၂၅. ဘိက္ခုဝဂ္ဂေါ
၃၆၀.
စက္ခုနာ သံဝရော သာဓု၊ သာဓု သောတေန သံဝရော။
ဃာနေန သံဝရော သာဓု၊ သာဓု ဇိဝှါယ သံဝရော။
၃၆၁.
ကာယေန သံဝရော သာဓု၊ သာဓု ဝါစာယ သံဝရော။
မနသာ သံဝရော သာဓု၊ သာဓု သဗ္ဗတ္ထ သံဝရော။
သဗ္ဗတ္ထ သံဝုတော ဘိက္ခု၊ သဗ္ဗဒုက္ခာ ပမုစ္စတိ။
၃၆၂.
ဟတ္ထသံယတော ပါဒသံယတော၊ ဝါစာသံယတော သံယတုတ္တမော။
အဇ္ဈတ္တရတော သမာဟိတော၊ ဧကော သန္တုသိတော တမာဟု ဘိက္ခုံ။
၃၆၃.
ယော မုခသံယတော ဘိက္ခု၊ မန္တဘာဏီ အနုဒ္ဓတော။
အတ္ထံ ဓမ္မဉ္စ ဒီပေတိ၊ မဓုရံ တဿ ဘာသိတံ။
၃၆၄.
ဓမ္မာရာမော ဓမ္မရတော၊ ဓမ္မံ အနုဝိစိန္တယံ။
ဓမ္မံ အနုဿရံ ဘိက္ခု၊ သဒ္ဓမ္မာ န ပရိဟာယတိ။
၃၆၅.
သလာဘံ နာတိမညေယျ၊ နာညေသံ ပိဟယံ စရေ။
အညေသံ ပိဟယံ ဘိက္ခု၊ သမာဓိံ နာဓိဂစ္ဆတိ။
၃၆၆.
အပ္ပလာဘောပိ စေ ဘိက္ခု၊ သလာဘံ နာတိမညတိ။
တံ ဝေ ဒေဝါ ပသံသန္တိ၊ သုဒ္ဓါဇီဝိံ အတန္ဒိတံ။
၃၆၇.
သဗ္ဗသော နာမရူပသ္မိံ၊ ယဿ နတ္ထိ မမာယိတံ။
အသတာ စ န သောစတိ၊ သ ဝေ ‘‘ဘိက္ခူ’’တိ ဝုစ္စတိ။
၃၆၈.
မေတ္တာဝိဟာရီ ယော ဘိက္ခု၊ ပသန္နော ဗုဒ္ဓသာသနေ။
အဓိဂစ္ဆေ ပဒံ သန္တံ၊ သင်္ခါရူပသမံ သုခံ။
၃၆၉.
သိဉ္စ ဘိက္ခု ဣမံ နာဝံ၊ သိတ္တာ တေ လဟုမေဿတိ။
ဆေတွာ ရာဂဉ္စ ဒေါသဉ္စ၊ တတော နိဗ္ဗာနမေဟိသိ။
၃၇၀.
ပဉ္စ ဆိန္ဒေ ပဉ္စ ဇဟေ၊ ပဉ္စ စုတ္တရိ ဘာဝယေ။
ပဉ္စ သင်္ဂါတိဂေါ ဘိက္ခု၊ ‘‘ဩဃတိဏ္ဏော’’တိ ဝုစ္စတိ။
၃၇၁.
ဈာယ ဘိက္ခု [ဈာယ တုဝံ ဘိက္ခု (?)] မာ ပမာဒေါ [မာ စ ပမာဒေါ (သီ. သျာ. ဣ.)]၊ မာ တေ ကာမဂုဏေ ရမေဿု [ဘမဿု (သီ. ဣ.)၊ ဘဝဿု (သျာ.)၊ ရမဿု (က.)] စိတ္တံ။
မာ လောဟဂုဠံ ဂိလီ ပမတ္တော၊ မာ ကန္ဒိ ‘‘ဒုက္ခမိဒ’’န္တိ ဍယှမာနော။
၃၇၂.
နတ္ထိ ဈာနံ အပညဿ၊ ပညာ နတ္ထိ အဈာယတော [အဇ္ဈာယိနော (က.)]။
ယမှိ ဈာနဉ္စ ပညာ စ၊ သ ဝေ နိဗ္ဗာနသန္တိကေ။
၃၇၃.
သုညာဂါရံ ပဝိဋ္ဌဿ၊ သန္တစိတ္တဿ ဘိက္ခုနော။
အမာနုသီ ရတိ ဟောတိ၊ သမ္မာ ဓမ္မံ ဝိပဿတော။
၃၇၄.
ယတော ယတော သမ္မသတိ၊ ခန္ဓာနံ ဥဒယဗ္ဗယံ။
လဘတီ [လဘတိ (ဣ.)၊ လဘတေ (က.)] ဣတိပါမောဇ္ဇံ၊ အမတံ တံ ဝိဇာနတံ။
၃၇၅.
တတြာယမာဒိ ဘဝတိ၊ ဣဓ ပညဿ ဘိက္ခုနော။
ဣန္ဒ္ရိယဂုတ္တိ သန္တုဋ္ဌိ၊ ပါတိမောက္ခေ စ သံဝရော။
၃၇၆.
မိတ္တေ ဘဇဿု ကလျာဏေ၊ သုဒ္ဓါဇီဝေ အတန္ဒိတေ။
ပဋိသန္ထာရဝုတ္ယဿ [ပဋိသန္ဓာရဝုတ္ယဿ (က.)]၊ အာစာရကုသလော သိယာ။
တတော ပါမောဇ္ဇဗဟုလော၊ ဒုက္ခဿန္တံ ကရိဿတိ။
၃၇၇.
ဝဿိကာ ဝိယ ပုပ္ဖာနိ၊ မဒ္ဒဝါနိ [မဇ္ဇဝါနိ (က. ဋီကာ) ပစ္စဝါနိ (က. အဋ္ဌ.)] ပမုဉ္စတိ။
ဧဝံ ရာဂဉ္စ ဒေါသဉ္စ၊ ဝိပ္ပမုဉ္စေထ ဘိက္ခဝေါ။
၃၇၈.
သန္တကာယော သန္တဝါစော၊ သန္တဝါ သုသမာဟိတော [သန္တမနော သုသမာဟိတော (သျာ. ဣ.)၊ သန္တမနော သမာဟိတော (က.)]။
ဝန္တလောကာမိသော ဘိက္ခု၊ ‘‘ဥပသန္တော’’တိ ဝုစ္စတိ။
၃၇၉.
အတ္တနာ စောဒယတ္တာနံ၊ ပဋိမံသေထ အတ္တနာ [ပဋိမာသေ အတ္တမတ္တနာ (သီ. ဣ.)၊ ပဋိမံသေ တမတ္တနာ (သျာ.)]။
သော အတ္တဂုတ္တော သတိမာ၊ သုခံ ဘိက္ခု ဝိဟာဟိသိ။
၃၈၀.
အတ္တာ ဟိ အတ္တနော နာထော၊ (ကော ဟိ နာထော ပရော သိယာ) [( ) ဝိဒေသပေါတ္ထကေသု နတ္ထိ]
အတ္တာ ဟိ အတ္တနော ဂတိ။
တသ္မာ သံယမမတ္တာနံ [သံယမယ’တ္တာနံ (သီ. ဣ.)]၊ အဿံ ဘဒြံဝ ဝါဏိဇော။
၃၈၁.
ပါမောဇ္ဇဗဟုလော ဘိက္ခု၊ ပသန္နော ဗုဒ္ဓသာသနေ။
အဓိဂစ္ဆေ ပဒံ သန္တံ၊ သင်္ခါရူပသမံ သုခံ။
၃၈၂.
ယော ဟဝေ ဒဟရော ဘိက္ခု၊ ယုဉ္ဇတိ ဗုဒ္ဓသာသနေ။
သောမံ [သော ဣမံ (သီ. သျာ. ကံ. ဣ.)] လောကံ ပဘာသေတိ၊ အဗ္ဘာ မုတ္တောဝ စန္ဒိမာ။
ဘိက္ခုဝဂ္ဂေါ ပဉ္စဝီသတိမော နိဋ္ဌိတော။