မာတုဂါမသံယုတ္တံ

၃. မာတုဂါမသံယုတ္တံ

၁. ပဌမပေယျာလဝဂ္ဂေါ

၁. မာတုဂါမသုတ္တံ

၂၈၀. ‘‘ပဉ္စဟိ , ဘိက္ခဝေ, အင်္ဂေဟိ သမန္နာဂတော မာတုဂါမော ဧကန္တအမနာပေါ ဟောတိ ပုရိသဿ။ ကတမေဟိ ပဉ္စဟိ? န စ ရူပဝါ ဟောတိ, န စ ဘောဂဝါ ဟောတိ, န စ သီလဝါ ဟောတိ, အလသော စ ဟောတိ, ပဇဉ္စဿ န လဘတိ – ဣမေဟိ ခေါ, ဘိက္ခဝေ, ပဉ္စဟိ အင်္ဂေဟိ သမန္နာဂတော မာတုဂါမော ဧကန္တအမနာပေါ ဟောတိ ပုရိသဿ။ ပဉ္စဟိ, ဘိက္ခဝေ, အင်္ဂေဟိ သမန္နာဂတော မာတုဂါမော ဧကန္တမနာပေါ ဟောတိ ပုရိသဿ။ ကတမေဟိ ပဉ္စဟိ? ရူပဝါ စ ဟောတိ, ဘောဂဝါ စ ဟောတိ, သီလဝါ စ ဟောတိ, ဒက္ခော စ ဟောတိ အနလသော, ပဇဉ္စဿ လဘတိ – ဣမေဟိ ခေါ, ဘိက္ခဝေ, ပဉ္စဟိ အင်္ဂေဟိ သမန္နာဂတော မာတုဂါမော ဧကန္တမနာပေါ ဟောတိ ပုရိသဿာ’’တိ။ ပဌမံ။

၂. ပုရိသသုတ္တံ

၂၈၁. ‘‘ပဉ္စဟိ, ဘိက္ခဝေ, အင်္ဂေဟိ သမန္နာဂတော ပုရိသော ဧကန္တအမနာပေါ ဟောတိ မာတုဂါမဿ။ ကတမေဟိ ပဉ္စဟိ? န စ ရူပဝါ ဟောတိ, န စ ဘောဂဝါ ဟောတိ, န စ သီလဝါ ဟောတိ, အလသော စ ဟောတိ, ပဇဉ္စဿ န လဘတိ – ဣမေဟိ ခေါ, ဘိက္ခဝေ, ပဉ္စဟိ အင်္ဂေဟိ သမန္နာဂတော ပုရိသော ဧကန္တအမနာပေါ ဟောတိ မာတုဂါမဿ။ ပဉ္စဟိ, ဘိက္ခဝေ, အင်္ဂေဟိ သမန္နာဂတော ပုရိသော ဧကန္တမနာပေါ ဟောတိ မာတုဂါမဿ။ ကတမေဟိ ပဉ္စဟိ? ရူပဝါ စ ဟောတိ, ဘောဂဝါ စ ဟောတိ, သီလဝါ စ ဟောတိ, ဒက္ခော စ ဟောတိ အနလသော, ပဇဉ္စဿ လဘတိ – ဣမေဟိ ခေါ, ဘိက္ခဝေ, ပဉ္စဟိ အင်္ဂေဟိ သမန္နာဂတော ပုရိသော ဧကန္တမနာပေါ ဟောတိ မာတုဂါမဿာ’’တိ။ ဒုတိယံ။

၃. အာဝေဏိကဒုက္ခသုတ္တံ

၂၈၂. ‘‘ပဉ္စိမာနိ, ဘိက္ခဝေ, မာတုဂါမဿ အာဝေဏိကာနိ ဒုက္ခာနိ, ယာနိ မာတုဂါမော ပစ္စနုဘောတိ, အညတ္ရေဝ ပုရိသေဟိ။ ကတမာနိ ပဉ္စ? ဣဓ, ဘိက္ခဝေ , မာတုဂါမော ဒဟရောဝ သမာနော ပတိကုလံ ဂစ္ဆတိ, ဉာတကေဟိ ဝိနာ ဟောတိ။ ဣဒံ, ဘိက္ခဝေ, မာတုဂါမဿ ပဌမံ အာဝေဏိကံ ဒုက္ခံ, ယံ မာတုဂါမော ပစ္စနုဘောတိ, အညတ္ရေဝ ပုရိသေဟိ။ ပုန စပရံ, ဘိက္ခဝေ, မာတုဂါမော ဥတုနီ ဟောတိ။ ဣဒံ, ဘိက္ခဝေ, မာတုဂါမဿ ဒုတိယံ အာဝေဏိကံ ဒုက္ခံ, ယံ မာတုဂါမော ပစ္စနုဘောတိ, အညတ္ရေဝ ပုရိသေဟိ။ ပုန စပရံ, ဘိက္ခဝေ, မာတုဂါမော ဂဗ္ဘိနီ ဟောတိ။ ဣဒံ, ဘိက္ခဝေ, မာတုဂါမဿ တတိယံ အာဝေဏိကံ ဒုက္ခံ, ယံ မာတုဂါမော ပစ္စနုဘောတိ, အညတ္ရေဝ ပုရိသေဟိ။ ပုန စပရံ, ဘိက္ခဝေ, မာတုဂါမော ဝိဇာယတိ။ ဣဒံ, ဘိက္ခဝေ, မာတုဂါမဿ စတုတ္ထံ အာဝေဏိကံ ဒုက္ခံ, ယံ မာတုဂါမော ပစ္စနုဘောတိ, အညတ္ရေဝ ပုရိသေဟိ။ ပုန စပရံ, ဘိက္ခဝေ, မာတုဂါမော ပုရိသဿ ပါရိစရိယံ ဥပေတိ။ ဣဒံ ခေါ, ဘိက္ခဝေ, မာတုဂါမဿ ပဉ္စမံ အာဝေဏိကံ ဒုက္ခံ, ယံ မာတုဂါမော ပစ္စနုဘောတိ, အညတ္ရေဝ ပုရိသေဟိ။ ဣမာနိ ခေါ, ဘိက္ခဝေ, ပဉ္စ မာတုဂါမဿ အာဝေဏိကာနိ ဒုက္ခာနိ, ယာနိ မာတုဂါမော ပစ္စနုဘောတိ, အညတ္ရေဝ ပုရိသေဟီ’’တိ။ တတိယံ။

၄. တီဟိဓမ္မေဟိသုတ္တံ

၂၈၃. ‘‘တီဟိ , ဘိက္ခဝေ, ဓမ္မေဟိ သမန္နာဂတော မာတုဂါမော ယေဘုယျေန ကာယဿ ဘေဒါ ပရံ မရဏာ အပါယံ ဒုဂ္ဂတိံ ဝိနိပါတံ နိရယံ ဥပပဇ္ဇတိ။ ကတမေဟိ တီဟိ? ဣဓ, ဘိက္ခဝေ, မာတုဂါမော ပုဗ္ဗဏှသမယံ မစ္ဆေရမလပရိယုဋ္ဌိတေန စေတသာ အဂါရံ အဇ္ဈာဝသတိ။ မဇ္ဈန္ဟိကသမယံ ဣဿာပရိယုဋ္ဌိတေန စေတသာ အဂါရံ အဇ္ဈာဝသတိ။ သာယနှသမယံ ကာမရာဂပရိယုဋ္ဌိတေန စေတသာ အဂါရံ အဇ္ဈာဝသတိ။ ဣမေဟိ ခေါ, ဘိက္ခဝေ, တီဟိ ဓမ္မေဟိ သမန္နာဂတော မာတုဂါမော ယေဘုယျေန ကာယဿ ဘေဒါ ပရံ မရဏာ အပါယံ ဒုဂ္ဂတိံ ဝိနိပါတံ နိရယံ ဥပပဇ္ဇတီ’’တိ။ စတုတ္ထံ။

၅. ကောဓနသုတ္တံ

၂၈၄. အထ ခေါ အာယသ္မာ အနုရုဒ္ဓေါ ယေန ဘဂဝါ တေနုပသင်္ကမိ; ဥပသင်္ကမိတွာ ဧကမန္တံ နိသီဒိ။ ဧကမန္တံ နိသိန္နော ခေါ အာယသ္မာ အနုရုဒ္ဓေါ ဘဂဝန္တံ ဧတဒဝေါစ – ‘‘ဣဓါဟံ, ဘန္တေ, မာတုဂါမံ ပဿာမိ ဒိဗ္ဗေန စက္ခုနာ ဝိသုဒ္ဓေန အတိက္ကန္တမာနုသကေန ကာယဿ ဘေဒါ ပရံ မရဏာ အပါယံ ဒုဂ္ဂတိံ ဝိနိပါတံ နိရယံ ဥပပဇ္ဇန္တံ။ ကတီဟိ နု ခေါ, ဘန္တေ, ဓမ္မေဟိ သမန္နာဂတော မာတုဂါမော ကာယဿ ဘေဒါ ပရံ မရဏာ အပါယံ ဒုဂ္ဂတိံ ဝိနိပါတံ နိရယံ ဥပပဇ္ဇတီ’’တိ?

‘‘ပဉ္စဟိ ခေါ, အနုရုဒ္ဓ, ဓမ္မေဟိ သမန္နာဂတော မာတုဂါမော ကာယဿ ဘေဒါ ပရံ မရဏာ အပါယံ ဒုဂ္ဂတိံ ဝိနိပါတံ နိရယံ ဥပပဇ္ဇတိ။ ကတမေဟိ ပဉ္စဟိ? အဿဒ္ဓေါ စ ဟောတိ, အဟိရိကော စ ဟောတိ, အနောတ္တပ္ပီ စ ဟောတိ, ကောဓနော စ ဟောတိ, ဒုပ္ပညော စ ဟောတိ – ဣမေဟိ ခေါ, အနုရုဒ္ဓ, ပဉ္စဟိ ဓမ္မေဟိ သမန္နာဂတော မာတုဂါမော ကာယဿ ဘေဒါ ပရံ မရဏာ အပါယံ ဒုဂ္ဂတိံ ဝိနိပါတံ နိရယံ ဥပပဇ္ဇတီ’’တိ။ ပဉ္စမံ။

၆. ဥပနာဟီသုတ္တံ

၂၈၅. ‘‘ပဉ္စဟိ , အနုရုဒ္ဓ, ဓမ္မေဟိ သမန္နာဂတော မာတုဂါမော ကာယဿ ဘေဒါ ပရံ မရဏာ အပါယံ ဒုဂ္ဂတိံ ဝိနိပါတံ နိရယံ ဥပပဇ္ဇတိ။ ကတမေဟိ ပဉ္စဟိ? အဿဒ္ဓေါ စ ဟောတိ, အဟိရိကော စ ဟောတိ, အနောတ္တပ္ပီ စ ဟောတိ, ဥပနာဟီ စ ဟောတိ, ဒုပ္ပညော စ ဟောတိ – ဣမေဟိ ခေါ, အနုရုဒ္ဓ, ပဉ္စဟိ ဓမ္မေဟိ သမန္နာဂတော မာတုဂါမော ကာယဿ ဘေဒါ ပရံ မရဏာ အပါယံ ဒုဂ္ဂတိံ ဝိနိပါတံ နိရယံ ဥပပဇ္ဇတီ’’တိ။ ဆဋ္ဌံ။

၇. ဣဿုကီသုတ္တံ

၂၈၆. ‘‘ပဉ္စဟိ, အနုရုဒ္ဓ, ဓမ္မေဟိ သမန္နာဂတော မာတုဂါမော ကာယဿ ဘေဒါ ပရံ မရဏာ အပါယံ ဒုဂ္ဂတိံ ဝိနိပါတံ နိရယံ ဥပပဇ္ဇတိ။ ကတမေဟိ ပဉ္စဟိ? အဿဒ္ဓေါ စ ဟောတိ, အဟိရိကော စ ဟောတိ, အနောတ္တပ္ပီ စ ဟောတိ, ဣဿုကီ စ ဟောတိ, ဒုပ္ပညော စ ဟောတိ – ဣမေဟိ ခေါ , အနုရုဒ္ဓ, ပဉ္စဟိ ဓမ္မေဟိ သမန္နာဂတော မာတုဂါမော ကာယဿ ဘေဒါ ပရံ မရဏာ အပါယံ ဒုဂ္ဂတိံ ဝိနိပါတံ နိရယံ ဥပပဇ္ဇတီ’’တိ။ သတ္တမံ။

၈. မစ္ဆရီသုတ္တံ

၂၈၇. ‘‘ပဉ္စဟိ, အနုရုဒ္ဓ, ဓမ္မေဟိ သမန္နာဂတော မာတုဂါမော ကာယဿ ဘေဒါ ပရံ မရဏာ အပါယံ ဒုဂ္ဂတိံ ဝိနိပါတံ နိရယံ ဥပပဇ္ဇတိ။ ကတမေဟိ ပဉ္စဟိ? အဿဒ္ဓေါ စ ဟောတိ, အဟိရိကော စ ဟောတိ, အနောတ္တပ္ပီ စ ဟောတိ, မစ္ဆရီ စ ဟောတိ, ဒုပ္ပညော စ ဟောတိ – ဣမေဟိ ခေါ, အနုရုဒ္ဓ, ပဉ္စဟိ ဓမ္မေဟိ သမန္နာဂတော မာတုဂါမော။ပေ.။ အပါယံ ဒုဂ္ဂတိံ ဝိနိပါတံ နိရယံ ဥပပဇ္ဇတီ’’တိ။ အဋ္ဌမံ။

၉. အတိစာရီသုတ္တံ

၂၈၈. ‘‘ပဉ္စဟိ , အနုရုဒ္ဓ, ဓမ္မေဟိ သမန္နာဂတော မာတုဂါမော။ပေ.။ အပါယံ ဒုဂ္ဂတိံ ဝိနိပါတံ နိရယံ ဥပပဇ္ဇတိ။ ကတမေဟိ ပဉ္စဟိ? အဿဒ္ဓေါ စ ဟောတိ, အဟိရိကော စ ဟောတိ, အနောတ္တပ္ပီ စ ဟောတိ, အတိစာရီ စ ဟောတိ, ဒုပ္ပညော စ ဟောတိ – ဣမေဟိ ခေါ, အနုရုဒ္ဓ, ပဉ္စဟိ ဓမ္မေဟိ သမန္နာဂတော မာတုဂါမော။ပေ.။ ဥပပဇ္ဇတီ’’တိ။ နဝမံ။

၁၀. ဒုဿီလသုတ္တံ

၂၈၉. ‘‘ပဉ္စဟိ, အနုရုဒ္ဓ, ဓမ္မေဟိ သမန္နာဂတော မာတုဂါမော။ပေ.။ နိရယံ ဥပပဇ္ဇတိ။ ကတမေဟိ ပဉ္စဟိ? အဿဒ္ဓေါ စ ဟောတိ, အဟိရိကော စ ဟောတိ, အနောတ္တပ္ပီ စ ဟောတိ, ဒုဿီလော စ ဟောတိ, ဒုပ္ပညော စ ဟောတိ – ဣမေဟိ ခေါ, အနုရုဒ္ဓ, ပဉ္စဟိ ဓမ္မေဟိ သမန္နာဂတော မာတုဂါမော။ပေ.။ နိရယံ ဥပပဇ္ဇတီ’’တိ။ ဒသမံ။

၁၁. အပ္ပဿုတသုတ္တံ

၂၉၀. ‘‘ပဉ္စဟိ, အနုရုဒ္ဓ, ဓမ္မေဟိ သမန္နာဂတော မာတုဂါမော။ပေ.။ နိရယံ ဥပပဇ္ဇတိ ။ ကတမေဟိ ပဉ္စဟိ? အဿဒ္ဓေါ စ ဟောတိ, အဟိရိကော စ ဟောတိ, အနောတ္တပ္ပီ စ ဟောတိ, အပ္ပဿုတော စ ဟောတိ, ဒုပ္ပညော စ ဟောတိ – ဣမေဟိ ခေါ, အနုရုဒ္ဓ, ပဉ္စဟိ ဓမ္မေဟိ သမန္နာဂတော မာတုဂါမော။ပေ.။ နိရယံ ဥပပဇ္ဇတီ’’တိ။ ဧကာဒသမံ။

၁၂. ကုသီတသုတ္တံ

၂၉၁. ‘‘ပဉ္စဟိ, အနုရုဒ္ဓ, ဓမ္မေဟိ သမန္နာဂတော မာတုဂါမော။ပေ.။ နိရယံ ဥပပဇ္ဇတိ။ ကတမေဟိ ပဉ္စဟိ? အဿဒ္ဓေါ စ ဟောတိ, အဟိရိကော စ ဟောတိ, အနောတ္တပ္ပီ စ ဟောတိ, ကုသီတော စ ဟောတိ, ဒုပ္ပညော စ ဟောတိ – ဣမေဟိ ခေါ, အနုရုဒ္ဓ, ပဉ္စဟိ ဓမ္မေဟိ သမန္နာဂတော မာတုဂါမော။ပေ.။ အပါယံ ဒုဂ္ဂတိံ ဝိနိပါတံ နိရယံ ဥပပဇ္ဇတီ’’တိ။ ဒွါဒသမံ။

၁၃. မုဋ္ဌဿတိသုတ္တံ

၂၉၂. ‘‘ပဉ္စဟိ , အနုရုဒ္ဓ, ဓမ္မေဟိ သမန္နာဂတော မာတုဂါမော။ပေ.။ နိရယံ ဥပပဇ္ဇတိ။ ကတမေဟိ ပဉ္စဟိ? အဿဒ္ဓေါ စ ဟောတိ, အဟိရိကော စ ဟောတိ, အနောတ္တပ္ပီ စ ဟောတိ, မုဋ္ဌဿတိ စ ဟောတိ, ဒုပ္ပညော စ ဟောတိ – ဣမေဟိ ခေါ, အနုရုဒ္ဓ, ပဉ္စဟိ ဓမ္မေဟိ သမန္နာဂတော မာတုဂါမော။ပေ.။ နိရယံ ဥပပဇ္ဇတီ’’တိ။ တေရသမံ။

၁၄. ပဉ္စဝေရသုတ္တံ

၂၉၃. ‘‘ပဉ္စဟိ, အနုရုဒ္ဓ, ဓမ္မေဟိ သမန္နာဂတော မာတုဂါမော။ပေ.။ နိရယံ ဥပပဇ္ဇတိ။ ကတမေဟိ ပဉ္စဟိ? ပါဏာတိပါတီ စ ဟောတိ, အဒိန္နာဒါယီ စ ဟောတိ, ကာမေသုမိစ္ဆာစာရီ စ ဟောတိ, မုသာဝါဒီ စ ဟောတိ, သုရာမေရယမဇ္ဇပ္ပမာဒဋ္ဌာယီ စ ဟောတိ – ဣမေဟိ ခေါ, အနုရုဒ္ဓ, ပဉ္စဟိ ဓမ္မေဟိ သမန္နာဂတော မာတုဂါမော ကာယဿ ဘေဒါ ပရံ မရဏာ အပါယံ ဒုဂ္ဂတိံ ဝိနိပါတံ နိရယံ ဥပပဇ္ဇတီ’’တိ။ စုဒ္ဒသမံ။

ပဌမပေယျာလဝဂ္ဂေါ။

တဿုဒ္ဒါနံ –

မာတုဂါမော ပုရိသော စ၊ အာဝေဏိကာ တိဓမ္မော စ [ဒွေ မနာပါမနာပါစ၊ အာဝေဏိကာ တီဟိ အနုရုဒ္ဓေါ (သဗ္ဗတ္ထ)]။

ကောဓနော ဥပနာဟီ စ၊ ဣဿုကီ မစ္ဆရေန စ။

အတိစာရီ စ ဒုဿီလော၊ အပ္ပဿုတော စ ကုသီတော။

မုဋ္ဌဿတိ ပဉ္စဝေရံ၊ ကဏှပက္ခေ ပကာသိတော။

၂. ဒုတိယပေယျာလဝဂ္ဂေါ

၁. အက္ကောဓနသုတ္တံ

၂၉၄. အထ ခေါ အာယသ္မာ အနုရုဒ္ဓေါ ယေန ဘဂဝါ တေနုပသင်္ကမိ; ဥပသင်္ကမိတွာ။ပေ.။ ဧကမန္တံ နိသိန္နော ခေါ အာယသ္မာ အနုရုဒ္ဓေါ ဘဂဝန္တံ ဧတဒဝေါစ – ‘‘ဣဓါဟံ, ဘန္တေ, မာတုဂါမံ ပဿာမိ ဒိဗ္ဗေန စက္ခုနာ ဝိသုဒ္ဓေန အတိက္ကန္တမာနုသကေန ကာယဿ ဘေဒါ ပရံ မရဏာ သုဂတိံ သဂ္ဂံ လောကံ ဥပပဇ္ဇန္တံ။ ကတီဟိ နု ခေါ, ဘန္တေ, ဓမ္မေဟိ သမန္နာဂတော မာတုဂါမော ကာယဿ ဘေဒါ ပရံ မရဏာ သုဂတိံ သဂ္ဂံ လောကံ ဥပပဇ္ဇတီ’’တိ?

‘‘ပဉ္စဟိ ခေါ, အနုရုဒ္ဓ, ဓမ္မေဟိ သမန္နာဂတော မာတုဂါမော ကာယဿ ဘေဒါ ပရံ မရဏာ သုဂတိံ သဂ္ဂံ လောကံ ဥပပဇ္ဇတိ။ ကတမေဟိ ပဉ္စဟိ? သဒ္ဓေါ စ ဟောတိ, ဟိရိမာ စ ဟောတိ, ဩတ္တပ္ပီ စ ဟောတိ, အက္ကောဓနော စ ဟောတိ, ပညဝါ စ ဟောတိ – ဣမေဟိ ခေါ, အနုရုဒ္ဓ, ပဉ္စဟိ ဓမ္မေဟိ သမန္နာဂတော မာတုဂါမော ကာယဿ ဘေဒါ ပရံ မရဏာ သုဂတိံ သဂ္ဂံ လောကံ ဥပပဇ္ဇတီ’’တိ။ ပဌမံ။

၂. အနုပနာဟီသုတ္တံ

၂၉၅. ‘‘ပဉ္စဟိ, အနုရုဒ္ဓ, ဓမ္မေဟိ သမန္နာဂတော မာတုဂါမော ကာယဿ ဘေဒါ ပရံ မရဏာ သုဂတိံ သဂ္ဂံ လောကံ ဥပပဇ္ဇတိ။ ကတမေဟိ ပဉ္စဟိ? သဒ္ဓေါ စ ဟောတိ, ဟိရိမာ စ ဟောတိ, ဩတ္တပ္ပီ စ ဟောတိ, အနုပနာဟီ စ ဟောတိ, ပညဝါ စ ဟောတိ – ဣမေဟိ ခေါ, အနုရုဒ္ဓ, ပဉ္စဟိ ဓမ္မေဟိ သမန္နာဂတော မာတုဂါမော ကာယဿ ဘေဒါ ပရံ မရဏာ သုဂတိံ သဂ္ဂံ လောကံ ဥပပဇ္ဇတီ’’တိ။ ဒုတိယံ။

၃. အနိဿုကီသုတ္တံ

၂၉၆. ‘‘ပဉ္စဟိ, အနုရုဒ္ဓ, ဓမ္မေဟိ သမန္နာဂတော မာတုဂါမော ကာယဿ ဘေဒါ ပရံ မရဏာ သုဂတိံ သဂ္ဂံ လောကံ ဥပပဇ္ဇတိ။ ကတမေဟိ ပဉ္စဟိ? သဒ္ဓေါ စ ဟောတိ, ဟိရိမာ စ ဟောတိ, ဩတ္တပ္ပီ စ ဟောတိ, အနိဿုကီ စ ဟောတိ, ပညဝါ စ ဟောတိ – ဣမေဟိ ခေါ, အနုရုဒ္ဓ, ပဉ္စဟိ ဓမ္မေဟိ သမန္နာဂတော မာတုဂါမော ကာယဿ ဘေဒါ ပရံ မရဏာ သုဂတိံ သဂ္ဂံ လောကံ ဥပပဇ္ဇတီ’’တိ။ တတိယံ။

၄. အမစ္ဆရီသုတ္တံ

၂၉၇. အမစ္ဆရီ စ ဟောတိ, ပညဝါ စ ဟောတိ။ပေ.။။ စတုတ္ထံ။

၅. အနတိစာရီသုတ္တံ

၂၉၈. အနတိစာရီ စ ဟောတိ, ပညဝါ စ ဟောတိ။ပေ.။။ ပဉ္စမံ။

၆. သုသီလသုတ္တံ

၂၉၉. သီလဝါ စ ဟောတိ, ပညဝါ စ ဟောတိ။ပေ.။။ ဆဋ္ဌံ။

၇. ဗဟုဿုတသုတ္တံ

၃၀၀. ဗဟုဿုတော စ ဟောတိ, ပညဝါ စ ဟောတိ။ပေ.။။ သတ္တမံ။

၈. အာရဒ္ဓဝီရိယသုတ္တံ

၃၀၁. အာရဒ္ဓဝီရိယော စ ဟောတိ, ပညဝါ စ ဟောတိ။ပေ.။။ အဋ္ဌမံ။

၉. ဥပဋ္ဌိတဿတိသုတ္တံ

၃၀၂. ‘‘ဥပဋ္ဌိတဿတိ စ ဟောတိ, ပညဝါ စ ဟောတိ – ဣမေဟိ ခေါ, အနုရုဒ္ဓ, ပဉ္စဟိ ဓမ္မေဟိ သမန္နာဂတော မာတုဂါမော ကာယဿ ဘေဒါ ပရံ မရဏာ သုဂတိံ သဂ္ဂံ လောကံ ဥပပဇ္ဇတီ’’တိ။ နဝမံ။

ဣမေ အဋ္ဌ သုတ္တန္တသင်္ခေပါ။

၁၀. ပဉ္စသီလသုတ္တံ

၃၀၃. ‘‘ပဉ္စဟိ, အနုရုဒ္ဓ, ဓမ္မေဟိ သမန္နာဂတော မာတုဂါမော ကာယဿ ဘေဒါ ပရံ မရဏာ သုဂတိံ သဂ္ဂံ လောကံ ဥပပဇ္ဇတိ။ ကတမေဟိ ပဉ္စဟိ? ပါဏာတိပါတာ ပဋိဝိရတော စ ဟောတိ, အဒိန္နာဒါနာ ပဋိဝိရတော စ ဟောတိ, ကာမေသုမိစ္ဆာစာရာ ပဋိဝိရတော စ ဟောတိ, မုသာဝါဒါ ပဋိဝိရတော စ ဟောတိ, သုရာမေရယမဇ္ဇပ္ပမာဒဋ္ဌာနာ ပဋိဝိရတော စ ဟောတိ – ဣမေဟိ ခေါ, အနုရုဒ္ဓ, ပဉ္စဟိ ဓမ္မေဟိ သမန္နာဂတော မာတုဂါမော ကာယဿ ဘေဒါ ပရံ မရဏာ သုဂတိံ သဂ္ဂံ လောကံ ဥပပဇ္ဇတီ’’တိ။ ဒသမံ။

ဒုတိယပေယျာလဝဂ္ဂေါ။

တဿုဒ္ဒါနံ –

ဒုတိယေ စ [အနုရုဒ္ဓေါ (သဗ္ဗတ္ထ)] အက္ကောဓနော၊ အနုပနာဟီ အနိဿုကီ။

အမစ္ဆရီ အနတိစာရီ၊ သီလဝါ စ ဗဟုဿုတော။

ဝီရိယံ သတိ သီလဉ္စ၊ သုက္ကပက္ခေ ပကာသိတော။

၃. ဗလဝဂ္ဂေါ

၁. ဝိသာရဒသုတ္တံ

၃၀၄. ‘‘ပဉ္စိမာနိ , ဘိက္ခဝေ, မာတုဂါမဿ ဗလာနိ။ ကတမာနိ ပဉ္စ? ရူပဗလံ, ဘောဂဗလံ, ဉာတိဗလံ, ပုတ္တဗလံ, သီလဗလံ – ဣမာနိ ခေါ, ဘိက္ခဝေ, ပဉ္စ မာတုဂါမဿ ဗလာနိ။ ဣမေဟိ ခေါ, ဘိက္ခဝေ, ပဉ္စဟိ ဗလေဟိ သမန္နာဂတော မာတုဂါမော ဝိသာရဒေါ အဂါရံ အဇ္ဈာဝသတီ’’တိ။ ပဌမံ။

၂. ပသယှသုတ္တံ

၃၀၅. ‘‘ပဉ္စိမာနိ, ဘိက္ခဝေ, မာတုဂါမဿ ဗလာနိ။ ကတမာနိ ပဉ္စ? ရူပဗလံ, ဘောဂဗလံ, ဉာတိဗလံ, ပုတ္တဗလံ, သီလဗလံ – ဣမာနိ ခေါ, ဘိက္ခဝေ, ပဉ္စ မာတုဂါမဿ ဗလာနိ။ ဣမေဟိ ခေါ, ဘိက္ခဝေ, ပဉ္စဟိ ဗလေဟိ သမန္နာဂတော မာတုဂါမော သာမိကံ ပသယှ အဂါရံ အဇ္ဈာဝသတီ’’တိ။ ဒုတိယံ။

၃. အဘိဘုယျသုတ္တံ

၃၀၆. ‘‘ပဉ္စိမာနိ, ဘိက္ခဝေ, မာတုဂါမဿ ဗလာနိ။ ကတမာနိ ပဉ္စ? ရူပဗလံ, ဘောဂဗလံ, ဉာတိဗလံ, ပုတ္တဗလံ, သီလဗလံ – ဣမာနိ ခေါ, ဘိက္ခဝေ, ပဉ္စ မာတုဂါမဿ ဗလာနိ။ ဣမေဟိ ခေါ, ဘိက္ခဝေ, ပဉ္စဟိ ဗလေဟိ သမန္နာဂတော မာတုဂါမော သာမိကံ အဘိဘုယျ ဝတ္တတီ’’တိ။ တတိယံ။

၄. ဧကသုတ္တံ

၃၀၇. ‘‘ဧကေန စ ခေါ, ဘိက္ခဝေ, ဗလေန သမန္နာဂတော ပုရိသော မာတုဂါမံ အဘိဘုယျ ဝတ္တတိ။ ကတမေန ဧကေန ဗလေန? ဣဿရိယဗလေန အဘိဘူတံ မာတုဂါမံ နေဝ ရူပဗလံ တာယတိ, န ဘောဂဗလံ တာယတိ, န ဉာတိဗလံ တာယတိ, န ပုတ္တဗလံ တာယတိ, န သီလဗလံ တာယတီ’’တိ။ စတုတ္ထံ။

၅. အင်္ဂသုတ္တံ

၃၀၈. ‘‘ပဉ္စိမာနိ , ဘိက္ခဝေ, မာတုဂါမဿ ဗလာနိ။ ကတမာနိ ပဉ္စ? ရူပဗလံ, ဘောဂဗလံ, ဉာတိဗလံ, ပုတ္တဗလံ, သီလဗလံ။ ရူပဗလေန စ, ဘိက္ခဝေ, မာတုဂါမော သမန္နာဂတော ဟောတိ, န စ ဘောဂဗလေန – ဧဝံ သော တေနင်္ဂေန အပရိပူရော ဟောတိ။ ယတော စ ခေါ, ဘိက္ခဝေ, မာတုဂါမော ရူပဗလေန စ သမန္နာဂတော ဟောတိ, ဘောဂဗလေန စ – ဧဝံ သော တေနင်္ဂေန ပရိပူရော ဟောတိ။ ရူပဗလေန စ, ဘိက္ခဝေ, မာတုဂါမော သမန္နာဂတော ဟောတိ, ဘောဂဗလေန စ, န စ ဉာတိဗလေန – ဧဝံ သော တေနင်္ဂေန အပရိပူရော ဟောတိ။ ယတော စ ခေါ, ဘိက္ခဝေ, မာတုဂါမော ရူပဗလေန စ သမန္နာဂတော ဟောတိ, ဘောဂဗလေန စ, ဉာတိဗလေန စ – ဧဝံ သော တေနင်္ဂေန ပရိပူရော ဟောတိ။ ရူပဗလေန စ, ဘိက္ခဝေ, မာတုဂါမော သမန္နာဂတော ဟောတိ, ဘောဂဗလေန စ, ဉာတိဗလေန စ, န စ ပုတ္တဗလေန – ဧဝံ သော တေနင်္ဂေန အပရိပူရော ဟောတိ။ ယတော စ ခေါ, ဘိက္ခဝေ, မာတုဂါမော ရူပဗလေန စ သမန္နာဂတော ဟောတိ, ဘောဂဗလေန စ, ဉာတိဗလေန စ, ပုတ္တဗလေန စ – ဧဝံ သော တေနင်္ဂေန ပရိပူရော ဟောတိ။ ရူပဗလေန စ, ဘိက္ခဝေ, မာတုဂါမော သမန္နာဂတော ဟောတိ, ဘောဂဗလေန စ, ဉာတိဗလေန စ, ပုတ္တဗလေန စ, န စ သီလဗလေန – ဧဝံ သော တေနင်္ဂေန အပရိပူရော ဟောတိ။ ယတော စ ခေါ, ဘိက္ခဝေ, မာတုဂါမော ရူပဗလေန စ သမန္နာဂတော ဟောတိ, ဘောဂဗလေန စ, ဉာတိဗလေန စ, ပုတ္တဗလေန စ, သီလဗလေန စ – ဧဝံ သော တေနင်္ဂေန ပရိပူရော ဟောတိ။ ဣမာနိ ခေါ , ဘိက္ခဝေ, ပဉ္စ မာတုဂါမဿ ဗလာနီ’’တိ။ ပဉ္စမံ။

၆. နာသေန္တိသုတ္တံ

၃၀၉. ‘‘ပဉ္စိမာနိ, ဘိက္ခဝေ, မာတုဂါမဿ ဗလာနိ။ ကတမာနိ ပဉ္စ? ရူပဗလံ, ဘောဂဗလံ, ဉာတိဗလံ, ပုတ္တဗလံ, သီလဗလံ။ ရူပဗလေန စ, ဘိက္ခဝေ, မာတုဂါမော သမန္နာဂတော ဟောတိ, န စ သီလဗလေန, နာသေန္တေဝ နံ, ကုလေ န ဝါသေန္တိ။ ရူပဗလေန စ, ဘိက္ခဝေ, မာတုဂါမော သမန္နာဂတော ဟောတိ, ဘောဂဗလေန စ, န စ သီလဗလေန, နာသေန္တေဝ နံ, ကုလေ န ဝါသေန္တိ။ ရူပဗလေန စ, ဘိက္ခဝေ, မာတုဂါမော သမန္နာဂတော ဟောတိ, ဘောဂဗလေန စ, ဉာတိဗလေန စ, န စ သီလဗလေန, နာသေန္တေဝ နံ, ကုလေ န ဝါသေန္တိ။ ရူပဗလေန စ, ဘိက္ခဝေ, မာတုဂါမော သမန္နာဂတော ဟောတိ, ဘောဂဗလေန စ, ဉာတိဗလေန စ , ပုတ္တဗလေန စ, န စ သီလဗလေန, နာသေန္တေဝ နံ, ကုလေ န ဝါသေန္တိ။ သီလဗလေန စ, ဘိက္ခဝေ, မာတုဂါမော သမန္နာဂတော ဟောတိ, န စ ရူပဗလေန, ဝါသေန္တေဝ နံ, ကုလေ န နာသေန္တိ။ သီလဗလေန စ, ဘိက္ခဝေ, မာတုဂါမော သမန္နာဂတော ဟောတိ, န စ ဘောဂဗလေန, ဝါသေန္တေဝ နံ, ကုလေ န နာသေန္တိ။ သီလဗလေန စ, ဘိက္ခဝေ, မာတုဂါမော သမန္နာဂတော ဟောတိ, န စ ဉာတိဗလေန, ဝါသေန္တေဝ နံ, ကုလေ န နာသေန္တိ။ သီလဗလေန စ, ဘိက္ခဝေ, မာတုဂါမော သမန္နာဂတော ဟောတိ, န စ ပုတ္တဗလေန, ဝါသေန္တေဝ နံ, ကုလေ န နာသေန္တိ။ ဣမာနိ ခေါ, ဘိက္ခဝေ, ပဉ္စ မာတုဂါမဿ ဗလာနီ’’တိ။ ဆဋ္ဌံ။

၇. ဟေတုသုတ္တံ

၃၁၀. ‘‘ပဉ္စိမာနိ , ဘိက္ခဝေ, မာတုဂါမဿ ဗလာနိ။ ကတမာနိ ပဉ္စ? ရူပဗလံ, ဘောဂဗလံ, ဉာတိဗလံ, ပုတ္တဗလံ, သီလဗလံ။ န, ဘိက္ခဝေ, မာတုဂါမော ရူပဗလဟေတု ဝါ ဘောဂဗလဟေတု ဝါ ဉာတိဗလဟေတု ဝါ ပုတ္တဗလဟေတု ဝါ ကာယဿ ဘေဒါ ပရံ မရဏာ သုဂတိံ သဂ္ဂံ လောကံ ဥပပဇ္ဇတိ။ သီလဗလဟေတု ခေါ, ဘိက္ခဝေ, မာတုဂါမော ကာယဿ ဘေဒါ ပရံ မရဏာ သုဂတိံ သဂ္ဂံ လောကံ ဥပပဇ္ဇတိ။ ဣမာနိ ခေါ, ဘိက္ခဝေ, ပဉ္စ မာတုဂါမဿ ဗလာနီ’’တိ။ သတ္တမံ။

၈. ဌာနသုတ္တံ

၃၁၁. ‘‘ပဉ္စိမာနိ , ဘိက္ခဝေ, ဌာနာနိ ဒုလ္လဘာနိ အကတပုညေန မာတုဂါမေန။ ကတမာနိ ပဉ္စ? ပတိရူပေ ကုလေ ဇာယေယျန္တိ – ဣဒံ, ဘိက္ခဝေ, ပဌမံ ဌာနံ ဒုလ္လဘံ အကတပုညေန မာတုဂါမေန။ ပတိရူပေ ကုလေ ဇာယိတွာ ပတိရူပံ ကုလံ ဂစ္ဆေယျန္တိ – ဣဒံ, ဘိက္ခဝေ, ဒုတိယံ ဌာနံ ဒုလ္လဘံ အကတပုညေန မာတုဂါမေန။ ပတိရူပေ ကုလေ ဇာယိတွာ, ပတိရူပံ ကုလံ ဂန္တွာ, အသပတ္တိ အဂါရံ အဇ္ဈာဝသေယျန္တိ – ဣဒံ, ဘိက္ခဝေ, တတိယံ ဌာနံ ဒုလ္လဘံ အကတပုညေန မာတုဂါမေန။ ပတိရူပေ ကုလေ ဇာယိတွာ, ပတိရူပံ ကုလံ ဂန္တွာ, အသပတ္တိ အဂါရံ အဇ္ဈာဝသန္တီ ပုတ္တဝတီ အဿန္တိ – ဣဒံ, ဘိက္ခဝေ, စတုတ္ထံ ဌာနံ ဒုလ္လဘံ အကတပုညေန မာတုဂါမေန။ ပတိရူပေ ကုလေ ဇာယိတွာ, ပတိရူပံ ကုလံ ဂန္တွာ, အသပတ္တိ အဂါရံ အဇ္ဈာဝသန္တီ ပုတ္တဝတီ သမာနာ သာမိကံ အဘိဘုယျ ဝတ္တေယျန္တိ – ဣဒံ, ဘိက္ခဝေ, ပဉ္စမံ ဌာနံ ဒုလ္လဘံ အကတပုညေန မာတုဂါမေန ။ ဣမာနိ ခေါ, ဘိက္ခဝေ, ပဉ္စ ဌာနာနိ ဒုလ္လဘာနိ အကတပုညေန မာတုဂါမေနာတိ။

‘‘ပဉ္စိမာနိ, ဘိက္ခဝေ, ဌာနာနိ သုလဘာနိ ကတပုညေန မာတုဂါမေန။ ကတမာနိ ပဉ္စ? ပတိရူပေ ကုလေ ဇာယေယျန္တိ – ဣဒံ, ဘိက္ခဝေ, ပဌမံ ဌာနံ သုလဘံ ကတပုညေန မာတုဂါမေန။ ပတိရူပေ ကုလေ ဇာယိတွာ ပတိရူပံ ကုလံ ဂစ္ဆေယျန္တိ – ဣဒံ, ဘိက္ခဝေ, ဒုတိယံ ဌာနံ သုလဘံ ကတပုညေန မာတုဂါမေန။ ပတိရူပေ ကုလေ ဇာယိတွာ ပတိရူပံ ကုလံ ဂန္တွာ အသပတ္တိ အဂါရံ အဇ္ဈာဝသေယျန္တိ – ဣဒံ, ဘိက္ခဝေ, တတိယံ ဌာနံ သုလဘံ ကတပုညေန မာတုဂါမေန။ ပတိရူပေ ကုလေ ဇာယိတွာ ပတိရူပံ ကုလံ ဂန္တွာ အသပတ္တိ အဂါရံ အဇ္ဈာဝသန္တီ ပုတ္တဝတီ အဿန္တိ – ဣဒံ, ဘိက္ခဝေ, စတုတ္ထံ ဌာနံ သုလဘံ ကတပုညေန မာတုဂါမေန။ ပတိရူပေ ကုလေ ဇာယိတွာ ပတိရူပံ ကုလံ ဂန္တွာ အသပတ္တိ အဂါရံ အဇ္ဈာဝသန္တီ ပုတ္တဝတီ သမာနာ သာမိကံ အဘိဘုယျ ဝတ္တေယျန္တိ – ဣဒံ, ဘိက္ခဝေ, ပဉ္စမံ ဌာနံ သုလဘံ ကတပုညေန မာတုဂါမေန။ ဣမာနိ ခေါ, ဘိက္ခဝေ, ပဉ္စ ဌာနာနိ သုလဘာနိ ကတပုညေန မာတုဂါမေနာ’’တိ။ အဋ္ဌမံ။

၉. ပဉ္စသီလဝိသာရဒသုတ္တံ

၃၁၂. ‘‘ပဉ္စဟိ, ဘိက္ခဝေ, ဓမ္မေဟိ သမန္နာဂတော မာတုဂါမော ဝိသာရဒေါ အဂါရံ အဇ္ဈာဝသတိ။ ကတမေဟိ ပဉ္စဟိ? ပါဏာတိပါတာ ပဋိဝိရတော စ ဟောတိ, အဒိန္နာဒါနာ ပဋိဝိရတော စ ဟောတိ, ကာမေသုမိစ္ဆာစာရာ ပဋိဝိရတော စ ဟောတိ, မုသာဝါဒါ ပဋိဝိရတော စ ဟောတိ , သုရာမေရယမဇ္ဇပ္ပမာဒဋ္ဌာနာ ပဋိဝိရတော စ ဟောတိ – ဣမေဟိ ခေါ, ဘိက္ခဝေ, ပဉ္စဟိ ဓမ္မေဟိ သမန္နာဂတော မာတုဂါမော ဝိသာရဒေါ အဂါရံ အဇ္ဈာဝသတီ’’တိ။ နဝမံ။

၁၀. ဝဍ္ဎီသုတ္တံ

၃၁၃. ‘‘ပဉ္စဟိ, ဘိက္ခဝေ, ဝဍ္ဎီဟိ ဝဍ္ဎမာနာ အရိယသာဝိကာ အရိယာယ ဝဍ္ဎိယာ ဝဍ္ဎတိ သာရာဒါယိနီ စ ဟောတိ ဝရာဒါယိနီ စ ကာယဿ။ ကတမေဟိ ပဉ္စဟိ? သဒ္ဓါယ ဝဍ္ဎတိ, သီလေန ဝဍ္ဎတိ, သုတေန ဝဍ္ဎတိ, စာဂေန ဝဍ္ဎတိ, ပညာယ ဝဍ္ဎတိ – ဣမေဟိ ခေါ, ဘိက္ခဝေ, ပဉ္စဟိ ဝဍ္ဎီဟိ ဝဍ္ဎမာနာ အရိယသာဝိကာ အရိယာယ ဝဍ္ဎိယာ ဝဍ္ဎတိ, သာရာဒါယိနီ စ ဟောတိ, ဝရာဒါယိနီ စ ကာယဿာ’’တိ။

‘‘သဒ္ဓါယ သီလေန စ ယာဓ ဝဍ္ဎတိ၊

ပညာယ စာဂေန သုတေန စူဘယံ။

သာ တာဒိသီ သီလဝတီ ဥပါသိကာ၊

အာဒီယတိ သာရမိဓေဝ အတ္တနော’’တိ။ ဒသမံ။

ဗလဝဂ္ဂေါ တတိယော။

တဿုဒ္ဒါနံ –

ဝိသာရဒါ ပသယှ အဘိဘုယျ၊ ဧကံ အင်္ဂေန ပဉ္စမံ။

နာသေန္တိ ဟေတု ဌာနဉ္စ၊ ဝိသာရဒေါ ဝဍ္ဎိနာ ဒသာတိ။

မာတုဂါမသံယုတ္တံ သမတ္တံ။