၁၉. ဧကူနဝီသတိမဝဂ္ဂ
(၁၈၆) ၁. ကိလေသဇဟနကထာ
၈၂၈. အတီတေ ကိလေသေ ဇဟတီတိ? အာမန္တာ။ နိရုဒ္ဓံ နိရောဓေတိ, ဝိဂတံ ဝိဂမေတိ, ခီဏံ ခေပေတိ, အတ္ထင်္ဂတံ အတ္ထင်္ဂမေတိ, အဗ္ဘတ္ထင်္ဂတံ အဗ္ဘတ္ထင်္ဂမေတီတိ? န ဟေဝံ ဝတ္တဗ္ဗေ။ပေ.။ အတီတေ ကိလေသေ ဇဟတီတိ? အာမန္တာ။ နနု အတီတံ နိရုဒ္ဓန္တိ? အာမန္တာ။ ဟဉ္စိ အတီတံ နိရုဒ္ဓံ , နော စ ဝတ ရေ ဝတ္တဗ္ဗေ – ‘‘အတီတေ ကိလေသေ ဇဟတီ’’တိ။ အတီတေ ကိလေသေ ဇဟတီတိ? အာမန္တာ။ နနု အတီတံ နတ္ထီတိ? အာမန္တာ။ ဟဉ္စိ အတီတံ နတ္ထိ, နော စ ဝတ ရေ ဝတ္တဗ္ဗေ – ‘‘အတီတေ ကိလေသေ ဇဟတီ’’တိ။
၈၂၉. အနာဂတေ ကိလေသေ ဇဟတီတိ? အာမန္တာ။ အဇာတံ အဇနေတိ, အသဉ္ဇာတံ အသဉ္ဇနေတိ, အနိဗ္ဗတ္တံ အနိဗ္ဗတ္တေတိ, အပါတုဘူတံ အပါတုဘာဝေတီတိ? န ဟေဝံ ဝတ္တဗ္ဗေ။ပေ.။ အနာဂတေ ကိလေသေ ဇဟတီတိ? အာမန္တာ။ နနု အနာဂတံ အဇာတန္တိ? အာမန္တာ။ ဟဉ္စိ အနာဂတံ အဇာတံ, နော စ ဝတ ရေ ဝတ္တဗ္ဗေ – ‘‘အနာဂတေ ကိလေသေ ဇဟတီ’’တိ ။ အနာဂတေ ကိလေသေ ဇဟတီတိ? အာမန္တာ။ နနု အနာဂတံ နတ္ထီတိ? အာမန္တာ။ ဟဉ္စိ အနာဂတံ နတ္ထိ, နော စ ဝတ ရေ ဝတ္တဗ္ဗေ – ‘‘အနာဂတေ ကိလေသေ ဇဟတီ’’တိ။
၈၃၀. ပစ္စုပ္ပန္နေ ကိလေသေ ဇဟတီတိ? အာမန္တာ။ ရတ္တော ရာဂံ ဇဟတိ, ဒုဋ္ဌော ဒေါသံ ဇဟတိ, မူဠ္ဟော မောဟံ ဇဟတိ, ကိလိဋ္ဌော ကိလေသေ ဇဟတီတိ? န ဟေဝံ ဝတ္တဗ္ဗေ။ပေ.။ ရာဂေန ရာဂံ ဇဟတိ, ဒေါသေန ဒေါသံ ဇဟတိ, မောဟေန မောဟံ ဇဟတိ, ကိလေသေဟိ ကိလေသေ ဇဟတီတိ? န ဟေဝံ ဝတ္တဗ္ဗေ။ပေ.။။
ရာဂေါ စိတ္တသမ္ပယုတ္တော, မဂ္ဂေါ စိတ္တသမ္ပယုတ္တောတိ? အာမန္တာ။ ဒွိန္နံ စိတ္တာနံ သမောဓါနံ ဟောတီတိ? န ဟေဝံ ဝတ္တဗ္ဗေ။ပေ.။။
ရာဂေါ အကုသလော, မဂ္ဂေါ ကုသလောတိ? အာမန္တာ။ ကုသလာကုသလာ သာဝဇ္ဇာနဝဇ္ဇာ ဟီနပဏီတာ ကဏှသုက္ကသပ္ပဋိဘာဂါ ဓမ္မာ သမ္မုခီဘာဝံ အာဂစ္ဆန္တီတိ? န ဟေဝံ ဝတ္တဗ္ဗေ။ပေ.။။
ကုသလာကုသလာ သာဝဇ္ဇာနဝဇ္ဇာ ဟီနပဏီတာ ကဏှသုက္ကသပ္ပဋိဘာဂါ ဓမ္မာ သမ္မုခီဘာဝံ အာဂစ္ဆန္တီတိ? အာမန္တာ။ နနု ဝုတ္တံ ဘဂဝတာ – ‘‘စတ္တာရိမာနိ, ဘိက္ခဝေ, သုဝိဒူရဝိဒူရာနိ! ကတမာနိ စတ္တာရိ? နဘဉ္စ, ဘိက္ခဝေ, ပထဝီ စ – ဣဒံ ပဌမံ သုဝိဒူရဝိဒူရံ။ပေ.။ တသ္မာ သတံ ဓမ္မော အသဗ္ဘိ အာရကာ’’တိ။ အတ္ထေဝ သုတ္တန္တောတိ? အာမန္တာ။ တေန ဟိ န ဝတ္တဗ္ဗံ – ‘‘ကုသလာကုသလာ။ပေ.။ သမ္မုခီဘာဝံ အာဂစ္ဆန္တီ’’တိ။
၈၃၁. န ဝတ္တဗ္ဗံ – ‘‘အတီတေ ကိလေသေ ဇဟတိ, အနာဂတေ ကိလေသေ ဇဟတိ, ပစ္စုပ္ပန္နေ ကိလေသေ ဇဟတီ’’တိ? အာမန္တာ။ နတ္ထိ ကိလေသေ ဇဟတီတိ ? န ဟေဝံ ဝတ္တဗ္ဗေ။ပေ.။ တေန ဟိ အတီတေ ကိလေသေ ဇဟတိ, အနာဂတေ ကိလေသေ ဇဟတိ, ပစ္စုပ္ပန္နေ ကိလေသေ ဇဟတီတိ။
ကိလေသဇဟနကထာ နိဋ္ဌိတာ။
၁၉. ဧကူနဝီသတိမဝဂ္ဂေါ
(၁၈၇) ၂. သုညတာကထာ
၈၃၂. သုညတာ သင်္ခါရက္ခန္ဓပရိယာပန္နာတိ? အာမန္တာ။ အနိမိတ္တံ သင်္ခါရက္ခန္ဓပရိယာပန္နန္တိ? န ဟေဝံ ဝတ္တဗ္ဗေ။ပေ.။ သုညတာ သင်္ခါရက္ခန္ဓပရိယာပန္နာတိ? အာမန္တာ။ အပ္ပဏိဟိတော သင်္ခါရက္ခန္ဓပရိယာပန္နောတိ? န ဟေဝံ ဝတ္တဗ္ဗေ။ပေ.။ အနိမိတ္တံ န ဝတ္တဗ္ဗံ – ‘‘သင်္ခါရက္ခန္ဓပရိယာပန္န’’န္တိ? အာမန္တာ။ သုညတာ န ဝတ္တဗ္ဗာ – ‘‘သင်္ခါရက္ခန္ဓပရိယာပန္နာ’’တိ? န ဟေဝံ ဝတ္တဗ္ဗေ။ပေ.။ အပ္ပဏိဟိတော န ဝတ္တဗ္ဗော – ‘‘သင်္ခါရက္ခန္ဓပရိယာပန္နော’’တိ? အာမန္တာ။ သုညတာ န ဝတ္တဗ္ဗာ – ‘‘သင်္ခါရက္ခန္ဓပရိယာပန္နာ’’တိ? န ဟေဝံ ဝတ္တဗ္ဗေ။ပေ.။။
သုညတာ သင်္ခါရက္ခန္ဓပရိယာပန္နာတိ? အာမန္တာ။ သင်္ခါရက္ခန္ဓော န အနိစ္စော န သင်္ခတော န ပဋိစ္စသမုပ္ပန္နော န ခယဓမ္မော န ဝယဓမ္မော န ဝိရာဂဓမ္မော န နိရောဓဓမ္မော န ဝိပရိဏာမဓမ္မောတိ? န ဟေဝံ ဝတ္တဗ္ဗေ။ပေ.။ နနု သင်္ခါရက္ခန္ဓော အနိစ္စော သင်္ခတော ပဋိစ္စသမုပ္ပန္နော ခယဓမ္မော ဝယဓမ္မော ဝိရာဂဓမ္မော နိရောဓဓမ္မော ဝိပရိဏာမဓမ္မောတိ? အာမန္တာ။ ဟဉ္စိ သင်္ခါရက္ခန္ဓော အနိစ္စော။ပေ.။ ဝိပရိဏာမဓမ္မော , နော စ ဝတ ရေ ဝတ္တဗ္ဗေ – ‘‘သုညတာ သင်္ခါရက္ခန္ဓပရိယာပန္နာ’’တိ။
၈၃၃. ရူပက္ခန္ဓဿ သုညတာ သင်္ခါရက္ခန္ဓပရိယာပန္နာတိ? အာမန္တာ။ သင်္ခါရက္ခန္ဓဿ သုညတာ ရူပက္ခန္ဓပရိယာပန္နာတိ? န ဟေဝံ ဝတ္တဗ္ဗေ။ပေ.။ ဝေဒနာက္ခန္ဓဿ။ပေ.။ သညာက္ခန္ဓဿ။ ဝိညာဏက္ခန္ဓဿ သုညတာ သင်္ခါရက္ခန္ဓပရိယာပန္နာတိ? အာမန္တာ။ သင်္ခါရက္ခန္ဓဿ သုညတာ ဝိညာဏက္ခန္ဓပရိယာပန္နာတိ? န ဟေဝံ ဝတ္တဗ္ဗေ။ပေ.။။
သင်္ခါရက္ခန္ဓဿ သုညတာ န ဝတ္တဗ္ဗာ – ‘‘ရူပက္ခန္ဓပရိယာပန္နာ’’တိ? အာမန္တာ။ ရူပက္ခန္ဓဿ သုညတာ န ဝတ္တဗ္ဗာ – ‘‘သင်္ခါရက္ခန္ဓပရိယာပန္နာ’’တိ? န ဟေဝံ ဝတ္တဗ္ဗေ။ပေ.။ သင်္ခါရက္ခန္ဓဿ သုညတာ န ဝတ္တဗ္ဗာ – ‘‘ဝေဒနာက္ခန္ဓပရိယာပန္နာ။ပေ.။ သညာက္ခန္ဓပရိယာပန္နာ။ ဝိညာဏက္ခန္ဓပရိယာပန္နာ’’တိ? အာမန္တာ။ ဝိညာဏက္ခန္ဓဿ သုညတာ န ဝတ္တဗ္ဗာ – ‘‘သင်္ခါရက္ခန္ဓပရိယာပန္နာ’’တိ? န ဟေဝံ ဝတ္တဗ္ဗေ။ပေ.။။
၈၃၄. န ဝတ္တဗ္ဗံ – သုညတာ သင်္ခါရက္ခန္ဓပရိယာပန္နာ’’တိ? အာမန္တာ။ နနု ဝုတ္တံ ဘဂဝတာ – ‘‘သုညမိဒံ, ဘိက္ခဝေ, သင်္ခါရာ အတ္တေန ဝါ အတ္တနိယေန ဝါ’’တိ [မ. နိ. ၃.၆၉ အာနေဉ္ဇသပ္ပါယေ]! အတ္ထေဝ သုတ္တန္တောတိ? အာမန္တာ။ တေန ဟိ သုညတာ သင်္ခါရက္ခန္ဓပရိယာပန္နာတိ။
သုညတာကထာ နိဋ္ဌိတာ။
၁၉. ဧကူနဝီသတိမဝဂ္ဂေါ
(၁၈၈) ၃ သာမညဖလကထာ
၈၃၅. သာမညဖလံ အသင်္ခတန္တိ? အာမန္တာ။ နိဗ္ဗာနံ တာဏံ လေဏံ သရဏံ ပရာယဏံ အစ္စုတံ အမတန္တိ? န ဟေဝံ ဝတ္တဗ္ဗေ။ပေ.။ သာမညဖလံ အသင်္ခတံ, နိဗ္ဗာနံ အသင်္ခတန္တိ? အာမန္တာ။ ဒွေ အသင်္ခတာနီတိ? န ဟေဝံ ဝတ္တဗ္ဗေ။ပေ.။ ဒွေ အသင်္ခတာနီတိ? အာမန္တာ။ ဒွေ တာဏာနိ။ပေ.။ အန္တရိကာ ဝါတိ? န ဟေဝံ ဝတ္တဗ္ဗေ။ပေ.။။
၈၃၆. သာမညဖလံ အသင်္ခတန္တိ? အာမန္တာ။ သာမညံ အသင်္ခတန္တိ? န ဟေဝံ ဝတ္တဗ္ဗေ ။ပေ.။ သာမညံ သင်္ခတန္တိ? အာမန္တာ။ သာမညဖလံ သင်္ခတန္တိ? န ဟေဝံ ဝတ္တဗ္ဗေ။ပေ.။။
သောတာပတ္တိဖလံ အသင်္ခတန္တိ? အာမန္တာ။ သောတာပတ္တိမဂ္ဂေါ အသင်္ခတောတိ? န ဟေဝံ ဝတ္တဗ္ဗေ။ပေ.။ သောတာပတ္တိမဂ္ဂေါ သင်္ခတောတိ? အာမန္တာ။ သောတာပတ္တိဖလံ သင်္ခတန္တိ? န ဟေဝံ ဝတ္တဗ္ဗေ။ပေ.။။
သကဒါဂါမိဖလံ။ပေ.။ အနာဂါမိဖလံ။ပေ.။ အရဟတ္တဖလံ အသင်္ခတန္တိ? အာမန္တာ။ အရဟတ္တမဂ္ဂေါ အသင်္ခတောတိ? န ဟေဝံ ဝတ္တဗ္ဗေ။ပေ.။ အရဟတ္တမဂ္ဂေါ သင်္ခတောတိ? အာမန္တာ။ အရဟတ္တဖလံ သင်္ခတန္တိ? န ဟေဝံ ဝတ္တဗ္ဗေ။ပေ.။။
သောတာပတ္တိဖလံ အသင်္ခတံ, သကဒါဂါမိဖလံ။ပေ.။ အနာဂါမိဖလံ ။ပေ.။ အရဟတ္တဖလံ အသင်္ခတံ, နိဗ္ဗာနံ အသင်္ခတန္တိ? အာမန္တာ။ ပဉ္စ အသင်္ခတာနီတိ? န ဟေဝံ ဝတ္တဗ္ဗေ။ပေ.။ ပဉ္စ အသင်္ခတာနီတိ? အာမန္တာ။ ပဉ္စ တာဏာနိ။ပေ.။ အန္တရိကာ ဝါတိ? န ဟေဝံ ဝတ္တဗ္ဗေ။ပေ.။။
သာမညဖလကထာ နိဋ္ဌိတာ။
၁၉. ဧကူနဝီသတိမဝဂ္ဂေါ
(၁၈၉) ၄. ပတ္တိကထာ
၈၃၇. ပတ္တိ အသင်္ခတာတိ? အာမန္တာ။ နိဗ္ဗာနံ တာဏံ လေဏံ သရဏံ ပရာယဏံ အစ္စုတံ အမတန္တိ? န ဟေဝံ ဝတ္တဗ္ဗေ။ပေ.။ ပတ္တိ အသင်္ခတာ, နိဗ္ဗာနံ အသင်္ခတန္တိ? အာမန္တာ။ ဒွေ အသင်္ခတာနီတိ? န ဟေဝံ ဝတ္တဗ္ဗေ။ပေ.။ ဒွေ အသင်္ခတာနီတိ? အာမန္တာ။ ဒွေ တာဏာနိ။ပေ.။ အန္တရိကာ ဝါတိ? န ဟေဝံ ဝတ္တဗ္ဗေ။ပေ.။။
၈၃၈. စီဝရဿ ပတ္တိ အသင်္ခတာတိ? အာမန္တာ။ နိဗ္ဗာနံ။ပေ.။ အမတန္တိ? န ဟေဝံ ဝတ္တဗ္ဗေ။ပေ.။ စီဝရဿ ပတ္တိ အသင်္ခတာ, နိဗ္ဗာနံ အသင်္ခတန္တိ? အာမန္တာ။ ဒွေ အသင်္ခတာနီတိ? န ဟေဝံ ဝတ္တဗ္ဗေ။ပေ.။ ဒွေ အသင်္ခတာနီတိ? အာမန္တာ။ ဒွေ တာဏာနိ။ပေ.။ အန္တရိကာ ဝါတိ? န ဟေဝံ ဝတ္တဗ္ဗေ။ပေ.။ ပိဏ္ဍပါတဿ။ပေ.။ သေနာသနဿ။ပေ.။ ဂိလာနပစ္စယဘေသဇ္ဇပရိက္ခာရဿ ပတ္တိ အသင်္ခတာတိ? အာမန္တာ။ နိဗ္ဗာနံ။ပေ.။ အစ္စုတံ အမတန္တိ? န ဟေဝံ ဝတ္တဗ္ဗေ။ပေ.။ ဂိလာနပစ္စယဘေသဇ္ဇပရိက္ခာရဿ ပတ္တိ အသင်္ခတာ, နိဗ္ဗာနံ အသင်္ခတန္တိ? အာမန္တာ။ ဒွေ အသင်္ခတာနီတိ? န ဟေဝံ ဝတ္တဗ္ဗေ။ပေ.။ ဒွေ အသင်္ခတာနီတိ? အာမန္တာ။ ဒွေ တာဏာနိ။ပေ.။ အန္တရိကာ ဝါတိ? န ဟေဝံ ဝတ္တဗ္ဗေ။ပေ.။။
စီဝရဿ ပတ္တိ အသင်္ခတာ။ပေ.။ ပိဏ္ဍပါတဿ။ပေ.။ သေနာသနဿ။ပေ.။ ဂိလာနပစ္စယဘေသဇ္ဇပရိက္ခာရဿ ပတ္တိ အသင်္ခတာ, နိဗ္ဗာနံ အသင်္ခတန္တိ? အာမန္တာ။ ပဉ္စ အသင်္ခတာနီတိ? န ဟေဝံ ဝတ္တဗ္ဗေ။ပေ.။ ပဉ္စ အသင်္ခတာနီတိ? အာမန္တာ။ ပဉ္စ တာဏာနိ။ပေ.။ အန္တရိကာ ဝါတိ? န ဟေဝံ ဝတ္တဗ္ဗေ။ပေ.။။
၈၃၉. ပဌမဿ ဈာနဿ ပတ္တိ အသင်္ခတာ (ဧဝံ သဗ္ဗံ ဝိတ္ထာရေတဗ္ဗံ) ဒုတိယဿ ဈာနဿ။ တတိယဿ ဈာနဿ။ စတုတ္ထဿ ဈာနဿ။ အာကာသာနဉ္စာယတနဿ။ ဝိညာဏဉ္စာယတနဿ။ အာကိဉ္စညာယတနဿ။ နေဝသညာနာသညာယတနဿ။ သောတာပတ္တိမဂ္ဂဿ။ သောတာပတ္တိဖလဿ။ သကဒါဂါမိမဂ္ဂဿ။ သကဒါဂါမိဖလဿ။ အနာဂါမိမဂ္ဂဿ။ အနာဂါမိဖလဿ။ အရဟတ္တမဂ္ဂဿ။ အရဟတ္တဖလဿ ပတ္တိ အသင်္ခတာတိ? အာမန္တာ။ နိဗ္ဗာနံ။ပေ.။ အစ္စုတံ အမတန္တိ? န ဟေဝံ ဝတ္တဗ္ဗေ။ပေ.။ အရဟတ္တဖလဿ ပတ္တိ အသင်္ခတာ, နိဗ္ဗာနံ အသင်္ခတန္တိ? အာမန္တာ ။ ဒွေ အသင်္ခတာနီတိ? န ဟေဝံ ဝတ္တဗ္ဗေ။ပေ.။ ဒွေ အသင်္ခတာနီတိ? အာမန္တာ။ ဒွေ တာဏာနိ။ပေ.။ အန္တရိကာ ဝါတိ? န ဟေဝံ ဝတ္တဗ္ဗေ။ပေ.။။
သောတာပတ္တိမဂ္ဂဿ ပတ္တိ အသင်္ခတာ။ သောတာပတ္တိဖလဿ ပတ္တိ အသင်္ခတာ။ အရဟတ္တမဂ္ဂဿ ပတ္တိ အသင်္ခတာ။ အရဟတ္တဖလဿ ပတ္တိ အသင်္ခတာ။ နိဗ္ဗာနံ အသင်္ခတန္တိ? အာမန္တာ။ နဝ အသင်္ခတာနီတိ? န ဟေဝံ ဝတ္တဗ္ဗေ။ပေ.။ နဝ အသင်္ခတာနီတိ? အာမန္တာ။ နဝ တာဏာနိ။ပေ.။ အန္တရိကာ ဝါတိ? န ဟေဝံ ဝတ္တဗ္ဗေ။ပေ.။။
၈၄၀. န ဝတ္တဗ္ဗံ – ပတ္တိ အသင်္ခတာတိ? အာမန္တာ။ ပတ္တိ ရူပံ ။ ဝေဒနာ။ သညာ။ သင်္ခါရာ။ ဝိညာဏန္တိ? န ဟေဝံ ဝတ္တဗ္ဗေ။ တေန ဟိ ပတ္တိ အသင်္ခတာတိ။
ပတ္တိကထာ နိဋ္ဌိတာ။
၁၉. ဧကူနဝီသတိမဝဂ္ဂေါ
(၁၉၀) ၅. တထတာကထာ
၈၄၁. သဗ္ဗဓမ္မာနံ တထတာ အသင်္ခတာတိ? အာမန္တာ။ နိဗ္ဗာနံ။ပေ.။ အမတန္တိ? န ဟေဝံ ဝတ္တဗ္ဗေ။ပေ.။ သဗ္ဗဓမ္မာနံ တထတာ အသင်္ခတာ, နိဗ္ဗာနံ အသင်္ခတန္တိ ? အာမန္တာ။ ဒွေ အသင်္ခတာနီတိ? န ဟေဝံ ဝတ္တဗ္ဗေ။ပေ.။ ဒွေ အသင်္ခတာနီတိ? အာမန္တာ။ ဒွေ တာဏာနိ။ပေ.။ အန္တရိကာ ဝါတိ? န ဟေဝံ ဝတ္တဗ္ဗေ။ပေ.။။
၈၄၂. ရူပဿ ရူပတာ, နနု ရူပတာ အသင်္ခတာတိ? အာမန္တာ။ နိဗ္ဗာနံ။ပေ.။ အမတန္တိ? န ဟေဝံ ဝတ္တဗ္ဗေ။ပေ.။ ရူပဿ ရူပတာ, နနု ရူပတာ အသင်္ခတာ, နိဗ္ဗာနံ အသင်္ခတန္တိ? အာမန္တာ။ ဒွေ အသင်္ခတာနီတိ? န ဟေဝံ ဝတ္တဗ္ဗေ။ပေ.။ ဒွေ အသင်္ခတာနီတိ? အာမန္တာ။ ဒွေ တာဏာနိ။ပေ.။ အန္တရိကာ ဝါတိ? န ဟေဝံ ဝတ္တဗ္ဗေ။ပေ.။။
ဝေဒနာယ ဝေဒနတာ, နနု ဝေဒနတာ။ပေ.။ သညာယ သညတာ, နနု သညတာ။ပေ.။ သင်္ခါရာနံ သင်္ခါရတာ, နနု သင်္ခါရတာ။ပေ.။ ဝိညာဏဿ ဝိညာဏတာ, နနု ဝိညာဏတာ အသင်္ခတာတိ? အာမန္တာ။ နိဗ္ဗာနံ။ပေ.။ အမတန္တိ? န ဟေဝံ ဝတ္တဗ္ဗေ ။ပေ.။။
ရူပဿ ရူပတာ, နနု ရူပတာ။ပေ.။ ဝိညာဏဿ ဝိညာဏတာ, နနု ဝိညာဏတာ အသင်္ခတာ, နိဗ္ဗာနံ အသင်္ခတန္တိ? အာမန္တာ။ ဆ အသင်္ခတာနီတိ? န ဟေဝံ ဝတ္တဗ္ဗေ။ပေ.။ ဆ အသင်္ခတာနီတိ? အာမန္တာ။ ဆ တာဏာနိ။ပေ.။ အန္တရိကာ ဝါတိ? န ဟေဝံ ဝတ္တဗ္ဗေ။ပေ.။။
၈၄၃. န ဝတ္တဗ္ဗံ – ‘‘သဗ္ဗဓမ္မာနံ တထတာ အသင်္ခတာ’’တိ? အာမန္တာ။ သဗ္ဗဓမ္မာနံ တထတာ ရူပံ။ ဝေဒနာ။ သညာ။ သင်္ခါရာ။ ဝိညာဏန္တိ? န ဟေဝံ ဝတ္တဗ္ဗေ ။ တေန ဟိ သဗ္ဗဓမ္မာနံ တထတာ အသင်္ခတာတိ။
တထတာကထာ နိဋ္ဌိတာ။
၁၉. ဧကူနဝီသတိမဝဂ္ဂေါ
(၁၉၁) ၆. ကုသလကထာ
၈၄၄. နိဗ္ဗာနဓါတု ကုသလာတိ? အာမန္တာ။ သာရမ္မဏာ, အတ္ထိ တာယ အာဝဋ္ဋနာ။ပေ.။ ပဏိဓီတိ? န ဟေဝံ ဝတ္တဗ္ဗေ။ပေ.။ နနု အနာရမ္မဏာ, နတ္ထိ တာယ အာဝဋ္ဋနာ။ပေ.။ ပဏိဓီတိ? အာမန္တာ။ ဟဉ္စိ အနာရမ္မဏာ, နတ္ထိ တာယ အာဝဋ္ဋနာ။ပေ.။ ပဏိဓိ, နော စ ဝတ ရေ ဝတ္တဗ္ဗေ – ‘‘နိဗ္ဗာနဓါတု ကုသလာ’’တိ။
၈၄၅. အလောဘော ကုသလော သာရမ္မဏော, အတ္ထိ တဿ အာဝဋ္ဋနာ။ပေ.။ ပဏိဓီတိ? အာမန္တာ။ နိဗ္ဗာနဓါတု ကုသလာ သာရမ္မဏာ, အတ္ထိ တာယ အာဝဋ္ဋနာ။ပေ.။ ပဏိဓီတိ? န ဟေဝံ ဝတ္တဗ္ဗေ ။ပေ.။ အဒေါသော ကုသလော။ပေ.။ အမောဟော ကုသလော။ပေ.။ သဒ္ဓါ။ ဝီရိယံ။ သတိ။ သမာဓိ။ပေ.။ ပညာ ကုသလာ သာရမ္မဏာ, အတ္ထိ တာယ အာဝဋ္ဋနာ။ပေ.။ ပဏိဓီတိ? အာမန္တာ။ နိဗ္ဗာနဓါတု ကုသလာ သာရမ္မဏာ, အတ္ထိ တာယ အာဝဋ္ဋနာ။ပေ.။ ပဏိဓီတိ? န ဟေဝံ ဝတ္တဗ္ဗေ။ပေ.။။
နိဗ္ဗာနဓါတု ကုသလာ အနာရမ္မဏာ, နတ္ထိ တာယ အာဝဋ္ဋနာ။ပေ.။ ပဏိဓီတိ? အာမန္တာ ။ အလောဘော ကုသလော အနာရမ္မဏော, နတ္ထိ တဿ အာဝဋ္ဋနာ။ပေ.။ ပဏိဓီတိ? န ဟေဝံ ဝတ္တဗ္ဗေ။ပေ.။ နိဗ္ဗာနဓါတု ကုသလာ အနာရမ္မဏာ, နတ္ထိ တာယ အာဝဋ္ဋနာ။ပေ.။ ပဏိဓီတိ? အာမန္တာ ။ အဒေါသော ကုသလော။ပေ.။ အမောဟော ကုသလော။ပေ.။ သဒ္ဓါ။ ဝီရိယံ။ သတိ။ သမာဓိ။ပေ.။ ပညာ ကုသလာ အနာရမ္မဏာ, နတ္ထိ တာယ အာဝဋ္ဋနာ။ပေ.။ ပဏိဓီတိ? န ဟေဝံ ဝတ္တဗ္ဗေ။ပေ.။။
၈၄၆. န ဝတ္တဗ္ဗံ – ‘‘နိဗ္ဗာနဓါတု ကုသလာ’’တိ? အာမန္တာ။ နနု နိဗ္ဗာနဓါတု အနဝဇ္ဇာတိ? အာမန္တာ။ ဟဉ္စိ နိဗ္ဗာနဓါတု အနဝဇ္ဇာ, တေန ဝတ ရေ ဝတ္တဗ္ဗေ – ‘‘နိဗ္ဗာနဓါတု ကုသလာ’’တိ။
ကုသလကထာ နိဋ္ဌိတာ။
၁၉. ဧကူနဝီသတိမဝဂ္ဂေါ
(၁၉၂) ၇. အစ္စန္တနိယာမကထာ
၈၄၇. အတ္ထိ ပုထုဇ္ဇနဿ အစ္စန္တနိယာမတာတိ? အာမန္တာ။ မာတုဃာတကော အစ္စန္တနိယတော, ပိတုဃာတကော။ပေ.။ အရဟန္တဃာတကော။ပေ.။ ရုဟိရုပ္ပါဒကော ။ပေ.။ သံဃဘေဒကော အစ္စန္တနိယတောတိ? န ဟေဝံ ဝတ္တဗ္ဗေ။ပေ.။။
၈၄၈. အတ္ထိ ပုထုဇ္ဇနဿ အစ္စန္တနိယာမတာတိ? အာမန္တာ။ အစ္စန္တနိယတဿ ပုဂ္ဂလဿ ဝိစိကိစ္ဆာ ဥပ္ပဇ္ဇေယျာတိ? အာမန္တာ။ ဟဉ္စိ အစ္စန္တနိယတဿ ပုဂ္ဂလဿ ဝိစိကိစ္ဆာ ဥပ္ပဇ္ဇေယျ, နော စ ဝတ ရေ ဝတ္တဗ္ဗေ – ‘‘အတ္ထိ ပုထုဇ္ဇနဿ အစ္စန္တနိယာမတာ’’တိ။
အစ္စန္တနိယတဿ ပုဂ္ဂလဿ ဝိစိကိစ္ဆာ နုပ္ပဇ္ဇေယျာတိ? အာမန္တာ။ ပဟီနာတိ? န ဟေဝံ ဝတ္တဗ္ဗေ။ပေ.။ ပဟီနာတိ? အာမန္တာ။ သောတာပတ္တိမဂ္ဂေနာတိ? န ဟေဝံ ဝတ္တဗ္ဗေ။ပေ.။ သကဒါဂါမိမဂ္ဂေန ။ပေ.။ အနာဂါမိမဂ္ဂေန။ပေ.။ အရဟတ္တမဂ္ဂေနာတိ? န ဟေဝံ ဝတ္တဗ္ဗေ။ပေ.။။
ကတမေန မဂ္ဂေနာတိ? အကုသလေန မဂ္ဂေနာတိ။ အကုသလော မဂ္ဂေါ နိယျာနိကော ခယဂါမီ ဗောဓဂါမီ အနာသဝေါ။ပေ.။ အသံကိလေသိကောတိ? န ဟေဝံ ဝတ္တဗ္ဗေ။ပေ.။ နနု အကုသလော မဂ္ဂေါ အနိယျာနိကော။ပေ.။ သံကိလေသိကောတိ? အာမန္တာ။ ဟဉ္စိ အကုသလော မဂ္ဂေါ အနိယျာနိကော။ပေ.။ သံကိလေသိကော, နော စ ဝတ ရေ ဝတ္တဗ္ဗေ – ‘‘အစ္စန္တနိယတဿ ပုဂ္ဂလဿ ဝိစိကိစ္ဆာ အကုသလေန မဂ္ဂေန ပဟီနာ’’တိ။
၈၄၉. သဿတဒိဋ္ဌိယာ နိယတဿ ပုဂ္ဂလဿ ဥစ္ဆေဒဒိဋ္ဌိ ဥပ္ပဇ္ဇေယျာတိ? အာမန္တာ။ ဟဉ္စိ သဿတဒိဋ္ဌိယာ နိယတဿ ပုဂ္ဂလဿ ဥစ္ဆေဒဒိဋ္ဌိ ဥပ္ပဇ္ဇေယျ, နော စ ဝတ ရေ ဝတ္တဗ္ဗေ – ‘‘အတ္ထိ ပုထုဇ္ဇနဿ အစ္စန္တနိယာမတာ’’တိ။
သဿတဒိဋ္ဌိယာ နိယတဿ ပုဂ္ဂလဿ ဥစ္ဆေဒဒိဋ္ဌိ နုပ္ပဇ္ဇေယျာတိ ? အာမန္တာ။ ပဟီနာတိ? န ဟေဝံ ဝတ္တဗ္ဗေ။ပေ.။ ပဟီနာတိ? အာမန္တာ။ သောတာပတ္တိမဂ္ဂေနာတိ? န ဟေဝံ ဝတ္တဗ္ဗေ။ပေ.။ သကဒါဂါမိမဂ္ဂေန။ပေ.။ အနာဂါမိမဂ္ဂေန။ပေ.။ အရဟတ္တမဂ္ဂေနာတိ? န ဟေဝံ ဝတ္တဗ္ဗေ။ပေ.။။
ကတမေန မဂ္ဂေနာတိ? အကုသလေန မဂ္ဂေန။ အကုသလော မဂ္ဂေါ။ပေ.။ နော စ ဝတ ရေ ဝတ္တဗ္ဗေ – ‘‘သဿတဒိဋ္ဌိယာ နိယတဿ ပုဂ္ဂလဿ ဥစ္ဆေဒဒိဋ္ဌိ အကုသလေန မဂ္ဂေန ပဟီနာ’’တိ။
၈၅၀. ဥစ္ဆေဒဒိဋ္ဌိယာ နိယတဿ ပုဂ္ဂလဿ သဿတဒိဋ္ဌိ ဥပ္ပဇ္ဇေယျာတိ? အာမန္တာ။ ဟဉ္စိ ဥစ္ဆေဒဒိဋ္ဌိယာ နိယတဿ ပုဂ္ဂလဿ သဿတဒိဋ္ဌိ ဥပ္ပဇ္ဇေယျ, နော စ ဝတ ရေ ဝတ္တဗ္ဗေ – ‘‘အတ္ထိ ပုထုဇ္ဇနဿ အစ္စန္တနိယာမတာ’’တိ။
ဥစ္ဆေဒဒိဋ္ဌိယာ နိယတဿ ပုဂ္ဂလဿ သဿတဒိဋ္ဌိ နုပ္ပဇ္ဇေယျာတိ? အာမန္တာ။ ပဟီနာတိ? န ဟေဝံ ဝတ္တဗ္ဗေ။ပေ.။ ပဟီနာတိ? အာမန္တာ။ သောတာပတ္တိမဂ္ဂေနာတိ ? န ဟေဝံ ဝတ္တဗ္ဗေ ။ပေ.။ သကဒါဂါမိမဂ္ဂေန။ပေ.။ အနာဂါမိမဂ္ဂေန။ပေ.။ အရဟတ္တမဂ္ဂေနာတိ? န ဟေဝံ ဝတ္တဗ္ဗေ။ပေ.။။
ကတမေန မဂ္ဂေနာတိ? အကုသလေန မဂ္ဂေနာတိ။ အကုသလော မဂ္ဂေါ။ပေ.။ နော စ ဝတ ရေ ဝတ္တဗ္ဗေ – ‘‘ဥစ္ဆေဒဒိဋ္ဌိယာ နိယတဿ ပုဂ္ဂလဿ သဿတဒိဋ္ဌိ အကုသလေန မဂ္ဂေန ပဟီနာ’’တိ။
၈၅၁. န ဝတ္တဗ္ဗံ – ‘‘အတ္ထိ ပုထုဇ္ဇနဿ အစ္စန္တနိယာမတာ’’တိ? အာမန္တာ။ နနု ဝုတ္တံ ဘဂဝတာ – ‘‘ဣဓ, ဘိက္ခဝေ, ဧကစ္စော ပုဂ္ဂလော သမန္နာဂတော ဟောတိ ဧကန္တကာဠကေဟိ အကုသလေဟိ ဓမ္မေဟိ, သော [ဧဝံ ခေါ ဘိက္ခဝေ ပုဂ္ဂလော (အ. နိ. ၇.၁၅)] သကိံ နိမုဂ္ဂေါ နိမုဂ္ဂေါဝ ဟောတီ’’တိ [အ. နိ. ၇.၁၅]! အတ္ထေဝ သုတ္တန္တောတိ? အာမန္တာ။ တေန ဟိ အတ္ထိ ပုထုဇ္ဇနဿ အစ္စန္တနိယာမတာတိ။
၈၅၂. ဝုတ္တံ ဘဂဝတာ – ‘‘ဣဓ, ဘိက္ခဝေ, ဧကစ္စော ပုဂ္ဂလော သမန္နာဂတော ဟောတိ ဧကန္တကာဠကေဟိ အကုသလေဟိ ဓမ္မေဟိ, သော သကိံ နိမုဂ္ဂေါ နိမုဂ္ဂေါဝ ဟောတီ’’တိ ကတွာ တေန စ ကာရဏေန အတ္ထိ ပုထုဇ္ဇနဿ အစ္စန္တနိယာမတာတိ? အာမန္တာ။ ဝုတ္တံ ဘဂဝတာ – ‘‘ဣဓ, ဘိက္ခဝေ, ဧကစ္စော ပုဂ္ဂလော ဥမ္မုဇ္ဇိတွာ နိမုဇ္ဇတီ’’တိ [အ. နိ. ၇.၁၅]! အတ္ထေဝ သုတ္တန္တောတိ? အာမန္တာ။ သဗ္ဗကာလံ ဥမ္မုဇ္ဇိတွာ နိမုဇ္ဇတီတိ? န ဟေဝံ ဝတ္တဗ္ဗေ။ပေ.။။
ဝုတ္တံ ဘဂဝတာ – ‘‘ဣဓ, ဘိက္ခဝေ, ဧကစ္စော ပုဂ္ဂလော သမန္နာဂတော ဟောတိ ဧကန္တကာဠကေဟိ အကုသလေဟိ ဓမ္မေဟိ, သော သကိံ နိမုဂ္ဂေါ နိမုဂ္ဂေါဝ ဟောတီ’’တိ – ကတွာ တေန စ ကာရဏေန အတ္ထိ ပုထုဇ္ဇနဿ အစ္စန္တနိယာမတာတိ? အာမန္တာ။ ဝုတ္တံ ဘဂဝတာ – ‘‘ဣဓ, ဘိက္ခဝေ, ဧကစ္စော ပုဂ္ဂလော ဥမ္မုဇ္ဇိတွာ ဌိတော ဟောတိ, ဥမ္မုဇ္ဇိတွာ ဝိပဿတိ ဝိလောကေတိ, ဥမ္မုဇ္ဇိတွာ ပတရတိ, ဥမ္မုဇ္ဇိတွာ ပတိဂါဓပ္ပတ္တော ဟောတီ’’တိ [အ. နိ. ၇.၁၅]! အတ္ထေဝ သုတ္တန္တောတိ? အာမန္တာ။ သဗ္ဗကာလံ ဥမ္မုဇ္ဇိတွာ ပတိဂါဓပ္ပတ္တော ဟောတီတိ? န ဟေဝံ ဝတ္တဗ္ဗေ။ပေ.။။
အစ္စန္တနိယာမကထာ နိဋ္ဌိတာ။
၁၉. ဧကူနဝီသတိမဝဂ္ဂေါ
(၁၉၃) ၈. ဣန္ဒ္ရိယကထာ
၈၅၃. နတ္ထိ လောကိယံ သဒ္ဓိန္ဒ္ရိယန္တိ? အာမန္တာ။ နတ္ထိ လောကိယာ သဒ္ဓါတိ? န ဟေဝံ ဝတ္တဗ္ဗေ။ပေ.။ နတ္ထိ လောကိယံ ဝီရိယိန္ဒ္ရိယံ။ပေ.။ သတိန္ဒ္ရိယံ။ပေ.။ သမာဓိန္ဒ္ရိယံ။ပေ.။ ပညိန္ဒ္ရိယန္တိ? အာမန္တာ ။ နတ္ထိ လောကိယာ ပညာတိ? န ဟေဝံ ဝတ္တဗ္ဗေ။ပေ.။။
အတ္ထိ လောကိယာ သဒ္ဓါတိ? အာမန္တာ။ အတ္ထိ လောကိယံ သဒ္ဓိန္ဒ္ရိယန္တိ? န ဟေဝံ ဝတ္တဗ္ဗေ။ပေ.။ အတ္ထိ လောကိယံ ဝီရိယံ။ပေ.။ သတိ။ပေ.။ သမာဓိ။ပေ.။ ပညာတိ? အာမန္တာ။ အတ္ထိ လောကိယံ ပညိန္ဒ္ရိယန္တိ? န ဟေဝံ ဝတ္တဗ္ဗေ။ပေ.။။
အတ္ထိ လောကိယော မနော, အတ္ထိ လောကိယံ မနိန္ဒ္ရိယန္တိ? အာမန္တာ။ အတ္ထိ လောကိယာ သဒ္ဓါ, အတ္ထိ လောကိယံ သဒ္ဓိန္ဒ္ရိယန္တိ? န ဟေဝံ ဝတ္တဗ္ဗေ။ပေ.။ အတ္ထိ လောကိယော မနော, အတ္ထိ လောကိယံ မနိန္ဒ္ရိယန္တိ? အာမန္တာ။ အတ္ထိ လောကိယာ ပညာ, အတ္ထိ လောကိယံ ပညိန္ဒ္ရိယန္တိ? န ဟေဝံ ဝတ္တဗ္ဗေ။ပေ.။။
အတ္ထိ လောကိယံ သောမနဿံ, အတ္ထိ လောကိယံ သောမနဿိန္ဒ္ရိယံ။ပေ.။ အတ္ထိ လောကိယံ ဇီဝိတံ, အတ္ထိ လောကိယံ ဇီဝိတိန္ဒ္ရိယန္တိ? အာမန္တာ။ အတ္ထိ လောကိယာ သဒ္ဓါ, အတ္ထိ လောကိယံ သဒ္ဓိန္ဒ္ရိယန္တိ? န ဟေဝံ ဝတ္တဗ္ဗေ။ပေ.။ အတ္ထိ လောကိယံ ဇီဝိတံ, အတ္ထိ လောကိယံ ဇီဝိတိန္ဒ္ရိယန္တိ? အာမန္တာ။ အတ္ထိ လောကိယာ ပညာ, အတ္ထိ လောကိယံ ပညိန္ဒ္ရိယန္တိ? န ဟေဝံ ဝတ္တဗ္ဗေ။ပေ.။။
၈၅၄. အတ္ထိ လောကိယာ သဒ္ဓါ, နတ္ထိ လောကိယံ သဒ္ဓိန္ဒ္ရိယန္တိ? အာမန္တာ။ အတ္ထိ လောကိယော မနော, နတ္ထိ လောကိယံ မနိန္ဒ္ရိယန္တိ? န ဟေဝံ ဝတ္တဗ္ဗေ။ပေ.။ အတ္ထိ လောကိယာ ပညာ, နတ္ထိ လောကိယံ ပညိန္ဒ္ရိယန္တိ? အာမန္တာ။ အတ္ထိ လောကိယော မနော, နတ္ထိ လောကိယံ မနိန္ဒ္ရိယန္တိ? န ဟေဝံ ဝတ္တဗ္ဗေ။ပေ.။။
အတ္ထိ လောကိယာ သဒ္ဓါ, နတ္ထိ လောကိယံ သဒ္ဓိန္ဒ္ရိယန္တိ? အာမန္တာ ။ အတ္ထိ လောကိယံ သောမနဿံ, နတ္ထိ လောကိယံ သောမနဿိန္ဒ္ရိယန္တိ။ အတ္ထိ လောကိယံ ဇီဝိတံ, နတ္ထိ လောကိယံ ဇီဝိတိန္ဒ္ရိယန္တိ? န ဟေဝံ ဝတ္တဗ္ဗေ။ပေ.။ အတ္ထိ လောကိယာ ပညာ, နတ္ထိ လောကိယံ ပညိန္ဒ္ရိယန္တိ? အာမန္တာ။ အတ္ထိ လောကိယော မနော, နတ္ထိ လောကိယံ မနိန္ဒ္ရိယန္တိ။ပေ.။ အတ္ထိ လောကိယံ ဇီဝိတံ, နတ္ထိ လောကိယံ ဇီဝိတိန္ဒ္ရိယန္တိ? န ဟေဝံ ဝတ္တဗ္ဗေ။ပေ.။။
၈၅၅. အတ္ထိ လောကုတ္တရာ သဒ္ဓါ, အတ္ထိ လောကုတ္တရံ သဒ္ဓိန္ဒ္ရိယန္တိ? အာမန္တာ။ အတ္ထိ လောကိယာ သဒ္ဓါ, အတ္ထိ လောကိယံ သဒ္ဓိန္ဒ္ရိယန္တိ? န ဟေဝံ ဝတ္တဗ္ဗေ။ပေ.။ အတ္ထိ လောကုတ္တရံ ဝီရိယံ။ပေ.။ အတ္ထိ လောကုတ္တရာ ပညာ, အတ္ထိ လောကုတ္တရံ ပညိန္ဒ္ရိယန္တိ? အာမန္တာ။ အတ္ထိ လောကိယာ ပညာ, အတ္ထိ လောကိယံ ပညိန္ဒ္ရိယန္တိ? န ဟေဝံ ဝတ္တဗ္ဗေ။ပေ.။။
အတ္ထိ လောကိယာ သဒ္ဓါ, နတ္ထိ လောကိယံ သဒ္ဓိန္ဒ္ရိယန္တိ? အာမန္တာ။ အတ္ထိ လောကုတ္တရာ သဒ္ဓါ, နတ္ထိ လောကုတ္တရံ သဒ္ဓိန္ဒ္ရိယန္တိ? န ဟေဝံ ဝတ္တဗ္ဗေ။ပေ.။ အတ္ထိ လောကိယံ ဝီရိယံ။ပေ.။ အတ္ထိ လောကိယာ ပညာ, နတ္ထိ လောကိယံ ပညိန္ဒ္ရိယန္တိ? အာမန္တာ။ အတ္ထိ လောကုတ္တရာ ပညာ, နတ္ထိ လောကုတ္တရံ ပညိန္ဒ္ရိယန္တိ? န ဟေဝံ ဝတ္တဗ္ဗေ။ပေ.။။
၈၅၆. နတ္ထိ လောကိယာနိ ပဉ္စိန္ဒ္ရိယာနီတိ? အာမန္တာ။ နနု ဝုတ္တံ ဘဂဝတာ – ‘‘အဒ္ဒသံ ခေါ အဟံ, ဘိက္ခဝေ, ဗုဒ္ဓစက္ခုနာ လောကံ ဝေါလောကေန္တော သတ္တေ အပ္ပရဇက္ခေ မဟာရဇက္ခေ, တိက္ခိန္ဒ္ရိယေ မုဒိန္ဒ္ရိယေ, သွာကာရေ, သုဝိညာပယေ , အပ္ပေကစ္စေ ပရလောကဝဇ္ဇဘယဒဿာဝိနော ဝိဟရန္တေ’’တိ [မ. နိ. ၁.၂၈၃ တတ္ထ ‘‘ဒွါကာရေ ဒုဝိညာပယေ’’ ဣစ္စာဒီနိပိ ပဒါနိ ဒိဿန္တိ]! အတ္ထေဝ သုတ္တန္တောတိ? အာမန္တာ။ တေန ဟိ အတ္ထိ လောကိယာနိ ပဉ္စိန္ဒ္ရိယာနီတိ။
ဣန္ဒ္ရိယကထာ နိဋ္ဌိတာ။
ဧကူနဝီသတိမဝဂ္ဂေါ။
တဿုဒ္ဒါနံ –
အတီတေ ကိလေသေ ဇဟတိ အနာဂတေ ကိလေသေ ဇဟတိ ပစ္စုပ္ပန္နေ ကိလေသေ ဇဟတိ, သုညတာ သင်္ခါရက္ခန္ဓပရိယာပန္နာ, သာမညဖလံ အသင်္ခတံ, ပတ္တိ အသင်္ခတာ, သဗ္ဗဓမ္မာနံ တထတာ အသင်္ခတာ, နိဗ္ဗာနဓါတု ကုသလာ, အတ္ထိ ပုထုဇ္ဇနဿ အစ္စန္တနိယာမတာ, နတ္ထိ လောကိယာနိ ပဉ္စိန္ဒ္ရိယာနီတိ။