တေဝီသတိမဝဂ္ဂ

၂၃. တေဝီသတိမဝဂ္ဂ

(၂၁၈) ၁. ဧကာဓိပ္ပါယကထာ

၉၀၈. ဧကာဓိပ္ပါယေန မေထုနော ဓမ္မော ပဋိသေဝိတဗ္ဗောတိ? အာမန္တာ။ ဧကာဓိပ္ပါယေန အဿမဏေန ဟောတဗ္ဗံ, အဘိက္ခုနာ ဟောတဗ္ဗံ, ဆိန္နမူလေန ဟောတဗ္ဗံ ပါရာဇိကေန ဟောတဗ္ဗန္တိ? န ဟေဝံ ဝတ္တဗ္ဗေ။ပေ.။ ဧကာဓိပ္ပါယေန မေထုနော ဓမ္မော ပဋိသေဝိတဗ္ဗောတိ? အာမန္တာ။ ဧကာဓိပ္ပါယေန ပါဏော ဟန္တဗ္ဗော, အဒိန္နံ အာဒိယိတဗ္ဗံ, မုသာ ဘဏိတဗ္ဗာ, ပိသုဏံ ဘဏိတဗ္ဗံ, ဖရုသံ ဘဏိတဗ္ဗံ, သမ္ဖံ ပလပိတဗ္ဗံ, သန္ဓိ ဆေဒိတဗ္ဗော, နိလ္လောပံ ဟာတဗ္ဗံ, ဧကာဂါရိကံ ကာတဗ္ဗံ, ပရိပန္ထေ ဌာတဗ္ဗံ, ပရဒါရော ဂန္တဗ္ဗော, ဂါမဃာတကော ကာတဗ္ဗော, နိဂမဃာတကော ကာတဗ္ဗောတိ? န ဟေဝံ ဝတ္တဗ္ဗေ။ပေ.။။

ဧကာဓိပ္ပါယကထာ နိဋ္ဌိတာ။

၂၃. တေဝီသတိမဝဂ္ဂေါ

(၂၁၉) ၂. အရဟန္တဝဏ္ဏကထာ

၉၀၉. အရဟန္တာနံ ဝဏ္ဏေန အမနုဿာ မေထုနံ ဓမ္မံ ပဋိသေဝန္တီတိ? အာမန္တာ။ အရဟန္တာနံ ဝဏ္ဏေန အမနုဿာ ပါဏံ ဟနန္တိ။ပေ.။ အဒိန္နံ အာဒိယန္တိ, မုသာ ဘဏန္တိ, ပိသုဏံ ဘဏန္တိ, ဖရုသံ ဘဏန္တိ, သမ္ဖံ ပလပန္တိ, သန္ဓိံ ဆိန္ဒန္တိ, နိလ္လောပံ ဟရန္တိ, ဧကာဂါရိကံ ကရောန္တိ, ပရိပန္ထေ တိဋ္ဌန္တိ, ပရဒါရံ ဂစ္ဆန္တိ, ဂါမဃာတကံ ကရောန္တိ။ပေ.။ နိဂမဃာတကံ ကရောန္တီတိ? န ဟေဝံ ဝတ္တဗ္ဗေ။ပေ.။။

အရဟန္တဝဏ္ဏကထာ နိဋ္ဌိတာ။

၂၃. တေဝီသတိမဝဂ္ဂေါ

(၂၂၀-၄) ၃-၇. ဣဿရိယကာမကာရိကာဒိကထာ

၉၁၀. ဗောဓိသတ္တော ဣဿရိယကာမကာရိကာဟေတု ဝိနိပါတံ ဂစ္ဆတီတိ? အာမန္တာ။ ဗောဓိသတ္တော ဣဿရိယကာမကာရိကာဟေတု နိရယံ ဂစ္ဆတိ , သဉ္ဇီဝံ ဂစ္ဆတိ, ကာလသုတ္တံ ဂစ္ဆတိ, တာပနံ ဂစ္ဆတိ, မဟာတာပနံ [ပတာပနံ (သီ. သျာ. ကံ. ဣ.)] ဂစ္ဆတိ, သံဃာတကံ ဂစ္ဆတိ, ရောရုဝံ ဂစ္ဆတိ။ပေ.။ အဝီစိံ ဂစ္ဆတီတိ? န ဟေဝံ ဝတ္တဗ္ဗေ။ပေ.။။

ဗောဓိသတ္တော ဣဿရိယကာမကာရိကာဟေတု ဝိနိပါတံ ဂစ္ဆတီတိ? အာမန္တာ။ ‘‘ဗောဓိသတ္တော ဣဿရိယကာမကာရိကာဟေတု ဝိနိပါတံ ဂစ္ဆတီ’’တိ – အတ္ထေဝ သုတ္တန္တောတိ? နတ္ထိ။ ဟဉ္စိ ‘‘ဗောဓိသတ္တော ဣဿရိယကာမကာရိကာဟေတု ဝိနိပါတံ ဂစ္ဆတီ’’တိ – နတ္ထေဝ သုတ္တန္တော, နော စ ဝတ ရေ ဝတ္တဗ္ဗေ – ‘‘ဗောဓိသတ္တော ဣဿရိယကာမကာရိကာဟေတု ဝိနိပါတံ ဂစ္ဆတီ’’တိ။

၉၁၁. ဗောဓိသတ္တော ဣဿရိယကာမကာရိကာဟေတု ဂဗ္ဘသေယျံ ဩက္ကမတီတိ? အာမန္တာ။ ဗောဓိသတ္တော ဣဿရိယကာမကာရိကာဟေတု နိရယံ ဥပပဇ္ဇေယျ, တိရစ္ဆာနယောနိံ ဥပပဇ္ဇေယျာတိ? န ဟေဝံ ဝတ္တဗ္ဗေ။ပေ.။။

ဗောဓိသတ္တော ဣဿရိယကာမကာရိကာဟေတု ဂဗ္ဘသေယျံ ဩက္ကမတီတိ ? အာမန္တာ။ ဗောဓိသတ္တော ဣဒ္ဓိမာတိ? န ဟေဝံ ဝတ္တဗ္ဗေ။ပေ.။ ဗောဓိသတ္တော ဣဒ္ဓိမာတိ? အာမန္တာ။ ဗောဓိသတ္တေန ဆန္ဒိဒ္ဓိပါဒေါ ဘာဝိတော။ပေ.။ ဝီရိယိဒ္ဓိပါဒေါ။ပေ.။ စိတ္တိဒ္ဓိပါဒေါ။ပေ.။ ဝီမံသိဒ္ဓိပါဒေါ ဘာဝိတောတိ? န ဟေဝံ ဝတ္တဗ္ဗေ။ပေ.။။

ဗောဓိသတ္တော ဣဿရိယကာမကာရိကာဟေတု ဂဗ္ဘသေယျံ ဩက္ကမတီတိ? အာမန္တာ။ ‘‘ဗောဓိသတ္တော ဣဿရိယကာမကာရိကာဟေတု ဂဗ္ဘသေယျံ ဩက္ကမတီ’’တိ – အတ္ထေဝ သုတ္တန္တောတိ? နတ္ထိ။ ဟဉ္စိ ‘‘ဗောဓိသတ္တော ဣဿရိယကာမကာရိကာဟေတု ဂဗ္ဘသေယျံ ဩက္ကမတီ’’တိ – နတ္ထေဝ သုတ္တန္တော, နော စ ဝတ ရေ ဝတ္တဗ္ဗေ – ‘‘ဗောဓိသတ္တော ဣဿရိယကာမကာရိကာဟေတု ဂဗ္ဘသေယျံ ဩက္ကမတီ’’တိ။

၉၁၂. ဗောဓိသတ္တော ဣဿရိယကာမကာရိကာဟေတု ဒုက္ကရကာရိကံ အကာသီတိ? အာမန္တာ။ ဗောဓိသတ္တော ဣဿရိယကာမကာရိကာဟေတု ‘‘သဿတော လောကော’’တိ ပစ္စာဂစ္ဆိ, ‘‘အသဿတော လောကော’’တိ။ပေ.။ ‘‘အန္တဝါ လောကော’’တိ။ပေ.။ ‘‘အနန္တဝါ လောကော’’တိ။ ‘‘တံ ဇီဝံ တံ သရီရ’’န္တိ ။ ‘‘အညံ ဇီဝံ အညံ သရီရ’’န္တိ။ ‘‘ဟောတိ တထာဂတော ပရံ မရဏာ’’တိ။ ‘‘န ဟောတိ တထာဂတော ပရံ မရဏာ’’တိ။ ‘‘ဟောတိ စ န စ ဟောတိ တထာဂတော ပရံ မရဏာ’’တိ။ပေ.။ ‘‘နေဝ ဟောတိ န န ဟောတိ တထာဂတော ပရံ မရဏာ’’တိ ပစ္စာဂစ္ဆီတိ? န ဟေဝံ ဝတ္တဗ္ဗေ။ပေ.။။

ဗောဓိသတ္တော ဣဿရိယကာမကာရိကာဟေတု ဒုက္ကရကာရိကံ အကာသီတိ? အာမန္တာ။ ‘‘ဗောဓိသတ္တော ဣဿရိယကာမကာရိကာဟေတု ဒုက္ကရကာရိကံ အကာသီ’’တိ – အတ္ထေဝ သုတ္တန္တောတိ? နတ္ထိ။ ဟဉ္စိ ‘‘ဗောဓိသတ္တော ဣဿရိယကာမကာရိကာဟေတု ဒုက္ကရကာရိကံ အကာသီ’’တိ – နတ္ထေဝ သုတ္တန္တော, နော စ ဝတ ရေ ဝတ္တဗ္ဗေ – ‘‘ဗောဓိသတ္တော ဣဿရိယကာမကာရိကာဟေတု ဒုက္ကရကာရိကံ အကာသီ’’တိ။

၉၁၃. ဗောဓိသတ္တော ဣဿရိယကာမကာရိကာဟေတု အပရန္တပံ [အမရံ တပံ (သံ. နိ. ၁.၁၃၇)] အကာသိ, အညံ သတ္ထာရံ ဥဒ္ဒိသီတိ? အာမန္တာ။ ဗောဓိသတ္တော ဣဿရိယကာမကာရိကာဟေတု ‘‘သဿတော လောကော’’တိ ပစ္စာဂစ္ဆိ။ပေ.။ ‘‘နေဝ ဟောတိ န န ဟောတိ တထာဂတော ပရံ မရဏာ’’တိ ပစ္စာဂစ္ဆီတိ? န ဟေဝံ ဝတ္တဗ္ဗေ။ပေ.။။

၉၁၄. ဗောဓိသတ္တော ဣဿရိယကာမကာရိကာဟေတု အညံ သတ္ထာရံ ဥဒ္ဒိသီတိ? အာမန္တာ။ ‘‘ဗောဓိသတ္တော ဣဿရိယကာမကာရိကာဟေတု အညံ သတ္ထာရံ ဥဒ္ဒိသီ’’တိ – အတ္ထေဝ သုတ္တန္တောတိ? နတ္ထိ။ ဟဉ္စိ ‘‘ဗောဓိသတ္တော ဣဿရိယကာမကာရိကာဟေတု အညံ သတ္ထာရံ ဥဒ္ဒိသီ’’တိ – နတ္ထေဝ သုတ္တန္တော, နော စ ဝတ ရေ ဝတ္တဗ္ဗေ – ‘‘ဗောဓိသတ္တော ဣဿရိယကာမကာရိကာဟေတု အညံ သတ္ထာရံ ဥဒ္ဒိသီ’’တိ။

ဣဿရိယကာမကာရိကာကထာ နိဋ္ဌိတာ။

၂၃. တေဝီသတိမဝဂ္ဂေါ

(၂၂၅) ၈. ပတိရူပကထာ

၉၁၅. အတ္ထိ န ရာဂေါ ရာဂပတိရူပကောတိ? အာမန္တာ။ အတ္ထိ န ဖဿော ဖဿပတိရူပကော, အတ္ထိ န ဝေဒနာ ဝေဒနာပတိရူပိကာ, အတ္ထိ န သညာ သညာပတိရူပိကာ , အတ္ထိ န စေတနာ စေတနာပတိရူပိကာ, အတ္ထိ န စိတ္တံ စိတ္တပတိရူပကံ, အတ္ထိ န သဒ္ဓါ သဒ္ဓါပတိရူပိကာ, အတ္ထိ န ဝီရိယံ ဝီရိယပတိရူပကံ, အတ္ထိ န သတိ သတိပတိရူပိကာ, အတ္ထိ န သမာဓိ သမာဓိပတိရူပကော , အတ္ထိ န ပညာ ပညာပတိရူပိကာတိ? န ဟေဝံ ဝတ္တဗ္ဗေ။ပေ.။။

၉၁၆. အတ္ထိ န ဒေါသော ဒေါသပတိရူပကော, အတ္ထိ န မောဟော မောဟပတိရူပကော, အတ္ထိ န ကိလေသော ကိလေသပတိရူပကောတိ? အာမန္တာ။ အတ္ထိ န ဖဿော ဖဿပတိရူပကော။ပေ.။ အတ္ထိ န ပညာ ပညာပတိရူပိကာတိ? န ဟေဝံ ဝတ္တဗ္ဗေ။ပေ.။။

ပတိရူပကထာ နိဋ္ဌိတာ။

၂၃. တေဝီသတိမဝဂ္ဂေါ

(၂၂၆) ၉. အပရိနိပ္ဖန္နကထာ

၉၁၇. ရူပံ အပရိနိပ္ဖန္နန္တိ? အာမန္တာ။ ရူပံ န အနိစ္စံ န သင်္ခတံ န ပဋိစ္စသမုပ္ပန္နံ န ခယဓမ္မံ န ဝယဓမ္မံ န ဝိရာဂဓမ္မံ န နိရောဓဓမ္မံ န ဝိပရိဏာမဓမ္မန္တိ? န ဟေဝံ ဝတ္တဗ္ဗေ။ပေ.။ နနု ရူပံ အနိစ္စံ သင်္ခတံ ပဋိစ္စသမုပ္ပန္နံ ခယဓမ္မံ ဝယဓမ္မံ ဝိရာဂဓမ္မံ နိရောဓဓမ္မံ ဝိပရိဏာမဓမ္မန္တိ? အာမန္တာ။ ဟဉ္စိ ရူပံ အနိစ္စံ သင်္ခတံ။ပေ.။ ဝိပရိဏာမဓမ္မံ, နော စ ဝတ ရေ ဝတ္တဗ္ဗေ – ‘‘ရူပံ အပရိနိပ္ဖန္န’’န္တိ။

ဒုက္ခညေဝ ပရိနိပ္ဖန္နန္တိ? အာမန္တာ။ နနု ယဒနိစ္စံ တံ ဒုက္ခံ [သံ. နိ. ၃.၁၅] ဝုတ္တံ ဘဂဝတာ – ‘‘ရူပံ အနိစ္စ’’န္တိ? အာမန္တာ။ ဟဉ္စိ ယဒနိစ္စံ တံ ဒုက္ခံ ဝုတ္တံ ဘဂဝတာ – ‘‘ရူပံ အနိစ္စံ’’, နော စ ဝတ ရေ ဝတ္တဗ္ဗေ – ‘‘ဒုက္ခညေဝ ပရိနိပ္ဖန္န’’န္တိ။ပေ.။။

၉၁၈. ဝေဒနာ ။ပေ.။ သညာ။ သင်္ခါရာ။ ဝိညာဏံ။ စက္ခာယတနံ။ပေ.။ ဓမ္မာယတနံ။ စက္ခုဓါတု။ ဓမ္မဓါတု။ စက္ခုန္ဒ္ရိယံ။ပေ.။ အညာတာဝိန္ဒ္ရိယံ အပရိနိပ္ဖန္နန္တိ? အာမန္တာ။ အညာတာဝိန္ဒ္ရိယံ န အနိစ္စံ။ပေ.။ န ဝိပရိဏာမဓမ္မန္တိ? န ဟေဝံ ဝတ္တဗ္ဗေ။ပေ.။ နနု အညာတာဝိန္ဒ္ရိယံ အနိစ္စံ သင်္ခတံ။ပေ.။ ဝိပရိဏာမဓမ္မန္တိ? အာမန္တာ။ ဟဉ္စိ အညာတာဝိန္ဒ္ရိယံ အနိစ္စံ သင်္ခတံ ပဋိစ္စသမုပ္ပန္နံ ခယဓမ္မံ ဝယဓမ္မံ ဝိရာဂဓမ္မံ နိရောဓဓမ္မံ ဝိပရိဏာမဓမ္မံ, နော စ ဝတ ရေ ဝတ္တဗ္ဗေ – ‘‘အညာတာဝိန္ဒ္ရိယံ အပရိနိပ္ဖန္န’’န္တိ။

ဒုက္ခညေဝ ပရိနိပ္ဖန္နန္တိ? အာမန္တာ။ နနု ယဒနိစ္စံ တံ ဒုက္ခံ ဝုတ္တံ ဘဂဝတာ – ‘‘အညာတာဝိန္ဒ္ရိယံ အနိစ္စ’’န္တိ? အာမန္တာ။ ဟဉ္စိ ယဒနိစ္စံ တံ ဒုက္ခံ ဝုတ္တံ ဘဂဝတာ – ‘‘အညာတာဝိန္ဒ္ရိယံ အနိစ္စံ’’, နော စ ဝတ ရေ ဝတ္တဗ္ဗေ – ‘‘ဒုက္ခညေဝ ပရိနိပ္ဖန္န’’န္တိ။

အပရိနိပ္ဖန္နကထာ နိဋ္ဌိတာ။

တေဝီသတိမဝဂ္ဂေါ။

တဿုဒ္ဒါနံ –

ဧကာဓိပ္ပါယေန မေထုနော ဓမ္မော ပဋိသေဝိတဗ္ဗော, အရဟန္တာနံ ဝဏ္ဏေန အမနုဿာ မေထုနံ ဓမ္မံ ပဋိသေဝန္တိ, ဗောဓိသတ္တော ဣဿရိယကာမကာရိကာဟေတု ဝိနိပါတံ ဂစ္ဆတိ, ဂဗ္ဘသေယျံ ဩက္ကမတိ, ဒုက္ကရကာရိကံ အကာသိ , အပရန္တပံ အကာသိ, အညံ သတ္ထာရံ ဥဒ္ဒိသိ, အတ္ထိ န ရာဂေါ ရာဂပတိရူပကော အတ္ထိ န ဒေါသော ဒေါသပတိရူပကော အတ္ထိ န မောဟော မောဟပတိရူပကော အတ္ထိ န ကိလေသော ကိလေသပတိရူပကော, ရူပံ အပရိနိပ္ဖန္နံ အညာတာဝိန္ဒ္ရိယံ အပရိနိပ္ဖန္နန္တိ။

ခုဒ္ဒကော အဍ္ဎပဏ္ဏာသကော။

တဿုဒ္ဒါနံ –

နဝံ, နိဗ္ဗုတိ, ဧကာဓိပ္ပါယောတိ။

ပဏ္ဏာသကုဒ္ဒါနံ –

မဟာနိယာမော ၊ အနုသယာ၊ နိဂ္ဂဟော၊ ခုဒ္ဒကပဉ္စမော။

ပရပ္ပဝါဒမဒ္ဒနာ၊ သုတ္တမူလသမာဟိတာ။

ဥဇ္ဇောတနာ သတ္ထုသမယေ၊ ကထာဝတ္ထုပကရဏေတိ။

ပဉ္စတ္တိံသဘာဏဝါရံ

ကထာဝတ္ထုပကရဏံ နိဋ္ဌိတံ။