ဥပ္ပန္နတ္တိက

၁၇. ဥပ္ပန္နတ္တိက

၇. ပဉှာဝါရ

၁. ပစ္စယာနုလောမ

၁. ဝိဘင်္ဂဝါရ

ဟေတုပစ္စယော

၁. ဥပ္ပန္နော ဓမ္မော ဥပ္ပန္နဿ ဓမ္မဿ ဟေတုပစ္စယေန ပစ္စယော – ဥပ္ပန္နာ ဟေတူ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ ဟေတုပစ္စယေန ပစ္စယော။ ပဋိသန္ဓိက္ခဏေ ဥပ္ပန္နာ ဟေတူ သမ္ပယုတ္တကာနံ ခန္ဓာနံ ကဋတ္တာ စ ရူပါနံ ဟေတုပစ္စယေန ပစ္စယော။ (၁)

အာရမ္မဏပစ္စယော

၂. ဥပ္ပန္နော ဓမ္မော ဥပ္ပန္နဿ ဓမ္မဿ အာရမ္မဏပစ္စယေန ပစ္စယော – ဥပ္ပန္နံ စက္ခုံ အနိစ္စတော ဒုက္ခတော အနတ္တတော ဝိပဿတိ၊ အဿာဒေတိ အဘိနန္ဒတိ၊ တံ အာရဗ္ဘ ရာဂေါ ဥပ္ပဇ္ဇတိ၊ ဒိဋ္ဌိ ဥပ္ပဇ္ဇတိ၊ ဝိစိကိစ္ဆာ။ပေ.။ ဥဒ္ဓစ္စံ။ပေ.။ ဒေါမနဿံ ဥပ္ပဇ္ဇတိ။ ဥပ္ပန္နံ သောတံ။ ဃာနံ။ ဇိဝှံ။ ကာယံ။ ရူပေ။ သဒ္ဒေ။ ဂန္ဓေ။ ရသေ။ ဖောဋ္ဌဗ္ဗေ။ ဝတ္ထုံ။ ဥပ္ပန္နေ ခန္ဓေ အနိစ္စတော ဒုက္ခတော အနတ္တတော ဝိပဿတိ။ပေ.။ ဒေါမနဿံ ဥပ္ပဇ္ဇတိ။ ဒိဗ္ဗေန စက္ခုနာ ရူပံ ပဿတိ၊ ဒိဗ္ဗာယ သောတဓါတုယာ သဒ္ဒံ သုဏာတိ၊ ရူပါယတနံ စက္ခုဝိညာဏဿ ။ပေ.။ ဖောဋ္ဌဗ္ဗာယတနံ ကာယဝိညာဏဿ။ပေ.။ ဥပ္ပန္နာ ခန္ဓာ ဣဒ္ဓိဝိဓဉာဏဿ အာဝဇ္ဇနာယ အာရမ္မဏပစ္စယေန ပစ္စယော။ (၁)

၃. အနုပ္ပန္နော ဓမ္မော ဥပ္ပန္နဿ ဓမ္မဿ အာရမ္မဏပစ္စယေန ပစ္စယော – အနုပ္ပန္နေ ရူပေ။ သဒ္ဒေ။ ဂန္ဓေ။ ရသေ။ ဖောဋ္ဌဗ္ဗေ။ အနုပ္ပန္နေ ခန္ဓေ အနိစ္စတော ဒုက္ခတော အနတ္တတော ဝိပဿတိ။ပေ.။ ဒေါမနဿံ ဥပ္ပဇ္ဇတိ။ အနုပ္ပန္နာ ခန္ဓာ ဣဒ္ဓိဝိဓဉာဏဿ၊ စေတောပရိယဉာဏဿ၊ အနာဂတံသဉာဏဿ၊ အာဝဇ္ဇနာယ အာရမ္မဏပစ္စယေန ပစ္စယော။ (၁)

၄. ဥပ္ပါဒီ ဓမ္မော ဥပ္ပန္နဿ ဓမ္မဿ အာရမ္မဏပစ္စယေန ပစ္စယော – ဥပ္ပါဒိံ စက္ခုံ။ပေ.။ ကာယံ။ ရူပေ။ ဂန္ဓေ။ ရသေ။ ဖောဋ္ဌဗ္ဗေ။ ဝတ္ထုံ။ ဥပ္ပါဒီ ခန္ဓေ အနိစ္စတော ဒုက္ခတော အနတ္တတော။ပေ.။ ဒေါမနဿံ ဥပ္ပဇ္ဇတိ။ ဥပ္ပါဒီ ခန္ဓာ ဣဒ္ဓိဝိဓဉာဏဿ၊ စေတောပရိယဉာဏဿ၊ အနာဂတံသဉာဏဿ၊ အာဝဇ္ဇနာယ အာရမ္မဏပစ္စယေန ပစ္စယော။ (၁)

အဓိပတိပစ္စယော

၅. ဥပ္ပန္နော ဓမ္မော ဥပ္ပန္နဿ ဓမ္မဿ အဓိပတိပစ္စယေန ပစ္စယော – အာရမ္မဏာဓိပတိ၊ သဟဇာတာဓိပတိ။ အာရမ္မဏာဓိပတိ – ဥပ္ပန္နံ စက္ခုံ ဂရုံ ကတွာ အဿာဒေတိ အဘိနန္ဒတိ၊ တံ ဂရုံ ကတွာ ရာဂေါ ဥပ္ပဇ္ဇတိ၊ ဒိဋ္ဌိ ဥပ္ပဇ္ဇတိ။ ဥပ္ပန္နံ သောတံ။ ဃာနံ။ ဇိဝှံ။ ကာယံ။ ရူပေ။ သဒ္ဒေ။ ဂန္ဓေ။ ရသေ။ ဖောဋ္ဌဗ္ဗေ။ ဝတ္ထုံ။ ဥပ္ပန္နေ ခန္ဓေ ဂရုံ ကတွာ အဿာဒေတိ အဘိနန္ဒတိ၊ တံ ဂရုံ ကတွာ ရာဂေါ ဥပ္ပဇ္ဇတိ။ပေ.။။ သဟဇာတာဓိပတိ – ဥပ္ပန္နာ အဓိပတိ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ အဓိပတိပစ္စယေန ပစ္စယော။ (၁)

အနုပ္ပန္နော ဓမ္မော ဥပ္ပန္နဿ ဓမ္မဿ အဓိပတိပစ္စယေန ပစ္စယော။ အာရမ္မဏာဓိပတိ – အနုပ္ပန္နေ ရူပေ။ သဒ္ဒေ။ ဂန္ဓေ။ ရသေ။ ဖောဋ္ဌဗ္ဗေ။ အနုပ္ပန္နေ ခန္ဓေ ဂရုံ ကတွာ အဿာဒေတိ အဘိနန္ဒတိ၊ တံ ဂရုံ ကတွာ ရာဂေါ ဥပ္ပဇ္ဇတိ၊ ဒိဋ္ဌိ ဥပ္ပဇ္ဇတိ။ (၁)

ဥပ္ပါဒီ ဓမ္မော ဥပ္ပန္နဿ ဓမ္မဿ အဓိပတိပစ္စယေန ပစ္စယော။ အာရမ္မဏာဓိပတိ – ဥပ္ပါဒိံ စက္ခုံ။ပေ.။ ကာယံ။ ရူပေ။ပေ.။ ဖောဋ္ဌဗ္ဗေ။ ဝတ္ထုံ။ ဥပ္ပါဒီ ခန္ဓေ ဂရုံ ကတွာ အဿာဒေတိ အဘိနန္ဒတိ၊ တံ ဂရုံ ကတွာ ရာဂေါ ဥပ္ပဇ္ဇတိ၊ ဒိဋ္ဌိ ဥပ္ပဇ္ဇတိ။ (၁)

သဟဇာတပစ္စယော

၆. ဥပ္ပန္နော ဓမ္မော ဥပ္ပန္နဿ ဓမ္မဿ သဟဇာတပစ္စယေန ပစ္စယော – ဥပ္ပန္နော ဧကော ခန္ဓော တိဏ္ဏန္နံ ခန္ဓာနံ စိတ္တသမုဋ္ဌာနာနဉ္စ ရူပါနံ သဟဇာတပစ္စယေန ပစ္စယော။ပေ.။ ဒွေ ခန္ဓာ ဒွိန္နံ ခန္ဓာနံ စိတ္တသမုဋ္ဌာနာနဉ္စ ရူပါနံ သဟဇာတပစ္စယေန ပစ္စယော။ ပဋိသန္ဓိက္ခဏေ ဥပ္ပန္နော ဧကော ခန္ဓော တိဏ္ဏန္နံ ခန္ဓာနံ ကဋတ္တာ စ ရူပါနံ သဟဇာတပစ္စယေန ပစ္စယော။ပေ.။ ဒွေ ခန္ဓာ ဒွိန္နံ ခန္ဓာနံ ကဋတ္တာ စ ရူပါနံ သဟဇာတပစ္စယေန ပစ္စယော။ ခန္ဓာ ဝတ္ထုဿ သဟဇာတပစ္စယေန ပစ္စယော။ ဝတ္ထု ခန္ဓာနံ သဟဇာတပစ္စယေန ပစ္စယော။ ဧကံ မဟာဘူတံ တိဏ္ဏန္နံ မဟာဘူတာနံ သဟဇာတပစ္စယေန ပစ္စယော။ပေ.။ ဒွေ မဟာဘူတာ။ပေ.။ မဟာဘူတာ စိတ္တသမုဋ္ဌာနာနံ ရူပါနံ ကဋတ္တာရူပါနံ ဥပါဒါရူပါနံ သဟဇာတပစ္စယေန ပစ္စယော။ ဗာဟိရံ။ အာဟာရသမုဋ္ဌာနံ။ ဥတုသမုဋ္ဌာနံ။ အသညသတ္တာနံ ဧကံ မဟာဘူတံ။ပေ.။ ဒွေ မဟာဘူတာ။ပေ.။ မဟာဘူတာ ကဋတ္တာရူပါနံ ဥပါဒါရူပါနံ သဟဇာတပစ္စယေန ပစ္စယော။ (၁)

အညမညပစ္စယော

၇. ဥပ္ပန္နော ဓမ္မော ဥပ္ပန္နဿ ဓမ္မဿ အညမညပစ္စယေန ပစ္စယော – ဥပ္ပန္နော ဧကော ခန္ဓော တိဏ္ဏန္နံ ခန္ဓာနံ အညမညပစ္စယေန ပစ္စယော။ပေ.။ ဒွေ ခန္ဓာ။ပေ.။ ပဋိသန္ဓိက္ခဏေ ဥပ္ပန္နော ဧကော ခန္ဓော တိဏ္ဏန္နံ ခန္ဓာနံ ဝတ္ထုဿ စ အညမညပစ္စယေန ပစ္စယော။ ဒွေ ခန္ဓာ။ပေ.။ ခန္ဓာ ဝတ္ထုဿ အညမညပစ္စယေန ပစ္စယော။ ဝတ္ထု ခန္ဓာနံ အညမညပစ္စယေန ပစ္စယော။ ဧကံ မဟာဘူတံ။ပေ.။ ဗာဟိရံ။ အာဟာရသမုဋ္ဌာနံ။ ဥတုသမုဋ္ဌာနံ။ အသညသတ္တာနံ ဧကံ မဟာဘူတံ တိဏ္ဏန္နံ မဟာဘူတာနံ အညမညပစ္စယေန ပစ္စယော။ပေ.။ ဒွေ မဟာဘူတာ။ပေ.။။ (၁)

နိဿယပစ္စယော

၈. ဥပ္ပန္နော ဓမ္မော ဥပ္ပန္နဿ ဓမ္မဿ နိဿယပစ္စယေန ပစ္စယော – ဥပ္ပန္နော ဧကော ခန္ဓော တိဏ္ဏန္နံ ခန္ဓာနံ စိတ္တသမုဋ္ဌာနာနဉ္စ ရူပါနံ နိဿယပစ္စယေန ပစ္စယော။ပေ.။ ဒွေ ခန္ဓာ။ပေ.။ ပဋိသန္ဓိက္ခဏေ။ပေ.။ ခန္ဓာ ဝတ္ထုဿ။ပေ.။ ဝတ္ထု ခန္ဓာနံ။ပေ.။ ဧကံ မဟာဘူတံ။ပေ.။ ဗာဟိရံ။ အာဟာရသမုဋ္ဌာနံ။ ဥတုသမုဋ္ဌာနံ။ အသညသတ္တာနံ ဧကံ မဟာဘူတံ။ပေ.။ မဟာဘူတာ စိတ္တသမုဋ္ဌာနာနံ ရူပါနံ ကဋတ္တာရူပါနံ ဥပါဒါရူပါနံ စက္ခါယတနံ စက္ခုဝိညာဏဿ။ပေ.။ ကာယာယတနံ ကာယဝိညာဏဿ။ပေ.။ ဝတ္ထု ဥပ္ပန္နာနံ ခန္ဓာနံ နိဿယပစ္စယေန ပစ္စယော။ (၁)

ဥပနိဿယပစ္စယော

၉. ဥပ္ပန္နော ဓမ္မော ဥပ္ပန္နဿ ဓမ္မဿ ဥပနိဿယပစ္စယေန ပစ္စယော – အာရမ္မဏူပနိဿယော၊ ပကတူပနိဿယော။ပေ.။ ပကတူပနိဿယော – ဥပ္ပန္နံ ဥတုံ ဥပနိဿာယ ဈာနံ ဥပ္ပါဒေတိ၊ ဝိပဿနံ။ပေ.။ မဂ္ဂံ။ပေ.။ အဘိညံ။ပေ.။ သမာပတ္တိံ ဥပ္ပါဒေတိ၊ မာနံ ဇပ္ပေတိ၊ ဒိဋ္ဌိံ ဂဏှာတိ။ ဥပ္ပန္နံ ဘောဇနံ။ပေ.။ သေနာသနံ ဥပနိဿာယ ဈာနံ ဥပ္ပါဒေတိ ဝိပဿနံ။ပေ.။ မဂ္ဂံ။ပေ.။ အဘိညံ။ပေ.။ သမာပတ္တိံ ဥပ္ပါဒေတိ၊ မာနံ ဇပ္ပေတိ၊ ဒိဋ္ဌိံ ဂဏှာတိ။ ဥပ္ပန္နံ ဥတု။ ဘောဇနံ။ သေနာသနံ ဥပ္ပန္နာယ သဒ္ဓါယ။ပေ.။ ပညာယ၊ ကာယိကဿ သုခဿ၊ ကာယိကဿ ဒုက္ခဿ၊ မဂ္ဂဿ၊ ဖလသမာပတ္တိယာ ဥပနိဿယပစ္စယေန ပစ္စယော။ (၁)

အနုပ္ပန္နော ဓမ္မော ဥပ္ပန္နဿ ဓမ္မဿ ဥပနိဿယပစ္စယေန ပစ္စယော – အာရမ္မဏူပနိဿယော၊ ပကတူပနိဿယော။ပေ.။။ ပကတူပနိဿယော – အနုပ္ပန္နံ ဝဏ္ဏသမ္ပဒံ ပတ္ထယမာနော ဒါနံ ဒေတိ၊ သီလံ သမာဒိယတိ၊ ဥပေါသထကမ္မံ ကရောတိ။ အနုပ္ပန္နံ သဒ္ဒသမ္ပဒံ။ ဂန္ဓသမ္ပဒံ။ ရသသမ္ပဒံ။ ဖောဋ္ဌဗ္ဗသမ္ပဒံ။ အနုပ္ပန္နေ ခန္ဓေ ပတ္ထယမာနော ဒါနံ ဒေတိ၊ သီလံ သမာဒိယတိ၊ ဥပေါသထကမ္မံ ကရောတိ။ အနုပ္ပန္နာ ဝဏ္ဏသမ္ပဒါ။ပေ.။ အနုပ္ပန္နာ ခန္ဓာ ဥပ္ပန္နာယ သဒ္ဓါယ။ပေ.။ ပညာယ၊ ကာယိကဿ သုခဿ၊ ကာယိကဿ ဒုက္ခဿ၊ မဂ္ဂဿ၊ ဖလသမာပတ္တိယာ ဥပနိဿယပစ္စယေန ပစ္စယော။ (၁)

ဥပ္ပါဒီ ဓမ္မော ဥပ္ပန္နဿ ဓမ္မဿ ဥပနိဿယပစ္စယေန ပစ္စယော – အာရမ္မဏူပနိဿယော၊ ပကတူပနိဿယော။ပေ.။။ ပကတူပနိဿယော – ဥပ္ပါဒိံ စက္ခုသမ္ပဒံ ပတ္ထယမာနော ဒါနံ ဒေတိ၊ သီလံ သမာဒိယတိ၊ ဥပေါသထကမ္မံ ကရောတိ။ ဥပ္ပါဒိံ သောတသမ္ပဒံ။ပေ.။ ကာယသမ္ပဒံ။ပေ.။ ဝဏ္ဏသမ္ပဒံ ။ ဂန္ဓသမ္ပဒံ။ ရသသမ္ပဒံ။ ဖောဋ္ဌဗ္ဗသမ္ပဒံ။ ဥပ္ပါဒီ ခန္ဓေ ပတ္ထယမာနော ဒါနံ ဒေတိ၊ သီလံ သမာဒိယတိ၊ ဥပေါသထကမ္မံ ကရောတိ။ ဥပ္ပါဒီ စက္ခုသမ္ပဒါ။ပေ.။ ကာယသမ္ပဒါ။ ဝဏ္ဏသမ္ပဒါ။ပေ.။ ဖောဋ္ဌဗ္ဗသမ္ပဒါ။ ဥပ္ပါဒီ ခန္ဓာ ဥပ္ပန္နာယ သဒ္ဓါယ။ပေ.။ ပညာယ၊ ကာယိကဿ သုခဿ၊ ကာယိကဿ ဒုက္ခဿ၊ မဂ္ဂဿ၊ ဖလသမာပတ္တိယာ ဥပနိဿယပစ္စယေန ပစ္စယော။ (၁)

ပုရေဇာတပစ္စယော

၁၀. ဥပ္ပန္နော ဓမ္မော ဥပ္ပန္နဿ ဓမ္မဿ ပုရေဇာတပစ္စယေန ပစ္စယော – အာရမ္မဏပုရေဇာတံ၊ ဝတ္ထုပုရေဇာတံ။ အာရမ္မဏပုရေဇာတံ – စက္ခုံ။ပေ.။ ဝတ္ထုံ အနိစ္စတော ဒုက္ခတော အနတ္တတော ဝိပဿတိ၊ အဿာဒေတိ အဘိနန္ဒတိ၊ တံ အာရဗ္ဘ ရာဂေါ ဥပ္ပဇ္ဇတိ။ပေ.။ ဒေါမနဿံ ဥပ္ပဇ္ဇတိ ဒိဗ္ဗေန စက္ခုနာ ရူပံ ပဿတိ၊ ဒိဗ္ဗာယ သောတဓါတုယာ သဒ္ဒံ သုဏာတိ၊ ရူပါယတနံ စက္ခုဝိညာဏဿ။ပေ.။ ဖောဋ္ဌဗ္ဗာယတနံ ကာယဝိညာဏဿ ပုရေဇာတပစ္စယေန ပစ္စယော။ ဝတ္ထုပုရေဇာတံ – စက္ခါယတနံ စက္ခုဝိညာဏဿ။ပေ.။ ဝတ္ထု ဥပ္ပန္နာနံ ခန္ဓာနံ ပုရေဇာတပစ္စယေန ပစ္စယော။ (၁)

ပစ္ဆာဇာတပစ္စယော

၁၁. ဥပ္ပန္နော ဓမ္မော ဥပ္ပန္နဿ ဓမ္မဿ ပစ္ဆာဇာတပစ္စယေန ပစ္စယော – ပစ္ဆာဇာတာ ဥပ္ပန္နာ ခန္ဓာ ပုရေဇာတဿ ဣမဿ ကာယဿ ပစ္ဆာဇာတပစ္စယေန ပစ္စယော။ (၁)

ကမ္မပစ္စယော

၁၂. ဥပ္ပန္နော ဓမ္မော ဥပ္ပန္နဿ ဓမ္မဿ ကမ္မပစ္စယေန ပစ္စယော – ဥပ္ပန္နာ စေတနာ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ ကမ္မပစ္စယေန ပစ္စယော။ ပဋိသန္ဓိက္ခဏေ ဥပ္ပန္နာ စေတနာ သမ္ပယုတ္တကာနံ ခန္ဓာနံ ကဋတ္တာ စ ရူပါနံ ကမ္မပစ္စယေန ပစ္စယော။ (၁)

ဝိပါကပစ္စယော

၁၃. ဥပ္ပန္နော ဓမ္မော ဥပ္ပန္နဿ ဓမ္မဿ ဝိပါကပစ္စယေန ပစ္စယော – ဝိပါကော ဥပ္ပန္နော ဧကော ခန္ဓော တိဏ္ဏန္နံ ခန္ဓာနံ စိတ္တသမုဋ္ဌာနာနဉ္စ ရူပါနံ ဝိပါကပစ္စယေန ပစ္စယော။ပေ.။ ဒွေ ခန္ဓာ။ပေ.။ ပဋိသန္ဓိက္ခဏေ ဥပ္ပန္နော ဧကော ခန္ဓော တိဏ္ဏန္နံ ခန္ဓာနံ ကဋတ္တာ စ ရူပါနံ။ပေ.။ ဒွေ ခန္ဓာ။ပေ.။ ခန္ဓာ ဝတ္ထုဿ ဝိပါကပစ္စယေန ပစ္စယော။ (၁)

အာဟာရပစ္စယော

၁၄. ဥပ္ပန္နော ဓမ္မော ဥပ္ပန္နဿ ဓမ္မဿ အာဟာရပစ္စယေန ပစ္စယော – ဥပ္ပန္နာ အာဟာရာ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ အာဟာရပစ္စယေန ပစ္စယော။ ပဋိသန္ဓိက္ခဏေ။ပေ.။ ကဗဠီကာရော အာဟာရော ဣမဿ ကာယဿ အာဟာရပစ္စယေန ပစ္စယော။ (၁)

ဣန္ဒြိယပစ္စယော

၁၅. ဥပ္ပန္နော ဓမ္မော ဥပ္ပန္နဿ ဓမ္မဿ ဣန္ဒြိယပစ္စယေန ပစ္စယော – ဥပ္ပန္နာ ဣန္ဒြိယာ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ ဣန္ဒြိယပစ္စယေန ပစ္စယော။ ပဋိသန္ဓိက္ခဏေ။ပေ.။ စက္ခုန္ဒြိယံ စက္ခုဝိညာဏဿ။ပေ.။ ကာယိန္ဒြိယံ ကာယဝိညာဏဿ။ပေ.။ ရူပဇီဝိတိန္ဒြိယံ ကဋတ္တာရူပါနံ ဣန္ဒြိယပစ္စယေန ပစ္စယော။ (၁)

ဈာနပစ္စယာဒိ

၁၆. ဥပ္ပန္နော ဓမ္မော ဥပ္ပန္နဿ ဓမ္မဿ ဈာနပစ္စယေန ပစ္စယော။ မဂ္ဂပစ္စယေန ပစ္စယော။ သမ္ပယုတ္တပစ္စယေန ပစ္စယော။ ဝိပ္ပယုတ္တပစ္စယေန ပစ္စယော – သဟဇာတံ၊ ပုရေဇာတံ၊ ပစ္ဆာဇာတံ။ သဟဇာတာ – ဥပ္ပန္နာ ခန္ဓာ စိတ္တသမုဋ္ဌာနာနံ ရူပါနံ ဝိပ္ပယုတ္တပစ္စယေန ပစ္စယော။ ပဋိသန္ဓိက္ခဏေ ဥပ္ပန္နာ ခန္ဓာ ကဋတ္တာရူပါနံ ဝိပ္ပယုတ္တပစ္စယေန ပစ္စယော။ ခန္ဓာ ဝတ္ထုဿ၊ ဝတ္ထု ခန္ဓာနံ ဝိပ္ပယုတ္တပစ္စယေန ပစ္စယော။ ပုရေဇာတံ – စက္ခါယတနံ စက္ခုဝိညာဏဿ ။ပေ.။ ကာယာယတနံ ကာယဝိညာဏဿ။ ဝတ္ထု ဥပ္ပန္နာနံ ခန္ဓာနံ ဝိပ္ပယုတ္တပစ္စယေန ပစ္စယော။ ပစ္ဆာဇာတာ – ဥပ္ပန္နာ ခန္ဓာ ပုရေဇာတဿ ဣမဿ ကာယဿ ဝိပ္ပယုတ္တပစ္စယေန ပစ္စယော။ (၁)

အတ္ထိပစ္စယော

၁၇. ဥပ္ပန္နော ဓမ္မော ဥပ္ပန္နဿ ဓမ္မဿ အတ္ထိပစ္စယေန ပစ္စယော – သဟဇာတံ၊ ပုရေဇာတံ၊ ပစ္ဆာဇာတံ၊ အာဟာရံ၊ ဣန္ဒြိယံ။ သဟဇာတော – ဥပ္ပန္နော ဧကော ခန္ဓော တိဏ္ဏန္နံ ခန္ဓာနံ စိတ္တသမုဋ္ဌာနာနဉ္စ ရူပါနံ အတ္ထိပစ္စယေန ပစ္စယော။ပေ.။ ဒွေ ခန္ဓာ။ပေ.။ ပဋိသန္ဓိက္ခဏေ။ပေ.။ ဧကံ မဟာဘူတံ။ပေ.။ ဗာဟိရံ။ အာဟာရသမုဋ္ဌာနံ။ ဥတုသမုဋ္ဌာနံ။ အသညသတ္တာနံ။ပေ.။။ ပုရေဇာတံ – စက္ခုံ အနိစ္စတော။ပေ.။ ဝတ္ထုံ အနိစ္စတော။ပေ.။ ဒေါမနဿံ ဥပ္ပဇ္ဇတိ၊ ဒိဗ္ဗေန စက္ခုနာ ရူပံ ပဿတိ၊ ဒိဗ္ဗာယ သောတုဓါတုယာ သဒ္ဒံ သုဏာတိ၊ ရူပါယတနံ စက္ခုဝိညာဏဿ။ပေ.။ ဖောဋ္ဌဗ္ဗာယတနံ ကာယဝိညာဏဿ အတ္ထိပစ္စယေန ပစ္စယော။ စက္ခါယတနံ စက္ခုဝိညာဏဿ။ပေ.။ ကာယာယတနံ ကာယဝိညာဏဿ။ပေ.။ ဝတ္ထု ဥပ္ပန္နာနံ ခန္ဓာနံ အတ္ထိပစ္စယေန ပစ္စယော။ ပစ္ဆာဇာတာ – ဥပ္ပန္နာ ခန္ဓာ ပုရေဇာတဿ ဣမဿ ကာယဿ အတ္ထိပစ္စယေန ပစ္စယော။ ကဗဠီကာရော အာဟာရော ဣမဿ ကာယဿ အတ္ထိပစ္စယေန ပစ္စယော။ ရူပဇီဝိတိန္ဒြိယံ ကဋတ္တာရူပါနံ အတ္ထိပစ္စယေန ပစ္စယော။ (၁)

အဝိဂတပစ္စယော

၁၈. ဥပ္ပန္နော ဓမ္မော ဥပ္ပန္နဿ ဓမ္မဿ အဝိဂတပစ္စယေန ပစ္စယော။ပေ.။။

၁. ပစ္စယာနုလောမံ

၂. သင်္ချာဝါရော

၁၉. ဟေတုယာ ဧကံ၊ အာရမ္မဏေ တီဏိ၊ အဓိပတိယာ တီဏိ၊ သဟဇာတေ ဧကံ၊ အညမညေ ဧကံ၊ နိဿယေ ဧကံ၊ ဥပနိဿယေ တီဏိ၊ ပုရေဇာတေ ဧကံ၊ ပစ္ဆာဇာတေ ကမ္မေ ဝိပါကေ အာဟာရေ ဣန္ဒြိယေ ဈာနေ မဂ္ဂေ သမ္ပယုတ္တေ ဝိပ္ပယုတ္တေ အတ္ထိယာ အဝိဂတေ ဧကံ (ဧဝံ ဂဏေတဗ္ဗံ)။

အနုလောမံ။

ပစ္စနီယုဒ္ဓါရော

၂၀. ဥပ္ပန္နော ဓမ္မော ဥပ္ပန္နဿ ဓမ္မဿ အာရမ္မဏပစ္စယေန ပစ္စယော။ သဟဇာတပစ္စယေန ပစ္စယော။ ဥပနိဿယပစ္စယေန ပစ္စယော။ ပုရေဇာတပစ္စယေန ပစ္စယော။ ပစ္ဆာဇာတပစ္စယေန ပစ္စယော။ အာဟာရပစ္စယေန ပစ္စယော။ ဣန္ဒြိယပစ္စယေန ပစ္စယော။ (၁)

အနုပ္ပန္နော ဓမ္မော ဥပ္ပန္နဿ ဓမ္မဿ အာရမ္မဏပစ္စယေန ပစ္စယော၊ ဥပနိဿယပစ္စယေန ပစ္စယော။ (၁)

ဥပ္ပါဒီ ဓမ္မော ဥပ္ပန္နဿ ဓမ္မဿ အာရမ္မဏပစ္စယေန ပစ္စယော။ ဥပနိဿယပစ္စယေန ပစ္စယော။ (၁)

၂. ပစ္စယပစ္စနီယံ

၂. သင်္ချာဝါရော

၂၁. နဟေတုယာ တီဏိ၊ နအာရမ္မဏေ တီဏိ၊ နအဓိပတိယာ တီဏိ။ပေ.။ နဝိပ္ပယုတ္တေ တီဏိ၊ နောအတ္ထိယာ ဒွေ၊ နောနတ္ထိယာ တီဏိ၊ နောဝိဂတေ တီဏိ၊ နောအဝိဂတေ ဒွေ (ဧဝံ ဂဏေတဗ္ဗံ)။

ပစ္စနီယံ။

၃. ပစ္စယာနုလောမပစ္စနီယံ

၂၂. ဟေတုပစ္စယာ နအာရမ္မဏေ ဧကံ။ပေ.။ နောနတ္ထိယာ နောဝိဂတေ ဧကံ။

အနုလောမပစ္စနီယံ။

၄. ပစ္စနီယာနုလောမံ

၂၃. နဟေတုပစ္စယာ အာရမ္မဏေ တီဏိ၊ အဓိပတိယာ တီဏိ၊ သဟဇာတေ ဧကံ၊ အညမညေ ဧကံ၊ နိဿယေ ဧကံ၊ ဥပနိဿယေ တီဏိ၊ ပုရေဇာတေ ဧကံ၊ ပစ္ဆာဇာတေ ဧကံ၊ ကမ္မေ ဝိပါကေ အာဟာရေ ဣန္ဒြိယေ ဈာနေ မဂ္ဂေ သမ္ပယုတ္တေ ဝိပ္ပယုတ္တေ အတ္ထိယာ အဝိဂတေ ဧကံ။

ပစ္စနီယာနုလောမံ။

ဥပ္ပန္နတ္တိကံ နိဋ္ဌိတံ။