၃. ရာဂပေယျာလံ
၃၀၃. ‘‘ရာဂဿ, ဘိက္ခဝေ, အဘိညာယ ပဉ္စ ဓမ္မာ ဘာဝေတဗ္ဗာ။ ကတမေ ပဉ္စ? အသုဘသညာ, မရဏသညာ, အာဒီနဝသညာ, အာဟာရေ ပဋိကူလသညာ, သဗ္ဗလောကေ အနဘိရတသညာ [သဗ္ဗတ္ထပိ ဧဝမေဝ ဒိဿတိ] – ရာဂဿ, ဘိက္ခဝေ, အဘိညာယ ဣမေ ပဉ္စ ဓမ္မာ ဘာဝေတဗ္ဗာ’’တိ။
၃၀၄. ‘‘ရာဂဿ, ဘိက္ခဝေ, အဘိညာယ ပဉ္စ ဓမ္မာ ဘာဝေတဗ္ဗာ။ ကတမေ ပဉ္စ? အနိစ္စသညာ, အနတ္တသညာ, မရဏသညာ, အာဟာရေ ပဋိကူလသညာ, သဗ္ဗလောကေ အနဘိရတသညာ – ရာဂဿ, ဘိက္ခဝေ, အဘိညာယ ဣမေ ပဉ္စ ဓမ္မာ ဘာဝေတဗ္ဗာ’’တိ။
၃၀၅. ‘‘ရာဂဿ , ဘိက္ခဝေ, အဘိညာယ ပဉ္စ ဓမ္မာ ဘာဝေတဗ္ဗာ။ ကတမေ ပဉ္စ? အနိစ္စသညာ, အနိစ္စေ ဒုက္ခသညာ, ဒုက္ခေ အနတ္တသညာ, ပဟာနသညာ, ဝိရာဂသညာ – ရာဂဿ, ဘိက္ခဝေ, အဘိညာယ ဣမေ ပဉ္စ ဓမ္မာ ဘာဝေတဗ္ဗာ’’တိ။
၃၀၆. ‘‘ရာဂဿ, ဘိက္ခဝေ, အဘိညာယ ပဉ္စ ဓမ္မာ ဘာဝေတဗ္ဗာ။ ကတမေ ပဉ္စ? သဒ္ဓိန္ဒ္ရိယံ, ဝီရိယိန္ဒ္ရိယံ, သတိန္ဒ္ရိယံ, သမာဓိန္ဒ္ရိယံ, ပညိန္ဒ္ရိယံ – ရာဂဿ, ဘိက္ခဝေ, အဘိညာယ ဣမေ ပဉ္စ ဓမ္မာ ဘာဝေတဗ္ဗာ’’တိ။
၃၀၇. ‘‘ရာဂဿ , ဘိက္ခဝေ, အဘိညာယ ပဉ္စ ဓမ္မာ ဘာဝေတဗ္ဗာ။ ကတမေ ပဉ္စ? သဒ္ဓါဗလံ, ဝီရိယဗလံ, သတိဗလံ, သမာဓိဗလံ, ပညာဗလံ – ရာဂဿ, ဘိက္ခဝေ, အဘိညာယ ဣမေ ပဉ္စ ဓမ္မာ ဘာဝေတဗ္ဗာ’’တိ။
၃၀၈-၁၁၅၁. ‘‘ရာဂဿ, ဘိက္ခဝေ, ပရိညာယ။ ပရိက္ခယာယ။ ပဟာနာယ။ ခယာယ။ ဝယာယ။ ဝိရာဂါယ။ နိရောဓါယ။ စာဂါယ။ ပဋိနိဿဂ္ဂါယ ပဉ္စ ဓမ္မာ ဘာဝေတဗ္ဗာ။ ဒေါသဿ။ မောဟဿ။ ကောဓဿ။ ဥပနာဟဿ။ မက္ခဿ။ ပဠာသဿ။ ဣဿာယ။ မစ္ဆရိယဿ။ မာယာယ။ သာဌေယျဿ။ ထမ္ဘဿ။ သာရမ္ဘဿ။ မာနဿ။ အတိမာနဿ ။ မဒဿ။ ပမာဒဿ အဘိညာယ။ ပရိညာယ။ ပရိက္ခယာယ။ ပဟာနာယ။ ခယာယ။ ဝယာယ။ ဝိရာဂါယ။ နိရောဓါယ။ စာဂါယ။ ပဋိနိဿဂ္ဂါယ ပဉ္စ ဓမ္မာ ဘာဝေတဗ္ဗာ။
‘‘ကတမေ ပဉ္စ? သဒ္ဓါဗလံ, ဝီရိယဗလံ, သတိဗလံ, သမာဓိဗလံ, ပညာဗလံ – ပမာဒဿ, ဘိက္ခဝေ, ပဋိနိဿဂ္ဂါယ ဣမေ ပဉ္စ ဓမ္မာ ဘာဝေတဗ္ဗာ’’တိ။
ရာဂပေယျာလံ နိဋ္ဌိတံ။
တဿုဒ္ဒါနံ –
အဘိညာယ ပရိညာယ ပရိက္ခယာယ၊
ပဟာနာယ ခယာယ ဝယေန စ။
ဝိရာဂနိရောဓါ စာဂဉ္စ၊
ပဋိနိဿဂ္ဂေါ ဣမေ ဒသာတိ။
ပဉ္စကနိပါတော နိဋ္ဌိတော။
တတ္ရိဒံ ဝဂ္ဂုဒ္ဒါနံ –
သေခဗလံ ဗလဉ္စေဝ၊ ပဉ္စင်္ဂိကဉ္စ သုမနံ။
မုဏ္ဍနီဝရဏဉ္စ သညဉ္စ၊ ယောဓါဇီဝဉ္စ အဋ္ဌမံ။
ထေရံ ကကုဓဖာသုဉ္စ၊ အန္ဓကဝိန္ဒဒွါဒသံ။
ဂိလာနရာဇတိကဏ္ဍံ၊ သဒ္ဓမ္မာဃာတုပါသကံ။
အရညဗြာဟ္မဏဉ္စေဝ၊ ကိမိလက္ကောသကံ တထာ။
ဒီဃာစာရာဝါသိကဉ္စ၊ ဒုစ္စရိတူပသမ္ပဒန္တိ။
ပဉ္စကနိပါတပါဠိ နိဋ္ဌိတာ။