၄. ဥပါလိဝဂ္ဂေါ
၁. ဥပါလိသုတ္တံ
၃၁. အထ ခေါ အာယသ္မာ ဥပါလိ ယေန ဘဂဝါ တေနုပသင်္ကမိ; ဥပသင်္ကမိတွာ ဘဂဝန္တံ အဘိဝါဒေတွာ ဧကမန္တံ နိသီဒိ။ ဧကမန္တံ နိသိန္နော ခေါ အာယသ္မာ ဥပါလိ ဘဂဝန္တံ ဧတဒဝေါစ – ‘‘ကတိ နု ခေါ, ဘန္တေ, အတ္ထဝသေ ပဋိစ္စ တထာဂတေန သာဝကာနံ သိက္ခာပဒံ ပညတ္တံ, ပါတိမောက္ခံ ဥဒ္ဒိဋ္ဌ’’န္တိ?
‘‘ဒသ ခေါ, ဥပါလိ, အတ္ထဝသေ ပဋိစ္စ တထာဂတေန သာဝကာနံ သိက္ခာပဒံ ပညတ္တံ, ပါတိမောက္ခံ ဥဒ္ဒိဋ္ဌံ။ ကတမေ ဒသ? သံဃသုဋ္ဌုတာယ, သံဃဖာသုတာယ, ဒုမ္မင်္ကူနံ ပုဂ္ဂလာနံ နိဂ္ဂဟာယ, ပေသလာနံ ဘိက္ခူနံ ဖာသုဝိဟာရာယ, ဒိဋ္ဌဓမ္မိကာနံ အာသဝါနံ သံဝရာယ, သမ္ပရာယိကာနံ အာသဝါနံ ပဋိဃာတာယ, အပ္ပသန္နာနံ ပသာဒါယ, ပသန္နာနံ ဘိယျောဘာဝါယ, သဒ္ဓမ္မဋ္ဌိတိယာ, ဝိနယာနုဂ္ဂဟာယ – ဣမေ ခေါ, ဥပါလိ, ဒသ အတ္ထဝသေ ပဋိစ္စ တထာဂတေန သာဝကာနံ သိက္ခာပဒံ ပညတ္တံ, ပါတိမောက္ခံ ဥဒ္ဒိဋ္ဌ’’န္တိ။ ပဌမံ။
၂. ပါတိမောက္ခဋ္ဌပနာသုတ္တံ
၃၂. ‘‘ကတိ နု ခေါ, ဘန္တေ, ပါတိမောက္ခဋ္ဌပနာ’’တိ? ‘‘ဒသ ခေါ, ဥပါလိ, ပါတိမောက္ခဋ္ဌပနာ။ ကတမေ ဒသ? ပါရာဇိကော တဿံ ပရိသာယံ နိသိန္နော ဟောတိ , ပါရာဇိကကထာ ဝိပ္ပကတာ ဟောတိ, အနုပသမ္ပန္နော တဿံ ပရိသာယံ နိသိန္နော ဟောတိ, အနုပသမ္ပန္နကထာ ဝိပ္ပကတာ ဟောတိ, သိက္ခံ ပစ္စက္ခာတကော တဿံ ပရိသာယံ နိသိန္နော ဟောတိ, သိက္ခံ ပစ္စက္ခာတကကထာ ဝိပ္ပကတာ ဟောတိ, ပဏ္ဍကော တဿံ ပရိသာယံ နိသိန္နော ဟောတိ, ပဏ္ဍကကထာ ဝိပ္ပကတာ ဟောတိ, ဘိက္ခုနိဒူသကော တဿံ ပရိသာယံ နိသိန္နော ဟောတိ, ဘိက္ခုနိဒူသကကထာ ဝိပ္ပကတာ ဟောတိ – ဣမေ ခေါ, ဥပါလိ, ဒသ ပါတိမောက္ခဋ္ဌပနာ’’တိ။ ဒုတိယံ။
၃. ဥဗ္ဗာဟိကာသုတ္တံ
၃၃. [စူဠဝ. ၂၃၁] ‘‘ကတိဟိ နု ခေါ, ဘန္တေ, ဓမ္မေဟိ သမန္နာဂတော ဘိက္ခု ဥဗ္ဗာဟိကာယ သမ္မန္နိတဗ္ဗော’’တိ? ‘‘ဒသဟိ ခေါ, ဥပါလိ, ဓမ္မေဟိ သမန္နာဂတော ဘိက္ခု ဥဗ္ဗာဟိကာယ သမ္မန္နိတဗ္ဗော။ ကတမေဟိ ဒသဟိ? ဣဓုပါလိ, ဘိက္ခု သီလဝါ ဟောတိ; ပါတိမောက္ခသံဝရသံဝုတော ဝိဟရတိ အာစာရဂေါစရသမ္ပန္နော အဏုမတ္တေသု ဝဇ္ဇေသု ဘယဒဿာဝီ, သမာဒါယ သိက္ခတိ သိက္ခာပဒေသု; ဗဟုဿုတော ဟောတိ သုတဓရော သုတသန္နိစယော, ယေ တေ ဓမ္မာ အာဒိကလျာဏာ မဇ္ဈေကလျာဏာ ပရိယောသာနကလျာဏာ သာတ္ထံ သဗျဉ္ဇနံ [သတ္ထာ သဗျဉ္ဇနာ (သီ.) ဧဝမုပရိပိ] ကေဝလပရိပုဏ္ဏံ ပရိသုဒ္ဓံ ဗြဟ္မစရိယံ အဘိဝဒန္တိ, တထာရူပါဿ ဓမ္မာ ဗဟုဿုတာ ဟောန္တိ ဓါတာ ဝစသာ ပရိစိတာ မနသာနုပေက္ခိတာ ဒိဋ္ဌိယာ သုပ္ပဋိဝိဒ္ဓါ; ဥဘယာနိ ခေါ ပနဿ ပါတိမောက္ခာနိ ဝိတ္ထာရေန သွာဂတာနိ ဟောန္တိ သုဝိဘတ္တာနိ သုပ္ပဝတ္တီနိ သုဝိနိစ္ဆိတာနိ သုတ္တသော အနုဗျဉ္ဇနသော; ဝိနယေ ခေါ ပန ဌိတော ဟောတိ အသံဟီရော; ပဋိဗလော ဟောတိ ဥဘော အတ္ထပစ္စတ္ထိကေ သညာပေတုံ ပညာပေတုံ နိဇ္ဈာပေတုံ ပေက္ခေတုံ ပသာဒေတုံ; အဓိကရဏသမုပ္ပါဒဝူပသမကုသလော ဟောတိ – အဓိကရဏံ ဇာနာတိ; အဓိကရဏသမုဒယံ ဇာနာတိ; အဓိကရဏနိရောဓံ ဇာနာတိ; အဓိကရဏနိရောဓဂါမိနိံ ပဋိပဒံ ဇာနာတိ။ ဣမေဟိ ခေါ, ဥပါလိ, ဒသဟိ ဓမ္မေဟိ သမန္နာဂတော ဘိက္ခု ဥဗ္ဗာဟိကာယ သမ္မန္နိတဗ္ဗော’’တိ။ တတိယံ။
၄. ဥပသမ္ပဒါသုတ္တံ
၃၄. ‘‘ကတိဟိ နု ခေါ, ဘန္တေ, ဓမ္မေဟိ သမန္နာဂတေန ဘိက္ခုနာ ဥပသမ္ပာဒေတဗ္ဗ’’န္တိ? ‘‘ဒသဟိ ခေါ, ဥပါလိ, ဓမ္မေဟိ သမန္နာဂတေန ဘိက္ခုနာ ဥပသမ္ပာဒေတဗ္ဗံ။ ကတမေဟိ ဒသဟိ? ဣဓုပါလိ, ဘိက္ခု သီလဝါ ဟောတိ, ပါတိမောက္ခသံဝရသံဝုတော ဝိဟရတိ အာစာရဂေါစရသမ္ပန္နော အဏုမတ္တေသု ဝဇ္ဇေသု ဘယဒဿာဝီ, သမာဒါယ သိက္ခတိ သိက္ခာပဒေသု; ဗဟုဿုတော ဟောတိ သုတဓရော သုတသန္နိစယော, ယေ တေ ဓမ္မာ အာဒိကလျာဏာ မဇ္ဈေကလျာဏာ ပရိယောသာနကလျာဏာ သာတ္ထံ သဗျဉ္ဇနံ ကေဝလပရိပုဏ္ဏံ ပရိသုဒ္ဓံ ဗြဟ္မစရိယံ အဘိဝဒန္တိ, တထာရူပါဿ ဓမ္မာ ဗဟုဿုတာ ဟောန္တိ ဓါတာ ဝစသာ ပရိစိတာ မနသာနုပေက္ခိတာ ဒိဋ္ဌိယာ သုပ္ပဋိဝိဒ္ဓါ; ပါတိမောက္ခံ ခေါ ပနဿ ဝိတ္ထာရေန သွာဂတံ ဟောတိ သုဝိဘတ္တံ သုပ္ပဝတ္တံ သုဝိနိစ္ဆိတံ သုတ္တသော အနုဗျဉ္ဇနသော; ပဋိဗလော ဟောတိ ဂိလာနံ ဥပဋ္ဌာတုံ ဝါ ဥပဋ္ဌာပေတုံ ဝါ; ပဋိဗလော ဟောတိ အနဘိရတိံ ဝူပကာသေတုံ ဝါ ဝူပကာသာပေတုံ ဝါ; ပဋိဗလော ဟောတိ ဥပ္ပန္နံ ကုက္ကုစ္စံ ဓမ္မတော ဝိနောဒေတုံ; ပဋိဗလော ဟောတိ ဥပ္ပန္နံ ဒိဋ္ဌိဂတံ ဓမ္မတော ဝိဝေစေတုံ; ပဋိဗလော ဟောတိ အဓိသီလေ သမာဒပေတုံ; ပဋိဗလော ဟောတိ အဓိစိတ္တေ သမာဒပေတုံ; ပဋိဗလော ဟောတိ အဓိပညာယ သမာဒပေတုံ။ ဣမေဟိ ခေါ, ဥပါလိ, ဒသဟိ ဓမ္မေဟိ သမန္နာဂတေန ဘိက္ခုနာ ဥပသမ္ပာဒေတဗ္ဗ’’န္တိ။ စတုတ္ထံ။
၅. နိဿယသုတ္တံ
၃၅. ‘‘ကတိဟိ နု ခေါ, ဘန္တေ, ဓမ္မေဟိ သမန္နာဂတေန ဘိက္ခုနာ နိဿယော ဒါတဗ္ဗော’’တိ? ‘‘ဒသဟိ ခေါ, ဥပါလိ, ဓမ္မေဟိ သမန္နာဂတေန ဘိက္ခုနာ နိဿယော ဒါတဗ္ဗော။ ကတမေဟိ ဒသဟိ? ဣဓုပါလိ, ဘိက္ခု သီလဝါ ဟောတိ။ပေ.။ သမာဒါယ သိက္ခတိ သိက္ခာပဒေသု; ဗဟုဿုတော ဟောတိ။ပေ.။ ဒိဋ္ဌိယာ သုပ္ပဋိဝိဒ္ဓါ; ပါတိမောက္ခံ ခေါ ပနဿ ဝိတ္ထာရေန သွာဂတံ ဟောတိ သုဝိဘတ္တံ သုပ္ပဝတ္တံ သုဝိနိစ္ဆိတံ သုတ္တသော အနုဗျဉ္ဇနသော; ပဋိဗလော ဟောတိ ဂိလာနံ ဥပဋ္ဌာတုံ ဝါ ဥပဋ္ဌာပေတုံ ဝါ; ပဋိဗလော ဟောတိ အနဘိရတိံ ဝူပကာသေတုံ ဝါ ဝူပကာသာပေတုံ ဝါ; ပဋိဗလော ဟောတိ ဥပ္ပန္နံ ကုက္ကုစ္စံ ဓမ္မတော ဝိနောဒေတုံ; ပဋိဗလော ဟောတိ ဥပ္ပန္နံ ဒိဋ္ဌိဂတံ ဓမ္မတော ဝိဝေစေတုံ; ပဋိဗလော ဟောတိ အဓိသီလေ။ပေ.။ အဓိစိတ္တေ။ အဓိပညာယ သမာဒပေတုံ။ ဣမေဟိ ခေါ, ဥပါလိ, ဒသဟိ ဓမ္မေဟိ သမန္နာဂတေန ဘိက္ခုနာ နိဿယော ဒါတဗ္ဗော’’တိ။ ပဉ္စမံ။
၆. သာမဏေရသုတ္တံ
၃၆. ‘‘ကတိဟိ နု ခေါ, ဘန္တေ, ဓမ္မေဟိ သမန္နာဂတေန ဘိက္ခုနာ သာမဏေရော ဥပဋ္ဌာပေတဗ္ဗော’’တိ? ‘‘ဒသဟိ ခေါ, ဥပါလိ, ဓမ္မေဟိ သမန္နာဂတေန ဘိက္ခုနာ သာမဏေရော ဥပဋ္ဌာပေတဗ္ဗော။ ကတမေဟိ ဒသဟိ? ဣဓုပါလိ, ဘိက္ခု သီလဝါ ဟောတိ။ပေ.။ သမာဒါယ သိက္ခတိ သိက္ခာပဒေသု; ဗဟုဿုတော ဟောတိ။ပေ.။ ဒိဋ္ဌိယာ သုပ္ပဋိဝိဒ္ဓါ; ပါတိမောက္ခံ ခေါ ပနဿ ဝိတ္ထာရေန သွာဂတံ ဟောတိ သုဝိဘတ္တံ သုပ္ပဝတ္တံ သုဝိနိစ္ဆိတံ သုတ္တသော အနုဗျဉ္ဇနသော; ပဋိဗလော ဟောတိ ဂိလာနံ ဥပဋ္ဌာတုံ ဝါ ဥပဋ္ဌာပေတုံ ဝါ; ပဋိဗလော ဟောတိ အနဘိရတိံ ဝူပကာသေတုံ ဝါ ဝူပကာသာပေတုံ ဝါ; ပဋိဗလော ဟောတိ ဥပ္ပန္နံ ကုက္ကုစ္စံ ဓမ္မတော ဝိနောဒေတုံ; ပဋိဗလော ဟောတိ ဥပ္ပန္နံ ဒိဋ္ဌိဂတံ ဓမ္မတော ဝိဝေစေတုံ; ပဋိဗလော ဟောတိ အဓိသီလေ သမာဒပေတုံ; ပဋိဗလော ဟောတိ အဓိစိတ္တေ သမာဒပေတုံ; ပဋိဗလော ဟောတိ အဓိပညာယ သမာဒပေတုံ။ ဣမေဟိ ခေါ, ဥပါလိ, ဒသဟိ ဓမ္မေဟိ သမန္နာဂတေန ဘိက္ခုနာ သာမဏေရော ဥပဋ္ဌာပေတဗ္ဗော’’တိ။ ဆဋ္ဌံ။
၇. သံဃဘေဒသုတ္တံ
၃၇. ‘‘‘သံဃဘေဒေါ သံဃဘေဒေါ’တိ, ဘန္တေ, ဝုစ္စတိ။ ကိတ္တာဝတာ နု ခေါ, ဘန္တေ, သံဃော ဘိန္နော ဟောတီ’’တိ? ‘‘ဣဓုပါလိ, ဘိက္ခူ အဓမ္မံ ဓမ္မောတိ ဒီပေန္တိ, ဓမ္မံ အဓမ္မောတိ ဒီပေန္တိ, အဝိနယံ ဝိနယောတိ ဒီပေန္တိ, ဝိနယံ အဝိနယောတိ ဒီပေန္တိ, အဘာသိတံ အလပိတံ တထာဂတေန ဘာသိတံ လပိတံ တထာဂတေနာတိ ဒီပေန္တိ, ဘာသိတံ လပိတံ တထာဂတေန အဘာသိတံ အလပိတံ တထာဂတေနာတိ ဒီပေန္တိ, အနာစိဏ္ဏံ တထာဂတေန အာစိဏ္ဏံ တထာဂတေနာတိ ဒီပေန္တိ, အာစိဏ္ဏံ တထာဂတေန အနာစိဏ္ဏံ တထာဂတေနာတိ ဒီပေန္တိ, အပညတ္တံ တထာဂတေန ပညတ္တံ တထာဂတေနာတိ ဒီပေန္တိ , ပညတ္တံ တထာဂတေန အပညတ္တံ တထာဂတေနာတိ ဒီပေန္တိ။ တေ ဣမေဟိ ဒသဟိ ဝတ္ထူဟိ အဝကဿန္တိ အပကဿန္တိ အာဝေနိ [အာဝေနိံ (စူဠဝ. ၃၅၂) အာဝေဏိ, အာဝေဏိကံ (တတ္ထေဝ အဓေါလိပိ)] ကမ္မာနိ ကရောန္တိ အာဝေနိ ပါတိမောက္ခံ ဥဒ္ဒိသန္တိ။ ဧတ္တာဝတာ ခေါ, ဥပါလိ, သံဃော ဘိန္နော ဟောတီ’’တိ။ သတ္တမံ။
၈. သံဃသာမဂ္ဂီသုတ္တံ
၃၈. [စူဠဝ. ၃၅၃] ‘‘‘သံဃသာမဂ္ဂီ သံဃသာမဂ္ဂီ’တိ, ဘန္တေ, ဝုစ္စတိ။ ကိတ္တာဝတာ နု ခေါ, ဘန္တေ, သံဃော သမဂ္ဂေါ ဟောတီ’’တိ? ‘‘ဣဓုပါလိ, ဘိက္ခူ အဓမ္မံ အဓမ္မောတိ ဒီပေန္တိ, ဓမ္မံ ဓမ္မောတိ ဒီပေန္တိ, အဝိနယံ အဝိနယောတိ ဒီပေန္တိ, ဝိနယံ ဝိနယောတိ ဒီပေန္တိ, အဘာသိတံ အလပိတံ တထာဂတေန အဘာသိတံ အလပိတံ တထာဂတေနာတိ ဒီပေန္တိ, ဘာသိတံ လပိတံ တထာဂတေန ဘာသိတံ လပိတံ တထာဂတေနာတိ ဒီပေန္တိ, အနာစိဏ္ဏံ တထာဂတေန အနာစိဏ္ဏံ တထာဂတေနာတိ ဒီပေန္တိ, အာစိဏ္ဏံ တထာဂတေန အာစိဏ္ဏံ တထာဂတေနာတိ ဒီပေန္တိ, အပညတ္တံ တထာဂတေန အပညတ္တံ တထာဂတေနာတိ ဒီပေန္တိ, ပညတ္တံ တထာဂတေန ပညတ္တံ တထာဂတေနာတိ ဒီပေန္တိ။ တေ ဣမေဟိ ဒသဟိ ဝတ္ထူဟိ န အဝကဿန္တိ န အပကဿန္တိ န အာဝေနိ ကမ္မာနိ ကရောန္တိ န အာဝေနိ ပါတိမောက္ခံ ဥဒ္ဒိသန္တိ။ ဧတ္တာဝတာ ခေါ, ဥပါလိ, သံဃော သမဂ္ဂေါ ဟောတီ’’တိ။ အဋ္ဌမံ။
၉. ပဌမအာနန္ဒသုတ္တံ
၃၉. အထ ခေါ အာယသ္မာ အာနန္ဒော ယေန ဘဂဝါ တေနုပသင်္ကမိ; ဥပသင်္ကမိတွာ ဘဂဝန္တံ အဘိဝါဒေတွာ ဧကမန္တံ နိသီဒိ။ ဧကမန္တံ နိသိန္နော ခေါ အာယသ္မာ အာနန္ဒော ဘဂဝန္တံ ဧတဒဝေါစ – ‘‘‘သံဃဘေဒေါ သံဃဘေဒေါ’တိ, ဘန္တေ, ဝုစ္စတိ။ ကိတ္တာဝတာ နု ခေါ, ဘန္တေ, သံဃော ဘိန္နော ဟောတီ’’တိ ? ‘‘ဣဓါနန္ဒ, ဘိက္ခူ အဓမ္မံ ဓမ္မောတိ ဒီပေန္တိ, ဓမ္မံ အဓမ္မောတိ ဒီပေန္တိ, အဝိနယံ ဝိနယောတိ ဒီပေန္တိ။ပေ.။ ပညတ္တံ တထာဂတေန အပညတ္တံ တထာဂတေနာတိ ဒီပေန္တိ။ တေ ဣမေဟိ ဒသဟိ ဝတ္ထူဟိ အဝကဿန္တိ အပကဿန္တိ အာဝေနိ ကမ္မာနိ ကရောန္တိ အာဝေနိ ပါတိမောက္ခံ ဥဒ္ဒိသန္တိ။ ဧတ္တာဝတာ ခေါ, အာနန္ဒ, သံဃော ဘိန္နော ဟောတီ’’တိ။
‘‘သမဂ္ဂံ ပန, ဘန္တေ, သသံဃံ ဘိန္ဒိတွာ ကိံ သော ပသဝတီ’’တိ? ‘‘ကပ္ပဋ္ဌိကံ, အာနန္ဒ, ကိဗ္ဗိသံ ပသဝတီ’’တိ။ ‘‘ကိံ ပန, ဘန္တေ, ကပ္ပဋ္ဌိကံ ကိဗ္ဗိသ’’န္တိ? ‘‘ကပ္ပံ, အာနန္ဒ, နိရယမှိ ပစ္စတီတိ –
‘‘အာပါယိကော နေရယိကော၊ ကပ္ပဋ္ဌော သံဃဘေဒကော။
ဝဂ္ဂရတော အဓမ္မဋ္ဌော၊ ယောဂက္ခေမာ ပဓံသတိ။
သသံဃံ သမဂ္ဂံ ဘိန္ဒိတွာ [ဘေတွာန (သီ. သျာ.)၊ ဘိတွာန (က.) စူဠဝ. ၃၅၄; ဣတိဝု. ၁၈; ကထာဝ. ၆၅၇] ကပ္ပံ နိရယမှိ ပစ္စတီ’’တိ။ နဝမံ။
၁၀. ဒုတိယအာနန္ဒသုတ္တံ
၄၀. ‘‘‘သံဃသာမဂ္ဂီ သံဃသာမဂ္ဂီ’တိ, ဘန္တေ, ဝုစ္စတိ။ ကိတ္တာဝတာ နု ခေါ, ဘန္တေ, သံဃော သမဂ္ဂေါ ဟောတီ’’တိ? ‘‘ဣဓါနန္ဒ, ဘိက္ခူ အဓမ္မံ အဓမ္မောတိ ဒီပေန္တိ, ဓမ္မံ ဓမ္မောတိ ဒီပေန္တိ, အဝိနယံ အဝိနယောတိ ဒီပေန္တိ , ဝိနယံ ဝိနယောတိ ဒီပေန္တိ, အဘာသိတံ အလပိတံ တထာဂတေန အဘာသိတံ အလပိတံ တထာဂတေနာတိ ဒီပေန္တိ, ဘာသိတံ လပိတံ တထာဂတေန ဘာသိတံ လပိတံ တထာဂတေနာတိ ဒီပေန္တိ, အနာစိဏ္ဏံ တထာဂတေန အနာစိဏ္ဏံ တထာဂတေနာတိ ဒီပေန္တိ, အာစိဏ္ဏံ တထာဂတေန အာစိဏ္ဏံ တထာဂတေနာတိ ဒီပေန္တိ, အပညတ္တံ တထာဂတေန အပညတ္တံ တထာဂတေနာတိ ဒီပေန္တိ, ပညတ္တံ တထာဂတေန ပညတ္တံ တထာဂတေနာတိ ဒီပေန္တိ။ တေ ဣမေဟိ ဒသဟိ ဝတ္ထူဟိ န အဝကဿန္တိ န အပကဿန္တိ န အာဝေနိ ကမ္မာနိ ကရောန္တိ န အာဝေနိ ပါတိမောက္ခံ ဥဒ္ဒိသန္တိ။ ဧတ္တာဝတာ ခေါ, အာနန္ဒ, သံဃော သမဂ္ဂေါ ဟောတီ’’တိ။
‘‘ဘိန္နံ ပန, ဘန္တေ, သသံဃံ သမဂ္ဂံ ကတွာ ကိံ သော ပသဝတီ’’တိ? ‘‘ဗြဟ္မံ, အာနန္ဒ, ပုညံ ပသဝတီ’’တိ။ ‘‘ကိံ ပန, ဘန္တေ, ဗြဟ္မံ ပုည’’န္တိ? ‘‘ကပ္ပံ, အာနန္ဒ, သဂ္ဂမှိ မောဒတီတိ –
‘‘သုခါ သံဃဿ သာမဂ္ဂီ၊ သမဂ္ဂါနဉ္စ အနုဂ္ဂဟော။
သမဂ္ဂရတော ဓမ္မဋ္ဌော၊ ယောဂက္ခေမာ န ဓံသတိ။
သသံဃံ သမဂ္ဂံ ကတွာန၊ ကပ္ပံ သဂ္ဂမှိ မောဒတီ’’တိ။ ဒသမံ။
ဥပါလိဝဂ္ဂေါ စတုတ္ထော။
တဿုဒ္ဒါနံ –
ဥပါလိ ဌပနာ ဥဗ္ဗာဟော၊ ဥပသမ္ပဒနိဿယာ။
သာမဏေရော စ ဒွေ ဘေဒါ၊ အာနန္ဒေဟိ ပရေ ဒုဝေတိ။