ဒုစ္စရိတဝဂ္ဂေါ

(၂၅) ၅. ဒုစ္စရိတဝဂ္ဂေါ

၁. ပဌမဒုစ္စရိတသုတ္တံ

၂၄၁. ‘‘ပဉ္စိမေ, ဘိက္ခဝေ, အာဒီနဝါ ဒုစ္စရိတေ။ ကတမေ ပဉ္စ? အတ္တာပိ အတ္တာနံ ဥပဝဒတိ; အနုဝိစ္စ ဝိညူ ဂရဟန္တိ; ပါပကော ကိတ္တိသဒ္ဒေါ အဗ္ဘုဂ္ဂစ္ဆတိ; သမ္မူဠ္ဟော ကာလံ ကရောတိ; ကာယဿ ဘေဒါ ပရံ မရဏာ အပါယံ ဒုဂ္ဂတိံ ဝိနိပါတံ နိရယံ ဥပပဇ္ဇတိ။ ဣမေ ခေါ, ဘိက္ခဝေ, ပဉ္စ အာဒီနဝါ ဒုစ္စရိတေ။

‘‘ပဉ္စိမေ, ဘိက္ခဝေ, အာနိသံသာ သုစရိတေ။ ကတမေ ပဉ္စ? အတ္တာပိ အတ္တာနံ န ဥပဝဒတိ; အနုဝိစ္စ ဝိညူ ပသံသန္တိ; ကလျာဏော ကိတ္တိသဒ္ဒေါ အဗ္ဘုဂ္ဂစ္ဆတိ; အသမ္မူဠ္ဟော ကာလံ ကရောတိ; ကာယဿ ဘေဒါ ပရံ မရဏာ သုဂတိံ သဂ္ဂံ လောကံ ဥပပဇ္ဇတိ။ ဣမေ ခေါ, ဘိက္ခဝေ, ပဉ္စ အာနိသံသာ သုစရိတေ’’တိ။ ပဌမံ။

၂. ပဌမကာယဒုစ္စရိတသုတ္တံ

၂၄၂. ‘‘ပဉ္စိမေ, ဘိက္ခဝေ, အာဒီနဝါ ကာယဒုစ္စရိတေ။ပေ.။ အာနိသံသာ ကာယသုစရိတေ။ပေ.။။ ဒုတိယံ။

၃. ပဌမဝစီဒုစ္စရိတသုတ္တံ

၂၄၃. ‘‘ပဉ္စိမေ , ဘိက္ခဝေ, အာဒီနဝါ ဝစီဒုစ္စရိတေ။ပေ.။ အာနိသံသာ ဝစီသုစရိတေ။ပေ.။။ တတိယံ။

၄. ပဌမမနောဒုစ္စရိတသုတ္တံ

၂၄၄. ‘‘ပဉ္စိမေ, ဘိက္ခဝေ, အာဒီနဝါ မနောဒုစ္စရိတေ။ပေ.။ အာနိသံသာ မနောသုစရိတေ ။ ကတမေ ပဉ္စ? အတ္တာပိ အတ္တာနံ န ဥပဝဒတိ; အနုဝိစ္စ ဝိညူ ပသံသန္တိ; ကလျာဏော ကိတ္တိသဒ္ဒေါ အဗ္ဘုဂ္ဂစ္ဆတိ; အသမ္မူဠ္ဟော ကာလံ ကရောတိ; ကာယဿ ဘေဒါ ပရံ မရဏာ သုဂတိံ သဂ္ဂံ လောကံ ဥပပဇ္ဇတိ။ ဣမေ ခေါ, ဘိက္ခဝေ, ပဉ္စ အာနိသံသာ မနောသုစရိတေ’’တိ။ စတုတ္ထံ။

၅. ဒုတိယဒုစ္စရိတသုတ္တံ

၂၄၅. ‘‘ပဉ္စိမေ, ဘိက္ခဝေ, အာဒီနဝါ ဒုစ္စရိတေ။ ကတမေ ပဉ္စ? အတ္တာပိ အတ္တာနံ ဥပဝဒတိ; အနုဝိစ္စ ဝိညူ ဂရဟန္တိ; ပါပကော ကိတ္တိသဒ္ဒေါ အဗ္ဘုဂ္ဂစ္ဆတိ; သဒ္ဓမ္မာ ဝုဋ္ဌာတိ; အသဒ္ဓမ္မေ ပတိဋ္ဌာတိ။ ဣမေ ခေါ, ဘိက္ခဝေ, ပဉ္စ အာဒီနဝါ ဒုစ္စရိတေ။

‘‘ပဉ္စိမေ, ဘိက္ခဝေ, အာနိသံသာ သုစရိတေ။ ကတမေ ပဉ္စ? အတ္တာပိ အတ္တာနံ န ဥပဝဒတိ; အနုဝိစ္စ ဝိညူ ပသံသန္တိ; ကလျာဏော ကိတ္တိသဒ္ဒေါ အဗ္ဘုဂ္ဂစ္ဆတိ; အသဒ္ဓမ္မာ ဝုဋ္ဌာတိ; သဒ္ဓမ္မေ ပတိဋ္ဌာတိ။ ဣမေ ခေါ, ဘိက္ခဝေ, ပဉ္စ အာနိသံသာ သုစရိတေ’’တိ။ ပဉ္စမံ။

၆. ဒုတိယကာယဒုစ္စရိတသုတ္တံ

၂၄၆. ‘‘ပဉ္စိမေ, ဘိက္ခဝေ, အာဒီနဝါ ကာယဒုစ္စရိတေ။ပေ.။ အာနိသံသာ ကာယသုစရိတေ။ပေ.။။ ဆဋ္ဌံ။

၇. ဒုတိယဝစီဒုစ္စရိတသုတ္တံ

၂၄၇. ‘‘ပဉ္စိမေ, ဘိက္ခဝေ, အာဒီနဝါ ဝစီဒုစ္စရိတေ။ပေ.။ အာနိသံသာ ဝစီသုစရိတေ။ပေ.။။ သတ္တမံ။

၈. ဒုတိယမနောဒုစ္စရိတသုတ္တံ

၂၄၈. ‘‘ပဉ္စိမေ , ဘိက္ခဝေ, အာဒီနဝါ မနောဒုစ္စရိတေ။ပေ.။ အာနိသံသာ မနောသုစရိတေ။ ကတမေ ပဉ္စ? အတ္တာပိ အတ္တာနံ န ဥပဝဒတိ; အနုဝိစ္စ ဝိညူ ပသံသန္တိ; ကလျာဏော ကိတ္တိသဒ္ဒေါ အဗ္ဘုဂ္ဂစ္ဆတိ; အသဒ္ဓမ္မာ ဝုဋ္ဌာတိ; သဒ္ဓမ္မေ ပတိဋ္ဌာတိ။ ဣမေ ခေါ, ဘိက္ခဝေ, ပဉ္စ အာနိသံသာ မနောသုစရိတေ’’တိ။ အဋ္ဌမံ။

၉. သိဝထိကသုတ္တံ

၂၄၉. ‘‘ပဉ္စိမေ, ဘိက္ခဝေ, အာဒီနဝါ သိဝထိကာယ [သီဝထိကာယ (သီ. သျာ. ကံ. ဣ.)]။ ကတမေ ပဉ္စ? အသုစိ, ဒုဂ္ဂန္ဓာ, သပ္ပဋိဘယာ, ဝါဠာနံ အမနုဿာနံ အာဝါသော, ဗဟုနော ဇနဿ အာရောဒနာ – ဣမေ ခေါ, ဘိက္ခဝေ, ပဉ္စ အာဒီနဝါ သိဝထိကာယ။

‘‘ဧဝမေဝံ ခေါ, ဘိက္ခဝေ, ပဉ္စိမေ အာဒီနဝါ သိဝထိကူပမေ ပုဂ္ဂလေ။ ကတမေ ပဉ္စ? ဣဓ , ဘိက္ခဝေ, ဧကစ္စော ပုဂ္ဂလော အသုစိနာ ကာယကမ္မေန သမန္နာဂတော ဟောတိ; အသုစိနာ ဝစီကမ္မေန သမန္နာဂတော ဟောတိ; အသုစိနာ မနောကမ္မေန သမန္နာဂတော ဟောတိ။ ဣဒမဿ အသုစိတာယ ဝဒါမိ။ သေယျထာပိ သာ, ဘိက္ခဝေ, သိဝထိကာ အသုစိ; တထူပမာဟံ, ဘိက္ခဝေ, ဣမံ ပုဂ္ဂလံ ဝဒါမိ။

‘‘တဿ အသုစိနာ ကာယကမ္မေန သမန္နာဂတဿ, အသုစိနာ ဝစီကမ္မေန သမန္နာဂတဿ, အသုစိနာ မနောကမ္မေန သမန္နာဂတဿ ပါပကော ကိတ္တိသဒ္ဒေါ အဗ္ဘုဂ္ဂစ္ဆတိ။ ဣဒမဿ ဒုဂ္ဂန္ဓတာယ ဝဒါမိ။ သေယျထာပိ သာ, ဘိက္ခဝေ, သိဝထိကာ ဒုဂ္ဂန္ဓာ; တထူပမာဟံ, ဘိက္ခဝေ, ဣမံ ပုဂ္ဂလံ ဝဒါမိ။

‘‘တမေနံ အသုစိနာ ကာယကမ္မေန သမန္နာဂတံ, အသုစိနာ ဝစီကမ္မေန သမန္နာဂတံ, အသုစိနာ မနောကမ္မေန သမန္နာဂတံ ပေသလာ သဗြဟ္မစာရီ အာရကာ ပရိဝဇ္ဇန္တိ။ ဣဒမဿ သပ္ပဋိဘယသ္မိံ ဝဒါမိ။ သေယျထာပိ သာ, ဘိက္ခဝေ, သိဝထိကာ သပ္ပဋိဘယာ; တထူပမာဟံ, ဘိက္ခဝေ, ဣမံ ပုဂ္ဂလံ ဝဒါမိ။

‘‘သော အသုစိနာ ကာယကမ္မေန သမန္နာဂတော, အသုစိနာ ဝစီကမ္မေန သမန္နာဂတော , အသုစိနာ မနောကမ္မေန သမန္နာဂတော သဘာဂေဟိ ပုဂ္ဂလေဟိ သဒ္ဓိံ သံဝသတိ။ ဣဒမဿ ဝါဠာဝါသသ္မိံ ဝဒါမိ။ သေယျထာပိ သာ , ဘိက္ခဝေ, သိဝထိကာ ဝါဠာနံ အမနုဿာနံ အာဝါသော; တထူပမာဟံ, ဘိက္ခဝေ, ဣမံ ပုဂ္ဂလံ ဝဒါမိ။

‘‘တမေနံ အသုစိနာ ကာယကမ္မေန သမန္နာဂတံ, အသုစိနာ ဝစီကမ္မေန သမန္နာဂတံ, အသုစိနာ မနောကမ္မေန သမန္နာဂတံ ပေသလာ သဗြဟ္မစာရီ ဒိသွာ ခီယဓမ္မံ [ခီယနဓမ္မံ (သီ.)] အာပဇ္ဇန္တိ – ‘အဟော ဝတ နော ဒုက္ခံ ယေ မယံ ဧဝရူပေဟိ ပုဂ္ဂလေဟိ သဒ္ဓိံ သံဝသာမာ’တိ! ဣဒမဿ အာရောဒနာယ ဝဒါမိ။ သေယျထာပိ သာ, ဘိက္ခဝေ, သိဝထိကာ ဗဟုနော ဇနဿ အာရောဒနာ; တထူပမာဟံ, ဘိက္ခဝေ, ဣမံ ပုဂ္ဂလံ ဝဒါမိ။ ဣမေ ခေါ, ဘိက္ခဝေ, ပဉ္စ အာဒီနဝါ သိဝထိကူပမေ ပုဂ္ဂလေ’’တိ။ နဝမံ။

၁၀. ပုဂ္ဂလပ္ပသာဒသုတ္တံ

၂၅၀. ‘‘ပဉ္စိမေ , ဘိက္ခဝေ, အာဒီနဝါ ပုဂ္ဂလပ္ပသာဒေ။ ကတမေ ပဉ္စ? ယသ္မိံ, ဘိက္ခဝေ, ပုဂ္ဂလေ ပုဂ္ဂလော အဘိပ္ပသန္နော ဟောတိ, သော တထာရူပံ အာပတ္တိံ အာပန္နော ဟောတိ ယထာရူပါယ အာပတ္တိယာ သံဃော ဥက္ခိပတိ။ တဿ ဧဝံ ဟောတိ – ‘ယော ခေါ မ္ယာယံ ပုဂ္ဂလော ပိယော မနာပေါ သော သံဃေန ဥက္ခိတ္တော’တိ။ ဘိက္ခူသု အပ္ပသာဒဗဟုလော ဟောတိ။ ဘိက္ခူသု အပ္ပသာဒဗဟုလော သမာနော အညေ ဘိက္ခူ န ဘဇတိ။ အညေ ဘိက္ခူ အဘဇန္တော သဒ္ဓမ္မံ န သုဏာတိ။ သဒ္ဓမ္မံ အသုဏန္တော သဒ္ဓမ္မာ ပရိဟာယတိ။ အယံ, ဘိက္ခဝေ, ပဌမော အာဒီနဝေါ ပုဂ္ဂလပ္ပသာဒေ။

‘‘ပုန စပရံ, ဘိက္ခဝေ, ယသ္မိံ ပုဂ္ဂလေ ပုဂ္ဂလော အဘိပ္ပသန္နော ဟောတိ, သော တထာရူပံ အာပတ္တိံ အာပန္နော ဟောတိ ယထာရူပါယ အာပတ္တိယာ သံဃော အန္တေ နိသီဒါပေတိ ။ တဿ ဧဝံ ဟောတိ – ‘ယော ခေါ မ္ယာယံ ပုဂ္ဂလော ပိယော မနာပေါ သော သံဃေန အန္တေ နိသီဒါပိတော’တိ။ ဘိက္ခူသု အပ္ပသာဒဗဟုလော ဟောတိ။ ဘိက္ခူသု အပ္ပသာဒဗဟုလော သမာနော အညေ ဘိက္ခူ န ဘဇတိ။ အညေ ဘိက္ခူ အဘဇန္တော သဒ္ဓမ္မံ န သုဏာတိ။ သဒ္ဓမ္မံ အသုဏန္တော သဒ္ဓမ္မာ ပရိဟာယတိ။ အယံ, ဘိက္ခဝေ, ဒုတိယော အာဒီနဝေါ ပုဂ္ဂလပ္ပသာဒေ။

‘‘ပုန စပရံ, ဘိက္ခဝေ, ယသ္မိံ ပုဂ္ဂလေ ပုဂ္ဂလော အဘိပ္ပသန္နော ဟောတိ, သော ဒိသာပက္ကန္တော ဟောတိ။ပေ.။ သော ဝိဗ္ဘန္တော ဟောတိ။ပေ.။ သော ကာလင်္ကတော ဟောတိ။ တဿ ဧဝံ ဟောတိ – ‘ယော ခေါ မ္ယာယံ ပုဂ္ဂလော ပိယော မနာပေါ သော ကာလင်္ကတော’တိ။ အညေ ဘိက္ခူ န ဘဇတိ။ အညေ ဘိက္ခူ အဘဇန္တော သဒ္ဓမ္မံ န သုဏာတိ။ သဒ္ဓမ္မံ အသုဏန္တော သဒ္ဓမ္မာ ပရိဟာယတိ။ အယံ, ဘိက္ခဝေ, ပဉ္စမော အာဒီနဝေါ ပုဂ္ဂလပ္ပသာဒေ။ ဣမေ ခေါ, ဘိက္ခဝေ, ပဉ္စ အာဒီနဝါ ပုဂ္ဂလပ္ပသာဒေ’’တိ။ ဒသမံ။

ဒုစ္စရိတဝဂ္ဂေါ ပဉ္စမော။

တဿုဒ္ဒါနံ –

ဒုစ္စရိတံ ကာယဒုစ္စရိတံ၊ ဝစီဒုစ္စရိတံ မနောဒုစ္စရိတံ။

စတူဟိ ပရေ ဒွေ သိဝထိကာ၊ ပုဂ္ဂလပ္ပသာဒေန စာတိ။

ပဉ္စမပဏ္ဏာသကံ သမတ္တံ။