မေတ္တသုတ္တံ

၉. မေတ္တသုတ္တံ

၁.

ကရဏီယမတ္ထကုသလေန ၊ ယန္တသန္တံ ပဒံ အဘိသမေစ္စ။

သက္ကော ဥဇူ စ သုဟုဇူ [သူဇူ (သီ.)] စ၊ သုဝစော စဿ မုဒု အနတိမာနီ။

၂.

သန္တုဿကော စ သုဘရော စ၊ အပ္ပကိစ္စော စ သလ္လဟုကဝုတ္တိ။

သန္တိန္ဒ္ရိယော စ နိပကော စ၊ အပ္ပဂဗ္ဘော ကုလေသွနနုဂိဒ္ဓေါ။

၃.

န စ ခုဒ္ဒမာစရေ ကိဉ္စိ၊ ယေန ဝိညူ ပရေ ဥပဝဒေယ္ယုံ။

သုခိနောဝ ခေမိနော ဟောန္တု၊ သဗ္ဗသတ္တာ [သဗ္ဗေ သတ္တာ (သီ. သ္ယာ.)] ဘဝန္တု သုခိတတ္တာ။

၄.

ယေ ကေစိ ပာဏဘူတတ္ထိ၊ တသာ ဝာ ထာဝရာ ဝနဝသေသာ။

ဒီဃာ ဝာ ယေဝ မဟန္တာ [မဟန္တ (?)]၊ မဇ္ဈိမာ ရသ္သကာ အဏုကထူလာ။

၅.

ဒိဋ္ဌာ ဝာ ယေဝ အဒိဋ္ဌာ [အဒိဋ္ဌ (?)]၊ ယေ ဝ [ယေ စ (သီ. သ္ယာ. ကံ. ပီ.)] ဒူရေ ဝသန္တိ အဝိဒူရေ။

ဘူတာ ဝ [ဝာ (သ္ယာ. ကံ. ပီ. က.)] သမ္ဘဝေသီ ဝ [ဝာ (သီ. သ္ယာ. ကံ. ပီ.)]၊ သဗ္ဗသတ္တာ ဘဝန္တု သုခိတတ္တာ။

၆.

န ပရော ပရံ နိကုဗ္ဗေထ၊ နာတိမညေထ ကတ္ထစိ န ကဉ္စိ [နံ ကဉ္စိ (သီ. ပီ.)၊ နံ ကိဉ္စိ (သ္ယာ.)၊ န ကိဉ္စိ (က.)]။

ဗ္ယာရောသနာ ပဋိဃသညာ၊ နာညမညသ္သ ဒုက္ခမိစ္ဆေယ္ယ။

၇.

မာတာ ယထာ နိယံ ပုတ္တမာယုသာ ဧကပုတ္တမနုရက္ခေ။

ဧဝမ္ပိ သဗ္ဗဘူတေသု၊ မာနသံ ဘာဝယေ အပရိမာဏံ။

၈.

မေတ္တဉ္စ သဗ္ဗလောကသ္မိ၊ မာနသံ ဘာဝယေ အပရိမာဏံ။

ဥဒ္ဓံ အဓော စ တိရိယဉ္စ၊ အသမ္ဗာဓံ အဝေရမသပတ္တံ။

၉.

တိဋ္ဌံ စရံ နိသိန္နော ဝ [ဝာ (သီ. သ္ယာ. ကံ. ပီ.)]၊ သယာနော ယာဝတာသ္သ ဝိတမိဒ္ဓော [ဝိဂတမိဒ္ဓော (ဗဟူသု)]။

ဧတံ သတိံ အဓိဋ္ဌေယ္ယ၊ ဗ္ရဟ္မမေတံ ဝိဟာရမိဓမာဟု။

၁၀.

ဒိဋ္ဌိဉ္စ အနုပဂ္ဂမ္မ၊ သီလဝာ ဒသ္သနေန သမ္ပန္နော။

ကာမေသု ဝိနယ [ဝိနေယ္ယ (သီ.)] ဂေဓံ၊ န ဟိ ဇာတုဂ္ဂဗ္ဘသေယ္ယ ပုန ရေတီတိ။

မေတ္တသုတ္တံ နိဋ္ဌိတံ။

ခုဒ္ဒကပာဌပါဠိ နိဋ္ဌိတာ။