ဗာဝီသတိမဝဂ္ဂ

၂၂. ဗာဝီသတိမဝဂ္ဂ

(၂၀၈) ၁. ပရိနိဗ္ဗာနကထာ

၈၉၂. အတ္ထိ ကိဉ္စိ သံယောဇနံ အပ္ပဟာယ ပရိနိဗ္ဗာနန္တိ? အာမန္တာ။ အတ္ထိ ကိဉ္စိ သက္ကာယဒိဋ္ဌိံ အပ္ပဟာယ။ပေ.။ အနောတ္တပ္ပံ အပ္ပဟာယ ပရိနိဗ္ဗာနန္တိ? န ဟေဝံ ဝတ္တဗ္ဗေ။ပေ.။။

အတ္ထိ ကိဉ္စိ သံယောဇနံ အပ္ပဟာယ ပရိနိဗ္ဗာနန္တိ? အာမန္တာ။ အရဟာ သရာဂေါ။ပေ.။ သကိလေသောတိ? န ဟေဝံ ဝတ္တဗ္ဗေ။ပေ.။ နနု အရဟာ နိရာဂေါ။ပေ.။ နိက္ကိလေသောတိ? အာမန္တာ။ ဟဉ္စိ အရဟာ နိရာဂေါ။ပေ.။ နိက္ကိလေသော, နော စ ဝတ ရေ ဝတ္တဗ္ဗေ – ‘‘အတ္ထိ ကိဉ္စိ သံယောဇနံ အပ္ပဟာယ ပရိနိဗ္ဗာန’’န္တိ။

၈၉၃. န ဝတ္တဗ္ဗံ – ‘‘အတ္ထိ ကိဉ္စိ သံယောဇနံ အပ္ပဟာယ ပရိနိဗ္ဗာန’’န္တိ? အာမန္တာ ။ အရဟာ သဗ္ဗံ ဗုဒ္ဓဝိသယံ ဇာနာတီတိ? န ဟေဝံ ဝတ္တဗ္ဗေ။ တေန ဟိ အတ္ထိ ကိဉ္စိ သံယောဇနံ အပ္ပဟာယ ပရိနိဗ္ဗာနန္တိ။

ပရိနိဗ္ဗာနကထာ နိဋ္ဌိတာ။

၂၂. ဗာဝီသတိမဝဂ္ဂေါ

(၂၀၉) ၂. ကုသလစိတ္တကထာ

၈၉၄. အရဟာ ကုသလစိတ္တော ပရိနိဗ္ဗာယတီတိ? အာမန္တာ။ အရဟာ ပုညာဘိသင်္ခါရံ အဘိသင်္ခရောန္တော။ အာနေဉ္ဇာဘိသင်္ခါရံ အဘိသင်္ခရောန္တော။ ဂတိသံဝတ္တနိယံ ကမ္မံ ကရောန္တော။ ဘဝသံဝတ္တနိယံ ကမ္မံ ကရောန္တော။ ဣဿရိယသံဝတ္တနိယံ ကမ္မံ ကရောန္တော။ အဓိပစ္စသံဝတ္တနိယံ ကမ္မံ ကရောန္တော။ မဟာဘောဂသံဝတ္တနိယံ ကမ္မံ ကရောန္တော။ မဟာပရိဝါရသံဝတ္တနိယံ ကမ္မံ ကရောန္တော။ ဒေဝသောဘဂ္ယသံဝတ္တနိယံ ကမ္မံ ကရောန္တော။ မနုဿသောဘဂ္ယသံဝတ္တနိယံ ကမ္မံ ကရောန္တော ပရိနိဗ္ဗာယတီတိ? န ဟေဝံ ဝတ္တဗ္ဗေ။ပေ.။။

အရဟာ ကုသလစိတ္တော ပရိနိဗ္ဗာယတီတိ? အာမန္တာ။ အရဟာ အာစိနန္တော အပစိနန္တော ပဇဟန္တော ဥပါဒိယန္တော ဝိသိနေန္တော ဥဿိနေန္တော ဝိဓူပေန္တော သန္ဓူပေန္တော ပရိနိဗ္ဗာယတီတိ? န ဟေဝံ ဝတ္တဗ္ဗေ ။ပေ.။ နနု အရဟာ နေဝါစိနာတိ န အပစိနာတိ အပစိနိတွာ ဌိတောတိ? အာမန္တာ။ ဟဉ္စိ အရဟာ နေဝါစိနာတိ န အပစိနာတိ အပစိနိတွာ ဌိတော, နော စ ဝတ ရေ ဝတ္တဗ္ဗေ – ‘‘အရဟာ ကုသလစိတ္တော ပရိနိဗ္ဗာယတီ’’တိ။ နနု အရဟာ နေဝ ပဇဟတိ န ဥပါဒိယတိ ပဇဟိတွာ ဌိတော, နေဝ ဝိသိနေတိ န ဥဿိနေတိ ဝိသိနေတွာ ဌိတော; နနု အရဟာ နေဝ ဝိဓူပေတိ န သန္ဓူပေတိ ဝိဓူပေတွာ ဌိတောတိ? အာမန္တာ။ ဟဉ္စိ အရဟာ နေဝ ဝိဓူပေတိ န သန္ဓူပေတိ ဝိဓူပေတွာ ဌိတော, နော စ ဝတ ရေ ဝတ္တဗ္ဗေ – ‘‘အရဟာ ကုသလစိတ္တော ပရိနိဗ္ဗာယတီ’’တိ။

၈၉၅. န ဝတ္တဗ္ဗံ – ‘‘အရဟာ ကုသလစိတ္တော ပရိနိဗ္ဗာယတီ’’တိ? အာမန္တာ။ နနု အရဟာ ဥပဋ္ဌိတဿတိ သတော သမ္ပဇာနော ပရိနိဗ္ဗာယတီတိ? အာမန္တာ။ ဟဉ္စိ အရဟာ ဥပဋ္ဌိတဿတိ သတော သမ္ပဇာနော ပရိနိဗ္ဗာယတိ, တေန ဝတ ရေ ဝတ္တဗ္ဗေ – ‘‘အရဟာ ကုသလစိတ္တော ပရိနိဗ္ဗာယတီ’’တိ။

ကုသလစိတ္တကထာ နိဋ္ဌိတာ။

၂၂. ဗာဝီသတိမဝဂ္ဂေါ

(၂၁၀) ၃. အာနေဉ္ဇကထာ

၈၉၆. အရဟာ အာနေဉ္ဇေ ဌိတော ပရိနိဗ္ဗာယတီတိ? အာမန္တာ။ နနု အရဟာ ပကတိစိတ္တေ ဌိတော ပရိနိဗ္ဗာယတီတိ? အာမန္တာ။ ဟဉ္စိ အရဟာ ပကတိစိတ္တေ ဌိတော ပရိနိဗ္ဗာယတိ, နော စ ဝတ ရေ ဝတ္တဗ္ဗေ – ‘‘အရဟာ အာနေဉ္ဇေ ဌိတော ပရိနိဗ္ဗာယတီ’’တိ။

အရဟာ အာနေဉ္ဇေ ဌိတော ပရိနိဗ္ဗာယတီတိ? အာမန္တာ။ အရဟာ ကိရိယမယေ စိတ္တေ ဌိတော ပရိနိဗ္ဗာယတီတိ? န ဟေဝံ ဝတ္တဗ္ဗေ။ပေ.။ နနု အရဟာ ဝိပါကစိတ္တေ ဌိတော ပရိနိဗ္ဗာယတီတိ? အာမန္တာ။ ဟဉ္စိ အရဟာ ဝိပါကစိတ္တေ ဌိတော ပရိနိဗ္ဗာယတိ, နော စ ဝတ ရေ ဝတ္တဗ္ဗေ – ‘‘အရဟာ အာနေဉ္ဇေ ဌိတော ပရိနိဗ္ဗာယတီ’’တိ။

အရဟာ အာနေဉ္ဇေ ဌိတော ပရိနိဗ္ဗာယတီတိ? အာမန္တာ။ အရဟာ ကိရိယာဗျာကတေ စိတ္တေ ဌိတော ပရိနိဗ္ဗာယတီတိ? န ဟေဝံ ဝတ္တဗ္ဗေ။ပေ.။ နနု အရဟာ ဝိပါကာဗျာကတေ စိတ္တေ ဌိတော ပရိနိဗ္ဗာယတီတိ? အာမန္တာ။ ဟဉ္စိ အရဟာ ဝိပါကာဗျာကတေ စိတ္တေ ဌိတော ပရိနိဗ္ဗာယတိ, နော စ ဝတ ရေ ဝတ္တဗ္ဗေ – ‘‘အရဟာ အာနေဉ္ဇေ ဌိတော ပရိနိဗ္ဗာယတီ’’တိ။

အရဟာ အာနေဉ္ဇေ ဌိတော ပရိနိဗ္ဗာယတီတိ? အာမန္တာ။ နနု ဘဂဝါ စတုတ္ထဇ္ဈာနာ ဝုဋ္ဌဟိတွာ သမနန္တရာ ပရိနိဗ္ဗုတောတိ [ဒီ. နိ. ၂.၂၁၉]? အာမန္တာ။ ဟဉ္စိ ဘဂဝါ စတုတ္ထဇ္ဈာနာ ဝုဋ္ဌဟိတွာ သမနန္တရာ ပရိနိဗ္ဗုတော, နော စ ဝတ ရေ ဝတ္တဗ္ဗေ – ‘‘အရဟာ အာနေဉ္ဇေ ဌိတော ပရိနိဗ္ဗာယတီ’’တိ။

အာနေဉ္ဇကထာ နိဋ္ဌိတာ။

၂၂. ဗာဝီသတိမဝဂ္ဂေါ

(၂၁၁) ၄. ဓမ္မာဘိသမယကထာ

၈၉၇. အတ္ထိ ဂဗ္ဘသေယျာယ ဓမ္မာဘိသမယောတိ? အာမန္တာ။ အတ္ထိ ဂဗ္ဘသေယျာယ ဓမ္မဒေသနာ, ဓမ္မဿဝနံ, ဓမ္မသာကစ္ဆာ, ပရိပုစ္ဆာ, သီလသမာဒါနံ , ဣန္ဒ္ရိယေသု ဂုတ္တဒွါရတာ, ဘောဇနေ မတ္တညုတာ, ပုဗ္ဗရတ္တာပရရတ္တံ ဇာဂရိယာနုယောဂေါတိ ? န ဟေဝံ ဝတ္တဗ္ဗေ။ပေ.။ နတ္ထိ ဂဗ္ဘသေယျာယ ဓမ္မဒေသနာ, ဓမ္မဿဝနံ။ပေ.။ ပုဗ္ဗရတ္တာပရရတ္တံ ဇာဂရိယာနုယောဂေါတိ? အာမန္တာ။ ဟဉ္စိ နတ္ထိ ဂဗ္ဘသေယျာယ ဓမ္မဒေသနာ, ဓမ္မဿဝနံ။ပေ.။ ပုဗ္ဗရတ္တာပရရတ္တံ ဇာဂရိယာနုယောဂေါ, နော စ ဝတ ရေ ဝတ္တဗ္ဗေ – ‘‘အတ္ထိ ဂဗ္ဘသေယျာယ ဓမ္မာဘိသမယော’’တိ။

အတ္ထိ ဂဗ္ဘသေယျာယ ဓမ္မာဘိသမယောတိ? အာမန္တာ။ နနု ဒွေ ပစ္စယာ သမ္မာဒိဋ္ဌိယာ ဥပ္ပါဒါယ – ပရတော စ ဃောသော, ယောနိသော စ မနသိကာရောတိ? အာမန္တာ။ ဟဉ္စိ ဒွေ ပစ္စယာ သမ္မာဒိဋ္ဌိယာ ဥပ္ပါဒါယ – ပရတော စ ဃောသော, ယောနိသော စ မနသိကာရော, နော စ ဝတ ရေ ဝတ္တဗ္ဗေ – ‘‘အတ္ထိ ဂဗ္ဘသေယျာယ ဓမ္မာဘိသမယော’’တိ။

အတ္ထိ ဂဗ္ဘသေယျာယ ဓမ္မာဘိသမယောတိ? အာမန္တာ။ သုတ္တဿ ပမတ္တဿ မုဋ္ဌဿတိဿ အသမ္ပဇာနဿ ဓမ္မာဘိသမယောတိ? န ဟေဝံ ဝတ္တဗ္ဗေ။ပေ.။။

ဓမ္မာဘိသမယကထာ နိဋ္ဌိတာ။

၂၂. ဗာဝီသတိမဝဂ္ဂေါ

(၂၁၂-၄) ၅-၇. တိဿောပိကထာ

၈၉၈. အတ္ထိ ဂဗ္ဘသေယျာယ အရဟတ္တပ္ပတ္တီတိ? အာမန္တာ။ သုတ္တဿ ပမတ္တဿ မုဋ္ဌဿတိဿ အသမ္ပဇာနဿ အရဟတ္တပ္ပတ္တီတိ? န ဟေဝံ ဝတ္တဗ္ဗေ။ပေ.။။

၈၉၉. အတ္ထိ သုပိနဂတဿ ဓမ္မာဘိသမယောတိ? အာမန္တာ။ သုတ္တဿ ပမတ္တဿ မုဋ္ဌဿတိဿ အသမ္ပဇာနဿ ဓမ္မာဘိသမယောတိ? န ဟေဝံ ဝတ္တဗ္ဗေ။ပေ.။။

၉၀၀. အတ္ထိ သုပိနဂတဿ အရဟတ္တပ္ပတ္တီတိ? အာမန္တာ။ သုတ္တဿ ပမတ္တဿ မုဋ္ဌဿတိဿ အသမ္ပဇာနဿ အရဟတ္တပ္ပတ္တီတိ? န ဟေဝံ ဝတ္တဗ္ဗေ။ပေ.။။

တိဿောပိကထာ နိဋ္ဌိတာ။

၂၂. ဗာဝီသတိမဝဂ္ဂေါ

(၂၁၅) ၈. အဗျာကတကထာ

၉၀၁. သဗ္ဗံ သုပိနဂတဿ စိတ္တံ အဗျာကတန္တိ? အာမန္တာ။ သုပိနန္တေန ပါဏံ ဟနေယျာတိ? အာမန္တာ။ ဟဉ္စိ သုပိနန္တေန ပါဏံ ဟနေယျ, နော စ ဝတ ရေ ဝတ္တဗ္ဗေ – ‘‘သဗ္ဗံ သုပိနဂတဿ စိတ္တံ အဗျာကတ’’န္တိ။

သုပိနန္တေန အဒိန္နံ အာဒိယေယျ။ပေ.။ မုသာ ဘဏေယျ, ပိသုဏံ ဘဏေယျ, ဖရုသံ ဘဏေယျ, သမ္ဖံ ပလပေယျ, သန္ဓိံ ဆိန္ဒေယျ, နိလ္လောပံ ဟရေယျ, ဧကာဂါရိကံ ကရေယျ, ပရိပန္ထေ တိဋ္ဌေယျ, ပရဒါရံ ဂစ္ဆေယျ, ဂါမဃာတကံ ကရေယျ, နိဂမဃာတကံ ကရေယျ, သုပိနန္တေန မေထုနံ ဓမ္မံ ပဋိသေဝေယျ , သုပိနဂတဿ အသုစိ မုစ္စေယျ, သုပိနန္တေန ဒါနံ ဒဒေယျ, စီဝရံ ဒဒေယျ, ပိဏ္ဍပါတံ ဒဒေယျ, သေနာသနံ ဒဒေယျ, ဂိလာနပစ္စယဘေသဇ္ဇပရိက္ခာရံ ဒဒေယျ, ခါဒနီယံ ဒဒေယျ, ဘောဇနီယံ ဒဒေယျ, ပါနီယံ ဒဒေယျ, စေတိယံ ဝန္ဒေယျ, စေတိယေ မာလံ အာရောပေယျ, ဂန္ဓံ အာရောပေယျ , ဝိလေပနံ အာရောပေယျ။ပေ.။ စေတိယံ အဘိဒက္ခိဏံ ကရေယျာတိ? အာမန္တာ ။ ဟဉ္စိ သုပိနန္တေန စေတိယံ အဘိဒက္ခိဏံ ကရေယျ, နော စ ဝတ ရေ ဝတ္တဗ္ဗေ – ‘‘သဗ္ဗံ သုပိနဂတဿ စိတ္တံ အဗျာကတ’’န္တိ။

၉၀၂. န ဝတ္တဗ္ဗံ – ‘‘သဗ္ဗံ သုပိနဂတဿ စိတ္တံ အဗျာကတ’’န္တိ? အာမန္တာ။ နနု သုပိနဂတဿ စိတ္တံ အဗ္ဗောဟာရိယံ ဝုတ္တံ ဘဂဝတာတိ? အာမန္တာ။ ဟဉ္စိ သုပိနဂတဿ စိတ္တံ အဗ္ဗောဟာရိယံ ဝုတ္တံ ဘဂဝတာ, တေန ဝတ ရေ ဝတ္တဗ္ဗေ – ‘‘သဗ္ဗံ သုပိနဂတဿ စိတ္တံ အဗျာကတ’’န္တိ။

အဗျာကတကထာ နိဋ္ဌိတာ။

၂၂. ဗာဝီသတိမဝဂ္ဂေါ

(၂၁၆) ၉. အာသေဝနပစ္စယကထာ

၉၀၃. နတ္ထိ ကာစိ အာသေဝနပစ္စယတာတိ? အာမန္တာ။ နနု ဝုတ္တံ ဘဂဝတာ – ‘‘ပါဏာတိပါတော, ဘိက္ခဝေ, အာသေဝိတော ဘာဝိတော ဗဟုလီကတော နိရယသံဝတ္တနိကော တိရစ္ဆာနယောနိသံဝတ္တနိကော ပေတ္တိဝိသယသံဝတ္တနိကော, ယော သဗ္ဗလဟုသော ပါဏာတိပါတဿ ဝိပါကော မနုဿဘူတဿ အပ္ပါယုကသံဝတ္တနိကော ဟောတီ’’တိ [အ. နိ. ၈.၄၀]။ အတ္ထေဝ သုတ္တန္တောတိ? အာမန္တာ။ တေန ဟိ အတ္ထိ ကာစိ အာသေဝနပစ္စယတာတိ။

နတ္ထိ ကာစိ အာသေဝနပစ္စယတာတိ? အာမန္တာ။ နနု ဝုတ္တံ ဘဂဝတာ – ‘‘အဒိန္နာဒါနံ, ဘိက္ခဝေ, အာသေဝိတံ ဘာဝိတံ ဗဟုလီကတံ နိရယသံဝတ္တနိကံ တိရစ္ဆာနယောနိသံဝတ္တနိကံ ပေတ္တိဝိသယသံဝတ္တနိကံ, ယော သဗ္ဗလဟုသော အဒိန္နာဒါနဿ ဝိပါကော မနုဿဘူတဿ ဘောဂဗျသနသံဝတ္တနိကော ဟောတိ။ပေ.။ ယော သဗ္ဗလဟုသော ကာမေသုမိစ္ဆာစာရဿ ဝိပါကော မနုဿဘူတဿ သပတ္တဝေရသံဝတ္တနိကော ဟောတိ။ပေ.။ ယော သဗ္ဗလဟုသော မုသာဝါဒဿ ဝိပါကော မနုဿဘူတဿ အဗ္ဘူတဗ္ဘက္ခာနသံဝတ္တနိကော ဟောတိ။ပေ.။ ယော သဗ္ဗလဟုသော ပိသုဏာယ ဝါစာယ ဝိပါကော မနုဿဘူတဿ မိတ္တေဟိ ဘေဒနသံဝတ္တနိကော ဟောတိ။ပေ.။ ယော သဗ္ဗလဟုသော ဖရုသာယ ဝါစာယ ဝိပါကော မနုဿဘူတဿ အမနာပသဒ္ဒသံဝတ္တနိကော ဟောတိ။ပေ.။ ယော သဗ္ဗလဟုသော သမ္ဖပ္ပလာပဿ ဝိပါကော မနုဿဘူတဿ အနာဒေယျဝါစာသံဝတ္တနိကော ဟောတိ, သုရာမေရယပါနံ, ဘိက္ခဝေ, အာသေဝိတံ။ပေ.။ ယော သဗ္ဗလဟုသော သုရာမေရယပါနဿ ဝိပါကော မနုဿဘူတဿ ဥမ္မတ္တကသံဝတ္တနိကော ဟောတီ’’တိ [အ. နိ. ၈.၄၀]! အတ္ထေဝ သုတ္တန္တောတိ? အာမန္တာ။ တေန ဟိ အတ္ထိ ကာစိ အာသေဝနပစ္စယတာတိ။

၉၀၄. နတ္ထိ ကာစိ အာသေဝနပစ္စယတာတိ? အာမန္တာ။ နနု ဝုတ္တံ ဘဂဝတာ – ‘‘မိစ္ဆာဒိဋ္ဌိ, ဘိက္ခဝေ, အာသေဝိတာ ဘာဝိတာ ဗဟုလီကတာ နိရယသံဝတ္တနိကာ တိရစ္ဆာနယောနိသံဝတ္တနိကာ ပေတ္တိဝိသယသံဝတ္တနိကာ’’တိ။ အတ္ထေဝ သုတ္တန္တောတိ? အာမန္တာ။ တေန ဟိ အတ္ထိ ကာစိ အာသေဝနပစ္စယတာတိ။

နတ္ထိ ကာစိ အာသေဝနပစ္စယတာတိ? အာမန္တာ။ နနု ဝုတ္တံ ဘဂဝတာ – ‘‘မိစ္ဆာသင်္ကပ္ပော။ပေ.။ မိစ္ဆာသမာဓိ, ဘိက္ခဝေ, အာသေဝိတော ဘာဝိတော။ပေ.။ ပေတ္တိဝိသယသံဝတ္တနိကော’’တိ! အတ္ထေဝ သုတ္တန္တောတိ ? အာမန္တာ။ တေန ဟိ အတ္ထိ ကာစိ အာသေဝနပစ္စယတာတိ။

၉၀၅. နတ္ထိ ကာစိ အာသေဝနပစ္စယတာတိ? အာမန္တာ။ နနု ဝုတ္တံ ဘဂဝတာ – ‘‘သမ္မာဒိဋ္ဌိ, ဘိက္ခဝေ, အာသေဝိတာ ဘာဝိတာ ဗဟုလီကတာ အမတောဂဓါ ဟောတိ အမတပရာယနာ အမတပရိယောသာနာ’’တိ! အတ္ထေဝ သုတ္တန္တောတိ? အာမန္တာ။ တေန ဟိ အတ္ထိ ကာစိ အာသေဝနပစ္စယတာတိ။

နတ္ထိ ကာစိ အာသေဝနပစ္စယတာတိ? အာမန္တာ။ နနု ဝုတ္တံ ဘဂဝတာ – ‘‘သမ္မာသင်္ကပ္ပော, ဘိက္ခဝေ, အာသေဝိတော ဘာဝိတော ဗဟုလီကတော။ပေ.။ သမ္မာသမာဓိ, ဘိက္ခဝေ, အာသေဝိတော ဘာဝိတော ဗဟုလီကတော အမတောဂဓေါ ဟောတိ အမတပရာယနော အမတပရိယောသာနော’’တိ အတ္ထေဝ သုတ္တန္တောတိ, အာမန္တာ။ တေန ဟိ အတ္ထိ ကာစိ အာသေဝနပစ္စယတာတိ။

အာသေဝနပစ္စယကထာ နိဋ္ဌိတာ။

၂၂. ဗာဝီသတိမဝဂ္ဂေါ

(၂၁၇) ၁၀. ခဏိကကထာ

၉၀၆. ဧကစိတ္တက္ခဏိကာ သဗ္ဗေ ဓမ္မာတိ? အာမန္တာ။ စိတ္တေ မဟာပထဝီ သဏ္ဌာတိ, မဟာသမုဒ္ဒေါ သဏ္ဌာတိ, သိနေရုပဗ္ဗတရာဇာ သဏ္ဌာတိ, အာပေါ သဏ္ဌာတိ, တေဇော သဏ္ဌာတိ, ဝါယော သဏ္ဌာတိ, တိဏကဋ္ဌဝနပ္ပတယော သဏ္ဌဟန္တီတိ? န ဟေဝံ ဝတ္တဗ္ဗေ။ပေ.။။

ဧကစိတ္တက္ခဏိကာ သဗ္ဗေ ဓမ္မာတိ? အာမန္တာ။ စက္ခာယတနံ စက္ခုဝိညာဏေန သဟဇာတန္တိ? န ဟေဝံ ဝတ္တဗ္ဗေ။ပေ.။ စက္ခာယတနံ စက္ခုဝိညာဏေန သဟဇာတန္တိ? အာမန္တာ။ နနု အာယသ္မာ သာရိပုတ္တော ဧတဒဝေါစ – ‘‘အဇ္ဈတ္တိကဉ္စေဝ, အာဝုသော, စက္ခုံ အပရိဘိန္နံ ဟောတိ, ဗာဟိရာ စ ရူပါ န အာပါထံ အာဂစ္ဆန္တိ, နော စ တဇ္ဇော သမန္နာဟာရော ဟောတိ, နေဝ တာဝ တဇ္ဇဿ ဝိညာဏဘာဂဿ [ဝိညာဏဘာဝဿ (ဗဟူသု)] ပါတုဘာဝေါ ဟောတိ။ အဇ္ဈတ္တိကဉ္စေဝ, အာဝုသော, စက္ခုံ အပရိဘိန္နံ ဟောတိ, ဗာဟိရာ စ ရူပါ အာပါထံ အာဂစ္ဆန္တိ, နော စ တဇ္ဇော သမန္နာဟာရော ဟောတိ, နေဝ တာဝ တဇ္ဇဿ ဝိညာဏဘာဂဿ ပါတုဘာဝေါ ဟောတိ။ ယတော စ ခေါ, အာဝုသော, အဇ္ဈတ္တိကဉ္စေဝ စက္ခုံ အပရိဘိန္နံ ဟောတိ , ဗာဟိရာ စ ရူပါ အာပါထံ အာဂစ္ဆန္တိ, တဇ္ဇော စ သမန္နာဟာရော ဟောတိ, ဧဝံ တဇ္ဇဿ ဝိညာဏဘာဂဿ ပါတုဘာဝေါ ဟောတီ’’တိ [မ. နိ. ၁.၃၀၆]! အတ္ထေဝ သုတ္တန္တောတိ? အာမန္တာ။ တေန ဟိ န ဝတ္တဗ္ဗံ – ‘‘စက္ခာယတနံ စက္ခုဝိညာဏေန သဟဇာတ’’န္တိ။

သောတာယတနံ။ပေ.။ ဃာနာယတနံ။ပေ.။ ဇိဝှာယတနံ။ပေ.။ ကာယာယတနံ ကာယဝိညာဏေန သဟဇာတန္တိ? န ဟေဝံ ဝတ္တဗ္ဗေ။ပေ.။ ကာယာယတနံ ကာယဝိညာဏေန သဟဇာတန္တိ? အာမန္တာ။ နနု အာယသ္မာ သာရိပုတ္တော ဧတဒဝေါစ – ‘‘အဇ္ဈတ္တိကော စေဝ, အာဝုသော, ကာယော အပရိဘိန္နော ဟောတိ, ဗာဟိရာ စ ဖောဋ္ဌဗ္ဗာ န အာပါထံ အာဂစ္ဆန္တိ, နော စ။ပေ.။ အဇ္ဈတ္တိကော စေဝ, အာဝုသော, ကာယော အပရိဘိန္နော ဟောတိ, ဗာဟိရာ စ ဖောဋ္ဌဗ္ဗာ အာပါထံ အာဂစ္ဆန္တိ, နော စ။ပေ.။ ယတော စ ခေါ, အာဝုသော, အဇ္ဈတ္တိကော စေဝ ကာယော အပရိဘိန္နော ဟောတိ, ဗာဟိရာ စ ဖောဋ္ဌဗ္ဗာ အာပါထံ အာဂစ္ဆန္တိ, တဇ္ဇော စ သမန္နာဟာရော ဟောတိ, ဧဝံ တဇ္ဇဿ ဝိညာဏဘာဂဿ ပါတုဘာဝေါ ဟောတီ’’တိ [မ. နိ. ၁.၃၀၆]! အတ္ထေဝ သုတ္တန္တောတိ? အာမန္တာ။ တေန ဟိ န ဝတ္တဗ္ဗံ – ‘‘ကာယာယတနံ ကာယဝိညာဏေန သဟဇာတ’’န္တိ။

၉၀၇. န ဝတ္တဗ္ဗံ – ‘‘ဧကစိတ္တက္ခဏိကာ သဗ္ဗေ ဓမ္မာ’’တိ? အာမန္တာ။ သဗ္ဗေ ဓမ္မာ နိစ္စာ ဓုဝါ သဿတာ အဝိပရိဏာမဓမ္မာတိ? န ဟေဝံ ဝတ္တဗ္ဗေ။ တေန ဟိ ဧကစိတ္တက္ခဏိကာ သဗ္ဗေ ဓမ္မာတိ။

ခဏိကကထာ နိဋ္ဌိတာ။

ဗာဝီသတိမဝဂ္ဂေါ။

တဿုဒ္ဒါနံ –

အတ္ထိ ကိဉ္စိ သံယောဇနံ အပ္ပဟာယ ပရိနိဗ္ဗာနံ, အရဟာ ကုသလစိတ္တော ပရိနိဗ္ဗာယတိ, အရဟာ အာနေဉ္ဇေ ဌိတော ပရိနိဗ္ဗာယတိ, အတ္ထိ ဂဗ္ဘသေယျာယ ဓမ္မာဘိသမယော, အတ္ထိ ဂဗ္ဘသေယျာယ အရဟတ္တပ္ပတ္တိ, အတ္ထိ သုပိနဂတဿ ဓမ္မာဘိသမယော, အတ္ထိ သုပိနဂတဿ အရဟတ္တပ္ပတ္တိ, သဗ္ဗံ သုပိနဂတဿ စိတ္တံ အဗျာကတံ, နတ္ထိ ကာစိ အာသေဝနပစ္စယတာ, ဧကစိတ္တက္ခဏိကာ သဗ္ဗေ ဓမ္မာတိ။