၁၉. ကာယဂတာသတိဝဂ္ဂေါ
၅၆၃. ‘‘ယဿ ကဿစိ, ဘိက္ခဝေ, မဟာသမုဒ္ဒေါ စေတသာ ဖုဋော အန္တောဂဓါ တဿ ကုန္နဒိယော ယာ ကာစိ သမုဒ္ဒင်္ဂမာ; ဧဝမေဝံ, ဘိက္ခဝေ, ယဿ ကဿစိ ကာယဂတာ သတိ ဘာဝိတာ ဗဟုလီကတာ အန္တောဂဓါ တဿ ကုသလာ ဓမ္မာ ယေ ကေစိ ဝိဇ္ဇာဘာဂိယာ’’တိ။
၅၆၄-၅၇၀. ‘‘ဧကဓမ္မော, ဘိက္ခဝေ, ဘာဝိတော ဗဟုလီကတော မဟတော သံဝေဂါယ သံဝတ္တတိ။ မဟတော အတ္ထာယ သံဝတ္တတိ။ မဟတော ယောဂက္ခေမာယ သံဝတ္တတိ။ သတိသမ္ပဇညာယ သံဝတ္တတိ။ ဉာဏဒဿနပ္ပဋိလာဘာယ သံဝတ္တတိ။ ဒိဋ္ဌဓမ္မသုခဝိဟာရာယ သံဝတ္တတိ။ ဝိဇ္ဇာဝိမုတ္တိဖလသစ္ဆိကိရိယာယ သံဝတ္တတိ။ ကတမော ဧကဓမ္မော? ကာယဂတာ သတိ။ အယံ ခေါ, ဘိက္ခဝေ, ဧကဓမ္မော ဘာဝိတော ဗဟုလီကတော မဟတော သံဝေဂါယ သံဝတ္တတိ။ မဟတော အတ္ထာယ သံဝတ္တတိ။ မဟတော ယောဂက္ခေမာယ သံဝတ္တတိ။ သတိသမ္ပဇညာယ သံဝတ္တတိ။ ဉာဏဒဿနပ္ပဋိလာဘာယ သံဝတ္တတိ။ ဒိဋ္ဌဓမ္မသုခဝိဟာရာယ သံဝတ္တတိ။ ဝိဇ္ဇာဝိမုတ္တိဖလသစ္ဆိကိရိယာယ သံဝတ္တတီ’’တိ။
၅၇၁. ‘‘ဧကဓမ္မေ , ဘိက္ခဝေ, ဘာဝိတေ ဗဟုလီကတေ ကာယောပိ ပဿမ္ဘတိ, စိတ္တမ္ပိ ပဿမ္ဘတိ, ဝိတက္ကဝိစာရာပိ ဝူပသမ္မန္တိ, ကေဝလာပိ ဝိဇ္ဇာဘာဂိယာ ဓမ္မာ ဘာဝနာပါရိပူရိံ ဂစ္ဆန္တိ။ ကတမသ္မိံ ဧကဓမ္မေ? ကာယဂတာယ သတိယာ။ ဣမသ္မိံ ခေါ, ဘိက္ခဝေ, ဧကဓမ္မေ ဘာဝိတေ ဗဟုလီကတေ ကာယောပိ ပဿမ္ဘတိ, စိတ္တမ္ပိ ပဿမ္ဘတိ, ဝိတက္ကဝိစာရာပိ ဝူပသမ္မန္တိ, ကေဝလာပိ ဝိဇ္ဇာဘာဂိယာ ဓမ္မာ ဘာဝနာပါရိပူရိံ ဂစ္ဆန္တီ’’တိ။
၅၇၂. ‘‘ဧကဓမ္မေ, ဘိက္ခဝေ, ဘာဝိတေ ဗဟုလီကတေ အနုပ္ပန္နာ စေဝ အကုသလာ ဓမ္မာ နုပ္ပဇ္ဇန္တိ, ဥပ္ပန္နာ စ အကုသလာ ဓမ္မာ ပဟီယန္တိ။ ကတမသ္မိံ ဧကဓမ္မေ? ကာယဂတာယ သတိယာ။ ဣမသ္မိံ ခေါ, ဘိက္ခဝေ, ဧကဓမ္မေ ဘာဝိတေ ဗဟုလီကတေ အနုပ္ပန္နာ စေဝ အကုသလာ ဓမ္မာ နုပ္ပဇ္ဇန္တိ, ဥပ္ပန္နာ စ အကုသလာ ဓမ္မာ ပဟီယန္တီ’’တိ။
၅၇၃. ‘‘ဧကဓမ္မေ , ဘိက္ခဝေ, ဘာဝိတေ ဗဟုလီကတေ အနုပ္ပန္နာ စေဝ ကုသလာ ဓမ္မာ ဥပ္ပဇ္ဇန္တိ, ဥပ္ပန္နာ စ ကုသလာ ဓမ္မာ ဘိယျောဘာဝါယ ဝေပုလ္လာယ သံဝတ္တန္တိ။ ကတမသ္မိံ ဧကဓမ္မေ? ကာယဂတာယ သတိယာ။ ဣမသ္မိံ ခေါ, ဘိက္ခဝေ, ဧကဓမ္မေ ဘာဝိတေ ဗဟုလီကတေ အနုပ္ပန္နာ စေဝ ကုသလာ ဓမ္မာ ဥပ္ပဇ္ဇန္တိ, ဥပ္ပန္နာ စ ကုသလာ ဓမ္မာ ဘိယျောဘာဝါယ ဝေပုလ္လာယ သံဝတ္တန္တီ’’တိ။
၅၇၄. ‘‘ဧကဓမ္မေ, ဘိက္ခဝေ, ဘာဝိတေ ဗဟုလီကတေ အဝိဇ္ဇာ ပဟီယတိ, ဝိဇ္ဇာ ဥပ္ပဇ္ဇတိ, အသ္မိမာနော ပဟီယတိ, အနုသယာ သမုဂ္ဃါတံ ဂစ္ဆန္တိ, သံယောဇနာ ပဟီယန္တိ။ ကတမသ္မိံ ဧကဓမ္မေ? ကာယဂတာယ သတိယာ။ ဣမသ္မိံ ခေါ, ဘိက္ခဝေ, ဧကဓမ္မေ ဘာဝိတေ ဗဟုလီကတေ အဝိဇ္ဇာ ပဟီယတိ, ဝိဇ္ဇာ ဥပ္ပဇ္ဇတိ, အသ္မိမာနော ပဟီယတိ, အနုသယာ သမုဂ္ဃါတံ ဂစ္ဆန္တိ, သံယောဇနာ ပဟီယန္တီ’’တိ။
၅၇၅-၅၇၆. ‘‘ဧကဓမ္မော, ဘိက္ခဝေ, ဘာဝိတော ဗဟုလီကတော ပညာပဘေဒါယ သံဝတ္တတိ။ အနုပါဒါပရိနိဗ္ဗာနာယ သံဝတ္တတိ။ ကတမော ဧကဓမ္မော? ကာယဂတာ သတိ။ အယံ ခေါ, ဘိက္ခဝေ, ဧကဓမ္မော ဘာဝိတော ဗဟုလီကတော ပညာပဘေဒါယ သံဝတ္တတိ။ အနုပါဒါပရိနိဗ္ဗာနာယ သံဝတ္တတီ’’တိ။
၅၇၇-၅၇၉. ‘‘ဧကဓမ္မေ , ဘိက္ခဝေ, ဘာဝိတေ ဗဟုလီကတေ အနေကဓါတုပဋိဝေဓေါ ဟောတိ။ နာနာဓါတုပဋိဝေဓေါ ဟောတိ။ အနေကဓါတုပဋိသမ္ဘိဒါ ဟောတိ။ ကတမသ္မိံ ဧကဓမ္မေ? ကာယဂတာယ သတိယာ။ ဣမသ္မိံ ခေါ, ဘိက္ခဝေ, ဧကဓမ္မေ ဘာဝိတေ ဗဟုလီကတေ အနေကဓါတုပဋိဝေဓေါ ဟောတိ။ နာနာဓါတုပဋိဝေဓေါ ဟောတိ။ အနေကဓါတုပဋိသမ္ဘိဒါ ဟောတီ’’တိ။
၅၈၀-၅၈၃. ‘‘ဧကဓမ္မော, ဘိက္ခဝေ, ဘာဝိတော ဗဟုလီကတော သောတာပတ္တိဖလသစ္ဆိကိရိယာယ သံဝတ္တတိ။ သကဒါဂါမိဖလသစ္ဆိကိရိယာယ သံဝတ္တတိ။ အနာဂါမိဖလသစ္ဆိကိရိယာယ သံဝတ္တတိ။ အရဟတ္တဖလသစ္ဆိကိရိယာယ သံဝတ္တတိ။ ကတမော ဧကဓမ္မော? ကာယဂတာ သတိ။ အယံ ခေါ, ဘိက္ခဝေ, ဧကဓမ္မော ဘာဝိတော ဗဟုလီကတော သောတာပတ္တိဖလသစ္ဆိကိရိယာယ သံဝတ္တတိ။ သကဒါဂါမိဖလသစ္ဆိကိရိယာယ သံဝတ္တတိ။ အနာဂါမိဖလသစ္ဆိကိရိယာယ သံဝတ္တတိ။ အရဟတ္တဖလသစ္ဆိကိရိယာယ သံဝတ္တတီ’’တိ။
၅၈၄-၅၉၉. ‘‘ဧကဓမ္မော , ဘိက္ခဝေ, ဘာဝိတော ဗဟုလီကတော ပညာပဋိလာဘာယ သံဝတ္တတိ။ ပညာဝုဒ္ဓိယာ သံဝတ္တတိ။ ပညာဝေပုလ္လာယ သံဝတ္တတိ။ မဟာပညတာယ သံဝတ္တတိ။ ပုထုပညတာယ သံဝတ္တတိ။ ဝိပုလပညတာယ သံဝတ္တတိ။ ဂမ္ဘီရပညတာယ သံဝတ္တတိ။ အသာမန္တပညတာယ [အသမတ္ထပညတာယ (သျာ. ကံ.), အသမတ္တပညတာယ (က.), အသမန္တပညတာယ (ဋီကာ) ပဋိ. မ. အဋ္ဌ. ၂.၃.၁ ပဿိတဗ္ဗံ] သံဝတ္တတိ။ ဘူရိပညတာယ သံဝတ္တတိ။ ပညာဗာဟုလ္လာယ သံဝတ္တတိ။ သီဃပညတာယ သံဝတ္တတိ။ လဟုပညတာယ သံဝတ္တတိ။ ဟာသပညတာယ [ဟာသုပညတာယ (သီ. ဣ.)] သံဝတ္တတိ။ ဇဝနပညတာယ သံဝတ္တတိ။ တိက္ခပညတာယ သံဝတ္တတိ။ နိဗ္ဗေဓိကပညတာယ သံဝတ္တတိ။ ကတမော ဧကဓမ္မော? ကာယဂတာ သတိ။ အယံ ခေါ, ဘိက္ခဝေ, ဧကဓမ္မော ဘာဝိတော ဗဟုလီကတော ပညာပဋိလာဘာယ သံဝတ္တတိ။ ပညာဝုဒ္ဓိယာ သံဝတ္တတိ။ ပညာဝေပုလ္လာယ သံဝတ္တတိ။ မဟာပညတာယ သံဝတ္တတိ။ ပုထုပညတာယ သံဝတ္တတိ။ ဝိပုလပညတာယ သံဝတ္တတိ။ ဂမ္ဘီရပညတာယ သံဝတ္တတိ။ အသာမန္တပညတာယ သံဝတ္တတိ။ ဘူရိပညတာယ သံဝတ္တတိ။ ပညာဗာဟုလ္လာယ သံဝတ္တတိ။ သီဃပညတာယ သံဝတ္တတိ။ လဟုပညတာယ သံဝတ္တတိ။ ဟာသပညတာယ သံဝတ္တတိ။ ဇဝနပညတာယ သံဝတ္တတိ။ တိက္ခပညတာယ သံဝတ္တတိ။ နိဗ္ဗေဓိကပညတာယ သံဝတ္တတီ’’တိ။
ကာယဂတာသတိဝဂ္ဂေါ ဧကူနဝီသတိမော။