မင်္ဂလဝဂ္ဂေါ

(၁၅) ၅. မင်္ဂလဝဂ္ဂေါ

၁. အကုသလသုတ္တံ

၁၄၇. ‘‘တီဟိ , ဘိက္ခဝေ, ဓမ္မေဟိ သမန္နာဂတော ယထာဘတံ နိက္ခိတ္တော ဧဝံ နိရယေ။ ကတမေဟိ တီဟိ? အကုသလေန ကာယကမ္မေန, အကုသလေန ဝစီကမ္မေန, အကုသလေန မနောကမ္မေန – ဣမေဟိ ခေါ, ဘိက္ခဝေ, တီဟိ ဓမ္မေဟိ သမန္နာဂတော ယထာဘတံ နိက္ခိတ္တော ဧဝံ နိရယေ။

‘‘တီဟိ, ဘိက္ခဝေ, ဓမ္မေဟိ သမန္နာဂတော ယထာဘတံ နိက္ခိတ္တော ဧဝံ သဂ္ဂေ။ ကတမေဟိ တီဟိ? ကုသလေန ကာယကမ္မေန, ကုသလေန ဝစီကမ္မေန, ကုသလေန မနောကမ္မေန – ဣမေဟိ ခေါ , ဘိက္ခဝေ, တီဟိ ဓမ္မေဟိ သမန္နာဂတော ယထာဘတံ နိက္ခိတ္တော ဧဝံ သဂ္ဂေ’’တိ။ ပဌမံ။

၂. သာဝဇ္ဇသုတ္တံ

၁၄၈. ‘‘တီဟိ, ဘိက္ခဝေ, ဓမ္မေဟိ သမန္နာဂတော ယထာဘတံ နိက္ခိတ္တော ဧဝံ နိရယေ။ ကတမေဟိ တီဟိ? သာဝဇ္ဇေန ကာယကမ္မေန, သာဝဇ္ဇေန ဝစီကမ္မေန, သာဝဇ္ဇေန မနောကမ္မေန – ဣမေဟိ ခေါ, ဘိက္ခဝေ, တီဟိ ဓမ္မေဟိ သမန္နာဂတော ယထာဘတံ နိက္ခိတ္တော ဧဝံ နိရယေ။

‘‘တီဟိ, ဘိက္ခဝေ, ဓမ္မေဟိ သမန္နာဂတော ယထာဘတံ နိက္ခိတ္တော ဧဝံ သဂ္ဂေ။ ကတမေဟိ တီဟိ? အနဝဇ္ဇေန ကာယကမ္မေန, အနဝဇ္ဇေန ဝစီကမ္မေန, အနဝဇ္ဇေန မနောကမ္မေန – ဣမေဟိ ခေါ။ပေ.။ ဧဝံ သဂ္ဂေ’’တိ။ ဒုတိယံ။

၃. ဝိသမသုတ္တံ

၁၄၉. ‘‘တီဟိ , ဘိက္ခဝေ။ပေ.။ ဝိသမေန ကာယကမ္မေန, ဝိသမေန ဝစီကမ္မေန, ဝိသမေန မနောကမ္မေန – ဣမေဟိ ခေါ။ပေ.။ ဧဝံ နိရယေ။

‘‘တီဟိ , ဘိက္ခဝေ, ဓမ္မေဟိ။ပေ.။ သမေန ကာယကမ္မေန, သမေန ဝစီကမ္မေန, သမေန မနောကမ္မေန – ဣမေဟိ ခေါ။ပေ.။ ဧဝံ သဂ္ဂေ’’တိ။ တတိယံ။

၄. အသုစိသုတ္တံ

၁၅၀. ‘‘တီဟိ, ဘိက္ခဝေ။ပေ.။ အသုစိနာ ကာယကမ္မေန, အသုစိနာ ဝစီကမ္မေန, အသုစိနာ မနောကမ္မေန – ဣမေဟိ ခေါ။ပေ.။ ဧဝံ နိရယေ။

‘‘တီဟိ, ဘိက္ခဝေ။ပေ.။ သုစိနာ ကာယကမ္မေန, သုစိနာ ဝစီကမ္မေန, သုစိနာ မနောကမ္မေန – ဣမေဟိ ခေါ, ဘိက္ခဝေ, တီဟိ ဓမ္မေဟိ သမန္နာဂတော ယထာဘတံ နိက္ခိတ္တော ဧဝံ သဂ္ဂေ’’တိ။ စတုတ္ထံ။

၅. ပဌမခတသုတ္တံ

၁၅၁. ‘‘တီဟိ, ဘိက္ခဝေ, ဓမ္မေဟိ သမန္နာဂတော ဗာလော အဗျတ္တော အသပ္ပုရိသော ခတံ ဥပဟတံ အတ္တာနံ ပရိဟရတိ, သာဝဇ္ဇော စ ဟောတိ သာနုဝဇ္ဇော စ ဝိညူနံ, ဗဟုဉ္စ အပုညံ ပသဝတိ။ ကတမေဟိ တီဟိ? အကုသလေန ကာယကမ္မေန, အကုသလေန ဝစီကမ္မေန, အကုသလေန မနောကမ္မေန – ဣမေဟိ ခေါ, ဘိက္ခဝေ, တီဟိ ဓမ္မေဟိ သမန္နာဂတော ဗာလော အဗျတ္တော အသပ္ပုရိသော ခတံ ဥပဟတံ အတ္တာနံ ပရိဟရတိ, သာဝဇ္ဇော စ ဟောတိ သာနုဝဇ္ဇော စ ဝိညူနံ, ဗဟုဉ္စ အပုညံ ပသဝတိ။

‘‘တီဟိ, ဘိက္ခဝေ, ဓမ္မေဟိ သမန္နာဂတော ပဏ္ဍိတော ဝိယတ္တော သပ္ပုရိသော အက္ခတံ အနုပဟတံ အတ္တာနံ ပရိဟရတိ, အနဝဇ္ဇော စ ဟောတိ အနနုဝဇ္ဇော စ ဝိညူနံ, ဗဟုဉ္စ ပုညံ ပသဝတိ။ ကတမေဟိ တီဟိ? ကုသလေန ကာယကမ္မေန, ကုသလေန ဝစီကမ္မေန, ကုသလေန မနောကမ္မေန။ပေ.။။ ပဉ္စမံ။

၆. ဒုတိယခတသုတ္တံ

၁၅၂. ‘‘တီဟိ, ဘိက္ခဝေ။ပေ.။ သာဝဇ္ဇေန ကာယကမ္မေန, သာဝဇ္ဇေန ဝစီကမ္မေန, သာဝဇ္ဇေန မနောကမ္မေန။ပေ.။။

‘‘တီဟိ , ဘိက္ခဝေ။ပေ.။ အနဝဇ္ဇေန ကာယကမ္မေန, အနဝဇ္ဇေန ဝစီကမ္မေန, အနဝဇ္ဇေန မနောကမ္မေန။ပေ.။။ ဆဋ္ဌံ။

၇. တတိယခတသုတ္တံ

၁၅၃. ‘‘တီဟိ, ဘိက္ခဝေ။ပေ.။ ဝိသမေန ကာယကမ္မေန, ဝိသမေန ဝစီကမ္မေန, ဝိသမေန မနောကမ္မေန။ပေ.။။

‘‘တီဟိ , ဘိက္ခဝေ။ပေ.။ သမေန ကာယကမ္မေန, သမေန ဝစီကမ္မေန, သမေန မနောကမ္မေန။ပေ.။။ သတ္တမံ။

၈. စတုတ္ထခတသုတ္တံ

၁၅၄. ‘‘တီဟိ, ဘိက္ခဝေ။ပေ.။ အသုစိနာ ကာယကမ္မေန, အသုစိနာ ဝစီကမ္မေန, အသုစိနာ မနောကမ္မေန။ပေ.။။

‘‘တီဟိ, ဘိက္ခဝေ။ပေ.။ သုစိနာ ကာယကမ္မေန, သုစိနာ ဝစီကမ္မေန, သုစိနာ မနောကမ္မေန – ဣမေဟိ ခေါ, ဘိက္ခဝေ, တီဟိ ဓမ္မေဟိ သမန္နာဂတော ပဏ္ဍိတော ဝိယတ္တော သပ္ပုရိသော အက္ခတံ အနုပဟတံ အတ္တာနံ ပရိဟရတိ, အနဝဇ္ဇော စ ဟောတိ အနနုဝဇ္ဇော စ ဝိညူနံ, ဗဟုဉ္စ ပုညံ ပသဝတီ’’တိ။ အဋ္ဌမံ။

၉. ဝန္ဒနာသုတ္တံ

၁၅၅. ‘‘တိဿော ဣမာ, ဘိက္ခဝေ, ဝန္ဒနာ။ ကတမာ တိဿော? ကာယေန, ဝါစာယ, မနသာ – ဣမာ ခေါ, ဘိက္ခဝေ, တိဿော ဝန္ဒနာ’’တိ။ နဝမံ။

၁၀. ပုဗ္ဗဏှသုတ္တံ

၁၅၆. ‘‘ယေ , ဘိက္ခဝေ, သတ္တာ ပုဗ္ဗဏှသမယံ ကာယေန သုစရိတံ စရန္တိ , ဝါစာယ သုစရိတံ စရန္တိ, မနသာ သုစရိတံ စရန္တိ, သုပုဗ္ဗဏှော, ဘိက္ခဝေ, တေသံ သတ္တာနံ။

‘‘ယေ, ဘိက္ခဝေ, သတ္တာ မဇ္ဈန္ဟိကသမယံ ကာယေန သုစရိတံ စရန္တိ, ဝါစာယ သုစရိတံ စရန္တိ, မနသာ သုစရိတံ စရန္တိ, သုမဇ္ဈန္ဟိကော, ဘိက္ခဝေ, တေသံ သတ္တာနံ။

‘‘ယေ , ဘိက္ခဝေ, သတ္တာ သာယနှသမယံ ကာယေန သုစရိတံ စရန္တိ, ဝါစာယ သုစရိတံ စရန္တိ, မနသာ သုစရိတံ စရန္တိ, သုသာယန္ဟော, ဘိက္ခဝေ, တေသံ သတ္တာန’’န္တိ။

‘‘သုနက္ခတ္တံ သုမင်္ဂလံ၊ သုပ္ပဘာတံ သုဟုဋ္ဌိတံ [သုဝုဋ္ဌိတံ (သီ. ဣ.)]။

သုခဏော သုမုဟုတ္တော စ၊ သုယိဋ္ဌံ ဗြဟ္မစာရိသု။

‘‘ပဒက္ခိဏံ ကာယကမ္မံ၊ ဝါစာကမ္မံ ပဒက္ခိဏံ။

ပဒက္ခိဏံ မနောကမ္မံ၊ ပဏီဓိ တေ ပဒက္ခိဏေ [ပဏိဓိယော ပဒက္ခိဏာ (သီ. ဣ.)၊ ပဏိဓိ တေ ပဒက္ခိဏာ (သျာ. ကံ.)]။

ပဒက္ခိဏာနိ ကတွာန၊ လဘန္တတ္ထေ [လဘတတ္ထေ (သီ. ဣ.)] ပဒက္ခိဏေ။

‘‘တေ အတ္ထလဒ္ဓါ သုခိတာ၊ ဝိရုဠ္ဟာ ဗုဒ္ဓသာသနေ။

အရောဂါ သုခိတာ ဟောထ၊ သဟ သဗ္ဗေဟိ ဉာတိဘီ’’တိ။ ဒသမံ။

မင်္ဂလဝဂ္ဂေါ ပဉ္စမော။

တဿုဒ္ဒါနံ –

အကုသလဉ္စ သာဝဇ္ဇံ၊ ဝိသမာသုစိနာ သဟ။

စတုရော ခတာ ဝန္ဒနာ၊ ပုဗ္ဗဏှေန စ တေ ဒသာတိ။

တတိယော ပဏ္ဏာသကော သမတ္တော။