၈. နိဓိကဏ္ဍသုတ္တံ
၁.
နိဓိံ နိဓေတိ ပုရိသော၊ ဂမ္ဘီရေ ဩဒကန္တိကေ။
အတ္ထေ ကိစ္စေ သမုပ္ပန္နေ၊ အတ္ထာယ မေ ဘဝိသ္သတိ။
၂.
ရာဇတော ဝာ ဒုရုတ္တသ္သ၊ စောရတော ပီဠိတသ္သ ဝာ။
ဣဏသ္သ ဝာ ပမောက္ခာယ၊ ဒုဗ္ဘိက္ခေ အာပဒာသု ဝာ။
ဧတဒတ္ထာယ လောကသ္မိံ၊ နိဓိ နာမ နိဓီယတိ။
၃.
တာဝသ္သုနိဟိတော [တာဝ သုနိဟိတော (သီ.)] သန္တော၊ ဂမ္ဘီရေ ဩဒကန္တိကေ။
န သဗ္ဗော သဗ္ဗဒာ ဧဝ၊ တသ္သ တံ ဥပကပ္ပတိ။
၄.
နိဓိ ဝာ ဌာနာ စဝတိ၊ သညာ ဝာသ္သ ဝိမုယ္ဟတိ။
နာဂာ ဝာ အပနာမေန္တိ၊ ယက္ခာ ဝာပိ ဟရန္တိ နံ။
၅.
အပ္ပိယာ ဝာပိ ဒာယာဒာ၊ ဥဒ္ဓရန္တိ အပသ္သတော။
ယဒာ ပုညက္ခယော ဟောတိ၊ သဗ္ဗမေတံ ဝိနသ္သတိ။
၆.
ယသ္သ ဒာနေန သီလေန၊ သံယမေန ဒမေန စ။
နိဓီ သုနိဟိတော ဟောတိ၊ ဣတ္ထိယာ ပုရိသသ္သ ဝာ။
၇.
စေတိယမ္ဟိ စ သင္ဃေ ဝာ၊ ပုဂ္ဂလေ အတိထီသု ဝာ။
မာတရိ ပိတရိ စာပိ [ဝာပိ (သ္ယာ. ကံ.)]၊ အထော ဇေဋ္ဌမ္ဟိ ဘာတရိ။
၈.
ဧသော နိဓိ သုနိဟိတော၊ အဇေယ္ယော အနုဂာမိကော။
ပဟာယ ဂမနီယေသု၊ ဧတံ အာဒာယ ဂစ္ဆတိ။
၉.
အသာဓာရဏမညေသံ၊ အစောရာဟရဏော နိဓိ။
ကယိရာထ ဓီရော ပုညာနိ၊ ယော နိဓိ အနုဂာမိကော။
၁၀.
ဧသ ဒေဝမနုသ္သာနံ၊ သဗ္ဗကာမဒဒော နိဓိ။
ယံ ယဒေဝာဘိပတ္ထေန္တိ၊ သဗ္ဗမေတေန လဗ္ဘတိ။
၁၁.
သုဝဏ္ဏတာ သုသရတာ၊ သုသဏ္ဌာနာ သုရူပတာ [သုသဏ္ဌာနသုရူပတာ (သီ.)၊ သုသဏ္ဌာနံ သုရူပတာ (သ္ယာ. ကံ.)]။
အာဓိပစ္စပရိဝာရော၊ သဗ္ဗမေတေန လဗ္ဘတိ။
၁၂.
ပဒေသရဇ္ဇံ ဣသ္သရိယံ၊ စက္ကဝတ္တိသုခံ ပိယံ။
ဒေဝရဇ္ဇမ္ပိ ဒိဗ္ဗေသု၊ သဗ္ဗမေတေန လဗ္ဘတိ။
၁၃.
မာနုသ္သိကာ စ သမ္ပတ္တိ၊ ဒေဝလောကေ စ ယာ ရတိ။
ယာ စ နိဗ္ဗာနသမ္ပတ္တိ၊ သဗ္ဗမေတေန လဗ္ဘတိ။
၁၄.
မိတ္တသမ္ပဒမာဂမ္မ၊ ယောနိသောဝ [ယောနိသော ဝေ (သီ.)၊ ယောနိသော စေ (သ္ယာ.)၊ ယောနိသော စ (?)] ပယုဉ္ဇတော။
ဝိဇ္ဇာ ဝိမုတ္တိ ဝသီဘာဝော၊ သဗ္ဗမေတေန လဗ္ဘတိ။
၁၅.
ပဋိသမ္ဘိဒာ ဝိမောက္ခာ စ၊ ယာ စ သာဝကပာရမီ။
ပစ္စေကဗောဓိ ဗုဒ္ဓဘူမိ၊ သဗ္ဗမေတေန လဗ္ဘတိ။
၁၆.
ဧဝံ မဟတ္ထိကာ ဧသာ၊ ယဒိဒံ ပုညသမ္ပဒာ။
တသ္မာ ဓီရာ ပသံသန္တိ၊ ပဏ္ဍိတာ ကတပုညတန္တိ။
နိဓိကဏ္ဍသုတ္တံ နိဋ္ဌိတံ။