၁၅. မိစ္ဆတ္တနိယတတ္တိက
၁. ပဋိစ္စဝါရ
၁. ပစ္စယာနုလောမ
၁. ဝိဘင်္ဂဝါရ
ဟေတုပစ္စယော
၁. မိစ္ဆတ္တနိယတံ ဓမ္မံ ပဋိစ္စ မိစ္ဆတ္တနိယတော ဓမ္မော ဥပ္ပဇ္ဇတိ ဟေတုပစ္စယာ – မိစ္ဆတ္တနိယတံ ဧကံ ခန္ဓံ ပဋိစ္စ တယော ခန္ဓာ။ပေ.။ ဒွေ ခန္ဓာ။ (၁)
မိစ္ဆတ္တနိယတံ ဓမ္မံ ပဋိစ္စ အနိယတော ဓမ္မော ဥပ္ပဇ္ဇတိ ဟေတုပစ္စယာ – မိစ္ဆတ္တနိယတေ ခန္ဓေ ပဋိစ္စ စိတ္တသမုဋ္ဌာနံ ရူပံ။ (၂)
မိစ္ဆတ္တနိယတံ ဓမ္မံ ပဋိစ္စ မိစ္ဆတ္တနိယတော စ အနိယတော စ ဓမ္မာ ဥပ္ပဇ္ဇန္တိ ဟေတုပစ္စယာ – မိစ္ဆတ္တနိယတံ ဧကံ ခန္ဓံ ပဋိစ္စ တယော ခန္ဓာ စိတ္တသမုဋ္ဌာနဉ္စ ရူပံ။ပေ.။ ဒွေ ခန္ဓေ။ပေ.။။ (၃)
၂. သမ္မတ္တနိယတံ ဓမ္မံ ပဋိစ္စ သမ္မတ္တနိယတော ဓမ္မော ဥပ္ပဇ္ဇတိ ဟေတုပစ္စယာ။ တီဏိ။
၃. အနိယတံ ဓမ္မံ ပဋိစ္စ အနိယတော ဓမ္မော ဥပ္ပဇ္ဇတိ ဟေတုပစ္စယာ – အနိယတံ ဧကံ ခန္ဓံ ပဋိစ္စ တယော ခန္ဓာ စိတ္တသမုဋ္ဌာနဉ္စ ရူပံ။ပေ.။ ဒွေ ခန္ဓေ။ပေ.။ ပဋိသန္ဓိက္ခဏေ အနိယတံ ဧကံ ခန္ဓံ ပဋိစ္စ တယော ခန္ဓာ ကဋတ္တာ စ ရူပံ၊ ဒွေ ခန္ဓေ။ပေ.။ ခန္ဓေ ပဋိစ္စ ဝတ္ထု၊ ဝတ္ထုံ ပဋိစ္စ ခန္ဓာ; ဧကံ မဟာဘူတံ ပဋိစ္စ တယော မဟာဘူတာ။ပေ.။ ဒွေ မဟာဘူတာ၊။ မဟာဘူတေ ပဋိစ္စ စိတ္တသမုဋ္ဌာနံ ရူပံ ကဋတ္တာရူပံ ဥပါဒါရူပံ။ (၁)
၄. မိစ္ဆတ္တနိယတဉ္စ အနိယတဉ္စ ဓမ္မံ ပဋိစ္စ အနိယတော ဓမ္မော ဥပ္ပဇ္ဇတိ ဟေတုပစ္စယာ – မိစ္ဆတ္တနိယတေ ခန္ဓေ စ မဟာဘူတေ စ ပဋိစ္စ စိတ္တသမုဋ္ဌာနံ ရူပံ။ (၁)
သမ္မတ္တနိယတဉ္စ အနိယတဉ္စ ဓမ္မံ ပဋိစ္စ အနိယတော ဓမ္မော ဥပ္ပဇ္ဇတိ ဟေတုပစ္စယာ – သမ္မတ္တနိယတေ ခန္ဓေ စ မဟာဘူတေ စ ပဋိစ္စ စိတ္တသမုဋ္ဌာနံ ရူပံ။ (၁)
အာရမ္မဏပစ္စယော
၅. မိစ္ဆတ္တနိယတံ ဓမ္မံ ပဋိစ္စ မိစ္ဆတ္တနိယတော ဓမ္မော ဥပ္ပဇ္ဇတိ အာရမ္မဏပစ္စယာ – မိစ္ဆတ္တနိယတံ ဧကံ ခန္ဓံ ပဋိစ္စ တယော ခန္ဓာ။ပေ.။ ဒွေ ခန္ဓေ။ပေ.။။ (၁)
သမ္မတ္တနိယတံ ဓမ္မံ ပဋိစ္စ သမ္မတ္တနိယတော ဓမ္မော ဥပ္ပဇ္ဇတိ အာရမ္မဏပစ္စယာ – သမ္မတ္တနိယတံ ဧကံ ခန္ဓံ ပဋိစ္စ တယော ခန္ဓာ။ပေ.။ ဒွေ ခန္ဓေ။ပေ.။။ (၁)
အနိယတံ ဓမ္မံ ပဋိစ္စ အနိယတော ဓမ္မော ဥပ္ပဇ္ဇတိ အာရမ္မဏပစ္စယာ – အနိယတံ ဧကံ ခန္ဓံ ပဋိစ္စ တယော ခန္ဓာ။ပေ.။ ဒွေ ခန္ဓေ။ပေ.။ ပဋိသန္ဓိက္ခဏေ အနိယတံ ဧကံ ခန္ဓံ ပဋိစ္စ တယော ခန္ဓာ။ပေ.။ ဒွေ ခန္ဓေ။ပေ.။ ဝတ္ထုံ ပဋိစ္စ ခန္ဓာ (သဗ္ဗေ ပစ္စယာ ဣမိနာ ကာရဏေန ဝိတ္ထာရေတဗ္ဗာ။ သံခိတ္တံ)။
၁. ပစ္စယာနုလောမံ
၂. သင်္ချာဝါရော
၆. ဟေတုယာ နဝ၊ အာရမ္မဏေ တီဏိ၊ အဓိပတိယာ နဝ၊ အနန္တရေ တီဏိ၊ သမနန္တရေ တီဏိ ၊ သဟဇာတေ နဝ၊ အညမညေ တီဏိ၊ နိဿယေ နဝ၊ ဥပနိဿယေ တီဏိ၊ ပုရေဇာတေ တီဏိ၊ အာသေဝနေ တီဏိ၊ ကမ္မေ နဝ၊ ဝိပါကေ ဧကံ၊ အာဟာရေ နဝ၊ ဣန္ဒြိယေ နဝ၊ ဈာနေ နဝ၊ မဂ္ဂေ နဝ၊ သမ္ပယုတ္တေ တီဏိ၊ ဝိပ္ပယုတ္တေ နဝ၊ အတ္ထိယာ နဝ၊ နတ္ထိယာ တီဏိ၊ ဝိဂတေ တီဏိ၊ အဝိဂတေ နဝ (ဧဝံ ဂဏေတဗ္ဗံ)။
အနုလောမံ။
၂. ပစ္စယပစ္စနီယံ
၁. ဝိဘင်္ဂဝါရော
နဟေတုပစ္စယော
၇. အနိယတံ ဓမ္မံ ပဋိစ္စ အနိယတော ဓမ္မော ဥပ္ပဇ္ဇတိ နဟေတုပစ္စယာ – အဟေတုကံ အနိယတံ ဧကံ ခန္ဓံ ပဋိစ္စ တယော ခန္ဓာ စိတ္တသမုဋ္ဌာနဉ္စ ရူပံ။ပေ.။ ဒွေ ခန္ဓေ။ပေ.။ အဟေတုကပဋိသန္ဓိက္ခဏေ။ပေ.။ ဧကံ မဟာဘူတံ ပဋိစ္စ။ပေ.။ ဗာဟိရံ။ အာဟာရသမုဋ္ဌာနံ။ ဥတုသမုဋ္ဌာနံ။ အသညသတ္တာနံ။ပေ.။ ဝိစိကိစ္ဆာသဟဂတေ ဥဒ္ဓစ္စသဟဂတေ ခန္ဓေ ပဋိစ္စ ဝိစိကိစ္ဆာသဟဂတော ဥဒ္ဓစ္စသဟဂတော မောဟော။ (၁)
နအာရမ္မဏပစ္စယော
၈. မိစ္ဆတ္တနိယတံ ဓမ္မံ ပဋိစ္စ အနိယတော ဓမ္မော ဥပ္ပဇ္ဇတိ နအာရမ္မဏပစ္စယာ – မိစ္ဆတ္တနိယတေ ခန္ဓေ ပဋိစ္စ စိတ္တသမုဋ္ဌာနံ ရူပံ (သံခိတ္တံ)။
နအဓိပတိပစ္စယော
၉. မိစ္ဆတ္တနိယတံ ဓမ္မံ ပဋိစ္စ မိစ္ဆတ္တနိယတော ဓမ္မော ဥပ္ပဇ္ဇတိ နအဓိပတိပစ္စယာ – မိစ္ဆတ္တနိယတေ ခန္ဓေ ပဋိစ္စ မိစ္ဆတ္တနိယတာဓိပတိ။ (၁)
သမ္မတ္တနိယတံ ဓမ္မံ ပဋိစ္စ သမ္မတ္တနိယတော ဓမ္မော ဥပ္ပဇ္ဇတိ နအဓိပတိပစ္စယာ – သမ္မတ္တနိယတေ ခန္ဓေ ပဋိစ္စ သမ္မတ္တနိယတာဓိပတိ။ (၁)
အနိယတံ ဓမ္မံ ပဋိစ္စ အနိယတော ဓမ္မော ဥပ္ပဇ္ဇတိ နအဓိပတိပစ္စယာ – အနိယတံ ဧကံ ခန္ဓံ ပဋိစ္စ တယော ခန္ဓာ စိတ္တသမုဋ္ဌာနဉ္စ ရူပံ။ပေ.။ ဒွေ ခန္ဓေ။ပေ.။ ပဋိသန္ဓိက္ခဏေ။ပေ.။ ခန္ဓေ ပဋိစ္စ ဝတ္ထု၊ ဝတ္ထုံ ပဋိစ္စ ခန္ဓာ; ဧကံ မဟာဘူတံ။ပေ.။ အသညသတ္တာနံ။ပေ.။။ (၁)
နအနန္တရပစ္စယော
၁၀. မိစ္ဆတ္တနိယတံ ဓမ္မံ ပဋိစ္စ အနိယတော ဓမ္မော ဥပ္ပဇ္ဇတိ နအနန္တရပစ္စယာ (သံခိတ္တံ၊ သဗ္ဗာနိ ပစ္စယာနိ ဝိတ္ထာရေတဗ္ဗာနိ)။
၂. ပစ္စယပစ္စနီယံ
၂. သင်္ချာဝါရော
၁၁. နဟေတုယာ ဧကံ၊ နအာရမ္မဏေ ပဉ္စ၊ နအဓိပတိယာ တီဏိ၊ နအနန္တရေ ပဉ္စ၊ နသမနန္တရေ ပဉ္စ၊ နအညမညေ ပဉ္စ၊ နဥပနိဿယေ ပဉ္စ၊ နပုရေဇာတေ ဆ၊ နပစ္ဆာဇာတေ နဝ၊ နအာသေဝနေ ပဉ္စ၊ နကမ္မေ တီဏိ၊ နဝိပါကေ နဝ၊ နအာဟာရေ ဧကံ၊ နဣန္ဒြိယေ ဧကံ၊ နဈာနေ ဧကံ၊ နမဂ္ဂေ ဧကံ၊ နသမ္ပယုတ္တေ ပဉ္စ၊ နဝိပ္ပယုတ္တေ ဒွေ၊ နောနတ္ထိယာ ပဉ္စ၊ နောဝိဂတေ ပဉ္စ (ဧဝံ ဂဏေတဗ္ဗံ)။
ပစ္စနီယံ။
၃. ပစ္စယာနုလောမပစ္စနီယံ
ဟေတုဒုကံ
၁၂. ဟေတုပစ္စယာ နအာရမ္မဏေ ပဉ္စ၊ နအဓိပတိယာ တီဏိ၊ နအနန္တရေ နသမနန္တရေ နအညမညေ နဥပနိဿယေ ပဉ္စ၊ နပုရေဇာတေ ဆ၊ နပစ္ဆာဇာတေ နဝ၊ နအာသေဝနေ ပဉ္စ၊ နကမ္မေ တီဏိ၊ နဝိပါကေ နဝ၊ နသမ္ပယုတ္တေ ပဉ္စ၊ နဝိပ္ပယုတ္တေ ဒွေ၊ နောနတ္ထိယာ ပဉ္စ၊ နောဝိဂတေ ပဉ္စ (ဧဝံ ဂဏေတဗ္ဗံ)။
အနုလောမပစ္စနီယံ။
၄. ပစ္စယပစ္စနီယာနုလောမံ
နဟေတုဒုကံ
၁၃. နဟေတုပစ္စယာ အာရမ္မဏေ ဧကံ၊ အနန္တရေ ဧကံ၊ သမနန္တရေ ဧကံ၊ သဟဇာတေ ဧကံ။ပေ.။ ဝိဂတေ ဧကံ (ဧဝံ ဂဏေတဗ္ဗံ)။
ပစ္စနီယာနုလောမံ။
ပဋိစ္စဝါရော။
၂. သဟဇာတဝါရော
(သဟဇာတဝါရော ပဋိစ္စဝါရသဒိသော။)
၃. ပစ္စယဝါရော
၁. ပစ္စယာနုလောမံ
၁. ဝိဘင်္ဂဝါရော
ဟေတုပစ္စယော
၁၄. မိစ္ဆတ္တနိယတံ ဓမ္မံ ပစ္စယာ မိစ္ဆတ္တနိယတော ဓမ္မော ဥပ္ပဇ္ဇတိ ဟေတုပစ္စယာ။ တီဏိ။
သမ္မတ္တနိယတံ ဓမ္မံ ပစ္စယာ သမ္မတ္တနိယတော ဓမ္မော ဥပ္ပဇ္ဇတိ ဟေတုပစ္စယာ။ တီဏိ။
၁၅. အနိယတံ ဓမ္မံ ပစ္စယာ အနိယတော ဓမ္မော ဥပ္ပဇ္ဇတိ ဟေတုပစ္စယာ – အနိယတံ ဧကံ ခန္ဓံ ပစ္စယာ တယော ခန္ဓာ စိတ္တသမုဋ္ဌာနဉ္စ ရူပံ။ပေ.။ ဒွေ ခန္ဓေ။ပေ.။ ပဋိသန္ဓိက္ခဏေ။ပေ.။ ခန္ဓေ ပစ္စယာ ဝတ္ထု၊ ဝတ္ထုံ ပစ္စယာ ခန္ဓာ; ဧကံ မဟာဘူတံ ပစ္စယာ။ပေ.။ ဝတ္ထုံ ပစ္စယာ အနိယတာ ခန္ဓာ။ (၁)
အနိယတံ ဓမ္မံ ပစ္စယာ မိစ္ဆတ္တနိယတော ဓမ္မော ဥပ္ပဇ္ဇတိ ဟေတုပစ္စယာ – ဝတ္ထုံ ပစ္စယာ မိစ္ဆတ္တနိယတာ ခန္ဓာ။ (၂)
အနိယတံ ဓမ္မံ ပစ္စယာ သမ္မတ္တနိယတော ဓမ္မော ဥပ္ပဇ္ဇတိ ဟေတုပစ္စယာ – ဝတ္ထုံ ပစ္စယာ သမ္မတ္တနိယတာ ခန္ဓာ။ (၃)
အနိယတံ ဓမ္မံ ပစ္စယာ မိစ္ဆတ္တနိယတော စ အနိယတော စ ဓမ္မာ ဥပ္ပဇ္ဇန္တိ ဟေတုပစ္စယာ – ဝတ္ထုံ ပစ္စယာ မိစ္ဆတ္တနိယတာ ခန္ဓာ၊ မဟာဘူတေ ပစ္စယာ စိတ္တသမုဋ္ဌာနံ ရူပံ။ (၄)
အနိယတံ ဓမ္မံ ပစ္စယာ သမ္မတ္တနိယတော စ အနိယတော စ ဓမ္မာ ဥပ္ပဇ္ဇန္တိ ဟေတုပစ္စယာ – ဝတ္ထုံ ပစ္စယာ သမ္မတ္တနိယတာ ခန္ဓာ၊ မဟာဘူတေ ပစ္စယာ စိတ္တသမုဋ္ဌာနံ ရူပံ။ (၅)
၁၆. မိစ္ဆတ္တနိယတဉ္စ အနိယတဉ္စ ဓမ္မံ ပစ္စယာ မိစ္ဆတ္တနိယတော ဓမ္မော ဥပ္ပဇ္ဇတိ ဟေတုပစ္စယာ – မိစ္ဆတ္တနိယတံ ဧကံ ခန္ဓဉ္စ ဝတ္ထုဉ္စ ပစ္စယာ တယော ခန္ဓာ။ပေ.။ ဒွေ ခန္ဓေ။ပေ.။။ (၁)
မိစ္ဆတ္တနိယတဉ္စ အနိယတဉ္စ ဓမ္မံ ပစ္စယာ အနိယတော ဓမ္မော ဥပ္ပဇ္ဇတိ ဟေတုပစ္စယာ – မိစ္ဆတ္တနိယတေ ခန္ဓေ စ မဟာဘူတေ စ ပစ္စယာ စိတ္တသမုဋ္ဌာနံ ရူပံ။ (၂)
မိစ္ဆတ္တနိယတဉ္စ အနိယတဉ္စ ဓမ္မံ ပစ္စယာ မိစ္ဆတ္တနိယတော စ အနိယတော စ ဓမ္မာ ဥပ္ပဇ္ဇန္တိ ဟေတုပစ္စယာ – မိစ္ဆတ္တနိယတံ ဧကံ ခန္ဓဉ္စ ဝတ္ထုဉ္စ ပစ္စယာ တယော ခန္ဓာ။ပေ.။ ဒွေ ခန္ဓေ။ပေ.။ မိစ္ဆတ္တနိယတေ ခန္ဓေ စ မဟာဘူတေ စ ပစ္စယာ စိတ္တသမုဋ္ဌာနံ ရူပံ။ (၃)
သမ္မတ္တနိယတဉ္စ အနိယတဉ္စ ဓမ္မံ ပစ္စယာ သမ္မတ္တနိယတော ဓမ္မော ဥပ္ပဇ္ဇတိ ဟေတုပစ္စယာ (တီဏိ ပဉှာ၊ မိစ္ဆတ္တသဒိသံ)။
အာရမ္မဏပစ္စယာဒိ
၁၇. မိစ္ဆတ္တနိယတံ ဓမ္မံ ပစ္စယာ မိစ္ဆတ္တနိယတော ဓမ္မော ဥပ္ပဇ္ဇတိ အာရမ္မဏပစ္စယာ။ (သံခိတ္တံ၊ ကုသလတ္တိကေ ပစ္စယဝါရသဒိသံ ဝိဘဇိတဗ္ဗံ)။ အဝိဂတပစ္စယာ။
၁. ပစ္စယာနုလောမံ
၂. သင်္ချာဝါရော
၁၈. ဟေတုယာ သတ္တရသ၊ အာရမ္မဏေ သတ္တ၊ အဓိပတိယာ သတ္တရသ၊ အနန္တရေ သတ္တ၊ သမနန္တရေ သတ္တ၊ သဟဇာတေ သတ္တရသ၊ အညမညေ သတ္တ၊ နိဿယေ သတ္တရသ၊ ဥပနိဿယေ သတ္တ၊ ပုရေဇာတေ သတ္တ၊ အာသေဝနေ သတ္တ၊ ကမ္မေ သတ္တရသ၊ ဝိပါကေ ဧကံ၊ အာဟာရေ သတ္တရသ၊ ဣန္ဒြိယေ သတ္တရသ၊ ဈာနေ သတ္တရသ၊ မဂ္ဂေ သတ္တရသ၊ သမ္ပယုတ္တေ သတ္တ၊ ဝိပ္ပယုတ္တေ သတ္တရသ၊ အတ္ထိယာ သတ္တရသ၊ နတ္ထိယာ သတ္တ၊ ဝိဂတေ သတ္တ၊ အဝိဂတေ သတ္တရသ (ဧဝံ ဂဏေတဗ္ဗံ)။
အနုလောမံ။
၂. ပစ္စယပစ္စနီယံ
၁. ဝိဘင်္ဂဝါရော
နဟေတုပစ္စယော
၁၉. အနိယတံ ဓမ္မံ ပစ္စယာ အနိယတော ဓမ္မော ဥပ္ပဇ္ဇတိ နဟေတုပစ္စယာ – အဟေတုကံ အနိယတံ ဧကံ ခန္ဓံ ပစ္စယာ တယော ခန္ဓာ စိတ္တသမုဋ္ဌာနဉ္စ ရူပံ။ပေ.။ ဒွေ ခန္ဓေ။ပေ.။ အဟေတုကပဋိသန္ဓိက္ခဏေ။ပေ.။ ခန္ဓေ ပစ္စယာ ဝတ္ထု၊ ဝတ္ထုံ ပစ္စယာ ခန္ဓာ။ ဧကံ မဟာဘူတံ။ပေ.။ အသညသတ္တာနံ။ပေ.။ စက္ခါယတနံ ပစ္စယာ စက္ခုဝိညာဏံ။ပေ.။ ကာယာယတနံ ပစ္စယာ ကာယဝိညာဏံ။ ဝတ္ထုံ ပစ္စယာ အဟေတုကာ အနိယတာ ခန္ဓာ။ ဝိစိကိစ္ဆာသဟဂတေ ဥဒ္ဓစ္စသဟဂတေ ခန္ဓေ စ ဝတ္ထုဉ္စ ပစ္စယာ ဝိစိကိစ္ဆာသဟဂတော ဥဒ္ဓစ္စသဟဂတော မောဟော။ (၁)
နအာရမ္မဏပစ္စယော
၂၀. မိစ္ဆတ္တနိယတံ ဓမ္မံ ပစ္စယာ အနိယတော ဓမ္မော ဥပ္ပဇ္ဇတိ နအာရမ္မဏပစ္စယာ – မိစ္ဆတ္တနိယတေ ခန္ဓေ ပစ္စယာ စိတ္တသမုဋ္ဌာနံ ရူပံ (ကုသလတ္တိကသဒိသံ၊ ပဉ္စ ကာတဗ္ဗာ)။
နအဓိပတိပစ္စယော
၂၁. မိစ္ဆတ္တနိယတံ ဓမ္မံ ပစ္စယာ မိစ္ဆတ္တနိယတော ဓမ္မော ဥပ္ပဇ္ဇတိ နအဓိပတိပစ္စယာ – မိစ္ဆတ္တနိယတေ ခန္ဓေ ပစ္စယာ မိစ္ဆတ္တနိယတာဓိပတိ။ (၁)
သမ္မတ္တနိယတံ ဓမ္မံ ပစ္စယာ သမ္မတ္တနိယတော ဓမ္မော ဥပ္ပဇ္ဇတိ နအဓိပတိပစ္စယာ – သမ္မတ္တနိယတေ ခန္ဓေ ပစ္စယာ သမ္မတ္တနိယတာဓိပတိ။ (၁)
အနိယတံ ဓမ္မံ ပစ္စယာ အနိယတော ဓမ္မော ဥပ္ပဇ္ဇတိ နအဓိပတိပစ္စယာ – အနိယတံ ဧကံ ခန္ဓံ ပစ္စယာ တယော ခန္ဓာ စိတ္တသမုဋ္ဌာနဉ္စ ရူပံ။ပေ.။ ဒွေ ခန္ဓေ။ပေ.။ ပဋိသန္ဓိက္ခဏေ ။ပေ.။ အသညသတ္တာနံ။ပေ.။ စက္ခါယတနံ ပစ္စယာ စက္ခုဝိညာဏံ။ပေ.။ ကာယာယတနံ ပစ္စယာ ကာယဝိညာဏံ။ ဝတ္ထုံ ပစ္စယာ အနိယတာ ခန္ဓာ။ (၁)
အနိယတံ ဓမ္မံ ပစ္စယာ မိစ္ဆတ္တနိယတော ဓမ္မော ဥပ္ပဇ္ဇတိ နအဓိပတိပစ္စယာ – ဝတ္ထုံ ပစ္စယာ မိစ္ဆတ္တနိယတာဓိပတိ။ (၂)
အနိယတံ ဓမ္မံ ပစ္စယာ သမ္မတ္တနိယတော ဓမ္မော ဥပ္ပဇ္ဇတိ နအဓိပတိပစ္စယာ – ဝတ္ထုံ ပစ္စယာ သမ္မတ္တနိယတာဓိပတိ။ (၃)
မိစ္ဆတ္တနိယတဉ္စ အနိယတဉ္စ ဓမ္မံ ပစ္စယာ မိစ္ဆတ္တနိယတော ဓမ္မော ဥပ္ပဇ္ဇတိ နအဓိပတိပစ္စယာ – မိစ္ဆတ္တနိယတေ ခန္ဓေ စ ဝတ္ထုဉ္စ ပစ္စယာ မိစ္ဆတ္တနိယတာဓိပတိ။ (၁)
သမ္မတ္တနိယတဉ္စ အနိယတဉ္စ ဓမ္မံ ပစ္စယာ သမ္မတ္တနိယတော ဓမ္မော ဥပ္ပဇ္ဇတိ နအဓိပတိပစ္စယာ – သမ္မတ္တနိယတေ ခန္ဓေ စ ဝတ္ထုဉ္စ ပစ္စယာ သမ္မတ္တနိယတာဓိပတိ။ (၁)
နအနန္တရပစ္စယာဒိ
၂၂. မိစ္ဆတ္တနိယတံ ဓမ္မံ ပစ္စယာ အနိယတော ဓမ္မော ဥပ္ပဇ္ဇတိ နအနန္တရပစ္စယာ။ပေ.။ နောနတ္ထိပစ္စယာ။ နောဝိဂတပစ္စယာ။
၂. ပစ္စယပစ္စနီယံ
၂. သင်္ချာဝါရော
၂၃. နဟေတုယာ ဧကံ၊ နအာရမ္မဏေ ပဉ္စ၊ နအဓိပတိယာ သတ္တ၊ နအနန္တရေ ပဉ္စ၊ နသမနန္တရေ ပဉ္စ၊ နအညမညေ ပဉ္စ ၊ နဥပနိဿယေ ပဉ္စ၊ နပုရေဇာတေ ဆ၊ နပစ္ဆာဇာတေ သတ္တရသ၊ နအာသေဝနေ ပဉ္စ၊ နကမ္မေ သတ္တ၊ နဝိပါကေ သတ္တရသ၊ နအာဟာရေ ဧကံ၊ နဣန္ဒြိယေ နဈာနေ နမဂ္ဂေ ဧကံ၊ နသမ္ပယုတ္တေ ပဉ္စ၊ နဝိပ္ပယုတ္တေ ဒွေ၊ နောနတ္ထိယာ ပဉ္စ၊ နောဝိဂတေ ပဉ္စ (ဧဝံ ဂဏေတဗ္ဗံ)။
ပစ္စနီယံ။
၃. ပစ္စယာနုလောမပစ္စနီယံ
ဟေတုဒုကံ
၂၄. ဟေတုပစ္စယာ နအာရမ္မဏေ ပဉ္စ၊ နအဓိပတိယာ သတ္တ၊ နအနန္တရေ ပဉ္စ၊ နသမနန္တရေ နအညမညေ နဥပနိဿယေ ပဉ္စ၊ နပုရေဇာတေ ဆ၊ နပစ္ဆာဇာတေ သတ္တရသ၊ နအာသေဝနေ ပဉ္စ၊ နကမ္မေ သတ္တ၊ နဝိပါကေ သတ္တရသ၊ နသမ္ပယုတ္တေ ပဉ္စ၊ နဝိပ္ပယုတ္တေ ဒွေ၊ နောနတ္ထိယာ ပဉ္စ၊ နောဝိဂတေ ပဉ္စ (ဧဝံ ဂဏေတဗ္ဗံ)။
အနုလောမပစ္စနီယံ။
၄. ပစ္စယပစ္စနီယာနုလောမံ
နဟေတုဒုကံ
၂၅. နဟေတုပစ္စယာ အာရမ္မဏေ ဧကံ၊ အနန္တရေ ဧကံ (သံခိတ္တံ)၊ အဝိဂတေ ဧကံ (ဧဝံ ဂဏေတဗ္ဗံ)။
ပစ္စနီယာနုလောမံ။
ပစ္စယဝါရော။
၄. နိဿယဝါရော
(နိဿယဝါရော ပစ္စယဝါရသဒိသော)။
၅. သံသဋ္ဌဝါရော
၁. ပစ္စယာနုလောမံ
၁. ဝိဘင်္ဂဝါရော
ဟေတုပစ္စယော
၂၆. မိစ္ဆတ္တနိယတံ ဓမ္မံ သံသဋ္ဌော မိစ္ဆတ္တနိယတော ဓမ္မော ဥပ္ပဇ္ဇတိ ဟေတုပစ္စယာ – မိစ္ဆတ္တနိယတံ ဧကံ ခန္ဓံ သံသဋ္ဌာ တယော ခန္ဓာ။ပေ.။ ဒွေ ခန္ဓေ။ပေ.။။ (၁)
သမ္မတ္တနိယတံ ဓမ္မံ သံသဋ္ဌော သမ္မတ္တနိယတော ဓမ္မော ဥပ္ပဇ္ဇတိ ဟေတုပစ္စယာ – သမ္မတ္တနိယတံ ဧကံ ခန္ဓံ သံသဋ္ဌာ တယော ခန္ဓာ။ပေ.။ ဒွေ ခန္ဓေ။ပေ.။။ (၁)
အနိယတံ ဓမ္မံ သံသဋ္ဌော အနိယတော ဓမ္မော ဥပ္ပဇ္ဇတိ ဟေတုပစ္စယာ – အနိယတံ ဧကံ ခန္ဓံ သံသဋ္ဌာ တယော ခန္ဓာ။ပေ.။ ဒွေ ခန္ဓေ။ပေ.။ ပဋိသန္ဓိက္ခဏေ။ပေ.။။ (၁)
အာရမ္မဏပစ္စယာဒိ
၂၇. မိစ္ဆတ္တနိယတံ ဓမ္မံ သံသဋ္ဌော မိစ္ဆတ္တနိယတော ဓမ္မော ဥပ္ပဇ္ဇတိ အာရမ္မဏပစ္စယာ။ပေ.။ အဝိဂတပစ္စယာ။
၁. ပစ္စယာနုလောမံ
၂. သင်္ချာဝါရော
၂၈. ဟေတုယာ တီဏိ၊ အာရမ္မဏေ တီဏိ။ပေ.။ ကမ္မေ တီဏိ၊ ဝိပါကေ ဧကံ၊ အာဟာရေ တီဏိ။ပေ.။ အဝိဂတေ တီဏိ (ဧဝံ ဂဏေတဗ္ဗံ)။
အနုလောမံ။
၂. ပစ္စယပစ္စနီယံ
၁. ဝိဘင်္ဂဝါရော
နဟေတုပစ္စယော
၂၉. အနိယတံ ဓမ္မံ သံသဋ္ဌော အနိယတော ဓမ္မော ဥပ္ပဇ္ဇတိ နဟေတုပစ္စယာ – အဟေတုကံ အနိယတံ ဧကံ ခန္ဓံ သံသဋ္ဌာ တယော ခန္ဓာ။ပေ.။ ဒွေ ခန္ဓေ။ပေ.။ အဟေတုကပဋိသန္ဓိက္ခဏေ။ပေ.။။ (၁)
နအဓိပတိပစ္စယော
၃၀. မိစ္ဆတ္တနိယတံ ဓမ္မံ သံသဋ္ဌော မိစ္ဆတ္တနိယတော ဓမ္မော ဥပ္ပဇ္ဇတိ နအဓိပတိပစ္စယာ – မိစ္ဆတ္တနိယတေ ခန္ဓေ သံသဋ္ဌော မိစ္ဆတ္တနိယတာဓိပတိ။ (၁)
သမ္မတ္တနိယတံ ဓမ္မံ သံသဋ္ဌော သမ္မတ္တနိယတော ဓမ္မော ဥပ္ပဇ္ဇတိ နအဓိပတိပစ္စယာ – သမ္မတ္တနိယတေ ခန္ဓေ သံသဋ္ဌော သမ္မတ္တနိယတာဓိပတိ။ (၁)
အနိယတံ ဓမ္မံ သံသဋ္ဌော အနိယတော ဓမ္မော ဥပ္ပဇ္ဇတိ နအဓိပတိပစ္စယာ – အနိယတံ ဧကံ ခန္ဓံ သံသဋ္ဌာ တယော ခန္ဓာ။ပေ.။ ဒွေ ခန္ဓေ။ပေ.။ ပဋိသန္ဓိက္ခဏေ။ပေ.။။(၁)
နပုရေဇာတပစ္စယာဒိ
၃၁. သမ္မတ္တနိယတံ ဓမ္မံ သံသဋ္ဌော သမ္မတ္တနိယတော ဓမ္မော ဥပ္ပဇ္ဇတိ နပုရေဇာတပစ္စယာ – အရူပေ သမ္မတ္တနိယတံ ဧကံ ခန္ဓံ သံသဋ္ဌာ တယော ခန္ဓာ။ပေ.။ ဒွေ ခန္ဓေ။ပေ.။။ (၁)
အနိယတံ ဓမ္မံ သံသဋ္ဌော အနိယတော ဓမ္မော ဥပ္ပဇ္ဇတိ နပုရေဇာတပစ္စယာ – အရူပေ အနိယတံ ဧကံ ခန္ဓံ သံသဋ္ဌာ တယော ခန္ဓာ။ပေ.။ ဒွေ ခန္ဓေ။ပေ.။ ပဋိသန္ဓိက္ခဏေ။ပေ.။။ (၁)
မိစ္ဆတ္တနိယတံ ဓမ္မံ သံသဋ္ဌော မိစ္ဆတ္တနိယတော ဓမ္မော ဥပ္ပဇ္ဇတိ နပစ္ဆာဇာတပစ္စယာ (ပရိပုဏ္ဏံ)။
နအာသေဝနပစ္စယာဒိ
၃၂. အနိယတံ ဓမ္မံ သံသဋ္ဌော အနိယတော ဓမ္မော ဥပ္ပဇ္ဇတိ နအာသေဝနပစ္စယာ – အနိယတံ ဧကံ ခန္ဓံ သံသဋ္ဌာ တယော ခန္ဓာ။ပေ.။ ဒွေ ခန္ဓေ။ပေ.။ ပဋိသန္ဓိက္ခဏေ။ပေ.။။ (၁)
မိစ္ဆတ္တနိယတံ ဓမ္မံ သံသဋ္ဌော မိစ္ဆတ္တနိယတော ဓမ္မော ဥပ္ပဇ္ဇတိ နကမ္မပစ္စယာ၊ နဝိပါကပစ္စယာ (သံခိတ္တံ)။
အနိယတံ ဓမ္မံ သံသဋ္ဌော အနိယတော ဓမ္မော ဥပ္ပဇ္ဇတိ နဈာနပစ္စယာ – ပဉ္စဝိညာဏံ။ပေ.။ နမဂ္ဂပစ္စယာ – အဟေတုကံ အနိယတံ။ပေ.။။
သမ္မတ္တနိယတံ ဓမ္မံ သံသဋ္ဌော သမ္မတ္တနိယတော ဓမ္မော ဥပ္ပဇ္ဇတိ နဝိပ္ပယုတ္တပစ္စယာ – အရူပေ သမ္မတ္တနိယတံ ဧကံ ခန္ဓံ သံသဋ္ဌာ တယော ခန္ဓာ။ပေ.။ ဒွေ ခန္ဓေ။ပေ.။။ (၁)
အနိယတံ ဓမ္မံ သံသဋ္ဌော အနိယတော ဓမ္မော ဥပ္ပဇ္ဇတိ နဝိပ္ပယုတ္တပစ္စယာ – အရူပေ အနိယတံ ဧကံ ခန္ဓံ သံသဋ္ဌာ တယော ခန္ဓာ။ပေ.။ ဒွေ ခန္ဓေ။ပေ.။။ (၁)
၂. ပစ္စယပစ္စနီယံ
၂. သင်္ချာဝါရော
၃၃. နဟေတုယာ ဧကံ၊ နအဓိပတိယာ တီဏိ၊ နပုရေဇာတေ ဒွေ၊ နပစ္ဆာဇာတေ တီဏိ၊ နအာသေဝနေ ဧကံ၊ နကမ္မေ တီဏိ၊ နဝိပါကေ တီဏိ၊ နဈာနေ ဧကံ၊ နမဂ္ဂေ ဧကံ၊ နဝိပ္ပယုတ္တေ ဒွေ (ဧဝံ ဂဏေတဗ္ဗံ)။
ပစ္စနီယံ။
၃. ပစ္စယာနုလောမပစ္စနီယံ
၃၄. ဟေတုပစ္စယာ နအဓိပတိယာ တီဏိ၊ နပုရေဇာတေ ဒွေ၊ နပစ္ဆာဇာတေ တီဏိ၊ နအာသေဝနေ ဧကံ၊ နကမ္မေ တီဏိ၊ နဝိပါကေ တီဏိ၊ နဝိပ္ပယုတ္တေ ဒွေ (ဧဝံ ဂဏေတဗ္ဗံ)။
အနုလောမပစ္စနီယံ။
၄. ပစ္စယပစ္စနီယာနုလောမံ
၃၅. နဟေတုပစ္စယာ အာရမ္မဏေ ဧကံ၊ အနန္တရေ ဧကံ (သံခိတ္တံ)၊ အဝိဂတေ ဧကံ (ဧဝံ ဂဏေတဗ္ဗံ)။
ပစ္စနီယာနုလောမံ။
သံသဋ္ဌဝါရော။
၆. သမ္ပယုတ္တဝါရော
(သမ္ပယုတ္တဝါရော သံသဋ္ဌဝါရသဒိသော)။
၇. ပဉှာဝါရော
၁. ပစ္စယာနုလောမံ
၁. ဝိဘင်္ဂဝါရော
ဟေတုပစ္စယော
၃၆. မိစ္ဆတ္တနိယတော ဓမ္မော မိစ္ဆတ္တနိယတဿ ဓမ္မဿ ဟေတုပစ္စယေန ပစ္စယော – မိစ္ဆတ္တနိယတာ ဟေတူ သမ္ပယုတ္တကာနံ ခန္ဓာနံ ဟေတုပစ္စယေန ပစ္စယော။ (၁)
မိစ္ဆတ္တနိယတော ဓမ္မော အနိယတဿ ဓမ္မဿ ဟေတုပစ္စယေန ပစ္စယော – မိစ္ဆတ္တနိယတာ ဟေတူ စိတ္တသမုဋ္ဌာနာနံ ရူပါနံ ဟေတုပစ္စယေန ပစ္စယော။ (၂)
မိစ္ဆတ္တနိယတော ဓမ္မော မိစ္ဆတ္တနိယတဿ စ အနိယတဿ စ ဓမ္မဿ ဟေတုပစ္စယေန ပစ္စယော – မိစ္ဆတ္တနိယတာ ဟေတူ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ ဟေတုပစ္စယေန ပစ္စယော။ (၃)
သမ္မတ္တနိယတော ဓမ္မော သမ္မတ္တနိယတဿ ဓမ္မဿ ဟေတုပစ္စယေန ပစ္စယော။ တီဏိ။
အနိယတော ဓမ္မော အနိယတဿ ဓမ္မဿ ဟေတုပစ္စယေန ပစ္စယော – အနိယတာ ဟေတူ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ ဟေတုပစ္စယေန ပစ္စယော။ ပဋိသန္ဓိက္ခဏေ။ပေ.။။ (၁)
အာရမ္မဏပစ္စယော
၃၇. မိစ္ဆတ္တနိယတော ဓမ္မော အနိယတဿ ဓမ္မဿ အာရမ္မဏပစ္စယေန ပစ္စယော – အရိယာ မိစ္ဆတ္တနိယတေ ပဟီနေ ကိလေသေ ပစ္စဝေက္ခန္တိ၊ ပုဗ္ဗေ သမုဒါစိဏ္ဏေ ကိလေသေ ဇာနန္တိ။ မိစ္ဆတ္တနိယတေ ခန္ဓေ အနိစ္စတော။ပေ.။ ဝိပဿန္တိ။ စေတောပရိယဉာဏေန မိစ္ဆတ္တနိယတစိတ္တသမင်္ဂိဿ စိတ္တံ ဇာနန္တိ။ မိစ္ဆတ္တနိယတာ ခန္ဓာ စေတောပရိယဉာဏဿ၊ ပုဗ္ဗေနိဝါသာနုဿတိဉာဏဿ၊ ယထာကမ္မူပဂဉာဏဿ၊ အနာဂတံသဉာဏဿ အာဝဇ္ဇနာယ အာရမ္မဏပစ္စယေန ပစ္စယော။ (၁)
သမ္မတ္တနိယတော ဓမ္မော အနိယတဿ ဓမ္မဿ အာရမ္မဏပစ္စယေန ပစ္စယော – အရိယာ မဂ္ဂါ ဝုဋ္ဌဟိတွာ မဂ္ဂံ ပစ္စဝေက္ခန္တိ။ စေတောပရိယဉာဏေန သမ္မတ္တနိယတစိတ္တသမင်္ဂိဿ စိတ္တံ ဇာနန္တိ။ သမ္မတ္တနိယတာ ခန္ဓာ စေတောပရိယဉာဏဿ၊ ပုဗ္ဗေနိဝါသာနုဿတိဉာဏဿ၊ အနာဂတံသဉာဏဿ ၊ အာဝဇ္ဇနာယ အာရမ္မဏပစ္စယေန ပစ္စယော။ (၁)
၃၈. အနိယတော ဓမ္မော အနိယတဿ ဓမ္မဿ အာရမ္မဏပစ္စယေန ပစ္စယော – ဒါနံ ဒတွာ သီလံ သမာဒိယိတွာ ဥပေါသထကမ္မံ ကတွာ တံ ပစ္စဝေက္ခတိ၊ ပုဗ္ဗေ သုစိဏ္ဏာနိ ပစ္စဝေက္ခတိ၊ ဈာနာ ဝုဋ္ဌဟိတွာ ဈာနံ ပစ္စဝေက္ခတိ၊ အရိယာ ဖလံ ပစ္စဝေက္ခန္တိ၊ နိဗ္ဗာနံ ပစ္စဝေက္ခန္တိ၊ နိဗ္ဗာနံ ဂေါတြဘုဿ၊ ဝေါဒါနဿ၊ ဖလဿ၊ အာဝဇ္ဇနာယ အာရမ္မဏပစ္စယေန ပစ္စယော။ အရိယာ အနိယတေ ပဟီနေ ကိလေသေ ပစ္စဝေက္ခန္တိ၊ ဝိက္ခမ္ဘိတေ ကိလေသေ ပစ္စဝေက္ခန္တိ။ ပုဗ္ဗေ သမုဒါစိဏ္ဏေ ကိလေသေ ဇာနန္တိ။ စက္ခုံ။ပေ.။ ဝတ္ထုံ။ အနိယတေ ခန္ဓေ အနိစ္စတော ဒုက္ခတော အနတ္တတော ဝိပဿန္တိ၊ အဿာဒေန္တိ အဘိနန္ဒန္တိ၊ တံ အာရဗ္ဘ အနိယတော ရာဂေါ ဥပ္ပဇ္ဇတိ။ပေ.။ ဒေါမနဿံ ဥပ္ပဇ္ဇတိ။ ဒိဗ္ဗေန စက္ခုနာ ရူပံ ပဿတိ၊ ဒိဗ္ဗာယ သောတဓါတုယာ သဒ္ဒံ သုဏာတိ၊ စေတောပရိယဉာဏေန အနိယတစိတ္တသမင်္ဂိဿ စိတ္တံ ဇာနာတိ၊ အာကာသာနဉ္စာယတနံ ဝိညာဏဉ္စာယတနဿ။ပေ.။ အာကိဉ္စညာယတနံ နေဝသညာနာသညာယတနဿ အာရမ္မဏပစ္စယေန ပစ္စယော။ ရူပါယတနံ စက္ခုဝိညာဏဿ။ပေ.။ ဖောဋ္ဌဗ္ဗာယတနံ ကာယဝိညာဏဿ အာရမ္မဏပစ္စယေန ပစ္စယော။ အနိယတာ ခန္ဓာ ဣဒ္ဓိဝိဓဉာဏဿ၊ စေတောပရိယဉာဏဿ၊ ပုဗ္ဗေနိဝါသာနုဿတိဉာဏဿ၊ ယထာကမ္မူပဂဉာဏဿ၊ အနာဂတံသဉာဏဿ၊ အာဝဇ္ဇနာယ အာရမ္မဏပစ္စယေန ပစ္စယော။ (၁)
အနိယတော ဓမ္မော မိစ္ဆတ္တနိယတဿ ဓမ္မဿ အာရမ္မဏပစ္စယေန ပစ္စယော – ရူပဇီဝိတိန္ဒြိယံ မာတုဃာတိကမ္မဿ။ ပိတုဃာတိကမ္မဿ။ အရဟန္တဃာတိကမ္မဿ။ ရုဟိရုပ္ပါဒကမ္မဿ အာရမ္မဏပစ္စယေန ပစ္စယော။ ယံ ဝတ္ထုံ ပရာမသန္တဿ မိစ္ဆတ္တနိယတာ ခန္ဓာ ဥပ္ပဇ္ဇန္တိ၊ တံ ဝတ္ထု မိစ္ဆတ္တနိယတာနံ ခန္ဓာနံ အာရမ္မဏပစ္စယေန ပစ္စယော။ (၂)
အနိယတော ဓမ္မော သမ္မတ္တနိယတဿ ဓမ္မဿ အာရမ္မဏပစ္စယေန ပစ္စယော – နိဗ္ဗာနံ မဂ္ဂဿ အာရမ္မဏပစ္စယေန ပစ္စယော။ (၃)
အဓိပတိပစ္စယော
၃၉. မိစ္ဆတ္တနိယတော ဓမ္မော မိစ္ဆတ္တနိယတဿ ဓမ္မဿ အဓိပတိပစ္စယေန ပစ္စယော။ သဟဇာတာဓိပတိ – မိစ္ဆတ္တနိယတာဓိပတိ သမ္ပယုတ္တကာနံ ခန္ဓာနံ အဓိပတိပစ္စယေန ပစ္စယော။ (၁)
မိစ္ဆတ္တနိယတော ဓမ္မော အနိယတဿ ဓမ္မဿ အဓိပတိပစ္စယေန ပစ္စယော။ သဟဇာတာဓိပတိ – မိစ္ဆတ္တနိယတာဓိပတိ စိတ္တသမုဋ္ဌာနာနံ ရူပါနံ အဓိပတိပစ္စယေန ပစ္စယော။ (၂)
မိစ္ဆတ္တနိယတော ဓမ္မော မိစ္ဆတ္တနိယတဿ စ အနိယတဿ စ ဓမ္မဿ အဓိပတိပစ္စယေန ပစ္စယော။ သဟဇာတာဓိပတိ – မိစ္ဆတ္တနိယတာဓိပတိ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ အဓိပတိပစ္စယေန ပစ္စယော။ (၃)
၄၀. သမ္မတ္တနိယတော ဓမ္မော သမ္မတ္တနိယတဿ ဓမ္မဿ အဓိပတိပစ္စယေန ပစ္စယော။ သဟဇာတာဓိပတိ – သမ္မတ္တနိယတာဓိပတိ သမ္ပယုတ္တကာနံ ခန္ဓာနံ အဓိပတိပစ္စယေန ပစ္စယော။ (၁)
သမ္မတ္တနိယတော ဓမ္မော အနိယတဿ ဓမ္မဿ အဓိပတိပစ္စယေန ပစ္စယော – အာရမ္မဏာဓိပတိ၊ သဟဇာတာဓိပတိ။ အာရမ္မဏာဓိပတိ – အရိယာ မဂ္ဂါ ဝုဋ္ဌဟိတွာ မဂ္ဂံ ဂရုံ ကတွာ ပစ္စဝေက္ခန္တိ။ သဟဇာတာဓိပတိ – သမ္မတ္တနိယတာဓိပတိ စိတ္တသမုဋ္ဌာနာနံ ရူပါနံ အဓိပတိပစ္စယေန ပစ္စယော။ (၂)
သမ္မတ္တနိယတော ဓမ္မော သမ္မတ္တနိယတဿ စ အနိယတဿ စ ဓမ္မဿ အဓိပတိပစ္စယေန ပစ္စယော။ သဟဇာတာဓိပတိ – သမ္မတ္တနိယတာဓိပတိ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ အဓိပတိပစ္စယေန ပစ္စယော။ (၃)
၄၁. အနိယတော ဓမ္မော အနိယတဿ ဓမ္မဿ အဓိပတိပစ္စယေန ပစ္စယော – အာရမ္မဏာဓိပတိ သဟဇာတာဓိပတိ။ အာရမ္မဏာဓိပတိ – ဒါနံ ဒတွာ သီလံ သမာဒိယိတွာ ဥပေါသထကမ္မံ ကတွာ တံ ဂရုံ ကတွာ ပစ္စဝေက္ခတိ၊ ပုဗ္ဗေ သုစိဏ္ဏာနိ ဂရုံ ကတွာ ပစ္စဝေက္ခတိ၊ ဈာနာ။ပေ.။ အရိယာ ဖလံ ဂရုံ ကတွာ ပစ္စဝေက္ခန္တိ၊ နိဗ္ဗာနံ ဂရုံ ကတွာ ပစ္စဝေက္ခန္တိ၊ နိဗ္ဗာနံ ဂေါတြဘုဿ၊ ဝေါဒါနဿ၊ ဖလဿ အဓိပတိပစ္စယေန ပစ္စယော။ စက္ခုံ။ပေ.။ ဝတ္ထုံ။ပေ.။ အနိယတေ ခန္ဓေ ဂရုံ ကတွာ အဿာဒေတိ အဘိနန္ဒတိ၊ တံ ဂရုံ ကတွာ အနိယတော ရာဂေါ ဥပ္ပဇ္ဇတိ၊ ဒိဋ္ဌိ ဥပ္ပဇ္ဇတိ။ သဟဇာတာဓိပတိ – အနိယတာဓိပတိ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ အဓိပတိပစ္စယေန ပစ္စယော။ (၁)
အနိယတော ဓမ္မော သမ္မတ္တနိယတဿ ဓမ္မဿ အဓိပတိပစ္စယေန ပစ္စယော။ အာရမ္မဏာဓိပတိ – နိဗ္ဗာနံ မဂ္ဂဿ အဓိပတိပစ္စယေန ပစ္စယော။ (၂)
အနန္တရပစ္စယော
၄၂. မိစ္ဆတ္တနိယတော ဓမ္မော အနိယတဿ ဓမ္မဿ အနန္တရပစ္စယေန ပစ္စယော – မိစ္ဆတ္တနိယတာ ခန္ဓာ ဝုဋ္ဌာနဿ အနန္တရပစ္စယေန ပစ္စယော။ (၁)
သမ္မတ္တနိယတော ဓမ္မော အနိယတဿ ဓမ္မဿ အနန္တရပစ္စယေန ပစ္စယော – မဂ္ဂေါ ဖလဿ အနန္တရပစ္စယေန ပစ္စယော။ (၁)
အနိယတော ဓမ္မော အနိယတဿ ဓမ္မဿ အနန္တရပစ္စယေန ပစ္စယော – ပုရိမာ ပုရိမာ အနိယတာ ခန္ဓာ ပစ္ဆိမာနံ ပစ္ဆိမာနံ အနိယတာနံ ခန္ဓာနံ အနန္တရပစ္စယေန ပစ္စယော။ အနုလောမံ ဂေါတြဘုဿ။ အနုလောမံ ဝေါဒါနဿ။ ဖလံ ဖလဿ။ အနုလောမံ ဖလသမာပတ္တိယာ။ နိရောဓါ ဝုဋ္ဌဟန္တဿ နေဝသညာနာသညာယတနံ ဖလသမာပတ္တိယာ အနန္တရပစ္စယေန ပစ္စယော။ (၁)
၄၃. အနိယတော ဓမ္မော မိစ္ဆတ္တနိယတဿ ဓမ္မဿ အနန္တရပစ္စယေန ပစ္စယော – အနိယတံ ဒေါမနဿံ မိစ္ဆတ္တနိယတဿ ဒေါမနဿဿ အနန္တရပစ္စယေန ပစ္စယော။ အနိယတမိစ္ဆာဒိဋ္ဌိ နိယတမိစ္ဆာဒိဋ္ဌိယာ အနန္တရပစ္စယေန ပစ္စယော။ (၂)
အနိယတော ဓမ္မော သမ္မတ္တနိယတဿ ဓမ္မဿ အနန္တရပစ္စယေန ပစ္စယော – ဂေါတြဘု မဂ္ဂဿ။ ဝေါဒါနံ မဂ္ဂဿ အနန္တရပစ္စယေန ပစ္စယော။ (၃)
သမနန္တရပစ္စယာဒိ
၄၄. မိစ္ဆတ္တနိယတော ဓမ္မော အနိယတဿ ဓမ္မဿ သမနန္တရပစ္စယေန ပစ္စယော (အနန္တရသဒိသံ)။ သဟဇာတပစ္စယေန ပစ္စယော (ပဋိစ္စဝါရသဒိသံ၊ နဝ ပဉှာ)။ အညမညပစ္စယေန ပစ္စယော (ပဋိစ္စဝါရသဒိသံ၊ တိဿော ပဉှာ)။ နိဿယပစ္စယေန ပစ္စယော (ကုသလတ္တိကသဒိသာ၊ တေရသ ပဉှာ)။
ဥပနိဿယပစ္စယော
၄၅. မိစ္ဆတ္တနိယတော ဓမ္မော မိစ္ဆတ္တနိယတဿ ဓမ္မဿ ဥပနိဿယပစ္စယေန ပစ္စယော။ ပကတူပနိဿယော – မာတုဃာတိကမ္မံ မာတုဃာတိကမ္မဿ ဥပနိဿယပစ္စယေန ပစ္စယော။ မာတုဃာတိကမ္မံ။ပေ.။ ပိတုဃာတိကမ္မံ။ပေ.။ အရဟန္တဃာတိကမ္မံ။ပေ.။ ရုဟိရုပ္ပါဒကမ္မံ။ပေ.။ သင်္ဃဘေဒကမ္မံ။ပေ.။ နိယတမိစ္ဆာဒိဋ္ဌိယာ ဥပနိဿယပစ္စယေန ပစ္စယော (စက္ကံ ကာတဗ္ဗံ)။ နိယတမိစ္ဆာဒိဋ္ဌိ နိယတမိစ္ဆာဒိဋ္ဌိယာ ဥပနိဿယပစ္စယေန ပစ္စယော။ နိယတမိစ္ဆာဒိဋ္ဌိ မာတုဃာတိကမ္မဿ။ပေ.။ သင်္ဃဘေဒကမ္မဿ ဥပနိဿယပစ္စယေန ပစ္စယော။ (၁)
မိစ္ဆတ္တနိယတော ဓမ္မော အနိယတဿ ဓမ္မဿ ဥပနိဿယပစ္စယေန ပစ္စယော – အနန္တရူပနိဿယော၊ ပကတူပနိဿယော။ပေ.။။ ပကတူပနိဿယော – မာတရံ ဇီဝိတာ ဝေါရောပေတွာ တဿ ပဋိဃာတတ္ထာယ ဒါနံ ဒေတိ၊ သီလံ သမာဒိယတိ၊ ဥပေါသထကမ္မံ ကရောတိ။ ပိတရံ ဇီဝိတာ ဝေါရောပေတွာ။ပေ.။ အရဟန္တံ ဇီဝိတာ ဝေါရောပေတွာ။ပေ.။ ဒုဋ္ဌေန စိတ္တေန တထာဂတဿ လောဟိတံ ဥပ္ပါဒေတွာ။ပေ.။ သံဃံ ဘိန္ဒိတွာ တဿ ပဋိဃာတတ္ထာယ ဒါနံ ဒေတိ၊ သီလံ သမာဒိယတိ၊ ဥပေါသထကမ္မံ ကရောတိ။ (၂)
၄၆. သမ္မတ္တနိယတော ဓမ္မော သမ္မတ္တနိယတဿ ဓမ္မဿ ဥပနိဿယပစ္စယေန ပစ္စယော။ ပကတူပနိဿယော – ပဌမော မဂ္ဂေါ ဒုတိယဿ မဂ္ဂဿ ဥပနိဿယပစ္စယေန ပစ္စယော။ပေ.။ တတိယော မဂ္ဂေါ စတုတ္ထဿ မဂ္ဂဿ ဥပနိဿယပစ္စယေန ပစ္စယော။ (၁)
သမ္မတ္တနိယတော ဓမ္မော အနိယတဿ ဓမ္မဿ ဥပနိဿယပစ္စယေန ပစ္စယော – အာရမ္မဏူပနိဿယော၊ အနန္တရူပနိဿယော၊ ပကတူပနိဿယော။ပေ.။။ ပကတူပနိဿယော – အရိယာ မဂ္ဂံ ဥပနိဿာယ အနုပ္ပန္နံ သမာပတ္တိံ ဥပ္ပါဒေန္တိ၊ ဥပ္ပန္နံ သမာပဇ္ဇန္တိ၊ သင်္ခါရေ အနိစ္စတော ဒုက္ခတော အနတ္တတော ဝိပဿန္တိ။ မဂ္ဂေါ အရိယာနံ အတ္ထပ္ပဋိသမ္ဘိဒါယ။ပေ.။ ဌာနာဌာနကောသလ္လဿ ဥပနိဿယပစ္စယေန ပစ္စယော။ မဂ္ဂေါ ဖလသမာပတ္တိယာ ဥပနိဿယပစ္စယေန ပစ္စယော။ (၂)
၄၇. အနိယတော ဓမ္မော အနိယတဿ ဓမ္မဿ ဥပနိဿယပစ္စယေန ပစ္စယော – အာရမ္မဏူပနိဿယော၊ အနန္တရူပနိဿယော၊ ပကတူပနိဿယော။ပေ.။။ ပကတူပနိဿယော – အနိယတံ သဒ္ဓံ ဥပနိဿာယ ဒါနံ ဒေတိ၊ သီလံ သမာဒိယတိ၊ ဥပေါသထကမ္မံ။ပေ.။ ဈာနံ ဥပ္ပါဒေတိ၊ ဝိပဿနံ။ အဘိညံ။ သမာပတ္တိံ ဥပ္ပါဒေတိ၊ မာနံ ဇပ္ပေတိ၊ ဒိဋ္ဌိံ ဂဏှာတိ။ အနိယတံ သီလံ။ သုတံ။ စာဂံ။ ပညံ။ ရာဂံ။ပေ.။ ပတ္ထနံ။ ကာယိကံ သုခံ။ ကာယိကံ ဒုက္ခံ။ ဥတုံ။ ဘောဇနံ။ သေနာသနံ ဥပနိဿာယ ဒါနံ ဒေတိ။ပေ.။ နိဂမဃာတံ ကရောတိ။ အနိယတာ သဒ္ဓါ။ပေ.။ ပညာ၊ ရာဂေါ။ပေ.။ သေနာသနံ အနိယတာယ သဒ္ဓါယ။ပေ.။ ကာယိကဿ သုခဿ၊ ကာယိကဿ ဒုက္ခဿ၊ ဖလသမာပတ္တိယာ ဥပနိဿယပစ္စယေန ပစ္စယော။ ပဌမဿ ဈာနဿ ပရိကမ္မံ တဿေဝ။ပေ.။ နေဝသညာနာသညာယတနဿ ပရိကမ္မံ တဿေဝ။ပေ.။ ပဌမံ ဈာနံ ဒုတိယဿ ဈာနဿ။ပေ.။ အာကိဉ္စညာယတနံ နေဝသညာနာသညာယတနဿ။ပေ.။ ပါဏာတိပါတော ပါဏာတိပါတဿ ဥပနိဿယပစ္စယေန ပစ္စယော (စက္ကံ ကာတဗ္ဗံ)။ (၁)
အနိယတော ဓမ္မော မိစ္ဆတ္တနိယတဿ ဓမ္မဿ ဥပနိဿယပစ္စယေန ပစ္စယော – အနန္တရူပနိဿယော၊ ပကတူပနိဿယော။ပေ.။။ ပကတူပနိဿယော – အနိယတံ ရာဂံ ဥပနိဿာယ မာတရံ ဇီဝိတာ ဝေါရောပေတိ။ပေ.။ သံဃံ ဘိန္ဒတိ။ အနိယတံ ဒေါသံ။ပေ.။ ပတ္ထနံ။ ကာယိကံ သုခံ။ပေ.။ သေနာသနံ ဥပနိဿာယ မာတရံ ဇီဝိတာ ဝေါရောပေတိ။ပေ.။ သံဃံ ဘိန္ဒတိ။ အနိယတော ရာဂေါ။ပေ.။ သေနာသနံ မာတုဃာတိကမ္မဿ။ ပိတုဃာတိကမ္မဿ။ အရဟန္တဃာတိကမ္မဿ။ ရုဟိရုပ္ပါဒကမ္မဿ။ သင်္ဃဘေဒကမ္မဿ။ နိယတမိစ္ဆာဒိဋ္ဌိယာ ဥပနိဿယပစ္စယေန ပစ္စယော။ (၂)
အနိယတော ဓမ္မော သမ္မတ္တနိယတဿ ဓမ္မဿ ဥပနိဿယပစ္စယေန ပစ္စယော – အာရမ္မဏူပနိဿယော၊ အနန္တရူပနိဿယော၊ ပကတူပနိဿယော။ပေ.။။ ပကတူပနိဿယော – ပဌမဿ မဂ္ဂဿ ပရိကမ္မံ ပဌမဿ မဂ္ဂဿ။ပေ.။ စတုတ္ထဿ မဂ္ဂဿ ပရိကမ္မံ စတုတ္ထဿ မဂ္ဂဿ ဥပနိဿယပစ္စယေန ပစ္စယော။ (၃)
ပုရေဇာတပစ္စယော
၄၈. အနိယတော ဓမ္မော အနိယတဿ ဓမ္မဿ ပုရေဇာတပစ္စယေန ပစ္စယော – အာရမ္မဏပုရေဇာတံ၊ ဝတ္ထုပုရေဇာတံ။ အာရမ္မဏပုရေဇာတံ – စက္ခုံ။ပေ.။ ဝတ္ထုံ အနိစ္စတော။ပေ.။ ဝိပဿတိ၊ အဿာဒေတိ အဘိနန္ဒတိ၊ တံ အာရဗ္ဘ အနိယတော ရာဂေါ ဥပ္ပဇ္ဇတိ။ပေ.။ ဒေါမနဿံ ဥပ္ပဇ္ဇတိ။ ဒိဗ္ဗေန စက္ခုနာ ရူပံ ပဿတိ၊ ဒိဗ္ဗာယ သောတဓါတုယာ သဒ္ဒံ သုဏာတိ၊ ရူပါယတနံ စက္ခုဝိညာဏဿ။ပေ.။ ဖောဋ္ဌဗ္ဗာယတနံ ကာယဝိညာဏဿ ပုရေဇာတပစ္စယေန ပစ္စယော။ ဝတ္ထုပုရေဇာတံ – စက္ခါယတနံ စက္ခုဝိညာဏဿ။ပေ.။ ကာယာယတနံ ကာယဝိညာဏဿ။ ဝတ္ထု အနိယတာနံ ခန္ဓာနံ ပုရေဇာတပစ္စယေန ပစ္စယော။ (၁)
အနိယတော ဓမ္မော မိစ္ဆတ္တနိယတဿ ဓမ္မဿ ပုရေဇာတပစ္စယေန ပစ္စယော – အာရမ္မဏပုရေဇာတံ၊ ဝတ္ထုပုရေဇာတံ။ အာရမ္မဏပုရေဇာတံ – ရူပဇီဝိတိန္ဒြိယံ မာတုဃာတိကမ္မဿ။ ပိတုဃာတိကမ္မဿ။ အရဟန္တဃာတိကမ္မဿ။ ရုဟိရုပ္ပါဒကမ္မဿ ပုရေဇာတပစ္စယေန ပစ္စယော။ ဝတ္ထုပုရေဇာတံ – ဝတ္ထု မိစ္ဆတ္တနိယတာနံ ခန္ဓာနံ ပုရေဇာတပစ္စယေန ပစ္စယော။ (၂)
အနိယတော ဓမ္မော သမ္မတ္တနိယတဿ ဓမ္မဿ ပုရေဇာတပစ္စယေန ပစ္စယော။ ဝတ္ထုပုရေဇာတံ – ဝတ္ထု သမ္မတ္တနိယတာနံ ခန္ဓာနံ ပုရေဇာတပစ္စယေန ပစ္စယော။ (၃)
ပစ္ဆာဇာတပစ္စယော
၄၉. မိစ္ဆတ္တနိယတော ဓမ္မော အနိယတဿ ဓမ္မဿ ပစ္ဆာဇာတပစ္စယေန ပစ္စယော – ပစ္ဆာဇာတာ မိစ္ဆတ္တနိယတာ ခန္ဓာ ပုရေဇာတဿ ဣမဿ ကာယဿ ပစ္ဆာဇာတပစ္စယေန ပစ္စယော။ (၁)
သမ္မတ္တနိယတော ဓမ္မော အနိယတဿ ဓမ္မဿ ပစ္ဆာဇာတပစ္စယေန ပစ္စယော။ ပစ္ဆာဇာတာ သမ္မတ္တနိယတာ ခန္ဓာ ပုရေဇာတဿ ဣမဿ ကာယဿ ပစ္ဆာဇာတပစ္စယေန ပစ္စယော။ (၁)
အနိယတော ဓမ္မော အနိယတဿ ဓမ္မဿ ပစ္ဆာဇာတပစ္စယေန ပစ္စယော – ပစ္ဆာဇာတာ အနိယတာ ခန္ဓာ ပုရေဇာတဿ ဣမဿ ကာယဿ ပစ္ဆာဇာတပစ္စယေန ပစ္စယော။ (၁)
အာသေဝနပစ္စယော
၅၀. အနိယတော ဓမ္မော အနိယတဿ ဓမ္မဿ အာသေဝနပစ္စယေန ပစ္စယော – ပုရိမာ ပုရိမာ အနိယတာ ခန္ဓာ ပစ္ဆိမာနံ ပစ္ဆိမာနံ အနိယတာနံ ခန္ဓာနံ အာသေဝနပစ္စယေန ပစ္စယော။ အနုလောမံ ဂေါတြဘုဿ။ အနုလောမံ ဝေါဒါနဿ အာသေဝနပစ္စယေန ပစ္စယော။ (၁)
အနိယတော ဓမ္မော မိစ္ဆတ္တနိယတဿ ဓမ္မဿ အာသေဝနပစ္စယေန ပစ္စယော – အနိယတံ ဒေါမနဿံ မိစ္ဆတ္တနိယတဿ ဒေါမနဿဿ အာသေဝနပစ္စယေန ပစ္စယော။ အနိယတမိစ္ဆာဒိဋ္ဌိ နိယတမိစ္ဆာဒိဋ္ဌိယာ အာသေဝနပစ္စယေန ပစ္စယော။ (၂)
အနိယတော ဓမ္မော သမ္မတ္တနိယတဿ ဓမ္မဿ အာသေဝနပစ္စယေန ပစ္စယော – ဂေါတြဘု မဂ္ဂဿ။ ဝေါဒါနံ မဂ္ဂဿ အာသေဝနပစ္စယေန ပစ္စယော။ (၃)
ကမ္မပစ္စယော
၅၁. မိစ္ဆတ္တနိယတော ဓမ္မော မိစ္ဆတ္တနိယတဿ ဓမ္မဿ ကမ္မပစ္စယေန ပစ္စယော – မိစ္ဆတ္တနိယတာ စေတနာ သမ္ပယုတ္တကာနံ ခန္ဓာနံ ကမ္မပစ္စယေန ပစ္စယော။ (၁)
မိစ္ဆတ္တနိယတော ဓမ္မော အနိယတဿ ဓမ္မဿ ကမ္မပစ္စယေန ပစ္စယော – သဟဇာတာ၊ နာနာက္ခဏိကာ။ သဟဇာတာ – မိစ္ဆတ္တနိယတာ စေတနာ စိတ္တသမုဋ္ဌာနာနံ ရူပါနံ ကမ္မပစ္စယေန ပစ္စယော။ နာနာက္ခဏိကာ – မိစ္ဆတ္တနိယတာ စေတနာ ဝိပါကာနံ ခန္ဓာနံ ကဋတ္တာ စ ရူပါနံ ကမ္မပစ္စယေန ပစ္စယော။ (၂)
မိစ္ဆတ္တနိယတော ဓမ္မော မိစ္ဆတ္တနိယတဿ စ အနိယတဿ စ ဓမ္မဿ ကမ္မပစ္စယေန ပစ္စယော – မိစ္ဆတ္တနိယတာ စေတနာ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ ကမ္မပစ္စယေန ပစ္စယော။ (၃)
၅၂. သမ္မတ္တနိယတော ဓမ္မော သမ္မတ္တနိယတဿ ဓမ္မဿ ကမ္မပစ္စယေန ပစ္စယော – သမ္မတ္တနိယတာ စေတနာ သမ္ပယုတ္တကာနံ ခန္ဓာနံ ကမ္မပစ္စယေန ပစ္စယော။ (၁)
သမ္မတ္တနိယတော ဓမ္မော အနိယတဿ ဓမ္မဿ ကမ္မပစ္စယေန ပစ္စယော – သဟဇာတာ၊ နာနာက္ခဏိကာ။ သဟဇာတာ – သမ္မတ္တနိယတာ စေတနာ စိတ္တသမုဋ္ဌာနာနံ ရူပါနံ ကမ္မပစ္စယေန ပစ္စယော။ နာနာက္ခဏိကာ – သမ္မတ္တနိယတာ စေတနာ ဝိပါကာနံ ခန္ဓာနံ ကမ္မပစ္စယေန ပစ္စယော။ (၂)
သမ္မတ္တနိယတော ဓမ္မော သမ္မတ္တနိယတဿ စ အနိယတဿ စ ဓမ္မဿ ကမ္မပစ္စယေန ပစ္စယော – သမ္မတ္တနိယတာ စေတနာ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ ကမ္မပစ္စယေန ပစ္စယော။ (၃)
အနိယတော ဓမ္မော အနိယတဿ ဓမ္မဿ ကမ္မပစ္စယေန ပစ္စယော – သဟဇာတာ၊ နာနာက္ခဏိကာ။ သဟဇာတာ – အနိယတာ စေတနာ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ ကမ္မပစ္စယေန ပစ္စယော။ ပဋိသန္ဓိက္ခဏေ။ပေ.။။ နာနာက္ခဏိကာ – အနိယတာ စေတနာ ဝိပါကာနံ ခန္ဓာနံ ကဋတ္တာ စ ရူပါနံ ကမ္မပစ္စယေန ပစ္စယော။ (၁)
ဝိပါကပစ္စယော
၅၃. အနိယတော ဓမ္မော အနိယတဿ ဓမ္မဿ ဝိပါကပစ္စယေန ပစ္စယော – ဝိပါကော အနိယတော ဧကော ခန္ဓော တိဏ္ဏန္နံ ခန္ဓာနံ စိတ္တသမုဋ္ဌာနာနဉ္စ ရူပါနံ ဝိပါကပစ္စယေန ပစ္စယော။ပေ.။ ပဋိသန္ဓိက္ခဏေ။ပေ.။ ခန္ဓာ ဝတ္ထုဿ။ပေ.။။
အာဟာရပစ္စယာဒိ
၅၄. မိစ္ဆတ္တနိယတော ဓမ္မော မိစ္ဆတ္တနိယတဿ ဓမ္မဿ အာဟာရပစ္စယေန ပစ္စယော။ ဣန္ဒြိယပစ္စယေန ပစ္စယော။ ဈာနပစ္စယေန ပစ္စယော။ မဂ္ဂပစ္စယေန ပစ္စယော။ သမ္ပယုတ္တပစ္စယေန ပစ္စယော။
ဝိပ္ပယုတ္တပစ္စယော
၅၅. မိစ္ဆတ္တနိယတော ဓမ္မော အနိယတဿ ဓမ္မဿ ဝိပ္ပယုတ္တပစ္စယေန ပစ္စယော – သဟဇာတံ၊ ပစ္ဆာဇာတံ။ သဟဇာတာ – မိစ္ဆတ္တနိယတာ ခန္ဓာ စိတ္တသမုဋ္ဌာနာနံ ရူပါနံ ဝိပ္ပယုတ္တပစ္စယေန ပစ္စယော။ ပစ္ဆာဇာတာ – မိစ္ဆတ္တနိယတာ ခန္ဓာ ပုရေဇာတဿ ဣမဿ ကာယဿ ဝိပ္ပယုတ္တပစ္စယေန ပစ္စယော။ (၁)
သမ္မတ္တနိယတော ဓမ္မော အနိယတဿ ဓမ္မဿ ဝိပ္ပယုတ္တပစ္စယေန ပစ္စယော – သဟဇာတံ၊ ပစ္ဆာဇာတံ။ သဟဇာတာ – သမ္မတ္တနိယတာ ခန္ဓာ စိတ္တသမုဋ္ဌာနာနံ ရူပါနံ ဝိပ္ပယုတ္တပစ္စယေန ပစ္စယော။ ပစ္ဆာဇာတာ – သမ္မတ္တနိယတာ ခန္ဓာ ပုရေဇာတဿ ဣမဿ ကာယဿ ဝိပ္ပယုတ္တပစ္စယေန ပစ္စယော။ (၁)
အနိယတော ဓမ္မော အနိယတဿ ဓမ္မဿ ဝိပ္ပယုတ္တပစ္စယေန ပစ္စယော – သဟဇာတံ၊ ပုရေဇာတံ၊ ပစ္ဆာဇာတံ။ သဟဇာတာ – အနိယတာ ခန္ဓာ စိတ္တသမုဋ္ဌာနာနံ ရူပါနံ ဝိပ္ပယုတ္တပစ္စယေန ပစ္စယော။ ပဋိသန္ဓိက္ခဏေ။ပေ.။ ခန္ဓာ ဝတ္ထုဿ ဝိပ္ပယုတ္တပစ္စယေန ပစ္စယော။ ဝတ္ထု ခန္ဓာနံ ဝိပ္ပယုတ္တပစ္စယေန ပစ္စယော။ ပုရေဇာတံ – စက္ခါယတနံ စက္ခုဝိညာဏဿ။ပေ.။ ကာယာယတနံ ကာယဝိညာဏဿ။ ဝတ္ထု အနိယတာနံ ခန္ဓာနံ ဝိပ္ပယုတ္တပစ္စယေန ပစ္စယော။ ပစ္ဆာဇာတာ – အနိယတာ ခန္ဓာ ပုရေဇာတဿ ဣမဿ ကာယဿ ဝိပ္ပယုတ္တပစ္စယေန ပစ္စယော။ (၁)
အနိယတော ဓမ္မော မိစ္ဆတ္တနိယတဿ ဓမ္မဿ ဝိပ္ပယုတ္တပစ္စယေန ပစ္စယော။ ပုရေဇာတံ – ဝတ္ထု မိစ္ဆတ္တနိယတာနံ ခန္ဓာနံ ဝိပ္ပယုတ္တပစ္စယေန ပစ္စယော။ (၂)
အနိယတော ဓမ္မော သမ္မတ္တနိယတဿ ဓမ္မဿ ဝိပ္ပယုတ္တပစ္စယေန ပစ္စယော။ ပုရေဇာတံ – ဝတ္ထု သမ္မတ္တနိယတာနံ ခန္ဓာနံ ဝိပ္ပယုတ္တပစ္စယေန ပစ္စယော။ (၃)
အတ္ထိပစ္စယော
၅၆. မိစ္ဆတ္တနိယတော ဓမ္မော မိစ္ဆတ္တနိယတဿ ဓမ္မဿ အတ္ထိပစ္စယေန ပစ္စယော – မိစ္ဆတ္တနိယတော ဧကော ခန္ဓော တိဏ္ဏန္နံ ခန္ဓာနံ။ပေ.။ ဒွေ ခန္ဓာ ဒွိန္နံ ခန္ဓာနံ အတ္ထိပစ္စယေန ပစ္စယော။ (၁)
မိစ္ဆတ္တနိယတော ဓမ္မော အနိယတဿ ဓမ္မဿ အတ္ထိပစ္စယေန ပစ္စယော – သဟဇာတံ၊ ပစ္ဆာဇာတံ။ သဟဇာတာ – မိစ္ဆတ္တနိယတာ ခန္ဓာ စိတ္တသမုဋ္ဌာနာနံ ရူပါနံ အတ္ထိပစ္စယေန ပစ္စယော။ ပစ္ဆာဇာတာ – မိစ္ဆတ္တနိယတာ ခန္ဓာ ပုရေဇာတဿ ဣမဿ ကာယဿ အတ္ထိပစ္စယေန ပစ္စယော။ (၂)
မိစ္ဆတ္တနိယတော ဓမ္မော မိစ္ဆတ္တနိယတဿ စ အနိယတဿ စ အတ္ထိပစ္စယေန ပစ္စယော – မိစ္ဆတ္တနိယတော ဧကော ခန္ဓော တိဏ္ဏန္နံ ခန္ဓာနံ စိတ္တသမုဋ္ဌာနာနဉ္စ ရူပါနံ အတ္ထိပစ္စယေန ပစ္စယော။ပေ.။ ဒွေ ခန္ဓာ။ပေ.။။ (၃)
သမ္မတ္တနိယတော ဓမ္မော သမ္မတ္တနိယတဿ ဓမ္မဿ အတ္ထိပစ္စယေန ပစ္စယော။ပေ.။ (တိဿော ပဉှာ)။
အနိယတော ဓမ္မော အနိယတဿ ဓမ္မဿ အတ္ထိပစ္စယေန ပစ္စယော – သဟဇာတံ၊ ပုရေဇာတံ၊ ပစ္ဆာဇာတံ၊ အာဟာရံ၊ ဣန္ဒြိယံ။ သဟဇာတော – အနိယတော ဧကော ခန္ဓော တိဏ္ဏန္နံ ခန္ဓာနံ စိတ္တသမုဋ္ဌာနာနဉ္စ ရူပါနံ အတ္ထိပစ္စယေန ပစ္စယော။ပေ.။ ဒွေ ခန္ဓာ။ပေ.။ ပဋိသန္ဓိက္ခဏေ။ပေ.။ ခန္ဓာ ဝတ္ထုဿ အတ္ထိပစ္စယေန ပစ္စယော။ ဝတ္ထု ခန္ဓာနံ အတ္ထိပစ္စယေန ပစ္စယော။ ဧကံ မဟာဘူတံ။ပေ.။ အသညသတ္တာနံ ဧကံ မဟာဘူတံ။ပေ.။။ ပုရေဇာတံ – စက္ခုံ။ပေ.။ ဝတ္ထုံ အနိစ္စတော ဒုက္ခတော အနတ္တတော ဝိပဿတိ အဿာဒေတိ အဘိနန္ဒတိ၊ တံ အာရဗ္ဘ ရာဂေါ ဥပ္ပဇ္ဇတိ။ပေ.။ ဒေါမနဿံ ဥပ္ပဇ္ဇတိ။ ဒိဗ္ဗေန စက္ခုနာ ရူပံ ပဿတိ၊ ဒိဗ္ဗာယ သောတဓါတုယာ သဒ္ဒံ သုဏာတိ၊ ရူပါယတနံ စက္ခုဝိညာဏဿ။ပေ.။ ဖောဋ္ဌဗ္ဗာယတနံ ကာယဝိညာဏဿ။ပေ.။ စက္ခါယတနံ စက္ခုဝိညာဏဿ။ပေ.။ ကာယာယတနံ ကာယဝိညာဏဿ။ ဝတ္ထု အနိယတာနံ ခန္ဓာနံ အတ္ထိပစ္စယေန ပစ္စယော။ ပစ္ဆာဇာတာ – အနိယတာ ခန္ဓာ ပုရေဇာတဿ ဣမဿ ကာယဿ အတ္ထိပစ္စယေန ပစ္စယော။ ကဗဠီကာရော အာဟာရော ဣမဿ ကာယဿ အတ္ထိပစ္စယေန ပစ္စယော။ ရူပဇီဝိတိန္ဒြိယံ ကဋတ္တာရူပါနံ အတ္ထိပစ္စယေန ပစ္စယော။ (၁)
အနိယတော ဓမ္မော မိစ္ဆတ္တနိယတဿ ဓမ္မဿ အတ္ထိပစ္စယေန ပစ္စယော။ ပုရေဇာတံ – ရူပဇီဝိတိန္ဒြိယံ မာတုဃာတိကမ္မဿ။ပေ.။ ရုဟိရုပ္ပါဒကမ္မဿ အတ္ထိပစ္စယေန ပစ္စယော။ ဝတ္ထု မိစ္ဆတ္တနိယတာနံ ခန္ဓာနံ အတ္ထိပစ္စယေန ပစ္စယော။ (၂)
အနိယတော ဓမ္မော သမ္မတ္တနိယတဿ ဓမ္မဿ အတ္ထိပစ္စယေန ပစ္စယော။ ပုရေဇာတံ – ဝတ္ထု သမ္မတ္တနိယတာနံ ခန္ဓာနံ အတ္ထိပစ္စယေန ပစ္စယော။ (၃)
၅၇. မိစ္ဆတ္တနိယတော စ အနိယတော စ ဓမ္မာ မိစ္ဆတ္တနိယတဿ ဓမ္မဿ အတ္ထိပစ္စယေန ပစ္စယော – သဟဇာတံ၊ ပုရေဇာတံ။ သဟဇာတော – မိစ္ဆတ္တနိယတော ဧကော ခန္ဓော စ ဝတ္ထု စ တိဏ္ဏန္နံ ခန္ဓာနံ။ပေ.။ ဒွေ ခန္ဓာ စ။ပေ.။။ (၁)
မိစ္ဆတ္တနိယတော စ အနိယတော စ ဓမ္မာ အနိယတဿ ဓမ္မဿ အတ္ထိပစ္စယေန ပစ္စယော – သဟဇာတံ၊ ပစ္ဆာဇာတံ၊ အာဟာရံ၊ ဣန္ဒြိယံ။ သဟဇာတာ – မိစ္ဆတ္တနိယတာ ခန္ဓာ စ မဟာဘူတာ စ စိတ္တသမုဋ္ဌာနာနံ ရူပါနံ အတ္ထိပစ္စယေန ပစ္စယော။ ပစ္ဆာဇာတာ – မိစ္ဆတ္တနိယတာ ခန္ဓာ စ ကဗဠီကာရော အာဟာရော စ ဣမဿ ကာယဿ အတ္ထိပစ္စယေန ပစ္စယော။ ပစ္ဆာဇာတာ – မိစ္ဆတ္တနိယတာ ခန္ဓာ စ ရူပဇီဝိတိန္ဒြိယဉ္စ ကဋတ္တာရူပါနံ အတ္ထိပစ္စယေန ပစ္စယော။ (၂)
သမ္မတ္တနိယတော စ အနိယတော စ ဓမ္မာ သမ္မတ္တနိယတဿ ဓမ္မဿ အတ္ထိပစ္စယေန ပစ္စယော။ပေ.။ (ဒွေ ပဉှာ မိစ္ဆတ္တနိယတသဒိသာ)။
၁. ပစ္စယာနုလောမံ
၂. သင်္ချာဝါရော
၅၈. ဟေတုယာ သတ္တ၊ အာရမ္မဏေ ပဉ္စ၊ အဓိပတိယာ အဋ္ဌ၊ အနန္တရေ ပဉ္စ၊ သမနန္တရေ ပဉ္စ၊ သဟဇာတေ နဝ၊ အညမညေ တီဏိ၊ နိဿယေ တေရသ၊ ဥပနိဿယေ သတ္တ၊ ပုရေဇာတေ တီဏိ၊ ပစ္ဆာဇာတေ တီဏိ၊ အာသေဝနေ တီဏိ၊ ကမ္မေ သတ္တ၊ ဝိပါကေ ဧကံ၊ အာဟာရေ သတ္တ၊ ဣန္ဒြိယေ သတ္တ၊ ဈာနေ သတ္တ၊ မဂ္ဂေ သတ္တ၊ သမ္ပယုတ္တေ တီဏိ၊ ဝိပ္ပယုတ္တေ ပဉ္စ၊ အတ္ထိယာ တေရသ၊ နတ္ထိယာ ပဉ္စ၊ ဝိဂတေ ပဉ္စ၊ အဝိဂတေ တေရသ (ဧဝံ ဂဏေတဗ္ဗံ)။
အနုလောမံ။
၂. ပစ္စနီယုဒ္ဓါရော
၅၉. မိစ္ဆတ္တနိယတော ဓမ္မော မိစ္ဆတ္တနိယတဿ ဓမ္မဿ သဟဇာတပစ္စယေန ပစ္စယော။ ဥပနိဿယပစ္စယေန ပစ္စယော။ (၁)
မိစ္ဆတ္တနိယတော ဓမ္မော အနိယတဿ ဓမ္မဿ အာရမ္မဏပစ္စယေန ပစ္စယော။ သဟဇာတပစ္စယေန ပစ္စယော။ ဥပနိဿယပစ္စယေန ပစ္စယော။ ပစ္ဆာဇာတပစ္စယေန ပစ္စယော။ ကမ္မပစ္စယေန ပစ္စယော။ (၂)
မိစ္ဆတ္တနိယတော ဓမ္မော မိစ္ဆတ္တနိယတဿ စ အနိယတဿ စ ဓမ္မဿ သဟဇာတပစ္စယေန ပစ္စယော။ (၃)
သမ္မတ္တနိယတော ဓမ္မော သမ္မတ္တနိယတဿ ဓမ္မဿ သဟဇာတပစ္စယေန ပစ္စယော။ ဥပနိဿယပစ္စယေန ပစ္စယော။ (၁)
သမ္မတ္တနိယတော ဓမ္မော အနိယတဿ ဓမ္မဿ အာရမ္မဏပစ္စယေန ပစ္စယော။ သဟဇာတပစ္စယေန ပစ္စယော။ ဥပနိဿယပစ္စယေန ပစ္စယော။ ပစ္ဆာဇာတပစ္စယေန ပစ္စယော။ (၂)
သမ္မတ္တနိယတော ဓမ္မော သမ္မတ္တနိယတဿ စ အနိယတဿ စ ဓမ္မဿ သဟဇာတပစ္စယေန ပစ္စယော။ (၃)
၆၀. အနိယတော ဓမ္မော အနိယတဿ ဓမ္မဿ အာရမ္မဏပစ္စယေန ပစ္စယော။ သဟဇာတပစ္စယေန ပစ္စယော။ ဥပနိဿယပစ္စယေန ပစ္စယော။ ပုရေဇာတပစ္စယေန ပစ္စယော။ ပစ္ဆာဇာတပစ္စယေန ပစ္စယော။ ကမ္မပစ္စယေန ပစ္စယော။ အာဟာရပစ္စယေန ပစ္စယော။ ဣန္ဒြိယပစ္စယေန ပစ္စယော။ (၁)
အနိယတော ဓမ္မော မိစ္ဆတ္တနိယတဿ ဓမ္မဿ အာရမ္မဏပစ္စယေန ပစ္စယော။ ဥပနိဿယပစ္စယေန ပစ္စယော။ ပုရေဇာတပစ္စယေန ပစ္စယော။ (၂)
အနိယတော ဓမ္မော သမ္မတ္တနိယတဿ ဓမ္မဿ ဥပနိဿယပစ္စယေန ပစ္စယော။ ပုရေဇာတပစ္စယေန ပစ္စယော။ (၃)
မိစ္ဆတ္တနိယတော စ အနိယတော စ ဓမ္မာ မိစ္ဆတ္တနိယတဿ ဓမ္မဿ သဟဇာတံ၊ ပုရေဇာတံ။ (၁)
မိစ္ဆတ္တနိယတော စ အနိယတော စ ဓမ္မာ အနိယတဿ ဓမ္မဿ သဟဇာတံ၊ ပစ္ဆာဇာတံ၊ အာဟာရံ၊ ဣန္ဒြိယံ။ (၂)
သမ္မတ္တနိယတော စ အနိယတော စ ဓမ္မာ သမ္မတ္တနိယတဿ ဓမ္မဿ သဟဇာတံ၊ ပုရေဇာတံ။ (၁)
သမ္မတ္တနိယတော စ အနိယတော စ ဓမ္မာ အနိယတဿ ဓမ္မဿ သဟဇာတံ၊ ပစ္ဆာဇာတံ၊ အာဟာရံ၊ ဣန္ဒြိယံ။ (၂)
၂. ပစ္စယပစ္စနီယံ
၂. သင်္ချာဝါရော
၆၁. နဟေတုယာ တေရသ၊ နအာရမ္မဏေ နအဓိပတိယာ နအနန္တရေ နသမနန္တရေ တေရသ၊ နသဟဇာတေ နဝ၊ နအညမညေ နဝ၊ နနိဿယေ နဝ၊ နဥပနိဿယေ တေရသ၊ နပုရေဇာတေ ဧကာဒသ၊ နပစ္ဆာဇာတေ တေရသ၊ နအာသေဝနေ တေရသ၊ နကမ္မေ နဝိပါကေ နအာဟာရေ တေရသ။ပေ.။ နမဂ္ဂေ တေရသ၊ နသမ္ပယုတ္တေ နဝ၊ နဝိပ္ပယုတ္တေ သတ္တ၊ နောအတ္ထိယာ သတ္တ၊ နောနတ္ထိယာ တေရသ၊ နောဝိဂတေ တေရသ၊ နောအဝိဂတေ သတ္တ (ဧဝံ ဂဏေတဗ္ဗံ)။
ပစ္စနီယံ။
၃. ပစ္စယာနုလောမပစ္စနီယံ
ဟေတုဒုကံ
၆၂. ဟေတုပစ္စယာ နအာရမ္မဏေ သတ္တ၊ နအဓိပတိယာ သတ္တ၊ နအနန္တရေ သတ္တ၊ နသမနန္တရေ သတ္တ၊ နအညမညေ တီဏိ၊ နဥပနိဿယေ သတ္တ။ပေ.။ နမဂ္ဂေ သတ္တ၊ နသမ္ပယုတ္တေ တီဏိ၊ နဝိပ္ပယုတ္တေ တီဏိ၊ နောနတ္ထိယာ သတ္တ၊ နောဝိဂတေ သတ္တ (ဧဝံ ဂဏေတဗ္ဗံ)။
အနုလောမပစ္စနီယံ။
၄. ပစ္စယပစ္စနီယာနုလောမံ
နဟေတုဒုကံ
၆၃. နဟေတုပစ္စယာ အာရမ္မဏေ ပဉ္စ၊ အဓိပတိယာ အဋ္ဌ၊ အနန္တရေ ပဉ္စ၊ သမနန္တရေ ပဉ္စ ၊ သဟဇာတေ နဝ၊ အညမညေ တီဏိ၊ နိဿယေ တေရသ၊ ဥပနိဿယေ သတ္တ၊ ပုရေဇာတေ တီဏိ၊ ပစ္ဆာဇာတေ တီဏိ၊ အာသေဝနေ တီဏိ၊ ကမ္မေ သတ္တ၊ ဝိပါကေ ဧကံ၊ အာဟာရေ သတ္တ၊ ဣန္ဒြိယေ ဈာနေ မဂ္ဂေ သတ္တ၊ သမ္ပယုတ္တေ တီဏိ၊ ဝိပ္ပယုတ္တေ ပဉ္စ၊ အတ္ထိယာ တေရသ၊ နတ္ထိယာ ပဉ္စ၊ ဝိဂတေ ပဉ္စ၊ အဝိဂတေ တေရသ (ဧဝံ ဂဏေတဗ္ဗံ)။
ပစ္စနီယာနုလောမံ။
မိစ္ဆတ္တနိယတတ္တိကံ နိဋ္ဌိတံ။