ရာဟုလသံယုတ္တံ

၇. ရာဟုလသံယုတ္တံ

၁. ပဌမဝဂ္ဂေါ

၁. စက္ခုသုတ္တံ

၁၈၈. ဧဝံ မေ သုတံ – ဧကံ သမယံ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ အထ ခေါ အာယသ္မာ ရာဟုလော ယေန ဘဂဝါ တေနုပသင်္ကမိ; ဥပသင်္ကမိတွာ ဘဂဝန္တံ အဘိဝါဒေတွာ ဧကမန္တံ နိသီဒိ။ ဧကမန္တံ နိသိန္နော ခေါ အာယသ္မာ ရာဟုလော ဘဂဝန္တံ ဧတဒဝေါစ – ‘‘သာဓု မေ, ဘန္တေ, ဘဂဝါ သံခိတ္တေန ဓမ္မံ ဒေသေတု, ယမဟံ ဘဂဝတော ဓမ္မံ သုတွာ ဧကော ဝူပကဋ္ဌော အပ္ပမတ္တော အာတာဣ ပဟိတတ္တော ဝိဟရေယျ’’န္တိ။

‘‘တံ ကိံ မညသိ, ရာဟုလ, စက္ခုံ နိစ္စံ ဝါ အနိစ္စံ ဝါ’’တိ? ‘‘အနိစ္စံ, ဘန္တေ’’။ ‘‘ယံ ပနာနိစ္စံ ဒုက္ခံ ဝါ တံ သုခံ ဝါ’’တိ? ‘‘ဒုက္ခံ, ဘန္တေ’’။ ‘‘ယံ ပနာနိစ္စံ ဒုက္ခံ ဝိပရိဏာမဓမ္မံ, ကလ္လံ နု တံ သမနုပဿိတုံ – ‘ဧတံ မမ, ဧသောဟမသ္မိ, ဧသော မေ အတ္တာ’’’တိ? ‘‘နော ဟေတံ, ဘန္တေ’’။ ‘‘သောတံ နိစ္စံ ဝါ အနိစ္စံ ဝါ’’တိ? ‘‘အနိစ္စံ, ဘန္တေ’’။ပေ.။။ ‘‘ဃာနံ နိစ္စံ ဝါ အနိစ္စံ ဝါ’’တိ? ‘‘အနိစ္စံ, ဘန္တေ’’။ပေ.။ ‘‘ဇိဝှာ နိစ္စာ ဝါ အနိစ္စာ ဝါ’’တိ? ‘‘အနိစ္စာ, ဘန္တေ’’။ပေ.။ ‘‘ကာယော နိစ္စော ဝါ အနိစ္စော ဝါ’’တိ? ‘‘အနိစ္စော, ဘန္တေ’’ ။ပေ.။ ‘‘မနော နိစ္စော ဝါ အနိစ္စော ဝါ’’တိ? ‘‘အနိစ္စော, ဘန္တေ’’။ ‘‘ယံ ပနာနိစ္စံ ဒုက္ခံ ဝါ တံ သုခံ ဝါ’’တိ? ‘‘ဒုက္ခံ, ဘန္တေ’’။ ‘‘ယံ ပနာနိစ္စံ ဒုက္ခံ ဝိပရိဏာမဓမ္မံ, ကလ္လံ နု တံ သမနုပဿိတုံ – ‘ဧတံ မမ, ဧသောဟမသ္မိ, ဧသော မေ အတ္တာ’’’တိ? ‘‘နော ဟေတံ, ဘန္တေ’’။

‘‘ဧဝံ ပဿံ, ရာဟုလ, သုတဝါ အရိယသာဝကော စက္ခုသ္မိမ္ပိ နိဗ္ဗိန္ဒတိ ။ပေ.။ သောတသ္မိမ္ပိ နိဗ္ဗိန္ဒတိ။ ဃာနသ္မိမ္ပိ နိဗ္ဗိန္ဒတိ။ ဇိဝှာယပိ နိဗ္ဗိန္ဒတိ။ ကာယသ္မိမ္ပိ နိဗ္ဗိန္ဒတိ။ မနသ္မိမ္ပိ နိဗ္ဗိန္ဒတိ; နိဗ္ဗိန္ဒံ ဝိရဇ္ဇတိ; ဝိရာဂါ ဝိမုစ္စတိ; ဝိမုတ္တသ္မိံ ဝိမုတ္တမိတိ ဉာဏံ ဟောတိ။ ‘ခီဏာ ဇာတိ, ဝုသိတံ ဗြဟ္မစရိယံ, ကတံ ကရဏီယံ, နာပရံ ဣတ္ထတ္တာယာ’တိ ပဇာနာတီ’’တိ။ ပဌမံ။

၂. ရူပသုတ္တံ

၁၈၉. သာဝတ္ထိယံ ဝိဟရတိ။ပေ.။ ‘‘တံ ကိံ မညသိ, ရာဟုလ, ရူပါ နိစ္စာ ဝါ အနိစ္စာ ဝါ’’တိ? ‘‘အနိစ္စာ , ဘန္တေ’’။ပေ.။ သဒ္ဒါ။ ဂန္ဓာ။ ရသာ။ ဖောဋ္ဌဗ္ဗာ။ ဓမ္မာ နိစ္စာ ဝါ အနိစ္စာ ဝါတိ? ‘‘အနိစ္စာ, ဘန္တေ’’။ပေ.။ ‘‘ဧဝံ ပဿံ, ရာဟုလ, သုတဝါ အရိယသာဝကော ရူပေသုပိ နိဗ္ဗိန္ဒတိ။ သဒ္ဒေသုပိ နိဗ္ဗိန္ဒတိ။ ဂန္ဓေသုပိ နိဗ္ဗိန္ဒတိ။ ရသေသုပိ နိဗ္ဗိန္ဒတိ။ ဖောဋ္ဌဗ္ဗေသုပိ နိဗ္ဗိန္ဒတိ။ ဓမ္မေသုပိ နိဗ္ဗိန္ဒတိ; နိဗ္ဗိန္ဒံ ဝိရဇ္ဇတိ။ပေ.။ ပဇာနာတီ’’တိ။ ဒုတိယံ။

၃. ဝိညာဏသုတ္တံ

၁၉၀. သာဝတ္ထိယံ ဝိဟရတိ။ပေ.။ ‘‘တံ ကိံ မညသိ, ရာဟုလ, စက္ခုဝိညာဏံ နိစ္စံ ဝါ အနိစ္စံ ဝါ’’တိ? ‘‘အနိစ္စံ, ဘန္တေ’’။ပေ.။ ‘‘သောတဝိညာဏံ။ပေ.။ ဃာနဝိညာဏံ။ ဇိဝှာဝိညာဏံ။ ကာယဝိညာဏံ။ မနောဝိညာဏံ နိစ္စံ ဝါ အနိစ္စံ ဝါ’’တိ? ‘‘အနိစ္စံ, ဘန္တေ’’ ။ပေ.။ ‘‘ဧဝံ ပဿံ, ရာဟုလ, သုတဝါ အရိယသာဝကော စက္ခုဝိညာဏသ္မိမ္ပိ နိဗ္ဗိန္ဒတိ။ပေ.။ သောတဝိညာဏသ္မိမ္ပိ နိဗ္ဗိန္ဒတိ။ ဃာနဝိညာဏသ္မိမ္ပိ နိဗ္ဗိန္ဒတိ။ ဇိဝှာဝိညာဏသ္မိမ္ပိ နိဗ္ဗိန္ဒတိ။ ကာယဝိညာဏသ္မိမ္ပိ နိဗ္ဗိန္ဒတိ။ မနောဝိညာဏသ္မိမ္ပိ နိဗ္ဗိန္ဒတိ; နိဗ္ဗိန္ဒံ ဝိရဇ္ဇတိ။ပေ.။ ပဇာနာတီ’’တိ။ တတိယံ။

၄. သမ္ဖဿသုတ္တံ

၁၉၁. သာဝတ္ထိယံ ဝိဟရတိ။ပေ.။ ‘‘တံ ကိံ မညသိ, ရာဟုလ, စက္ခုသမ္ဖဿော နိစ္စော ဝါ အနိစ္စော ဝါ’’တိ? ‘‘အနိစ္စော, ဘန္တေ’’။ပေ.။ ‘‘သောတသမ္ဖဿော။ပေ.။ ဃာနသမ္ဖဿော။ ဇိဝှာသမ္ဖဿော။ ကာယသမ္ဖဿော။ မနောသမ္ဖဿော နိစ္စော ဝါ အနိစ္စော ဝါ’’တိ? ‘‘အနိစ္စော, ဘန္တေ’’။ပေ.။ ‘‘ဧဝံ ပဿံ, ရာဟုလ, သုတဝါ အရိယသာဝကော စက္ခုသမ္ဖဿသ္မိမ္ပိ နိဗ္ဗိန္ဒတိ။ပေ.။ သောတသမ္ဖဿသ္မိမ္ပိ နိဗ္ဗိန္ဒတိ။ ဃာနသမ္ဖဿသ္မိမ္ပိ နိဗ္ဗိန္ဒတိ။ ဇိဝှာသမ္ဖဿသ္မိမ္ပိ နိဗ္ဗိန္ဒတိ။ ကာယသမ္ဖဿသ္မိမ္ပိ နိဗ္ဗိန္ဒတိ။ မနောသမ္ဖဿသ္မိမ္ပိ နိဗ္ဗိန္ဒတိ; နိဗ္ဗိန္ဒံ ဝိရဇ္ဇတိ။ပေ.။ ပဇာနာတီ’’တိ။ စတုတ္ထံ။

၅. ဝေဒနာသုတ္တံ

၁၉၂. သာဝတ္ထိယံ ဝိဟရတိ။ပေ.။ ‘‘တံ ကိံ မညသိ, ရာဟုလ, စက္ခုသမ္ဖဿဇာ ဝေဒနာ နိစ္စာ ဝါ အနိစ္စာ ဝါ’’တိ? ‘‘အနိစ္စာ, ဘန္တေ’’။ပေ.။ ‘‘သောတသမ္ဖဿဇာ ဝေဒနာ။ပေ.။ ဃာနသမ္ဖဿဇာ ဝေဒနာ။ ဇိဝှာသမ္ဖဿဇာ ဝေဒနာ။ ကာယသမ္ဖဿဇာ ဝေဒနာ။ မနောသမ္ဖဿဇာ ဝေဒနာ နိစ္စာ ဝါ အနိစ္စာ ဝါ’’တိ? ‘‘အနိစ္စာ , ဘန္တေ’’။ပေ.။ ‘‘ဧဝံ ပဿံ, ရာဟုလ, သုတဝါ အရိယသာဝကော စက္ခုသမ္ဖဿဇာယ ဝေဒနာယပိ နိဗ္ဗိန္ဒတိ။ပေ.။ သောတ။ ဃာန။ ဇိဝှာ။ ကာယ။ မနောသမ္ဖဿဇာယ ဝေဒနာယပိ နိဗ္ဗိန္ဒတိ။ပေ.။ ပဇာနာတီ’’တိ။ ပဉ္စမံ။

၆. သညာသုတ္တံ

၁၉၃. သာဝတ္ထိယံ ဝိဟရတိ။ပေ.။ ‘‘တံ ကိံ မညသိ, ရာဟုလ, ရူပသညာ နိစ္စာ ဝါ အနိစ္စာ ဝါ’’တိ? ‘‘အနိစ္စာ, ဘန္တေ’’။ပေ.။ ‘‘သဒ္ဒသညာ။ပေ.။ ဂန္ဓသညာ။ ရသသညာ။ ဖောဋ္ဌဗ္ဗသညာ။ ဓမ္မသညာ နိစ္စာ ဝါ အနိစ္စာ ဝါ’’တိ? ‘‘အနိစ္စာ, ဘန္တေ’’။ပေ.။ ‘‘ဧဝံ ပဿံ, ရာဟုလ, သုတဝါ အရိယသာဝကော ရူပသညာယပိ နိဗ္ဗိန္ဒတိ။ပေ.။ သဒ္ဒသညာယပိ နိဗ္ဗိန္ဒတိ။ ဂန္ဓသညာယပိ နိဗ္ဗိန္ဒတိ။ ရသသညာယပိ နိဗ္ဗိန္ဒတိ။ ဖောဋ္ဌဗ္ဗသညာယပိ နိဗ္ဗိန္ဒတိ။ ဓမ္မသညာယပိ နိဗ္ဗိန္ဒတိ။ပေ.။ ပဇာနာတီ’’တိ။ ဆဋ္ဌံ။

၇. သဉ္စေတနာသုတ္တံ

၁၉၄. သာဝတ္ထိယံ ဝိဟရတိ။ပေ.။ ‘‘တံ ကိံ မညသိ, ရာဟုလ, ရူပသဉ္စေတနာ နိစ္စာ ဝါ အနိစ္စာ ဝါ’’တိ? ‘‘အနိစ္စာ, ဘန္တေ’’။ပေ.။ ‘‘သဒ္ဒသဉ္စေတနာ။ပေ.။ ဂန္ဓသဉ္စေတနာ။ ရသသဉ္စေတနာ ။ ဖောဋ္ဌဗ္ဗသဉ္စေတနာ။ ဓမ္မသဉ္စေတနာ နိစ္စာ ဝါ အနိစ္စာ ဝါ’’တိ? ‘‘အနိစ္စာ, ဘန္တေ’’။ပေ.။ ‘‘ဧဝံ ပဿံ, ရာဟုလ, သုတဝါ အရိယသာဝကော ရူပသဉ္စေတနာယပိ နိဗ္ဗိန္ဒတိ။ပေ.။ သဒ္ဒသဉ္စေတနာယပိ နိဗ္ဗိန္ဒတိ။ ဂန္ဓသဉ္စေတနာယပိ နိဗ္ဗိန္ဒတိ။ ရသသဉ္စေတနာယပိ နိဗ္ဗိန္ဒတိ။ ဖောဋ္ဌဗ္ဗသဉ္စေတနာယပိ နိဗ္ဗိန္ဒတိ။ ဓမ္မသဉ္စေတနာယပိ နိဗ္ဗိန္ဒတိ။ပေ.။ ပဇာနာတီ’’တိ။ သတ္တမံ။

၈. တဏှာသုတ္တံ

၁၉၅. သာဝတ္ထိယံ ဝိဟရတိ။ပေ.။ ‘‘တံ ကိံ မညသိ, ရာဟုလ, ရူပတဏှာ နိစ္စာ ဝါ အနိစ္စာ ဝါ’’တိ? ‘‘အနိစ္စာ, ဘန္တေ’’။ပေ.။ ‘‘သဒ္ဒတဏှာ။ပေ.။ ဂန္ဓတဏှာ။ ရသတဏှာ။ ဖောဋ္ဌဗ္ဗတဏှာ။ ဓမ္မတဏှာ နိစ္စာ ဝါ အနိစ္စာ ဝါ’’တိ? ‘‘အနိစ္စာ, ဘန္တေ’’။ပေ.။ ‘‘ဧဝံ ပဿံ, ရာဟုလ, သုတဝါ အရိယသာဝကော ရူပတဏှာယပိ နိဗ္ဗိန္ဒတိ။ပေ.။ သဒ္ဒတဏှာယပိ နိဗ္ဗိန္ဒတိ။ ဂန္ဓတဏှာယပိ နိဗ္ဗိန္ဒတိ။ ရသတဏှာယပိ နိဗ္ဗိန္ဒတိ။ ဖောဋ္ဌဗ္ဗတဏှာယ နိဗ္ဗိန္ဒတိ။ ဓမ္မတဏှာယပိ နိဗ္ဗိန္ဒတိ ။ပေ.။ ပဇာနာတီ’’တိ။ အဋ္ဌမံ။

၉. ဓါတုသုတ္တံ

၁၉၆. သာဝတ္ထိယံ ဝိဟရတိ။ပေ.။ ‘‘တံ ကိံ မညသိ, ရာဟုလ, ပထဝီဓါတု နိစ္စာ ဝါ အနိစ္စာ ဝါ’’တိ? ‘‘အနိစ္စာ, ဘန္တေ’’။ပေ.။ ‘‘အာပေါဓါတု။ပေ.။ တေဇောဓါတု။ ဝါယောဓါတု။ အာကာသဓါတု။ ဝိညာဏဓါတု နိစ္စာ ဝါ အနိစ္စာ ဝါ’’တိ? ‘‘အနိစ္စာ, ဘန္တေ’’။ပေ.။ ‘‘ဧဝံ ပဿံ, ရာဟုလ, သုတဝါ အရိယသာဝကော ပထဝီဓါတုယာပိ နိဗ္ဗိန္ဒတိ။ပေ.။ အာပေါဓါတုယာပိ နိဗ္ဗိန္ဒတိ။ တေဇောဓါတုယာပိ နိဗ္ဗိန္ဒတိ။ ဝါယောဓါတုယာပိ နိဗ္ဗိန္ဒတိ။ အာကာသဓါတုယာပိ နိဗ္ဗိန္ဒတိ။ ဝိညာဏဓါတုယာပိ နိဗ္ဗိန္ဒတိ။ပေ.။ ပဇာနာတီ’’တိ။ နဝမံ။

၁၀. ခန္ဓသုတ္တံ

၁၉၇. သာဝတ္ထိယံ ဝိဟရတိ။ပေ.။ ‘‘တံ ကိံ မညသိ, ရာဟုလ, ရူပံ နိစ္စံ ဝါ အနိစ္စံ ဝါ’’တိ? ‘‘အနိစ္စံ, ဘန္တေ’’။ပေ.။ ‘‘ဝေဒနာ။ပေ.။ သညာ။ သင်္ခါရာ။ ဝိညာဏံ နိစ္စံ ဝါ အနိစ္စံ ဝါ’’တိ? ‘‘အနိစ္စံ, ဘန္တေ’’။ပေ.။ ‘‘ဧဝံ ပဿံ, ရာဟုလ, သုတဝါ အရိယသာဝကော ရူပသ္မိမ္ပိ နိဗ္ဗိန္ဒတိ။ပေ.။ ဝေဒနာယပိ နိဗ္ဗိန္ဒတိ။ သညာယပိ နိဗ္ဗိန္ဒတိ။ သင်္ခါရေသုပိ နိဗ္ဗိန္ဒတိ။ ဝိညာဏသ္မိမ္ပိ နိဗ္ဗိန္ဒတိ; နိဗ္ဗိန္ဒံ ဝိရဇ္ဇတိ ; ဝိရာဂါ ဝိမုစ္စတိ; ဝိမုတ္တသ္မိံ ဝိမုတ္တမိတိ ဉာဏံ ဟောတိ။ ‘ခီဏာ ဇာတိ, ဝုသိတံ ဗြဟ္မစရိယံ, ကတံ ကရဏီယံ, နာပရံ ဣတ္ထတ္တာယာ’တိ ပဇာနာတီ’’တိ။ ဒသမံ။

ပဌမော ဝဂ္ဂေါ။

တဿုဒ္ဒါနံ –

စက္ခု ရူပဉ္စ ဝိညာဏံ၊ သမ္ဖဿော ဝေဒနာယ စ။

သညာ သဉ္စေတနာ တဏှာ၊ ဓါတု ခန္ဓေန တေ ဒသာတိ။

၂. ဒုတိယဝဂ္ဂေါ

၁. စက္ခုသုတ္တံ

၁၉၈. ဧဝံ မေ သုတံ – ဧကံ သမယံ ဘဂဝါ သာဝတ္ထိယံ ဝိဟရတိ။ အထ ခေါ အာယသ္မာ ရာဟုလော ယေန ဘဂဝါ တေနုပသင်္ကမိ; ဥပသင်္ကမိတွာ ဘဂဝန္တံ အဘိဝါဒေတွာ ဧကမန္တံ နိသီဒိ။ ဧကမန္တံ နိသိန္နံ ခေါ အာယသ္မန္တံ ရာဟုလံ ဘဂဝါ ဧတဒဝေါစ – ‘‘တံ ကိံ မညသိ, ရာဟုလ, စက္ခုံ နိစ္စံ ဝါ အနိစ္စံ ဝါ’’တိ? ‘‘အနိစ္စံ, ဘန္တေ’’။ ‘‘ယံ ပနာနိစ္စံ, ဒုက္ခံ ဝါ တံ သုခံ ဝါ’’တိ? ‘‘ဒုက္ခံ, ဘန္တေ’’။ ‘‘ယံ ပနာနိစ္စံ ဒုက္ခံ ဝိပရိဏာမဓမ္မံ, ကလ္လံ နု တံ သမနုပဿိတုံ – ‘ဧတံ မမ, ဧသောဟမသ္မိ, ဧသော မေ အတ္တာ’’’တိ? ‘‘နော ဟေတံ, ဘန္တေ’’။ ‘‘သောတံ။ပေ.။ ဃာနံ။ ဇိဝှာ။ ကာယော။ မနော နိစ္စော ဝါ အနိစ္စော ဝါ’’တိ? ‘‘အနိစ္စော, ဘန္တေ’’။ ‘‘ယံ ပနာနိစ္စံ, ဒုက္ခံ ဝါ တံ သုခံ ဝါ’’တိ? ‘‘ဒုက္ခံ, ဘန္တေ’’။ ‘‘ယံ ပနာနိစ္စံ ဒုက္ခံ ဝိပရိဏာမဓမ္မံ, ကလ္လံ နု တံ သမနုပဿိတုံ – ‘ဧတံ မမ, ဧသောဟမသ္မိ, ဧသော မေ အတ္တာ’’’တိ? ‘‘နော ဟေတံ, ဘန္တေ’’။ ‘‘ဧဝံ ပဿံ, ရာဟုလ, သုတဝါ အရိယသာဝကော စက္ခုသ္မိမ္ပိ နိဗ္ဗိန္ဒတိ။ပေ.။ သောတသ္မိမ္ပိ နိဗ္ဗိန္ဒတိ။ ဃာနသ္မိမ္ပိ နိဗ္ဗိန္ဒတိ ။ ဇိဝှာယပိ နိဗ္ဗိန္ဒတိ။ ကာယသ္မိမ္ပိ နိဗ္ဗိန္ဒတိ။ မနသ္မိမ္ပိ နိဗ္ဗိန္ဒတိ; နိဗ္ဗိန္ဒံ ဝိရဇ္ဇတိ; ဝိရာဂါ ဝိမုစ္စတိ; ဝိမုတ္တသ္မိံ ဝိမုတ္တမိတိ ဉာဏံ ဟောတိ။ ‘ခီဏာ ဇာတိ, ဝုသိတံ ဗြဟ္မစရိယံ, ကတံ ကရဏီယံ, နာပရံ ဣတ္ထတ္တာယာ’တိ ပဇာနာတီ’’တိ။ ဧတေန ပေယျာလေန ဒသ သုတ္တန္တာ ကာတဗ္ဗာ။ ပဌမံ။

၂-၁၀. ရူပါဒိသုတ္တနဝကံ

၁၉၉. သာဝတ္ထိယံ ဝိဟရတိ။ပေ.။ ‘‘တံ ကိံ မညသိ, ရာဟုလ, ရူပါ နိစ္စာ ဝါ အနိစ္စာ ဝါ’’တိ? ‘‘အနိစ္စာ, ဘန္တေ’’။ပေ.။ သဒ္ဒါ။ ဂန္ဓာ။ ရသာ။ ဖောဋ္ဌဗ္ဗာ။ ဓမ္မာ။။

‘‘စက္ခုဝိညာဏံ။ပေ.။ သောတဝိညာဏံ။ ဃာနဝိညာဏံ။ ဇိဝှာဝိညာဏံ။ ကာယဝိညာဏံ။ မနောဝိညာဏံ။။

‘‘စက္ခုသမ္ဖဿော။ပေ.။ သောတသမ္ဖဿော။ ဃာနသမ္ဖဿော။ ဇိဝှာသမ္ဖဿော။ ကာယသမ္ဖဿော။ မနောသမ္ဖဿော။။

‘‘စက္ခုသမ္ဖဿဇာ ဝေဒနာ။ပေ.။ သောတသမ္ဖဿဇာ ဝေဒနာ။ ဃာနသမ္ဖဿဇာ ဝေဒနာ။ ဇိဝှာသမ္ဖဿဇာ ဝေဒနာ။ ကာယသမ္ဖဿဇာ ဝေဒနာ။ မနောသမ္ဖဿဇာ ဝေဒနာ။။

‘‘ရူပသညာ။ပေ.။ သဒ္ဒသညာ။ ဂန္ဓသညာ။ ရသသညာ။ ဖောဋ္ဌဗ္ဗသညာ။ ဓမ္မသညာ။။

‘‘ရူပသဉ္စေတနာ။ပေ.။ သဒ္ဒသဉ္စေတနာ။ ဂန္ဓသဉ္စေတနာ။ ရသသဉ္စေတနာ။ ဖောဋ္ဌဗ္ဗသဉ္စေတနာ။ ဓမ္မသဉ္စေတနာ။။

‘‘ရူပတဏှာ ။ပေ.။ သဒ္ဒတဏှာ။ ဂန္ဓတဏှာ။ ရသတဏှာ။ ဖောဋ္ဌဗ္ဗတဏှာ။ ဓမ္မတဏှာ။။

‘‘ပထဝီဓါတု။ပေ.။ အာပေါဓါတု။ တေဇောဓါတု။ ဝါယောဓါတု။ အာကာသဓါတု ။ ဝိညာဏဓါတု။။

‘‘ရူပံ ။ပေ.။ ဝေဒနာ။ သညာ။ သင်္ခါရာ။ ဝိညာဏံ နိစ္စံ ဝါ အနိစ္စံ ဝါ’’တိ? အနိစ္စံ, ဘန္တေ။ပေ.။ ဧဝံ ပဿံ ရာဟုလ။ပေ.။ နာပရံ ဣတ္ထတ္တာယာတိ ပဇာနာတီတိ။ ဒသမံ။

၁၁. အနုသယသုတ္တံ

၂၀၀. သာဝတ္ထိယံ ဝိဟရတိ။ အထ ခေါ အာယသ္မာ ရာဟုလော ယေန ဘဂဝါ တေနုပသင်္ကမိ; ဥပသင်္ကမိတွာ ဘဂဝန္တံ အဘိဝါဒေတွာ ဧကမန္တံ နိသီဒိ။ ဧကမန္တံ နိသိန္နော ခေါ အာယသ္မာ ရာဟုလော ဘဂဝန္တံ ဧတဒဝေါစ – ‘‘ကထံ နု ခေါ, ဘန္တေ, ဇာနတော ကထံ ပဿတော ဣမသ္မိဉ္စ သဝိညာဏကေ ကာယေ ဗဟိဒ္ဓါ စ သဗ္ဗနိမိတ္တေသု အဟင်္ကာရမမင်္ကာရမာနာနုသယာ န ဟောန္တီ’’တိ? ‘‘ယံ ကိဉ္စိ, ရာဟုလ, ရူပံ အတီတာနာဂတပစ္စုပ္ပန္နံ အဇ္ဈတ္တံ ဝါ ဗဟိဒ္ဓါ ဝါ ဩဠာရိကံ ဝါ သုခုမံ ဝါ ဟီနံ ဝါ ပဏီတံ ဝါ ယံ ဒူရေ သန္တိကေ ဝါ, သဗ္ဗံ ရူပံ ‘နေတံ မမ, နေသောဟမသ္မိ, န မေသော အတ္တာ’တိ ဧဝမေတံ ယထာဘူတံ သမ္မပ္ပညာယ ပဿတိ။ ယာ ကာစိ ဝေဒနာ။ပေ.။ ယာ ကာစိ သညာ။ ယေ ကေစိ သင်္ခါရာ။ ယံ ကိဉ္စိ ဝိညာဏံ အတီတာနာဂတပစ္စုပ္ပန္နံ အဇ္ဈတ္တံ ဝါ ဗဟိဒ္ဓါ ဝါ ဩဠာရိကံ ဝါ သုခုမံ ဝါ ဟီနံ ဝါ ပဏီတံ ဝါ ယံ ဒူရေ သန္တိကေ ဝါ, သဗ္ဗံ ဝိညာဏံ ‘နေတံ မမ, နေသောဟမသ္မိ, န မေသော အတ္တာ’တိ ဧဝမေတံ ယထာဘူတံ သမ္မပ္ပညာယ ပဿတိ။ ဧဝံ ခေါ, ရာဟုလ, ဇာနတော ဧဝံ ပဿတော ဣမသ္မိဉ္စ သဝိညာဏကေ ကာယေ ဗဟိဒ္ဓါ စ သဗ္ဗနိမိတ္တေသု အဟင်္ကာရမမင်္ကာရမာနာနုသယာ န ဟောန္တီ’’တိ။ ဧကာဒသမံ။

၁၂. အပဂတသုတ္တံ

၂၀၁. သာဝတ္ထိနိဒါနံ ။ အထ ခေါ အာယသ္မာ ရာဟုလော ယေန ဘဂဝါ တေနုပသင်္ကမိ; ဥပသင်္ကမိတွာ ဘဂဝန္တံ အဘိဝါဒေတွာ ဧကမန္တံ နိသီဒိ။ ဧကမန္တံ နိသိန္နော ခေါ အာယသ္မာ ရာဟုလော ဘဂဝန္တံ ဧတဒဝေါစ – ‘‘ကထံ နု ခေါ, ဘန္တေ, ဇာနတော ကထံ ပဿတော ဣမသ္မိံ စ သဝိညာဏကေ ကာယေ ဗဟိဒ္ဓါ စ သဗ္ဗနိမိတ္တေသု အဟင်္ကာရမမင်္ကာရမာနာပဂတံ မာနသံ ဟောတိ ဝိဓါ သမတိက္ကန္တံ သန္တံ သုဝိမုတ္တ’’န္တိ? ‘‘ယံ ကိဉ္စိ, ရာဟုလ, ရူပံ အတီတာနာဂတပစ္စုပ္ပန္နံ အဇ္ဈတ္တံ ဝါ ဗဟိဒ္ဓါ ဝါ ဩဠာရိကံ ဝါ သုခုမံ ဝါ ဟီနံ ဝါ ပဏီတံ ဝါ ယံ ဒူရေ သန္တိကေ ဝါ သဗ္ဗံ ရူပံ ‘နေတံ မမ, နေသောဟမသ္မိ, န မေသော အတ္တာ’တိ ဧဝမေတံ ယထာဘူတံ သမ္မပ္ပညာယ ဒိသွာ အနုပါဒါ ဝိမုတ္တော ဟောတိ’’။

‘‘ယာ ကာစိ ဝေဒနာ။ပေ.။ ယာ ကာစိ သညာ။ ယေ ကေစိ သင်္ခါရာ။ ယံ ကိဉ္စိ ဝိညာဏံ အတီတာနာဂတပစ္စုပ္ပန္နံ အဇ္ဈတ္တံ ဝါ ဗဟိဒ္ဓါ ဝါ ဩဠာရိကံ ဝါ သုခုမံ ဝါ ဟီနံ ဝါ ပဏီတံ ဝါ ယံ ဒူရေ သန္တိကေ ဝါ, သဗ္ဗံ ဝိညာဏံ ‘နေတံ မမ, နေသောဟမသ္မိ, န မေသော အတ္တာ’တိ ဧဝမေတံ ယထာဘူတံ သမ္မပ္ပညာယ ဒိသွာ အနုပါဒါ ဝိမုတ္တော ဟောတိ။ ဧဝံ ခေါ, ရာဟုလ, ဇာနတော ဧဝံ ပဿတော ဣမသ္မိဉ္စ သဝိညာဏကေ ကာယေ ဗဟိဒ္ဓါ စ သဗ္ဗနိမိတ္တေသု အဟင်္ကာရမမင်္ကာရမာနာပဂတံ မာနသံ ဟောတိ ဝိဓါ သမတိက္ကန္တံ သန္တံ သုဝိမုတ္တ’’န္တိ။ ဒွါဒသမံ။

ဒုတိယော ဝဂ္ဂေါ။

တဿုဒ္ဒါနံ –

စက္ခု ရူပဉ္စ ဝိညာဏံ၊ သမ္ဖဿော ဝေဒနာယ စ။

သညာ သဉ္စေတနာ တဏှာ၊ ဓါတု ခန္ဓေန တေ ဒသ။

အနုသယံ အပဂတဉ္စေဝ၊ ဝဂ္ဂေါ တေန ပဝုစ္စတီတိ။

ရာဟုလသံယုတ္တံ သမတ္တံ။