၇. တိရောကုဋ္ဋသုတ္တံ
၁.
တိရောကုဋ္ဋေသု တိဋ္ဌန္တိ၊ သန္ဓိသိင္ဃာဋကေသု စ။
ဒ္ဝာရဗာဟာသု တိဋ္ဌန္တိ၊ အာဂန္တ္ဝာန သကံ ဃရံ။
၂.
ပဟူတေ အန္နပာနမ္ဟိ၊ ခဇ္ဇဘောဇ္ဇေ ဥပဋ္ဌိတေ။
န တေသံ ကောစိ သရတိ၊ သတ္တာနံ ကမ္မပစ္စယာ။
၃.
ဧဝံ ဒဒန္တိ ဉာတီနံ၊ ယေ ဟောန္တိ အနုကမ္ပကာ။
သုစိံ ပဏီတံ ကာလေန၊ ကပ္ပိယံ ပာနဘောဇနံ။
ဣဒံ ဝော ဉာတီနံ ဟောတု၊ သုခိတာ ဟောန္တု ဉာတယော။
၄.
တေ စ တတ္ထ သမာဂန္တ္ဝာ၊ ဉာတိပေတာ သမာဂတာ။
ပဟူတေ အန္နပာနမ္ဟိ၊ သက္ကစ္စံ အနုမောဒရေ။
၅.
စိရံ ဇီဝန္တု နော ဉာတီ၊ ယေသံ ဟေတု လဘာမသေ။
အမ္ဟာကဉ္စ ကတာ ပူဇာ၊ ဒာယကာ စ အနိပ္ဖလာ။
၆.
န ဟိ တတ္ထ ကသိ [ကသီ (သီ.)] အတ္ထိ၊ ဂောရက္ခေတ္ထ န ဝိဇ္ဇတိ။
ဝဏိဇ္ဇာ တာဒိသီ နတ္ထိ၊ ဟိရညေန ကယောကယံ [ကယာက္ကယံ (သီ.)၊ ကယာ ကယံ (သ္ယာ.)]။
ဣတော ဒိန္နေန ယာပေန္တိ၊ ပေတာ ကာလင္ကတာ [ကာလကတာ (သီ. သ္ယာ. ကံ.)] တဟိံ။
၇.
ဥန္နမေ ဥဒကံ ဝုဋ္ဌံ၊ ယထာ နိန္နံ ပဝတ္တတိ။
ဧဝမေဝ ဣတော ဒိန္နံ၊ ပေတာနံ ဥပကပ္ပတိ။
၈.
ယထာ ဝာရိဝဟာ ပူရာ၊ ပရိပူရေန္တိ သာဂရံ။
ဧဝမေဝ ဣတော ဒိန္နံ၊ ပေတာနံ ဥပကပ္ပတိ။
၉.
အဒာသိ မေ အကာသိ မေ၊ ဉာတိမိတ္တာ [ဉာတိ မိတ္တော (?)] သခာ စ မေ။
ပေတာနံ ဒက္ခိဏံ ဒဇ္ဇာ၊ ပုဗ္ဗေ ကတမနုသ္သရံ။
၁၀.
န ဟိ ရုဏ္ဏံ ဝာ သောကော ဝာ၊ ယာ စညာ ပရိဒေဝနာ။
န တံ ပေတာနမတ္ထာယ၊ ဧဝံ တိဋ္ဌန္တိ ဉာတယော။
၁၁.
အယဉ္စ ခော ဒက္ခိဏာ ဒိန္နာ၊ သင္ဃမ္ဟိ သုပ္ပတိဋ္ဌိတာ။
ဒီဃရတ္တံ ဟိတာယသ္သ၊ ဌာနသော ဥပကပ္ပတိ။
၁၂.
သော ဉာတိဓမ္မော စ အယံ နိဒသ္သိတော၊ ပေတာန ပူဇာ စ ကတာ ဥဠာရာ။
ဗလဉ္စ ဘိက္ခူနမနုပ္ပဒိန္နံ [။ မနုပ္ပဒိန္နဝာ (က.)]၊ တုမ္ဟေဟိ ပုညံ ပသုတံ အနပ္ပကန္တိ။
တိရောကုဋ္ဋသုတ္တံ နိဋ္ဌိတံ။