၁၀. ဒဏ္ဍဝဂ္ဂေါ
၁၂၉.
သဗ္ဗေ တသန္တိ ဒဏ္ဍဿ၊ သဗ္ဗေ ဘာယန္တိ မစ္စုနော။
အတ္တာနံ ဥပမံ ကတွာ၊ န ဟနေယျ န ဃာတယေ။
၁၃၀.
သဗ္ဗေ တသန္တိ ဒဏ္ဍဿ၊ သဗ္ဗေသံ ဇီဝိတံ ပိယံ။
အတ္တာနံ ဥပမံ ကတွာ၊ န ဟနေယျ န ဃာတယေ။
၁၃၁.
သုခကာမာနိ ဘူတာနိ၊ ယော ဒဏ္ဍေန ဝိဟိံသတိ။
အတ္တနော သုခမေသာနော၊ ပေစ္စ သော န လဘတေ သုခံ။
၁၃၂.
သုခကာမာနိ ဘူတာနိ၊ ယော ဒဏ္ဍေန န ဟိံသတိ။
အတ္တနော သုခမေသာနော၊ ပေစ္စ သော လဘတေ သုခံ။
၁၃၃.
မာဝေါစ ဖရုသံ ကဉ္စိ၊ ဝုတ္တာ ပဋိဝဒေယျု တံ [ပဋိဝဒေယျုံ တံ (က.)]။
ဒုက္ခာ ဟိ သာရမ္ဘကထာ၊ ပဋိဒဏ္ဍာ ဖုသေယျု တံ [ဖုသေယျုံ တံ (က.)]။
၁၃၄.
သစေ နေရေသိ အတ္တာနံ၊ ကံသော ဥပဟတော ယထာ။
ဧသ ပတ္တောသိ နိဗ္ဗာနံ၊ သာရမ္ဘော တေ န ဝိဇ္ဇတိ။
၁၃၅.
ယထာ ဒဏ္ဍေန ဂေါပါလော၊ ဂါဝေါ ပါဇေတိ ဂေါစရံ။
ဧဝံ ဇရာ စ မစ္စု စ၊ အာယုံ ပါဇေန္တိ ပါဏိနံ။
၁၃၆.
အထ ပါပါနိ ကမ္မာနိ၊ ကရံ ဗာလော န ဗုဇ္ဈတိ။
သေဟိ ကမ္မေဟိ ဒုမ္မေဓေါ၊ အဂ္ဂိဒဍ္ဎောဝ တပ္ပတိ။
၁၃၇.
ယော ဒဏ္ဍေန အဒဏ္ဍေသု၊ အပ္ပဒုဋ္ဌေသု ဒုဿတိ။
ဒသန္နမညတရံ ဌာနံ၊ ခိပ္ပမေဝ နိဂစ္ဆတိ။
၁၃၈.
ဝေဒနံ ဖရုသံ ဇာနိံ၊ သရီရဿ စ ဘေဒနံ [သရီရဿ ပဘေဒနံ (သျာ.)]။
ဂရုကံ ဝါပိ အာဗာဓံ၊ စိတ္တက္ခေပဉ္စ [စိတ္တက္ခေပံ ဝ (သီ. သျာ. ဣ.)] ပါပုဏေ။
၁၃၉.
ရာဇတော ဝါ ဥပသဂ္ဂံ [ဥပဿဂ္ဂံ (သီ. ဣ.)]၊ အဗ္ဘက္ခာနဉ္စ [အဗ္ဘက္ခာနံ ဝ (သီ. ဣ.)] ဒါရုဏံ။
ပရိက္ခယဉ္စ [ပရိက္ခယံ ဝ (သီ. သျာ. ဣ.)] ဉာတီနံ၊ ဘောဂါနဉ္စ [ဘောဂါနံ ဝ (သီ. သျာ. ဣ.)] ပဘင်္ဂုရံ [ပဘင်္ဂုနံ (က.)]။
၁၄၀.
အထ ဝါဿ အဂါရာနိ၊ အဂ္ဂိ ဍဟတိ [ဍယှတိ (က.)] ပါဝကော။
ကာယဿ ဘေဒါ ဒုပ္ပညော၊ နိရယံ သောပပဇ္ဇတိ [သော ဥပပဇ္ဇတိ (သီ. သျာ.)]။
၁၄၁.
န နဂ္ဂစရိယာ န ဇဋာ န ပင်္ကာ၊ နာနာသကာ ထဏ္ဍိလသာယိကာ ဝါ။
ရဇောဇလ္လံ ဥက္ကုဋိကပ္ပဓါနံ၊ သောဓေန္တိ မစ္စံ အဝိတိဏ္ဏကင်္ခံ။
၁၄၂.
အလင်္ကတော စေပိ သမံ စရေယျ၊ သန္တော ဒန္တော နိယတော ဗြဟ္မစာရီ။
သဗ္ဗေသု ဘူတေသု နိဓါယ ဒဏ္ဍံ၊ သော ဗြာဟ္မဏော သော သမဏော သ ဘိက္ခု။
၁၄၃.
ဟိရီနိသေဓေါ ပုရိသော၊ ကောစိ လောကသ္မိ ဝိဇ္ဇတိ။
ယော နိဒ္ဒံ [နိန္ဒံ (သီ. ဣ.) သံ. နိ. ၁.၁၈] အပဗောဓေတိ [အပဗောဓတိ (သီ. သျာ. ဣ.)]၊ အဿော ဘဒြော ကသာမိဝ။
၁၄၄.
အဿော ယထာ ဘဒြော ကသာနိဝိဋ္ဌော၊ အာတာပိနော သံဝေဂိနော ဘဝါထ။
သဒ္ဓါယ သီလေန စ ဝီရိယေန စ၊ သမာဓိနာ ဓမ္မဝိနိစ္ဆယေန စ။
သမ္ပန္နဝိဇ္ဇာစရဏာ ပတိဿတာ၊ ဇဟိဿထ [ပဟဿထ (သီ. သျာ. ဣ.)] ဒုက္ခမိဒံ အနပ္ပကံ။
၁၄၅.
ဥဒကဉှိ နယန္တိ နေတ္တိကာ၊ ဥသုကာရာ နမယန္တိ တေဇနံ။
ဒါရုံ နမယန္တိ တစ္ဆကာ၊ အတ္တာနံ ဒမယန္တိ သုဗ္ဗတာ။
ဒဏ္ဍဝဂ္ဂေါ ဒသမော နိဋ္ဌိတော။