၂၁. အဇ္ဈတ္တာရမ္မဏတ္တိက
၁. ပဋိစ္စဝါရ
၁. ပစ္စယာနုလောမ
၁. ဝိဘင်္ဂဝါရ
ဟေတုပစ္စယော
၁. အဇ္ဈတ္တာရမ္မဏံ ဓမ္မံ ပဋိစ္စ အဇ္ဈတ္တာရမ္မဏော ဓမ္မော ဥပ္ပဇ္ဇတိ ဟေတုပစ္စယာ – အဇ္ဈတ္တာရမ္မဏံ ဧကံ ခန္ဓံ ပဋိစ္စ တယော ခန္ဓာ။ပေ.။ ဒွေ ခန္ဓေ။ပေ.။ ပဋိသန္ဓိက္ခဏေ အဇ္ဈတ္တာရမ္မဏံ ဧကံ ခန္ဓံ ပဋိစ္စ တယော ခန္ဓာ။ပေ.။ ဒွေ ခန္ဓေ။ပေ.။။ (၁)
ဗဟိဒ္ဓါရမ္မဏံ ဓမ္မံ ပဋိစ္စ ဗဟိဒ္ဓါရမ္မဏော ဓမ္မော ဥပ္ပဇ္ဇတိ ဟေတုပစ္စယာ – ဗဟိဒ္ဓါရမ္မဏံ ဧကံ ခန္ဓံ ပဋိစ္စ တယော ခန္ဓာ။ပေ.။ ဒွေ ခန္ဓေ။ပေ.။ ပဋိသန္ဓိက္ခဏေ ဗဟိဒ္ဓါရမ္မဏံ ဧကံ ခန္ဓံ ပဋိစ္စ တယော ခန္ဓာ။ပေ.။ ဒွေ ခန္ဓေ။ပေ.။။ (၁)
အာရမ္မဏပစ္စယာဒိ
၂. အဇ္ဈတ္တာရမ္မဏံ ဓမ္မံ ပဋိစ္စ အဇ္ဈတ္တာရမ္မဏော ဓမ္မော ဥပ္ပဇ္ဇတိ အာရမ္မဏပစ္စယာ။ပေ.။ အဝိဂတပစ္စယာ (သံခိတ္တံ)။
၁. ပစ္စယာနုလောမံ
၂. သင်္ချာဝါရော
၃. ဟေတုပစ္စယာ အာရမ္မဏေ ဒွေ (သံခိတ္တံ၊ သဗ္ဗတ္ထ ဒွေ)၊ အဝိဂတေ ဒွေ (ဧဝံ ဂဏေတဗ္ဗံ)။
အနုလောမံ။
၂. ပစ္စယပစ္စနီယံ
၁. ဝိဘင်္ဂဝါရော
နဟေတုပစ္စယော
၄. အဇ္ဈတ္တာရမ္မဏံ ဓမ္မံ ပဋိစ္စ အဇ္ဈတ္တာရမ္မဏော ဓမ္မော ဥပ္ပဇ္ဇတိ နဟေတုပစ္စယာ – အဟေတုကံ အဇ္ဈတ္တာရမ္မဏံ ဧကံ ခန္ဓံ ပဋိစ္စ တယော ခန္ဓာ။ပေ.။ ဒွေ ခန္ဓေ။ပေ.။ အဟေတုကပဋိသန္ဓိက္ခဏေ အဇ္ဈတ္တာရမ္မဏံ ဧကံ ခန္ဓံ ပဋိစ္စ တယော ခန္ဓာ။ပေ.။ ဒွေ ခန္ဓေ။ပေ.။ ဝိစိကိစ္ဆာသဟဂတေ ဥဒ္ဓစ္စသဟဂတေ ခန္ဓေ ပဋိစ္စ ဝိစိကိစ္ဆာသဟဂတော ဥဒ္ဓစ္စသဟဂတော မောဟော။ (၁)
ဗဟိဒ္ဓါရမ္မဏံ ဓမ္မံ ပဋိစ္စ ဗဟိဒ္ဓါရမ္မဏော ဓမ္မော ဥပ္ပဇ္ဇတိ နဟေတုပစ္စယာ – အဟေတုကံ ဗဟိဒ္ဓါရမ္မဏံ ဧကံ ခန္ဓံ ပဋိစ္စ တယော ခန္ဓာ။ပေ.။ ဒွေ ခန္ဓေ။ပေ.။ အဟေတုကပဋိသန္ဓိက္ခဏေ။ပေ.။ ဝိစိကိစ္ဆာသဟဂတေ ဥဒ္ဓစ္စသဟဂတေ ခန္ဓေ ပဋိစ္စ ဝိစိကိစ္ဆာသဟဂတော ဥဒ္ဓစ္စသဟဂတော မောဟော။ (၁)
နအဓိပတိပစ္စယာဒိ
၅. အဇ္ဈတ္တာရမ္မဏံ ဓမ္မံ ပဋိစ္စ အဇ္ဈတ္တာရမ္မဏော ဓမ္မော ဥပ္ပဇ္ဇတိ နအဓိပတိပစ္စယာ ။ (အနုလောမသဟဇာတသဒိသံ၊ နိန္နာနာကရဏံ) နပုရေဇာတပစ္စယာ – အရူပေ အဇ္ဈတ္တာရမ္မဏံ ဧကံ ခန္ဓံ ပဋိစ္စ။ပေ.။ ပဋိသန္ဓိက္ခဏေ။ပေ.။။ (၁)
၆. ဗဟိဒ္ဓါရမ္မဏံ ဓမ္မံ ပဋိစ္စ ဗဟိဒ္ဓါရမ္မဏော ဓမ္မော ဥပ္ပဇ္ဇတိ နပုရေဇာတပစ္စယာ – အရူပေ ဗဟိဒ္ဓါရမ္မဏံ ဧကံ ခန္ဓံ ပဋိစ္စ တယော ခန္ဓာ။ပေ.။။ ပဋိသန္ဓိက္ခဏေ။ပေ.။ နပစ္ဆာဇာတပစ္စယာ။ နအာသေဝနပစ္စယာ။ (သဟဇာတသဒိသံ) နကမ္မပစ္စယာ – အဇ္ဈတ္တာရမ္မဏေ ခန္ဓေ ပဋိစ္စ အဇ္ဈတ္တာရမ္မဏာ စေတနာ။
ဗဟိဒ္ဓါရမ္မဏံ ဓမ္မံ ပဋိစ္စ ဗဟိဒ္ဓါရမ္မဏော ဓမ္မော ဥပ္ပဇ္ဇတိ နကမ္မပစ္စယာ – ဗဟိဒ္ဓါရမ္မဏေ ခန္ဓေ ပဋိစ္စ ဗဟိဒ္ဓါရမ္မဏာ စေတနာ။
နဝိပါကပစ္စယာဒိ
၇. အဇ္ဈတ္တာရမ္မဏံ ဓမ္မံ ပဋိစ္စ အဇ္ဈတ္တာရမ္မဏော ဓမ္မော ဥပ္ပဇ္ဇတိ နဝိပါကပစ္စယာ (ပဋိသန္ဓိ နတ္ထိ)။ နဈာနပစ္စယာ။ပေ.။ ပဉ္စဝိညာဏသဟဂတံ အဇ္ဈတ္တာရမ္မဏံ ဧကံ။ပေ.။။ (၁)
ဗဟိဒ္ဓါရမ္မဏံ ဓမ္မံ ပဋိစ္စ ဗဟိဒ္ဓါရမ္မဏော ဓမ္မော ဥပ္ပဇ္ဇတိ နဈာနပစ္စယာ – ပဉ္စဝိညာဏသဟဂတံ ဗဟိဒ္ဓါရမ္မဏံ ဧကံ ခန္ဓံ ပဋိစ္စ တယော ခန္ဓာ။ပေ.။ နမဂ္ဂပစ္စယာ (နဟေတုသဒိသော။ မောဟော နတ္ထိ)။ နဝိပ္ပယုတ္တပစ္စယာ – အရူပေ အဇ္ဈတ္တာရမ္မဏံ ဧကံ ခန္ဓံ ပဋိစ္စ တယော ခန္ဓာ။ပေ.။။ (၁)
ဗဟိဒ္ဓါရမ္မဏံ ဓမ္မံ ပဋိစ္စ ဗဟိဒ္ဓါရမ္မဏော ဓမ္မော ဥပ္ပဇ္ဇတိ နဝိပ္ပယုတ္တပစ္စယာ – အရူပေ ဗဟိဒ္ဓါရမ္မဏံ ဧကံ ခန္ဓံ ပဋိစ္စ တယော ခန္ဓာ။ပေ.။။ (၁)
၂. ပစ္စယပစ္စနီယံ
၂. သင်္ချာဝါရော
၈. နဟေတုယာ ဒွေ၊ နအဓိပတိယာ ဒွေ၊ နပုရေဇာတေ ဒွေ၊ နပစ္ဆာဇာတေ ဒွေ၊ နအာသေဝနေ နကမ္မေ နဝိပါကေ နဈာနေ နမဂ္ဂေ နဝိပ္ပယုတ္တေ ဒွေ (ဧဝံ ဂဏေတဗ္ဗံ)။
ပစ္စနီယံ။
၃. ပစ္စယာနုလောမပစ္စနီယံ
၉. ဟေတုပစ္စယာ နအဓိပတိယာ ဒွေ။ပေ.။ နဝိပါကေ ဒွေ၊ နဝိပ္ပယုတ္တေ ဒွေ (ဧဝံ ဂဏေတဗ္ဗံ)။
အနုလောမပစ္စနီယံ။
၄. ပစ္စယပစ္စနီယာနုလောမံ
၁၀. နဟေတုပစ္စယာ အာရမ္မဏေ ဒွေ၊ အနန္တရေ ဒွေ၊ သမနန္တရေ ဒွေ။ပေ.။ မဂ္ဂေ ဒွေ။ပေ.။ အဝိဂတေ ဒွေ (ဧဝံ ဂဏေတဗ္ဗံ)။
ပစ္စနီယာနုလောမံ။
ပဋိစ္စဝါရော။
၂-၆. သဟဇာတ-ပစ္စယ-နိဿယ-သံသဋ္ဌ-သမ္ပယုတ္တဝါရော
(သဟဇာတဝါရောပိ ပစ္စယဝါရောပိ နိဿယဝါရောပိ သံသဋ္ဌဝါရောပိ သမ္ပယုတ္တဝါရောပိ ပဋိစ္စဝါရသဒိသာ။)
၇. ပဉှာဝါရော
၁. ပစ္စယာနုလောမံ
၁. ဝိဘင်္ဂဝါရော
ဟေတုပစ္စယော
၁၁. အဇ္ဈတ္တာရမ္မဏော ဓမ္မော အဇ္ဈတ္တာရမ္မဏဿ ဓမ္မဿ ဟေတုပစ္စယေန ပစ္စယော – အဇ္ဈတ္တာရမ္မဏာ ဟေတူ သမ္ပယုတ္တကာနံ ခန္ဓာနံ ဟေတုပစ္စယေန ပစ္စယော။ ပဋိသန္ဓိက္ခဏေ အဇ္ဈတ္တာရမ္မဏာ ဟေတူ သမ္ပယုတ္တကာနံ ခန္ဓာနံ ဟေတုပစ္စယေန ပစ္စယော။ (၁)
ဗဟိဒ္ဓါရမ္မဏော ဓမ္မော ဗဟိဒ္ဓါရမ္မဏဿ ဓမ္မဿ ဟေတုပစ္စယေန ပစ္စယော – ဗဟိဒ္ဓါရမ္မဏာ ဟေတူ သမ္ပယုတ္တကာနံ ခန္ဓာနံ။ပေ.။ ပဋိသန္ဓိက္ခဏေ။ပေ.။။ (၁)
အာရမ္မဏပစ္စယော
၁၂. အဇ္ဈတ္တာရမ္မဏော ဓမ္မော အဇ္ဈတ္တာရမ္မဏဿ ဓမ္မဿ အာရမ္မဏပစ္စယေန ပစ္စယော – အဇ္ဈတ္တံ ဝိညာဏဉ္စာယတနံ ပစ္စဝေက္ခတိ၊ နေဝသညာနာသညာယတနံ ပစ္စဝေက္ခတိ၊ အဇ္ဈတ္တာရမ္မဏံ အဇ္ဈတ္တံ ဒိဗ္ဗံ စက္ခုံ ပစ္စဝေက္ခတိ၊ ဒိဗ္ဗံ သောတဓါတုံ။ပေ.။ ဣဒ္ဓိဝိဓဉာဏံ။ပေ.။ ပုဗ္ဗေနိဝါသာနုဿတိဉာဏံ။ပေ.။ ယထာကမ္မူပဂဉာဏံ။ပေ.။ အနာဂတံသဉာဏံ ပစ္စဝေက္ခတိ။ အရိယာ အဇ္ဈတ္တာရမ္မဏေ ပဟီနေ ကိလေသေ ပစ္စဝေက္ခန္တိ၊ ဝိက္ခမ္ဘိတေ ကိလေသေ ပစ္စဝေက္ခန္တိ၊ ပုဗ္ဗေ သမုဒါစိဏ္ဏေ ကိလေသေ ဇာနန္တိ။ အဇ္ဈတ္တာရမ္မဏေ အဇ္ဈတ္တေ ခန္ဓေ အနိစ္စတော။ပေ.။ ဝိပဿတိ၊ အဿာဒေတိ အဘိနန္ဒတိ၊ တံ အာရဗ္ဘ အဇ္ဈတ္တာရမ္မဏော ရာဂေါ ဥပ္ပဇ္ဇတိ။ပေ.။ ဒေါမနဿံ ဥပ္ပဇ္ဇတိ။ အဇ္ဈတ္တာရမ္မဏာ အဇ္ဈတ္တာ ခန္ဓာ ပုဗ္ဗေနိဝါသာနုဿတိဉာဏဿ၊ ယထာကမ္မူပဂဉာဏဿ၊ အနာဂတံသဉာဏဿ၊ အာဝဇ္ဇနာယ အာရမ္မဏပစ္စယေန ပစ္စယော။ (၁)
အဇ္ဈတ္တာရမ္မဏော ဓမ္မော ဗဟိဒ္ဓါရမ္မဏဿ ဓမ္မဿ အာရမ္မဏပစ္စယေန ပစ္စယော – ဗဟိဒ္ဓါ ဝိညာဏဉ္စာယတနံ ပစ္စဝေက္ခတိ၊ နေဝသညာနာသညာယတနံ ပစ္စဝေက္ခတိ။ အဇ္ဈတ္တာရမ္မဏံ ဗဟိဒ္ဓါ ဒိဗ္ဗံ စက္ခုံ ပစ္စဝေက္ခတိ၊ ဒိဗ္ဗံ သောတဓါတုံ။ပေ.။ ဣဒ္ဓိဝိဓဉာဏံ။ပေ.။ ပုဗ္ဗေနိဝါသာနုဿတိဉာဏံ။ပေ.။ ယထာကမ္မူပဂဉာဏံ။ပေ.။ အနာဂတံသဉာဏံ ပစ္စဝေက္ခတိ၊ အဇ္ဈတ္တာရမ္မဏေ ဗဟိဒ္ဓါ ခန္ဓေ အနိစ္စတော ဒုက္ခတော အနတ္တတော ဝိပဿတိ။ပေ.။ စေတောပရိယဉာဏေန အဇ္ဈတ္တာရမ္မဏဗဟိဒ္ဓါစိတ္တသမင်္ဂိဿ စိတ္တံ ဇာနာတိ၊ အဇ္ဈတ္တာရမ္မဏာ ဗဟိဒ္ဓါ ခန္ဓာ စေတောပရိယဉာဏဿ၊ ပုဗ္ဗေနိဝါသာနုဿတိဉာဏဿ၊ ယထာကမ္မူပဂဉာဏဿ၊ အနာဂတံသဉာဏဿ၊ အာဝဇ္ဇနာယ အာရမ္မဏပစ္စယေန ပစ္စယော။ (၂)
၁၃. ဗဟိဒ္ဓါရမ္မဏော ဓမ္မော ဗဟိဒ္ဓါရမ္မဏဿ ဓမ္မဿ အာရမ္မဏပစ္စယေန ပစ္စယော – ဗဟိဒ္ဓါရမ္မဏံ ဗဟိဒ္ဓါ ဒိဗ္ဗံ စက္ခုံ ပစ္စဝေက္ခတိ၊ ဒိဗ္ဗံ သောတဓါတုံ ပစ္စဝေက္ခတိ။ ဣဒ္ဓိဝိဓဉာဏံ။ပေ.။ စေတောပရိယဉာဏံ။ပေ.။ ပုဗ္ဗေနိဝါသာနုဿတိဉာဏံ။ပေ.။ ယထာကမ္မူပဂဉာဏံ။ပေ.။ အနာဂတံသဉာဏံ ပစ္စဝေက္ခတိ။ ဗဟိဒ္ဓါရမ္မဏေ ဗဟိဒ္ဓါ ခန္ဓေ အနိစ္စတော ဒုက္ခတော အနတ္တတော ဝိပဿတိ။ပေ.။ စေတောပရိယဉာဏေန ဗဟိဒ္ဓါရမ္မဏဗဟိဒ္ဓါစိတ္တသမင်္ဂိဿ စိတ္တံ ဇာနာတိ။ ဗဟိဒ္ဓါရမ္မဏာ ဗဟိဒ္ဓါ ခန္ဓာ စေတောပရိယဉာဏဿ၊ ပုဗ္ဗေနိဝါသာနုဿတိဉာဏဿ၊ ယထာကမ္မူပဂဉာဏဿ၊ အနာဂတံသဉာဏဿ၊ အာဝဇ္ဇနာယ အာရမ္မဏပစ္စယေန ပစ္စယော။ (၁)
ဗဟိဒ္ဓါရမ္မဏော ဓမ္မော အဇ္ဈတ္တာရမ္မဏဿ ဓမ္မဿ အာရမ္မဏပစ္စယေန ပစ္စယော – ဒါနံ ဒတွာ သီလံ သမာဒိယိတွာ ဥပေါသထကမ္မံ ကတွာ တံ ပစ္စဝေက္ခတိ၊ ပုဗ္ဗေ သုစိဏ္ဏာနိ ပစ္စဝေက္ခတိ၊ ဈာနာ ဝုဋ္ဌဟိတွာ ဈာနံ ပစ္စဝေက္ခတိ။ အရိယာ မဂ္ဂါ ဝုဋ္ဌဟိတွာ မဂ္ဂံ ပစ္စဝေက္ခန္တိ၊ ဖလံ ပစ္စဝေက္ခန္တိ၊ ဗဟိဒ္ဓါရမ္မဏေ ပဟီနေ ကိလေသေ ပစ္စဝေက္ခန္တိ၊ ဝိက္ခမ္ဘိတေ ကိလေသေ ပစ္စဝေက္ခန္တိ၊ ပုဗ္ဗေ သမုဒါစိဏ္ဏေ ကိလေသေ ဇာနန္တိ။ ဗဟိဒ္ဓါရမ္မဏံ အဇ္ဈတ္တံ ဒိဗ္ဗံ စက္ခုံ ပစ္စဝေက္ခတိ၊ ဒိဗ္ဗံ သောတဓါတုံ။ ဣဒ္ဓိဝိဓဉာဏံ။ စေတောပရိယဉာဏံ။ ပုဗ္ဗေနိဝါသာနုဿတိဉာဏံ။ ယထာကမ္မူပဂဉာဏံ။ အနာဂတံသဉာဏံ။ ဗဟိဒ္ဓါရမ္မဏေ အဇ္ဈတ္တေ ခန္ဓေ အနိစ္စတော။ပေ.။ ဝိပဿတိ၊ အဿာဒေတိ အဘိနန္ဒတိ၊ တံ အာရဗ္ဘ အဇ္ဈတ္တာရမ္မဏော ရာဂေါ ဥပ္ပဇ္ဇတိ။ပေ.။ ဒေါမနဿံ ဥပ္ပဇ္ဇတိ။ ဗဟိဒ္ဓါရမ္မဏာ အဇ္ဈတ္တာ ခန္ဓာ ဣဒ္ဓိဝိဓဉာဏဿ၊ ပုဗ္ဗေနိဝါသာနုဿတိဉာဏဿ၊ ယထာကမ္မူပဂဉာဏဿ၊ အနာဂတံသဉာဏဿ၊ အာဝဇ္ဇနာယ အာရမ္မဏပစ္စယေန ပစ္စယော။ (၂)
အဓိပတိပစ္စယော
၁၄. အဇ္ဈတ္တာရမ္မဏော ဓမ္မော အဇ္ဈတ္တာရမ္မဏဿ ဓမ္မဿ အဓိပတိပစ္စယေန ပစ္စယော – အာရမ္မဏာဓိပတိ၊ သဟဇာတာဓိပတိ။ အာရမ္မဏာဓိပတိ – အဇ္ဈတ္တံ ဝိညာဏဉ္စာယတနံ ဂရုံ ကတွာ ပစ္စဝေက္ခတိ၊ နေဝသညာနာသညာယတနံ ဂရုံ ကတွာ ပစ္စဝေက္ခတိ။ အဇ္ဈတ္တာရမ္မဏံ အဇ္ဈတ္တံ ဒိဗ္ဗံ စက္ခုံ ဂရုံ ကတွာ။ပေ.။ ဒိဗ္ဗံ သောတဓါတုံ။ပေ.။ ဣဒ္ဓိဝိဓဉာဏံ။ ပုဗ္ဗေနိဝါသာနုဿတိဉာဏံ။ ယထာကမ္မူပဂဉာဏံ။ အနာဂတံသဉာဏံ ဂရုံ ကတွာ။ပေ.။ အဇ္ဈတ္တာရမ္မဏေ အဇ္ဈတ္တေ ခန္ဓေ ဂရုံ ကတွာ အဿာဒေတိ အဘိနန္ဒတိ၊ တံ ဂရုံ ကတွာ အဇ္ဈတ္တာရမ္မဏော ရာဂေါ ဥပ္ပဇ္ဇတိ၊ ဒိဋ္ဌိ ဥပ္ပဇ္ဇတိ။ သဟဇာတာဓိပတိ – အဇ္ဈတ္တာရမ္မဏာဓိပတိ သမ္ပယုတ္တကာနံ ခန္ဓာနံ အဓိပတိပစ္စယေန ပစ္စယော။ (၁)
၁၅. ဗဟိဒ္ဓါရမ္မဏော ဓမ္မော ဗဟိဒ္ဓါရမ္မဏဿ ဓမ္မဿ အဓိပတိပစ္စယေန ပစ္စယော။ သဟဇာတာဓိပတိ – ဗဟိဒ္ဓါရမ္မဏာဓိပတိ သမ္ပယုတ္တကာနံ ခန္ဓာနံ အဓိပတိပစ္စယေန ပစ္စယော။ (၁)
ဗဟိဒ္ဓါရမ္မဏော ဓမ္မော အဇ္ဈတ္တာရမ္မဏဿ ဓမ္မဿ အဓိပတိပစ္စယေန ပစ္စယော။ အာရမ္မဏာဓိပတိ – ဒါနံ ဒတွာ သီလံ သမာဒိယိတွာ ဥပေါသထကမ္မံ ကတွာ တံ ဂရုံ ကတွာ ပစ္စဝေက္ခတိ၊ ပုဗ္ဗေ သုစိဏ္ဏာနိ။ပေ.။ ဈာနာ ဝုဋ္ဌဟိတွာ။ပေ.။ အရိယာ မဂ္ဂါ ဝုဋ္ဌဟိတွာ မဂ္ဂံ။ ဖလံ ဂရုံ ကတွာ ပစ္စဝေက္ခန္တိ။ ဗဟိဒ္ဓါရမ္မဏံ အဇ္ဈတ္တံ ဒိဗ္ဗံ စက္ခုံ ဂရုံ ကတွာ။ပေ.။ ဒိဗ္ဗံ သောတဓါတုံ။ ဣဒ္ဓိဝိဓဉာဏံ။ စေတောပရိယဉာဏံ။ ပုဗ္ဗေနိဝါသာနုဿတိဉာဏံ။ ယထာကမ္မူပဂဉာဏံ။ အနာဂတံသဉာဏံ ဂရုံ ကတွာ ပစ္စဝေက္ခတိ၊ ဗဟိဒ္ဓါရမ္မဏေ အဇ္ဈတ္တေ ခန္ဓေ ဂရုံ ကတွာ အဿာဒေတိ အဘိနန္ဒတိ၊ တံ ဂရုံ ကတွာ အဇ္ဈတ္တာရမ္မဏော ရာဂေါ ဥပ္ပဇ္ဇတိ၊ ဒိဋ္ဌိ ဥပ္ပဇ္ဇတိ။ (၂)
အနန္တရပစ္စယော
၁၆. အဇ္ဈတ္တာရမ္မဏော ဓမ္မော အဇ္ဈတ္တာရမ္မဏဿ ဓမ္မဿ အနန္တရပစ္စယေန ပစ္စယော – ပုရိမာ ပုရိမာ အဇ္ဈတ္တာရမ္မဏာ ခန္ဓာ ပစ္ဆိမာနံ ပစ္ဆိမာနံ အဇ္ဈတ္တာရမ္မဏာနံ ခန္ဓာနံ အနန္တရပစ္စယေန ပစ္စယော။ (၁)
အဇ္ဈတ္တာရမ္မဏော ဓမ္မော ဗဟိဒ္ဓါရမ္မဏဿ ဓမ္မဿ အနန္တရပစ္စယေန ပစ္စယော – အဇ္ဈတ္တာရမ္မဏံ စုတိစိတ္တံ ဗဟိဒ္ဓါရမ္မဏဿ ဥပပတ္တိစိတ္တဿ အနန္တရပစ္စယေန ပစ္စယော။ အဇ္ဈတ္တာရမ္မဏံ ဘဝင်္ဂံ ဗဟိဒ္ဓါရမ္မဏာယ အာဝဇ္ဇနာယ အနန္တရပစ္စယေန ပစ္စယော။ အဇ္ဈတ္တာရမ္မဏာ ခန္ဓာ ဗဟိဒ္ဓါရမ္မဏဿ ဝုဋ္ဌာနဿ အနန္တရပစ္စယေန ပစ္စယော။ အဇ္ဈတ္တာရမ္မဏံ အနုလောမံ ဂေါတြဘုဿ။ အနုလောမံ ဝေါဒါနဿ။ အနုလောမံ ဖလသမာပတ္တိယာ။ နိရောဓါ ဝုဋ္ဌဟန္တဿ။ နေဝသညာနာသညာယတနံ ဖလသမာပတ္တိယာ အနန္တရပစ္စယေန ပစ္စယော။ (၂)
၁၇. ဗဟိဒ္ဓါရမ္မဏော ဓမ္မော ဗဟိဒ္ဓါရမ္မဏဿ ဓမ္မဿ အနန္တရပစ္စယေန ပစ္စယော – ပုရိမာ ပုရိမာ ဗဟိဒ္ဓါရမ္မဏာ ခန္ဓာ ပစ္ဆိမာနံ ပစ္ဆိမာနံ ဗဟိဒ္ဓါရမ္မဏာနံ ခန္ဓာနံ အနန္တရပစ္စယေန ပစ္စယော။ ဗဟိဒ္ဓါရမ္မဏံ အနုလောမံ ဂေါတြဘုဿ။ အနုလောမံ ဝေါဒါနဿ။ ဂေါတြဘု မဂ္ဂဿ။ ဝေါဒါနံ မဂ္ဂဿ။ မဂ္ဂေါ ဖလဿ။ ဖလံ ဖလဿ။ အနုလောမံ ဖလသမာပတ္တိယာ အနန္တရပစ္စယေန ပစ္စယော။ (၁)
ဗဟိဒ္ဓါရမ္မဏော ဓမ္မော အဇ္ဈတ္တာရမ္မဏဿ ဓမ္မဿ အနန္တရပစ္စယေန ပစ္စယော – ဗဟိဒ္ဓါရမ္မဏံ စုတိစိတ္တံ အဇ္ဈတ္တာရမ္မဏဿ ဥပပတ္တိစိတ္တဿ အနန္တရပစ္စယေန ပစ္စယော။ ဗဟိဒ္ဓါရမ္မဏံ ဘဝင်္ဂံ အဇ္ဈတ္တာရမ္မဏာယ အာဝဇ္ဇနာယ အနန္တရပစ္စယေန ပစ္စယော။ ဗဟိဒ္ဓါရမ္မဏာ ခန္ဓာ အဇ္ဈတ္တာရမ္မဏဿ ဝုဋ္ဌာနဿ အနန္တရပစ္စယေန ပစ္စယော။ (၂)
သမနန္တရပစ္စယာဒိ
၁၈. အဇ္ဈတ္တာရမ္မဏော ဓမ္မော အဇ္ဈတ္တာရမ္မဏဿ ဓမ္မဿ သမနန္တရပစ္စယေန ပစ္စယော။ပေ.။ သဟဇာတပစ္စယေန ပစ္စယော။ အညမညပစ္စယေန ပစ္စယော။ နိဿယပစ္စယေန ပစ္စယော။
ဥပနိဿယပစ္စယော
၁၉. အဇ္ဈတ္တာရမ္မဏော ဓမ္မော အဇ္ဈတ္တာရမ္မဏဿ ဓမ္မဿ ဥပနိဿယပစ္စယေန ပစ္စယော – အာရမ္မဏူပနိဿယော၊ အနန္တရူပနိဿယော၊ ပကတူပနိဿယော။ပေ.။။ ပကတူပနိဿယော – အဇ္ဈတ္တာရမ္မဏာ အနိစ္စာနုပဿနာ၊ ဒုက္ခါနုပဿနာ၊ အနတ္တာနုပဿနာ၊ အဇ္ဈတ္တာရမ္မဏာယ အနိစ္စာနုပဿနာယ၊ ဒုက္ခါနုပဿနာယ၊ အနတ္တာနုပဿနာယ ဥပနိဿယပစ္စယေန ပစ္စယော။ (၁)
အဇ္ဈတ္တာရမ္မဏော ဓမ္မော ဗဟိဒ္ဓါရမ္မဏဿ ဓမ္မဿ ဥပနိဿယပစ္စယေန ပစ္စယော – အနန္တရူပနိဿယော၊ ပကတူပနိဿယော။ပေ.။။ ပကတူပနိဿယော – အဇ္ဈတ္တာရမ္မဏာ အနိစ္စာနုပဿနာ၊ ဒုက္ခါနုပဿနာ၊ အနတ္တာနုပဿနာ ဗဟိဒ္ဓါရမ္မဏာယ အနိစ္စာနုပဿနာယ၊ ဒုက္ခါနုပဿနာယ၊ အနတ္တာနုပဿနာယ ဥပနိဿယပစ္စယေန ပစ္စယော။ (၂)
၂၀. ဗဟိဒ္ဓါရမ္မဏော ဓမ္မော ဗဟိဒ္ဓါရမ္မဏဿ ဓမ္မဿ ဥပနိဿယပစ္စယေန ပစ္စယော – အနန္တရူပနိဿယော၊ ပကတူပနိဿယော။ပေ.။။ ပကတူပနိဿယော – ဗဟိဒ္ဓါရမ္မဏာ အနိစ္စာနုပဿနာ၊ ဒုက္ခါနုပဿနာ၊ အနတ္တာနုပဿနာ ဗဟိဒ္ဓါရမ္မဏာယ အနိစ္စာနုပဿနာယ၊ ဒုက္ခါနုပဿနာယ၊ အနတ္တာနုပဿနာယ ဥပနိဿယပစ္စယေန ပစ္စယော။ (၁)
ဗဟိဒ္ဓါရမ္မဏော ဓမ္မော အဇ္ဈတ္တာရမ္မဏဿ ဓမ္မဿ ဥပနိဿယပစ္စယေန ပစ္စယော – အာရမ္မဏူပနိဿယော၊ အနန္တရူပနိဿယော၊ ပကတူပနိဿယော။ပေ.။။ ပကတူပနိဿယော – ဗဟိဒ္ဓါရမ္မဏာ အနိစ္စာနုပဿနာ ၊ ဒုက္ခါနုပဿနာ၊ အနတ္တာနုပဿနာ အဇ္ဈတ္တာရမ္မဏာယ အနိစ္စာနုပဿနာယ၊ ဒုက္ခါနုပဿနာယ၊ အနတ္တာနုပဿနာယ ဥပနိဿယပစ္စယေန ပစ္စယော။ (၂)
အာသေဝနပစ္စယော
၂၁. အဇ္ဈတ္တာရမ္မဏော ဓမ္မော အဇ္ဈတ္တာရမ္မဏဿ ဓမ္မဿ အာသေဝနပစ္စယေန ပစ္စယော – ပုရိမာ ပုရိမာ အဇ္ဈတ္တာရမ္မဏာ ခန္ဓာ ပစ္ဆိမာနံ ပစ္ဆိမာနံ အဇ္ဈတ္တာရမ္မဏာနံ ခန္ဓာနံ အာသေဝနပစ္စယေန ပစ္စယော။ (၁)
အဇ္ဈတ္တာရမ္မဏော ဓမ္မော ဗဟိဒ္ဓါရမ္မဏဿ ဓမ္မဿ အာသေဝနပစ္စယေန ပစ္စယော – အဇ္ဈတ္တာရမ္မဏံ အနုလောမံ ဂေါတြဘုဿ၊ အနုလောမံ ဝေါဒါနဿ အာသေဝနပစ္စယေန ပစ္စယော။ (၂)
ဗဟိဒ္ဓါရမ္မဏော ဓမ္မော ဗဟိဒ္ဓါရမ္မဏဿ ဓမ္မဿ အာသေဝနပစ္စယေန ပစ္စယော – ပုရိမာ ပုရိမာ ဗဟိဒ္ဓါရမ္မဏာ ခန္ဓာ ပစ္ဆိမာနံ ပစ္ဆိမာနံ ဗဟိဒ္ဓါရမ္မဏာနံ ခန္ဓာနံ အာသေဝနပစ္စယေန ပစ္စယော။ ဗဟိဒ္ဓါရမ္မဏံ အနုလောမံ ဂေါတြဘုဿ။ အနုလောမံ ဝေါဒါနဿ။ ဂေါတြဘု မဂ္ဂဿ။ ဝေါဒါနံ မဂ္ဂဿ အာသေဝနပစ္စယေန ပစ္စယော။ (၁)
ကမ္မပစ္စယော
၂၂. အဇ္ဈတ္တာရမ္မဏော ဓမ္မော အဇ္ဈတ္တာရမ္မဏဿ ဓမ္မဿ ကမ္မပစ္စယေန ပစ္စယော – သဟဇာတာ၊ နာနာက္ခဏိကာ။ သဟဇာတာ – အဇ္ဈတ္တာရမ္မဏာ စေတနာ သမ္ပယုတ္တကာနံ ခန္ဓာနံ ကမ္မပစ္စယေန ပစ္စယော။ ပဋိသန္ဓိက္ခဏေ။ပေ.။။ နာနာက္ခဏိကာ – အဇ္ဈတ္တာရမ္မဏာ စေတနာ ဝိပါကာနံ အဇ္ဈတ္တာရမ္မဏာနံ ခန္ဓာနံ ကမ္မပစ္စယေန ပစ္စယော။ (၁)
အဇ္ဈတ္တာရမ္မဏော ဓမ္မော ဗဟိဒ္ဓါရမ္မဏဿ ဓမ္မဿ ကမ္မပစ္စယေန ပစ္စယော။ နာနာက္ခဏိကာ – အဇ္ဈတ္တာရမ္မဏာ စေတနာ ဝိပါကာနံ ဗဟိဒ္ဓါရမ္မဏာနံ ခန္ဓာနံ ကမ္မပစ္စယေန ပစ္စယော။ (၂)
ဗဟိဒ္ဓါရမ္မဏော ဓမ္မော ဗဟိဒ္ဓါရမ္မဏဿ ဓမ္မဿ ကမ္မပစ္စယေန ပစ္စယော – သဟဇာတာ၊ နာနာက္ခဏိကာ။ သဟဇာတာ – ဗဟိဒ္ဓါရမ္မဏာ စေတနာ သမ္ပယုတ္တကာနံ ခန္ဓာနံ ကမ္မပစ္စယေန ပစ္စယော။ ပဋိသန္ဓိက္ခဏေ။ပေ.။။ နာနာက္ခဏိကာ – ဗဟိဒ္ဓါရမ္မဏာ စေတနာ ဝိပါကာနံ ဗဟိဒ္ဓါရမ္မဏာနံ ခန္ဓာနံ ကမ္မပစ္စယေန ပစ္စယော။ (၁)
ဗဟိဒ္ဓါရမ္မဏော ဓမ္မော အဇ္ဈတ္တာရမ္မဏဿ ဓမ္မဿ ကမ္မပစ္စယေန ပစ္စယော။ နာနာက္ခဏိကာ – ဗဟိဒ္ဓါရမ္မဏာ စေတနာ ဝိပါကာနံ အဇ္ဈတ္တာရမ္မဏာနံ ခန္ဓာနံ ကမ္မပစ္စယေန ပစ္စယော။ (၂)
ဝိပါကပစ္စယာဒိ
၂၃. အဇ္ဈတ္တာရမ္မဏော ဓမ္မော အဇ္ဈတ္တာရမ္မဏဿ ဓမ္မဿ ဝိပါကပစ္စယေန ပစ္စယော။ပေ.။ အာဟာရပစ္စယေန ပစ္စယော။ ဣန္ဒြိယပစ္စယေန ပစ္စယော။ ဈာနပစ္စယေန ပစ္စယော ။ မဂ္ဂပစ္စယေန ပစ္စယော။ သမ္ပယုတ္တပစ္စယေန ပစ္စယော။ အတ္ထိပစ္စယေန ပစ္စယော။ နတ္ထိပစ္စယေန ပစ္စယော။ဝိဂတပစ္စယေန ပစ္စယော။ အဝိဂတပစ္စယေန ပစ္စယော။
၁. ပစ္စယာနုလောမံ
၂. သင်္ချာဝါရော
သုဒ္ဓံ
၂၄. ဟေတုယာ ဒွေ၊ အာရမ္မဏေ စတ္တာရိ၊ အဓိပတိယာ တီဏိ၊ အနန္တရေ စတ္တာရိ၊ သမနန္တရေ စတ္တာရိ၊ သဟဇာတေ ဒွေ၊ အညမညေ ဒွေ၊ နိဿယေ ဒွေ၊ ဥပနိဿယေ စတ္တာရိ၊ အာသေဝနေ တီဏိ၊ ကမ္မေ စတ္တာရိ၊ ဝိပါကေ ဒွေ ။ပေ.။ (သဗ္ဗတ္ထ ဒွေ )၊ သမ္ပယုတ္တေ ဒွေ၊ အတ္ထိယာ ဒွေ၊ နတ္ထိယာ စတ္တာရိ၊ ဝိဂတေ စတ္တာရိ၊ အဝိဂတေ ဒွေ (ဧဝံ ဂဏေတဗ္ဗံ)။
အနုလောမံ။
ပစ္စနီယုဒ္ဓါရော
၂၅. အဇ္ဈတ္တာရမ္မဏော ဓမ္မော အဇ္ဈတ္တာရမ္မဏဿ ဓမ္မဿ အာရမ္မဏပစ္စယေန ပစ္စယော။ သဟဇာတပစ္စယေန ပစ္စယော။ ဥပနိဿယပစ္စယေန ပစ္စယော။ ကမ္မပစ္စယေန ပစ္စယော။ (၁)
အဇ္ဈတ္တာရမ္မဏော ဓမ္မော ဗဟိဒ္ဓါရမ္မဏဿ ဓမ္မဿ အာရမ္မဏပစ္စယေန ပစ္စယော။ ဥပနိဿယပစ္စယေန ပစ္စယော။ ကမ္မပစ္စယေန ပစ္စယော။ (၂)
ဗဟိဒ္ဓါရမ္မဏော ဓမ္မော ဗဟိဒ္ဓါရမ္မဏဿ ဓမ္မဿ အာရမ္မဏပစ္စယေန ပစ္စယော။ သဟဇာတပစ္စယေန ပစ္စယော။ ဥပနိဿယပစ္စယေန ပစ္စယော။ ကမ္မပစ္စယေန ပစ္စယော။ (၁)
ဗဟိဒ္ဓါရမ္မဏော ဓမ္မော အဇ္ဈတ္တာရမ္မဏဿ ဓမ္မဿ အာရမ္မဏပစ္စယေန ပစ္စယော။ ဥပနိဿယပစ္စယေန ပစ္စယော။ ကမ္မပစ္စယေန ပစ္စယော။ (၂)
၂. ပစ္စယပစ္စနီယံ
၂. သင်္ချာဝါရော
၂၆. နဟေတုယာ စတ္တာရိ၊ နအာရမ္မဏေ စတ္တာရိ၊ နအဓိပတိယာ စတ္တာရိ၊ နအနန္တရေ စတ္တာရိ (သံခိတ္တံ၊ သဗ္ဗတ္ထ စတ္တာရိ)၊ နပုရေဇာတေ နပစ္ဆာဇာတေ နအာသေဝနေ။ပေ.။ နဝိပ္ပယုတ္တေ စတ္တာရိ။ပေ.။ နောအဝိဂတေ စတ္တာရိ (ဧဝံ ဂဏေတဗ္ဗံ)။
ပစ္စနီယံ။
၃. ပစ္စယာနုလောမပစ္စနီယံ
၂၇. ဟေတုပစ္စယာ နအာရမ္မဏေ ဒွေ၊ နအဓိပတိယာ ဒွေ၊ နအနန္တရေ နသမနန္တရေ နဥပနိဿယေ နအာသေဝနေ နကမ္မေ။ပေ.။ နောနတ္ထိယာ နောဝိဂတေ ဒွေ (သဗ္ဗတ္ထ ဒွေ။ ဧဝံ ဂဏေတဗ္ဗံ)။
အနုလောမပစ္စနီယံ။
၄. ပစ္စယပစ္စနီယာနုလောမံ
၂၈. နဟေတုပစ္စယာ အာရမ္မဏေ စတ္တာရိ၊ အဓိပတိယာ တီဏိ၊ အနန္တရေ စတ္တာရိ၊ သမနန္တရေ စတ္တာရိ၊ သဟဇာတေ အညမညေ နိဿယေ ဒွေ၊ ဥပနိဿယေ စတ္တာရိ၊ အာသေဝနေ တီဏိ၊ ကမ္မေ စတ္တာရိ၊ ဝိပါကေ ဒွေ။ပေ.။ သမ္ပယုတ္တေ ဒွေ၊ အတ္ထိယာ ဒွေ၊ နတ္ထိယာ စတ္တာရိ၊ ဝိဂတေ စတ္တာရိ၊ အဝိဂတေ ဒွေ (ဧဝံ ဂဏေတဗ္ဗံ)။
ပစ္စနီယာနုလောမံ။
ပဉှာဝါရော။
အဇ္ဈတ္တာရမ္မဏတ္တိကံ နိဋ္ဌိတံ။