၉. ပါပဝဂ္ဂေါ
၁၁၆.
အဘိတ္ထရေထ ကလျာဏေ၊ ပါပါ စိတ္တံ နိဝါရယေ။
ဒန္ဓဉှိ ကရောတော ပုညံ၊ ပါပသ္မိံ ရမတီ မနော။
၁၁၇.
ပါပဉ္စေ ပုရိသော ကယိရာ၊ န နံ [န တံ (သီ. ဣ.)] ကယိရာ ပုနပ္ပုနံ။
န တမှိ ဆန္ဒံ ကယိရာထ၊ ဒုက္ခော ပါပဿ ဥစ္စယော။
၁၁၈.
ပုညဉ္စေ ပုရိသော ကယိရာ၊ ကယိရာ နံ [ကယိရာထေတံ (သီ. သျာ.)၊ ကယိရာထေနံ (ဣ.)] ပုနပ္ပုနံ။
တမှိ ဆန္ဒံ ကယိရာထ၊ သုခေါ ပုညဿ ဥစ္စယော။
၁၁၉.
ပါပေါပိ ပဿတိ ဘဒြံ၊ ယာဝ ပါပံ န ပစ္စတိ။
ယဒါ စ ပစ္စတိ ပါပံ၊ အထ ပါပေါ ပါပါနိ [အထ ပါပါနိ (?)] ပဿတိ။
၁၂၀.
ဘဒြောပိ ပဿတိ ပါပံ၊ ယာဝ ဘဒြံ န ပစ္စတိ။
ယဒါ စ ပစ္စတိ ဘဒြံ၊ အထ ဘဒြော ဘဒြာနိ [အထ ဘဒြာနိ (?)] ပဿတိ။
၁၂၁.
မာဝမညေထ [မာပ္ပမညေထ (သီ. သျာ. ဣ.)] ပါပဿ၊ န မန္တံ [န မံ တံ (သီ. ဣ.)၊ န မတ္တံ (သျာ.)] အာဂမိဿတိ။
ဥဒဗိန္ဒုနိပါတေန၊ ဥဒကုမ္ဘောပိ ပူရတိ။
ဗာလော ပူရတိ [ပူရတိ ဗာလော (သီ. က.)၊ အာပူရတိ ဗာလော (သျာ.)] ပါပဿ၊ ထောကံ ထောကမ္ပိ [ထောက ထောကမ္ပိ (သီ. ဣ.)] အာစိနံ။
၁၂၂.
မာဝမညေထ ပုညဿ၊ န မန္တံ အာဂမိဿတိ။
ဥဒဗိန္ဒုနိပါတေန၊ ဥဒကုမ္ဘောပိ ပူရတိ။
ဓီရော ပူရတိ ပုညဿ၊ ထောကံ ထောကမ္ပိ အာစိနံ။
၁၂၃.
ဝါဏိဇောဝ ဘယံ မဂ္ဂံ၊ အပ္ပသတ္ထော မဟဒ္ဓနော။
ဝိသံ ဇီဝိတုကာမောဝ၊ ပါပါနိ ပရိဝဇ္ဇယေ။
၁၂၄.
ပါဏိမှိ စေ ဝဏော နာဿ၊ ဟရေယျ ပါဏိနာ ဝိသံ။
နာဗ္ဗဏံ ဝိသမန္ဝေတိ၊ နတ္ထိ ပါပံ အကုဗ္ဗတော။
၁၂၅.
ယော အပ္ပဒုဋ္ဌဿ နရဿ ဒုဿတိ၊ သုဒ္ဓဿ ပေါသဿ အနင်္ဂဏဿ။
တမေဝ ဗာလံ ပစ္စေတိ ပါပံ၊ သုခုမော ရဇော ပဋိဝါတံဝ ခိတ္တော။
၁၂၆.
ဂဗ္ဘမေကေ ဥပ္ပဇ္ဇန္တိ၊ နိရယံ ပါပကမ္မိနော။
သဂ္ဂံ သုဂတိနော ယန္တိ၊ ပရိနိဗ္ဗန္တိ အနာသဝါ။
၁၂၇.
န အန္တလိက္ခေ န သမုဒ္ဒမဇ္ဈေ၊ န ပဗ္ဗတာနံ ဝိဝရံ ပဝိဿ [ပဝိသံ (သျာ.)]။
န ဝိဇ္ဇတီ [န ဝိဇ္ဇတိ (က. သီ. ဣ. က.)] သော ဇဂတိပ္ပဒေသော၊ ယတ္ထဋ္ဌိတော [ယတြဋ္ဌိတော (သျာ.)] မုစ္စေယျ ပါပကမ္မာ။
၁၂၈.
န အန္တလိက္ခေ န သမုဒ္ဒမဇ္ဈေ၊ န ပဗ္ဗတာနံ ဝိဝရံ ပဝိဿ။
န ဝိဇ္ဇတီ သော ဇဂတိပ္ပဒေသော၊ ယတ္ထဋ္ဌိတံ [ယတြဋ္ဌိတံ (သျာ.)] နပ္ပသဟေယျ မစ္စု။
ပါပဝဂ္ဂေါ နဝမော နိဋ္ဌိတော။