၁၅. သုခဝဂ္ဂေါ
၁၉၇.
သုသုခံ ဝတ ဇီဝါမ၊ ဝေရိနေသု အဝေရိနော။
ဝေရိနေသု မနုဿေသု၊ ဝိဟရာမ အဝေရိနော။
၁၉၈.
သုသုခံ ဝတ ဇီဝါမ၊ အာတုရေသု အနာတုရာ။
အာတုရေသု မနုဿေသု၊ ဝိဟရာမ အနာတုရာ။
၁၉၉.
သုသုခံ ဝတ ဇီဝါမ၊ ဥဿုကေသု အနုဿုကာ။
ဥဿုကေသု မနဿေသု၊ ဝိဟရာမ အနုဿုကာ။
၂၀၀.
သုသုခံ ဝတ ဇီဝါမ၊ ယေသံ နော နတ္ထိ ကိဉ္စနံ။
ဣတိဘက္ခာ ဘဝိဿာမ၊ ဒေဝါ အာဘဿရာ ယထာ။
၂၀၁.
ဇယံ ဝေရံ ပသဝတိ၊ ဒုက္ခံ သေတိ ပရာဇိတော။
ဥပသန္တော သုခံ သေတိ၊ ဟိတွာ ဇယပရာဇယံ။
၂၀၂.
နတ္ထိ ရာဂသမော အဂ္ဂိ၊ နတ္ထိ ဒေါသသမော ကလိ။
နတ္ထိ ခန္ဓသမာ [ခန္ဓာဒိသာ (သီ. သျာ. ဣ. ရူပသိဒ္ဓိယာ သမေတိ)] ဒုက္ခာ၊ နတ္ထိ သန္တိပရံ သုခံ။
၂၀၃.
ဇိဃစ္ဆာပရမာ ရောဂါ၊ သင်္ခါရပရမာ [သင်္ကာရာ ပရမာ (ဗဟူသု)] ဒုခါ။
ဧတံ ဉတွာ ယထာဘူတံ၊ နိဗ္ဗာနံ ပရမံ သုခံ။
၂၀၄.
အာရောဂ္ယပရမာ လာဘာ၊ သန္တုဋ္ဌိပရမံ ဓနံ။
ဝိဿာသပရမာ ဉာတိ [ဝိဿာသပရမော ဉာတိ (က. သီ.)၊ ဝိဿာသပရမာ ဉာတီ (သီ. အဋ္ဌ.)၊ ဝိဿာသာ ပရမာ ဉာတိ (က.)]၊ နိဗ္ဗာနံ ပရမံ [နိဗ္ဗာဏပရမံ (က. သီ.)] သုခံ။
၂၀၅.
ပဝိဝေကရသံ ပိတွာ [ဣတွာ (သီ. သျာ. ကံ. ဣ.)]၊ ရသံ ဥပသမဿ စ။
နိဒ္ဒရော ဟောတိ နိပ္ပါပေါ၊ ဓမ္မဣတိရသံ ပိဝံ။
၂၀၆.
သာဟု ဒဿနမရိယာနံ၊ သန္နိဝါသော သဒါ သုခေါ။
အဒဿနေန ဗာလာနံ၊ နိစ္စမေဝ သုခီ သိယာ။
၂၀၇.
ဗာလသင်္ဂတစာရီ [ဗာလသင်္ဂတိစာရီ (က.)] ဟိ၊ ဒီဃမဒ္ဓါန သောစတိ။
ဒုက္ခော ဗာလေဟိ သံဝါသော၊ အမိတ္တေနေဝ သဗ္ဗဒါ။
ဓီရော စ သုခသံဝါသော၊ ဉာတီနံဝ သမာဂမော။
၂၀၈.
တသ္မာ ဟိ –
ဓီရဉ္စ ပညဉ္စ ဗဟုဿုတဉ္စ၊ ဓေါရယှသီလံ ဝတဝန္တမရိယံ။
တံ တာဒိသံ သပ္ပုရိသံ သုမေဓံ၊ ဘဇေထ နက္ခတ္တပထံဝ စန္ဒိမာ [တသ္မာ ဟိ ဓီရံ ပညဉ္စ၊ ဗဟုဿုတဉ္စ ဓေါရယှံ။ သီလံ ဓုတဝတမရိယံ၊ တံ တာဒိသံ သပ္ပုရိသံ။ သုမေဓံ ဘဇေထ နက္ခတ္တပထံဝ စန္ဒိမာ။ (က.)]။
သုခဝဂ္ဂေါ ပန္နရသမော နိဋ္ဌိတော။