၂၆. ဗြာဟ္မဏဝဂ္ဂေါ
၃၈၃.
ဆိန္ဒ သောတံ ပရက္ကမ္မ၊ ကာမေ ပနုဒ ဗြာဟ္မဏ။
သင်္ခါရာနံ ခယံ ဉတွာ၊ အကတညူသိ ဗြာဟ္မဏ။
၃၈၄.
ယဒါ ဒွယေသု ဓမ္မေသု၊ ပါရဂူ ဟောတိ ဗြာဟ္မဏော။
အထဿ သဗ္ဗေ သံယောဂါ၊ အတ္ထံ ဂစ္ဆန္တိ ဇာနတော။
၃၈၅.
ယဿ ပါရံ အပါရံ ဝါ၊ ပါရာပါရံ န ဝိဇ္ဇတိ။
ဝီတဒ္ဒရံ ဝိသံယုတ္တံ၊ တမဟံ ဗြူမိ ဗြာဟ္မဏံ။
၃၈၆.
ဈာယိံ ဝိရဇမာသီနံ၊ ကတကိစ္စမနာသဝံ။
ဥတ္တမတ္ထမနုပ္ပတ္တံ၊ တမဟံ ဗြူမိ ဗြာဟ္မဏံ။
၃၈၇.
ဒိဝါ တပတိ အာဒိစ္စော၊ ရတ္တိမာဘာတိ စန္ဒိမာ။
သန္နဒ္ဓေါ ခတ္တိယော တပတိ၊ ဈာယီ တပတိ ဗြာဟ္မဏော။
အထ သဗ္ဗမဟောရတ္တိံ [သဗ္ဗမဟောရတ္တံ (?)]၊ ဗုဒ္ဓေါ တပတိ တေဇသာ။
၃၈၈.
ဗာဟိတပါပေါတိ ဗြာဟ္မဏော၊ သမစရိယာ သမဏောတိ ဝုစ္စတိ။
ပဗ္ဗာဇယမတ္တနော မလံ၊ တသ္မာ ‘‘ပဗ္ဗဇိတော’’တိ ဝုစ္စတိ။
၃၈၉.
န ဗြာဟ္မဏဿ ပဟရေယျ၊ နာဿ မုဉ္စေထ ဗြာဟ္မဏော။
ဓီ [ဓိ (သျာ. ဗျာကရဏေသု)] ဗြာဟ္မဏဿ ဟန္တာရံ၊ တတော ဓီ ယဿ [ယော + အဿ = ယဿ] မုဉ္စတိ။
၃၉၀.
န ဗြာဟ္မဏဿေတဒကိဉ္စိ သေယျော၊ ယဒါ နိသေဓေါ မနသော ပိယေဟိ။
ယတော ယတော ဟိံသမနော နိဝတ္တတိ၊ တတော တတော သမ္မတိမေဝ ဒုက္ခံ။
၃၉၁.
ယဿ ကာယေန ဝါစာယ၊ မနသာ နတ္ထိ ဒုက္ကဋံ။
သံဝုတံ တီဟိ ဌာနေဟိ၊ တမဟံ ဗြူမိ ဗြာဟ္မဏံ။
၃၉၂.
ယမှာ ဓမ္မံ ဝိဇာနေယျ၊ သမ္မာသမ္ဗုဒ္ဓဒေသိတံ။
သက္ကစ္စံ တံ နမဿေယျ၊ အဂ္ဂိဟုတ္တံဝ ဗြာဟ္မဏော။
၃၉၃.
န ဇဋာဟိ န ဂေါတ္တေန၊ န ဇစ္စာ ဟောတိ ဗြာဟ္မဏော။
ယမှိ သစ္စဉ္စ ဓမ္မော စ၊ သော သုစီ သော စ ဗြာဟ္မဏော။
၃၉၄.
ကိံ တေ ဇဋာဟိ ဒုမ္မေဓ၊ ကိံ တေ အဇိနသာဋိယာ။
အဗ္ဘန္တရံ တေ ဂဟနံ၊ ဗာဟိရံ ပရိမဇ္ဇသိ။
၃၉၅.
ပံသုကူလဓရံ ဇန္တုံ၊ ကိသံ ဓမနိသန္ထတံ။
ဧကံ ဝနသ္မိံ ဈာယန္တံ၊ တမဟံ ဗြူမိ ဗြာဟ္မဏံ။
၃၉၆.
န စာဟံ ဗြာဟ္မဏံ ဗြူမိ၊ ယောနိဇံ မတ္တိသမ္ဘဝံ။
ဘောဝါဒိ နာမ သော ဟောတိ၊ သစေ ဟောတိ သကိဉ္စနော။
အကိဉ္စနံ အနာဒါနံ၊ တမဟံ ဗြူမိ ဗြာဟ္မဏံ။
၃၉၇.
သဗ္ဗသံယောဇနံ ဆေတွာ၊ ယော ဝေ န ပရိတဿတိ။
သင်္ဂါတိဂံ ဝိသံယုတ္တံ၊ တမဟံ ဗြူမိ ဗြာဟ္မဏံ။
၃၉၈.
ဆေတွာ နဒ္ဓိံ [နန္ဓိံ (က. သီ.)၊ နန္ဒိံ (ဣ.)] ဝရတ္တဉ္စ၊ သန္ဒာနံ [သန္ဒာမံ (သီ.)] သဟနုက္ကမံ။
ဥက္ခိတ္တပလိဃံ ဗုဒ္ဓံ၊ တမဟံ ဗြူမိ ဗြာဟ္မဏံ။
၃၉၉.
အက္ကောသံ ဝဓဗန္ဓဉ္စ၊ အဒုဋ္ဌော ယော တိတိက္ခတိ။
ခန္တီဗလံ ဗလာနီကံ၊ တမဟံ ဗြူမိ ဗြာဟ္မဏံ။
၄၀၀.
အက္ကောဓနံ ဝတဝန္တံ၊ သီလဝန္တံ အနုဿဒံ။
ဒန္တံ အန္တိမသာရီရံ၊ တမဟံ ဗြူမိ ဗြာဟ္မဏံ။
၄၀၁.
ဝါရိ ပေါက္ခရပတ္တေဝ၊ အာရဂ္ဂေရိဝ သာသပေါ။
ယော န လိမ္ပတိ [လိပ္ပတိ (သီ. ဣ.)] ကာမေသု၊ တမဟံ ဗြူမိ ဗြာဟ္မဏံ။
၄၀၂.
ယော ဒုက္ခဿ ပဇာနာတိ၊ ဣဓေဝ ခယမတ္တနော။
ပန္နဘာရံ ဝိသံယုတ္တံ၊ တမဟံ ဗြူမိ ဗြာဟ္မဏံ။
၄၀၃.
ဂမ္ဘီရပညံ မေဓါဝိံ၊ မဂ္ဂါမဂ္ဂဿ ကောဝိဒံ။
ဥတ္တမတ္ထမနုပ္ပတ္တံ၊ တမဟံ ဗြူမိ ဗြာဟ္မဏံ။
၄၀၄.
အသံသဋ္ဌံ ဂဟဋ္ဌေဟိ၊ အနာဂါရေဟိ စူဘယံ။
အနောကသာရိမပ္ပိစ္ဆံ၊ တမဟံ ဗြူမိ ဗြာဟ္မဏံ။
၄၀၅.
နိဓါယ ဒဏ္ဍံ ဘူတေသု၊ တသေသု ထာဝရေသု စ။
ယော န ဟန္တိ န ဃာတေတိ၊ တမဟံ ဗြူမိ ဗြာဟ္မဏံ။
၄၀၆.
အဝိရုဒ္ဓံ ဝိရုဒ္ဓေသု၊ အတ္တဒဏ္ဍေသု နိဗ္ဗုတံ။
သာဒါနေသု အနာဒါနံ၊ တမဟံ ဗြူမိ ဗြာဟ္မဏံ။
၄၀၇.
ယဿ ရာဂေါ စ ဒေါသော စ၊ မာနော မက္ခော စ ပါတိတော။
သာသပေါရိဝ အာရဂ္ဂါ [အာရဂ္ဂေ (က.)]၊ တမဟံ ဗြူမိ ဗြာဟ္မဏံ။
၄၀၈.
အကက္ကသံ ဝိညာပနိံ၊ ဂိရံ သစ္စမုဒီရယေ။
ယာယ နာဘိသဇေ ကဉ္စိ [ကိဉ္စိ (က.)]၊ တမဟံ ဗြူမိ ဗြာဟ္မဏံ။
၄၀၉.
ယောဓ ဒီဃံ ဝ ရဿံ ဝါ၊ အဏုံ ထူလံ သုဘာသုဘံ။
လောကေ အဒိန္နံ နာဒိယတိ [နာဒေတိ (မ. နိ. ၂.၄၅၉)]၊ တမဟံ ဗြူမိ ဗြာဟ္မဏံ။
၄၁၀.
အာသာ ယဿ န ဝိဇ္ဇန္တိ၊ အသ္မိံ လောကေ ပရမှိ စ။
နိရာသာသံ [နိရာသယံ (သီ. သျာ. ဣ.)၊ နိရာသကံ (?)] ဝိသံယုတ္တံ၊ တမဟံ ဗြူမိ ဗြာဟ္မဏံ။
၄၁၁.
ယဿာလယာ န ဝိဇ္ဇန္တိ၊ အညာယ အကထံကထီ။
အမတောဂဓမနုပ္ပတ္တံ၊ တမဟံ ဗြူမိ ဗြာဟ္မဏံ။
၄၁၂.
ယောဓ ပုညဉ္စ ပါပဉ္စ၊ ဥဘော သင်္ဂမုပစ္စဂါ။
အသောကံ ဝိရဇံ သုဒ္ဓံ၊ တမဟံ ဗြူမိ ဗြာဟ္မဏံ။
၄၁၃.
စန္ဒံဝ ဝိမလံ သုဒ္ဓံ၊ ဝိပ္ပသန္နမနာဝိလံ။
နန္ဒီဘဝပရိက္ခီဏံ၊ တမဟံ ဗြူမိ ဗြာဟ္မဏံ။
၄၁၄.
ယောမံ [ယော ဣမံ (သီ. သျာ. ကံ. ဣ.)] ပလိပထံ ဒုဂ္ဂံ၊ သံသာရံ မောဟမစ္စဂါ။
တိဏ္ဏော ပါရဂတော [ပါရဂတော (သီ. သျာ. ကံ. ဣ.)] ဈာယီ၊ အနေဇော အကထံကထီ။
အနုပါဒါယ နိဗ္ဗုတော၊ တမဟံ ဗြူမိ ဗြာဟ္မဏံ။
၄၁၅.
ယောဓ ကာမေ ပဟန္တွာန [ပဟတွာန (သီ. ဣ.)]၊ အနာဂါရော ပရိဗ္ဗဇေ။
ကာမဘဝပရိက္ခီဏံ၊ တမဟံ ဗြူမိ ဗြာဟ္မဏံ [ဣဒံ ဂါထာဒွယံ ဝိဒေသပေါတ္ထကေသု သကိဒေဝ ဒဿိတံ]။
၄၁၆.
ယောဓ တဏှံ ပဟန္တွာန၊ အနာဂါရော ပရိဗ္ဗဇေ။
တဏှာဘဝပရိက္ခီဏံ ၊ တမဟံ ဗြူမိ ဗြာဟ္မဏံ။
၄၁၇.
ဟိတွာ မာနုသကံ ယောဂံ၊ ဒိဗ္ဗံ ယောဂံ ဥပစ္စဂါ။
သဗ္ဗယောဂဝိသံယုတ္တံ၊ တမဟံ ဗြူမိ ဗြာဟ္မဏံ။
၄၁၈.
ဟိတွာ ရတိဉ္စ အရတိဉ္စ၊ သီတိဘူတံ နိရူပဓိံ။
သဗ္ဗလောကာဘိဘုံ ဝီရံ၊ တမဟံ ဗြူမိ ဗြာဟ္မဏံ။
၄၁၉.
စုတိံ ယော ဝေဒိ သတ္တာနံ၊ ဥပပတ္တိဉ္စ သဗ္ဗသော။
အသတ္တံ သုဂတံ ဗုဒ္ဓံ၊ တမဟံ ဗြူမိ ဗြာဟ္မဏံ။
၄၂၀.
ယဿ ဂတိံ န ဇာနန္တိ၊ ဒေဝါ ဂန္ဓဗ္ဗမာနုသာ။
ခီဏာသဝံ အရဟန္တံ၊ တမဟံ ဗြူမိ ဗြာဟ္မဏံ။
၄၂၁.
ယဿ ပုရေ စ ပစ္ဆာ စ၊ မဇ္ဈေ စ နတ္ထိ ကိဉ္စနံ။
အကိဉ္စနံ အနာဒါနံ၊ တမဟံ ဗြူမိ ဗြာဟ္မဏံ။
၄၂၂.
ဥသဘံ ပဝရံ ဝီရံ၊ မဟေသိံ ဝိဇိတာဝိနံ။
အနေဇံ နှာတကံ [နဟာတကံ (သီ. သျာ. ကံ ဣ.)] ဗုဒ္ဓံ၊ တမဟံ ဗြူမိ ဗြာဟ္မဏံ။
၄၂၃.
ပုဗ္ဗေနိဝါသံ ယော ဝေဒိ၊ သဂ္ဂါပါယဉ္စ ပဿတိ၊
အထော ဇာတိက္ခယံ ပတ္တော၊ အဘိညာဝေါသိတော မုနိ။
သဗ္ဗဝေါသိတဝေါသာနံ၊ တမဟံ ဗြူမိ ဗြာဟ္မဏံ။
ဗြာဟ္မဏဝဂ္ဂေါ ဆဗ္ဗီသတိမော နိဋ္ဌိတော။
(ဧတ္တာဝတာ သဗ္ဗပဌမေ ယမကဝဂ္ဂေ စုဒ္ဒသ ဝတ္ထူနိ, အပ္ပမာဒဝဂ္ဂေ နဝ, စိတ္တဝဂ္ဂေ နဝ, ပုပ္ဖဝဂ္ဂေ ဒွါဒသ, ဗာလဝဂ္ဂေ ပန္နရသ, ပဏ္ဍိတဝဂ္ဂေ ဧကာဒသ, အရဟန္တဝဂ္ဂေ ဒသ, သဟဿဝဂ္ဂေ စုဒ္ဒသ, ပါပဝဂ္ဂေ ဒွါဒသ, ဒဏ္ဍဝဂ္ဂေ ဧကာဒသ, ဇရာဝဂ္ဂေ နဝ, အတ္တဝဂ္ဂေ ဒသ, လောကဝဂ္ဂေ ဧကာဒသ, ဗုဒ္ဓဝဂ္ဂေ နဝ [အဋ္ဌ (က.)], သုခဝဂ္ဂေ အဋ္ဌ, ပိယဝဂ္ဂေ နဝ, ကောဓဝဂ္ဂေ အဋ္ဌ, မလဝဂ္ဂေ ဒွါဒသ, ဓမ္မဋ္ဌဝဂ္ဂေ ဒသ, မဂ္ဂဝဂ္ဂေ ဒွါဒသ, ပကိဏ္ဏကဝဂ္ဂေ နဝ, နိရယဝဂ္ဂေ နဝ, နာဂဝဂ္ဂေ အဋ္ဌ, တဏှာဝဂ္ဂေ ဒွါဒသ, ဘိက္ခုဝဂ္ဂေ ဒွါဒသ, ဗြာဟ္မဏဝဂ္ဂေ စတ္တာလီသာတိ ပဉ္စာဓိကာနိ တီဏိ ဝတ္ထုသတာနိ။
သတေဝီသစတုဿတာ၊ စတုသစ္စဝိဘာဝိနာ။
သတတ္တယဉ္စ ဝတ္ထူနံ၊ ပဉ္စာဓိကံ သမုဋ္ဌိတာတိ) [( ) ဧတ္ထန္တရေ ပါဌော ဝိဒေသပေါတ္ထကေသု နတ္ထိ၊ အဋ္ဌကထာသုယေဝ ဒိဿတိ]။
[ဓမ္မပဒဿ ဝဂ္ဂဿုဒ္ဒါနံ§ယမကံ ပမာဒံ စိတ္တံ, ပုပ္ဖံ ဗာလဉ္စ ပဏ္ဍိတံ။§ရဟန္တံ သဟဿံ ပါပံ, ဒဏ္ဍံ ဇရာ အတ္တလောကံ။§ဗုဒ္ဓံ သုခံ ပိယံ ကောဓံ, မလံ ဓမ္မဋ္ဌမဂ္ဂဉ္စ။§ပကိဏ္ဏကံ နိရယံ နာဂံ, တဏှာ ဘိက္ခူ စ ဗြာဟ္မဏော။§ဂါထာယုဒ္ဒါနံ§ယမကေ ဝီသဂါထာယော, အပ္ပမာဒလောကမှိ စ။§ပိယေ ဒွါဒသဂါထာယော, စိတ္တေ ဇရတ္တေကာဒသ။§ပုပ္ဖဗာလသဟဿမှိ, ဗုဒ္ဓ မဂ္ဂ ပကိဏ္ဏကေ။§သောဠသ ပဏ္ဍိတေ ကောဓေ, နိရယေ နာဂေ စတုဒ္ဒသ။§အရဟန္တေ ဒသဂ္ဂါထာ, ပါပသုခမှိ တေရသ။§သတ္တရသ ဒဏ္ဍဓမ္မဋ္ဌေ, မလမှိ ဧကဝီသတိ။§တဏှာဝဂ္ဂေ သတ္တဗ္ဗီသ, တေဝီသ ဘိက္ခုဝဂ္ဂမှိ။§ဗြာဟ္မဏေ ဧကတာလီသ, စတုဿတာ သတေဝီသ။ (က.)]
ဓမ္မပဒေ ဝဂ္ဂါနမုဒ္ဒါနံ –
ယမကပ္ပမာဒေါ စိတ္တံ၊ ပုပ္ဖံ ဗာလေန ပဏ္ဍိတော။
အရဟန္တော သဟဿဉ္စ၊ ပါပံ ဒဏ္ဍေန တေ ဒသ။
ဇရာ အတ္တာ စ လောကော စ၊ ဗုဒ္ဓေါ သုခံ ပိယေန စ။
ကောဓေါ မလဉ္စ ဓမ္မဋ္ဌော၊ မဂ္ဂဝဂ္ဂေန ဝီသတိ။
ပကိဏ္ဏံ နိရယော နာဂေါ၊ တဏှာ ဘိက္ခု စ ဗြာဟ္မဏော။
ဧတေ ဆဗ္ဗီသတိ ဝဂ္ဂါ၊ ဒေသိတာဒိစ္စဗန္ဓုနာ။
ဂါထာနမုဒ္ဒါနံ –
ယမကေ ဝီသတိ ဂါထာ၊ အပ္ပမာဒမှိ ဒွါဒသ။
ဧကာဒသ စိတ္တဝဂ္ဂေ၊ ပုပ္ဖဝဂ္ဂမှိ သောဠသ။
ဗာလေ စ သောဠသ ဂါထာ၊ ပဏ္ဍိတမှိ စတုဒ္ဒသ။
အရဟန္တေ ဒသ ဂါထာ၊ သဟဿေ ဟောန္တိ သောဠသ။
တေရသ ပါပဝဂ္ဂမှိ၊ ဒဏ္ဍမှိ ဒသ သတ္တ စ။
ဧကာဒသ ဇရာ ဝဂ္ဂေ၊ အတ္တဝဂ္ဂမှိ တာ ဒသ။
ဒွါဒသ လောကဝဂ္ဂမှိ၊ ဗုဒ္ဓဝဂ္ဂမှိ ဌာရသ [သောဠသ (သဗ္ဗတ္ထ)]။
သုခေ စ ပိယဝဂ္ဂေ စ၊ ဂါထာယော ဟောန္တိ ဒွါဒသ။
စုဒ္ဒသ ကောဓဝဂ္ဂမှိ၊ မလဝဂ္ဂေကဝီသတိ။
သတ္တရသ စ ဓမ္မဋ္ဌေ၊ မဂ္ဂဝဂ္ဂေ သတ္တရသ။
ပကိဏ္ဏေ သောဠသ ဂါထာ၊ နိရယေ နာဂေ စ စုဒ္ဒသ။
ဆဗ္ဗီသ တဏှာဝဂ္ဂမှိ၊ တေဝီသ ဘိက္ခုဝဂ္ဂိကာ။
ဧကတာလီသဂါထာယော၊ ဗြာဟ္မဏေ ဝဂ္ဂမုတ္တမေ။
ဂါထာသတာနိ စတ္တာရိ၊ တေဝီသ စ ပုနာပရေ။
ဓမ္မပဒေ နိပါတမှိ၊ ဒေသိတာဒိစ္စဗန္ဓုနာတိ။
ဓမ္မပဒပါဠိ နိဋ္ဌိတာ။