၁၂. သာမညဝ ဂ္ဂေါ
၁. ကာယာနုပဿီသုတ္တံ
၁၁၇. ‘‘ဆ, ဘိက္ခဝေ, ဓမ္မေ အပ္ပဟာယ အဘဗ္ဗော ကာယေ ကာယာနုပဿီ ဝိဟရိတုံ။ ကတမေ ဆ? ကမ္မာရာမတံ, ဘဿာရာမတံ, နိဒ္ဒါရာမတံ, သင်္ဂဏိကာရာမတံ, ဣန္ဒ္ရိယေသု အဂုတ္တဒွါရတံ, ဘောဇနေ အမတ္တညုတံ။ ဣမေ ခေါ, ဘိက္ခဝေ, ဆ ဓမ္မေ အပ္ပဟာယ အဘဗ္ဗော ကာယေ ကာယာနုပဿီ ဝိဟရိတုံ။
‘‘ဆ , ဘိက္ခဝေ, ဓမ္မေ ပဟာယ ဘဗ္ဗော ကာယေ ကာယာနုပဿီ ဝိဟရိတုံ။ ကတမေ ဆ? ကမ္မာရာမတံ, ဘဿာရာမတံ, နိဒ္ဒါရာမတံ, သင်္ဂဏိကာရာမတံ, ဣန္ဒ္ရိယေသု အဂုတ္တဒွါရတံ, ဘောဇနေ အမတ္တညုတံ – ဣမေ ခေါ, ဘိက္ခဝေ, ဆ ဓမ္မေ ပဟာယ ဘဗ္ဗော ကာယေ ကာယာနုပဿီ ဝိဟရိတု’’န္တိ။ ပဌမံ။
၂. ဓမ္မာနုပဿီသုတ္တံ
၁၁၈. ‘‘ဆ, ဘိက္ခဝေ, ဓမ္မေ အပ္ပဟာယ အဘဗ္ဗော အဇ္ဈတ္တံ ကာယေ။ပေ.။ ဗဟိဒ္ဓါ ကာယေ။ပေ.။ အဇ္ဈတ္တဗဟိဒ္ဓါ ကာယေ။ပေ.။ အဇ္ဈတ္တံ ဝေဒနာသု။ပေ.။ ဗဟိဒ္ဓါ ဝေဒနာသု။ပေ.။ အဇ္ဈတ္တဗဟိဒ္ဓါ ဝေဒနာသု။ပေ.။ အဇ္ဈတ္တံ စိတ္တေ။ပေ.။ ဗဟိဒ္ဓါ စိတ္တေ။ပေ.။ အဇ္ဈတ္တဗဟိဒ္ဓါ စိတ္တေ။ပေ.။ အဇ္ဈတ္တံ ဓမ္မေသု။ပေ.။ ဗဟိဒ္ဓါ ဓမ္မေသု။ပေ.။ အဇ္ဈတ္တဗဟိဒ္ဓါ ဓမ္မေသု ဓမ္မာနုပဿီ ဝိဟရိတုံ။ ကတမေ ဆ? ကမ္မာရာမတံ, ဘဿာရာမတံ, နိဒ္ဒါရာမတံ, သင်္ဂဏိကာရာမတံ, ဣန္ဒ္ရိယေသု အဂုတ္တဒွါရတံ , ဘောဇနေ အမတ္တညုတံ။ ဣမေ ခေါ, ဘိက္ခဝေ, ဆ ဓမ္မေ ပဟာယ ဘဗ္ဗော အဇ္ဈတ္တဗဟိဒ္ဓါ ဓမ္မေသု ဓမ္မာနုပဿီ ဝိဟရိတု’’န္တိ။ ဒုတိယံ။
၃. တပုဿသုတ္တံ
၁၁၉. ‘‘ဆဟိ , ဘိက္ခဝေ, ဓမ္မေဟိ သမန္နာဂတော တပုဿော [တပဿော (ဣ.) အ. နိ. ၁.၂၄၈] ဂဟပတိ တထာဂတေ နိဋ္ဌင်္ဂတော အမတဒ္ဒသော အမတံ သစ္ဆိကတွာ ဣရိယတိ။ ကတမေဟိ ဆဟိ? ဗုဒ္ဓေ အဝေစ္စပ္ပသာဒေန, ဓမ္မေ အဝေစ္စပ္ပသာဒေန, သံဃေ အဝေစ္စပ္ပသာဒေန, အရိယေန သီလေန, အရိယေန ဉာဏေန, အရိယာယ ဝိမုတ္တိယာ။ ဣမေဟိ ခေါ, ဘိက္ခဝေ, ဆဟိ ဓမ္မေဟိ သမန္နာဂတော တပုဿော ဂဟပတိ တထာဂတေ နိဋ္ဌင်္ဂတော အမတဒ္ဒသော အမတံ သစ္ဆိကတွာ ဣရိယတီ’’တိ။ တတိယံ။
၄-၂၃. ဘလ္လိကာဒိသုတ္တာနိ
၁၂၀-၁၃၉. ‘‘ဆဟိ, ဘိက္ခဝေ, ဓမ္မေဟိ သမန္နာဂတော ဘလ္လိကော ဂဟပတိ။ပေ.။ သုဒတ္တော ဂဟပတိ အနာထပိဏ္ဍိကော။ စိတ္တော ဂဟပတိ မစ္ဆိကာသဏ္ဍိကော။ ဟတ္ထကော အာဠဝကော။ မဟာနာမော သက္ကော။ ဥဂ္ဂေါ ဂဟပတိ ဝေသာလိကော။ ဥဂ္ဂတော ဂဟပတိ။ သူရမ္ဗဋ္ဌော [သူရော အမ္ဗဋ္ဌော (က.)] ။ ဇီဝကော ကောမာရဘစ္စော။ နကုလပိတာ ဂဟပတိ။ တဝကဏ္ဏိကော ဂဟပတိ။ ပူရဏော ဂဟပတိ။ ဣသိဒတ္တော ဂဟပတိ။ သန္ဓာနော [သန္တာနော (က.)] ဂဟပတိ။ ဝိစယော [ဝိဇယော (သီ. သျာ. ဣ.)] ဂဟပတိ။ ဝိဇယမာဟိကော [ဝဇ္ဇိယမဟိတော (သီ. သျာ. ဣ.)] ဂဟပတိ။ မေဏ္ဍကော ဂဟပတိ ။ ဝါသေဋ္ဌော ဥပါသကော။ အရိဋ္ဌော ဥပါသကော။ သာရဂ္ဂေါ [သာဒတ္တော (သျာ.)] ဥပါသကော တထာဂတေ နိဋ္ဌင်္ဂတော အမတဒ္ဒသော အမတံ သစ္ဆိကတွာ ဣရိယတိ။ ကတမေဟိ ဆဟိ? ဗုဒ္ဓေ အဝေစ္စပ္ပသာဒေန, ဓမ္မေ အဝေစ္စပ္ပသာဒေန, သံဃေ အဝေစ္စပ္ပသာဒေန, အရိယေန သီလေန, အရိယေန ဉာဏေန, အရိယာယ ဝိမုတ္တိယာ။ ဣမေဟိ ခေါ, ဘိက္ခဝေ, ဆဟိ ဓမ္မေဟိ သမန္နာဂတော သာရဂ္ဂေါ ဥပါသကော တထာဂတေ နိဋ္ဌင်္ဂတော အမတဒ္ဒသော အမတံ သစ္ဆိကတွာ ဣရိယတီ’’တိ။ တေဝီသတိမံ။
သာမညဝဂ္ဂေါ ဒွါဒသမော။