၁၁. ဇရာဝဂ္ဂေါ
၁၄၆.
ကော နု ဟာသော [ကိန္နု ဟာသော (က.)] ကိမာနန္ဒော၊ နိစ္စံ ပဇ္ဇလိတေ သတိ။
အန္ဓကာရေန ဩနဒ္ဓါ၊ ပဒီပံ န ဂဝေသထ။
၁၄၇.
ပဿ စိတ္တကတံ ဗိမ္ဗံ၊ အရုကာယံ သမုဿိတံ။
အာတုရံ ဗဟုသင်္ကပ္ပံ၊ ယဿ နတ္ထိ ဓုဝံ ဌိတိ။
၁၄၈.
ပရိဇိဏ္ဏမိဒံ ရူပံ၊ ရောဂနီဠံ [ရောဂနိဍ္ဎံ (သီ. ဣ.)၊ ရောဂနိဒ္ဓံ (သျာ.)] ပဘင်္ဂုရံ။
ဘိဇ္ဇတိ ပူတိသန္ဒေဟော၊ မရဏန္တဉှိ ဇီဝိတံ။
၁၄၉.
ယာနိမာနိ အပတ္ထာနိ [ယာနိမာနိ အပတ္ထာနိ (သီ. သျာ. ဣ.)၊ ယာနိမာနိ’ပဝိဒ္ဓါနိ (?)]၊ အလာဗူနေဝ [အလာပူနေဝ (သီ. သျာ. ဣ.)] သာရဒေ။
ကာပေါတကာနိ အဋ္ဌီနိ၊ တာနိ ဒိသွာန ကာ ရတိ။
၁၅၀.
အဋ္ဌီနံ နဂရံ ကတံ၊ မံသလောဟိတလေပနံ။
ယတ္ထ ဇရာ စ မစ္စု စ၊ မာနော မက္ခော စ ဩဟိတော။
၁၅၁.
ဇီရန္တိ ဝေ ရာဇရထာ သုစိတ္တာ၊ အထော သရီရမ္ပိ ဇရံ ဥပေတိ။
သတဉ္စ ဓမ္မော န ဇရံ ဥပေတိ၊ သန္တော ဟဝေ သဗ္ဘိ ပဝေဒယန္တိ။
၁၅၂.
အပ္ပဿုတာယံ ပုရိသော၊ ဗလိဗဒ္ဓေါဝ [ဗလိဝဒ္ဒေါဝ (သီ. သျာ. ဣ.)] ဇီရတိ။
မံသာနိ တဿ ဝဍ္ဎန္တိ၊ ပညာ တဿ န ဝဍ္ဎတိ။
၁၅၃.
အနေကဇာတိသံသာရံ ၊ သန္ဓာဝိဿံ အနိဗ္ဗိသံ။
ဂဟကာရံ [ဂဟကာရကံ (သီ. သျာ. ဣ.)] ဂဝေသန္တော၊ ဒုက္ခာ ဇာတိ ပုနပ္ပုနံ။
၁၅၄.
ဂဟကာရက ဒိဋ္ဌောသိ၊ ပုန ဂေဟံ န ကာဟသိ။
သဗ္ဗာ တေ ဖာသုကာ ဘဂ္ဂါ၊ ဂဟကူဋံ ဝိသင်္ခတံ။
ဝိသင်္ခါရဂတံ စိတ္တံ၊ တဏှာနံ ခယမဇ္ဈဂါ။
၁၅၅.
အစရိတွာ ဗြဟ္မစရိယံ၊ အလဒ္ဓါ ယောဗ္ဗနေ ဓနံ။
ဇိဏ္ဏကောဉ္စာဝ ဈာယန္တိ၊ ခီဏမစ္ဆေဝ ပလ္လလေ။
၁၅၆.
အစရိတွာ ဗြဟ္မစရိယံ၊ အလဒ္ဓါ ယောဗ္ဗနေ ဓနံ။
သေန္တိ စာပါတိခီဏာဝ၊ ပုရာဏာနိ အနုတ္ထုနံ။
ဇရာဝဂ္ဂေါ ဧကာဒသမော နိဋ္ဌိတော။