ဧကဝီသတိမဝဂ္ဂ

၂၁. ဧကဝီသတိမဝဂ္ဂ

(၂၀၀) ၁. သာသနကထာ

၈၇၈. သာသနံ နဝံ ကတန္တိ? အာမန္တာ။ သတိပဋ္ဌာနာ နဝံ ကတာတိ? န ဟေဝံ ဝတ္တဗ္ဗေ။ပေ.။ သာသနံ နဝံ ကတန္တိ? အာမန္တာ။ သမ္မပ္ပဓါနာ။ပေ.။ ဣဒ္ဓိပါဒါ။ပေ.။ ဣန္ဒ္ရိယာ။ပေ.။ ဗလာ။ပေ.။ ဗောဇ္ဈင်္ဂါ နဝံ ကတာတိ? န ဟေဝံ ဝတ္တဗ္ဗေ။ပေ.။ ပုဗ္ဗေ အကုသလံ ပစ္ဆာ ကုသလံ ကတန္တိ? န ဟေဝံ ဝတ္တဗ္ဗေ။ပေ.။ ပုဗ္ဗေ သာသဝံ။ပေ.။ သံယောဇနိယံ ဂန္ထနိယံ ဩဃနိယံ ယောဂနိယံ နီဝရဏိယံ ပရာမဋ္ဌံ ဥပါဒါနိယံ။ပေ.။ သံကိလေသိကံ ပစ္ဆာ အသံကိလေသိကံ ကတန္တိ? န ဟေဝံ ဝတ္တဗ္ဗေ။ပေ.။။

အတ္ထိ ကောစိ တထာဂတဿ သာသနံ နဝံ ကရောတီတိ? အာမန္တာ။ အတ္ထိ ကောစိ သတိပဋ္ဌာနေ နဝံ ကရောတီတိ? န ဟေဝံ ဝတ္တဗ္ဗေ။ပေ.။ အတ္ထိ ကောစိ သမ္မပ္ပဓါနေ။ပေ.။ ဣဒ္ဓိပါဒေ။ပေ.။ ဣန္ဒ္ရိယေ။ပေ.။ ဗလေ။ပေ.။ ဗောဇ္ဈင်္ဂေ နဝံ ကရောတီတိ? န ဟေဝံ ဝတ္တဗ္ဗေ။ပေ.။ အတ္ထိ ကောစိ ပုဗ္ဗေ အကုသလံ ပစ္ဆာ ကုသလံ ကရောတီတိ? န ဟေဝံ ဝတ္တဗ္ဗေ။ပေ.။ အတ္ထိ ကောစိ ပုဗ္ဗေ သာသဝံ။ပေ.။ သံကိလေသိကံ ပစ္ဆာ အသံကိလေသိယံ ကရောတီတိ? န ဟေဝံ ဝတ္တဗ္ဗေ။ပေ.။။

လဗ္ဘာ တထာဂတဿ သာသနံ ပုန နဝံ ကာတုန္တိ? အာမန္တာ။ လဗ္ဘာ သတိပဋ္ဌာနာ ပုန နဝံ ကာတုန္တိ? န ဟေဝံ ဝတ္တဗ္ဗေ။ပေ.။ လဗ္ဘာ သမ္မပ္ပဓါနာ။ပေ.။ ဣဒ္ဓိပါဒါ။ပေ.။ ဣန္ဒ္ရိယာ။ပေ.။ ဗလာ။ပေ.။ ဗောဇ္ဈင်္ဂါ ပုန နဝံ ကာတုန္တိ? န ဟေဝံ ဝတ္တဗ္ဗေ။ပေ.။ လဗ္ဘာ ပုဗ္ဗေ အကုသလံ ပစ္ဆာ ကုသလံ ကာတုန္တိ? န ဟေဝံ ဝတ္တဗ္ဗေ။ပေ.။ လဗ္ဘာ ပုဗ္ဗေ သာသဝံ။ပေ.။ သံကိလေသိယံ ပစ္ဆာ အသံကိလေသိယံ ကာတုန္တိ? န ဟေဝံ ဝတ္တဗ္ဗေ။ပေ.။။

သာသနကထာ နိဋ္ဌိတာ။

၂၁. ဧကဝီသတိမဝဂ္ဂေါ

(၂၀၁) ၂. အဝိဝိတ္တကထာ

၈၇၉. ပုထုဇ္ဇနော တေဓါတုကေဟိ ဓမ္မေဟိ အဝိဝိတ္တောတိ? အာမန္တာ။ ပုထုဇ္ဇနော တေဓါတုကေဟိ ဖဿေဟိ။ပေ.။ တေဓါတုကာဟိ ဝေဒနာဟိ။ သညာဟိ ။ စေတနာဟိ။ စိတ္တေဟိ။ သဒ္ဓါဟိ။ ဝီရိယေဟိ။ သတီဟိ။ သမာဓီဟိ။ပေ.။ တေဓါတုကာဟိ ပညာဟိ အဝိဝိတ္တောတိ? န ဟေဝံ ဝတ္တဗ္ဗေ။ပေ.။။

ပုထုဇ္ဇနော တေဓါတုကေဟိ ကမ္မေဟိ အဝိဝိတ္တောတိ? အာမန္တာ။ ယသ္မိံ ခဏေ ပုထုဇ္ဇနော စီဝရံ ဒေတိ, တသ္မိံ ခဏေ ပဌမံ ဈာနံ ဥပသမ္ပဇ္ဇ ဝိဟရတိ။ပေ.။ အာကာသာနဉ္စာယတနံ ဥပသမ္ပဇ္ဇ ဝိဟရတီတိ? န ဟေဝံ ဝတ္တဗ္ဗေ။ပေ.။ ယသ္မိံ ခဏေ ပုထုဇ္ဇနော ပိဏ္ဍပါတံ ဒေတိ။ပေ.။ သေနာသနံ ဒေတိ။ပေ.။ ဂိလာနပစ္စယဘေသဇ္ဇပရိက္ခာရံ ဒေတိ, တသ္မိံ ခဏေ စတုတ္ထံ ဈာနံ ဥပသမ္ပဇ္ဇ ဝိဟရတိ။ နေဝသညာနာသညာယတနံ ဥပသမ္ပဇ္ဇ ဝိဟရတီတိ? န ဟေဝံ ဝတ္တဗ္ဗေ။ပေ.။။

၈၈၀. န ဝတ္တဗ္ဗံ – ‘‘ပုထုဇ္ဇနော တေဓါတုကေဟိ ကမ္မေဟိ အဝိဝိတ္တော’’တိ? အာမန္တာ ။ ပုထုဇ္ဇနဿ ရူပဓါတုအရူပဓါတူပဂံ ကမ္မံ ပရိညာတန္တိ? န ဟေဝံ ဝတ္တဗ္ဗေ။ တေန ဟိ ပုထုဇ္ဇနော တေဓါတုကေဟိ ကမ္မေဟိ အဝိဝိတ္တောတိ။ပေ.။။

အဝိဝိတ္တကထာ နိဋ္ဌိတာ။

၂၁. ဧကဝီသတိမဝဂ္ဂေါ

(၂၀၂) ၃. သံယောဇနကထာ

၈၈၁. အတ္ထိ ကိဉ္စိ သံယောဇနံ အပ္ပဟာယ အရဟတ္တပ္ပတ္တီတိ? အာမန္တာ။ အတ္ထိ ကိဉ္စိ သက္ကာယဒိဋ္ဌိံ အပ္ပဟာယ။ပေ.။ ဝိစိကိစ္ဆံ အပ္ပဟာယ။ပေ.။ သီလဗ္ဗတပရာမာသံ အပ္ပဟာယ။ ရာဂံ အပ္ပဟာယ။ ဒေါသံ အပ္ပဟာယ။ မောဟံ အပ္ပဟာယ။ အနောတ္တပ္ပံ အပ္ပဟာယ အရဟတ္တပ္ပတ္တီတိ? န ဟေဝံ ဝတ္တဗ္ဗေ။ပေ.။။

အတ္ထိ ကိဉ္စိ သံယောဇနံ အပ္ပဟာယ အရဟတ္တပ္ပတ္တီတိ? အာမန္တာ။ အရဟာ သရာဂေါ သဒေါသော သမောဟော သမာနော သမက္ခော သပဠာသော သဥပါယာသော သကိလေသောတိ? န ဟေဝံ ဝတ္တဗ္ဗေ။ပေ.။ နနု အရဟာ နိရာဂေါ နိဒ္ဒေါသော နိမ္မောဟော နိမ္မာနော နိမ္မက္ခော နိပ္ပဠာသော နိရုပါယာသော နိက္ကိလေသောတိ? အာမန္တာ။ ဟဉ္စိ အရဟာ နိရာဂေါ။ပေ.။ နိက္ကိလေသော, နော စ ဝတ ရေ ဝတ္တဗ္ဗေ – ‘‘အတ္ထိ ကိဉ္စိ သံယောဇနံ အပ္ပဟာယ အရဟတ္တပ္ပတ္တီ’’တိ။

၈၈၂. န ဝတ္တဗ္ဗံ – ‘‘အတ္ထိ ကိဉ္စိ သံယောဇနံ အပ္ပဟာယ အရဟတ္တပ္ပတ္တီ’’တိ ? အာမန္တာ။ အရဟာ သဗ္ဗံ ဗုဒ္ဓဝိသယံ ဇာနာတီတိ? န ဟေဝံ ဝတ္တဗ္ဗေ။ တေန ဟိ အတ္ထိ ကိဉ္စိ သံယောဇနံ အပ္ပဟာယ အရဟတ္တပ္ပတ္တီတိ။

သံယောဇနကထာ နိဋ္ဌိတာ။

၂၁. ဧကဝီသတိမဝဂ္ဂေါ

(၂၀၃) ၄. ဣဒ္ဓိကထာ

၈၈၃. အတ္ထိ အဓိပ္ပါယဣဒ္ဓိ ဗုဒ္ဓါနံ ဝါ သာဝကာနံ ဝါတိ? အာမန္တာ။ ‘‘နိစ္စပဏ္ဏာ ရုက္ခာ ဟောန္တူ’’တိ – အတ္ထိ အဓိပ္ပါယဣဒ္ဓိ ဗုဒ္ဓါနံ ဝါ သာဝကာနံ ဝါတိ? န ဟေဝံ ဝတ္တဗ္ဗေ။ပေ.။ နိစ္စပုပ္ဖာ ရုက္ခာ ဟောန္တု။ပေ.။ နိစ္စဖလိကာ ရုက္ခာ ဟောန္တု။ နိစ္စံ ဇုဏှံ ဟောတု။ နိစ္စံ ခေမံ ဟောတု။ နိစ္စံ သုဘိက္ခံ ဟောတု။ ‘‘နိစ္စံ သုဝတ္ထိ [သုဝုဋ္ဌိကံ (သျာ.)] ဟောတူ’’တိ – အတ္ထိ အဓိပ္ပါယဣဒ္ဓိ ဗုဒ္ဓါနံ ဝါ သာဝကာနံ ဝါတိ? န ဟေဝံ ဝတ္တဗ္ဗေ။ပေ.။။

အတ္ထိ အဓိပ္ပါယဣဒ္ဓိ ဗုဒ္ဓါနံ ဝါ သာဝကာနံ ဝါတိ? အာမန္တာ ။ ‘‘ဥပ္ပန္နော ဖဿော မာ နိရုဇ္ဈီ’’တိ – အတ္ထိ အဓိပ္ပါယဣဒ္ဓိ ဗုဒ္ဓါနံ ဝါ သာဝကာနံ ဝါတိ? န ဟေဝံ ဝတ္တဗ္ဗေ။ပေ.။။

ဥပ္ပန္နာ ဝေဒနာ။ပေ.။ သညာ။ စေတနာ။ စိတ္တံ။ သဒ္ဓါ။ ဝီရိယံ။ သတိ။ သမာဓိ။ပေ.။ ပညာ မာ နိရုဇ္ဈီတိ – အတ္ထိ အဓိပ္ပါယဣဒ္ဓိ ဗုဒ္ဓါနံ ဝါ သာဝကာနံ ဝါတိ? န ဟေဝံ ဝတ္တဗ္ဗေ။ပေ.။။

အတ္ထိ အဓိပ္ပါယဣဒ္ဓိ ဗုဒ္ဓါနံ ဝါ သာဝကာနံ ဝါတိ? အာမန္တာ။ ‘‘ရူပံ နိစ္စံ ဟောတူ’’တိ – အတ္ထိ အဓိပ္ပါယဣဒ္ဓိ။ ဝေဒနာ။ပေ.။ သညာ။ပေ.။ သင်္ခါရာ။ပေ.။ ‘‘ဝိညာဏံ နိစ္စံ ဟောတူ’’တိ – အတ္ထိ အဓိပ္ပါယဣဒ္ဓိ ဗုဒ္ဓါနံ ဝါ သာဝကာနံ ဝါတိ? န ဟေဝံ ဝတ္တဗ္ဗေ။ပေ.။။

အတ္ထိ အဓိပ္ပါယဣဒ္ဓိ ဗုဒ္ဓါနံ ဝါ သာဝကာနံ ဝါတိ? အာမန္တာ။ ‘‘ဇာတိဓမ္မာ သတ္တာ မာ ဇာယိံသူ’’တိ အတ္ထိ။ပေ.။ ‘‘ဇရာဓမ္မာ သတ္တာ မာ ဇီရိံသူ’’တိ။ပေ.။ ‘‘ဗျာဓိဓမ္မာ သတ္တာ မာ ဗျာဓိယိံသူ’’တိ။ပေ.။ ‘‘မရဏဓမ္မာ သတ္တာ မာ မီယိံသူ’’တိ – အတ္ထိ အဓိပ္ပါယဣဒ္ဓိ ဗုဒ္ဓါနံ ဝါ သာဝကာနံ ဝါတိ? န ဟေဝံ ဝတ္တဗ္ဗေ။ပေ.။။

၈၈၄. န ဝတ္တဗ္ဗံ – ‘‘အတ္ထိ အဓိပ္ပါယဣဒ္ဓိ ဗုဒ္ဓါနံ ဝါ သာဝကာနံ ဝါ’’တိ? အာမန္တာ ။ နနု အာယသ္မာ ပိလိန္ဒဝစ္ဆော ရညော မာဂဓဿ သေနိယဿ ဗိမ္ဗိသာရဿ ပါသာဒံ ‘‘သုဝဏ္ဏ’’န္တ္ဝေဝ အဓိမုစ္စိ, သုဝဏ္ဏော စ ပန အာသီတိ [ပါရာ. ၆၂၁; မဟာဝ. ၂၇၁]? အာမန္တာ။ ဟဉ္စိ အာယသ္မာ ပိလိန္ဒဝစ္ဆော ရညော မာဂဓဿ သေနိယဿ ဗိမ္ဗိသာရဿ ပါသာဒံ သုဝဏ္ဏန္တ္ဝေဝ အဓိမုစ္စိ, သုဝဏ္ဏော စ ပန အာသိ, တေန ဝတ ရေ ဝတ္တဗ္ဗေ – ‘‘အတ္ထိ အဓိပ္ပါယဣဒ္ဓိ ဗုဒ္ဓါနံ ဝါ သာဝကာနံ ဝါ’’တိ။

ဣဒ္ဓိကထာ နိဋ္ဌိတာ။

၂၁. ဧကဝီသတိမဝဂ္ဂေါ

(၂၀၄) ၅. ဗုဒ္ဓကထာ

၈၈၅. အတ္ထိ ဗုဒ္ဓါနံ ဗုဒ္ဓေဟိ ဟီနာတိရေကတာတိ? အာမန္တာ။ သတိပဋ္ဌာနတောတိ? န ဟေဝံ ဝတ္တဗ္ဗေ ။ပေ.။ သမ္မပ္ပဓါနတော။ပေ.။ ဣဒ္ဓိပါဒတော။ ဣန္ဒ္ရိယတော။ ဗလတော။ ဗောဇ္ဈင်္ဂတော။ ဝသိဘာဝတော။ပေ.။ သဗ္ဗညုတဉာဏဒဿနတောတိ? န ဟေဝံ ဝတ္တဗ္ဗေ။ပေ.။။

ဗုဒ္ဓကထာ နိဋ္ဌိတာ။

၂၁. ဧကဝီသတိမဝဂ္ဂေါ

(၂၀၅) ၆. သဗ္ဗဒိသာကထာ

၈၈၆. သဗ္ဗာ ဒိသာ ဗုဒ္ဓါ တိဋ္ဌန္တီတိ? အာမန္တာ။ ပုရတ္ထိမာယ ဒိသာယ ဗုဒ္ဓေါ တိဋ္ဌတီတိ? န ဟေဝံ ဝတ္တဗ္ဗေ။ပေ.။ ပုရတ္ထိမာယ ဒိသာယ ဗုဒ္ဓေါ တိဋ္ဌတီတိ? အာမန္တာ။ ကိန္နာမော သော ဘဂဝါ, ကိံဇစ္စော, ကိံဂေါတ္တော, ကိန္နာမာ တဿ ဘဂဝတော မာတာပိတရော, ကိန္နာမံ တဿ ဘဂဝတော သာဝကယုဂံ, ကောနာမော တဿ ဘဂဝတော ဥပဋ္ဌာကော, ကီဒိသံ စီဝရံ ဓါရေတိ, ကီဒိသံ ပတ္တံ ဓါရေတိ, ကတရသ္မိံ ဂါမေ ဝါ နိဂမေ ဝါ နဂရေ ဝါ ရဋ္ဌေ ဝါ ဇနပဒေ ဝါတိ? န ဟေဝံ ဝတ္တဗ္ဗေ။ပေ.။။

ဒက္ခိဏာယ ဒိသာယ။ပေ.။ ပစ္ဆိမာယ ဒိသာယ။ပေ.။ ဥတ္တရာယ ဒိသာယ။ပေ.။ ဟေဋ္ဌိမာယ ဒိသာယ ဗုဒ္ဓေါ တိဋ္ဌတီတိ? န ဟေဝံ ဝတ္တဗ္ဗေ။ပေ.။ ဟေဋ္ဌိမာယ ဒိသာယ ဗုဒ္ဓေါ တိဋ္ဌတီတိ? အာမန္တာ။ ကိန္နာမော သော ဘဂဝါ။ပေ.။ ဇနပဒေ ဝါတိ? န ဟေဝံ ဝတ္တဗ္ဗေ။ပေ.။။

ဥပရိမာယ ဒိသာယ ဗုဒ္ဓေါ တိဋ္ဌတီတိ? န ဟေဝံ ဝတ္တဗ္ဗေ။ပေ.။။ ဥပရိမာယ ဒိသာယ ဗုဒ္ဓေါ တိဋ္ဌတီတိ? အာမန္တာ။ စာတုမဟာရာဇိကေ တိဋ္ဌတိ။ပေ.။ တာဝတိံသေ တိဋ္ဌတိ။ပေ.။ ယာမေ တိဋ္ဌတိ။ပေ.။ တုသိတေ တိဋ္ဌတိ။ပေ.။ နိမ္မာနရတိယာ တိဋ္ဌတိ။ပေ.။ ပရနိမ္မိတဝသဝတ္တိယာ တိဋ္ဌတိ။ပေ.။ ဗြဟ္မလောကေ တိဋ္ဌတီတိ? န ဟေဝံ ဝတ္တဗ္ဗေ။ပေ.။။

သဗ္ဗဒိသာကထာ နိဋ္ဌိတာ။

၂၁. ဧကဝီသတိမဝဂ္ဂေါ

(၂၀၆) ၇. ဓမ္မကထာ

၈၈၇. သဗ္ဗေ ဓမ္မာ နိယတာတိ? အာမန္တာ။ မိစ္ဆတ္တနိယတာတိ? န ဟေဝံ ဝတ္တဗ္ဗေ။ပေ.။ သမ္မတ္တနိယတာတိ? န ဟေဝံ ဝတ္တဗ္ဗေ။ပေ.။ နတ္ထိ အနိယတော ရာသီတိ? န ဟေဝံ ဝတ္တဗ္ဗေ။ပေ.။ နနု အတ္ထိ အနိယတော ရာသီတိ? အာမန္တာ ။ ဟဉ္စိ အတ္ထိ အနိယတော ရာသိ, နော စ ဝတ ရေ ဝတ္တဗ္ဗေ – ‘‘သဗ္ဗေ ဓမ္မာ နိယတာ’’တိ။

သဗ္ဗေ ဓမ္မာ နိယတာတိ? အာမန္တာ။ နနု တယော ရာသီ ဝုတ္တာ ဘဂဝတာ – မိစ္ဆတ္တနိယတော ရာသိ, သမ္မတ္တနိယတော ရာသိ, အနိယတော ရာသီတိ [ဓ. သ. တိကမာတိကာ ၁၅]? အာမန္တာ။ ဟဉ္စိ တယော ရာသီ ဝုတ္တာ ဘဂဝတာ – မိစ္ဆတ္တနိယတော ရာသိ, သမ္မတ္တနိယတော ရာသိ, အနိယတော ရာသိ, နော စ ဝတ ရေ ဝတ္တဗ္ဗေ – ‘‘သဗ္ဗေ ဓမ္မာ နိယတာ’’တိ။

ရူပံ ရူပဋ္ဌေန နိယတန္တိ? အာမန္တာ။ မိစ္ဆတ္တနိယတန္တိ? န ဟေဝံ ဝတ္တဗ္ဗေ။ပေ.။ သမ္မတ္တနိယတန္တိ? န ဟေဝံ ဝတ္တဗ္ဗေ။ပေ.။ ဝေဒနာ။ပေ.။ သညာ။ပေ.။ သင်္ခါရာ။ပေ.။ ဝိညာဏံ ဝိညာဏဋ္ဌေန နိယတန္တိ? အာမန္တာ။ မိစ္ဆတ္တနိယတန္တိ? န ဟေဝံ ဝတ္တဗ္ဗေ။ပေ.။ သမ္မတ္တနိယတန္တိ? န ဟေဝံ ဝတ္တဗ္ဗေ။ပေ.။။

၈၈၈. န ဝတ္တဗ္ဗံ – ရူပံ ရူပဋ္ဌေန နိယတံ။ပေ.။ ဝေဒနာ။ပေ.။ သညာ။ပေ.။ သင်္ခါရာ။ပေ.။ ဝိညာဏံ ဝိညာဏဋ္ဌေန နိယတန္တိ? အာမန္တာ။ ရူပံ ဝေဒနာ ဟောတိ။ပေ.။ သညာ ဟောတိ။ သင်္ခါရာ ဟောန္တိ။ ဝိညာဏံ ဟောတိ။ ဝေဒနာ။ပေ.။ သညာ။ပေ.။ သင်္ခါရာ။ပေ.။ ဝိညာဏံ ရူပံ ဟောတိ။ပေ.။ ဝေဒနာ ဟောတိ။ သညာ ဟောတိ။ သင်္ခါရာ ဟောန္တီတိ? န ဟေဝံ ဝတ္တဗ္ဗေ။ တေန ဟိ ရူပံ ရူပဋ္ဌေန နိယတံ, ဝေဒနာ။ပေ.။ သညာ။ပေ.။ သင်္ခါရာ။ပေ.။ ဝိညာဏံ ဝိညာဏဋ္ဌေန နိယတန္တိ။

ဓမ္မကထာ နိဋ္ဌိတာ။

၂၁. ဧကဝီသတိမဝဂ္ဂေါ

(၂၀၇) ၈. ကမ္မကထာ

၈၈၉. သဗ္ဗေ ကမ္မာ နိယတာတိ? အာမန္တာ။ မိစ္ဆတ္တနိယတာတိ? န ဟေဝံ ဝတ္တဗ္ဗေ။ပေ.။ သမ္မတ္တနိယတာတိ? န ဟေဝံ ဝတ္တဗ္ဗေ။ပေ.။ နတ္ထိ အနိယတော ရာသီတိ? န ဟေဝံ ဝတ္တဗ္ဗေ။ပေ.။ နနု အတ္ထိ အနိယတော ရာသီတိ? အာမန္တာ။ ဟဉ္စိ အတ္ထိ အနိယတော ရာသိ, နော စ ဝတ ရေ ဝတ္တဗ္ဗေ – ‘‘သဗ္ဗေ ကမ္မာ နိယတာ’’တိ။

သဗ္ဗေ ကမ္မာ နိယတာတိ? အာမန္တာ။ နနု တယော ရာသီ ဝုတ္တာ ဘဂဝတာ – မိစ္ဆတ္တနိယတော ရာသိ, သမ္မတ္တနိယတော ရာသိ, အနိယတော ရာသီတိ? အာမန္တာ။ ဟဉ္စိ တယော ရာသီ ဝုတ္တာ ဘဂဝတာ – မိစ္ဆတ္တနိယတော ရာသိ, သမ္မတ္တနိယတော ရာသိ, အနိယတော ရာသိ, နော စ ဝတ ရေ ဝတ္တဗ္ဗေ – ‘‘သဗ္ဗေ ကမ္မာ နိယတာ’’တိ။

၈၉၀. ဒိဋ္ဌဓမ္မဝေဒနီယံ ကမ္မံ ဒိဋ္ဌဓမ္မဝေဒနီယဋ္ဌေန နိယတန္တိ? အာမန္တာ။ မိစ္ဆတ္တနိယတန္တိ? န ဟေဝံ ဝတ္တဗ္ဗေ။ပေ.။ သမ္မတ္တနိယတန္တိ? န ဟေဝံ ဝတ္တဗ္ဗေ။ပေ.။။ ဥပပဇ္ဇဝေဒနီယံ ကမ္မံ။ပေ.။ အပရာပရိယဝေဒနီယံ ကမ္မံ အပရာပရိယဝေဒနီယဋ္ဌေန နိယတန္တိ? အာမန္တာ။ မိစ္ဆတ္တနိယတန္တိ? န ဟေဝံ ဝတ္တဗ္ဗေ။ပေ.။ သမ္မတ္တနိယတန္တိ? န ဟေဝံ ဝတ္တဗ္ဗေ။ပေ.။။

၈၉၁. န ဝတ္တဗ္ဗံ – ဒိဋ္ဌဓမ္မဝေဒနီယံ ကမ္မံ ဒိဋ္ဌဓမ္မဝေဒနီယဋ္ဌေန နိယတံ, ဥပပဇ္ဇဝေဒနီယံ ကမ္မံ။ပေ.။ အပရာပရိယဝေဒနီယံ ကမ္မံ အပရာပရိယဝေဒနီယဋ္ဌေန နိယတန္တိ? အာမန္တာ။ ဒိဋ္ဌဓမ္မဝေဒနီယံ ကမ္မံ ဥပပဇ္ဇဝေဒနီယံ ဟောတိ, အပရာပရိယဝေဒနီယံ ဟောတိ။ပေ.။ ဥပပဇ္ဇဝေဒနီယံ ကမ္မံ ဒိဋ္ဌဓမ္မဝေဒနီယံ ဟောတိ, အပရာပရိယဝေဒနီယံ ဟောတိ။ပေ.။ အပရာပရိယဝေဒနီယံ ကမ္မံ ဒိဋ္ဌဓမ္မဝေဒနီယံ ဟောတိ, ဥပပဇ္ဇဝေဒနီယံ ဟောတီတိ? န ဟေဝံ ဝတ္တဗ္ဗေ ။ တေန ဟိ ဒိဋ္ဌဓမ္မဝေဒနီယံ ကမ္မံ ဒိဋ္ဌဓမ္မဝေဒနီယဋ္ဌေန နိယတံ, ဥပပဇ္ဇဝေဒနီယံ ကမ္မံ။ပေ.။ အပရာပရိယဝေဒနီယံ ကမ္မံ အပရာပရိယဝေဒနီယဋ္ဌေန နိယတန္တိ။

ကမ္မကထာ နိဋ္ဌိတာ။

ဧကဝီသတိမဝဂ္ဂေါ။

တဿုဒ္ဒါနံ –

သာသနံ နဝံ ကတံ အတ္ထိ ကောစိ တထာဂတဿ သာသနံ နဝံ ကရောတိ လဗ္ဘာ တထာဂတဿ သာသနံ ပုန နဝံ ကာတုံ, ပုထုဇ္ဇနော တေဓါတုကေဟိ ဓမ္မေဟိ အဝိဝိတ္တော, အတ္ထိ ကိဉ္စိ သံယောဇနံ အပ္ပဟာယ အရဟတ္တပ္ပတ္တိ, အတ္ထိ အဓိပ္ပါယိဒ္ဓိ ဗုဒ္ဓါနံ ဝါ သာဝကာနံ ဝါ, အတ္ထိ ဗုဒ္ဓါနံ ဗုဒ္ဓေဟိ ဟီနာတိရေကတာ, သဗ္ဗာ ဒိသာ ဗုဒ္ဓါ တိဋ္ဌန္တိ, သဗ္ဗေ ဓမ္မာ နိယတာ, သဗ္ဗေ ကမ္မာ နိယတာတိ။