ဝနသံယုတ္တံ

၉. ဝနသံယုတ္တံ

၁. ဝိဝေကသုတ္တံ

၂၂၁. ဧဝံ မေ သုတံ – ဧကံ သမယံ အညတရော ဘိက္ခု ကောသလေသု ဝိဟရတိ အညတရသ္မိံ ဝနသဏ္ဍေ။ တေန ခေါ ပန သမယေန သော ဘိက္ခု ဒိဝါဝိဟာရဂတော ပါပကေ အကုသလေ ဝိတက္ကေ ဝိတက္ကေတိ ဂေဟနိဿိတေ။ အထ ခေါ ယာ တသ္မိံ ဝနသဏ္ဍေ အဓိဝတ္ထာ ဒေဝတာ တဿ ဘိက္ခုနော အနုကမ္ပိကာ အတ္ထကာမာ တံ ဘိက္ခုံ သံဝေဇေတုကာမာ ယေန သော ဘိက္ခု တေနုပသင်္ကမိ; ဥပသင်္ကမိတွာ တံ ဘိက္ခုံ ဂါထာဟိ အဇ္ဈဘာသိ –

‘‘ဝိဝေကကာမောသိ ဝနံ ပဝိဋ္ဌော၊

အထ တေ မနော နိစ္ဆရတီ ဗဟိဒ္ဓါ။

ဇနော ဇနသ္မိံ ဝိနယဿု ဆန္ဒံ၊

တတော သုခီ ဟောဟိသိ ဝီတရာဂေါ။

‘‘အရတိံ ပဇဟာသိ သတော၊ ဘဝါသိ သတံ တံ သာရယာမသေ။

ပါတာလရဇော ဟိ ဒုတ္တရော၊ မာ တံ ကာမရဇော အဝါဟရိ။

‘‘သကုဏော ယထာ ပံသုကုန္ထိတော [ပံသုကုဏ္ဌိတော (က.)၊ ပံသုကုဏ္ဍိတော (သီ. သျာ. ကံ. ဣ.)]၊ ဝိဓုနံ ပါတယတိ သိတံ ရဇံ။

ဧဝံ ဘိက္ခု ပဓါနဝါ သတိမာ၊ ဝိဓုနံ ပါတယတိ သိတံ ရဇ’’န္တ္န္တ္တိ။

အထ ခေါ သော ဘိက္ခု တာယ ဒေဝတာယ သံဝေဇိတော သံဝေဂမာပါဒီတိ။

၂. ဥပဋ္ဌာနသုတ္တံ

၂၂၂. ဧကံ သမယံ အညတရော ဘိက္ခု ကောသလေသု ဝိဟရတိ အညတရသ္မိံ ဝနသဏ္ဍေ။ တေန ခေါ ပန သမယေန သော ဘိက္ခု ဒိဝါဝိဟာရဂတော သုပတိ။ အထ ခေါ ယာ တသ္မိံ ဝနသဏ္ဍေ အဓိဝတ္ထာ ဒေဝတာ တဿ ဘိက္ခုနော အနုကမ္ပိကာ အတ္ထကာမာ တံ ဘိက္ခုံ သံဝေဇေတုကာမာ ယေန သော ဘိက္ခု တေနုပသင်္ကမိ; ဥပသင်္ကမိတွာ တံ ဘိက္ခုံ ဂါထာဟိ အဇ္ဈဘာသိ –

‘‘ဥဋ္ဌေဟိ ဘိက္ခု ကိံ သေသိ၊ ကော အတ္ထော သုပိတေန [သုပိနေန (သီ.)] တေ။

အာတုရဿ ဟိ ကာ နိဒ္ဒါ၊ သလ္လဝိဒ္ဓဿ ရုပ္ပတော။

‘‘ယာယ သဒ္ဓါယ ပဗ္ဗဇိတော [ယာယ သဒ္ဓါပဗ္ဗဇိတော (သီ. သျာ. ကံ.)]၊ အဂါရသ္မာနဂါရိယံ။

တမေဝ သဒ္ဓံ ဗြူဟေဟိ၊ မာ နိဒ္ဒါယ ဝသံ ဂမီ’’တိ။

‘‘အနိစ္စာ အဒ္ဓုဝါ ကာမာ၊ ယေသု မန္ဒောဝ မုစ္ဆိတော။

ဗဒ္ဓေသု [ခန္ဓေသု (သီ.)] မုတ္တံ အသိတံ၊ ကသ္မာ ပဗ္ဗဇိတံ တပေ။

‘‘ဆန္ဒရာဂဿ ဝိနယာ၊ အဝိဇ္ဇာသမတိက္ကမာ။

တံ ဉာဏံ ပရမောဒါနံ [ပရိယောဒါတံ (သီ. ဣ.)၊ ပရမောဒါတံ (သျာ. ကံ.)၊ ပရမဝေါဒါနံ (သီ. အဋ္ဌ.)]၊ ကသ္မာ ပဗ္ဗဇိတံ တပေ။

‘‘ဆေတွာ [ဘေတွာ (သီ. သျာ. ကံ. ဣ.)] အဝိဇ္ဇံ ဝိဇ္ဇာယ၊ အာသဝါနံ ပရိက္ခယာ။

အသောကံ အနုပါယာသံ၊ ကသ္မာ ပဗ္ဗဇိတံ တပေ။

‘‘အာရဒ္ဓဝီရိယံ ပဟိတတ္တံ၊ နိစ္စံ ဒဠှပရက္ကမံ။

နိဗ္ဗာနံ အဘိကင်္ခန္တံ၊ ကသ္မာ ပဗ္ဗဇိတံ တပေ’’တိ။

၃. ကဿပဂေါတ္တသုတ္တံ

၂၂၃. ဧကံ သမယံ အာယသ္မာ ကဿပဂေါတ္တော ကောသလေသု ဝိဟရတိ အညတရသ္မိံ ဝနသဏ္ဍေ။ တေန ခေါ ပန သမယေန အာယသ္မာ ကဿပဂေါတ္တော ဒိဝါဝိဟာရဂတော အညတရံ ဆေတံ ဩဝဒတိ။ အထ ခေါ ယာ တသ္မိံ ဝနသဏ္ဍေ အဓိဝတ္ထာ ဒေဝတာ အာယသ္မန္တံ ကဿပဂေါတ္တံ သံဝေဇေတုကာမာ ယေနာယသ္မာ ကဿပဂေါတ္တော တေနုပသင်္ကမိ; ဥပသင်္ကမိတွာ အာယသ္မန္တံ ကဿပဂေါတ္တံ ဂါထာဟိ အဇ္ဈဘာသိ –

‘‘ဂိရိဒုဂ္ဂစရံ ဆေတံ၊ အပ္ပပညံ အစေတသံ။

အကာလေ ဩဝဒံ ဘိက္ခု၊ မန္ဒောဝ ပဋိဘာတိ မံ။

‘‘သုဏာတိ န ဝိဇာနာတိ၊ အာလောကေတိ န ပဿတိ။

ဓမ္မသ္မိံ ဘညမာနသ္မိံ၊ အတ္ထံ ဗာလော န ဗုဇ္ဈတိ။

‘‘သစေပိ ဒသ ပဇ္ဇောတေ၊ ဓါရယိဿသိ ကဿပ။

နေဝ ဒက္ခတိ ရူပါနိ၊ စက္ခု ဟိဿ န ဝိဇ္ဇတီ’’တိ။

အထ ခေါ အာယသ္မာ ကဿပဂေါတ္တော တာယ ဒေဝတာယ သံဝေဇိတော သံဝေဂမာပါဒီတိ။

၄. သမ္ဗဟုလသုတ္တံ

၂၂၄. ဧကံ သမယံ သမ္ဗဟုလာ ဘိက္ခူ ကောသလေသု ဝိဟရန္တိ အညတရသ္မိံ ဝနသဏ္ဍေ။ အထ ခေါ တေ ဘိက္ခူ ဝဿံဝုဋ္ဌာ [ဝဿံဝုတ္ထာ (သီ. သျာ. ကံ. ဣ.)] တေမာသစ္စယေန စာရိကံ ပက္ကမိံသု။ အထ ခေါ ယာ တသ္မိံ ဝနသဏ္ဍေ အဓိဝတ္ထာ ဒေဝတာ တေ ဘိက္ခူ အပဿန္တီ ပရိဒေဝမာနာ တာယံ ဝေလာယံ ဣမံ ဂါထံ အဘာသိ –

‘‘အရတိ ဝိယ မေဇ္ဇ ခါယတိ၊

ဗဟုကေ ဒိသွာန ဝိဝိတ္တေ အာသနေ။

တေ စိတ္တကထာ ဗဟုဿုတာ၊

ကောမေ ဂေါတမသာဝကာ ဂတာ’’တိ။

ဧဝံ ဝုတ္တေ, အညတရာ ဒေဝတာ တံ ဒေဝတံ ဂါထာယ ပစ္စဘာသိ –

‘‘မာဂဓံ ဂတာ ကောသလံ ဂတာ၊ ဧကစ္စိယာ ပန ဝဇ္ဇိဘူမိယာ။

မဂါ ဝိယ အသင်္ဂစာရိနော၊ အနိကေတာ ဝိဟရန္တိ ဘိက္ခဝေါ’’တိ။

၅. အာနန္ဒသုတ္တံ

၂၂၅. ဧကံ သမယံ အာယသ္မာ အာနန္ဒော ကောသလေသု ဝိဟရတိ အညတရသ္မိံ ဝနသဏ္ဍေ။ တေန ခေါ ပန သမယေန အာယသ္မာ အာနန္ဒော အတိဝေလံ ဂိဟိသညတ္တိဗဟုလော ဝိဟရတိ။ အထ ခေါ ယာ တသ္မိံ ဝနသဏ္ဍေ အဓိဝတ္ထာ ဒေဝတာ အာယသ္မတော အာနန္ဒဿ အနုကမ္ပိကာ အတ္ထကာမာ အာယသ္မန္တံ အာနန္ဒံ သံဝေဇေတုကာမာ ယေနာယသ္မာ အာနန္ဒော တေနုပသင်္ကမိ; ဥပသင်္ကမိတွာ အာယသ္မန္တံ အာနန္ဒံ ဂါထာယ အဇ္ဈဘာသိ –

‘‘ရုက္ခမူလဂဟနံ ပသက္ကိယ၊ နိဗ္ဗာနံ ဟဒယသ္မိံ ဩပိယ။

ဈာ ဂေါတမ မာ ပမာဒေါ [မာ စ ပမာဒေါ (သီ. ဣ.)]၊ ကိံ တေ ဗိဠိဗိဠိကာ ကရိဿတီ’’တိ။

အထ ခေါ အာယသ္မာ အာနန္ဒော တာယ ဒေဝတာယ သံဝေဇိတော သံဝေဂမာပါဒီတိ။

၆. အနုရုဒ္ဓသုတ္တံ

၂၂၆. ဧကံ သမယံ အာယသ္မာ အနုရုဒ္ဓေါ ကောသလေသု ဝိဟရတိ အညတရသ္မိံ ဝနသဏ္ဍေ။ အထ ခေါ အညတရာ တာဝတိံသကာယိကာ ဒေဝတာ ဇာလိနီ နာမ အာယသ္မတော အနုရုဒ္ဓဿ ပုရာဏဒုတိယိကာ ယေနာယသ္မာ အနုရုဒ္ဓေါ တေနုပသင်္ကမိ; ဥပသင်္ကမိတွာ အာယသ္မန္တံ အနုရုဒ္ဓံ ဂါထာယ အဇ္ဈဘာသိ –

‘‘တတ္ထ စိတ္တံ ပဏိဓေဟိ၊ ယတ္ထ တေ ဝုသိတံ ပုရေ။

တာဝတိံသေသု ဒေဝေသု၊ သဗ္ဗကာမသမိဒ္ဓိသု။

ပုရက္ခတော ပရိဝုတော၊ ဒေဝကညာဟိ သောဘသီ’’တိ။

‘‘ဒုဂ္ဂတာ ဒေဝကညာယော၊ သက္ကာယသ္မိံ ပတိဋ္ဌိတာ။

တေ စာပိ ဒုဂ္ဂတာ သတ္တာ၊ ဒေဝကညာဟိ ပတ္ထိတာ’’တိ။

‘‘န တေ သုခံ ပဇာနန္တိ၊ ယေ န ပဿန္တိ နန္ဒနံ။

အာဝါသံ နရဒေဝါနံ၊ တိဒသာနံ ယသဿိန’’န္တိ။

‘‘န တွံ ဗာလေ ဝိဇာနာသိ၊ ယထာ အရဟတံ ဝစော။

အနိစ္စာ သဗ္ဗသင်္ခါရာ၊ ဥပ္ပါဒဝယဓမ္မိနော။

ဥပ္ပဇ္ဇိတွာ နိရုဇ္ဈန္တိ၊ တေသံ ဝူပသမော သုခေါ။

‘‘နတ္ထိ ဒါနိ ပုနာဝါသော၊ ဒေဝကာယသ္မိ ဇာလိနိ။

ဝိက္ခီဏော ဇာတိသံသာရော၊ နတ္ထိ ဒါနိ ပုနဗ္ဘဝေါ’’တိ။

၇. နာဂဒတ္တသုတ္တံ

၂၂၇. ဧကံ သမယံ အာယသ္မာ နာဂဒတ္တော ကောသလေသု ဝိဟရတိ အညတရသ္မိံ ဝနသဏ္ဍေ။ တေန ခေါ ပန သမယေန အာယသ္မာ နာဂဒတ္တော အတိကာလေန ဂါမံ ပဝိသတိ, အတိဒိဝါ ပဋိက္ကမတိ။ အထ ခေါ ယာ တသ္မိံ ဝနသဏ္ဍေ အဓိဝတ္ထာ ဒေဝတာ အာယသ္မတော နာဂဒတ္တဿ အနုကမ္ပိကာ အတ္ထကာမာ အာယသ္မန္တံ နာဂဒတ္တံ သံဝေဇေတုကာမာ ယေနာယသ္မာ နာဂဒတ္တော တေနုပသင်္ကမိ; ဥပသင်္ကမိတွာ အာယသ္မန္တံ နာဂဒတ္တံ ဂါထာဟိ အဇ္ဈဘာသိ –

‘‘ကာလေ ပဝိသ နာဂဒတ္တ၊ ဒိဝါ စ အာဂန္တွာ အတိဝေလစာရီ။

သံသဋ္ဌော ဂဟဋ္ဌေဟိ၊ သမာနသုခဒုက္ခော။

‘‘ဘာယာမိ နာဂဒတ္တံ သုပ္ပဂဗ္ဘံ၊ ကုလေသု ဝိနိဗဒ္ဓံ။

မာ ဟေဝ မစ္စုရညော ဗလဝတော၊ အန္တကဿ ဝသံ ဥပေသီ’’တိ [ဝသမေယျာတိ (သီ. ဣ.)၊ ဝသမေသီတိ (သျာ. ကံ.)]။

အထ ခေါ အာယသ္မာ နာဂဒတ္တော တာယ ဒေဝတာယ သံဝေဇိတော သံဝေဂမာပါဒီတိ။

၈. ကုလဃရဏီသုတ္တံ

၂၂၈. ဧကံ သမယံ အညတရော ဘိက္ခု ကောသလေသု ဝိဟရတိ အညတရသ္မိံ ဝနသဏ္ဍေ။ တေန ခေါ ပန သမယေန သော ဘိက္ခု အညတရသ္မိံ ကုလေ အတိဝေလံ အဇ္ဈောဂါဠှပ္ပတ္တော ဝိဟရတိ။ အထ ခေါ ယာ တသ္မိံ ဝနသဏ္ဍေ အဓိဝတ္ထာ ဒေဝတာ တဿ ဘိက္ခုနော အနုကမ္ပိကာ အတ္ထကာမာ တံ ဘိက္ခုံ သံဝေဇေတုကာမာ ယာ တသ္မိံ ကုလေ ကုလဃရဏီ, တဿာ ဝဏ္ဏံ အဘိနိမ္မိနိတွာ ယေန သော ဘိက္ခု တေနုပသင်္ကမိ; ဥပသင်္ကမိတွာ တံ ဘိက္ခုံ ဂါထာယ အဇ္ဈဘာသိ –

‘‘နဒီတီရေသု သဏ္ဌာနေ၊ သဘာသု ရထိယာသု စ။

ဇနာ သင်္ဂမ္မ မန္တေန္တိ၊ မဉ္စ တဉ္စ [တ္ဝဉ္စ (က.)] ကိမန္တရ’’န္တိ။

‘‘ဗဟူဟိ သဒ္ဒါ ပစ္စူဟာ၊ ခမိတဗ္ဗာ တပဿိနာ။

န တေန မင္ကု ဟောတဗ္ဗံ၊ န ဟိ တေန ကိလိဿတိ။

‘‘ယော စ သဒ္ဒပရိတ္တာသီ၊ ဝနေ ဝါတမိဂေါ ယထာ။

လဟုစိတ္တောတိ တံ အာဟု၊ နာဿ သမ္ပဇ္ဇတေ ဝတ’’န္တိ။

၉. ဝဇ္ဇိပုတ္တသုတ္တံ

၂၂၉. ဧကံ သမယံ အညတရော ဝဇ္ဇိပုတ္တကော ဘိက္ခု ဝေသာလိယံ ဝိဟရတိ အညတရသ္မိံ ဝနသဏ္ဍေ။ တေန ခေါ ပန သမယေန ဝေသာလိယံ ဝဇ္ဇိပုတ္တကော သဗ္ဗရတ္တိစာရော ဟောတိ။ အထ ခေါ သော ဘိက္ခု ဝေသာလိယာ တူရိယ-တာဠိတ-ဝါဒိတ-နိဂ္ဃောသသဒ္ဒံ သုတွာ ပရိဒေဝမာနော တာယံ ဝေလာယံ ဣမံ ဂါထံ အဘာသိ –

‘‘ဧကကာ မယံ အရညေ ဝိဟရာမ၊

အပဝိဒ္ဓံဝ [အပဝိဋ္ဌံဝ (သျာ. ကံ.)] ဝနသ္မိံ ဒါရုကံ။

ဧတာဒိသိကာယ ရတ္တိယာ၊

ကော သု နာမမှေဟိ [နာမ အမှေဟိ (သီ. ဣ.)] ပါပိယော’’တိ။

အထ ခေါ ယာ တသ္မိံ ဝနသဏ္ဍေ အဓိဝတ္ထာ ဒေဝတာ တဿ ဘိက္ခုနော အနုကမ္ပိကာ အတ္ထကာမာ တံ ဘိက္ခုံ သံဝေဇေတုကာမာ ယေန သော ဘိက္ခု တေနုပသင်္ကမိ; ဥပသင်္ကမိတွာ တံ ဘိက္ခုံ ဂါထာယ အဇ္ဈဘာသိ –

‘‘ဧကကောဝ တွံ အရညေ ဝိဟရသိ၊ အပဝိဒ္ဓံဝ ဝနသ္မိံ ဒါရုကံ။

တဿ တေ ဗဟုကာ ပိဟယန္တိ၊ နေရယိကာ ဝိယ သဂ္ဂဂါမိန’’န္တိ။

အထ ခေါ သော ဘိက္ခု တာယ ဒေဝတာယ သံဝေဇိတော သံဝေဂမာပါဒီတိ။

၁၀. သဇ္ဈာယသုတ္တံ

၂၃၀. ဧကံ သမယံ အညတရော ဘိက္ခု ကောသလေသု ဝိဟရတိ အညတရသ္မိံ ဝနသဏ္ဍေ။ တေန ခေါ ပန သမယေန သော ဘိက္ခု ယံ သုဒံ ပုဗ္ဗေ အတိဝေလံ သဇ္ဈာယဗဟုလော ဝိဟရတိ သော အပရေန သမယေန အပ္ပောဿုက္ကော တုဏှီဘူတော သင်္ကသာယတိ။ အထ ခေါ ယာ တသ္မိံ ဝနသဏ္ဍေ အဓိဝတ္ထာ ဒေဝတာ တဿ ဘိက္ခုနော ဓမ္မံ အသုဏန္တီ ယေန သော ဘိက္ခု တေနုပသင်္ကမိ; ဥပသင်္ကမိတွာ တံ ဘိက္ခုံ ဂါထာယ အဇ္ဈဘာသိ –

‘‘ကသ္မာ တုဝံ ဓမ္မပဒါနိ ဘိက္ခု၊ နာဓီယသိ ဘိက္ခူဟိ သံဝသန္တော။

သုတွာန ဓမ္မံ လဘတိပ္ပသာဒံ၊ ဒိဋ္ဌေဝ ဓမ္မေ လဘတိပ္ပသံသ’’န္တိ။

‘‘အဟု ပုရေ ဓမ္မပဒေသု ဆန္ဒော၊ ယာဝ ဝိရာဂေန သမာဂမိမှ။

ယတော ဝိရာဂေန သမာဂမိမှ၊ ယံ ကိဉ္စိ ဒိဋ္ဌံဝ သုတံ မုတံ ဝါ။

အညာယ နိက္ခေပနမာဟု သန္တော’’တိ။

၁၁. အကုသလဝိတက္ကသုတ္တံ

၂၃၁. ဧကံ သမယံ အညတရော ဘိက္ခု ကောသလေသု ဝိဟရတိ အညတရသ္မိံ ဝနသဏ္ဍေ။ တေန ခေါ ပန သမယေန သော ဘိက္ခု ဒိဝါဝိဟာရဂတော ပါပကေ အကုသလေ ဝိတက္ကေ ဝိတက္ကေတိ, သေယျထိဒံ – ကာမဝိတက္ကံ, ဗျာပါဒဝိတက္ကံ, ဝိဟိံသာဝိတက္ကံ။ အထ ခေါ ယာ တသ္မိံ ဝနသဏ္ဍေ အဓိဝတ္ထာ ဒေဝတာ တဿ ဘိက္ခုနော အနုကမ္ပိကာ အတ္ထကာမာ တံ ဘိက္ခုံ သံဝေဇေတုကာမာ ယေန သော ဘိက္ခု တေနုပသင်္ကမိ; ဥပသင်္ကမိတွာ တံ ဘိက္ခုံ ဂါထာဟိ အဇ္ဈဘာသိ –

‘‘အယောနိသော မနသိကာရာ၊ သော ဝိတက္ကေဟိ ခဇ္ဇသိ။

အယောနိသော [အယောနိံ (ဣ. က.)] ပဋိနိဿဇ္ဇ၊ ယောနိသော အနုစိန္တယ။

‘‘သတ္ထာရံ ဓမ္မမာရဗ္ဘ၊ သသံဃံ သီလာနိ အတ္တနော။

အဓိဂစ္ဆသိ ပါမောဇ္ဇံ၊ ဣတိသုခမသံသယံ။

တတော ပါမောဇ္ဇဗဟုလော၊ ဒုက္ခဿန္တံ ကရိဿသီ’’တိ။

အထ ခေါ သော ဘိက္ခု တာယ ဒေဝတာယ သံဝေဇိတော သံဝေဂမာပါဒီတိ။

၁၂. မဇ္ဈန္ဟိကသုတ္တံ

၂၃၂. ဧကံ သမယံ အညတရော ဘိက္ခု ကောသလေသု ဝိဟရတိ အညတရသ္မိံ ဝနသဏ္ဍေ။ အထ ခေါ တသ္မိံ ဝနသဏ္ဍေ အဓိဝတ္ထာ ဒေဝတာ ယေန သော ဘိက္ခု တေနုပသင်္ကမိ; ဥပသင်္ကမိတွာ တဿ ဘိက္ခုနော သန္တိကေ ဣမံ ဂါထံ အဘာသိ –

‘‘ဌိတေ မဇ္ဈန္ဟိကေ ကာလေ၊ သန္နိသီဝေသု [သန္နိသိန္နေသု (သျာ. ကံ. ဣ.)] ပက္ခိသု။

သဏတေဝ ဗြဟာရညံ၊ တံ ဘယံ ပဋိဘာတိ မံ။

‘‘ဌိတေ မဇ္ဈန္ဟိကေ ကာလေ၊ သန္နိသီဝေသု ပက္ခိသု။

သဏတေဝ ဗြဟာရညံ၊ သာ ရတိ ပဋိဘာတိ မ’’န္တိ။

၁၃. ပါကတိန္ဒ္ရိယသုတ္တံ

၂၃၃. ဧကံ သမယံ သမ္ဗဟုလာ ဘိက္ခူ ကောသလေသု ဝိဟရန္တိ အညတရသ္မိံ ဝနသဏ္ဍေ ဥဒ္ဓတာ ဥန္နဠာ စပလာ မုခရာ ဝိကိဏ္ဏဝါစာ မုဋ္ဌဿတိနော အသမ္ပဇာနာ အသမာဟိတာ ဝိဗ္ဘန္တစိတ္တာ ပါကတိန္ဒ္ရိယာ။ အထ ခေါ ယာ တသ္မိံ ဝနသဏ္ဍေ အဓိဝတ္ထာ ဒေဝတာ တေသံ ဘိက္ခူနံ အနုကမ္ပိကာ အတ္ထကာမာ တေ ဘိက္ခူ သံဝေဇေတုကာမာ ယေန တေ ဘိက္ခူ တေနုပသင်္ကမိ; ဥပသင်္ကမိတွာ တေ ဘိက္ခူ ဂါထာဟိ အဇ္ဈဘာသိ –

‘‘သုခဇီဝိနော ပုရေ အာသုံ၊ ဘိက္ခူ ဂေါတမသာဝကာ။

အနိစ္ဆာ ပိဏ္ဍမေသနာ၊ အနိစ္ဆာ သယနာသနံ။

လောကေ အနိစ္စတံ ဉတွာ၊ ဒုက္ခဿန္တံ အကံသု တေ။

‘‘ဒုပ္ပောသံ ကတွာ အတ္တာနံ၊ ဂါမေ ဂါမဏိကာ ဝိယ။

ဘုတွာ ဘုတွာ နိပဇ္ဇန္တိ၊ ပရာဂါရေသု မုစ္ဆိတာ။

‘‘သံဃဿ အဉ္ဇလိံ ကတွာ၊ ဣဓေကစ္စေ ဝဒါမဟံ။

အပဝိဒ္ဓါ [အပဝိဋ္ဌာ (သျာ. ကံ.)] အနာထာ တေ၊ ယထာ ပေတာ တထေဝ တေ။

‘‘ယေ ခေါ ပမတ္တာ ဝိဟရန္တိ၊ တေ မေ သန္ဓာယ ဘာသိတံ။

ယေ အပ္ပမတ္တာ ဝိဟရန္တိ၊ နမော တေသံ ကရောမဟ’’န္တိ။

အထ ခေါ တေ ဘိက္ခူ တာယ ဒေဝတာယ သံဝေဇိတာ သံဝေဂမာပါဒုန္တိ။

၁၄. ဂန္ဓတ္ထေနသုတ္တံ

၂၃၄. ဧကံ သမယံ အညတရော ဘိက္ခု ကောသလေသု ဝိဟရတိ အညတရသ္မိံ ဝနသဏ္ဍေ။ တေန ခေါ ပန သမယေန သော ဘိက္ခု ပစ္ဆာဘတ္တံ ပိဏ္ဍပါတပဋိက္ကန္တော ပေါက္ခရဏိံ ဩဂါဟေတွာ ပဒုမံ ဥပသိင်္ဃတိ။ အထ ခေါ ယာ တသ္မိံ ဝနသဏ္ဍေ အဓိဝတ္ထာ ဒေဝတာ တဿ ဘိက္ခုနော အနုကမ္ပိကာ အတ္ထကာမာ တံ ဘိက္ခုံ သံဝေဇေတုကာမာ ယေန သော ဘိက္ခု တေနုပသင်္ကမိ; ဥပသင်္ကမိတွာ တံ ဘိက္ခုံ ဂါထာယ အဇ္ဈဘာသိ –

‘‘ယမေတံ ဝါရိဇံ ပုပ္ဖံ၊ အဒိန္နံ ဥပသိင်္ဃသိ။

ဧကင်္ဂမေတံ ထေယျာနံ၊ ဂန္ဓတ္ထေနောသိ မာရိသာ’’တိ။

‘‘န ဟရာမိ န ဘဉ္ဇာမိ၊ အာရာ သိင္ဃာမိ ဝါရိဇံ။

အထ ကေန နု ဝဏ္ဏေန၊ ဂန္ဓတ္ထေနောတိ ဝုစ္စတိ။

‘‘ယွာယံ ဘိသာနိ ခနတိ၊ ပုဏ္ဍရီကာနိ ဘဉ္ဇတိ။

ဧဝံ အာကိဏ္ဏကမ္မန္တော၊ ကသ္မာ ဧသော န ဝုစ္စတီ’’တိ။

‘‘အာကိဏ္ဏလုဒ္ဒေါ ပုရိသော၊ ဓါတိစေလံဝ မက္ခိတော။

တသ္မိံ မေ ဝစနံ နတ္ထိ၊ တ္ဝဉ္စာရဟာမိ ဝတ္တဝေ။

‘‘အနင်္ဂဏဿ ပေါသဿ၊ နိစ္စံ သုစိဂဝေသိနော။

ဝါလဂ္ဂမတ္တံ ပါပဿ၊ အဗ္ဘာမတ္တံဝ ခါယတီ’’တိ။

‘‘အဒ္ဓါ မံ ယက္ခ ဇာနာသိ၊ အထော မေ အနုကမ္ပသိ။

ပုနပိ ယက္ခ ဝဇ္ဇာသိ၊ ယဒါ ပဿသိ ဧဒိသ’’န္တိ။

‘‘နေဝ တံ ဥပဇီဝါမ၊ နပိ တေ ဘတကာမှသေ။

တ္ဝမေဝ ဘိက္ခု ဇာနေယျ၊ ယေန ဂစ္ဆေယျ သုဂ္ဂတိ’’န္တိ။

အထ ခေါ သော ဘိက္ခု တာယ ဒေဝတာယ သံဝေဇိတော သံဝေဂမာပါဒီတိ။

ဝနသံယုတ္တံ သမတ္တံ။

တဿုဒ္ဒါနံ –

ဝိဝေကံ ဥပဋ္ဌာနဉ္စ၊ ကဿပဂေါတ္တေန သမ္ဗဟုလာ။

အာနန္ဒော အနုရုဒ္ဓေါ စ၊ နာဂဒတ္တဉ္စ ကုလဃရဏီ။

ဝဇ္ဇိပုတ္တော စ ဝေသာလီ၊ သဇ္ဈာယေန အယောနိသော။

မဇ္ဈန္ဟိကာလမှိ ပါကတိန္ဒ္ရိယ၊ ပဒုမပုပ္ဖေန စုဒ္ဒသ ဘဝေတိ။