အတီတတ္တိက

၁၈. အတီတတ္တိက

၇. ပဉှာဝါရ

၁. ပစ္စယာနုလောမ

၁. ဝိဘင်္ဂဝါရ

ဟေတုပစ္စယော

၁. ပစ္စုပ္ပန္နော ဓမ္မော ပစ္စုပ္ပန္နဿ ဓမ္မဿ ဟေတုပစ္စယေန ပစ္စယော – ပစ္စုပ္ပန္နာ ဟေတူ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ ဟေတုပစ္စယေန ပစ္စယော။ ပဋိသန္ဓိက္ခဏေ။ပေ.။။ (၁)

အာရမ္မဏပစ္စယော

၂. အတီတော ဓမ္မော ပစ္စုပ္ပန္နဿ ဓမ္မဿ အာရမ္မဏပစ္စယေန ပစ္စယော – ဒါနံ ဒတွာ သီလံ သမာဒိယိတွာ ဥပေါသထကမ္မံ။ပေ.။ ပစ္စဝေက္ခတိ၊ ပုဗ္ဗေ သုစိဏ္ဏာနိ ပစ္စဝေက္ခတိ၊ ဈာနာ ဝုဋ္ဌဟိတွာ ဈာနံ ပစ္စဝေက္ခတိ။ အရိယာ မဂ္ဂါ ဝုဋ္ဌဟိတွာ မဂ္ဂံ ပစ္စဝေက္ခန္တိ၊ ဖလံ ပစ္စဝေက္ခန္တိ၊ ပဟီနေ ကိလေသေ ပစ္စဝေက္ခန္တိ၊ ဝိက္ခမ္ဘိတေ ကိလေသေ ပစ္စဝေက္ခန္တိ၊ ပုဗ္ဗေ သမုဒါစိဏ္ဏေ ကိလေသေ ဇာနန္တိ။ အတီတံ စက္ခုံ အနိစ္စတော ဒုက္ခတော အနတ္တတော ဝိပဿတိ။ပေ.။ ဒေါမနဿံ ဥပ္ပဇ္ဇတိ။ အတီတံ သောတံ။ပေ.။ ဃာနံ။ ဇိဝှံ။ ကာယံ။ ရူပေ။ သဒ္ဒေ။ ဂန္ဓေ။ ရသေ။ ဖောဋ္ဌဗ္ဗေ။ ဝတ္ထုံ။ အတီတေ ခန္ဓေ အနိစ္စတော ဒုက္ခတော အနတ္တတော ဝိပဿတိ ၊ အဿာဒေတိ အဘိနန္ဒတိ၊ တံ အာရဗ္ဘ ရာဂေါ ဥပ္ပဇ္ဇတိ၊ ဒိဋ္ဌိ ဥပ္ပဇ္ဇတိ၊ ဝိစိကိစ္ဆာ။ ဥဒ္ဓစ္စံ။ ဒေါမနဿံ ဥပ္ပဇ္ဇတိ၊ အာကာသာနဉ္စာယတနံ ဝိညာဏဉ္စာယတနဿ အာရမ္မဏပစ္စယေန ပစ္စယော။ အာကိဉ္စညာယတနံ နေဝသညာနာသညာယတနဿ အာရမ္မဏပစ္စယေန ပစ္စယော။ အတီတာ ခန္ဓာ ဣဒ္ဓိဝိဓဉာဏဿ၊ စေတောပရိယဉာဏဿ၊ ပုဗ္ဗေနိဝါသာနုဿတိဉာဏဿ၊ ယထာကမ္မူပဂဉာဏဿ၊ အာဝဇ္ဇနာယ အာရမ္မဏပစ္စယေန ပစ္စယော။ (၁)

၃. အနာဂတော ဓမ္မော ပစ္စုပ္ပန္နဿ ဓမ္မဿ အာရမ္မဏပစ္စယေန ပစ္စယော – အနာဂတံ စက္ခုံ။ပေ.။ ဝတ္ထုံ။ အနာဂတေ ခန္ဓေ အနိစ္စတော။ပေ.။ ဒေါမနဿံ ဥပ္ပဇ္ဇတိ။ အနာဂတာ ခန္ဓာ ဣဒ္ဓိဝိဓဉာဏဿ၊ စေတောပရိယဉာဏဿ၊ အနာဂတံသဉာဏဿ၊ အာဝဇ္ဇနာယ အာရမ္မဏပစ္စယေန ပစ္စယော။ (၁)

ပစ္စုပ္ပန္နော ဓမ္မော ပစ္စုပ္ပန္နဿ ဓမ္မဿ အာရမ္မဏပစ္စယေန ပစ္စယော – ပစ္စုပ္ပန္နံ စက္ခုံ။ပေ.။ ကာယံ။ ရူပေ။ သဒ္ဒေ။ ဂန္ဓေ။ ရသေ။ ဖောဋ္ဌဗ္ဗေ။ ဝတ္ထုံ။ ပစ္စုပ္ပန္နေ ခန္ဓေ အနိစ္စတော။ပေ.။ ဒေါမနဿံ ဥပ္ပဇ္ဇတိ၊ ဒိဗ္ဗေန စက္ခုနာ ရူပံ ပဿတိ၊ ဒိဗ္ဗာယ သောတဓါတုယာ သဒ္ဒံ သုဏာတိ၊ ရူပါယတနံ စက္ခုဝိညာဏဿ။ပေ.။ ဖောဋ္ဌဗ္ဗာယတနံ ကာယဝိညာဏဿ။ပေ.။ ပစ္စုပ္ပန္နာ ခန္ဓာ ဣဒ္ဓိဝိဓဉာဏဿ၊ အာဝဇ္ဇနာယ အာရမ္မဏပစ္စယေန ပစ္စယော။ (၁)

အဓိပတိပစ္စယော

၄. အတီတော ဓမ္မော ပစ္စုပ္ပန္နဿ ဓမ္မဿ အဓိပတိပစ္စယေန ပစ္စယော ။ အာရမ္မဏာဓိပတိ – ဒါနံ ဒတွာ သီလံ သမာဒိယိတွာ။ပေ.။ ပုဗ္ဗေ သုစိဏ္ဏာနိ ဂရုံ ကတွာ ပစ္စဝေက္ခတိ၊ ဈာနာ ဝုဋ္ဌဟိတွာ ဈာနံ ဂရုံ ကတွာ ပစ္စဝေက္ခတိ။ အရိယာ မဂ္ဂါ ဝုဋ္ဌဟိတွာ မဂ္ဂံ ဂရုံ ကတွာ ပစ္စဝေက္ခန္တိ၊ ဖလံ ဂရုံ ကတွာ ပစ္စဝေက္ခန္တိ။ အတီတံ စက္ခုံ။ပေ.။ ကာယံ။ ရူပေ။ သဒ္ဒေ။ ဂန္ဓေ။ ရသေ။ ဖောဋ္ဌဗ္ဗေ။ ဝတ္ထုံ။ အတီတေ ခန္ဓေ ဂရုံ ကတွာ အဿာဒေတိ အဘိနန္ဒတိ၊ တံ ဂရုံ ကတွာ ရာဂေါ ဥပ္ပဇ္ဇတိ၊ ဒိဋ္ဌိ ဥပ္ပဇ္ဇတိ။ (၁) အနာဂတော ဓမ္မော ပစ္စုပ္ပန္နဿ ဓမ္မဿ အဓိပတိပစ္စယေန ပစ္စယော။ အာရမ္မဏာဓိပတိ – အနာဂတံ စက္ခုံ။ပေ.။ ဝတ္ထုံ။ အနာဂတေ ခန္ဓေ ဂရုံ ကတွာ အဿာဒေတိ အဘိနန္ဒတိ၊ တံ ဂရုံ ကတွာ ရာဂေါ ဥပ္ပဇ္ဇတိ၊ ဒိဋ္ဌိ ဥပ္ပဇ္ဇတိ။ (၁)

ပစ္စုပ္ပန္နော ဓမ္မော ပစ္စုပ္ပန္နဿ ဓမ္မဿ အဓိပတိပစ္စယေန ပစ္စယော – အာရမ္မဏာဓိပတိ၊ သဟဇာတာဓိပတိ။ အာရမ္မဏာဓိပတိ – ပစ္စုပ္ပန္နံ စက္ခုံ။ပေ.။ ဝတ္ထုံ။ ပစ္စုပ္ပန္နေ ခန္ဓေ ဂရုံ ကတွာ အဿာဒေတိ အဘိနန္ဒတိ၊ တံ ဂရုံ ကတွာ ရာဂေါ ဥပ္ပဇ္ဇတိ၊ ဒိဋ္ဌိ ဥပ္ပဇ္ဇတိ။ သဟဇာတာဓိပတိ – ပစ္စုပ္ပန္နာဓိပတိ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ အဓိပတိပစ္စယေန ပစ္စယော။ (၁)

အနန္တရပစ္စယော

၅. အတီတော ဓမ္မော ပစ္စုပ္ပန္နဿ ဓမ္မဿ အနန္တရပစ္စယေန ပစ္စယော – ပုရိမာ ပုရိမာ အတီတာ ခန္ဓာ ပစ္ဆိမာနံ ပစ္ဆိမာနံ ပစ္စုပ္ပန္နာနံ ခန္ဓာနံ အနန္တရပစ္စယေန ပစ္စယော။ အနုလောမံ ဂေါတြဘုဿ။ အနုလောမံ ဝေါဒါနဿ။ ဂေါတြဘု မဂ္ဂဿ။ ဝေါဒါနံ မဂ္ဂဿ။ မဂ္ဂေါ ဖလဿ။ ဖလံ ဖလဿ။ အနုလောမံ ဖလသမာပတ္တိယာ။ နိရောဓါ ဝုဋ္ဌဟန္တဿ နေဝသညာနာသညာယတနံ ဖလသမာပတ္တိယာ အနန္တရပစ္စယေန ပစ္စယော။ (၁)

သမနန္တရပစ္စယော

၆. အတီတော ဓမ္မော ပစ္စုပ္ပန္နဿ ဓမ္မဿ သမနန္တရပစ္စယေန ပစ္စယော (အနန္တရသဒိသံ)။ (၁)

သဟဇာတပစ္စယာဒိ

၇. ပစ္စုပ္ပန္နော ဓမ္မော ပစ္စုပ္ပန္နဿ ဓမ္မဿ သဟဇာတပစ္စယေန ပစ္စယော။ အညမညပစ္စယေန ပစ္စယော။ နိဿယပစ္စယေန ပစ္စယော (သံခိတ္တံ)။ (၁)

ဥပနိဿယပစ္စယော

၈. အတီတော ဓမ္မော ပစ္စုပ္ပန္နဿ ဓမ္မဿ ဥပနိဿယပစ္စယေန ပစ္စယော – အာရမ္မဏူပနိဿယော၊ အနန္တရူပနိဿယော၊ ပကတူပနိဿယော။ပေ.။။ ပကတူပနိဿယော – အတီတံ သဒ္ဓံ ဥပနိဿာယ ဒါနံ ဒေတိ၊ သီလံ သမာဒိယတိ၊ ဥပေါသထကမ္မံ ကရောတိ၊ ဈာနံ ဥပ္ပါဒေတိ၊ ဝိပဿနံ။ မဂ္ဂံ။ အဘိညံ။ သမာပတ္တိံ ဥပ္ပါဒေတိ၊ မာနံ ဇပ္ပေတိ၊ ဒိဋ္ဌိံ ဂဏှာတိ။ အတီတံ သီလံ။ပေ.။ ပညံ။ ရာဂံ။ပေ.။ ပတ္ထနံ။ ကာယိကံ သုခံ။ ကာယိကံ ဒုက္ခံ ဥပနိဿာယ ဒါနံ ဒေတိ သီလံ သမာဒိယတိ၊ ဥပေါသထကမ္မံ။ပေ.။ သမာပတ္တိံ ဥပ္ပါဒေတိ၊ ပါဏံ ဟနတိ။ပေ.။ သံဃံ ဘိန္ဒတိ။ အတီတာ သဒ္ဓါ။ပေ.။ ပညာ၊ ရာဂေါ။ပေ.။ ပတ္ထနာ၊ ကာယိကံ သုခံ။ ကာယိကံ ဒုက္ခံ။ ပစ္စုပ္ပန္နာယ သဒ္ဓါယ။ပေ.။ ပညာယ၊ ရာဂဿ။ပေ.။ ပတ္ထနာယ။ပေ.။ ဖလသမာပတ္တိယာ ဥပနိဿယပစ္စယေန ပစ္စယော။ (၁)

အနာဂတော ဓမ္မော ပစ္စုပ္ပန္နဿ ဓမ္မဿ ဥပနိဿယပစ္စယေန ပစ္စယော – အာရမ္မဏူပနိဿယော၊ ပကတူပနိဿယော။ပေ.။။ ပကတူပနိဿယော – အနာဂတံ စက္ခုသမ္ပဒံ ပတ္ထယမာနော။ပေ.။ သောတသမ္ပဒံ။ ဃာနသမ္ပဒံ ဇိဝှာသမ္ပဒံ။ ကာယသမ္ပဒံ။ ဝဏ္ဏသမ္ပဒံ။ သဒ္ဒသမ္ပဒံ။ ဂန္ဓသမ္ပဒံ။ ရသသမ္ပဒံ။ ဖောဋ္ဌဗ္ဗသမ္ပဒံ။ပတ္ထယမာနော။ပေ.။ အနာဂတေ ခန္ဓေ ပတ္ထယမာနော ဒါနံ ဒေတိ၊ သီလံ သမာဒိယတိ၊ ဥပေါသထကမ္မံ။ အနာဂတာ စက္ခုသမ္ပဒါ။ပေ.။ ဝဏ္ဏသမ္ပဒါ။ပေ.။ ဖောဋ္ဌဗ္ဗသမ္ပဒါ။ အနာဂတာ ခန္ဓာ ပစ္စုပ္ပန္နာယ သဒ္ဓါယ။ပေ.။ ပညာယ၊ ကာယိကဿ သုခဿ၊ ကာယိကဿ ဒုက္ခဿ၊ မဂ္ဂဿ၊ ဖလသမာပတ္တိယာ ဥပနိဿယပစ္စယေန ပစ္စယော။ (၁)

ပစ္စုပ္ပန္နော ဓမ္မော ပစ္စုပ္ပန္နဿ ဓမ္မဿ ဥပနိဿယပစ္စယေန ပစ္စယော – အာရမ္မဏူပနိဿယော၊ ပကတူပနိဿယော။ပေ.။။ ပကတူပနိဿယော – ပစ္စုပ္ပန္နံ ဥတုံ ဥပနိဿာယ ဈာနံ ဥပ္ပါဒေတိ၊ ဝိပဿနံ။ပေ.။ ပစ္စုပ္ပန္နံ ဘောဇနံ သေနာသနံ ဥပနိဿာယ ဈာနံ ဥပ္ပါဒေတိ။ပေ.။ သမာပတ္တိံ ဥပ္ပါဒေတိ။ ပစ္စုပ္ပန္နံ ဥတု။ ဘောဇနံ။ သေနာသနံ ပစ္စုပ္ပန္နာယ သဒ္ဓါယ။ပေ.။ ပညာယ ကာယိကဿ။ပေ.။ ဖလသမာပတ္တိယာ ဥပနိဿယပစ္စယေန ပစ္စယော။ (၁)

ပုရေဇာတပစ္စယော

၉. ပစ္စုပ္ပန္နော ဓမ္မော ပစ္စုပ္ပန္နဿ ဓမ္မဿ ပုရေဇာတပစ္စယေန ပစ္စယော – အာရမ္မဏပုရေဇာတံ၊ ဝတ္ထုပုရေဇာတံ။ အာရမ္မဏပုရေဇာတံ – စက္ခုံ။ပေ.။ ဝတ္ထုံ အနိစ္စတော။ပေ.။ ဒေါမနဿံ ဥပ္ပဇ္ဇတိ၊ ဒိဗ္ဗေန စက္ခုနာ ရူပံ ပဿတိ၊ ဒိဗ္ဗာယ သောတဓါတုယာ သဒ္ဒံ သုဏာတိ၊ ရူပါယတနံ စက္ခုဝိညာဏဿ။ပေ.။ ဖောဋ္ဌဗ္ဗာယတနံ ကာယဝိညာဏဿ ပုရေဇာတပစ္စယေန ပစ္စယော။ ဝတ္ထုပုရေဇာတံ – စက္ခါယတနံ စက္ခုဝိညာဏဿ။ပေ.။ ကာယာယတနံ ကာယဝိညာဏဿ။ ဝတ္ထု ပစ္စုပ္ပန္နာနံ ခန္ဓာနံ ပုရေဇာတပစ္စယေန ပစ္စယော။ (၁)

ပစ္ဆာဇာတပစ္စယော

၁၀. ပစ္စုပ္ပန္နော ဓမ္မော ပစ္စုပ္ပန္နဿ ဓမ္မဿ ပစ္ဆာဇာတပစ္စယေန ပစ္စယော – ပစ္ဆာဇာတာ ပစ္စုပ္ပန္နာ ခန္ဓာ ပုရေဇာတဿ ဣမဿ ကာယဿ ပစ္ဆာဇာတပစ္စယေန ပစ္စယော။ (၁)

အာသေဝနပစ္စယော

၁၁. အတီတော ဓမ္မော ပစ္စုပ္ပန္နဿ ဓမ္မဿ အာသေဝနပစ္စယေန ပစ္စယော – ပုရိမာ ပုရိမာ အတီတာ ခန္ဓာ ပစ္ဆိမာနံ ပစ္ဆိမာနံ ပစ္စုပ္ပန္နာနံ ခန္ဓာနံ အာသေဝနပစ္စယေန ပစ္စယော။ အနုလောမံ ဂေါတြဘုဿ။ အနုလောမံ ဝေါဒါနဿ။ ဂေါတြဘု မဂ္ဂဿ။ ဝေါဒါနံ မဂ္ဂဿ အာသေဝနပစ္စယေန ပစ္စယော။ (၁)

ကမ္မပစ္စယော

၁၂. အတီတော ဓမ္မော ပစ္စုပ္ပန္နဿ ဓမ္မဿ ကမ္မပစ္စယေန ပစ္စယော။ နာနာက္ခဏိကာ – အတီတာ စေတနာ ပစ္စုပ္ပန္နာနံ ဝိပါကာနံ ခန္ဓာနံ ကဋတ္တာ စ ရူပါနံ ကမ္မပစ္စယေန ပစ္စယော။ (၁)

ပစ္စုပ္ပန္နော ဓမ္မော ပစ္စုပ္ပန္နဿ ဓမ္မဿ ကမ္မပစ္စယေန ပစ္စယော – ပစ္စုပ္ပန္နာ စေတနာ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ ကမ္မပစ္စယေန ပစ္စယော။ ပဋိသန္ဓိက္ခဏေ ပစ္စုပ္ပန္နာ စေတနာ သမ္ပယုတ္တကာနံ ခန္ဓာနံ ကဋတ္တာ စ ရူပါနံ ကမ္မပစ္စယေန ပစ္စယော။ (၁)

ဝိပါကပစ္စယော

၁၃. ပစ္စုပ္ပန္နော ဓမ္မော ပစ္စုပ္ပန္နဿ ဓမ္မဿ ဝိပါကပစ္စယေန ပစ္စယော – ဝိပါကော ပစ္စုပ္ပနော ဧကော ခန္ဓော တိဏ္ဏန္နံ ခန္ဓာနံ စိတ္တသမုဋ္ဌာနာနဉ္စ ရူပါနံ ဝိပါကပစ္စယေန ပစ္စယော။ပေ.။ ဒွေ ခန္ဓာ။ပေ.။ ပဋိသန္ဓိက္ခဏေ။ပေ.။ ခန္ဓာ ဝတ္ထုဿ ဝိပါကပစ္စယေန ပစ္စယော။ (၁)

အာဟာရပစ္စယာဒိ

၁၄. ပစ္စုပ္ပန္နော ဓမ္မော ပစ္စုပ္ပန္နဿ ဓမ္မဿ အာဟာရပစ္စယေန ပစ္စယော။ ဣန္ဒြိယပစ္စယေန ပစ္စယော။ ဈာနပစ္စယေန ပစ္စယော။ မဂ္ဂပစ္စယေန ပစ္စယော။ သမ္ပယုတ္တပစ္စယေန ပစ္စယော။ ဝိပ္ပယုတ္တပစ္စယေန ပစ္စယော – သဟဇာတံ၊ ပုရေဇာတံ၊ ပစ္ဆာဇာတံ။ သဟဇာတာ – ပစ္စုပ္ပန္နာ ခန္ဓာ စိတ္တသမုဋ္ဌာနာနံ ရူပါနံ ဝိပ္ပယုတ္တပစ္စယေန ပစ္စယော။ ပဋိသန္ဓိက္ခဏေ ပစ္စုပ္ပန္နာ ခန္ဓာ ကဋတ္တာရူပါနံ ဝိပ္ပယုတ္တပစ္စယေန ပစ္စယော၊ ခန္ဓာ ဝတ္ထုဿ ဝိပ္ပယုတ္တပစ္စယေန ပစ္စယော၊ ဝတ္ထု ခန္ဓာနံ ဝိပ္ပယုတ္တပစ္စယေန ပစ္စယော။ ပုရေဇာတံ – စက္ခါယတနံ စက္ခုဝိညာဏဿ။ပေ.။ ကာယာယတနံ ကာယဝိညာဏဿ။ ဝတ္ထု ပစ္စုပ္ပန္နာနံ ခန္ဓာနံ ဝိပ္ပယုတ္တပစ္စယေန ပစ္စယော။ ပစ္ဆာဇာတာ – ပစ္စုပ္ပန္နာ ခန္ဓာ ပုရေဇာတဿ ဣမဿ ကာယဿ ဝိပ္ပယုတ္တပစ္စယေန ပစ္စယော။ (၁)

အတ္ထိပစ္စယော

၁၅. ပစ္စုပ္ပန္နော ဓမ္မော ပစ္စုပ္ပန္နဿ ဓမ္မဿ အတ္ထိပစ္စယေန ပစ္စယော (ဥပ္ပန္နတ္တိကေ အတ္ထိသဒိသံ)။ (၁)

နတ္ထိဝိဂတာဝိဂတပစ္စယာ

၁၆. အတီတော ဓမ္မော ပစ္စုပ္ပန္နဿ ဓမ္မဿ နတ္ထိပစ္စယေန ပစ္စယော။ ဝိဂတပစ္စယေန ပစ္စယော။

ပစ္စုပ္ပန္နော ဓမ္မော ပစ္စုပ္ပန္နဿ ဓမ္မဿ အဝိဂတပစ္စယေန ပစ္စယော။ပေ.။။

၁. ပစ္စယာနုလောမံ

၂. သင်္ချာဝါရော

၁၇. ဟေတုယာ ဧကံ၊ အာရမ္မဏေ တီဏိ၊ အဓိပတိယာ တီဏိ၊ အနန္တရေ ဧကံ၊ သမနန္တရေ ဧကံ၊ သဟဇာတေ အညမညေ နိဿယေ ဧကံ၊ ဥပနိဿယေ တီဏိ၊ ပုရေဇာတေ ပစ္ဆာဇာတေ အာသေဝနေ ဧကံ၊ ကမ္မေ ဒွေ၊ ဝိပါကေ အာဟာရေ ဧကံ။ပေ.။ အဝိဂတေ ဧကံ (ဧဝံ ဂဏေတဗ္ဗံ)။

အနုလောမံ။

ပစ္စနီယုဒ္ဓါရော

၁၈. အတီတော ဓမ္မော ပစ္စုပ္ပန္နဿ ဓမ္မဿ အာရမ္မဏပစ္စယေန ပစ္စယော။ ဥပနိဿယပစ္စယေန ပစ္စယော။ ကမ္မပစ္စယေန ပစ္စယော။ (၁)

အနာဂတော ဓမ္မော ပစ္စုပ္ပန္နဿ ဓမ္မဿ အာရမ္မဏပစ္စယေန ပစ္စယော။ ဥပနိဿယပစ္စယေန ပစ္စယော။ (၁)

ပစ္စုပ္ပန္နော ဓမ္မော ပစ္စုပ္ပန္နဿ ဓမ္မဿ အာရမ္မဏပစ္စယေန ပစ္စယော။ သဟဇာတပစ္စယေန ပစ္စယော။ ဥပနိဿယပစ္စယေန ပစ္စယော။ ပုရေဇာတပစ္စယေန ပစ္စယော။ ပစ္ဆာဇာတပစ္စယေန ပစ္စယော။ အာဟာရပစ္စယေန ပစ္စယော။ ဣန္ဒြိယပစ္စယေန ပစ္စယော။ (၁)

၂. ပစ္စယပစ္စနီယံ

၂. သင်္ချာဝါရော

၁၉. နဟေတုယာ တီဏိ၊ နအာရမ္မဏေ တီဏိ၊ နအဓိပတိယာ တီဏိ၊ နအနန္တရေ တီဏိ ။ပေ.။ နသမ္ပယုတ္တေ တီဏိ၊ နဝိပ္ပယုတ္တေ တီဏိ၊ နောအတ္ထိယာ ဒွေ၊ နောနတ္ထိယာ တီဏိ၊ နောဝိဂတေ တီဏိ၊ နောအဝိဂတေ ဒွေ (ဧဝံ ဂဏေတဗ္ဗံ)။

ပစ္စနီယံ။

၃. ပစ္စယာနုလောမပစ္စနီယံ

၂၀. ဟေတုပစ္စယာ နအာရမ္မဏေ ဧကံ၊ နအဓိပတိယာ နအနန္တရေ နသမနန္တရေ နအညမညေ နဥပနိဿယေ။ပေ.။ နသမ္ပယုတ္တေ နဝိပ္ပယုတ္တေ နောနတ္ထိယာ နောဝိဂတေ ဧကံ (ဧဝံ ဂဏေတဗ္ဗံ)။

အနုလောမပစ္စနီယံ။

၄. ပစ္စယပစ္စနီယာနုလောမံ

၂၁. နဟေတုပစ္စယာ အာရမ္မဏေ တီဏိ၊ အဓိပတိယာ တီဏိ၊ အနန္တရေ သမနန္တရေ သဟဇာတေ အညမညေ နိဿယေ ဧကံ၊ ဥပနိဿယေ တီဏိ၊ ပုရေဇာတေ ဧကံ၊ ပစ္ဆာဇာတေ အာသေဝနေ ဧကံ။ပေ.။ ကမ္မေ ဒွေ၊ ဝိပါကေ ဧကံ (ဣမေသု ပဒေသု ဧကံယေဝ)၊ အဝိဂတေ ဧကံ (ဧဝံ ဂဏေတဗ္ဗံ)။

ပစ္စနီယာနုလောမံ။

ပဉှာဝါရော။

အတီတတ္တိကံ နိဋ္ဌိတံ။