဝဇ္ဇနဝဇ္ဇမေတံ။
သုဒ္ဓိံ အသုဒ္ဓိန္တိ အပတ္ထယာနော၊ ဝိရတော စရေ သန္တိမနုဂ္ဂဟာယ။
၉၀၇.
တမူပနိဿာယ ဇိဂုစ္ဆိတံ ဝါ၊ အထဝါပိ ဒိဋ္ဌံ ဝ သုတံ မုတံ ဝါ။
ဥဒ္ဓံသရာ သုဒ္ဓိမနုတ္ထုနန္တိ၊ အဝီတတဏှာသေ ဘဝါဘဝေသု။
၉၀၈.
ပတ္ထယမာနဿ ဟိ ဇပ္ပိတာနိ၊ ပဝေဓိတံ ဝါပိ ပကပ္ပိတေသု။
စုတူပပါတော ဣဓ ယဿ နတ္ထိ၊ သ ကေန ဝေဓေယျ ကုဟိံဝ ဇပ္ပေ [ကုဟိဉ္စိ ဇပ္ပေ (သီ. သျာ. က.)၊ ကုဟိံ ပဇပ္ပေ (ဣ.) နိဒ္ဒေသော ပဿိတဗ္ဗော]။
၉၀၉.
ယမာဟု ဓမ္မံ ပရမန္တိ ဧကေ၊ တမေဝ ဟီနန္တိ ပနာဟု အညေ။
သစ္စော နု ဝါဒေါ ကတမော ဣမေသံ, သဗ္ဗေဝ ဟီမေ ကုသလာ ဝဒါနာ။
၉၁၀.
သကဉှိ ဓမ္မံ ပရိပုဏ္ဏမာဟု၊ အညဿ ဓမ္မံ ပန ဟီနမာဟု။
ဧဝမ္ပိ ဝိဂ္ဂယှ ဝိဝါဒယန္တိ၊ သကံ သကံ သမ္မုတိမာဟု သစ္စံ။
၉၁၁.
ပရဿ စေ ဝမ္ဘယိတေန ဟီနော၊ န ကောစိ ဓမ္မေသု ဝိသေသိ အဿ။
ပုထူ ဟိ အညဿ ဝဒန္တိ ဓမ္မံ၊ နိဟီနတော သမှိ ဒဠှံ ဝဒါနာ။
၉၁၂.
သဒ္ဓမ္မပူဇာပိ နေသံ တထေဝ၊ ယထာ ပသံသန္တိ သကာယနာနိ။
သဗ္ဗေဝ ဝါဒါ [သဗ္ဗေ ပဝါဒါ (သျာ.)] တထိယာ [တထိဝါ (သဗ္ဗတ္ထ)] ဘဝေယျုံ၊ သုဒ္ဓီ ဟိ နေသံ ပစ္စတ္တမေဝ။
၉၁၃.
န ဗြာဟ္မဏဿ ပရနေယျမတ္ထိ၊ ဓမ္မေသု နိစ္ဆေယျ သမုဂ္ဂဟီတံ။
တသ္မာ ဝိဝါဒါနိ ဥပါတိဝတ္တော၊ န ဟိ သေဋ္ဌတော ပဿတိ ဓမ္မမညံ။
၉၁၄.
ဇာနာမိ ပဿာမိ တထေဝ ဧတံ၊ ဒိဋ္ဌိယာ ဧကေ ပစ္စေန္တိ သုဒ္ဓိံ။
အဒ္ဒက္ခိ စေ ကိဉှိ တုမဿ တေန၊ အတိသိတွာ အညေန ဝဒန္တိ သုဒ္ဓိံ။
၉၁၅.
ပဿံ နရော ဒက္ခတိ [ဒက္ခိတိ (သီ.)] နာမရူပံ၊ ဒိသွာန ဝါ ဉဿတိ တာနိမေဝ။
ကာမံ ဗဟုံ ပဿတု အပ္ပကံ ဝါ၊ န ဟိ တေန သုဒ္ဓိံ ကုသလာ ဝဒန္တိ။
၉၁၆.
နိဝိဿဝါဒီ န ဟိ သုဗ္ဗိနာယော၊ ပကပ္ပိတံ ဒိဋ္ဌိ ပုရေက္ခရာနော။
ယံ နိဿိတော တတ္ထ သုဘံ ဝဒါနော၊ သုဒ္ဓိံဝဒေါ တတ္ထ တထဒ္ဒသာ သော။
၉၁၇.
န ဗြာဟ္မဏော ကပ္ပမုပေတိ သင်္ခါ [သင်္ခံ (သီ. သျာ. ဣ.)]၊ န ဒိဋ္ဌိသာရီ နပိ ဉာဏဗန္ဓု။
ဉတွာ စ သော သမ္မုတိယော [သမ္မတိယော (သျာ.)] ပုထုဇ္ဇာ၊ ဥပေက္ခတီ ဥဂ္ဂဟဏန္တိ မညေ။
၉၁၈.
ဝိဿဇ္ဇ ဂန္ထာနိ မုနီဓ လောကေ၊ ဝိဝါဒဇာတေသု န ဝဂ္ဂသာရီ။
သန္တော အသန္တေသု ဥပေက္ခကော သော၊ အနုဂ္ဂဟော ဥဂ္ဂဟဏန္တိ မညေ။
၉၁၉.
ပုဗ္ဗာသဝေ ဟိတွာ နဝေ အကုဗ္ဗံ၊ န ဆန္ဒဂူ နောပိ နိဝိဿဝါဒီ။
သ ဝိပ္ပမုတ္တော ဒိဋ္ဌိဂတေဟိ ဓီရော၊ န လိမ္ပတိ [န လိပ္ပတိ (သီ. ဣ.)] လောကေ အနတ္တဂရဟီ။
၉၂၀.
သ သဗ္ဗဓမ္မေသု ဝိသေနိဘူတော၊ ယံ ကိဉ္စိ ဒိဋ္ဌံ ဝ သုတံ မုတံ ဝါ။
သ ပန္နဘာရော မုနိ ဝိပ္ပမုတ္တော၊ န ကပ္ပိယော နူပရတော န ပတ္ထိယောတိ။
မဟာဗ္ယူဟသုတ္တံ တေရသမံ နိဋ္ဌိတံ။
၁၄. တုဝဋကသုတ္တံ
၉၂၁.
‘‘ပုစ္ဆာမိ တံ အာဒိစ္စဗန္ဓု [အာဒိစ္စဗန္ဓုံ (သီ. သျာ.)]၊ ဝိဝေကံ သန္တိပဒဉ္စ မဟေသိ။
ကထံ ဒိသွာ နိဗ္ဗာတိ ဘိက္ခု၊ အနုပါဒိယာနော လောကသ္မိံ ကိဉ္စိ’’။
၉၂၂.
‘‘မူလံ ပပဉ္စသင်္ခါယ၊ (ဣတိ ဘဂဝါ)
မန္တာ အသ္မီတိ သဗ္ဗမုပရုန္ဓေ [သဗ္ဗမုပရုဒ္ဓေ (သျာ. ဣ. က.)]။
ယာ ကာစိ တဏှာ အဇ္ဈတ္တံ၊
တာသံ ဝိနယာ [ဝိနယာယ (?)] သဒါ သတော သိက္ခေ။
၉၂၃.
‘‘ယံ ကိဉ္စိ ဓမ္မမဘိဇညာ၊ အဇ္ဈတ္တံ အထဝါပိ ဗဟိဒ္ဓါ။
န တေန ထာမံ [မာနံ (သီ. က.)] ကုဗ္ဗေထ၊ န ဟိ သာ နိဗ္ဗုတိ သတံ ဝုတ္တာ။
၉၂၄.
‘‘သေယျော န တေန မညေယျ၊ နီစေယျော အထဝါပိ သရိက္ခော။
ဖုဋ္ဌော [ပုဋ္ဌော (သီ. သျာ. က.)] အနေကရူပေဟိ၊ နာတုမာနံ ဝိကပ္ပယံ တိဋ္ဌေ။
၉၂၅.
‘‘အဇ္ဈတ္တမေဝုပသမေ ၊ န အညတော ဘိက္ခု သန္တိမေသေယျ။
အဇ္ဈတ္တံ ဥပသန္တဿ၊ နတ္ထိ အတ္တာ ကုတော နိရတ္တာ ဝါ။
၉၂၆.
‘‘မဇ္ဈေ ယထာ သမုဒ္ဒဿ၊ ဦမိ နော ဇာယတီ ဌိတော ဟောတိ။
ဧဝံ ဌိတော အနေဇဿ၊ ဥဿဒံ ဘိက္ခု န ကရေယျ ကုဟိဉ္စိ’’။
၉၂၇.
‘‘အကိတ္တယီ ဝိဝဋစက္ခု၊ သက္ခိဓမ္မံ ပရိဿယဝိနယံ။
ပဋိပဒံ ဝဒေဟိ ဘဒ္ဒန္တေ၊ ပါတိမောက္ခံ အထဝါပိ သမာဓိံ’’။
၉၂၈.
‘‘စက္ခူဟိ နေဝ လောလဿ၊ ဂါမကထာယ အာဝရယေ သောတံ။
ရသေ စ နာနုဂိဇ္ဈေယျ၊ န စ မမာယေထ ကိဉ္စိ လောကသ္မိံ။
၉၂၉.
‘‘ဖဿေန ယဒါ ဖုဋ္ဌဿ၊ ပရိဒေဝံ ဘိက္ခု န ကရေယျ ကုဟိဉ္စ္ဉ္စ္စိ။
ဘဝဉ္စ နာဘိဇပ္ပေယျ၊ ဘေရဝေသု စ န သမ္ပဝေဓေယျ။
၉၃၀.
‘‘အန္နာနမထော ပါနာနံ၊ ခါဒနီယာနံ အထောပိ ဝတ္ထာနံ။
လဒ္ဓါ န သန္နိဓိံ ကယိရာ၊ န စ ပရိတ္တသေ တာနိ အလဘမာနော။
၉၃၁.
‘‘ဈာယီ န ပါဒလောလဿ၊ ဝိရမေ ကုက္ကုစ္စာ နပ္ပမဇ္ဇေယျ။
အထာသနေသု သယနေသု၊ အပ္ပသဒ္ဒေသု ဘိက္ခု ဝိဟရေယျ။
၉၃၂.
‘‘နိဒ္ဒံ န ဗဟုလီကရေယျ၊ ဇာဂရိယံ ဘဇေယျ အာတာဣ။
တန္ဒိံ မာယံ ဟဿံ ခိဍ္ဍံ၊ မေထုနံ ဝိပ္ပဇဟေ သဝိဘူသံ။
၉၃၃.
‘‘အာထဗ္ဗဏံ သုပိနံ လက္ခဏံ၊ နော ဝိဒဟေ အထောပိ နက္ခတ္တံ။
ဝိရုတဉ္စ ဂဗ္ဘကရဏံ၊ တိကိစ္ဆံ မာမကော န သေဝေယျ။
၉၃၄.
‘‘နိန္ဒာယ နပ္ပဝေဓေယျ၊ န ဥဏ္ဏမေယျ ပသံသိတော ဘိက္ခု။
လောဘံ သဟ မစ္ဆရိယေန၊ ကောဓံ ပေသုဏိယဉ္စ ပနုဒေယျ။
၉၃၅.
‘‘ကယဝိက္ကယေ န တိဋ္ဌေယျ၊ ဥပဝါဒံ ဘိက္ခု န ကရေယျ ကုဟိဉ္စိ။
ဂါမေ စ နာဘိသဇ္ဇေယျ၊ လာဘကမ္ယာ ဇနံ န လပယေယျ။
၉၃၆.
‘‘န စ ကတ္ထိတာ သိယာ ဘိက္ခု၊ န စ ဝါစံ ပယုတ္တံ ဘာသေယျ။
ပါဂဗ္ဘိယံ န သိက္ခေယျ၊ ကထံ ဝိဂ္ဂါဟိကံ န ကထယေယျ။
၉၃၇.
‘‘မောသဝဇ္ဇေ န နီယေထ၊ သမ္ပဇာနော သဌာနိ န ကယိရာ။
အထ ဇီဝိတေန ပညာယ၊ သီလဗ္ဗတေန နာညမတိမညေ။
၉၃၈.
‘‘သုတွာ ရုသိတော ဗဟုံ ဝါစံ၊ သမဏာနံ ဝါ ပုထုဇနာနံ [ပုထုဝစနာနံ (သီ. သျာ. ဣ.)]။
ဖရုသေန နေ န ပဋိဝဇ္ဇာ၊ န ဟိ သန္တော ပဋိသေနိကရောန္တိ။
၉၃၉.
‘‘ဧတဉ္စ ဓမ္မမညာယ၊ ဝိစိနံ ဘိက္ခု သဒါ သတော သိက္ခေ။
သန္တီတိ နိဗ္ဗုတိံ ဉတွာ၊ သာသနေ ဂေါတမဿ န ပမဇ္ဇေယျ။
၉၄၀.
‘‘အဘိဘူ ဟိ သော အနဘိဘူတော၊ သက္ခိဓမ္မမနီတိဟမဒဿီ။
တသ္မာ ဟိ တဿ ဘဂဝတော သာသနေ၊ အပ္ပမတ္တော သဒါ နမဿမနုသိက္ခေ’’တိ။
တုဝဋကသုတ္တံ စုဒ္ဒသမံ နိဋ္ဌိတံ။
၁၅. အတ္တဒဏ္ဍသုတ္တံ
၉၄၁.
‘‘အတ္တဒဏ္ဍာ ဘယံ ဇာတံ၊ ဇနံ ပဿထ မေဓဂံ။
သံဝေဂံ ကိတ္တယိဿာမိ၊ ယထာ သံဝိဇိတံ မယာ။
၉၄၂.
‘‘ဖန္ဒမာနံ ပဇံ ဒိသွာ၊ မစ္ဆေ အပ္ပောဒကေ ယထာ။
အညမညေဟိ ဗျာရုဒ္ဓေ၊ ဒိသွာ မံ ဘယမာဝိသိ။
၉၄၃.
‘‘သမန္တမသာရော လောကော၊ ဒိသာ သဗ္ဗာ သမေရိတာ။
ဣစ္ဆံ ဘဝနမတ္တနော၊ နာဒ္ဒသာသိံ အနောသိတံ။
၉၄၄.
‘‘ဩသာနေတွေဝ ဗျာရုဒ္ဓေ၊ ဒိသွာ မေ အရတီ အဟု။
အထေတ္ထ သလ္လမဒ္ဒက္ခိံ၊ ဒုဒ္ဒသံ ဟဒယနိဿိတံ။
၉၄၅.
‘‘ယေန သလ္လေန ဩတိဏ္ဏော၊ ဒိသာ သဗ္ဗာ ဝိဓါဝတိ။
တမေဝ သလ္လမဗ္ဗုယှ၊ န ဓါဝတိ န သီဒတိ။
၉၄၆.
‘‘တတ္ထ သိက္ခာနုဂီယန္တိ [သိက္ခာနုကိရိယန္တိ (က.)]၊ ယာနိ လောကေ ဂဓိတာနိ။
န တေသု ပသုတော သိယာ၊ နိဗ္ဗိဇ္ဈ သဗ္ဗသော ကာမေ။
သိက္ခေ နိဗ္ဗာနမတ္တနော။
၉၄၇.
‘‘သစ္စော သိယာ အပ္ပဂဗ္ဘော၊ အမာယော ရိတ္တပေသုဏော။
အက္ကောဓနော လောဘပါပံ၊ ဝေဝိစ္ဆံ ဝိတရေ မုနိ။
၉၄၈.
‘‘နိဒ္ဒံ တန္ဒိံ သဟေ ထီနံ၊ ပမာဒေန န သံဝသေ။
အတိမာနေ န တိဋ္ဌေယျ၊ နိဗ္ဗာနမနသော နရော။
၉၄၉.
‘‘မောသဝဇ္ဇေ န နီယေထ၊ ရူပေ သ္နေဟံ န ကုဗ္ဗယေ။
မာနဉ္စ ပရိဇာနေယျ၊ သာဟသာ ဝိရတော စရေ။
၉၅၀.
‘‘ပုရာဏံ နာဘိနန္ဒေယျ၊ နဝေ ခန္တိံ န ကုဗ္ဗယေ။
ဟိယျမာနေ န သောစေယျ၊ အာကာသံ န သိတော သိယာ။
၉၅၁.
‘‘ဂေဓံ ဗြူမိ မဟောဃောတိ၊ အာဇဝံ ဗြူမိ ဇပ္ပနံ။
အာရမ္မဏံ ပကပ္ပနံ၊ ကာမပင္ကော ဒုရစ္စယော။
၉၅၂.
‘‘သစ္စာ အဝေါက္ကမ္မ [အဝေါက္ကမံ (နိဒ္ဒေသ)] မုနိ၊ ထလေ တိဋ္ဌတိ ဗြာဟ္မဏော။
သဗ္ဗံ သော [သဗ္ဗသော (သျာ. က.)] ပဋိနိဿဇ္ဇ၊ သ ဝေ သန္တောတိ ဝုစ္စတိ။
၉၅၃.
‘‘သ ဝေ ဝိဒွါ သ ဝေဒဂူ၊ ဉတွာ ဓမ္မံ အနိဿိတော။
သမ္မာ သော လောကေ ဣရိယာနော၊ န ပိဟေတီဓ ကဿစိ။
၉၅၄.
‘‘ယောဓ ကာမေ အစ္စတရိ၊ သင်္ဂံ လောကေ ဒုရစ္စယံ။
န သော သောစတိ နာဇ္ဈေတိ၊ ဆိန္နသောတော အဗန္ဓနော။
၉၅၅.
‘‘ယံ ပုဗ္ဗေ တံ ဝိသောသေဟိ၊ ပစ္ဆာ တေ မာဟု ကိဉ္စနံ။
မဇ္ဈေ စေ နော ဂဟေဿသိ၊ ဥပသန္တော စရိဿသိ။
၉၅၆.
‘‘သဗ္ဗသော နာမရူပသ္မိံ၊ ယဿ နတ္ထိ မမာယိတံ။
အသတာ စ န သောစတိ၊ သ ဝေ လောကေ န ဇီယတိ။
၉၅၇.
‘‘ယဿ နတ္ထိ ဣဒံ မေတိ၊ ပရေသံ ဝါပိ ကိဉ္စနံ။
မမတ္တံ သော အသံဝိန္ဒံ၊ နတ္ထိ မေတိ န သောစတိ။
၉၅၈.
‘‘အနိဋ္ဌုရီ အနနုဂိဒ္ဓေါ၊ အနေဇော သဗ္ဗဓီ သမော။
တမာနိသံသံ ပဗြူမိ၊ ပုစ္ဆိတော အဝိကမ္ပိနံ။
၉၅၉.
‘‘အနေဇဿ ဝိဇာနတော၊ နတ္ထိ ကာစိ နိသင်္ခတိ [နိသင္ခိတိ (သီ. ဣ.)]။
ဝိရတော သော ဝိယာရဗ္ဘာ၊ ခေမံ ပဿတိ သဗ္ဗဓိ။
၉၆၀.
‘‘န သမေသု န ဩမေသု၊ န ဥဿေသု ဝဒတေ မုနိ။
သန္တော သော ဝီတမစ္ဆရော၊ နာဒေတိ န နိရဿတီ’’တိ။
အတ္တဒဏ္ဍသုတ္တံ ပန္နရသမံ နိဋ္ဌိတံ။
၁၆. သာရိပုတ္တသုတ္တံ
၉၆၁.
‘‘န မေ ဒိဋ္ဌော ဣတော ပုဗ္ဗေ၊ (ဣစ္စာယသ္မာ သာရိပုတ္တော)
န သုတော ဥဒ ကဿစိ။
ဧဝံ ဝဂ္ဂုဝဒေါ သတ္ထာ၊
တုသိတာ ဂဏိမာဂတော။
၉၆၂.
‘‘သဒေဝကဿ လောကဿ၊ ယထာ ဒိဿတိ စက္ခုမာ။
သဗ္ဗံ တမံ ဝိနောဒေတွာ၊ ဧကောဝ ရတိမဇ္ဈဂါ။
၉၆၃.
‘‘တံ ဗုဒ္ဓံ အသိတံ တာဒိံ၊ အကုဟံ ဂဏိမာဂတံ။
ဗဟူနမိဓ ဗဒ္ဓါနံ၊ အတ္ထိ ပဉ္ဟေန အာဂမံ။
၉၆၄.
‘‘ဘိက္ခုနော ဝိဇိဂုစ္ဆတော၊ ဘဇတော ရိတ္တမာသနံ။
ရုက္ခမူလံ သုသာနံ ဝါ၊ ပဗ္ဗတာနံ ဂုဟာသု ဝါ။
၉၆၅.
‘‘ဥစ္စာဝစေသု သယနေသု၊ ကီဝန္တော တတ္ထ ဘေရဝါ။
ယေဟိ ဘိက္ခု န ဝေဓေယျ၊ နိဂ္ဃောသေ သယနာသနေ။
၉၆၆.
‘‘ကတီ ပရိဿယာ လောကေ၊ ဂစ္ဆတော အဂတံ ဒိသံ။
ယေ ဘိက္ခု အဘိသမ္ဘဝေ၊ ပန္တမှိ သယနာသနေ။
၉၆၇.
‘‘က္ယာဿ ဗျပ္ပထယော အဿု၊ က္ယာဿဿု ဣဓ ဂေါစရာ။
ကာနိ သီလဗ္ဗတာနာဿု၊ ပဟိတတ္တဿ ဘိက္ခုနော။
၉၆၈.
‘‘ကံ သော သိက္ခံ သမာဒါယ၊ ဧကောဒိ နိပကော သတော။
ကမ္မာရော ရဇတဿေဝ၊ နိဒ္ဓမေ မလမတ္တနော’’။
၉၆၉.
‘‘ဝိဇိဂုစ္ဆမာနဿ ယဒိဒံ ဖာသု၊ (သာရိပုတ္တာတိ ဘဂဝါ)
ရိတ္တာသနံ သယနံ သေဝတော စေ။
သမ္ဗောဓိကာမဿ ယထာနုဓမ္မံ၊
တံ တေ ပဝက္ခာမိ ယထာ ပဇာနံ။
၉၇၀.
‘‘ပဉ္စန္နံ ဓီရော ဘယာနံ န ဘာယေ၊ ဘိက္ခု သတော သပရိယန္တစာရီ။
ဍံသာဓိပါတာနံ သရီသပါနံ၊ မနုဿဖဿာနံ စတုပ္ပဒါနံ။
၉၇၁.
‘‘ပရဓမ္မိကာနမ္ပိ န သန္တသေယျ၊ ဒိသွာပိ တေသံ ဗဟုဘေရဝါနိ။
အထာပရာနိ အဘိသမ္ဘဝေယျ၊ ပရိဿယာနိ ကုသလာနုဧသီ။
၉၇၂.
‘‘အာတင်္ကဖဿေန ခုဒါယ ဖုဋ္ဌော၊ သီတံ အတုဏှံ [အစ္စုဏှံ (သီ. သျာ.)] အဓိဝါသယေယျ။
သော တေဟိ ဖုဋ္ဌော ဗဟုဓါ အနောကော၊ ဝီရိယံ ပရက္ကမ္မဒဠှံ ကရေယျ။
၉၇၃.
‘‘ထေယျံ န ကာရေ [န ကရေယျ (သီ. သျာ. က.)] န မုသာ ဘဏေယျ၊ မေတ္တာယ ဖဿေ တသထာဝရာနိ။
ယဒါဝိလတ္တံ မနသော ဝိဇညာ၊ ကဏှဿ ပက္ခောတိ ဝိနောဒယေယျ။
၉၇၄.
‘‘ကောဓါတိမာနဿ ဝသံ န ဂစ္ဆေ၊ မူလမ္ပိ တေသံ ပလိခည တိဋ္ဌေ။
အထပ္ပိယံ ဝါ ပန အပ္ပိယံ ဝါ၊ အဒ္ဓါ ဘဝန္တော အဘိသမ္ဘဝေယျ။
၉၇၅.
‘‘ပညံ ပုရက္ခတွာ ကလျာဏဣတိ၊ ဝိက္ခမ္ဘယေ တာနိ ပရိဿယာနိ။
အရတိံ သဟေထ သယနမှိ ပန္တေ၊ စတုရော သဟေထ ပရိဒေဝဓမ္မေ။
၉၇၆.
‘‘ကိံသူ အသိဿာမိ ကုဝံ ဝါ [ကုဓ ဝါ (က.)၊ ကုထ ဝါ (နိဒ္ဒေသ)] အသိဿံ၊ ဒုက္ခံ ဝတ သေတ္ထ က္ဝဇ္ဇ သေဿံ။
ဧတေ ဝိတက္ကေ ပရိဒေဝနေယျေ၊ ဝိနယေထ သေခေါ အနိကေတစာရီ။
၉၇၇.
‘‘အန္နဉ္စ လဒ္ဓါ ဝသနဉ္စ ကာလေ၊ မတ္တံ သော ဇညာ ဣဓ တောသနတ္ထံ။
သော တေသု ဂုတ္တော ယတစာရိ ဂါမေ၊ ရုသိတောပိ ဝါစံ ဖရုသံ န ဝဇ္ဇာ။
၉၇၈.
‘‘ဩက္ခိတ္တစက္ခု န စ ပါဒလောလော၊ ဈာနာနုယုတ္တော ဗဟုဇာဂရဿ။
ဥပေက္ခမာရဗ္ဘ သမာဟိတတ္တော၊ တက္ကာသယံ ကုက္ကုစ္စိယူပဆိန္ဒေ။
၉၇၉.
‘‘စုဒိတော ဝစီဘိ သတိမာဘိနန္ဒေ၊ သဗြဟ္မစာရီသု ခိလံ ပဘိန္ဒေ။
ဝါစံ ပမုဉ္စေ ကုသလံ နာတိဝေလံ၊ ဇနဝါဒဓမ္မာယ န စေတယေယျ။
၉၈၀.
‘‘အထာပရံ ပဉ္စ ရဇာနိ လောကေ၊ ယေသံ သတီမာ ဝိနယာယ သိက္ခေ။
ရူပေသု သဒ္ဒေသု အထော ရသေသု၊ ဂန္ဓေသု ဖဿေသု သဟေထ ရာဂံ။
၉၈၁.
‘‘ဧတေသု ဓမ္မေသု ဝိနေယျ ဆန္ဒံ၊ ဘိက္ခု သတိမာ သုဝိမုတ္တစိတ္တော။
ကာလေန သော သမ္မာ ဓမ္မံ ပရိဝီမံသမာနော၊
ဧကောဒိဘူတော ဝိဟနေ တမံ သော’’တိ။
သာရိပုတ္တသုတ္တံ သောဠသမံ နိဋ္ဌိတံ။ အဋ္ဌကဝဂ္ဂေါ စတုတ္ထော
နိဋ္ဌိတော။
တဿုဒ္ဒါနံ –
ကာမံ ဂုဟဉ္စ ဒုဋ္ဌာ စ၊ သုဒ္ဓဉ္စ ပရမာ ဇရာ။
မေတ္တေယျော စ ပသူရော စ၊ မာဂဏ္ဍိ ပုရာဘေဒနံ။
ကလဟံ ဒွေ စ ဗ္ယူဟာနိ [ဗ္ယူဟာနိ (သီ.)]၊ ပုနဒေဝ တုဝဋ္ဋကံ။
အတ္တဒဏ္ဍဝရံ သုတ္တံ၊ ထေရပုဋ္ဌေန [ထေရပဉ္ဟေန (သီ.)၊ သာရိပုတ္တေန (သျာ.)] သောဠသ။
ဣတိ ဧတာနိ သုတ္တာနိ၊ သဗ္ဗာနဋ္ဌကဝဂ္ဂိကာတိ။