၆. ကိလေသသံယုတ္တံ
၁. စက္ခုသုတ္တံ
၃၂၂. သာဝတ္ထိနိဒါနံ ။ ‘‘ယော, ဘိက္ခဝေ, စက္ခုသ္မိံ ဆန္ဒရာဂေါ, စိတ္တဿေသော ဥပက္ကိလေသော။ ယော သောတသ္မိံ ဆန္ဒရာဂေါ, စိတ္တဿေသော ဥပက္ကိလေသော။ ယော ဃာနသ္မိံ ဆန္ဒရာဂေါ, စိတ္တဿေသော ဥပက္ကိလေသော။ ယော ဇိဝှာယ ဆန္ဒရာဂေါ, စိတ္တဿေသော ဥပက္ကိလေသော။ ယော ကာယသ္မိံ ဆန္ဒရာဂေါ, စိတ္တဿေသော ဥပက္ကိလေသော။ ယော မနသ္မိံ ဆန္ဒရာဂေါ, စိတ္တဿေသော ဥပက္ကိလေသော။ ယတော ခေါ, ဘိက္ခဝေ, ဘိက္ခုနော ဣမေသု ဆသု ဌာနေသု စေတသော ဥပက္ကိလေသော ပဟီနော ဟောတိ, နေက္ခမ္မနိန္နဉ္စဿ စိတ္တံ ဟောတိ။ နေက္ခမ္မပရိဘာဝိတံ စိတ္တံ ကမ္မနိယံ ခါယတိ, အဘိညာ သစ္ဆိကရဏီယေသု ဓမ္မေသူ’’တိ။ ပဌမံ။
၂. ရူပသုတ္တံ
၃၂၃. သာဝတ္ထိနိဒါနံ။ ‘‘ယော, ဘိက္ခဝေ, ရူပေသု ဆန္ဒရာဂေါ, စိတ္တဿေသော ဥပက္ကိလေသော။ ယော သဒ္ဒေသု။ ယော ဂန္ဓေသု။ ယော ရသေသု။ ယော ဖောဋ္ဌဗ္ဗေသု။ ယော ဓမ္မေသု ဆန္ဒရာဂေါ, စိတ္တဿေသော ဥပက္ကိလေသော။ ယတော ခေါ, ဘိက္ခဝေ, ဘိက္ခုနော ဣမေသု ဆသု ဌာနေသု စေတသော ဥပက္ကိလေသော ပဟီနော ဟောတိ, နေက္ခမ္မနိန္နဉ္စဿ စိတ္တံ ဟောတိ။ နေက္ခမ္မပရိဘာဝိတံ စိတ္တံ ကမ္မနိယံ ခါယတိ, အဘိညာ သစ္ဆိကရဏီယေသု ဓမ္မေသူ’’တိ။ ဒုတိယံ။
၃. ဝိညာဏသုတ္တံ
၃၂၄. သာဝတ္ထိနိဒါနံ။ ‘‘ယော, ဘိက္ခဝေ, စက္ခုဝိညာဏသ္မိံ ဆန္ဒရာဂေါ, စိတ္တဿေသော ဥပက္ကိလေသော။ ယော သောတဝိညာဏသ္မိံ။ ယော ဃာနဝိညာဏသ္မိံ။ ယော ဇိဝှာဝိညာဏသ္မိံ။ ယော ကာယဝိညာဏသ္မိံ။ ယော မနောဝိညာဏသ္မိံ ဆန္ဒရာဂေါ, စိတ္တဿေသော ဥပက္ကိလေသော။ ယတော ခေါ , ဘိက္ခဝေ, ဘိက္ခုနော ဣမေသု ဆသု ဌာနေသု စေတသော ဥပက္ကိလေသော ပဟီနော ဟောတိ, နေက္ခမ္မနိန္နဉ္စဿ စိတ္တံ ဟောတိ။ နေက္ခမ္မပရိဘာဝိတံ စိတ္တံ ကမ္မနိယံ ခါယတိ, အဘိညာ သစ္ဆိကရဏီယေသု ဓမ္မေသူ’’တိ။ တတိယံ။
၄. သမ္ဖဿသုတ္တံ
၃၂၅. သာဝတ္ထိနိဒါနံ ။ ‘‘ယော, ဘိက္ခဝေ, စက္ခုသမ္ဖဿသ္မိံ ဆန္ဒရာဂေါ, စိတ္တဿေသော ဥပက္ကိလေသော။ ယော သောတသမ္ဖဿသ္မိံ။ ယော ဃာနသမ္ဖဿသ္မိံ။ ယော ဇိဝှာသမ္ဖဿသ္မိံ။ ယော ကာယသမ္ဖဿသ္မိံ။ ယော မနောသမ္ဖဿသ္မိံ ဆန္ဒရာဂေါ, စိတ္တဿေသော ဥပက္ကိလေသော။ ယတော ခေါ, ဘိက္ခဝေ, ဘိက္ခုနော။ပေ.။ အဘိညာ သစ္ဆိကရဏီယေသု ဓမ္မေသူ’’တိ။ စတုတ္ထံ။
၅. သမ္ဖဿဇသုတ္တံ
၃၂၆. သာဝတ္ထိနိဒါနံ။ ‘‘ယော, ဘိက္ခဝေ, စက္ခုသမ္ဖဿဇာယ ဝေဒနာယ ဆန္ဒရာဂေါ, စိတ္တဿေသော ဥပက္ကိလေသော။ ယော သောတသမ္ဖဿဇာယ ဝေဒနာယ။ ယော ဃာနသမ္ဖဿဇာယ ဝေဒနာယ။ ယော ဇိဝှာသမ္ဖဿဇာယ ဝေဒနာယ။ ယော ကာယသမ္ဖဿဇာယ ဝေဒနာယ။ ယော မနောသမ္ဖဿဇာယ ဝေဒနာယ ဆန္ဒရာဂေါ, စိတ္တဿေသော ဥပက္ကိလေသော။ ယတော ခေါ, ဘိက္ခဝေ, ဘိက္ခုနော။ပေ.။ အဘိညာ သစ္ဆိကရဏီယေသု ဓမ္မေသူ’’တိ။ ပဉ္စမံ။
၆. သညာသုတ္တံ
၃၂၇. သာဝတ္ထိနိဒါနံ။ ‘‘ယော, ဘိက္ခဝေ, ရူပသညာယ ဆန္ဒရာဂေါ, စိတ္တဿေသော ဥပက္ကိလေသော။ ယော သဒ္ဒသညာယ။ ယော ဂန္ဓသညာယ။ ယော ရသသညာယ။ ယော ဖောဋ္ဌဗ္ဗသညာယ။ ယော ဓမ္မသညာယ ဆန္ဒရာဂေါ, စိတ္တဿေသော ဥပက္ကိလေသော ။ ယတော ခေါ, ဘိက္ခဝေ, ဘိက္ခုနော။ပေ.။ အဘိညာ သစ္ဆိကရဏီယေသု ဓမ္မေသူ’’တိ။ ဆဋ္ဌံ။
၇. သဉ္စေတနာသုတ္တံ
၃၂၈. သာဝတ္ထိနိဒါနံ။ ‘‘ယော, ဘိက္ခဝေ, ရူပသဉ္စေတနာယ ဆန္ဒရာဂေါ, စိတ္တဿေသော ဥပက္ကိလေသော။ ယော သဒ္ဒသဉ္စေတနာယ။ ယော ဂန္ဓသဉ္စေတနာယ။ ယော ရသသဉ္စေတနာယ။ ယော ဖောဋ္ဌဗ္ဗသဉ္စေတနာယ။ ယော ဓမ္မသဉ္စေတနာယ ဆန္ဒရာဂေါ, စိတ္တဿေသော ဥပက္ကိလေသော။ ယတော ခေါ, ဘိက္ခဝေ, ဘိက္ခုနော။ပေ.။ အဘိညာ သစ္ဆိကရဏီယေသု ဓမ္မေသူ’’တိ။ သတ္တမံ။
၈. တဏှာသုတ္တံ
၃၂၉. သာဝတ္ထိနိဒါနံ ။ ‘‘ယော, ဘိက္ခဝေ, ရူပတဏှာယ ဆန္ဒရာဂေါ, စိတ္တဿေသော ဥပက္ကိလေသော။ ယော သဒ္ဒတဏှာယ။ ယော ဂန္ဓတဏှာယ။ ယော ရသတဏှာယ။ ယော ဖောဋ္ဌဗ္ဗတဏှာယ။ ယော ဓမ္မတဏှာယ ဆန္ဒရာဂေါ , စိတ္တဿေသော ဥပက္ကိလေသော။ ယတော ခေါ, ဘိက္ခဝေ, ဘိက္ခုနော။ပေ.။ အဘိညာ သစ္ဆိကရဏီယေသု ဓမ္မေသူ’’တိ။ အဋ္ဌမံ။
၉. ဓါတုသုတ္တံ
၃၃၀. သာဝတ္ထိနိဒါနံ။ ‘‘ယော, ဘိက္ခဝေ, ပထဝီဓါတုယာ ဆန္ဒရာဂေါ, စိတ္တဿေသော ဥပက္ကိလေသော။ ယော အာပေါဓါတုယာ။ ယော တေဇောဓါတုယာ။ ယော ဝါယောဓါတုယာ။ ယော အာကာသဓါတုယာ။ ယော ဝိညာဏဓါတုယာ ဆန္ဒရာဂေါ, စိတ္တဿေသော ဥပက္ကိလေသော။ ယတော ခေါ, ဘိက္ခဝေ, ဘိက္ခုနော ဣမေသု ဆသု ဌာနေသု စေတသော ဥပက္ကိလေသော ပဟီနော ဟောတိ, နေက္ခမ္မနိန္နဉ္စဿ စိတ္တံ ဟောတိ။ နေက္ခမ္မပရိဘာဝိတံ စိတ္တံ ကမ္မနိယံ ခါယတိ, အဘိညာ သစ္ဆိကရဏီယေသု ဓမ္မေသူ’’တိ။ နဝမံ။
၁၀. ခန္ဓသုတ္တံ
၃၃၁. သာဝတ္ထိနိဒါနံ။ ‘‘ယော, ဘိက္ခဝေ, ရူပသ္မိံ ဆန္ဒရာဂေါ, စိတ္တဿေသော ဥပက္ကိလေသော။ပေ.။ ယော ဝိညာဏသ္မိံ ဆန္ဒရာဂေါ, စိတ္တဿေသော ဥပက္ကိလေသော။ ယတော ခေါ, ဘိက္ခဝေ, ဘိက္ခုနော ဣမေသု ပဉ္စသု ဌာနေသု စေတသော ဥပက္ကိလေသော ပဟီနော ဟောတိ, နေက္ခမ္မနိန္နဉ္စဿ စိတ္တံ ဟောတိ။ နေက္ခမ္မပရိဘာဝိတံ စိတ္တံ ကမ္မနိယံ ခါယတိ, အဘိညာ သစ္ဆိကရဏီယေသု ဓမ္မေသူ’’တိ။ ဒသမံ။
ကိလေသသံယုတ္တံ သမတ္တံ။
တဿုဒ္ဒါနံ –
စက္ခု ရူပဉ္စ ဝိညာဏံ၊ ဖဿော စ ဝေဒနာယ စ။
သညာ စ စေတနာ တဏှာ၊ ဓါတု ခန္ဓေန တေ ဒသာတိ။