၁၀. အာစယဂါမိတ္တိက
၁. ပဋိစ္စဝါရ
၁. ပစ္စယာနုလောမ
၁. ဝိဘင်္ဂဝါရ
ဟေတုပစ္စယော
၁. အာစယဂါမိံ ဓမ္မံ ပဋိစ္စ အာစယဂါမီ ဓမ္မော ဥပ္ပဇ္ဇတိ ဟေတုပစ္စယာ – အာစယဂါမိံ ဧကံ ခန္ဓံ ပဋိစ္စ တယော ခန္ဓာ။ပေ.။ ဒွေ ခန္ဓေ ပဋိစ္စ ဒွေ ခန္ဓာ။ (၁)
အာစယဂါမိံ ဓမ္မံ ပဋိစ္စ နေဝါစယဂါမိနာပစယဂါမီ ဓမ္မော ဥပ္ပဇ္ဇတိ ဟေတုပစ္စယာ – အာစယဂါမီ ခန္ဓေ ပဋိစ္စ စိတ္တသမုဋ္ဌာနံ ရူပံ။ (၂)
အာစယဂါမိံ ဓမ္မံ ပဋိစ္စ အာစယဂါမီ စ နေဝါစယဂါမိနာပစယဂါမီ စ ဓမ္မာ ဥပ္ပဇ္ဇန္တိ ဟေတုပစ္စယာ – အာစယဂါမိံ ဧကံ ခန္ဓံ ပဋိစ္စ တယော ခန္ဓာ စိတ္တသမုဋ္ဌာနဉ္စ ရူပံ။ပေ.။ ဒွေ ခန္ဓေ ပဋိစ္စ ဒွေ ခန္ဓာ စိတ္တသမုဋ္ဌာနဉ္စ ရူပံ။ (၃)
၂. အပစယဂါမိံ ဓမ္မံ ပဋိစ္စ အပစယဂါမီ ဓမ္မော ဥပ္ပဇ္ဇတိ ဟေတုပစ္စယာ – အပစယဂါမိံ ဧကံ ခန္ဓံ ပဋိစ္စ တယော ခန္ဓာ။ပေ.။ ဒွေ ခန္ဓေ ပဋိစ္စ ဒွေ ခန္ဓာ။ (၁)
အပစယဂါမိံ ဓမ္မံ ပဋိစ္စ နေဝါစယဂါမိနာပစယဂါမီ ဓမ္မော ဥပ္ပဇ္ဇတိ ဟေတုပစ္စယာ – အပစယဂါမီ ခန္ဓေ ပဋိစ္စ စိတ္တသမုဋ္ဌာနံ ရူပံ။ (၂)
အပစယဂါမိံ ဓမ္မံ ပဋိစ္စ အပစယဂါမီ စ နေဝါစယဂါမိနာပစယဂါမီ စ ဓမ္မာ ဥပ္ပဇ္ဇန္တိ ဟေတုပစ္စယာ – အပစယဂါမိံ ဧကံ ခန္ဓံ ပဋိစ္စ တယော ခန္ဓာ စိတ္တသမုဋ္ဌာနဉ္စ ရူပံ။ပေ.။ ဒွေ ခန္ဓေ ပဋိစ္စ ဒွေ ခန္ဓာ စိတ္တသမုဋ္ဌာနဉ္စ ရူပံ။ (၃)
၃. နေဝါစယဂါမိနာပစယဂါမိံ ဓမ္မံ ပဋိစ္စ နေဝါစယဂါမိနာပစယဂါမီ ဓမ္မော ဥပ္ပဇ္ဇတိ ဟေတုပစ္စယာ – နေဝါစယဂါမိနာပစယဂါမိံ ဧကံ ခန္ဓံ ပဋိစ္စ တယော ခန္ဓာ စိတ္တသမုဋ္ဌာနဉ္စ ရူပံ။ပေ.။ ဒွေ ခန္ဓေ။ပေ.။ ပဋိသန္ဓိက္ခဏေ နေဝါစယဂါမိနာပစယဂါမိံ ဧကံ ခန္ဓံ ပဋိစ္စ တယော ခန္ဓာ ကဋတ္တာ စ ရူပံ။ပေ.။ ဒွေ ခန္ဓေ။ပေ.။ ခန္ဓေ ပဋိစ္စ ဝတ္ထု၊ ဝတ္ထုံ ပဋိစ္စ ခန္ဓာ; ဧကံ မဟာဘူတံ ပဋိစ္စ တယော မဟာဘူတာ။ပေ.။ ဒွေ မဟာဘူတေ ပဋိစ္စ ဒွေ မဟာဘူတာ; မဟာဘူတေ ပဋိစ္စ စိတ္တသမုဋ္ဌာနံ ရူပံ ကဋတ္တာရူပံ ဥပါဒါရူပံ။ (၁)
အာစယဂါမိဉ္စ နေဝါစယဂါမိနာပစယဂါမိဉ္စ ဓမ္မံ ပဋိစ္စ နေဝါစယဂါမိနာပစယဂါမီ ဓမ္မော ဥပ္ပဇ္ဇတိ ဟေတုပစ္စယာ – အာစယဂါမီ ခန္ဓေ စ မဟာဘူတေ စ ပဋိစ္စ စိတ္တသမုဋ္ဌာနံ ရူပံ။ (၁)
အပစယဂါမိဉ္စ နေဝါစယဂါမိနာပစယဂါမိဉ္စ ဓမ္မံ ပဋိစ္စ နေဝါစယဂါမိနာပစယဂါမီ ဓမ္မော ဥပ္ပဇ္ဇတိ ဟေတုပစ္စယာ – အပစယဂါမီ ခန္ဓေ စ မဟာဘူတေ စ ပဋိစ္စ စိတ္တသမုဋ္ဌာနံ ရူပံ။ (၁)
အာရမ္မဏပစ္စယော
၄. အာစယဂါမိံ ဓမ္မံ ပဋိစ္စ အာစယဂါမီ ဓမ္မော ဥပ္ပဇ္ဇတိ အာရမ္မဏပစ္စယာ – အာစယဂါမိံ ဧကံ ခန္ဓံ ပဋိစ္စ တယော ခန္ဓာ။ပေ.။ ဒွေ ခန္ဓေ။ပေ.။။ (၁)
အပစယဂါမိံ ဓမ္မံ ပဋိစ္စ အပစယဂါမီ ဓမ္မော ဥပ္ပဇ္ဇတိ အာရမ္မဏပစ္စယာ – အပစယဂါမိံ ဧကံ ခန္ဓံ ပဋိစ္စ တယော ခန္ဓာ။ပေ.။ ဒွေ ခန္ဓေ။ပေ.။။ (၁)
နေဝါစယဂါမိနာပစယဂါမိံ ဓမ္မံ ပဋိစ္စ နေဝါစယဂါမိနာပစယဂါမီ ဓမ္မော ဥပ္ပဇ္ဇတိ အာရမ္မဏပစ္စယာ – နေဝါစယဂါမိနာပစယဂါမိံ ဧကံ ခန္ဓံ ပဋိစ္စ တယော ခန္ဓာ။ပေ.။ ဒွေ ခန္ဓေ ပဋိစ္စ ဒွေ ခန္ဓာ။ ပဋိသန္ဓိက္ခဏေ။ပေ.။ ဝတ္ထုံ ပဋိစ္စ ခန္ဓာ။ (၁)
အဓိပတိပစ္စယော
၅. အာစယဂါမိံ ဓမ္မံ ပဋိစ္စ အာစယဂါမီ ဓမ္မော ဥပ္ပဇ္ဇတိ အဓိပတိပစ္စယာ။ တီဏိ။
အပစယဂါမိံ ဓမ္မံ ပဋိစ္စ အပစယဂါမီ ဓမ္မော ဥပ္ပဇ္ဇတိ အဓိပတိပစ္စယာ။ တီဏိ။
နေဝါစယဂါမိနာပစယဂါမိံ ဓမ္မံ ပဋိစ္စ နေဝါစယဂါမိနာပစယဂါမီ ဓမ္မော။ ဧကံ (ပဋိသန္ဓိ နတ္ထိ); ဧကံ မဟာဘူတံ ပဋိစ္စ တယော မဟာဘူတာ။ပေ.။ မဟာဘူတေ ပဋိစ္စ စိတ္တသမုဋ္ဌာနံ ရူပံ ဥပါဒါရူပံ။ (၁)
အာစယဂါမိဉ္စ နေဝါစယဂါမိနာပစယဂါမိဉ္စ ဓမ္မံ ပဋိစ္စ နေဝါစယဂါမိနာပစယဂါမီ ဓမ္မော ဥပ္ပဇ္ဇတိ အဓိပတိပစ္စယာ – အာစယဂါမီ ခန္ဓေ စ မဟာဘူတေ စ ပဋိစ္စ စိတ္တသမုဋ္ဌာနံ ရူပံ။ (၁)
အပစယဂါမိဉ္စ နေဝါစယဂါမိနာပစယဂါမိဉ္စ ဓမ္မံ ပဋိစ္စ နေဝါစယဂါမိနာပစယဂါမီ ဓမ္မော ဥပ္ပဇ္ဇတိ အဓိပတိပစ္စယာ – အပစယဂါမီ ခန္ဓေ စ မဟာဘူတေ စ ပဋိစ္စ စိတ္တသမုဋ္ဌာနံ ရူပံ။ (၁)
အနန္တရပစ္စယာဒိ
၆. အာစယဂါမိံ ဓမ္မံ ပဋိစ္စ၊ အာစယဂါမီ ဓမ္မော ဥပ္ပဇ္ဇတိ အနန္တရပစ္စယာ။ သမနန္တရပစ္စယာ ။ သဟဇာတပစ္စယာ (သဗ္ဗေပိ မဟာဘူတာ ကာတဗ္ဗာ)။ အညမညပစ္စယာ (စိတ္တသမုဋ္ဌာနမ္ပိ ကဋတ္တာရူပမ္ပိ ဥပါဒါရူပမ္ပိ နတ္ထိ)။ နိဿယပစ္စယာ။ ဥပနိဿယပစ္စယာ။ ပုရေဇာတပစ္စယာ။ အာသေဝနပစ္စယာ။ ကမ္မပစ္စယာ။ ဝိပါကပစ္စယာ။ အာဟာရပစ္စယာ။ ဣန္ဒြိယပစ္စယာ။ ဈာနပစ္စယာ။ မဂ္ဂပစ္စယာ။ သမ္ပယုတ္တပစ္စယာ။ ဝိပ္ပယုတ္တပစ္စယာ။ အတ္ထိပစ္စယာ။ နတ္ထိပစ္စယာ။ ဝိဂတပစ္စယာ။ အဝိဂတပစ္စယာ။။
၁. ပစ္စယာနုလောမံ
၂. သင်္ချာဝါရော
သုဒ္ဓံ
၇. ဟေတုယာ နဝ၊ အာရမ္မဏေ တီဏိ၊ အဓိပတိယာ နဝ၊ အနန္တရေ တီဏိ၊ သမနန္တရေ တီဏိ၊ သဟဇာတေ နဝ၊ အညမညေ တီဏိ၊ နိဿယေ နဝ၊ ဥပနိဿယေ တီဏိ၊ ပုရေဇာတေ တီဏိ၊ အာသေဝနေ တီဏိ၊ ကမ္မေ နဝ၊ ဝိပါကေ ဧကံ၊ အာဟာရေ နဝ၊ ဣန္ဒြိယေ နဝ၊ ဈာနေ နဝ၊ မဂ္ဂေ နဝ၊ သမ္ပယုတ္တေ တီဏိ၊ ဝိပ္ပယုတ္တေ နဝ၊ အတ္ထိယာ နဝ၊ နတ္ထိယာ တီဏိ၊ ဝိဂတေ တီဏိ၊ အဝိဂတေ နဝ (ဧဝံ ဂဏေတဗ္ဗံ)။
အနုလောမံ။
၂. ပစ္စယပစ္စနီယံ
၁. ဝိဘင်္ဂဝါရော
နဟေတုပစ္စယော
၈. အာစယဂါမိံ ဓမ္မံ ပဋိစ္စ အာစယဂါမီ ဓမ္မော ဥပ္ပဇ္ဇတိ နဟေတုပစ္စယာ – ဝိစိကိစ္ဆာသဟဂတေ ဥဒ္ဓစ္စသဟဂတေ ခန္ဓေ ပဋိစ္စ ဝိစိကိစ္ဆာသဟဂတော ဥဒ္ဓစ္စသဟဂတော မောဟော။ (၁)
နေဝါစယဂါမိနာပစယဂါမိံ ဓမ္မံ ပဋိစ္စ နေဝါစယဂါမိနာပစယဂါမီ ဓမ္မော ဥပ္ပဇ္ဇတိ နဟေတုပစ္စယာ – အဟေတုကံ နေဝါစယဂါမိနာပစယဂါမိံ ဧကံ ခန္ဓံ ပဋိစ္စ တယော ခန္ဓာ စိတ္တသမုဋ္ဌာနဉ္စ ရူပံ။ပေ.။ ဒွေ ခန္ဓေ။ပေ.။ အဟေတုကပဋိသန္ဓိက္ခဏေ။ပေ.။ ခန္ဓေ ပဋိစ္စ ဝတ္ထု၊ ဝတ္ထုံ ပဋိစ္စ ခန္ဓာ; ဧကံ မဟာဘူတံ။ပေ.။ ဗာဟိရံ။ အာဟာရသမုဋ္ဌာနံ။ ဥတုသမုဋ္ဌာနံ။ အသညသတ္တာနံ ဧကံ မဟာဘူတံ။ပေ.။။ (၁)
နအာရမ္မဏပစ္စယော
၉. အာစယဂါမိံ ဓမ္မံ ပဋိစ္စ နေဝါစယဂါမိနာပစယဂါမီ ဓမ္မော ဥပ္ပဇ္ဇတိ နအာရမ္မဏပစ္စယာ – အာစယဂါမီ ခန္ဓေ ပဋိစ္စ စိတ္တသမုဋ္ဌာနံ ရူပံ။ (၁)
အပစယဂါမိံ ဓမ္မံ ပဋိစ္စ နေဝါစယဂါမိနာပစယဂါမီ ဓမ္မော ဥပ္ပဇ္ဇတိ နအာရမ္မဏပစ္စယာ – အပစယဂါမီ ခန္ဓေ ပဋိစ္စ စိတ္တသမုဋ္ဌာနံ ရူပံ။ (၁)
နေဝါစယဂါမိနာပစယဂါမိံ ဓမ္မံ ပဋိစ္စ နေဝါစယဂါမိနာပစယဂါမီ ဓမ္မော ဥပ္ပဇ္ဇတိ နအာရမ္မဏပစ္စယာ – နေဝါစယဂါမိနာပစယဂါမီ ခန္ဓေ ပဋိစ္စ စိတ္တသမုဋ္ဌာနံ ရူပံ။ ပဋိသန္ဓိက္ခဏေ။ပေ.။ ခန္ဓေ ပဋိစ္စ ဝတ္ထု။ပေ.။ ဧကံ မဟာဘူတံ။ပေ.။ ဗာဟိရံ။ အာဟာရသမုဋ္ဌာနံ။ ဥတုသမုဋ္ဌာနံ။ အသညသတ္တာနံ။ပေ.။။ (၁)
အာစယဂါမိဉ္စ နေဝါစယဂါမိနာပစယဂါမိဉ္စ ဓမ္မံ ပဋိစ္စ နေဝါစယဂါမိနာပစယဂါမီ ဓမ္မော ဥပ္ပဇ္ဇတိ နအာရမ္မဏပစ္စယာ – အာစယဂါမီ ခန္ဓေ စ မဟာဘူတေ စ ပဋိစ္စ စိတ္တသမုဋ္ဌာနံ ရူပံ။ (၁)
အပစယဂါမိဉ္စ နေဝါစယဂါမိနာပစယဂါမိဉ္စ ဓမ္မံ ပဋိစ္စ နေဝါစယဂါမိနာပစယဂါမီ ဓမ္မော ဥပ္ပဇ္ဇတိ နအာရမ္မဏပစ္စယာ – အပစယဂါမီ ခန္ဓေ စ မဟာဘူတေ စ ပဋိစ္စ စိတ္တသမုဋ္ဌာနံ ရူပံ။ (၁)
နအဓိပတိပစ္စယော
၁၀. အာစယဂါမိံ ဓမ္မံ ပဋိစ္စ အာစယဂါမီ ဓမ္မော ဥပ္ပဇ္ဇတိ နအဓိပတိပစ္စယာ။ တီဏိ။
အပစယဂါမိံ ဓမ္မံ ပဋိစ္စ အပစယဂါမီ ဓမ္မော ဥပ္ပဇ္ဇတိ နအဓိပတိပစ္စယာ – အပစယဂါမီ ခန္ဓေ ပဋိစ္စ အပစယဂါမီ အဓိပတိ။ (၁)
နေဝါစယဂါမိနာပစယဂါမိံ ဓမ္မံ ပဋိစ္စ နေဝါစယဂါမိနာပစယဂါမီ ဓမ္မော ဥပ္ပဇ္ဇတိ နအဓိပတိပစ္စယာ – နေဝါစယဂါမိနာပစယဂါမိံ ဧကံ ခန္ဓံ ပဋိစ္စ တယော ခန္ဓာ စိတ္တသမုဋ္ဌာနဉ္စ ရူပံ။ပေ.။ ဒွေ ခန္ဓေ။ပေ.။ ပဋိသန္ဓိက္ခဏေ။ပေ.။ ခန္ဓေ ပဋိစ္စ ဝတ္ထု၊ ဝတ္ထုံ ပဋိစ္စ ခန္ဓာ; ဧကံ မဟာဘူတံ။ပေ.။ ဗာဟိရံ။ အာဟာရသမုဋ္ဌာနံ။ ဥတုသမုဋ္ဌာနံ။ အသညသတ္တာနံ ဧကံ မဟာဘူတံ။ပေ.။။ (၁)
အာစယဂါမိဉ္စ နေဝါစယဂါမိနာပစယဂါမိဉ္စ ဓမ္မံ ပဋိစ္စ နေဝါစယဂါမိနာပစယဂါမီ ဓမ္မော ဥပ္ပဇ္ဇတိ နအဓိပတိပစ္စယာ – အာစယဂါမီ ခန္ဓေ စ မဟာဘူတေ စ ပဋိစ္စ စိတ္တသမုဋ္ဌာနံ ရူပံ။ (၁)
နအနန္တရပစ္စယာဒိ
၁၁. အာစယဂါမိံ ဓမ္မံ ပဋိစ္စ နေဝါစယဂါမိနာပစယဂါမီ ဓမ္မော ဥပ္ပဇ္ဇတိ နအနန္တရပစ္စယာ။ နသမနန္တရပစ္စယာ။ နအညမညပစ္စယာ။ နဥပနိဿယပစ္စယာ။ နပုရေဇာတပစ္စယာ (ကုသလတ္တိကသဒိသာ သတ္တ ပဉှာ)။ နပစ္ဆာဇာတပစ္စယာ။
နအာသေဝနပစ္စယော
၁၂. အာစယဂါမိံ ဓမ္မံ ပဋိစ္စ အာစယဂါမီ ဓမ္မော ဥပ္ပဇ္ဇတိ နအာသေဝနပစ္စယာ။ တီဏိ။
အပစယဂါမိံ ဓမ္မံ ပဋိစ္စ နေဝါစယဂါမိနာပစယဂါမီ ဓမ္မော ဥပ္ပဇ္ဇတိ နအာသေဝနပစ္စယာ – အပစယဂါမီ ခန္ဓေ ပဋိစ္စ စိတ္တသမုဋ္ဌာနံ ရူပံ။ (၁)
နေဝါစယဂါမိနာပစယဂါမိံ ဓမ္မံ ပဋိစ္စ နေဝါစယဂါမိနာပစယဂါမီ ဓမ္မော ဥပ္ပဇ္ဇတိ နအာသေဝနပစ္စယာ (ဧကာ ပဉှာ သဗ္ဗေ မဟာဘူတာ ကာတဗ္ဗာ)။
အာစယဂါမိဉ္စ နေဝါစယဂါမိနာပစယဂါမိဉ္စ ဓမ္မံ ပဋိစ္စ နေဝါစယဂါမိနာပစယဂါမီ ဓမ္မော ဥပ္ပဇ္ဇတိ နအာသေဝနပစ္စယာ – အာစယဂါမီ ခန္ဓေ စ မဟာဘူတေ စ ပဋိစ္စ စိတ္တသမုဋ္ဌာနံ ရူပံ။ (၁)
အပစယဂါမိဉ္စ နေဝါစယဂါမိနာပစယဂါမိဉ္စ ဓမ္မံ ပဋိစ္စ နေဝါစယဂါမိနာပစယဂါမီ ဓမ္မော ဥပ္ပဇ္ဇတိ နအာသေဝနပစ္စယာ – အပစယဂါမီ ခန္ဓေ စ မဟာဘူတေ စ ပဋိစ္စ စိတ္တသမုဋ္ဌာနံ ရူပံ။ (၁)
နကမ္မပစ္စယော
၁၃. အာစယဂါမိံ ဓမ္မံ ပဋိစ္စ အာစယဂါမီ ဓမ္မော ဥပ္ပဇ္ဇတိ နကမ္မပစ္စယာ – အာစယဂါမီ ခန္ဓေ ပဋိစ္စ အာစယဂါမီ စေတနာ။ (၁)
အပစယဂါမိံ ဓမ္မံ ပဋိစ္စ အပစယဂါမီ ဓမ္မော ဥပ္ပဇ္ဇတိ နကမ္မပစ္စယာ – အပစယဂါမီ ခန္ဓေ ပဋိစ္စ အပစယဂါမီ စေတနာ။ (၁)
နေဝါစယဂါမိနာပစယဂါမိံ ဓမ္မံ ပဋိစ္စ နေဝါစယဂါမိနာပစယဂါမီ ဓမ္မော ဥပ္ပဇ္ဇတိ နကမ္မပစ္စယာ – နေဝါစယဂါမိနာပစယဂါမီ ခန္ဓေ ပဋိစ္စ နေဝါစယဂါမိနာပစယဂါမီ စေတနာ; ဗာဟိရံ။ အာဟာရသမုဋ္ဌာနံ။ ဥတုသမုဋ္ဌာနံ။ ဧကံ မဟာဘူတံ။ပေ.။။ (၁)
နဝိပါကပစ္စယာဒိ
၁၄. အာစယဂါမိံ ဓမ္မံ ပဋိစ္စ အာစယဂါမီ ဓမ္မော ဥပ္ပဇ္ဇတိ နဝိပါကပစ္စယာ (ပရိပုဏ္ဏံ ၊ ပဋိသန္ဓိ နတ္ထိ)။ နအာဟာရပစ္စယာ။ နဣန္ဒြိယပစ္စယာ။ နဈာနပစ္စယာ။ နမဂ္ဂပစ္စယာ။ နသမ္ပယုတ္တပစ္စယာ။ နဝိပ္ပယုတ္တပစ္စယာ (တီဏိ)။ နောနတ္ထိပစ္စယာ။ နောဝိဂတပစ္စယာ။
၂. ပစ္စယပစ္စနီယံ
၂. သင်္ချာဝါရော
သုဒ္ဓံ
၁၅. နဟေတုယာ ဒွေ၊ နအာရမ္မဏေ ပဉ္စ၊ နအဓိပတိယာ ဆ၊ နအနန္တရေ ပဉ္စ၊ နသမနန္တရေ ပဉ္စ၊ နအညမညေ ပဉ္စ၊ နဥပနိဿယေ ပဉ္စ၊ နပုရေဇာတေ သတ္တ၊ နပစ္ဆာဇာတေ နဝ၊ နအာသေဝနေ သတ္တ၊ နကမ္မေ တီဏိ၊ နဝိပါကေ နဝ၊ နအာဟာရေ ဧကံ၊ နဣန္ဒြိယေ ဧကံ၊ နဈာနေ ဧကံ၊ နမဂ္ဂေ ဧကံ၊ နသမ္ပယုတ္တေ ပဉ္စ၊ နဝိပ္ပယုတ္တေ တီဏိ၊ နောနတ္ထိယာ ပဉ္စ၊ နောဝိဂတေ ပဉ္စ (ဧဝံ ဂဏေတဗ္ဗံ) ။
ပစ္စနီယံ။
၃. ပစ္စယာနုလောမပစ္စနီယံ
ဟေတုဒုကံ
၁၆. ဟေတုပစ္စယာ နအာရမ္မဏေ ပဉ္စ၊ နအဓိပတိယာ ဆ၊ နအနန္တရေ ပဉ္စ၊ နသမနန္တရေ ပဉ္စ၊ နအညမညေ ပဉ္စ၊ နဥပနိဿယေ ပဉ္စ၊ နပုရေဇာတေ သတ္တ ၊ နပစ္ဆာဇာတေ နဝ၊ နအာသေဝနေ သတ္တ၊ နကမ္မေ တီဏိ၊ နဝိပါကေ နဝ၊ နသမ္ပယုတ္တေ ပဉ္စ၊ နဝိပ္ပယုတ္တေ တီဏိ၊ နောနတ္ထိယာ ပဉ္စ၊ နောဝိဂတေ ပဉ္စ (ဧဝံ ဂဏေတဗ္ဗံ)။
အနုလောမပစ္စနီယံ။
၄. ပစ္စယပစ္စနီယာနုလောမံ
နဟေတုဒုကံ
၁၇. နဟေတုပစ္စယာ အာရမ္မဏေ ဒွေ၊ အနန္တရေ ဒွေ၊ သမနန္တရေ ဒွေ၊ သဟဇာတေ ဒွေ၊ အညမညေ နိဿယေ ဥပနိဿယေ ပုရေဇာတေ အာသေဝနေ ကမ္မေ ဒွေ၊ ဝိပါကေ ဧကံ၊ အာဟာရေ ဒွေ၊ ဣန္ဒြိယေ ဒွေ၊ ဈာနေ ဒွေ၊ မဂ္ဂေ ဧကံ၊ သမ္ပယုတ္တေ ဒွေ၊ ဝိပ္ပယုတ္တေ အတ္ထိယာ နတ္ထိယာ ဝိဂတေ အဝိဂတေ ဒွေ (ဧဝံ ဂဏေတဗ္ဗံ)။
ပစ္စနီယာနုလောမံ။
ပဋိစ္စဝါရော။
၂. သဟဇာတဝါရော
(သဟဇာတဝါရော ပဋိစ္စဝါရသဒိသော။)
၃. ပစ္စယဝါရော
၁. ပစ္စယာနုလောမံ
၁. ဝိဘင်္ဂဝါရော
ဟေတုပစ္စယော
၁၈. အာစယဂါမိံ ဓမ္မံ ပစ္စယာ အာစယဂါမီ ဓမ္မော ဥပ္ပဇ္ဇတိ ဟေတုပစ္စယာ – အာစယဂါမိံ ဧကံ ခန္ဓံ ပစ္စယာ တယော ခန္ဓာ။ပေ.။ ဒွေ ခန္ဓေ ပစ္စယာ ဒွေ ခန္ဓာ။ (၁)
အာစယဂါမိံ ဓမ္မံ ပစ္စယာ နေဝါစယဂါမိနာပစယဂါမီ ဓမ္မော ဥပ္ပဇ္ဇတိ ဟေတုပစ္စယာ – အာစယဂါမီ ခန္ဓေ ပစ္စယာ စိတ္တသမုဋ္ဌာနံ ရူပံ။ (၂)
အာစယဂါမိံ ဓမ္မံ ပစ္စယာ အာစယဂါမီ စ နေဝါစယဂါမိနာပစယဂါမီ စ ဓမ္မာ ဥပ္ပဇ္ဇန္တိ ဟေတုပစ္စယာ – အာစယဂါမိံ ဧကံ ခန္ဓံ ပစ္စယာ တယော ခန္ဓာ စိတ္တသမုဋ္ဌာနဉ္စ ရူပံ။ပေ.။ ဒွေ ခန္ဓေ။ပေ.။။ (၃)
အပစယဂါမိံ ဓမ္မံ ပစ္စယာ အပစယဂါမီ ဓမ္မော။ တီဏိ။
၁၉. နေဝါစယဂါမိနာပစယဂါမိံ ဓမ္မံ ပစ္စယာ နေဝါစယဂါမိနာပစယဂါမီ ဓမ္မော ဥပ္ပဇ္ဇတိ ဟေတုပစ္စယာ – နေဝါစယဂါမိနာပစယဂါမိံ ဧကံ ခန္ဓံ ပစ္စယာ တယော ခန္ဓာ စိတ္တသမုဋ္ဌာနဉ္စ ရူပံ။ပေ.။ ဒွေ ခန္ဓေ။ပေ.။ ပဋိသန္ဓိက္ခဏေ။ပေ.။ ခန္ဓေ ပစ္စယာ ဝတ္ထု၊ ဝတ္ထုံ ပစ္စယာ ခန္ဓာ; ဧကံ မဟာဘူတံ ပစ္စယာ။ပေ.။ ဝတ္ထုံ ပစ္စယာ နေဝါစယဂါမိနာပစယဂါမီ ခန္ဓာ။ (၁)
နေဝါစယဂါမိနာပစယဂါမိံ ဓမ္မံ ပစ္စယာ အာစယဂါမီ ဓမ္မော ဥပ္ပဇ္ဇတိ ဟေတုပစ္စယာ – ဝတ္ထုံ ပစ္စယာ အာစယဂါမီ ခန္ဓာ။ (၂)
နေဝါစယဂါမိနာပစယဂါမိံ ဓမ္မံ ပစ္စယာ အပစယဂါမီ ဓမ္မော ဥပ္ပဇ္ဇတိ ဟေတုပစ္စယာ – ဝတ္ထုံ ပစ္စယာ အပစယဂါမီ ခန္ဓာ။ (၃)
နေဝါစယဂါမိနာပစယဂါမိံ ဓမ္မံ ပစ္စယာ အာစယဂါမီ စ နေဝါစယဂါမိနာပစယဂါမီ စ ဓမ္မာ ဥပ္ပဇ္ဇန္တိ ဟေတုပစ္စယာ – ဝတ္ထုံ ပစ္စယာ အာစယဂါမီ ခန္ဓာ၊ မဟာဘူတေ ပစ္စယာ စိတ္တသမုဋ္ဌာနံ ရူပံ။ (၄)
နေဝါစယဂါမိနာပစယဂါမိံ ဓမ္မံ ပစ္စယာ အပစယဂါမီ စ နေဝါစယဂါမိနာပစယဂါမီ စ ဓမ္မာ ဥပ္ပဇ္ဇန္တိ ဟေတုပစ္စယာ – ဝတ္ထုံ ပစ္စယာ အပစယဂါမီ ခန္ဓာ၊ မဟာဘူတေ ပစ္စယာ စိတ္တသမုဋ္ဌာနံ ရူပံ။ (၅)
၂၀. အာစယဂါမိဉ္စ နေဝါစယဂါမိနာပစယဂါမိဉ္စ ဓမ္မံ ပစ္စယာ အာစယဂါမီ ဓမ္မော ဥပ္ပဇ္ဇတိ ဟေတုပစ္စယာ – အာစယဂါမိံ ဧကံ ခန္ဓဉ္စ ဝတ္ထုဉ္စ ပစ္စယာ တယော ခန္ဓာ။ပေ.။ ဒွေ ခန္ဓေ။ပေ.။။ (၁)
အာစယဂါမိဉ္စ နေဝါစယဂါမိနာပစယဂါမိဉ္စ ဓမ္မံ ပစ္စယာ နေဝါစယဂါမိနာပစယဂါမီ ဓမ္မော ဥပ္ပဇ္ဇတိ ဟေတုပစ္စယာ – အာစယဂါမီ ခန္ဓေ စ မဟာဘူတေ စ ပစ္စယာ စိတ္တသမုဋ္ဌာနံ ရူပံ။ (၂)
အာစယဂါမိဉ္စ နေဝါစယဂါမိနာပစယဂါမိဉ္စ ဓမ္မံ ပစ္စယာ အာစယဂါမီ စ နေဝါစယဂါမိနာပစယဂါမီ စ ဓမ္မာ ဥပ္ပဇ္ဇန္တိ ဟေတုပစ္စယာ – အာစယဂါမိံ ဧကံ ခန္ဓဉ္စ ဝတ္ထုဉ္စ ပစ္စယာ တယော ခန္ဓာ။ပေ.။ ဒွေ ခန္ဓေ။ပေ.။ အာစယဂါမီ ခန္ဓေ စ မဟာဘူတေ စ ပစ္စယာ စိတ္တသမုဋ္ဌာနံ ရူပံ။ (၃)
အပစယဂါမိဉ္စ နေဝါစယဂါမိနာပစယဂါမိဉ္စ ဓမ္မံ ပစ္စယာ အပစယဂါမီ ဓမ္မော။ တီဏိ။
အာရမ္မဏပစ္စယော
၂၁. အာစယဂါမိံ ဓမ္မံ ပစ္စယာ အာစယဂါမီ ဓမ္မော ဥပ္ပဇ္ဇတိ အာရမ္မဏပစ္စယာ – အာစယဂါမိံ ဧကံ ခန္ဓံ ပစ္စယာ။ပေ.။။ (၁)
အပစယဂါမိံ ဓမ္မံ ပစ္စယာ အပစယဂါမီ ဓမ္မော။ ဧကံ။
နေဝါစယဂါမိနာပစယဂါမိံ ဓမ္မံ ပစ္စယာ နေဝါစယဂါမိနာပစယဂါမီ ဓမ္မော ဥပ္ပဇ္ဇတိ အာရမ္မဏပစ္စယာ။ နေဝါစယဂါမိနာပစယဂါမိံ ဧကံ ခန္ဓံ ပစ္စယာ တယော ခန္ဓာ။ပေ.။ ဒွေ ခန္ဓေ။ပေ.။ ပဋိသန္ဓိက္ခဏေ။ပေ.။ ဝတ္ထုံ ပစ္စယာ ခန္ဓာ၊ စက္ခါယတနံ ပစ္စယာ စက္ခုဝိညာဏံ။ပေ.။ ကာယာယတနံ ပစ္စယာ ကာယဝိညာဏံ။ ဝတ္ထုံ ပစ္စယာ နေဝါစယဂါမိနာပစယဂါမီ ခန္ဓာ။ (၁)
နေဝါစယဂါမိနာပစယဂါမိံ ဓမ္မံ ပစ္စယာ အာစယဂါမီ ဓမ္မော ဥပ္ပဇ္ဇတိ အာရမ္မဏပစ္စယာ – ဝတ္ထုံ ပစ္စယာ အာစယဂါမီ ခန္ဓာ။ (၂)
နေဝါစယဂါမိနာပစယဂါမိံ ဓမ္မံ ပစ္စယာ အပစယဂါမီ ဓမ္မော ဥပ္ပဇ္ဇတိ အာရမ္မဏပစ္စယာ – ဝတ္ထုံ ပစ္စယာ အပစယဂါမီ ခန္ဓာ။ (၃)
အာစယဂါမိဉ္စ နေဝါစယဂါမိနာပစယဂါမိဉ္စ ဓမ္မံ ပစ္စယာ အာစယဂါမီ ဓမ္မော ဥပ္ပဇ္ဇတိ အာရမ္မဏပစ္စယာ – အာစယဂါမိံ ဧကံ ခန္ဓဉ္စ ဝတ္ထုဉ္စ ပစ္စယာ တယော ခန္ဓာ။ပေ.။ ဒွေ ခန္ဓေ။ပေ.။။ (၁)
အပစယဂါမိဉ္စ နေဝါစယဂါမိနာပစယဂါမိဉ္စ ဓမ္မံ ပစ္စယာ အပစယဂါမီ ဓမ္မော ဥပ္ပဇ္ဇတိ အာရမ္မဏပစ္စယာ – အပစယဂါမိံ ဧကံ ခန္ဓဉ္စ ဝတ္ထုဉ္စ ပစ္စယာ တယော ခန္ဓာ။ပေ.။ ဒွေ ခန္ဓေ။ပေ.။။ (၁)
အဓိပတိပစ္စယော
၂၂. အာစယဂါမိံ ဓမ္မံ ပစ္စယာ အာစယဂါမီ ဓမ္မော ဥပ္ပဇ္ဇတိ အဓိပတိပစ္စယာ။ တီဏိ။
အပစယဂါမိံ ဓမ္မံ ပစ္စယာ အပစယဂါမီ ဓမ္မော။ တီဏိ။
နေဝါစယဂါမိနာပစယဂါမိံ ဓမ္မံ ပစ္စယာ နေဝါစယဂါမိနာပစယဂါမီ ဓမ္မော။ ဧကံ။ပေ.။ ဝတ္ထုံ ပစ္စယာ နေဝါစယဂါမိနာပစယဂါမီ ခန္ဓာ။
နေဝါစယဂါမိနာပစယဂါမိံ ဓမ္မံ ပစ္စယာ အာစယဂါမီ ဓမ္မော။ပေ.။ (ဣဓါပိ ဃဋနာ ဟေတုသဒိသာ)။
အနန္တရပစ္စယာဒိ
၂၃. အာစယဂါမိံ ဓမ္မံ ပစ္စယာ အာစယဂါမီ ဓမ္မော ဥပ္ပဇ္ဇတိ အနန္တရပစ္စယာ။ သမနန္တရပစ္စယာ။ သဟဇာတပစ္စယာ။ တီဏိ။
အပစယဂါမိံ ဓမ္မံ ပစ္စယာ အပစယဂါမီ ဓမ္မော။ တီဏိ။
နေဝါစယဂါမိနာပစယဂါမိံ ဓမ္မံ ပစ္စယာ နေဝါစယဂါမိနာပစယဂါမီ ဓမ္မော ဥပ္ပဇ္ဇတိ သဟဇာတပစ္စယာ – နေဝါစယဂါမိနာပစယဂါမိံ ဧကံ ခန္ဓံ ပစ္စယာ တယော ခန္ဓာ စိတ္တသမုဋ္ဌာနဉ္စ ရူပံ။ပေ.။ ဒွေ ခန္ဓေ။ပေ.။ ပဋိသန္ဓိက္ခဏေ။ပေ.။ အသညသတ္တာနံ ဧကံ မဟာဘူတံ။ပေ.။ စက္ခါယတနံ ပစ္စယာ စက္ခုဝိညာဏံ။ပေ.။ ကာယာယတနံ ပစ္စယာ ကာယဝိညာဏံ။ ဝတ္ထုံ ပစ္စယာ။ပေ.။။ (၁)
နေဝါစယဂါမိနာပစယဂါမိံ ဓမ္မံ ပစ္စယာ အာစယဂါမီ ဓမ္မော ဥပ္ပဇ္ဇတိ သဟဇာတပစ္စယာ (သံခိတ္တံ၊ သဗ္ဗေ ဃဋနာ ကာတဗ္ဗာ)။
အညမညပစ္စယာဒိ
၂၄. အပစယဂါမိံ ဓမ္မံ ပစ္စယာ အပစယဂါမီ ဓမ္မော ဥပ္ပဇ္ဇတိ အညမညပစ္စယာ။ နိဿယပစ္စယာ။ ဥပနိဿယပစ္စယာ။ ပုရေဇာတပစ္စယာ။ အာသေဝနပစ္စယာ။ ကမ္မပစ္စယာ။ ဝိပါကပစ္စယာ။ အာဟာရပစ္စယာ။ ဣန္ဒြိယပစ္စယာ။ ဈာနပစ္စယာ။ မဂ္ဂပစ္စယာ။ သမ္ပယုတ္တပစ္စယာ။ ဝိပ္ပယုတ္တပစ္စယာ။ အတ္ထိပစ္စယာ။ နတ္ထိပစ္စယာ။ ဝိဂတပစ္စယာ။ အဝိဂတပစ္စယာ။
၁. ပစ္စယာနုလောမံ
၂. သင်္ချာဝါရော
သုဒ္ဓံ
၂၅. ဟေတုယာ သတ္တရသ၊ အာရမ္မဏေ သတ္တ၊ အဓိပတိယာ သတ္တရသ၊ အနန္တရေ သတ္တ၊ သမနန္တရေ သတ္တ၊ သဟဇာတေ သတ္တရသ၊ အညမညေ သတ္တ၊ နိဿယေ သတ္တရသ၊ ဥပနိဿယေ သတ္တ၊ ပုရေဇာတေ သတ္တ၊ အာသေဝနေ သတ္တ၊ ကမ္မေ သတ္တရသ၊ ဝိပါကေ ဧကံ၊ အာဟာရေ သတ္တရသ၊ ဣန္ဒြိယေ ဈာနေ မဂ္ဂေ သတ္တရသ၊ သမ္ပယုတ္တေ သတ္တ၊ ဝိပ္ပယုတ္တေ သတ္တရသ၊ အတ္ထိယာ သတ္တရသ၊ နတ္ထိယာ သတ္တ၊ ဝိဂတေ သတ္တ၊ အဝိဂတေ သတ္တရသ (ဧဝံ ဂဏေတဗ္ဗံ)။
အနုလောမံ။
၂. ပစ္စယပစ္စနီယံ
၁. ဝိဘင်္ဂဝါရော
နဟေတုပစ္စယော
၂၆. အာစယဂါမိံ ဓမ္မံ ပစ္စယာ အာစယဂါမီ ဓမ္မော ဥပ္ပဇ္ဇတိ နဟေတုပစ္စယာ – ဝိစိကိစ္ဆာသဟဂတေ ဥဒ္ဓစ္စသဟဂတေ ခန္ဓေ ပစ္စယာ ဝိစိကိစ္ဆာသဟဂတော ဥဒ္ဓစ္စသဟဂတော မောဟော။ (၁)
နေဝါစယဂါမိနာပစယဂါမိံ ဓမ္မံ ပစ္စယာ နေဝါစယဂါမိနာပစယဂါမီ ဓမ္မော ဥပ္ပဇ္ဇတိ နဟေတုပစ္စယာ – အဟေတုကံ နေဝါစယဂါမိနာပစယဂါမိံ ဧကံ ခန္ဓံ ပစ္စယာ တယော ခန္ဓာ စိတ္တသမုဋ္ဌာနဉ္စ ရူပံ။ပေ.။ ဒွေ ခန္ဓေ။ပေ.။ အဟေတုကပဋိသန္ဓိက္ခဏေ။ပေ.။ အသညသတ္တာနံ ဧကံ မဟာဘူတံ။ပေ.။ စက္ခါယတနံ ပစ္စယာ စက္ခုဝိညာဏံ။ပေ.။ ကာယာယတနံ ပစ္စယာ ကာယဝိညာဏံ။ ဝတ္ထုံ ပစ္စယာ အဟေတုကာ နေဝါစယဂါမိနာပစယဂါမီ ခန္ဓာ။ (၁)
နေဝါစယဂါမိနာပစယဂါမိံ ဓမ္မံ ပစ္စယာ အာစယဂါမီ ဓမ္မော ဥပ္ပဇ္ဇတိ နဟေတုပစ္စယာ – ဝတ္ထုံ ပစ္စယာ ဝိစိကိစ္ဆာသဟဂတော ဥဒ္ဓစ္စသဟဂတော မောဟော။ (၂)
အာစယဂါမိဉ္စ နေဝါစယဂါမိနာပစယဂါမိဉ္စ ဓမ္မံ ပစ္စယာ အာစယဂါမီ ဓမ္မော ဥပ္ပဇ္ဇတိ နဟေတုပစ္စယာ – ဝိစိကိစ္ဆာသဟဂတေ ဥဒ္ဓစ္စသဟဂတေ ခန္ဓေ စ ဝတ္ထုဉ္စ ပစ္စယာ ဝိစိကိစ္ဆာသဟဂတော ဥဒ္ဓစ္စသဟဂတော မောဟော။ (၁)
နအာရမ္မဏပစ္စယော
၂၇. အာစယဂါမိံ ဓမ္မံ ပစ္စယာ နေဝါစယဂါမိနာပစယဂါမီ ဓမ္မော ဥပ္ပဇ္ဇတိ နအာရမ္မဏပစ္စယာ (သံခိတ္တံ။ ပဋိစ္စဝါရသဒိသံ)။
နအဓိပတိပစ္စယော
၂၈. အာစယဂါမိံ ဓမ္မံ ပစ္စယာ အာစယဂါမီ ဓမ္မော ဥပ္ပဇ္ဇတိ နအဓိပတိပစ္စယာ။ တီဏိ။
အပစယဂါမိံ ဓမ္မံ ပစ္စယာ အပစယဂါမီ ဓမ္မော ဥပ္ပဇ္ဇတိ နအဓိပတိပစ္စယာ – အပစယဂါမီ ခန္ဓေ ပစ္စယာ အပစယဂါမီ အဓိပတိ။ (၁)
နေဝါစယဂါမိနာပစယဂါမိံ ဓမ္မံ ပစ္စယာ နေဝါစယဂါမိနာပစယဂါမီ ဓမ္မော ဥပ္ပဇ္ဇတိ နအဓိပတိပစ္စယာ။ပေ.။ အသညသတ္တာနံ။ပေ.။ စက္ခါယတနံ ပစ္စယာ စက္ခုဝိညာဏံ။ပေ.။ ကာယာယတနံ ပစ္စယာ ကာယဝိညာဏံ။ ဝတ္ထုံ ပစ္စယာ နေဝါစယဂါမိနာပစယဂါမီ ခန္ဓာ။ (၁)
နေဝါစယဂါမိနာပစယဂါမိံ ဓမ္မံ ပစ္စယာ အာစယဂါမီ ဓမ္မော ဥပ္ပဇ္ဇတိ နအဓိပတိပစ္စယာ – ဝတ္ထုံ ပစ္စယာ အာစယဂါမီ ခန္ဓာ။ (၂)
နေဝါစယဂါမိနာပစယဂါမိံ ဓမ္မံ ပစ္စယာ အပစယဂါမီ ဓမ္မော ဥပ္ပဇ္ဇတိ နအဓိပတိပစ္စယာ – ဝတ္ထုံ ပစ္စယာ အပစယဂါမီ အဓိပတိ။ (၃)
နေဝါစယဂါမိနာပစယဂါမိံ ဓမ္မံ ပစ္စယာ အာစယဂါမီ စ နေဝါစယဂါမိနာပစယဂါမီ စ ဓမ္မာ ဥပ္ပဇ္ဇန္တိ နအဓိပတိပစ္စယာ – ဝတ္ထုံ ပစ္စယာ အာစယဂါမီ ခန္ဓာ၊ မဟာဘူတေ ပစ္စယာ စိတ္တသမုဋ္ဌာနံ ရူပံ။ (၄)
၂၉. အာစယဂါမိဉ္စ နေဝါစယဂါမိနာပစယဂါမိဉ္စ ဓမ္မံ ပစ္စယာ အာစယဂါမီ ဓမ္မော ဥပ္ပဇ္ဇတိ နအဓိပတိပစ္စယာ – အာစယဂါမိံ ဧကံ ခန္ဓဉ္စ ဝတ္ထုဉ္စ ပစ္စယာ တယော ခန္ဓာ။ပေ.။ ဒွေ ခန္ဓေ။ပေ.။။ (၁)
အာစယဂါမိဉ္စ နေဝါစယဂါမိနာပစယဂါမိဉ္စ ဓမ္မံ ပစ္စယာ နေဝါစယဂါမိနာပစယဂါမီ ဓမ္မော ဥပ္ပဇ္ဇတိ နအဓိပတိပစ္စယာ – အာစယဂါမီ ခန္ဓေ စ မဟာဘူတေ စ ပစ္စယာ စိတ္တသမုဋ္ဌာနံ ရူပံ။ (၂)
အာစယဂါမိဉ္စ နေဝါစယဂါမိနာပစယဂါမိဉ္စ ဓမ္မံ ပစ္စယာ အာစယဂါမီ စ နေဝါစယဂါမိနာပစယဂါမီ စ ဓမ္မာ ဥပ္ပဇ္ဇန္တိ နအဓိပတိပစ္စယာ – အာစယဂါမိံ ဧကံ ခန္ဓဉ္စ ဝတ္ထုဉ္စ ပစ္စယာ တယော ခန္ဓာ။ပေ.။ ဒွေ ခန္ဓေ။ပေ.။ အာစယဂါမီ ခန္ဓေ စ မဟာဘူတေ စ ပစ္စယာ စိတ္တသမုဋ္ဌာနံ ရူပံ။ (၃)
အပစယဂါမိဉ္စ နေဝါစယဂါမိနာပစယဂါမိဉ္စ ဓမ္မံ ပစ္စယာ အပစယဂါမီ ဓမ္မော ဥပ္ပဇ္ဇတိ နအဓိပတိပစ္စယာ – အပစယဂါမီ ခန္ဓေ စ ဝတ္ထုဉ္စ ပစ္စယာ အပစယဂါမီ အဓိပတိ။ (၁)
နအနန္တရပစ္စယာဒိ
၃၀. နအနန္တရပစ္စယာ။ နသမနန္တရပစ္စယာ။ နအညမညပစ္စယာ။ နဥပနိဿယပစ္စယာ။ နပုရေဇာတပစ္စယာ (ပဋိစ္စဝါရသဒိသာ၊ သတ္တ ပဉှာ)။ နပစ္ဆာဇာတပစ္စယာ (ပရိပုဏ္ဏံ)။
နအာသေဝနပစ္စယော
၃၁. အာစယဂါမိံ ဓမ္မံ ပစ္စယာ အာစယဂါမီ ဓမ္မော ဥပ္ပဇ္ဇတိ နအာသေဝနပစ္စယာ။ တီဏိ။
အပစယဂါမိံ ဓမ္မံ ပစ္စယာ နေဝါစယဂါမိနာပစယဂါမီ ဓမ္မော ဥပ္ပဇ္ဇတိ နအာသေဝနပစ္စယာ – အပစယဂါမီ ခန္ဓေ ပစ္စယာ စိတ္တသမုဋ္ဌာနံ ရူပံ။ (၁)
နေဝါစယဂါမိနာပစယဂါမိံ ဓမ္မံ ပစ္စယာ နေဝါစယဂါမိနာပစယဂါမီ ဓမ္မော ဥပ္ပဇ္ဇတိ နအာသေဝနပစ္စယာ – အသညသတ္တာနံ။ပေ.။ စက္ခါယတနံ ပစ္စယာ စက္ခုဝိညာဏံ။ပေ.။ ကာယာယတနံ ပစ္စယာ ကာယဝိညာဏံ။ ဝတ္ထုံ ပစ္စယာ နေဝါစယဂါမိနာပစယဂါမီ ခန္ဓာ။ (၁)
နေဝါစယဂါမိနာပစယဂါမိံ ဓမ္မံ ပစ္စယာ အာစယဂါမီ ဓမ္မော ဥပ္ပဇ္ဇတိ နအာသေဝနပစ္စယာ – ဝတ္ထုံ ပစ္စယာ အာစယဂါမီ ခန္ဓာ။ (၂)
နေဝါစယဂါမိနာပစယဂါမိံ ဓမ္မံ ပစ္စယာ အာစယဂါမီ စ နေဝါစယဂါမိနာပစယဂါမီ စ ဓမ္မာ ဥပ္ပဇ္ဇန္တိ နအာသေဝနပစ္စယာ – ဝတ္ထုံ ပစ္စယာ အာစယဂါမီ ခန္ဓာ၊ မဟာဘူတေ ပစ္စယာ စိတ္တသမုဋ္ဌာနံ ရူပံ။ (၃)
အာစယဂါမိဉ္စ နေဝါစယဂါမိနာပစယဂါမိဉ္စ ဓမ္မံ ပစ္စယာ အာစယဂါမီ ဓမ္မော ဥပ္ပဇ္ဇတိ နအာသေဝနပစ္စယာ – အာစယဂါမိံ ဧကံ ခန္ဓဉ္စ ဝတ္ထုဉ္စ ပစ္စယာ တယော ခန္ဓာ။ပေ.။ ဒွေ ခန္ဓေ။ပေ.။။ (၁)
အာစယဂါမိဉ္စ နေဝါစယဂါမိနာပစယဂါမိဉ္စ ဓမ္မံ ပစ္စယာ နေဝါစယဂါမိနာပစယဂါမီ ဓမ္မော ဥပ္ပဇ္ဇတိ နအာသေဝနပစ္စယာ – အာစယဂါမီ ခန္ဓေ စ မဟာဘူတေ စ ပစ္စယာ စိတ္တသမုဋ္ဌာနံ ရူပံ။ (၂)
အာစယဂါမိဉ္စ နေဝါစယဂါမိနာပစယဂါမိဉ္စ ဓမ္မံ ပစ္စယာ အာစယဂါမီ စ နေဝါစယဂါမိနာပစယဂါမီ စ ဓမ္မာ ဥပ္ပဇ္ဇန္တိ နအာသေဝနပစ္စယာ – အာစယဂါမိံ ဧကံ ခန္ဓဉ္စ ဝတ္ထုဉ္စ ပစ္စယာ တယော ခန္ဓာ။ပေ.။ ဒွေ ခန္ဓေ။ပေ.။ အာစယဂါမီ ခန္ဓေ စ မဟာဘူတေ စ ပစ္စယာ စိတ္တသမုဋ္ဌာနံ ရူပံ။ (၃)
အပစယဂါမိဉ္စ နေဝါစယဂါမိနာပစယဂါမိဉ္စ ဓမ္မံ ပစ္စယာ နေဝါစယဂါမိနာပစယဂါမီ ဓမ္မော ဥပ္ပဇ္ဇတိ နအာသေဝနပစ္စယာ – အပစယဂါမီ ခန္ဓေ စ မဟာဘူတေ စ ပစ္စယာ စိတ္တသမုဋ္ဌာနံ ရူပံ။ (၁)
နကမ္မပစ္စယော
၃၂. အာစယဂါမိံ ဓမ္မံ ပစ္စယာ အာစယဂါမီ ဓမ္မော ဥပ္ပဇ္ဇတိ နကမ္မပစ္စယာ – အာစယဂါမီ ခန္ဓေ ပစ္စယာ အာစယဂါမီ စေတနာ။ (၁)
အပစယဂါမိံ ဓမ္မံ ပစ္စယာ အပစယဂါမီ ဓမ္မော ဥပ္ပဇ္ဇတိ နကမ္မပစ္စယာ – အပစယဂါမီ ခန္ဓေ ပစ္စယာ အပစယဂါမီ စေတနာ။ (၁)
နေဝါစယဂါမိနာပစယဂါမိံ ဓမ္မံ ပစ္စယာ နေဝါစယဂါမိနာပစယဂါမီ ဓမ္မော ဥပ္ပဇ္ဇတိ နကမ္မပစ္စယာ – နေဝါစယဂါမိနာပစယဂါမီ ခန္ဓေ ပစ္စယာ နေဝါစယဂါမိနာပစယဂါမီ စေတနာ; ဗာဟိရံ။ အာဟာရသမုဋ္ဌာနံ။ ဥတုသမုဋ္ဌာနံ။ပေ.။ ဝတ္ထုံ ပစ္စယာ နေဝါစယဂါမိနာပစယဂါမီ စေတနာ။ (၁)
နေဝါစယဂါမိနာပစယဂါမိံ ဓမ္မံ ပစ္စယာ အာစယဂါမီ ဓမ္မော ဥပ္ပဇ္ဇတိ နကမ္မပစ္စယာ – ဝတ္ထုံ ပစ္စယာ အာစယဂါမီ စေတနာ။ (၂)
နေဝါစယဂါမိနာပစယဂါမိံ ဓမ္မံ ပစ္စယာ အပစယဂါမီ ဓမ္မော ဥပ္ပဇ္ဇတိ နကမ္မပစ္စယာ – ဝတ္ထုံ ပစ္စယာ အပစယဂါမီ စေတနာ။ (၃)
အာစယဂါမိဉ္စ နေဝါစယဂါမိနာပစယဂါမိဉ္စ ဓမ္မံ ပစ္စယာ အာစယဂါမီ ဓမ္မော ဥပ္ပဇ္ဇတိ နကမ္မပစ္စယာ – အာစယဂါမီ ခန္ဓေ စ ဝတ္ထုဉ္စ ပစ္စယာ အာစယဂါမီ စေတနာ။ (၁)
အပစယဂါမိဉ္စ နေဝါစယဂါမိနာပစယဂါမိဉ္စ ဓမ္မံ ပစ္စယာ အပစယဂါမီ ဓမ္မော ဥပ္ပဇ္ဇတိ နကမ္မပစ္စယာ – အပစယဂါမီ ခန္ဓေ စ ဝတ္ထုဉ္စ ပစ္စယာ အပစယဂါမီ စေတနာ။ (၁)
နဝိပါကပစ္စယာဒိ
၃၃. အာစယဂါမိံ ဓမ္မံ ပစ္စယာ အာစယဂါမီ ဓမ္မော ဥပ္ပဇ္ဇတိ နဝိပါကပစ္စယာ (ပရိပုဏ္ဏံ ကာတဗ္ဗံ၊ ပဋိသန္ဓိက္ခဏေ နတ္ထိ)။
နေဝါစယဂါမိနာပစယဂါမိံ ဓမ္မံ ပစ္စယာ နေဝါစယဂါမိနာပစယဂါမီ ဓမ္မော ဥပ္ပဇ္ဇတိ နအာဟာရပစ္စယာ – ဗာဟိရံ။ ဥတုသမုဋ္ဌာနံ။ အသညသတ္တာနံ။ပေ.။ နဣန္ဒြိယပစ္စယာ – ဗာဟိရံ။ အာဟာရသမုဋ္ဌာနံ။ ဥတုသမုဋ္ဌာနံ။ အသညသတ္တာနံ။ပေ.။ မဟာဘူတေ ပစ္စယာ ရူပဇီဝိတိန္ဒြိယံ။ နဈာနပစ္စယာ – ပဉ္စဝိညာဏံ။ပေ.။ ဗာဟိရံ။ အာဟာရသမုဋ္ဌာနံ။ ဥတုသမုဋ္ဌာနံ။ အသညသတ္တာနံ။ပေ.။ စက္ခါယတနံ ပစ္စယာ စက္ခုဝိညာဏံ။ပေ.။ ကာယာယတနံ ပစ္စယာ ကာယဝိညာဏံ။ပေ.။ နမဂ္ဂပစ္စယာ – အဟေတုကာ နေဝါစယဂါမိနာပစယဂါမီ။ပေ.။ အသညသတ္တာနံ ဧကံ မဟာဘူတံ။ပေ.။ စက္ခါယတနံ ပစ္စယာ စက္ခုဝိညာဏံ။ပေ.။ ကာယာယတနံ ပစ္စယာ ကာယဝိညာဏံ၊ ဝတ္ထုံ ပစ္စယာ အဟေတုကာ နေဝါစယဂါမိနာပစယဂါမီ။ပေ.။ နသမ္ပယုတ္တပစ္စယာ။ နဝိပ္ပယုတ္တပစ္စယာ (ပဋိစ္စဝါရသဒိသံ၊ တီဏိ)။ နောနတ္ထိပစ္စယာ။ နောဝိဂတပစ္စယာ။
၂. ပစ္စယပစ္စနီယံ
၂. သင်္ချာဝါရော
သုဒ္ဓံ
၃၄. နဟေတုယာ စတ္တာရိ၊ နအာရမ္မဏေ ပဉ္စ၊ နအဓိပတိယာ ဒွါဒသ၊ နအနန္တရေ ပဉ္စ၊ နသမနန္တရေ နအညမညေ နဥပနိဿယေ ပဉ္စ၊ နပုရေဇာတေ သတ္တ၊ နပစ္ဆာဇာတေ သတ္တရသ၊ နအာသေဝနေ ဧကာဒသ၊ နကမ္မေ သတ္တ၊ နဝိပါကေ သတ္တရသ၊ နအာဟာရေ နဣန္ဒြိယေ နဈာနေ နမဂ္ဂေ ဧကံ၊ နသမ္ပယုတ္တေ ပဉ္စ၊ နဝိပ္ပယုတ္တေ တီဏိ၊ နောနတ္ထိယာ နောဝိဂတေ ပဉ္စ (ဧဝံ ဂဏေတဗ္ဗံ)။
ပစ္စနီယံ။
၃. ပစ္စယာနုလောမပစ္စနီယံ
ဟေတုဒုကံ
၃၅. ဟေတုပစ္စယာ နအာရမ္မဏေ ပဉ္စ၊ နအဓိပတိယာ ဒွါဒသ၊ နအနန္တရေ နသမနန္တရေ နအညမညေ နဥပနိဿယေ ပဉ္စ၊ နပုရေဇာတေ သတ္တ၊ နပစ္ဆာဇာတေ သတ္တရသ၊ နအာသေဝနေ ဧကာဒသ၊ နကမ္မေ သတ္တ၊ နဝိပါကေ သတ္တရသ၊ နသမ္ပယုတ္တေ ပဉ္စ၊ နဝိပ္ပယုတ္တေ တီဏိ၊ နောနတ္ထိယာ နောဝိဂတေ ပဉ္စ (ဧဝံ ဂဏေတဗ္ဗံ)။
အနုလောမပစ္စနီယံ။
၄. ပစ္စယပစ္စနီယာနုလောမံ
နဟေတုဒုကံ
၃၆. နဟေတုပစ္စယာ အာရမ္မဏေ စတ္တာရိ၊ အနန္တရေ သမနန္တရေ သဟဇာတေ အညမညေ နိဿယေ ဥပနိဿယေ ပုရေဇာတေ အာသေဝနေ ကမ္မေ စတ္တာရိ၊ ဝိပါကေ ဧကံ၊ အာဟာရေ စတ္တာရိ၊ ဣန္ဒြိယေ ဈာနေ စတ္တာရိ၊ မဂ္ဂေ တီဏိ၊ သမ္ပယုတ္တေ ဝိပ္ပယုတ္တေ အတ္ထိယာ နတ္ထိယာ ဝိဂတေ စတ္တာရိ၊ အဝိဂတေ စတ္တာရိ (ဧဝံ ဂဏေတဗ္ဗံ)။
ပစ္စနီယာနုလောမံ။
ပစ္စယဝါရော။
၄. နိဿယဝါရော
(နိဿယဝါရော ပစ္စယဝါရသဒိသော)။
၅. သံသဋ္ဌဝါရော
၁. ပစ္စယာနုလောမံ
၁. ဝိဘင်္ဂဝါရော
ဟေတုပစ္စယော
၃၇. အာစယဂါမိံ ဓမ္မံ သံသဋ္ဌော အာစယဂါမီ ဓမ္မော ဥပ္ပဇ္ဇတိ ဟေတုပစ္စယာ – အာစယဂါမိံ ဧကံ ခန္ဓံ သံသဋ္ဌာ တယော ခန္ဓာ။ပေ.။ ဒွေ ခန္ဓေ သံသဋ္ဌာ ဒွေ ခန္ဓာ။ (၁)
အပစယဂါမိံ ဓမ္မံ သံသဋ္ဌော အပစယဂါမီ ဓမ္မော ဥပ္ပဇ္ဇတိ ဟေတုပစ္စယာ – အပစယဂါမိံ ဧကံ ခန္ဓံ သံသဋ္ဌာ တယော ခန္ဓာ။ပေ.။ ဒွေ ခန္ဓေ။ပေ.။။ (၁)
နေဝါစယဂါမိနာပစယဂါမိံ ဓမ္မံ သံသဋ္ဌော နေဝါစယဂါမိနာပစယဂါမီ ဓမ္မော ဥပ္ပဇ္ဇတိ ဟေတုပစ္စယာ – နေဝါစယဂါမိနာပစယဂါမိံ ဧကံ ခန္ဓံ သံသဋ္ဌာ တယော ခန္ဓာ။ပေ.။ ဒွေ ခန္ဓေ။ပေ.။ ပဋိသန္ဓိက္ခဏေ။ပေ.။။ (၁)
အာရမ္မဏပစ္စယာဒိ
၃၈. အာစယဂါမိံ ဓမ္မံ သံသဋ္ဌော အာစယဂါမီ ဓမ္မော ဥပ္ပဇ္ဇတိ အာရမ္မဏပစ္စယာ။ အဓိပတိပစ္စယာ။ အနန္တရပစ္စယာ။ သမနန္တရပစ္စယာ။ သဟဇာတပစ္စယာ။ အညမညပစ္စယာ။ နိဿယပစ္စယာ။ ဥပနိဿယပစ္စယာ။ ပုရေဇာတပစ္စယာ။ အာသေဝနပစ္စယာ။ ကမ္မပစ္စယာ။ ဝိပါကပစ္စယာ။ အာဟာရပစ္စယာ။ ဣန္ဒြိယပစ္စယာ။ ဈာနပစ္စယာ။ မဂ္ဂပစ္စယာ။ သမ္ပယုတ္တပစ္စယာ။ ဝိပ္ပယုတ္တပစ္စယာ။ အတ္ထိပစ္စယာ။ နတ္ထိပစ္စယာ။ ဝိဂတပစ္စယာ။ အဝိဂတပစ္စယာ။
၁. ပစ္စယာနုလောမံ
၂. သင်္ချာဝါရော
သုဒ္ဓံ
၃၉. ဟေတုယာ တီဏိ၊ အာရမ္မဏေ အဓိပတိယာ အနန္တရေ သမနန္တရေ သဟဇာတေ အညမညေ နိဿယေ ဥပနိဿယေ ပုရေဇာတေ အာသေဝနေ ကမ္မေ သဗ္ဗတ္ထ တီဏိ၊ ဝိပါကေ ဧကံ၊ အာဟာရေ တီဏိ၊ ဣန္ဒြိယေ ဈာနေ မဂ္ဂေ သမ္ပယုတ္တေ ဝိပ္ပယုတ္တေ အတ္ထိယာ နတ္ထိယာ ဝိဂတေ အဝိဂတေ တီဏိ (ဧဝံ ဂဏေတဗ္ဗံ)။
အနုလောမံ။
၂. ပစ္စယပစ္စနီယံ
၁. ဝိဘင်္ဂဝါရော
နဟေတုပစ္စယော
၄၀. အာစယဂါမိံ ဓမ္မံ သံသဋ္ဌော အာစယဂါမီ ဓမ္မော ဥပ္ပဇ္ဇတိ နဟေတုပစ္စယာ – ဝိစိကိစ္ဆာသဟဂတေ ဥဒ္ဓစ္စသဟဂတေ ခန္ဓေ သံသဋ္ဌော ဝိစိကိစ္ဆာသဟဂတော ဥဒ္ဓစ္စသဟဂတော မောဟော။ (၁)
နေဝါစယဂါမိနာပစယဂါမိံ ဓမ္မံ သံသဋ္ဌော နေဝါစယဂါမိနာပစယဂါမီ ဓမ္မော ဥပ္ပဇ္ဇတိ နဟေတုပစ္စယာ – အဟေတုကံ နေဝါစယဂါမိနာပစယဂါမိံ ဧကံ ခန္ဓံ သံသဋ္ဌာ တယော ခန္ဓာ။ပေ.။ ဒွေ ခန္ဓေ။ပေ.။ အဟေတုကပဋိသန္ဓိက္ခဏေ။ပေ.။။ (၁)
နအဓိပတိပစ္စယာဒိ
၄၁. အာစယဂါမိံ ဓမ္မံ သံသဋ္ဌော အာစယဂါမီ ဓမ္မော ဥပ္ပဇ္ဇတိ နအဓိပတိပစ္စယာ။ နပုရေဇာတပစ္စယာ။ နပစ္ဆာဇာတပစ္စယာ။ နအာသေဝနပစ္စယာ။ အာစယဂါမိံ ဧကံ ခန္ဓံ သံသဋ္ဌာ တယော ခန္ဓာ။ပေ.။ ဒွေ ခန္ဓေ။ပေ.။။
နေဝါစယဂါမိနာပစယဂါမိံ ဓမ္မံ သံသဋ္ဌော နေဝါစယဂါမိနာပစယဂါမီ ဓမ္မော ဥပ္ပဇ္ဇတိ နအာသေဝနပစ္စယာ – နေဝါစယဂါမိနာပစယဂါမိံ ဧကံ ခန္ဓံ သံသဋ္ဌာ။ပေ.။ ပဋိသန္ဓိက္ခဏေ။ပေ.။ နကမ္မပစ္စယာ။ နဝိပါကပစ္စယာ။ နဈာနပစ္စယာ။ နမဂ္ဂပစ္စယာ။ နဝိပ္ပယုတ္တပစ္စယာ။
၂. ပစ္စယပစ္စနီယံ
၂. သင်္ချာဝါရော
သုဒ္ဓံ
၄၂. နဟေတုယာ ဒွေ၊ နအဓိပတိယာ တီဏိ၊ နပုရေဇာတေ တီဏိ၊ နပစ္ဆာဇာတေ တီဏိ၊ နအာသေဝနေ ဒွေ၊ နကမ္မေ တီဏိ၊ နဝိပါကေ တီဏိ၊ နဈာနေ ဧကံ၊ နမဂ္ဂေ ဧကံ၊ နဝိပ္ပယုတ္တေ တီဏိ (ဧဝံ ဂဏေတဗ္ဗံ)။
ပစ္စနီယံ။
၃. ပစ္စယာနုလောမပစ္စနီယံ
၄၃. ဟေတုပစ္စယာ နအဓိပတိယာ တီဏိ၊ နပုရေဇာတေ တီဏိ၊ နပစ္ဆာဇာတေ တီဏိ၊ နအာသေဝနေ ဒွေ၊ နကမ္မေ တီဏိ၊ နဝိပါကေ တီဏိ၊ နဝိပ္ပယုတ္တေ တီဏိ (ဧဝံ ဂဏေတဗ္ဗံ)။
အနုလောမပစ္စနီယံ။
၄. ပစ္စယပစ္စနီယာနုလောမံ
၄၄. နဟေတုပစ္စယာ အာရမ္မဏေ ဒွေ၊ အနန္တရေ သမနန္တရေ သဟဇာတေ အညမညေ နိဿယေ ဥပနိဿယေ ပုရေဇာတေ အာသေဝနေ ကမ္မေ သဗ္ဗတ္ထ ဒွေ၊ ဝိပါကေ ဧကံ၊ အာဟာရေ ဒွေ၊ ဣန္ဒြိယေ ဒွေ၊ ဈာနေ ဒွေ၊ မဂ္ဂေ ဧကံ၊ သမ္ပယုတ္တေ ဒွေ၊ ဝိပ္ပယုတ္တေ အတ္ထိယာ နတ္ထိယာ ဝိဂတေ အဝိဂတေ ဒွေ (ဧဝံ ဂဏေတဗ္ဗံ)။
ပစ္စနီယာနုလောမံ။
သံသဋ္ဌဝါရော။
၆. သမ္ပယုတ္တဝါရော
(သမ္ပယုတ္တဝါရော သံသဋ္ဌဝါရသဒိသော။)
၇. ပဉှာဝါရော
၁. ပစ္စယာနုလောမံ
၁. ဝိဘင်္ဂဝါရော
ဟေတုပစ္စယော
၄၅. အာစယဂါမီ [အာစယဂါမိ (သီ. သျာ.) ဧဝမုပရိပိ] ဓမ္မော အာစယဂါမိဿ ဓမ္မဿ ဟေတုပစ္စယေန ပစ္စယော – အာစယဂါမီ ဟေတူ သမ္ပယုတ္တကာနံ ခန္ဓာနံ ဟေတုပစ္စယေန ပစ္စယော။ (၁)
အာစယဂါမီ ဓမ္မော နေဝါစယဂါမိနာပစယဂါမိဿ ဓမ္မဿ ဟေတုပစ္စယေန ပစ္စယော – အာစယဂါမီ ဟေတူ စိတ္တသမုဋ္ဌာနာနံ ရူပါနံ ဟေတုပစ္စယေန ပစ္စယော။ (၂)
အာစယဂါမီ ဓမ္မော အာစယဂါမိဿ စ နေဝါစယဂါမိနာပစယဂါမိဿ စ ဓမ္မဿ ဟေတုပစ္စယေန ပစ္စယော – အာစယဂါမီ ဟေတူ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ ဟေတုပစ္စယေန ပစ္စယော။ (၃)
အပစယဂါမီ ဓမ္မော အပစယဂါမိဿ ဓမ္မဿ ဟေတုပစ္စယေန ပစ္စယော။ တီဏိ။
နေဝါစယဂါမိနာပစယဂါမီ ဓမ္မော နေဝါစယဂါမိနာပစယဂါမိဿ ဓမ္မဿ ဟေတုပစ္စယေန ပစ္စယော – နေဝါစယဂါမိနာပစယဂါမီ ဟေတူ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ ဟေတုပစ္စယေန ပစ္စယော။ ပဋိသန္ဓိက္ခဏေ နေဝါစယဂါမိနာပစယဂါမီ ဟေတူ သမ္ပယုတ္တကာနံ ခန္ဓာနံ ကဋတ္တာ စ ရူပါနံ ဟေတုပစ္စယေန ပစ္စယော။ (၁)
အာရမ္မဏပစ္စယော
၄၆. အာစယဂါမီ ဓမ္မော အာစယဂါမိဿ ဓမ္မဿ အာရမ္မဏပစ္စယေန ပစ္စယော – ဒါနံ ဒတွာ သီလံ သမာဒိယိတွာ ဥပေါသထကမ္မံ ကတွာ တံ ပစ္စဝေက္ခတိ၊ ပုဗ္ဗေ သုစိဏ္ဏာနိ ပစ္စဝေက္ခတိ၊ ဈာနာ ဝုဋ္ဌဟိတွာ ဈာနံ ပစ္စဝေက္ခတိ။ သေက္ခါ ပဟီနေ ကိလေသေ ပစ္စဝေက္ခန္တိ၊ ဝိက္ခမ္ဘိတေ ကိလေသေ ပစ္စဝေက္ခန္တိ၊ ပုဗ္ဗေ သမုဒါစိဏ္ဏေ ကိလေသေ ဇာနန္တိ။ သေက္ခါ ဝါ ပုထုဇ္ဇနာ ဝါ အာစယဂါမီ ခန္ဓေ အနိစ္စတော ဒုက္ခတော အနတ္တတော ဝိပဿန္တိ၊ အဿာဒေန္တိ အဘိနန္ဒန္တိ၊ တံ အာရဗ္ဘ ရာဂေါ ဥပ္ပဇ္ဇတိ၊ ဒိဋ္ဌိ။ပေ.။ ဝိစိကိစ္ဆာ။ပေ.။ ဥဒ္ဓစ္စံ။ပေ.။ ဒေါမနဿံ ဥပ္ပဇ္ဇတိ၊ စေတောပရိယဉာဏေန အာစယဂါမိစိတ္တသမင်္ဂိဿ စိတ္တံ ဇာနန္တိ၊ အာကာသာနဉ္စာယတနကုသလံ ဝိညာဏဉ္စာယတနကုသလဿ အာရမ္မဏပစ္စယေန ပစ္စယော။ အာကိဉ္စညာယတနကုသလံ နေဝသညာနာသညာယတနကုသလဿ။ပေ.။ အာစယဂါမီ ခန္ဓာ ဣဒ္ဓိဝိဓဉာဏဿ၊ စေတောပရိယဉာဏဿ၊ ပုဗ္ဗေနိဝါသာနုဿတိဉာဏဿ၊ ယထာကမ္မူပဂဉာဏဿ၊ အနာဂတံသဉာဏဿ အာရမ္မဏပစ္စယေန ပစ္စယော။ (၁)
အာစယဂါမီ ဓမ္မော နေဝါစယဂါမိနာပစယဂါမိဿ ဓမ္မဿ အာရမ္မဏပစ္စယေန ပစ္စယော – အရဟာ ပဟီနေ ကိလေသေ ပစ္စဝေက္ခတိ၊ ပုဗ္ဗေ သမုဒါစိဏ္ဏေ ကိလေသေ ဇာနာတိ၊ အာစယဂါမီ ခန္ဓေ အနိစ္စတော ဒုက္ခတော အနတ္တတော ဝိပဿတိ; စေတောပရိယဉာဏေန အာစယဂါမိစိတ္တသမင်္ဂိဿ စိတ္တံ ဇာနာတိ ။ သေက္ခါ ဝါ ပုထုဇ္ဇနာ ဝါ အာစယဂါမီ ခန္ဓေ အနိစ္စတော ဒုက္ခတော အနတ္တတော ဝိပဿန္တိ၊ ကုသလေ နိရုဒ္ဓေ ဝိပါကော တဒါရမ္မဏတာ ဥပ္ပဇ္ဇတိ၊ အာစယဂါမီ ခန္ဓေ အဿာဒေတိ အဘိနန္ဒတိ၊ တံ အာရဗ္ဘ ရာဂေါ ဥပ္ပဇ္ဇတိ။ပေ.။ ဒေါမနဿံ ဥပ္ပဇ္ဇတိ၊ အကုသလေ နိရုဒ္ဓေ ဝိပါကော တဒါရမ္မဏတာ ဥပ္ပဇ္ဇတိ၊ အာကာသာနဉ္စာယတနကုသလံ ဝိညာဏဉ္စာယတနဝိပါကဿ စ ကိရိယဿ စ အာရမ္မဏပစ္စယေန ပစ္စယော။ အာကိဉ္စညာယတနကုသလံ နေဝသညာနာသညာယတနဝိပါကဿ စ ကိရိယဿ စ အာရမ္မဏပစ္စယေန ပစ္စယော။ အာစယဂါမီ ခန္ဓာ စေတောပရိယဉာဏဿ၊ ပုဗ္ဗေနိဝါသာနုဿတိဉာဏဿ၊ ယထာကမ္မူပဂဉာဏဿ၊ အနာဂတံသဉာဏဿ၊ အာဝဇ္ဇနာယ အာရမ္မဏပစ္စယေန ပစ္စယော။ (၂)
၄၇. အပစယဂါမီ ဓမ္မော အာစယဂါမိဿ ဓမ္မဿ အာရမ္မဏပစ္စယေန ပစ္စယော – သေက္ခါ မဂ္ဂါ ဝုဋ္ဌဟိတွာ မဂ္ဂံ ပစ္စဝေက္ခန္တိ၊ စေတောပရိယဉာဏေန အပစယဂါမိစိတ္တသမင်္ဂိဿ စိတ္တံ ဇာနန္တိ၊ အပစယဂါမီ ခန္ဓာ စေတောပရိယဉာဏဿ၊ ပုဗ္ဗေနိဝါသာနုဿတိဉာဏဿ၊ အနာဂတံသဉာဏဿ၊ အာရမ္မဏပစ္စယေန ပစ္စယော။ (၁)
အပစယဂါမီ ဓမ္မော နေဝါစယဂါမိနာပစယဂါမိဿ ဓမ္မဿ အာရမ္မဏပစ္စယေန ပစ္စယော – အရဟာ မဂ္ဂါ ဝုဋ္ဌဟိတွာ မဂ္ဂံ ပစ္စဝေက္ခတိ ၊ စေတောပရိယဉာဏေန အပစယဂါမိစိတ္တသမင်္ဂိဿ စိတ္တံ ဇာနာတိ၊ အပစယဂါမီ ခန္ဓာ စေတောပရိယဉာဏဿ၊ ပုဗ္ဗေနိဝါသာနုဿတိဉာဏဿ၊ အနာဂတံသဉာဏဿ၊ အာဝဇ္ဇနာယ အာရမ္မဏပစ္စယေန ပစ္စယော။ (၂)
၄၈. နေဝါစယဂါမိနာပစယဂါမီ ဓမ္မော နေဝါစယဂါမိနာပစယဂါမိဿ ဓမ္မဿ အာရမ္မဏပစ္စယေန ပစ္စယော – အရဟာ ဖလံ ပစ္စဝေက္ခတိ၊ နိဗ္ဗာနံ ပစ္စဝေက္ခတိ၊ နိဗ္ဗာနံ ဖလဿ အာဝဇ္ဇနာယ အာရမ္မဏပစ္စယေန ပစ္စယော။ အရဟာ စက္ခုံ အနိစ္စတော ဒုက္ခတော အနတ္တတော ဝိပဿတိ၊ သောတံ။ပေ.။ ဝတ္ထုံ။ နေဝါစယဂါမိနာပစယဂါမီ ခန္ဓေ အနိစ္စတော ဒုက္ခတော အနတ္တတော ဝိပဿတိ၊ ဒိဗ္ဗေန စက္ခုနာ ရူပံ ပဿတိ၊ ဒိဗ္ဗာယ သောတဓါတုယာ သဒ္ဒံ သုဏာတိ၊ စေတောပရိယဉာဏေန နေဝါစယဂါမိနာပစယဂါမိစိတ္တသမင်္ဂိဿ စိတ္တံ ဇာနာတိ၊ အာကာသာနဉ္စာယတနကိရိယံ ဝိညာဏဉ္စာယတနကိရိယဿ အာရမ္မဏပစ္စယေန ပစ္စယော။ အာကိဉ္စညာယတနကိရိယံ နေဝသညာနာသညာယတနကိရိယဿ။ပေ.။ ရူပါယတနံ စက္ခုဝိညာဏဿ။ပေ.။ ဖောဋ္ဌဗ္ဗာယတနံ ကာယဝိညာဏဿ။ပေ.။ နေဝါစယဂါမိနာပစယဂါမီ ခန္ဓာ ဣဒ္ဓိဝိဓဉာဏဿ၊ စေတောပရိယဉာဏဿ၊ ပုဗ္ဗေနိဝါသာနုဿတိဉာဏဿ၊ အနာဂတံသဉာဏဿ အာဝဇ္ဇနာယ အာရမ္မဏပစ္စယေန ပစ္စယော။ (၁)
နေဝါစယဂါမိနာပစယဂါမီ ဓမ္မော အာစယဂါမိဿ ဓမ္မဿ အာရမ္မဏပစ္စယေန ပစ္စယော – သေက္ခါ ဖလံ ပစ္စဝေက္ခန္တိ၊ နိဗ္ဗာနံ ပစ္စဝေက္ခန္တိ၊ နိဗ္ဗာနံ ဂေါတြဘုဿ၊ ဝေါဒါနဿ အာရမ္မဏပစ္စယေန ပစ္စယော ။ သေက္ခါ ဝါ ပုထုဇ္ဇနာ ဝါ စက္ခုံ အနိစ္စတော ဒုက္ခတော အနတ္တတော ဝိပဿန္တိ၊ အဿာဒေန္တိ အဘိနန္ဒန္တိ; တံ အာရဗ္ဘ ရာဂေါ ဥပ္ပဇ္ဇတိ။ပေ.။ ဒေါမနဿံ ဥပ္ပဇ္ဇတိ။ သောတံ။ပေ.။ ဝတ္ထုံ။ နေဝါစယဂါမိနာပစယဂါမီ ခန္ဓေ အနိစ္စတော ဒုက္ခတော အနတ္တတော ဝိပဿန္တိ၊ အဿာဒေန္တိ အဘိနန္ဒန္တိ; တံ အာရဗ္ဘ ရာဂေါ ဥပ္ပဇ္ဇတိ၊ ဒိဋ္ဌိ ဥပ္ပဇ္ဇတိ၊ ဝိစိကိစ္ဆာ။ပေ.။ ဥဒ္ဓစ္စံ။ပေ.။ ဒေါမနဿံ။ပေ.။ ဒိဗ္ဗေန စက္ခုနာ ရူပံ ပဿန္တိ၊ ဒိဗ္ဗာယ သောတဓါတုယာ သဒ္ဒံ သုဏန္တိ၊ စေတောပရိယဉာဏေန နေဝါစယဂါမိနာပစယဂါမိစိတ္တသမင်္ဂိဿ စိတ္တံ ဇာနန္တိ၊ နေဝါစယဂါမိနာပစယဂါမီ ခန္ဓာ ဣဒ္ဓိဝိဓဉာဏဿ၊ စေတောပရိယဉာဏဿ၊ ပုဗ္ဗေနိဝါသာနုဿတိဉာဏဿ၊ အနာဂတံသဉာဏဿ အာရမ္မဏပစ္စယေန ပစ္စယော။ (၂)
နေဝါစယဂါမိနာပစယဂါမီ ဓမ္မော အပစယဂါမိဿ ဓမ္မဿ အာရမ္မဏပစ္စယေန ပစ္စယော – နိဗ္ဗာနံ မဂ္ဂဿ အာရမ္မဏပစ္စယေန ပစ္စယော။ (၃)
အဓိပတိပစ္စယော
၄၉. အာစယဂါမီ ဓမ္မော အာစယဂါမိဿ ဓမ္မဿ အဓိပတိပစ္စယေန ပစ္စယော – အာရမ္မဏာဓိပတိ၊ သဟဇာတာဓိပတိ။ အာရမ္မဏာဓိပတိ – ဒါနံ ဒတွာ သီလံ သမာဒိယိတွာ ဥပေါသထကမ္မံ ကတွာ တံ ဂရုံ ကတွာ ပစ္စဝေက္ခတိ၊ ပုဗ္ဗေ သုစိဏ္ဏာနိ ဂရုံ ကတွာ ပစ္စဝေက္ခတိ၊ ဈာနာ ဝုဋ္ဌဟိတွာ ဈာနံ ဂရုံ ကတွာ ပစ္စဝေက္ခတိ၊ အာစယဂါမီ ခန္ဓေ ဂရုံ ကတွာ အဿာဒေတိ အဘိနန္ဒတိ; တံ ဂရုံ ကတွာ ရာဂေါ ဥပ္ပဇ္ဇတိ၊ ဒိဋ္ဌိ ဥပ္ပဇ္ဇတိ။ သဟဇာတာဓိပတိ – အာစယဂါမီ အဓိပတိ သမ္ပယုတ္တကာနံ ခန္ဓာနံ အဓိပတိပစ္စယေန ပစ္စယော။ (၁)
အာစယဂါမီ ဓမ္မော နေဝါစယဂါမိနာပစယဂါမိဿ ဓမ္မဿ အဓိပတိပစ္စယေန ပစ္စယော။ သဟဇာတာဓိပတိ – အာစယဂါမီ အဓိပတိ စိတ္တသမုဋ္ဌာနာနံ ရူပါနံ အဓိပတိပစ္စယေန ပစ္စယော။ (၂)
အာစယဂါမီ ဓမ္မော အာစယဂါမိဿ စ နေဝါစယဂါမိနာပစယဂါမိဿ စ ဓမ္မဿ အဓိပတိပစ္စယေန ပစ္စယော။ သဟဇာတာဓိပတိ – အာစယဂါမီ အဓိပတိ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ အဓိပတိပစ္စယေန ပစ္စယော။ (၃)
၅၀. အပစယဂါမီ ဓမ္မော အပစယဂါမိဿ ဓမ္မဿ အဓိပတိပစ္စယေန ပစ္စယော။ သဟဇာတာဓိပတိ – အပစယဂါမီ အဓိပတိ သမ္ပယုတ္တကာနံ ခန္ဓာနံ အဓိပတိပစ္စယေန ပစ္စယော။ (၁)
အပစယဂါမီ ဓမ္မော အာစယဂါမိဿ ဓမ္မဿ အဓိပတိပစ္စယေန ပစ္စယော။ အာရမ္မဏာဓိပတိ – သေက္ခါ မဂ္ဂါ ဝုဋ္ဌဟိတွာ မဂ္ဂံ ဂရုံ ကတွာ ပစ္စဝေက္ခန္တိ။ (၂)
အပစယဂါမီ ဓမ္မော နေဝါစယဂါမိနာပစယဂါမိဿ ဓမ္မဿ အဓိပတိပစ္စယေန ပစ္စယော – အာရမ္မဏာဓိပတိ၊ သဟဇာတာဓိပတိ။ အာရမ္မဏာဓိပတိ – အရဟာ မဂ္ဂါ ဝုဋ္ဌဟိတွာ မဂ္ဂံ ဂရုံ ကတွာ ပစ္စဝေက္ခတိ။ သဟဇာတာဓိပတိ – အပစယဂါမီ အဓိပတိ စိတ္တသမုဋ္ဌာနာနံ ရူပါနံ အဓိပတိပစ္စယေန ပစ္စယော။ (၃)
အပစယဂါမီ ဓမ္မော အပစယဂါမိဿ စ နေဝါစယဂါမိနာပစယဂါမိဿ စ ဓမ္မဿ အဓိပတိပစ္စယေန ပစ္စယော။ သဟဇာတာဓိပတိ – အပစယဂါမီ အဓိပတိ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ အဓိပတိပစ္စယေန ပစ္စယော။ (၄)
၅၁. နေဝါစယဂါမိနာပစယဂါမီ ဓမ္မော နေဝါစယဂါမိနာပစယဂါမိဿ ဓမ္မဿ အဓိပတိပစ္စယေန ပစ္စယော – အာရမ္မဏာဓိပတိ၊ သဟဇာတာဓိပတိ။ အာရမ္မဏာဓိပတိ – အရဟာ ဖလံ ဂရုံ ကတွာ ပစ္စဝေက္ခတိ၊ နိဗ္ဗာနံ ဂရုံ ကတွာ ပစ္စဝေက္ခတိ၊ နိဗ္ဗာနံ ဖလဿ အဓိပတိပစ္စယေန ပစ္စယော။ သဟဇာတာဓိပတိ – နေဝါစယဂါမိနာပစယဂါမီ အဓိပတိ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ အဓိပတိပစ္စယေန ပစ္စယော။ (၁)
နေဝါစယဂါမိနာပစယဂါမီ ဓမ္မော အာစယဂါမိဿ ဓမ္မဿ အဓိပတိပစ္စယေန ပစ္စယော။ အာရမ္မဏာဓိပတိ – သေက္ခါ ဖလံ ဂရုံ ကတွာ ပစ္စဝေက္ခန္တိ၊ နိဗ္ဗာနံ ဂရုံ ကတွာ ပစ္စဝေက္ခန္တိ၊ နိဗ္ဗာနံ ဂေါတြဘုဿ၊ ဝေါဒါနဿ အဓိပတိပစ္စယေန ပစ္စယော။ စက္ခုံ ဂရုံ ကတွာ အဿာဒေတိ။ပေ.။ ဝတ္ထုံ။ နေဝါစယဂါမိနာပစယဂါမီ ခန္ဓေ ဂရုံ ကတွာ အဿာဒေတိ အဘိနန္ဒတိ; တံ ဂရုံ ကတွာ ရာဂေါ ဥပ္ပဇ္ဇတိ၊ ဒိဋ္ဌိ ဥပ္ပဇ္ဇတိ။ (၂)
နေဝါစယဂါမိနာပစယဂါမီ ဓမ္မော အပစယဂါမိဿ ဓမ္မဿ အဓိပတိပစ္စယေန ပစ္စယော။ အာရမ္မဏာဓိပတိ – နိဗ္ဗာနံ မဂ္ဂဿ အဓိပတိပစ္စယေန ပစ္စယော။ (၃)
အနန္တရပစ္စယော
၅၂. အာစယဂါမီ ဓမ္မော အာစယဂါမိဿ ဓမ္မဿ အနန္တရပစ္စယေန ပစ္စယော – ပုရိမာ ပုရိမာ အာစယဂါမီ ခန္ဓာ ပစ္ဆိမာနံ ပစ္ဆိမာနံ အာစယဂါမီနံ ခန္ဓာနံ အနန္တရပစ္စယေန ပစ္စယော။ အနုလောမံ ဂေါတြဘုဿ။ အနုလောမံ ဝေါဒါနဿ အနန္တရပစ္စယေန ပစ္စယော။ (၁)
အာစယဂါမီ ဓမ္မော အပစယဂါမိဿ ဓမ္မဿ အနန္တရပစ္စယေန ပစ္စယော – ဂေါတြဘု မဂ္ဂဿ။ ဝေါဒါနံ မဂ္ဂဿ အနန္တရပစ္စယေန ပစ္စယော။ (၂)
အာစယဂါမီ ဓမ္မော နေဝါစယဂါမိနာပစယဂါမိဿ ဓမ္မဿ အနန္တရပစ္စယေန ပစ္စယော – အာစယဂါမီ ခန္ဓာ ဝုဋ္ဌာနဿ အနန္တရပစ္စယေန ပစ္စယော။ သေက္ခါနံ အနုလောမံ ဖလသမာပတ္တိယာ၊ နိရောဓါ ဝုဋ္ဌဟန္တဿ နေဝသညာနာသညာယတနကုသလံ ဖလသမာပတ္တိယာ အနန္တရပစ္စယေန ပစ္စယော။ (၃)
အပစယဂါမီ ဓမ္မော နေဝါစယဂါမိနာပစယဂါမိဿ ဓမ္မဿ အနန္တရပစ္စယေန ပစ္စယော – မဂ္ဂေါ ဖလဿ အနန္တရပစ္စယေန ပစ္စယော။ (၁)
နေဝါစယဂါမိနာပစယဂါမီ ဓမ္မော နေဝါစယဂါမိနာပစယဂါမိဿ ဓမ္မဿ အနန္တရပစ္စယေန ပစ္စယော – ပုရိမာ ပုရိမာ နေဝါစယဂါမိနာပစယဂါမီ ခန္ဓာ ပစ္ဆိမာနံ ပစ္ဆိမာနံ နေဝါစယဂါမိနာပစယဂါမီနံ ခန္ဓာနံ အနန္တရပစ္စယေန ပစ္စယော။ ဘဝင်္ဂံ အာဝဇ္ဇနာယ။ ကိရိယံ ဝုဋ္ဌာနဿ။ အရဟတော အနုလောမံ ဖလသမာပတ္တိယာ။ နိရောဓါ ဝုဋ္ဌဟန္တဿ နေဝသညာနာသညာယတနကိရိယံ ဖလသမာပတ္တိယာ အနန္တရပစ္စယေန ပစ္စယော။ (၁)
နေဝါစယဂါမိနာပစယဂါမီ ဓမ္မော အာစယဂါမိဿ ဓမ္မဿ အနန္တရပစ္စယေန ပစ္စယော – အာဝဇ္ဇနာ အာစယဂါမီနံ ခန္ဓာနံ အနန္တရပစ္စယေန ပစ္စယော။ (၂)
သမနန္တရပစ္စယာဒိ
၅၃. အာစယဂါမီ ဓမ္မော အာစယဂါမိဿ ဓမ္မဿ သမနန္တရပစ္စယေန ပစ္စယော။ပေ.။ (အနန္တရသဒိသံ)။ (သဟဇာတပစ္စယေ ပဋိစ္စဝါရေ သဟဇာတဝါရသဒိသာ နဝ ပဉှာ။ အညမညပစ္စယေ ပဋိစ္စဝါရေ အညမညသဒိသံ တီဏိ။ နိဿယပစ္စယေ ပစ္စယဝါရေ နိဿယဝါရသဒိသံ။ စတ္တာရိပိ ဟိ ဝိသုံ ဃဋနာ နတ္ထိ။ တေရသ ပဉှာ။)
ဥပနိဿယပစ္စယော
၅၄. အာစယဂါမီ ဓမ္မော အာစယဂါမိဿ ဓမ္မဿ ဥပနိဿယပစ္စယေန ပစ္စယော – အာရမ္မဏူပနိဿယော၊ အနန္တရူပနိဿယော၊ ပကတူပနိဿယော။ပေ.။။ ပကတူပနိဿယော – အာစယဂါမိံ သဒ္ဓံ ဥပနိဿာယ ဒါနံ ဒေတိ၊ သီလံ။ပေ.။ ဥပေါသထကမ္မံ။ပေ.။ ဈာနံ။ပေ.။ ဝိပဿနံ။ပေ.။ အဘိညံ။ပေ.။ သမာပတ္တိံ ဥပ္ပါဒေတိ၊ မာနံ ဇပ္ပေတိ၊ ဒိဋ္ဌိံ ဂဏှာတိ၊ အာစယဂါမိံ သီလံ။ သုတံ။ စာဂံ။ ပညံ။ ရာဂံ။ ဒေါသံ။ မောဟံ။ မာနံ။ ဒိဋ္ဌိံ။ ပတ္ထနံ ဥပနိဿာယ ဒါနံ ဒေတိ။ သီလံ။ပေ.။ ဥပေါသထကမ္မံ။ပေ.။ ဈာနံ။ပေ.။ ဝိပဿနံ။ပေ.။ အဘိညံ။ပေ.။ သမာပတ္တိံ။ပေ.။ ပါဏံ ဟနတိ။ပေ.။ သံဃံ ဘိန္ဒတိ။ အာစယဂါမီ သဒ္ဓါ။ပေ.။ ပညာ၊ ရာဂေါ။ပေ.။ ပတ္ထနာ အာစယဂါမိယာ သဒ္ဓါယ။ပေ.။ ပညာယ၊ ရာဂဿ။ပေ.။ ပတ္ထနာယ ဥပနိဿယပစ္စယေန ပစ္စယော။ ပဌမဿ ဈာနဿ ပရိကမ္မံ ပဌမဿ ဈာနဿ ဥပနိဿယပစ္စယေန ပစ္စယော။ပေ.။။ နေဝသညာနာသညာယတနဿ ပရိကမ္မံ နေဝသညာနာသညာယတနဿ ဥပနိဿယပစ္စယေန ပစ္စယော။ ပဌမံ ဈာနံ ဒုတိယဿ ဈာနဿ။ပေ.။ အာကိဉ္စညာယတနံ နေဝသညာနာသညာယတနဿ ဥပနိဿယပစ္စယေန ပစ္စယော။ (၁)
အာစယဂါမီ ဓမ္မော အပစယဂါမိဿ ဓမ္မဿ ဥပနိဿယပစ္စယေန ပစ္စယော – အနန္တရူပနိဿယော၊ ပကတူပနိဿယော။ပေ.။။ ပကတူပနိဿယော – ပဌမဿ မဂ္ဂဿ ပရိကမ္မံ ပဌမဿ မဂ္ဂဿ။ပေ.။ စတုတ္ထဿ မဂ္ဂဿ ပရိကမ္မံ စတုတ္ထဿ မဂ္ဂဿ ဥပနိဿယပစ္စယေန ပစ္စယော။ (၂)
အာစယဂါမီ ဓမ္မော နေဝါစယဂါမိနာပစယဂါမိဿ ဓမ္မဿ ဥပနိဿယပစ္စယေန ပစ္စယော – အနန္တရူပနိဿယော၊ ပကတူပနိဿယော။ပေ.။။ ပကတူပနိဿယော – အာစယဂါမိံ သဒ္ဓံ ဥပနိဿာယ အတ္တာနံ အာတာပေတိ ပရိတာပေတိ ပရိယိဋ္ဌိမူလကံ ဒုက္ခံ ပစ္စနုဘောတိ။ အာစယဂါမိံ သီလံ။ပေ.။ ပညံ။ ရာဂံ။ပေ.။ ပတ္ထနံ ဥပနိဿာယ အတ္တာနံ အာတာပေတိ ပရိတာပေတိ ပရိယိဋ္ဌိမူလကံ ဒုက္ခံ ပစ္စနုဘောတိ။ အာစယဂါမီ သဒ္ဓါ။ပေ.။ ပညာ။ ရာဂေါ။ပေ.။ ပတ္ထနာ၊ ကာယိကဿ သုခဿ၊ ကာယိကဿ ဒုက္ခဿ ဖလသမာပတ္တိယာ ဥပနိဿယပစ္စယေန ပစ္စယော။ ကုသလာကုသလံ ကမ္မံ ဝိပါကဿ ဥပနိဿယပစ္စယေန ပစ္စယော။ (၃)
၅၅. အပစယဂါမီ ဓမ္မော အပစယဂါမိဿ ဓမ္မဿ ဥပနိဿယပစ္စယေန ပစ္စယော။ ပကတူပနိဿယော – ပဌမော မဂ္ဂေါ ဒုတိယဿ မဂ္ဂဿ။ပေ.။ တတိယော မဂ္ဂေါ စတုတ္ထဿ မဂ္ဂဿ ဥပနိဿယပစ္စယေန ပစ္စယော။ (၁)
အပစယဂါမီ ဓမ္မော အာစယဂါမိဿ ဓမ္မဿ ဥပနိဿယပစ္စယေန ပစ္စယော – အာရမ္မဏူပနိဿယော၊ ပကတူပနိဿယော။ပေ.။။ ပကတူပနိဿယော – သေက္ခါ မဂ္ဂံ ဥပနိဿာယ အနုပ္ပန္နံ ကုသလသမာပတ္တိံ ဥပ္ပါဒေန္တိ၊ ဥပ္ပန္နံ သမာပဇ္ဇန္တိ ၊ သင်္ခါရေ အနိစ္စတော ဒုက္ခတော အနတ္တတော ဝိပဿန္တိ၊ မဂ္ဂေါ သေက္ခါနံ အတ္ထပ္ပဋိသမ္ဘိဒါယ။ပေ.။ ပဋိဘာနပဋိသမ္ဘိဒါယ ဌာနာဌာနကောသလ္လဿ ဥပနိဿယပစ္စယေန ပစ္စယော။ (၂)
အပစယဂါမီ ဓမ္မော နေဝါစယဂါမိနာပစယဂါမိဿ ဓမ္မဿ ဥပနိဿယပစ္စယေန ပစ္စယော – အာရမ္မဏူပနိဿယော၊ အနန္တရူပနိဿယော၊ ပကတူပနိဿယော။ပေ.။။ ပကတူပနိဿယော – အရဟာ မဂ္ဂံ ဥပနိဿာယ အနုပ္ပန္နံ ကိရိယသမာပတ္တိံ ဥပ္ပါဒေတိ၊ ဥပ္ပန္နံ သမာပဇ္ဇတိ။ပေ.။ ဌာနာဌာနကောသလ္လဿ ဥပနိဿယပစ္စယေန ပစ္စယော။ မဂ္ဂေါ ဖလသမာပတ္တိယာ ဥပနိဿယပစ္စယေန ပစ္စယော။ (၃)
၅၆. နေဝါစယဂါမိနာပစယဂါမီ ဓမ္မော နေဝါစယဂါမိနာပစယဂါမိဿ ဓမ္မဿ ဥပနိဿယပစ္စယေန ပစ္စယော – အာရမ္မဏူပနိဿယော၊ အနန္တရူပနိဿယော၊ ပကတူပနိဿယော။ပေ.။။ ပကတူပနိဿယော – ကာယိကံ သုခံ ဥပနိဿာယ အတ္တာနံ အာတာပေတိ ပရိတာပေတိ ပရိယိဋ္ဌိမူလကံ ဒုက္ခံ ပစ္စနုဘောတိ။ ကာယိကံ ဒုက္ခံ။ ဥတုံ။ ဘောဇနံ။ သေနာသနံ ဥပနိဿာယ အတ္တာနံ အာတာပေတိ ပရိတာပေတိ။ပေ.။ ကာယိကံ သုခံ။ ကာယိကံ ဒုက္ခံ။ ဥတု။ ဘောဇနံ။ သေနာသနံ ကာယိကဿ သုခဿ၊ ကာယိကဿ ဒုက္ခဿ ဖလသမာပတ္တိယာ ဥပနိဿယပစ္စယေန ပစ္စယော။ အရဟာ ကာယိကံ သုခံ ဥပနိဿာယ အနုပ္ပန္နံ ကိရိယသမာပတ္တိံ ဥပ္ပါဒေတိ။ပေ.။ ဝိပဿတိ။ ကာယိကံ ဒုက္ခံ။ ဥတုံ။ ဘောဇနံ။ သေနာသနံ ဥပနိဿာယ။ပေ.။ ဝိပဿတိ။ (၁)
နေဝါစယဂါမီနာပစယဂါမီ ဓမ္မော အာစယဂါမိဿ ဓမ္မဿ ဥပနိဿယပစ္စယေန ပစ္စယော – အာရမ္မဏူပနိဿယော၊ အနန္တရူပနိဿယော၊ ပကတူပနိဿယော။ပေ.။ ။ ပကတူပနိဿယော – ကာယိကံ သုခံ ဥပနိဿာယ ဒါနံ ဒေတိ။ပေ.။ သမာပတ္တိံ ဥပ္ပါဒေတိ၊ ပါဏံ ဟနတိ။ပေ.။ သံဃံ ဘိန္ဒတိ။ ကာယိကံ ဒုက္ခံ။ ဥတုံ။ ဘောဇနံ။ သေနာသနံ ဥပနိဿာယ ဒါနံ ဒေတိ။ပေ.။ သံဃံ ဘိန္ဒတိ၊ ကာယိကံ သုခံ။ပေ.။ သေနာသနံ အာစယဂါမိယာ သဒ္ဓါယ။ပေ.။ ပညာယ၊ ရာဂဿ။ပေ.။ ပတ္ထနာယ ဥပနိဿယပစ္စယေန ပစ္စယော။ (၂)
နေဝါစယဂါမိနာပစယဂါမီ ဓမ္မော အပစယဂါမိဿ ဓမ္မဿ ဥပနိဿယပစ္စယေန ပစ္စယော – အာရမ္မဏူပနိဿယော၊ ပကတူပနိဿယော။ပေ.။။ ပကတူပနိဿယော – ကာယိကံ သုခံ ဥပနိဿာယ မဂ္ဂံ ဥပ္ပါဒေတိ။ ကာယိကံ ဒုက္ခံ ။ပေ.။ သေနာသနံ ဥပနိဿာယ မဂ္ဂံ ဥပ္ပါဒေတိ၊ ကာယိကံ သုခံ၊ ကာယိကံ ဒုက္ခံ။ပေ.။ သေနာသနံ မဂ္ဂဿ ဥပနိဿယပစ္စယေန ပစ္စယော။ (၃)
ပုရေဇာတပစ္စယော
၅၇. နေဝါစယဂါမိနာပစယဂါမီ ဓမ္မော နေဝါစယဂါမိနာပစယဂါမိဿ ဓမ္မဿ ပုရေဇာတပစ္စယေန ပစ္စယော – အာရမ္မဏပုရေဇာတံ၊ ဝတ္ထုပုရေဇာတံ။ အာရမ္မဏပုရေဇာတံ – အရဟာ စက္ခုံ။ပေ.။ ဝတ္ထုံ အနိစ္စတော ဒုက္ခတော အနတ္တတော ဝိပဿတိ၊ ဒိဗ္ဗေန စက္ခုနာ ရူပံ ပဿတိ၊ ဒိဗ္ဗာယ သောတဓါတုယာ သဒ္ဒံ သုဏာတိ၊ ရူပါယတနံ စက္ခုဝိညာဏဿ။ပေ.။ ဖောဋ္ဌဗ္ဗာယတနံ ကာယဝိညာဏဿ ပုရေဇာတပစ္စယေန ပစ္စယော။ ဝတ္ထုပုရေဇာတံ – စက္ခါယတနံ စက္ခုဝိညာဏဿ။ပေ.။ ကာယာယတနံ ကာယဝိညာဏဿ။ပေ.။ ဝတ္ထု နေဝါစယဂါမိနာပစယဂါမီနံ ခန္ဓာနံ ပုရေဇာတပစ္စယေန ပစ္စယော။ (၁)
နေဝါစယဂါမိနာပစယဂါမီ ဓမ္မော အာစယဂါမိဿ ဓမ္မဿ ပုရေဇာတပစ္စယေန ပစ္စယော – အာရမ္မဏပုရေဇာတံ၊ ဝတ္ထုပုရေဇာတံ။ အာရမ္မဏပုရေဇာတံ – သေက္ခါ ဝါ ပုထုဇ္ဇနာ ဝါ စက္ခုံ။ပေ.။ ဝတ္ထုံ အနိစ္စတော ဒုက္ခတော အနတ္တတော ဝိပဿန္တိ၊ အဿာဒေန္တိ အဘိနန္ဒန္တိ; တံ အာရဗ္ဘ ရာဂေါ ဥပ္ပဇ္ဇတိ။ပေ.။ ဒေါမနဿံ ဥပ္ပဇ္ဇတိ၊ ဒိဗ္ဗေန စက္ခုနာ ရူပံ ပဿတိ၊ ဒိဗ္ဗာယ သောတဓါတုယာ သဒ္ဒံ သုဏာတိ။ ဝတ္ထုပုရေဇာတံ – ဝတ္ထု အာစယဂါမီနံ ခန္ဓာနံ ပုရေဇာတပစ္စယေန ပစ္စယော။ (၂)
နေဝါစယဂါမိနာပစယဂါမီ ဓမ္မော အပစယဂါမိဿ ဓမ္မဿ ပုရေဇာတပစ္စယေန ပစ္စယော။ ဝတ္ထုပုရေဇာတံ – ဝတ္ထု အပစယဂါမီနံ ခန္ဓာနံ ပုရေဇာတပစ္စယေန ပစ္စယော။ (၃)
ပစ္ဆာဇာတပစ္စယော
၅၈. အာစယဂါမီ ဓမ္မော နေဝါစယဂါမိနာပစယဂါမိဿ ဓမ္မဿ ပစ္ဆာဇာတပစ္စယေန ပစ္စယော – ပစ္ဆာဇာတာ အာစယဂါမီ ခန္ဓာ ပုရေဇာတဿ ဣမဿ ကာယဿ ပစ္ဆာဇာတပစ္စယေန ပစ္စယော။ (၁)
အပစယဂါမီ ဓမ္မော နေဝါစယဂါမိနာပစယဂါမိဿ ဓမ္မဿ ပစ္ဆာဇာတပစ္စယေန ပစ္စယော – ပစ္ဆာဇာတာ အပစယဂါမီ ခန္ဓာ ပုရေဇာတဿ ဣမဿ ကာယဿ ပစ္ဆာဇာတပစ္စယေန ပစ္စယော။ (၁)
နေဝါစယဂါမိနာပစယဂါမီ ဓမ္မော နေဝါစယဂါမိနာပစယဂါမိဿ ဓမ္မဿ ပစ္ဆာဇာတပစ္စယေန ပစ္စယော – ပစ္ဆာဇာတာ နေဝါစယဂါမိနာပစယဂါမီ ခန္ဓာ ပုရေဇာတဿ ဣမဿ ကာယဿ ပစ္ဆာဇာတပစ္စယေန ပစ္စယော။
အာသေဝနပစ္စယော
၅၉. အာစယဂါမီ ဓမ္မော အာစယဂါမိဿ ဓမ္မဿ အာသေဝနပစ္စယေန ပစ္စယော – ပုရိမာ ပုရိမာ အာစယဂါမီ ခန္ဓာ ပစ္ဆိမာနံ ပစ္ဆိမာနံ အာစယဂါမီနံ ခန္ဓာနံ အာသေဝနပစ္စယေန ပစ္စယော။ အနုလောမံ ဂေါတြဘုဿ။ အနုလောမံ ဝေါဒါနဿ အာသေဝနပစ္စယေန ပစ္စယော။ (၁)
အာစယဂါမီ ဓမ္မော အပစယဂါမိဿ ဓမ္မဿ အာသေဝနပစ္စယေန ပစ္စယော – ဂေါတြဘု မဂ္ဂဿ။ ဝေါဒါနံ မဂ္ဂဿ အာသေဝနပစ္စယေန ပစ္စယော။ (၂)
နေဝါစယဂါမိနာပစယဂါမီ ဓမ္မော နေဝါစယဂါမိနာပစယဂါမိဿ ဓမ္မဿ အာသေဝနပစ္စယေန ပစ္စယော – ပုရိမာ ပုရိမာ နေဝါစယဂါမိနာပစယဂါမီ ခန္ဓာ ပစ္ဆိမာနံ ပစ္ဆိမာနံ နေဝါစယဂါမိနာပစယဂါမီနံ ခန္ဓာနံ အာသေဝနပစ္စယေန ပစ္စယော။ (၁)
ကမ္မပစ္စယော
၆၀. အာစယဂါမီ ဓမ္မော အာစယဂါမိဿ ဓမ္မဿ ကမ္မပစ္စယေန ပစ္စယော – အာစယဂါမီ စေတနာ သမ္ပယုတ္တကာနံ ခန္ဓာနံ ကမ္မပစ္စယေန ပစ္စယော။ (၁)
အာစယဂါမီ ဓမ္မော နေဝါစယဂါမိနာပစယဂါမိဿ ဓမ္မဿ ကမ္မပစ္စယေန ပစ္စယော – သဟဇာတာ၊ နာနာက္ခဏိကာ။ သဟဇာတာ – အာစယဂါမီ စေတနာ စိတ္တသမုဋ္ဌာနာနံ ရူပါနံ ကမ္မပစ္စယေန ပစ္စယော။ နာနာက္ခဏိကာ – အာစယဂါမီ စေတနာ ဝိပါကာနံ ခန္ဓာနံ ကဋတ္တာ စ ရူပါနံ ကမ္မပစ္စယေန ပစ္စယော။ (၂)
အာစယဂါမီ ဓမ္မော အာစယဂါမိဿ စ နေဝါစယဂါမိနာပစယဂါမိဿ စ ဓမ္မဿ ကမ္မပစ္စယေန ပစ္စယော – အာစယဂါမီ စေတနာ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ ကမ္မပစ္စယေန ပစ္စယော။ (၃)
၆၁. အပစယဂါမီ ဓမ္မော အပစယဂါမိဿ ဓမ္မဿ ကမ္မပစ္စယေန ပစ္စယော – အပစယဂါမီ စေတနာ သမ္ပယုတ္တကာနံ ခန္ဓာနံ ကမ္မပစ္စယေန ပစ္စယော။ (၁)
အပစယဂါမီ ဓမ္မော နေဝါစယဂါမိနာပစယဂါမိဿ ဓမ္မဿ ကမ္မပစ္စယေန ပစ္စယော – သဟဇာတာ၊ နာနာက္ခဏိကာ။ သဟဇာတာ – အပစယဂါမီ စေတနာ စိတ္တသမုဋ္ဌာနာနံ ရူပါနံ ကမ္မပစ္စယေန ပစ္စယော။ နာနာက္ခဏိကာ – အပစယဂါမီ စေတနာ ဝိပါကာနံ ခန္ဓာနံ ကမ္မပစ္စယေန ပစ္စယော။ (၂)
အပစယဂါမီ ဓမ္မော အပစယဂါမိဿ စ နေဝါစယဂါမိနာပစယဂါမိဿ စ ဓမ္မဿ ကမ္မပစ္စယေန ပစ္စယော – အပစယဂါမီ စေတနာ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ ကမ္မပစ္စယေန ပစ္စယော။ (၃)
နေဝါစယဂါမိနာပစယဂါမီ ဓမ္မော နေဝါစယဂါမိနာပစယဂါမိဿ ဓမ္မဿ ကမ္မပစ္စယေန ပစ္စယော – နေဝါစယဂါမိနာပစယဂါမီ စေတနာ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ ကမ္မပစ္စယေန ပစ္စယော။ ပဋိသန္ဓိက္ခဏေ နေဝါစယဂါမိနာပစယဂါမီ စေတနာ သမ္ပယုတ္တကာနံ ခန္ဓာနံ ကဋတ္တာ စ ရူပါနံ ကမ္မပစ္စယေန ပစ္စယော။ (၁)
ဝိပါကပစ္စယော
၆၂. နေဝါစယဂါမိနာပစယဂါမီ ဓမ္မော နေဝါစယဂါမိနာပစယဂါမိဿ ဓမ္မဿ ဝိပါကပစ္စယေန ပစ္စယော – ဝိပါကော နေဝါစယဂါမိနာပစယဂါမီ ဧကော ခန္ဓော တိဏ္ဏန္နံ ခန္ဓာနံ။ပေ.။ ပဋိသန္ဓိက္ခဏေ။ပေ.။ ခန္ဓာ ဝတ္ထုဿ ဝိပါကပစ္စယေန ပစ္စယော။ (၁)
အာဟာရပစ္စယာဒိ
၆၃. အာစယဂါမီ ဓမ္မော အာစယဂါမိဿ ဓမ္မဿ အာဟာရပစ္စယေန ပစ္စယော။ ဣန္ဒြိယပစ္စယေန ပစ္စယော။ ဈာနပစ္စယေန ပစ္စယော။ မဂ္ဂပစ္စယေန ပစ္စယော။ သမ္ပယုတ္တပစ္စယေန ပစ္စယော။
ဝိပ္ပယုတ္တပစ္စယော
၆၄. အာစယဂါမီ ဓမ္မော နေဝါစယဂါမိနာပစယဂါမိဿ ဓမ္မဿ ဝိပ္ပယုတ္တပစ္စယေန ပစ္စယော – သဟဇာတံ၊ ပစ္ဆာဇာတံ။ သဟဇာတာ – အာစယဂါမီ ခန္ဓာ စိတ္တသမုဋ္ဌာနာနံ ရူပါနံ ဝိပ္ပယုတ္တပစ္စယေန ပစ္စယော။ ပစ္ဆာဇာတာ – အာစယဂါမီ ခန္ဓာ ပုရေဇာတဿ ဣမဿ ကာယဿ ဝိပ္ပယုတ္တပစ္စယေန ပစ္စယော။ (၁)
အပစယဂါမီ ဓမ္မော နေဝါစယဂါမိနာပစယဂါမိဿ ဓမ္မဿ ဝိပ္ပယုတ္တပစ္စယေန ပစ္စယော – သဟဇာတံ၊ ပစ္ဆာဇာတံ။ သဟဇာတာ – အပစယဂါမီ ခန္ဓာ စိတ္တသမုဋ္ဌာနာနံ ရူပါနံ ဝိပ္ပယုတ္တပစ္စယေန ပစ္စယော။ ပစ္ဆာဇာတာ – အပစယဂါမီ ခန္ဓာ ပုရေဇာတဿ ဣမဿ ကာယဿ ဝိပ္ပယုတ္တပစ္စယေန ပစ္စယော။ (၁)
နေဝါစယဂါမိနာပစယဂါမီ ဓမ္မော နေဝါစယဂါမိနာပစယဂါမိဿ ဓမ္မဿ ဝိပ္ပယုတ္တပစ္စယေန ပစ္စယော – သဟဇာတံ၊ ပုရေဇာတံ၊ ပစ္ဆာဇာတံ။ သဟဇာတာ – နေဝါစယဂါမိနာပစယဂါမီ ခန္ဓာ စိတ္တသမုဋ္ဌာနာနံ ရူပါနံ ဝိပ္ပယုတ္တပစ္စယေန ပစ္စယော။ ပဋိသန္ဓိက္ခဏေ နေဝါစယဂါမိနာပစယဂါမီ ခန္ဓာ ကဋတ္တာရူပါနံ ဝိပ္ပယုတ္တပစ္စယေန ပစ္စယော ။ ခန္ဓာ ဝတ္ထုဿ ဝိပ္ပယုတ္တပစ္စယေန ပစ္စယော။ ဝတ္ထု ခန္ဓာနံ ဝိပ္ပယုတ္တပစ္စယေန ပစ္စယော။ ပုရေဇာတံ – စက္ခါယတနံ စက္ခုဝိညာဏဿ။ပေ.။ ကာယာယတနံ ကာယဝိညာဏဿ။ပေ.။ ဝတ္ထု နေဝါစယဂါမိနာပစယဂါမီနံ ခန္ဓာနံ ဝိပ္ပယုတ္တပစ္စယေန ပစ္စယော။ ပစ္ဆာဇာတာ – နေဝါစယဂါမိနာပစယဂါမီ ခန္ဓာ ပုရေဇာတဿ ဣမဿ ကာယဿ။ပေ.။။ (၁)
နေဝါစယဂါမိနာပစယဂါမီ ဓမ္မော အာစယဂါမိဿ ဓမ္မဿ ဝိပ္ပယုတ္တပစ္စယေန ပစ္စယော။ ပုရေဇာတံ – ဝတ္ထု အာစယဂါမီနံ ခန္ဓာနံ ဝိပ္ပယုတ္တပစ္စယေန ပစ္စယော။ (၂)
နေဝါစယဂါမိနာပစယဂါမီ ဓမ္မော အပစယဂါမိဿ ဓမ္မဿ ဝိပ္ပယုတ္တပစ္စယေန ပစ္စယော။ ပုရေဇာတံ – ဝတ္ထု အပစယဂါမီနံ ခန္ဓာနံ ဝိပ္ပယုတ္တပစ္စယေန ပစ္စယော။ (၃)
အတ္ထိပစ္စယာဒိ
၆၅. အာစယဂါမီ ဓမ္မော အာစယဂါမိဿ ဓမ္မဿ အတ္ထိပစ္စယေန ပစ္စယော – အာစယဂါမီ ဧကော ခန္ဓော တိဏ္ဏန္နံ ခန္ဓာနံ။ပေ.။။ (၁)
အာစယဂါမီ ဓမ္မော နေဝါစယဂါမိနာပစယဂါမိဿ ဓမ္မဿ အတ္ထိပစ္စယေန ပစ္စယော – သဟဇာတံ၊ ပစ္ဆာဇာတံ။ သဟဇာတာ – အာစယဂါမီ ခန္ဓာ စိတ္တသမုဋ္ဌာနာနံ ရူပါနံ အတ္ထိပစ္စယေန ပစ္စယော။ ပစ္ဆာဇာတာ – အာစယဂါမီ ခန္ဓာ ပုရေဇာတဿ ဣမဿ ကာယဿ အတ္ထိပစ္စယေန ပစ္စယော။ (၂)
အာစယဂါမီ ဓမ္မော အာစယဂါမိဿ စ နေဝါစယဂါမိနာပစယဂါမိဿ စ ဓမ္မဿ အတ္ထိပစ္စယေန ပစ္စယော – အာစယဂါမီ ဧကော ခန္ဓော တိဏ္ဏန္နံ ခန္ဓာနံ စိတ္တသမုဋ္ဌာနာနဉ္စ ရူပါနံ အတ္ထိပစ္စယေန ပစ္စယော။ပေ.။ ဒွေ ခန္ဓာ။ပေ.။။ (၃)
အပစယဂါမီ ဓမ္မော။ တီဏိ (အာစယဂါမိနယေန ကာတဗ္ဗံ)။
၆၆. နေဝါစယဂါမိနာပစယဂါမီ ဓမ္မော နေဝါစယဂါမိနာပစယဂါမိဿ ဓမ္မဿ အတ္ထိပစ္စယေန ပစ္စယော – သဟဇာတံ၊ ပုရေဇာတံ၊ ပစ္ဆာဇာတံ၊ အာဟာရံ၊ ဣန္ဒြိယံ။ သဟဇာတော – နေဝါစယဂါမိနာပစယဂါမီ ဧကော ခန္ဓော တိဏ္ဏန္နံ ခန္ဓာနံ စိတ္တသမုဋ္ဌာနာနဉ္စ ရူပါနံ အတ္ထိပစ္စယေန ပစ္စယော။ပေ.။ ဒွေ ခန္ဓာ။ပေ.။ ပဋိသန္ဓိက္ခဏေ။ပေ.။ ခန္ဓာ ဝတ္ထုဿ အတ္ထိပစ္စယေန ပစ္စယော။ ဝတ္ထု ခန္ဓာနံ အတ္ထိပစ္စယေန ပစ္စယော။ ဧကံ မဟာဘူတံ။ပေ.။ ဗာဟိရံ။ အာဟာရသမုဋ္ဌာနံ။ ဥတုသမုဋ္ဌာနံ။ အသညသတ္တာနံ။ပေ.။။ ပုရေဇာတံ – အရဟာ စက္ခုံ။ပေ.။ ဝတ္ထုံ အနိစ္စတော ဒုက္ခတော အနတ္တတော ဝိပဿတိ၊ ဒိဗ္ဗေန စက္ခုနာ ရူပံ ပဿတိ၊ ဒိဗ္ဗာယ သောတဓါတုယာ သဒ္ဒံ သုဏာတိ၊ ရူပါယတနံ စက္ခုဝိညာဏဿ။ပေ.။ ဖောဋ္ဌဗ္ဗာယတနံ ကာယဝိညာဏဿ။ပေ.။ စက္ခါယတနံ စက္ခုဝိညာဏဿ။ပေ.။ ကာယာယတနံ ကာယဝိညာဏဿ။ပေ.။ ဝတ္ထု နေဝါစယဂါမိနာပစယဂါမီနံ ခန္ဓာနံ အတ္ထိပစ္စယေန ပစ္စယော။ ပစ္ဆာဇာတာ – နေဝါစယဂါမိနာပစယဂါမီ ခန္ဓာ ပုရေဇာတဿ ဣမဿ ကာယဿ အတ္ထိပစ္စယေန ပစ္စယော။ ကဗဠီကာရော အာဟာရော ဣမဿ ကာယဿ။ပေ.။ ရူပဇီဝိတိန္ဒြိယံ ကဋတ္တာရူပါနံ။ပေ.။။ (၁)
နေဝါစယဂါမိနာပစယဂါမီ ဓမ္မော အာစယဂါမိဿ ဓမ္မဿ အတ္ထိပစ္စယေန ပစ္စယော။ ပုရေဇာတံ – သေက္ခါ ဝါ ပုထုဇ္ဇနာ ဝါ စက္ခုံ အနိစ္စတော ဒုက္ခတော အနတ္တတော ဝိပဿန္တိ၊ အဿာဒေန္တိ အဘိနန္ဒန္တိ; တံ အာရဗ္ဘ ရာဂေါ။ပေ.။ ဒေါမနဿံ ဥပ္ပဇ္ဇတိ၊ သောတံ။ပေ.။ ဝတ္ထုံ အနိစ္စတော။ပေ.။ ဝိပဿန္တိ၊ အဿာဒေန္တိ အဘိနန္ဒန္တိ; တံ အာရဗ္ဘ ရာဂေါ။ပေ.။ ဒေါမနဿံ ဥပ္ပဇ္ဇတိ၊ ဒိဗ္ဗေန စက္ခုနာ ရူပံ ပဿတိ၊ ဒိဗ္ဗာယ သောတဓါတုယာ သဒ္ဒံ သုဏာတိ၊ ဝတ္ထု အာစယဂါမီနံ ခန္ဓာနံ အတ္ထိပစ္စယေန ပစ္စယော။ (၂)
နေဝါစယဂါမိနာပစယဂါမီ ဓမ္မော အပစယဂါမိဿ ဓမ္မဿ အတ္ထိပစ္စယေန ပစ္စယော။ ပုရေဇာတံ – ဝတ္ထု အပစယဂါမီနံ ခန္ဓာနံ အတ္ထိပစ္စယေန ပစ္စယော။ (၃)
၆၇. အာစယဂါမီ စ နေဝါစယဂါမိနာပစယဂါမီ စ ဓမ္မာ အာစယဂါမိဿ ဓမ္မဿ အတ္ထိပစ္စယေန ပစ္စယော သဟဇာတံ၊ ပုရေဇာတံ။ သဟဇာတော – အာစယဂါမီ ဧကော ခန္ဓော စ ဝတ္ထု စ တိဏ္ဏန္နံ ခန္ဓာနံ အတ္ထိပစ္စယေန ပစ္စယော။ပေ.။ ဒွေ ခန္ဓာ။ပေ.။။ (၁)
အာစယဂါမီ စ နေဝါစယဂါမိနာပစယဂါမီ စ ဓမ္မာ နေဝါစယဂါမိနာပစယဂါမိဿ ဓမ္မဿ အတ္ထိပစ္စယေန ပစ္စယော – သဟဇာတံ၊ ပစ္ဆာဇာတံ၊ အာဟာရံ၊ ဣန္ဒြိယံ။ သဟဇာတာ – အာစယဂါမီ ခန္ဓာ စ မဟာဘူတာ စ စိတ္တသမုဋ္ဌာနာနံ ရူပါနံ အတ္ထိပစ္စယေန ပစ္စယော။ ပစ္ဆာဇာတာ – အာစယဂါမီ ခန္ဓာ စ ကဗဠီကာရော အာဟာရော စ ဣမဿ ကာယဿ အတ္ထိပစ္စယေန ပစ္စယော။ ပစ္ဆာဇာတာ – အာစယဂါမီ ခန္ဓာ စ ရူပဇီဝိတိန္ဒြိယဉ္စ ကဋတ္တာရူပါနံ အတ္ထိပစ္စယေန ပစ္စယော။ (၂)
အပစယဂါမီ စ နေဝါစယဂါမိနာပစယဂါမီ စ ဓမ္မာ အပစယဂါမိဿ ဓမ္မဿ အတ္ထိပစ္စယေန ပစ္စယော (ဒွေ ကာတဗ္ဗာ ဒဿိတနယေန)၊ နတ္ထိပစ္စယေန ပစ္စယော၊ ဝိဂတပစ္စယေန ပစ္စယော၊ အဝိဂတပစ္စယေန ပစ္စယော။
၁. ပစ္စယာနုလောမံ
၂. သင်္ချာဝါရော
သုဒ္ဓံ
၆၈. ဟေတုယာ သတ္တ၊ အာရမ္မဏေ သတ္တ၊ အဓိပတိယာ ဒသ၊ အနန္တရေ ဆ၊ သမနန္တရေ ဆ၊ သဟဇာတေ နဝ၊ အညမညေ တီဏိ၊ နိဿယေ တေရသ၊ ဥပနိဿယေ နဝ၊ ပုရေဇာတေ တီဏိ၊ ပစ္ဆာဇာတေ တီဏိ၊ အာသေဝနေ တီဏိ၊ ကမ္မေ သတ္တ၊ ဝိပါကေ ဧကံ၊ အာဟာရေ သတ္တ၊ ဣန္ဒြိယေ သတ္တ၊ ဈာနေ သတ္တ၊ မဂ္ဂေ သတ္တ၊ သမ္ပယုတ္တေ တီဏိ၊ ဝိပ္ပယုတ္တေ ပဉ္စ၊ အတ္ထိယာ တေရသ၊ နတ္ထိယာ ဆ၊ ဝိဂတေ ဆ၊ အဝိဂတေ တေရသ။
အနုလောမံ။
ပစ္စနီယုဒ္ဓါရော
၆၉. အာစယဂါမီ ဓမ္မော အာစယဂါမိဿ ဓမ္မဿ အာရမ္မဏပစ္စယေန ပစ္စယော။ သဟဇာတပစ္စယေန ပစ္စယော။ ဥပနိဿယပစ္စယေန ပစ္စယော။ (၁)
အာစယဂါမီ ဓမ္မော အပစယဂါမိဿ ဓမ္မဿ ဥပနိဿယပစ္စယေန ပစ္စယော။ (၂)
အာစယဂါမီ ဓမ္မော နေဝါစယဂါမိနာပစယဂါမိဿ ဓမ္မဿ အာရမ္မဏပစ္စယေန ပစ္စယော။ သဟဇာတပစ္စယေန ပစ္စယော။ ဥပနိဿယပစ္စယေန ပစ္စယော။ ပစ္ဆာဇာတပစ္စယေန ပစ္စယော။ ကမ္မပစ္စယေန ပစ္စယော။ (၃)
အာစယဂါမီ ဓမ္မော အာစယဂါမိဿ စ နေဝါစယဂါမိနာပစယဂါမိဿ စ ဓမ္မဿ သဟဇာတပစ္စယေန ပစ္စယော။ (၄)
၇၀. အပစယဂါမီ ဓမ္မော အပစယဂါမိဿ ဓမ္မဿ သဟဇာတပစ္စယေန ပစ္စယော။ ဥပနိဿယပစ္စယေန ပစ္စယော။ (၁)
အပစယဂါမီ ဓမ္မော အာစယဂါမိဿ ဓမ္မဿ အာရမ္မဏပစ္စယေန ပစ္စယော။ ဥပနိဿယပစ္စယေန ပစ္စယော။ (၂)
အပစယဂါမီ ဓမ္မော နေဝါစယဂါမိနာပစယဂါမိဿ ဓမ္မဿ အာရမ္မဏပစ္စယေန ပစ္စယော။ သဟဇာတပစ္စယေန ပစ္စယော။ ဥပနိဿယပစ္စယေန ပစ္စယော။ ပစ္ဆာဇာတပစ္စယေန ပစ္စယော။ (၃)
အပစယဂါမီ ဓမ္မော အပစယဂါမိဿ စ နေဝါစယဂါမိနာပစယဂါမိဿ စ ဓမ္မဿ သဟဇာတပစ္စယေန ပစ္စယော။ (၄)
၇၁. နေဝါစယဂါမိနာပစယဂါမီ ဓမ္မော နေဝါစယဂါမိနာပစယဂါမိဿ ဓမ္မဿ အာရမ္မဏပစ္စယေန ပစ္စယော။ သဟဇာတပစ္စယေန ပစ္စယော။ ဥပနိဿယပစ္စယေန ပစ္စယော။ ပုရေဇာတပစ္စယေန ပစ္စယော။ ပစ္ဆာဇာတပစ္စယေန ပစ္စယော။ အာဟာရပစ္စယေန ပစ္စယော။ ဣန္ဒြိယပစ္စယေန ပစ္စယော။ (၁)
နေဝါစယဂါမိနာပစယဂါမီ ဓမ္မော အာစယဂါမိဿ ဓမ္မဿ အာရမ္မဏပစ္စယေန ပစ္စယော။ ဥပနိဿယပစ္စယေန ပစ္စယော။ ပုရေဇာတပစ္စယေန ပစ္စယော။ (၂)
နေဝါစယဂါမိနာပစယဂါမီ ဓမ္မော အပစယဂါမိဿ ဓမ္မဿ ဥပနိဿယပစ္စယေန ပစ္စယော။ ပုရေဇာတပစ္စယေန ပစ္စယော။ (၃)
၇၂. အာစယဂါမီ စ နေဝါစယဂါမိနာပစယဂါမီ စ ဓမ္မာ အာစယဂါမိဿ ဓမ္မဿ သဟဇာတံ၊ ပုရေဇာတံ။ (၁)
အာစယဂါမီ စ နေဝါစယဂါမိနာပစယဂါမီ စ ဓမ္မာ နေဝါစယဂါမိနာပစယဂါမိဿ ဓမ္မဿ သဟဇာတံ၊ ပစ္ဆာဇာတံ၊ အာဟာရံ၊ ဣန္ဒြိယံ။ (၂)
အပစယဂါမီ စ နေဝါစယဂါမိနာပစယဂါမီ စ ဓမ္မာ အပစယဂါမိဿ ဓမ္မဿ သဟဇာတံ၊ ပုရေဇာတံ။ (၁)
အပစယဂါမီ စ နေဝါစယဂါမိနာပစယဂါမီ စ ဓမ္မာ နေဝါစယဂါမိနာပစယဂါမိဿ ဓမ္မဿ သဟဇာတံ၊ ပစ္ဆာဇာတံ၊ အာဟာရံ၊ ဣန္ဒြိယံ။ (၂)
၂. ပစ္စယပစ္စနီယံ
၂. သင်္ချာဝါရော
သုဒ္ဓံ
၇၃. နဟေတုယာ ပန္နရသ၊ နအာရမ္မဏေ နအဓိပတိယာ နအနန္တရေ နသမနန္တရေ ပန္နရသ၊ နသဟဇာတေ ဧကာဒသ၊ နအညမညေ ဧကာဒသ၊ နနိဿယေ ဧကာဒသ၊ နဥပနိဿယေ စုဒ္ဒသ၊ နပုရေဇာတေ တေရသ၊ နပစ္ဆာဇာတေ ပန္နရသ၊ နအာသေဝနေ နကမ္မေ နဝိပါကေ နအာဟာရေ နဣန္ဒြိယေ နဈာနေ နမဂ္ဂေ ပန္နရသ၊ နသမ္ပယုတ္တေ ဧကာဒသ၊ နဝိပ္ပယုတ္တေ နဝ၊ နောအတ္ထိယာ နဝ၊ နောနတ္ထိယာ ပန္နရသ၊ နောဝိဂတေ ပန္နရသ၊ နောအဝိဂတေ နဝ (ဧဝံ ဂဏေတဗ္ဗံ)။
ပစ္စနီယံ။
၃. ပစ္စယာနုလောမပစ္စနီယံ
ဟေတုဒုကံ
၇၄. ဟေတုပစ္စယာ နအာရမ္မဏေ သတ္တ၊ နအဓိပတိယာ နအနန္တရေ နသမနန္တရေ သတ္တ၊ နအညမညေ တီဏိ၊ နဥပနိဿယေ သတ္တ၊ နပုရေဇာတေ နပစ္ဆာဇာတေ နအာသေဝနေ နကမ္မေ နဝိပါကေ နအာဟာရေ နဣန္ဒြိယေ နဈာနေ နမဂ္ဂေ သတ္တ၊ နသမ္ပယုတ္တေ တီဏိ၊ နဝိပ္ပယုတ္တေ တီဏိ၊ နောနတ္ထိယာ သတ္တ၊ နောဝိဂတေ သတ္တ (ဧဝံ ဂဏေတဗ္ဗံ)။
အနုလောမပစ္စနီယံ။
၄. ပစ္စယပစ္စနီယာနုလောမံ
နဟေတုဒုကံ
၇၅. နဟေတုပစ္စယာ အာရမ္မဏေ သတ္တ၊ အဓိပတိယာ ဒသ၊ အနန္တရေ ဆ၊ သမနန္တရေ ဆ၊ သဟဇာတေ နဝ၊ အညမညေ တီဏိ၊ နိဿယေ တေရသ၊ ဥပနိဿယေ နဝ၊ ပုရေဇာတေ တီဏိ၊ ပစ္ဆာဇာတေ တီဏိ၊ အာသေဝနေ တီဏိ၊ ကမ္မေ သတ္တ၊ ဝိပါကေ ဧကံ၊ အာဟာရေ သတ္တ၊ ဣန္ဒြိယေ ဈာနေ မဂ္ဂေ သတ္တ၊ သမ္ပယုတ္တေ တီဏိ၊ ဝိပ္ပယုတ္တေ ပဉ္စ၊ အတ္ထိယာ တေရသ၊ နတ္ထိယာ ဆ၊ ဝိဂတေ ဆ၊ အဝိဂတေ တေရသ (ဧဝံ ဂဏေတဗ္ဗံ)။
ပစ္စနီယာနုလောမံ။
အာစယဂါမိတ္တိကံ နိဋ္ဌိတံ။