(၂၂) ၂. ပရိသာဝဂ္ဂေါ
၁. ပရိသာသုတ္တံ
၂၁၁. ‘‘စတ္တာရောမေ, ဘိက္ခဝေ, ပရိသဒူသနာ။ ကတမေ စတ္တာရော? ဘိက္ခု, ဘိက္ခဝေ [ဣဓ ဘိက္ခဝေ ဘိက္ခု (ဣ. က.)], ဒုဿီလော ပါပဓမ္မော ပရိသဒူသနော; ဘိက္ခုနီ, ဘိက္ခဝေ, ဒုဿီလာ ပါပဓမ္မာ ပရိသဒူသနာ; ဥပါသကော, ဘိက္ခဝေ, ဒုဿီလော ပါပဓမ္မော ပရိသဒူသနော; ဥပါသိကာ, ဘိက္ခဝေ, ဒုဿီလာ ပါပဓမ္မာ ပရိသဒူသနာ။ ဣမေ ခေါ, ဘိက္ခဝေ, စတ္တာရော ပရိသဒူသနာ။
‘‘စတ္တာရောမေ, ဘိက္ခဝေ, ပရိသသောဘနာ။ ကတမေ စတ္တာရော? ဘိက္ခု, ဘိက္ခဝေ, သီလဝါ ကလျာဏဓမ္မော ပရိသသောဘနော ; ဘိက္ခုနီ, ဘိက္ခဝေ, သီလဝတီ ကလျာဏဓမ္မာ ပရိသသောဘနာ; ဥပါသကော, ဘိက္ခဝေ, သီလဝါ ကလျာဏဓမ္မော ပရိသသောဘနော; ဥပါသိကာ, ဘိက္ခဝေ, သီလဝတီ ကလျာဏဓမ္မာ ပရိသသောဘနာ။ ဣမေ ခေါ, ဘိက္ခဝေ, စတ္တာရော ပရိသသောဘနာ’’တိ။ ပဌမံ။
၂. ဒိဋ္ဌိသုတ္တံ
၂၁၂. ‘‘စတူဟိ, ဘိက္ခဝေ, ဓမ္မေဟိ သမန္နာဂတော ယထာဘတံ နိက္ခိတ္တော ဧဝံ နိရယေ။ ကတမေဟိ စတူဟိ? ကာယဒုစ္စရိတေန, ဝစီဒုစ္စရိတေန, မနောဒုစ္စရိတေန, မိစ္ဆာဒိဋ္ဌိယာ – ဣမေဟိ ခေါ, ဘိက္ခဝေ, စတူဟိ ဓမ္မေဟိ သမန္နာဂတော ယထာဘတံ နိက္ခိတ္တော ဧဝံ နိရယေ။
‘‘စတူဟိ, ဘိက္ခဝေ, ဓမ္မေဟိ သမန္နာဂတော ယထာဘတံ နိက္ခိတ္တော ဧဝံ သဂ္ဂေ။ ကတမေဟိ စတူဟိ ? ကာယသုစရိတေန, ဝစီသုစရိတေန, မနောသုစရိတေန, သမ္မာဒိဋ္ဌိယာ – ဣမေဟိ ခေါ, ဘိက္ခဝေ, စတူဟိ ဓမ္မေဟိ သမန္နာဂတော ယထာဘတံ နိက္ခိတ္တော ဧဝံ သဂ္ဂေ’’တိ။ ဒုတိယံ။
၃. အကတညုတာသုတ္တံ
၂၁၃. ‘‘စတူဟိ , ဘိက္ခဝေ, ဓမ္မေဟိ သမန္နာဂတော ယထာဘတံ နိက္ခိတ္တော ဧဝံ နိရယေ။ ကတမေဟိ စတူဟိ? ကာယဒုစ္စရိတေန, ဝစီဒုစ္စရိတေန, မနောဒုစ္စရိတေန, အကတညုတာ အကတဝေဒိတာ [အကတညုတာအကတဝေဒိတာယ (သီ.)] – ဣမေဟိ ခေါ, ဘိက္ခဝေ, စတူဟိ ဓမ္မေဟိ သမန္နာဂတော ယထာဘတံ နိက္ခိတ္တော ဧဝံ နိရယေ။
‘‘စတူဟိ, ဘိက္ခဝေ, ဓမ္မေဟိ သမန္နာဂတော ယထာဘတံ နိက္ခိတ္တော ဧဝံ သဂ္ဂေ။ ကတမေဟိ စတူဟိ? ကာယသုစရိတေန, ဝစီသုစရိတေန, မနောသုစရိတေန, ကတညုတာကတဝေဒိတာ [ကတညုတာကတဝေဒိတာယ (သီ.)] – ဣမေဟိ ခေါ, ဘိက္ခဝေ, စတူဟိ ဓမ္မေဟိ သမန္နာဂတော ယထာဘတံ နိက္ခိတ္တော ဧဝံ သဂ္ဂေ’’တိ။ တတိယံ။
၄. ပါဏာတိပါတီသုတ္တံ
၂၁၄. ။ပေ.။ ပါဏာတိပါတီ ဟောတိ, အဒိန္နာဒါယီ ဟောတိ, ကာမေသုမိစ္ဆာစာရီ ဟောတိ, မုသာဝါဒီ ဟောတိ။ပေ.။ ပါဏာတိပါတာ ပဋိဝိရတော ဟောတိ, အဒိန္နာဒါနာ ပဋိဝိရတော ဟောတိ, ကာမေသုမိစ္ဆာစာရာ ပဋိဝိရတော ဟောတိ, မုသာဝါဒါ ပဋိဝိရတော ဟောတိ။ စတုတ္ထံ။
၅. ပဌမမဂ္ဂသုတ္တံ
၂၁၅. ။ပေ.။ မိစ္ဆာဒိဋ္ဌိကော ဟောတိ, မိစ္ဆာသင်္ကပ္ပော ဟောတိ, မိစ္ဆာဝါစော ဟောတိ, မိစ္ဆာကမ္မန္တော ဟောတိ။ပေ.။ သမ္မာဒိဋ္ဌိကော ဟောတိ, သမ္မာသင်္ကပ္ပော ဟောတိ, သမ္မာဝါစော ဟောတိ, သမ္မာကမ္မန္တော ဟောတိ။ ပဉ္စမံ။
၆. ဒုတိယမဂ္ဂသုတ္တံ
၂၁၆. ။ပေ.။ မိစ္ဆာအာဇီဝေါ ဟောတိ, မိစ္ဆာဝါယာမော ဟောတိ, မိစ္ဆာသတိ ဟောတိ, မိစ္ဆာသမာဓိ ဟောတိ။ပေ.။ သမ္မာအာဇီဝေါ ဟောတိ, သမ္မာဝါယာမော ဟောတိ, သမ္မာသတိ ဟောတိ, သမ္မာသမာဓိ ဟောတိ။ ဆဋ္ဌံ။
၇. ပဌမဝေါဟာရပထသုတ္တံ
၂၁၇. ။ပေ.။ အဒိဋ္ဌေ ဒိဋ္ဌဝါဒီ ဟောတိ, အသုတေ သုတဝါဒီ ဟောတိ, အမုတေ မုတဝါဒီ ဟောတိ, အဝိညာတေ ဝိညာတဝါဒီ ဟောတိ။ပေ.။ အဒိဋ္ဌေ အဒိဋ္ဌဝါဒီ ဟောတိ, အသုတေ အသုတဝါဒီ ဟောတိ, အမုတေ အမုတဝါဒီ ဟောတိ, အဝိညာတေ အဝိညာတဝါဒီ ဟောတိ။ သတ္တမံ။
၈. ဒုတိယဝေါဟာရပထသုတ္တံ
၂၁၈. ။ပေ.။ ဒိဋ္ဌေ အဒိဋ္ဌဝါဒီ ဟောတိ, သုတေ အသုတဝါဒီ ဟောတိ, မုတေ အမုတဝါဒီ ဟောတိ, ဝိညာတေ အဝိညာတဝါဒီ ဟောတိ။ပေ.။ ဒိဋ္ဌေ ဒိဋ္ဌဝါဒီ ဟောတိ, သုတေ သုတဝါဒီ ဟောတိ, မုတေ မုတဝါဒီ ဟောတိ, ဝိညာတေ ဝိညာတဝါဒီ ဟောတိ။ အဋ္ဌမံ။
၉. အဟိရိကသုတ္တံ
၂၁၉. ။ပေ.။ အဿဒ္ဓေါ ဟောတိ, ဒုဿီလော ဟောတိ, အဟိရိကော ဟောတိ, အနောတ္တပ္ပီ ဟောတိ။ပေ.။ သဒ္ဓေါ ဟောတိ, သီလဝါ ဟောတိ, ဟိရိမာ ဟောတိ, ဩတ္တပ္ပီ ဟောတိ။ နဝမံ။
၁၀. ဒုဿီလသုတ္တံ
၂၂၀. ‘‘စတူဟိ , ဘိက္ခဝေ, ဓမ္မေဟိ သမန္နာဂတော ယထာဘတံ နိက္ခိတ္တော ဧဝံ နိရယေ။ ကတမေဟိ စတူဟိ? အဿဒ္ဓေါ ဟောတိ, ဒုဿီလော ဟောတိ, ကုသီတော ဟောတိ, ဒုပ္ပညော ဟောတိ – ဣမေဟိ ခေါ, ဘိက္ခဝေ, စတူဟိ ဓမ္မေဟိ သမန္နာဂတော ယထာဘတံ နိက္ခိတ္တော ဧဝံ နိရယေ။
‘‘စတူဟိ, ဘိက္ခဝေ, ဓမ္မေဟိ သမန္နာဂတော ယထာဘတံ နိက္ခိတ္တော ဧဝံ သဂ္ဂေ။ ကတမေဟိ စတူဟိ ? သဒ္ဓေါ ဟောတိ, သီလဝါ ဟောတိ, အာရဒ္ဓဝီရိယော ဟောတိ, ပညဝါ ဟောတိ – ဣမေဟိ ခေါ, ဘိက္ခဝေ, စတူဟိ ဓမ္မေဟိ သမန္နာဂတော ယထာဘတံ နိက္ခိတ္တော ဧဝံ သဂ္ဂေ’’တိ။ ဒသမံ။
ပရိသာဝဂ္ဂေါ [သောဘနဝဂ္ဂေါ (သီ. သျာ. ကံ. ဣ.)] ဒုတိယော။
တဿုဒ္ဒါနံ –
ပရိသာ ဒိဋ္ဌိ အကတညုတာ၊ ပါဏာတိပါတာပိ ဒွေ မဂ္ဂါ။
ဒွေ ဝေါဟာရပထာ ဝုတ္တာ၊ အဟိရိကံ ဒုပ္ပညေန စာတိ။